Трампын нийтэлсэн газрын зурагтай холбогдуулан Исланд улс АНУ-ын элчин сайдад эсэргүүцэл илэрхийлжээ

<p>Даваа гарагт ерөнхийлөгч Дональд Трамп сошиал хуудсандаа АНУ-ын далбаагаар дэлхийн хэд хэдэн улсыг бүрхэж харуулсан газрын зургийг нийтэлсэн юм.</p> <p>Тухайлбал АНУ, Канад, Гринланд, Исланд, Мексик, Төв Америк, Карибын тэнгисийг таван хошуу, судалтай далбаагаар бүрхсэн газрын зургийг тэр Truth Social хуудсандаа нийтэлжээ.</p> <p>Ингэхдээ далбаанд бүрхэгдсэн хэсгийг &ldquo;Америкийн Нэгдсэн Улс&rdquo; гэж тэмдэглэсэн байв.</p> <p>Үүнтэй холбогдуулан Мягмар гарагт Исланд улсын гадаад хэргийн яам тус улсад суугаа АНУ-ын элчин сайдыг дуудаж, эсэргүүцэл илэрхийлжээ.</p> <p>Трампын нутаг дэвсгэрээ тэлэх хүсэл сонирхол хөрш орнуудтай харилцах харилцааг нэлээд хурцатгаж байгаа.</p> <p>Тухайлбал тэр Гринланд арлыг нэгтгэх, Канадыг АНУ-ын 51 дэх муж болгох санааг байнга илэрхийлэх болсон. Саяхан тэр бас АНУ-ын Нью Мексико мужийн нэрийг &ldquo;Нью Америка&rdquo; болгон өөрчилсөн газрын зургийг нийтэлж байв.</p> <p>Трампын сүүлийн нийтлэлтэй холбогдуулан Исландын гадаад хэргийн сайд Торгердур Катрин Гуннарсдоттир өнгөрсөн сард албан тушаалдаа томилогдсон АНУ-ын элчин сайд Билли Лонгийг дуудаж уулзсан байна.</p> <p>Трампын нийтэлсэн газрын зураг бас Дани улсын эрх баригчдыг нэлээд бухимдуулжээ.</p> <p>Тус улсын ерөнхий сайд Метте Фредериксен &ldquo;Гринландын засгийн газар болон Гринландын ард түмэн Америк хүн болохыг хүсэхгүй байгаагаа удаа дараа илэрхийлсэн. АНУ болон дэлхийн бусад улс орнууд үүнд огт эргэлзэхгүй байгаасай гэж би хүсэж байна&rdquo; гэж Данийн хэвлэлд ярьсан байна.</p> <p>Трампын нийтлэлийн өмнөхөн Данийн ерөнхий сайд Метте Фредериксентэй хамт Гринланд аралд айлчилсан Европын Зөвлөлийн ерөнхийлөгч Урсула фон дер Ляйен тус бүс нутагт 200 сая еврогийн хөрөнгө оруулах төлөвлөгөөг зарласан юм.</p> <p>Европын Холбооны энэ хөрөнгө оруулалт арлын ард иргэдийн боловсрол, интернэт холболт, түүхий эдийн ашиглалт, усан цахилгаан станцын төсөлд зарцуулагдах гэнэ.</p> <p>Трампын нийтэлсэн зурагтай холбогдуулан АНУ-ын өмнөд хөрш Мексикийн эрх баригчид бас дургүйцлээ илэрхийлсэн юм.</p> <p>Тус улсын ерөнхийлөгч Клаудиа Шэйнбаум &ldquo;Мексик улс гадаад улсын колони биш, эсвэл аль нэг улсын хамгаалалтад байдаггүй, байх ч үгүй. Бид чөлөөт, тусгаар тогтносон, бүрэн эрхт улс гэдгээрээ бахархдаг&rdquo; гэж сошиал хуудсандаа бичжээ.</p> <p>&nbsp;</p> <p>Эх сурвалж: <strong>BBC</strong></p> <p>&nbsp;</p>