Ормузын хоолойг орлож байсан Саудын Арабын газрын тос дамжуулах хоолой халдлагад өртсөний дараа зогсжээ

<p>Пүрэв гарагт болсон хэд хэдэн халдлагын дараа Ормузын хоолойг орлож байсан газрын тос дамжуулах &ldquo;Зүүн-Баруун&rdquo; чиглэлийн хоолойн ажиллагааг зогсоосноо Саудын Арабын эрх баригчид өчигдөр зарлажээ.</p> <p>Баасан гарагт тус улсын эрчим хүчний яамны гаргасан мэдэгдэлд хоолойн ажиллагааг зогсоосон нь урьдчилан сэргийлэх зорилготой байсныг тайлбарласан байна.</p> <p>Халдлагын улмаас хэд хэдэн хүн шархадсан, яаралтай тусламжийн багууд хоолойн аюулгүй байдлыг хангах, үүссэн нөхцөл байдлыг үнэлэх арга хэмжээ авч байгааг мэдэгдэлд бас дурджээ.</p> <p>Сүүлийн өдрүүдэд Ойрх Дорнод даяар мөргөлдөөн эрчимжээд байгаа. Йемений Хусит зэвсэгт босогчид Саудын Арабын Абха, Нажран, Жазан дахь эрчим хүчний байгууламжуудыг онилж, Ираны газрын тос тээвэрлэгч хөлгүүдийг АНУ-ын зэвсэгт хүчин довтолж байна.</p> <p>Саудын Арабын мэдэгдлийн дараа газрын тосны үнэ төдийлөн өөрчлөгдөөгүй бөгөөд Брент ангиллын баррель газрын тосны фючерс хэлцлийн үнэ $105 орчимд хэлбэлзэж байлаа.</p> <p>Уг үнэ Пүрэв гарагт $110 руу дөхөж, огцом өссөн юм.</p> <p>&ldquo;Зүүн-Баруун&rdquo; чиглэлийн хоолой нь Ираны дайн эхэлсэн цагаас хойш Саудын Арабын газрын тосны экспортын чухал зам болоод байгаа.</p> <p>Ормузын хоолойн тээвэрлэлт бараг зогссоны дараа өдөрт 7 сая баррель газрын тос дамжуулах хүчин чадалтай уг хоолойн ашиглалт маш хурдан дээд хэмжээндээ тулсан юм.</p> <p>Энэ хоолой нь газрын тосыг Персийн булангаас Улаан тэнгис рүү тээвэрлэдэг. Тэндээс хөлөг онгоцонд ачиж, гадаад зах зээлд хүргэдэг юм.</p> <p>Гэвч энэ чиглэл сүүлийн үед Хусит босогчдын халдлагын улмаас эрсдэлтэй тулгараад байна.</p> <p>Улаан тэнгис дэх тээвэрлэгч хөлгүүд Хуситуудын халдлагад өртөх болсноор энэ чиглэлийн газрын тосны экспортын хэмжээ наймдугаар сард өдөрт ердөө 3 сая баррель болж буурсан нь 2017 оны эхэн үеэс хойших хамгийн доод үзүүлэлт болжээ.</p> <p>Газрын тосны үнэ өсөхийн хэрээр бензин шатахууны үнэ ч өсөж байна. Тухайлбал АНУ-д галлон бензиний үнэ $4 орчимд хэлбэлзэж байгаа нь энэ оны хамгийн дээд үзүүлэлт болж байгаа бол галлон дизель түлшний үнэ түүхэн дээд хэмжээндээ буюу $6-т хүрчээ.</p> <p>&nbsp;</p> <p>Эх сурвалж: <strong>Reuters</strong></p> <p>&nbsp;</p>