Дулааны шугам цоорох, цахилгааны гэмтэл гарсан үед ажиллах чадавхыг нэмэгдүүлэх сургуулилалт зохион байгуулав
Ulaanbaatar held its annual staff practice drill to check winter preparation and readiness of engineering supply organizations for 2026-2027. The drill took place today for the 11th year. Seven engineering supply organizations and 20 organizations responsible for lighting operation and maintenance took part. The exercise focused on preventing problems during peak winter load and improving response to heating-line leaks and electricity faults.
Улаанбаатар хотын инженерийн хангамжийн байгууллагуудын 2026-2027 оны өвөлжилтийн бэлтгэл, бэлэн байдлыг шалгах штабын дадлага сургуулилалт 11 дэх жилдээ өнөөдөр боллоо. Инженерийн хангамжийн 7, гэрэлтүүлгийн ашиглалт, засвар үйлчилгээ хариуцсан 20 байгууллага өвлийн оргил ачааллын үед гарч болзошгүй хүндрэлээс сэргийлэх, шугам тоноглол, техникийн холбогдолтой осол аваарын үеийн шуурхай удирдлага, зохицуулалт, нөөцийн хуваарилалтыг оновчтой зохион байгуулах, хоорондын уялдаа холбоог сайжруулах сургуулилалт хийв. Энэ үеэр мэргэжлийн байгууллагууд хүн хүч, техник тоног төхөөрөмжийн бэлэн байдал, найдвартай ажиллагааг ханган ажиллаж байгаагаа тайлбарлав. “Улаанбаатар цахилгаан түгээх сүлжээ” ТӨХК нь 1,900 гаруй ажилтантай Улаанбаатар хотын найман дүүрэг, Төв аймгийн 16 сумыг 24 цагаар цахилгаан эрчим хүчээр хангадаг. 2026-2027 оны өвөлжилтийн бэлтгэл ажлын хүрээнд 52 нэр төрлийн 95 багц ажлыг хийжээ. Хувийн орон сууцны 60 гаруй контор нийслэл хотын оршин суугчдын 50 хувийг дулааны эрчим хүч, цэвэр усаар хангаж, бохирыг зайлуулах үйл ажиллагааг 1,500 орчим ажилтан, албан хаагчтай гүйцэтгэдэг байна. Хэсэгчилсэн инженерийн хангамжийн удирдах газар хийн түлш, дулааны насос, хатуу түлш, мидллинг гэсэн дөрвөн төрлийн эрчим хүчний эх үүсвэрээр дулаан үйлдвэрлэх зорилт тавьж, машин механизм, техник, ажиллах хүчний бэлэн байдлыг хангажээ. Төвийн зургаан дүүргийн 108 мянган гэрэлтүүлгийн хэвийн ажиллагааг 20 байгууллага хариуцаж, сэлбэг хэрэгслээ нөөцөлсөн, нийт гэрэлтүүлгийн асалтыг тогтмол шалгаж, хариуцсан хороодтой хамтран ажиллаж буйгаа хэллээ. Нийслэлийн хэмжээнд өвөлжилтийн бэлтгэл ажлын хүрээнд давс, бодис цацах зориулалтын 96 машин, зам цэвэрлэгээний 432 тусгай зориулалтын машин техникийн бэлэн байдлыг хангаж, нийт 80.2 км дулаан, цахилгаан, борооны ус зайлуулах болон ус хангамж, ариутгах татуургын шугам сүлжээг шинэчилжээ. Харин инженерийн хангамжийн үндсэн шугам сүлжээнүүд 1970-1990 онд баригдсан бөгөөд инженерийн дэд бүтцийн 40 орчим хувь 30 жилээс дээш жилийн насжилттай байна. Шугам сүлжээ, тоноглолын насжилтаас хамаарч дулааны шугам сүлжээ цоорох, цахилгааны кабельд гэмтэл гарч, оршин суугчдын дэд бүтэц тасалдах эрсдэлтэй нөхцөл үүсжээ. Өнөөдөр зохион байгуулж буй өвөлжилтийн бэлтгэл ажил, бэлэн байдлыг шалгах штабын дадлага сургуулилалт нь инженерийн хангамж, мэргэжлийн байгууллагуудын өвлийн улиралд болзошгүй эрсдэлтэй үед үүрэг гүйцэтгэх чадавхыг нэмэгдүүлж, иргэдийг дэд бүтцээр тогтвортой хангах нөхцөлийг бүрдүүлэх зорилготой байна. Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс