Украины нөхцөл байдал “амаргүй” байгааг АНУ-ын элч нарт Путин хэлэв

<p>АНУ-ын ерөнхийлөгч Дональд Трампын элч нар Бямба гарагт Москвад ирж, Украины дайныг дуусгах асуудлаар ОХУ-ын ерөнхийлөгч Владимир Путинтай уулзжээ.</p> <p>Кремлиэс нийтэлсэн дүрс бичлэгт Стив Виткофф, Жаред Кушнер нарыг Путин угтан авч байгааг харуулсан байна.</p> <p>Энэ үеэр тэр Украины нөхцөл байдал &ldquo;тийм ч амар биш&rdquo; байгааг мэдэгдээд Орос улс &ldquo;нөхцөл байдлыг хэрхэн харж байгааг тайлбарлах болно&rdquo; гэж хэлжээ.</p> <p>Виткофф гурван өдрийн хугацаанд Украинтай харилцан нэгнийхээ нийслэлд довтлохгүй байх нөхцөлийг хүлээн зөвшөөрсөн Путинд талархал илэрхийлсэн байна.</p> <p>Трампын элч нар өнөөдөр буюу Мягмар гарагт Киев хотод айлчилж, Украины эрх баригчидтай уулзах юм.</p> <p>Баасан гарагт Трамп өөрийн элч нарыг &ldquo;Украины дайныг дуусгах саналтай&rdquo; Москвад айлчлах гэж байгааг мэдэгдэж байв.</p> <p>Өнгөрсөн хугацаанд тэд хэд хэдэн удаа ийм санал танилцуулсан ч үр дүнд хүрээгүй юм.</p> <p>Бямба гарагийн уулзалтын үеэр Путин &ldquo;ямар ч тохиолдолд, юу ч болж байсан ийм холбоо харилцаа үргэлж ашигтай байдаг нь эргэлзээгүй&rdquo; хэмээн АНУ-тай хийж буй яриа хэлэлцээгээ сайшаагаад Трампын энхийг сахиулах хүчин зүтгэлд талархал илэрхийлжээ.</p> <p>Москвагийн төвд байрлах Путиний албан өргөөнд болсон хаалттай уулзалт гурван цаг үргэлжилснийг Оросын төв хэвлэлүүд мэдээлсэн байна.</p> <p>Украины ерөнхийлөгч Володимир Зеленский &ldquo;Бид Стив Виткофф, Жаред Кушнер нарыг хүлээж байгаа бөгөөд бодитой яриа хэлэлцээг хийхэд бэлэн байна&rdquo; гэж өчигдөр мэдэгджээ.</p> <p>&ldquo;Одоогоос эхлэн Бямба гарагийг дуустал, бас Ням, Даваа гараг хүртэл бид Москвад довтлохоо зогсооход бэлэн байгаа бөгөөд Оросын тал Киевийн талаар адил арга хэмжээ авна гэдэгт найдаж байна&rdquo; гэж тэр хэлсэн юм.</p> <p>Харин Украины нийслэлээс бусад хэсэгт агаарын цохилтоо зогсоохоор тохиролцоогүйг Путин мэдэгдсэн байна.</p> <p>Виткофф, Кушнер нар өмнө нь хэд хэдэн удаа Москвад айлчилж байсан бол анх удаагаа Киевт очих гэж байгаа юм.</p> <p>Тэд Москвагаас хэрхэн Киевт хүрэх нь тодорхойгүй байна.</p> <p>Дайн эхэлсэн цагаас хойш Украин улс агаарын орон зайгаа хаагаад байгаа.</p> <p>АНУ-ын элч нарыг ирэхийн өмнөхөн Оросын тал Киевийн болон түүний ойролцоох Бориспалийн нисэх буудлуудад &ldquo;үзүүлбэр&rdquo; маягийн агаарын цохилт өгснийг Зеленский мэдээлжээ.</p> <p>&ldquo;Нисэх онгоцны буудлуудад өгсөн Оросын эдгээр цохилтууд нь АНУ-ын элч нарыг энхийн яриа хэлэлцээний зорилгоор Украинд газардаж магадгүй болсонд үзүүлж буй хариу үйлдэл гэдэг нь тодорхой&rdquo; гэж тэр хэлсэн байна.</p> <p>&nbsp;</p> <p>Эх сурвалж: <strong>BBC</strong></p> <p>&nbsp;</p>