ក្រុមហ៊ុន​Space X របស់​មហាសេដ្ឋី Elon Musk មានគ្រោង​វិនិយោគក្នុងទំហំទឹកប្រាក់​១៥០០លាន​ដុល្លារ​នៅ​ប្រទេស​វៀតណាម។ យោងតាម​ការចុះផ្សាយ​របស់​កាសែត​ក្នុងស្រុកវៀតណាម ឆ្លៀត​ឱកាស​ចូលរួម​ក្នុងមហាសន្និបាត​អង្គការ​សហប្រជាជាតិ នៅទីក្រុង​ញូវយ៉ក កាលពីថ្ងៃ​ពុធទី ២៥ កញ្ញា អគ្គលេខាធិការបក្សកុម្មុយនិស្ត​វៀតណាម​បានជួប​ពិភាក្សា​ជាមួយ ប្រធានផ្នែកកិច្ចការជាមួយ​រដ្ឋាភិបាល​ របស់​ក្រុមហ៊ុន​អាមេរិក​ Space X ដែលបានលើកតម្រុយថា ក្រុមហ៊ុន​របស់​មហាសេដ្ឋី​Elon Musk គ្រោ​ងចង់វិនិយោគ​លើ​បណ្តាញ​អ៊ីនធ័រនែត​របស់វៀតណាម នៅអនាគត​ខាងមុខ។

ក្រុមហ៊ុន​Space X របស់​មហាសេដ្ឋី Elon Musk មានគ្រោង​វិនិយោគក្នុងទំហំទឹកប្រាក់​១៥០០លាន​ដុល្លារ​នៅ​ប្រទេស​វៀតណាម។ យោងតាម​ការចុះផ្សាយ​របស់​កាសែត​ក្នុងស្រុកវៀតណាម ឆ្លៀត​ឱកាស​ចូលរួម​ក្នុងមហាសន្និបាត​អង្គការ​សហប្រជាជាតិ នៅទីក្រុង​ញូវយ៉ក កាលពីថ្ងៃ​ពុធទី ២៥ កញ្ញា អគ្គលេខាធិការបក្សកុម្មុយនិស្ត​វៀតណាម​បានជួប​ពិភាក្សា​ជាមួយ ប្រធានផ្នែកកិច្ចការជាមួយ​រដ្ឋាភិបាល​ របស់​ក្រុមហ៊ុន​អាមេរិក​ Space X ដែលបានលើកតម្រុយថា ក្រុមហ៊ុន​របស់​មហាសេដ្ឋី​Elon Musk គ្រោ​ងចង់វិនិយោគ​លើ​បណ្តាញ​អ៊ីនធ័រនែត​របស់វៀតណាម នៅអនាគត​ខាងមុខ។

នៅក្នុងឱកាសជំនួបក្រៅផ្លូវការមួយក្នុងក្រុងញូយ៉កនាថ្ងៃទី២៤កញ្ញា ប្រមុខការទូតវៀតណាមលោក Bui Thanh Son បានបញ្ជាក់ជាថ្មីពីការប្តេជ្ញាចិត្តរបស់វៀតណាមក្នុងការបង្កើនកិច្ចសហប្រតិបត្តិការ និងការអភិវឌ្ឍន៍រួមគ្នាជាមួយឡាវ និងកម្ពុជា។ នេះបើយោងតាមការចុះផ្សាយរបស់កាសែតរដ្ឋវៀតណាម Vietnam Plus នៅថ្ងៃទី២៥កញ្ញា។ តាម Vietnam Plus ប្រមុខការទូតកម្ពុជាលោក សុខ ចិន្តាសោភាក៏បានបញ្ជាក់ថា ការដែលកម្ពុជាដកខ្លួនចេញពីកិច្ចសហការតំបន់អភិវឌ្ឍតំបន់ត្រីកោណ CLV-DTA មិនប៉ះពាល់ដល់យន្តការកិច្ចសហប្រតិបត្តិការផ្សេងទៀតនៅក្នុងក្របខ័ណ្ឌទ្វេភាគី ឬត្រីភាគីរវាងប្រទេសជិតខាងទាំង២ទេ។

ក្នុងរយៈពេលជិត១២០ថ្ងៃ អាជ្ញាធរថៃបានចាប់ខ្លួនពលករខ្មែរខុសច្បាប់ជិត៤ម៉ឺននាក់។ នេះបើតាមក្រសួងការងារថៃដែលបានបូកសរុបតួលេខពលករខុសច្បាប់ឆ្លងដែនចូលទឹកដីរបស់ខ្លួន។ តាមក្រសួងការងារថៃ កម្ពុជាជាប្រទេសទី២ដែលមានពលករខុសច្បាប់ច្រើនឆ្លងចូលទឹកដីខ្លួន បន្ទាប់ពីប្រទេសភូមា។

នៅថ្ងៃព្រហស្បតិ៍ ទី២៦ កញ្ញានេះ សមាគមក្នុងស្រុកចំនួន៣ បានឯកភាពគ្នាជាមួយរដ្ឋបាលគយចិនក្នុងខេត្តគ័ងហ្ស៊ីដើម្បីនាំចូលទំនិញស្វាយចន្ទី ត្រចៀកកាំ និងដំឡូងមីដោយមិនចាំបាច់ឆ្លងកាត់ប្រទេសទី៣។ សមាគមស្វាយចន្ទីកម្ពុជាបានអះអាងពីភាពជោគជ័យនៃសកិច្ចព្រមព្រៀងមួយនេះ ព្រោះវានឹងជួយសម្រួលការនាំចេញទំនិញទៅកាន់ប្រទេសចិនដោយគ្មានភាពស្មុគស្មាញ។

នៅលីបង់ កងទ័ពអ៊ីស្រាអែល​នៅបន្ត​វាយប្រហារ​យ៉ាងសន្ធប់​​នៅ​បីថ្ងៃជាប់ៗគ្នា ទៅលើ​ទីតាំង​យោធា​របស់​ក្រុមហេសបូឡា​ភាគខាងត្បូង​លីបង់។ ក្រៅតែ​ពី​សម្លាប់មនុស្ស​ជាង ៦០០នាក់ ដែលក្នុងនោះ មានទាំងប្រជាជនស៊ីវិល ស្រ្តីនិងកុមារ ការវាយប្រហារ​ផ្លូវអាកាសរបស់អ៊ីស្រាអែល ដែលឈាន​ចូលដល់​ថ្ងៃទី​៤ នៅត្រឹម​ថ្ងៃព្រហស្បតិ៍ទី ២៦​​កញ្ញា​បាន​ធ្វើ​ឲ្យ​ប្រជាជន​លីបង់​ជាង​៩ម៉ឺននាក់​រត់ភៀសខ្លួន​ពីតំបន់​ខាងត្បូង។ នៅចំពោះ​មុខសង្រ្គាម​រាលដាល​ចូល​ទឹកដី​លីបង់ ដែល​នឹង​អាច​រាលដាល​ទៅជា​សង្រ្គាម​បើកចំហនៅក្នុង​តំបន់ បារាំង និងអាមេរិកដែល​ជាសម្ព័ន្ធមិត្ត​របស់​អ៊ីស្រាអែល​បានអំពាវនាវកាលពីយប់​ថ្ងៃ​ពុធម្សិលមិញ​​ឲ្យមាន​បទឈប់​បាញ់​រយៈពេល ២១ថ្ងៃ ដើម្បី​បើកផ្លូវ​ឲ្យមានការចរចា​តាមផ្លូវទូត។ ប៉ុន្តែ ពាក្យអំពាវនាវ​របស់​សម្ព័ន្ធមិត្ត​អ៊ីស្រាអែល​ស្លាប់​មុន​កើត ព្រោះថា កងទ័ព​អ៊ីស្រាអែល​បាន​ប្រកាស​នៅថ្ងៃ​ពុធ​ដដែល​​ ពីគម្រោង​បើកការវាយប្រហារ​តាមផ្លូវគោក​ចូល​ទឹកដី​លីបង់ ដើម្បីគាស់រំលើង​ក្រុមហេសបូឡា នៅភាគខាងត្បូងលីបង់។

  នៅថ្ងៃ​ទី​២៥ ​ខែ​កញ្ញា ​ឆ្នាំ​២០២៤ ​សាលាដំបូង​រាជធានី​ភ្នំពេញ​បានចេញសេចក្តី​ប្រកាស​សាលក្រម​ផ្តន្ទាទោស​ជនជាប់​ចោទឈ្មោះ ​នាង សំអូន ​ដាក់ក្នុង​ពន្ធនាគារ​ចំនួន ៥ឆ្នាំ ​និង​ពិន័យជាប្រាក់​ចំនួន​២០​លានរៀល​។ នាង សំអូន ​បានជាប់ចោទ​ពីបទ​បើកបរ​ក្រោម​ឥទ្ធិពល​គ្រឿងស្រវឹង ​បង្កគ្រោះថ្នាក់​បណ្តាលឲ្យ​ស្លាប់​មនុស្ស​ចំនួន ​៤នាក់ ​នៅ​ចំណុច​ស្ពាន​ឬស្សីកែវ ​កាលពី​ខែ​មករា​ ឆ្នាំ​២០២៤​។ ​តាម​តុលាការ ​នេះជាកម្រិត​អតិបរមា​ដោយយោង​លើ​មាត្រា៨៣ ​និង​មាត្រា​៨៥ នៃ​ច្បាប់​ស្តីពី​ចរាចរណ៍​ផ្លូវគោក​។ ​តែលោកនាយក​រដ្ឋមន្ត្រី ​ហ៊ុន ម៉ាណែត ​បានបញ្វេញ​ប្រតិកម្ម​នៅថ្ងៃទី​២៦ ខែ​កញ្ញានេះ ​ដោយស្នើឲ្យ​រដ្ឋមន្ត្រី​ក្រសួងយុត្តិធម៌​ប្រើ​អធិបញ្ជា​ប្តឹងទៅ​សាលាឧទ្ធរណ៍ ​និង​ពិនិត្យមើល​ឡើងវិញ​ពីការ​ធ្វើវិសោធនកម្ម​ច្បាប់​សំដៅដាក់ទោស​អ្នក​ប្រព្រឹត្តខុស​ឲ្យធ្ងន់ធ្ងរ​ ប្រសិនបើ​ច្បាប់​បច្ចុប្បន្ន​មានកម្រិត​ទោសទណ្ឌ​ស្រាលពេក​។ ​តើទម្ងន់ទោស​កម្រិតណា​ដែល ​នាង សំអូន ​ត្រូវទទួល​នៅក្នុង​ទង្វើរបស់ខ្លួន​?

ហេតុការណ៍នៃការបាត់ស្រុតដីផ្លូវមាត់ប្រឡាយស្ទឹងមានជ័យក្នុងថ្ងៃចន្ទទី២៣កញ្ញាបានបង្កជាក្តីកង្វល់យ៉ាងខ្លាំងដល់ប្រជាពលរដ្ឋដែលកំពុងរស់នៅទីនោះ។ ពួកគេសម្តែងក្តីកង្វល់ពីការហូរច្រោះដីបន្ថែមទៀត ប្រសិនបើអាជ្ញាធរមិនរួសរាន់ជួសជុលឲ្យទាន់ពេល។ ក្នុងន័យនេះ ពួកគេបានស្នើឲ្យអាជ្ញាធរពន្លឿនការជួសជុលផ្លូវឡើងវិញដើម្បីបង្កភាពងាយស្រួលដល់ការធ្វើដំណើរ  និងការបើកអាជីវកម្មជាថ្មី។

នៅ​អឺរ៉ុប ក្មេង​ជំទង់ប្រើប្រាស់បណ្តាញទាក់ទង​សង្គមតាមប្រព័ន្ធអ៊ីនធ័រនែត កាន់តែ​ចំនួន​ច្រើន​ឡើងៗ ហើយ​ពួក​គេ​ក៏​កាន់តែ​លេចចេញ​រោគសញ្ញា មាន​​បញ្ហា​ផ្លូវ​ចិត្ត​ និង​បញ្ហា​អត្តចរិត ក៏ច្រើនឡើង​ៗដែរ។ ការ​ឈ្លក់ញៀន​ល្បែង​ហ្គែម តាម​អនឡាន​និង​នៅតាម​បណ្តាញ​សង្គមនីមួយៗនោះ ក៏​កាន់តែ​លំបាក​ទប់​ស្កាត់​ថែមទៀត។ ជា​ផលវិបាក​ជាក់ស្តែង ការសិក្សារៀន​សូត្រ​​របស់​ពួក​គេ​ធ្លាក់​ចុះ​ខ្លាំង ហើយត្រូវ​​​ប្រឈម​នឹង​វិបត្តិ​ជំងឺ​ផ្លូវចិត្ត​។ ​អង្គការ​សុខភាព​ពិភពលោក​ប្រចាំតំបន់​អឺរ៉ុប ថ្លែងក្តីព្រួយបារម្ភ និង​ជំរុញឲ្យ​រដ្ឋាភិបាល​ទាំងឡាយ រក​ដំណោះស្រាយ​ជាបន្ទាន់ ដើម្បីស្រោច​ស្រង់​សុខភាព​ផ្លូវ​ចិត្ត​របស់​យុវជន​​។​

ក្រុមហ៊ុនGoogle បានដាក់ពាក្យ​ប្តឹងទៅ​កាន់គណកម្មការអឺរ៉ុប ដោយចោទថាក្រុមហ៊ុន Microsoft បានប្រើយុទ្ធសាស្ត្រប្រកួតប្រជែងមិនស្មោះត្រង់ ក្នុងវិស័យបច្ចេកវិទ្យាCloud។ Google ចោទ​ថា​ Microsoft បានដាក់រនាំងឧបសគ្គ បង្ខំ​ឲ្យ​អតិថិជន​ប្រើប្រាស់​តែ​បច្ចេកវិទ្យាCloud របស់ខ្លួនតែមួយ ដោយ​មិន​ឲ្យ​គេ​អាចមានជម្រើស​ផ្សេង​។ Microsoft អាច​ប្រឈមនឹងការផាកពិន័យប្រាក់ច្រើនរយលានអឺរ៉ូ ពីសំណាក់​គណកម្មការអឺរ៉ុប ដែលជាស្ថាប័ន​មានតួនាទី ​តាមដានការគោរពការប្រកួតជែងដោយស្មោះត្រង់ ក្នុងទីផ្សារអឺរ៉ុប​។

តាមការចុះផ្សាយរបស់ Channel News Asia នាថ្ងៃទី២៥ កញ្ញានេះ ការដែលចិនផ្តល់ជំនួយនាវាចម្បាំងចំនួន ២ គ្រឿងឲ្យកម្ពុជាអាចជាផ្នែកនៃកិច្ចព្រមព្រៀងដើម្បីធានាសិទ្ធិក្នុងការប្រើប្រាស់មូលដ្ឋានទ័ពជើងទឹករាមក្នុងខេត្តព្រះសីហនុ។ ក្នុងន័យនេះ Channel News Asia បានចោទជាសំណួរថា តើចិននឹងត្រូវបង្កើនឥទ្ធិពលយោធារបស់ខ្លួនដល់កម្រិតណា និងត្រូវបញ្ចប់ដោយរបៀបណា?

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ​លើកឡើងថា គណៈកម្មាធិការជាតិអូឡាំពិកកម្ពុជា គ្រោងស្នើទៅរដ្ឋាភិបាលឱ្យបង្កើតងារ «ស្ដេចប្រដាល់គុនចម្រុះបុរាណខ្មែរ» ក្នុងគោលដៅលើកស្ទួយវិស័យកីឡាយុទ្ធគុន។ នេះបើតាមលោក វ៉ាត់ ចំរើន ដែល​ថ្លែង​ក្នុងសន្និសីទសារព័ត៌មាន នៅថ្ងៃទី២៣ ខែកញ្ញា ឆ្នាំ២០២៤។ ថ្នាក់ដឹកនាំ​កីឡារូបនេះ កត់សម្គាល់ឃើញថា កម្ពុជាជួបការលំបាកក្នុងការជំរុញគុនខ្មែរលើឆាកអន្តរជាតិ ដោយហេតុថា កម្ពុជាគ្មានតំណាងសម្រាប់ផ្សព្វផ្សាយ​។ តើការបង្កើតងារ « ស្ដេចប្រដាល់គុនចម្រុះបុរាណខ្មែរ »  អាចជួយ​លើកស្ទួយវិស័យគុនខ្មែរ មែនដែរឬទេ?

ក្រសួង​ការ​ពារជាតិចិន​​ប្រកាស​អំពីការ​បាញ់​​សាកល្បង​មីស៊ីល​បាលីស្ទីកអន្តរទ្វីប​  ដោយ​ជោគជ័យ​នៅថ្ងៃទី​២៥កញ្ញា​នេះ។ ប្រមាណ​ជាង​៤០ឆ្នាំចុងក្រោយ​ រដ្ឋអំណាច​ចិនពុំ​ដែល​បាញ់​សាកល្បង​មីស៊ីល ប្រភេទខ្នាតធំ ដូច​​មីស៊ីល​បាលីស្ទីកអន្តរទ្វីបលើកនេះឡើយ។ ការ​បាញ់​មីស៊ីលរបស់​ចិន​​ ជួន​ចំ​ពេល​ស្ថានការណ៍​នៅក្នុង​តំបន់​អាស៊ី​ ​កំពុងតែពើបប្រទះ​ភាព​​តានតឹង​ខ្លាំង រវាង​ចិននិង​​ហ្វីលីពីន, ចិន​និង​​ជប៉ុន​, ចិននិង​តៃវ៉ាន់ ហើយ​​និង​​ការ​ប្រជែង​ឥទ្ធិពល​គ្នា​ពីសហរដ្ឋអាមេរិក​ថែមទៀត។​ ការ​សាកល្បង​សព្វាវុធ​របស់ចិន​ក៏បានធ្វើឲ្យ​ ជប៉ុន ​ក្បែរខាង សម្តែងក្តី​ព្រួយ​បារម្ភ និង​មិន​សប្បាយចិត្ត​នោះឡើយ។​

ស្រុកចំនួន​៣​ស្ថិតនៅ​ក្នុងខេត្ត​សៀមរាប ​គឺស្រុកជីក្រែង ​ស្រុក​ស្វាយលើ ​និងស្រុក​ប្រាសាទបាគង​បានរងនូវ​ការលិចលង់​ដោយ​ជំនន់ទឹកភ្លៀង​ចាប់តាំងពីថ្ងៃទី២៣​ ខែ​កញ្ញា ឆ្នាំ២០២៤មក​។ មកទល់​ថ្ងៃ​ពុធ ​ទី​២៥ ខែ​កញ្ញានេះ ​ស្រុក​ស្វាយលើ និង​ស្រុក​ប្រាសាទ​បាគង ​បាន​ធូរស្រាល​ពីទឹក​ជំនន់​។ ​លោក​ លី វណ្ណៈ ​អ្នកនាំពាក្យរដ្ឋបាល​សាលាខេត្ត​សៀមរាប​បានប្រាប់​វិទ្យុបារាំង ​RFI នៅថ្ងៃ​នេះថា ទឹកជំនន់​មិនបានធ្វើឲ្យប៉ះពាល់​ដល់​ប្រាសាទបុរាណណាមួយ​នៅក្នុងខេត្តឡើយ​។ ​ដោយឡែក​ចរាចរណ៍តាមដងផ្លូវ​មួយចំនួន​ត្រូវបានបិទ​មិនឲ្យ​រថយន្តធុនធំ​ឆ្លងកាត់នៅថ្ងៃទី​២៥ ខែកញ្ញានេះ។​ សូមស្តាប់ការលើកឡើងរបស់លោក លី វណ្ណៈ ដែលរៀបចំឡើងដោយ ញឹម សុផល៖

«នេត្រា» ជាឈ្មោះពិព័រណ៍គំនូររបស់សិល្បករឈឹម សុធីដែលបានគូរចេញពីតថភាពនៃការរស់នៅរបស់មនុស្សក្នុងសង្គមប្រចាំថ្ងៃ។ ពិព័រណ៌ «នេត្រា» កំពុងដាក់បង្ហាញគំនូរចំនួន ២១ផ្ទាំង ចាប់ពីថ្ងៃទី២១ ខែកញ្ញា ដល់ថ្ងៃទី២០ ខែវិច្ឆិកា ឆ្នាំ២០២៤ ក្នុងវិចិត្រសាលសួនច្បារម្លប់ នៅទីក្រុងភ្នំពេញ។ វិចិត្រករឈឹម សុធី លើកឡើងថា លោកបានប្រើប្រាស់ការស្រមើលស្រមៃខ្ពស់ ដើម្បីប្រមូលអារម្មណ៍ផ្តិតយកទិដ្ឋភាពទាំងនោះមកច្នៃប្រឌិតបង្កើតជាស្នាដៃគំនូរទាំងជាង ២០ផ្ទាំងនេះ។ សូមទស្សនាបទយកការណ៍របស់ ស៊ឹម ចាន់សំណាង៖

ក្រសួង​ការ​ពារជាតិចិន​​ប្រកាស​អំពីការ​បាញ់​​សាកល្បង​មីស៊ីល​បាឡេស្ទីកអន្តរទ្វីប​  ដោយ​ជោគជ័យ​នៅថ្ងៃទី​២៥កញ្ញា​នេះ។ ប្រមាណ​ជាង​៤០ឆ្នាំចុងក្រោយ​ រដ្ឋអំណាច​ចិនពុំ​ដែល​បាញ់​សាកល្បង​មីស៊ីល ប្រភេទខ្នាតធំ ដូច​​មីស៊ីល​បាឡេស្ទីកអន្តរទ្វីបលើកនេះឡើយ។ ការ​បាញ់​មីស៊ីលរបស់​ចិន​​ ជួន​ចំ​ពេល​ស្ថានការណ៍​នៅក្នុង​តំបន់​អាស៊ី​ ​កំពុងតែពើបប្រទះ​ភាព​​តានតឹង​ខ្លាំង រវាង​ចិននិង​​ហ្វីលីពីន, ចិន​និង​​ជប៉ុន​, ចិននិង​តៃវ៉ាន់ ហើយ​​និង​​ការ​ប្រជែង​ឥទ្ធិពល​គ្នា​ពីសហរដ្ឋអាមេរិក​ថែមទៀត។​ ការ​សាកល្បង​សព្វាវុធ​របស់ចិន​ក៏បានធ្វើឲ្យ​ ជប៉ុន ​ក្បែរខាង សម្តែងក្តី​ព្រួយ​បារម្ភ និង​មិន​សប្បាយចិត្ត​នោះឡើយ។​

កាលពីថ្ងៃទី២៣ កញ្ញា តុលាការកំពូលបានចេញសេចក្តីថ្លែងការណ៍សម្រេចក្តីរឿងទំនាស់ដីធ្លីរវាងព្រះចៅអធិការវត្តចង្ក្រានតាព្រហ្មស្ទឹងមានជ័យ និងបុគ្គលឈ្មោះអៀង សៀ។ នៅក្នុងសេចក្តីថ្លែងការណ៍ តុលាការបានសម្តែងការសោកស្តាយដែលពុំអាចដោះស្រាយបានតាមការទាមទាររបស់ព្រះចៅអធិការវត្តដោយសារតែភស្តុតាង អង្គហេតុ និងអង្គច្បាប់បានកំណត់ច្បាស់លាស់រួចទៅហើយ។ តាមតុលាការកំពូល ឈ្មោះ ហុក អៀងដែលជាឪពុកឈ្មោះ អៀង សៀបានចូលទៅរស់នៅលើដីទំនាស់តាំងពីឆ្នាំ១៩៧៩ រហូតមកដល់បច្ចុប្បន្ន តាមការប្រគល់ឱ្យរបស់អាជ្ញាធរសង្កាត់ស្ទឹងមានជ័យ។

ក្រុមប្រឹក្សានាយកប្រតិបត្តិរបស់ធនាគារពិភពលោក World Bank បានអនុម័តកញ្ចប់ថវិកាចំនួន ៨០ លានដុល្លារអាមេរិកឲ្យកម្ពុជាក្នុងការជួយលើកកម្ពស់គុណភាពអប់រំ និងការស្រាវជ្រាវនៅកម្រិតឧត្តមសិក្សាផ្នែកជំនាញវិទ្យាសាស្ត្រ ឬហៅថា STEM។ នេះបើតាមសេចក្តីប្រកាសព័ត៌មានរបស់ធនាគារពិភពលោកចេញផ្សាយថ្ងៃទី២៤ កញ្ញា និងថា គម្រោងលើមុខជំនាញ STEM មួយនេះមានរយៈពេល៦ឆ្នាំសម្រាប់បណ្តុះបណ្តាលនិស្សិតឲ្យរៀនចប់ដោយសមត្ថភាព និងផលិតការស្រាវជ្រាវនានាដើម្បីរួមចំណែកដល់ការអភិវឌ្ឍប្រទេសកម្ពុជា។

សេដ្ឋកិច្ចចិន ចាប់តាំងពីក្រោយ​វិបត្តិកូវីដ​១៩​មក បានពើបប្រទះនឹងវិបត្តិ​ ហាក់​មិនងើបស្ទុះឡើងទាល់តែសោះ។ រដ្ឋាភិបាល​ចិនបាន​ចេញវិធានការជាបន្តបន្ទាប់ ដើម្បី​ជួយជំរុញ​ការចំណាយ​ចាយ​វាយ​ក្នុងស្រុក និង​ដោះស្រាយ​វិបត្តិ​អចលនទ្រព្យ តែហាក់ដូចជាមិន​បានលទ្ធផល​។ កាលពី​ថ្ងៃអង្គារទី​២៤កញ្ញា​ ធនាគារកណ្តាលចិន បានចេញវិធានការថ្មី​បន្ថែមទៀត ដើម្បី​ចាក់បញ្ចូលសាច់ប្រាក់ទៅក្នុងចរន្តសេដ្ឋកិច្ច​។

​ព្រះមហាក្សត្រថៃ បាន​លាយព្រះហត្ថលេខា ​ប្រទាន​រាជានុញ្ញាត ឲ្យ​ប្រជារាស្ត្រ​ថៃ ដែល​ស្រឡាញ់ភេទ​ដូចគ្នា អាច​មា​នសិទ្ធិ​ស្របច្បាប់​ រៀបអាពាហ៍ពិពាហ៍​ជាមួយ​គ្នា​បាន​។ នេះ​បើតាម​ព្រះរាជក្រឹត្យ​ ដែលត្រូវបណ្តាញ​ឃោសនាថៃ ផ្សព្វផ្សាយ​ព្រោងព្រាត នៅ​ថ្ងៃអង្គារ៍ ទី​២៤កញ្ញា។ តាមរយៈ​ច្បាប់​ថ្មីនេះ ​ ​ថៃបានក្លាយ​ជាប្រទេស​អាស៊ីអាគ្នេយ៍​ទី​១​ដំបូង​គេ ដែល​យល់ព្រម​ទទួលការរៀបមង្គលការរវាង​​​អ្នក​ស្រឡាញ់​ភេទ​ដូចគ្នា​។  ​

កុងស៊ុលវៀតណាម និងសមាគមធុរកិច្ចវៀតណាម-កម្ពុជា (VCBA) គ្រោងបង្កើតកម្មវិធីគាំទ្រវិស័យអប់រំសម្រាប់កុមារវៀតណាមនៅតាមដងទន្លេសាប ក្នុងភូមិសាស្ត្រនៃខេត្តពោធិ៍សាត់។ នេះបើតាមការចុះផ្សាយរបស់កាសែតវៀតណាម Vietnam News នៅថ្ងៃទី២៣ កញ្ញា និងថា តាមរយៈកម្មវិធីគាំទ្រវិស័យអប់រំមួយនេះ សាលារៀនបណ្តែតទឹកសម្រាប់កុមារវៀតណាមក្នុងខេត្តពោធិ៍សាត់នឹងត្រូវជួសជុល កែលម្អឡើងវិញ។

កាលពីថ្ងៃទី២៣ ខែកញ្ញា សារមន្ទីរជាតិបានបង្ហាញការសោកស្តាយចំពោះទង្វើអសីលធម៌របស់យុវជនខ្មែរមួយចំនួនដែលបានសម្រុក និងផ្លោះរបងចូលក្នុងបរិវេណសារមន្ទីរជាតិ អំឡុងពេលមានវត្តមានអ្នកបង្កើតមាតិកាតាមយូធូបបរទេសម្នាក់នៅក្នុងសារមន្ទីរ។ សារមន្ទីរជាតិចាត់ទុកទង្វើរបស់យុវជនខ្មែររបៀបនេះថាខ្វះការគោរព និងមិនផ្តល់តម្លៃដល់បេតិកភណ្ឌជាតិរបស់ខ្លួន។ ចំណែកអ្នកស្រាវជ្រាវសង្គមវាយតម្លៃថា សីលធម៌ និងឥរិយាបថរស់នៅរបស់យុវជនខ្មែរនាពេលសព្វថ្ងៃកំពុងធ្លាក់ចុះខ្លាំង។ ក្នុងន័យនេះ អ្នកវិភាគបានស្តីបន្ទោសលើភាពទន់ខ្សោយនៃវិស័យអប់រំ និន្នាការនយោបាយ សង្គម គ្រួសារ និងយុវជនខ្លួនឯង៕

មេដឹកនាំ​កំពូល​នៃ​រដ្ឋសភា​កម្ពុជា ​និង​ចិន ​បាន​ចុះហត្ថលេខា​កាលពីថ្ងៃ​ទី​២៣ ​ខែ​កញ្ញា ​លើឯកសារ​ចំនួនពីរ​ស្តីពី​ការ​ពង្រឹងកិច្ច​សហប្រតិបត្តិការ​ជាមួយគ្នា​នៅគ្រប់​កំរិត ​និង​គ្រប់​វិស័យ​។ ​ពិធីចុះហត្ថលេខា​នេះ​ ធ្វើឡើង​នៅក្នុង​ឱកាស​ដំណើរទស្សនកិច្ច​រយៈពេល ​៥ថ្ងៃ​របស់​គណៈប្រតិភូ​រដ្ឋសភាកម្ពុជា​ដឹកនាំដោយ​លោកស្រី ​ឃួន សុដារី ​ប្រធាន​រដ្ឋសភា​ពីថ្ងៃ​ទី​២២ ​ដល់ថ្ងៃ​ទី​២៦ ​ខែ​កញ្ញា ​ឆ្នាំ​២០២៤​។

នៅសិង្ហបុរី តុលាការកំពូល​បានបើកសវនាការ នៅព្រឹកថ្ងៃអង្គារទី​២៤កញ្ញា ដើម្បី​កាត់ទោស​​អតីតរដ្ឋមន្ត្រី​ក្រសួងដឹកជញ្ជូន ឈ្មោះ ឥសវ៉ារ៉ាន (Iswaran)។ លោកម្នាក់នេះ ត្រូវជាប់ចោទ​អំពីបទពុករលួយជាច្រើនករណី ក្នុងពេលដែល​លោកកាន់មុខតំណែងជា​រដ្ឋមន្ត្រី​។ គួរបញ្ជាក់ថា បទល្មើសអំពើពុករលួយ គឺជារឿងកម្រខ្លាំងណាស់នៅសិង្ហបុរី ព្រោះថាប្រទេសនេះ​ មានច្បាប់ដ៏តឹងតែង ហាមឃាត់​មន្ត្រី​រដ្ឋាភិបាល ​មិន​ឲ្យទទួលសំណូក ឬក៏វត្ថុមានតម្លៃ​ពី​គេឯង​ឡើយ​។

នៅលីបង់ ​ថ្ងៃអង្គារ៍ ទី​២៤កញ្ញា ​ កងទ័ព​អ៊ីស្រាអែល​ បន្តវាយប្រហារ​ថែមទៀត ក្រោយ​ពីបាន​ធ្វើ​​ប្រតិបត្តិការ​សឹក​ពេញមួយ​ថ្ងៃចន្ទ​ សម្លាប់​មនុស្ស​ប្រមាណ ​៥០០នាក់​។ អង្គការសហប្រជាជាតិ សហភាពអឺរ៉ុប សហរដ្ឋអាមេរិក ចិន រុស្ស៊ី និងប្រទេសសម្ព័ន្ធអារ៉ាប់ សុទ្ធសឹង​តែ​អំពាវនាវឲ្យ ភាគីជម្លោះរវាង អ៊ីស្រាអែល​និង​ក្រុម​ប្រដាប់​អាវុធ​ហេសបូឡាលីបង់​ ត្រូវបន្ធូរ​បន្ថយស្ថានការណ៍តានតឹង។ ទន្ទឹម​នឹងគ្នានេះ​ ប្រទេសមានសន្ទុះ​សេដ្ឋកិច្ចជឿនលឿនហ្សេ៧ ក៏​ដាស់​តឿនដែរថា ​ក្នុង​ជម្លោះ​នៅតំបន់​​មជ្ឈិមបូព៌ា គ្មាន​នរណា​បា​ន​ចំណេញ​ឈ្នះ​គេ​នោះឡើយ​ ​មានតែ​ខាត​បង់ ហើយ​​​ផលវិបាក​ប៉ះពាល់​ធ្ងន់ធ្ងរ មិន​អាច​ស្មានដល់។ 

កម្មវិធីព័ត៌មានប្រចាំថ្ងៃ ចន្ទទី ២៣ ខែកញ្ញា ឆ្នាំ ២០២៤ ដោយ អោ ស្រីពេជ្រ

លោកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានអញ្ជើញទៅដល់អាមេរិក នៅថ្ងៃអាទិត្យ ទី២២កញ្ញា ដើម្បីបំពេញទស្សនកិច្ចជាច្រើនថ្ងៃ នៅអាមេរិក។ ក្នុងដំណើរទស្សនកិច្ចសារជាថ្មីនេះ លោក ហ្សេឡេនស្គី គ្រោងជួបលោកប្រធានាធិបតីអាមេរិក ចូ បៃដិន និង សភាអាមេរិកបង្ហាញពីផែនការសន្តិភាព សម្រាប់បិទបញ្ចប់សង្គ្រាមឈ្លានពានរបស់រុស្ស៊ី នៅអ៊ុយក្រែន តាំង​ពី​ខែ​កុម្ភៈ​ឆ្នាំ ២០២២។

កំពុង​ជាប់បណ្តឹង​របស់​ចិន​នៅ  អង្គការ​ពាណិជ្ជកម្ម​ពិភពលោក នៅក្នុង​រឿងសំណុំរឿង​រថយន្តអគ្គិសនី អាមេរិក​បាន​ប្រកាស​គម្រោង​​ចង់​បិទខ្ទប់​ ហាមឃាត់​មិន​ឲ្យ​រថយន្តដែលប្រើ​បច្ចេកវិទ្យា​របស់​ចិន​ និង​រុស្ស៊ី មាន​វត្តមាន​នៅក្នុង​ទឹកដីអាមេរិក។ យោងតាម​សេចក្តីប្រកាស​របស់​ក្រសួងពាណិជ្ជកម្ម​អាមេរិក រដ្ឋាភិបាល​នឹង​ប្រកាសជាផ្លូវការ​ វិធានការ​ប្រឆាំង​រថយន្តដែល​ផលិត​ជាមួយ​បច្ចេកវិទ្យាចិន និង​រុស្ស៊ី នៅក្នុង​រយៈពេល​៣០ថ្ងៃខាងមុខ។ នៅ​ខែ​ឧសភាឆ្នាំនេះ រដ្ឋបាល​លោក​ចូ បៃដិន​ទើប​បាន​ប្រកាស​តម្លើង​ពន្ធ​១០០​%លើ​រថយន្តអគ្គិសនី​​ចិននាំចូល​ទៅ​អាមេរិក​។

អ៊ីរ៉ង់បានសាងសង់ជញ្ជាំងព្រំដែនជាមួយនឹងអាហ្វហ្កានីស្ថាន ដើម្បីពង្រឹងសន្តិសុខនៅតាមព្រំដែនរបស់ខ្លួន និង ទប់ស្កាត់កំណើនយ៉ាងច្រើនលើសលប់ នៃជនភៀសខ្លួនអាហ្វហ្កានីស្ថានខុសច្បាប់ ចូលមកប្រទេសរបស់ខ្លួន។ នេះបើតាមការចុះផ្សាយរបស់កាសែតក្នុងស្រុកអ៊ីរ៉ង់ ដែលបានដកស្រង់សំដីរបស់អគ្គមេបញ្ជាការរងកងទ័ពជើងគោកអ៊ីរ៉ង់ នៅថ្ងៃចន្ទ ទី២៣កញ្ញា។

ស្ថានការណ៍​នៅតំបន់​ដើមបូព៌ា​​កាន់តែ​ក្តៅគគុក។ បន្ទាប់ពី​បើកការវាយប្រហារ​ផ្លូវអាកាស​នៅប៉ុន្មាន​ថ្ងៃជាប់គ្នា នៅភាគខាងត្បូង​លីបង់ កងទ័ព​អ៊ីស្រាអែល​នៅ​ថ្ងៃ​ចន្ទនេះ​បាន​ប្រកាស​ប្រាប់​ឲ្យ​ប្រជាជន​លីបង់​ រត់រក​កន្លែងជ្រកលាក់ខ្លួន ឆ្ងាយ​ពីទីតាំង​របស់​ក្រុមហេសបូឡា​។ តាម​ការប្រកាស​របស់​ក្រសួងសុខាភិបាល​លីបង់ ការវាយប្រហាររបស់អ៊ីស្រាអែល​នៅថ្ងៃចន្ទ បានសម្លាប់មនុស្ស​យ៉ាងហោច ១០០នាក់ និង​របួសជាង​៤០០នាក់។ នៅចំពោះមុខ​ការផ្ទុះសង្រ្គាម​វាយប្រហារគ្នាទៅវិញ ទៅមក រវាង​អ៊ីស្រាអែល និង​ក្រុមហេ​សបូឡា អាមេរិក​ដែល​ជា​សម្ព័ន្ធមិត្ត​របស់​អ៊ីស្រាអែល​បាន​ប្រកូកប្រកាស​ឲ្យ​ពលរដ្ឋ​របស់ខ្លួន​ចាកចេញពីទឹកដី​លីបង់ ចំណែក​ប៉េកាំង​ឯណោះ​វិញ​បានប្រាប់ជនជាតិ​ចិន​ឲ្យ​ចាកចេញពីប្រទេស​អ៊ីស្រាអែល ព្រោះថា អ៊ីស្រាអែល​ក៏កំពុង​រកគ្រាប់រ៉ូក្កែត​របស់​ពួកហេសបូឡា​លីបង់ច្រើនណាស់​ដែរ នៅប៉ុន្មាន​ថ្ងៃ​មកនេះ។

លោកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានអញ្ជើញទៅដល់អាមេរិក នៅថ្ងៃអាទិត្យ ទី២២កញ្ញា ដើម្បីបំពេញទស្សនកិច្ចជាច្រើនថ្ងៃ នៅអាមេរិក។ ក្នុងដំណើរទស្សនកិច្ចសារជាថ្មីនេះ លោក ហ្សេឡេនស្គី គ្រោងជួបលោកប្រធានាធិបតីអាមេរិក ចូ បៃដិន និង សភាអាមេរិកបង្ហាញពីផែនការសន្តិភាព សម្រាប់បិទបញ្ចប់សង្គ្រាមឈ្លានពានរបស់រុស្ស៊ី នៅអ៊ុយក្រែន តាំង​ពី​ខែ​កុម្ភៈ​ឆ្នាំ ២០២២។

អង្គការទស្សនៈពិភពលោក World Vision បានចេញរបាយការណ៍ថ្មីមួយដោយផ្តល់ជាអនុសាសន៍ថា កម្ពុជាត្រូវបង្កើនកិច្ចខិតខំប្រឹងប្រែងរបស់ខ្លួនចំនួន១០ដងដើម្បីអាចតភ្ជាប់បណ្តាញទឹកស្អាតតាមបំពង់ឱ្យពលរដ្ឋខ្មែររស់នៅតាមទីជនបទអាចប្រើប្រាស់បានទាំងអស់គ្នានៅឆ្នាំ២០៣០។ World Vision បានមើលឃើញថា តំបន់ជនបទដែលប្រជាពលរដ្ឋភាគច្រើនរស់នៅ នៅតែប្រឈមនឹងបញ្ហាសំខាន់ៗក្នុងការទទួលបានទឹកស្អាតប្រើប្រាស់។ 

ប្រធានគណបក្សជំនាន់ថ្មីលោកមាជ សុវណ្ណារ៉ាបានប្រកាសវិលចូលស្រុកវិញនៅថ្ងៃទី២៣ ខែកញ្ញានេះដើម្បីបន្តការងារនយោបាយ និងថា លោកត្រៀមខ្លួនរួចរាល់ដើម្បីចូលទៅបំភ្លឺនៅចំពោះមុខតុលាការខេត្តរតនៈគីរី ប្រសិនបើមានការកោះហៅណាមួយ។ លោកមាជ សុវណ្ណារ៉ាបានប្រាប់វិទ្យុបារាំងអន្តរជាតិ RFI នៅរសៀលថ្ងៃទី២៣ ខែកញ្ញានេះថា លោកនឹងមិនគេចវេសពីការគោរពច្បាប់ឡើយ និងបានតាំងខ្លួនជាអ្នកនយោបាយស្អាតស្អំ។ 

កាលពី​ថ្ងៃទី​២០ ខែ​កញ្ញា ​ឆ្នាំ​២០២៤ ​រដ្ឋាភិបាល​កម្ពុជា​បាន​សម្រេច​ដកខ្លួន​ជាផ្លូវការ​ពីការ​ចូលរួម​នៅក្នុង​តំបន់​ត្រីកោណ​អភិវឌ្ឍន៍​កម្ពុជា ​ឡាវ ​វៀតណាម​(CLV​-DTA) ​ដែលមាន​អាយុកាល ​២៥ឆ្នាំ​កន្លងទៅ​។ ការ​សម្រេច​ដកខ្លួននេះ ​ត្រូវបាន​រដ្ឋាភិបាល​ពន្យល់ថា ​គឺជាការគិតគូរ​ពី​ក្តីកង្វល់របស់​ប្រជាជន​លើបញ្ហាទឹក​ដី ​និង​ភាពចាំបាច់​ខាង​នយោបាយ​។ គួររម្លឹកថា​ CLV ជាប្រធានបទ​ដ៏ក្តៅគគុក​រវាងអ្នក​នយោបាយ​ប្រឆាំង និង​រដ្ឋាភិបាល ​ហើយក៏ជា​ប្រធានបទ​ដែលពលរដ្ឋខ្មែរ​ជាច្រើន​សម្តែង​ការព្រួយបារម្ភ​ជុំវិញ​អធិបតេយ្យភាព​ និង​បូរណភាព​ទឹកដី​។ ​តើការ​សម្រេចដកខ្លួន​ចេញ​ពី CLV ​របស់​រដ្ឋាភិបាលនេះ​នឹងជួយ​កាត់​បន្ថយភាពតានតឹង​ខាង​នយោបាយរវាង​រដ្ឋាភិបាល និង​ពលរដ្ឋខ្មែរ​ដែលមាន​និន្នាការ​ផ្ទុយពី​រដ្ឋាភិបាល​ដែរ ឬ​ទេ​?