លោក ស្លេះ ហ្វឺត ប្តឹងមន្ត្រីបរិស្ថានស្ទឹងត្រែង ២នាក់ពាក់ព័ន្ធករណីចាប់ខ្លួនមនុស្សច្រឡំ

​​លោក ស្លេះ ហ្វឺត ពលរដ្ឋខ្មែរ-ឥស្លាមដែល​​អះអាងថា ខ្លួនត្រូវតុលាការឃុំខ្លួនច្រឡំចំនួន ១ឆ្នាំបាន​ដាក់ពាក្យបណ្តឹង​ទៅ​រដ្ឋមន្ត្រីក្រសួងបរិស្ថាន លោក អ៊ាង សុផល្លែត កាលពីថ្ងៃទី​៣០ ខែ​​កញ្ញា​ ឆ្នាំ​​២០២៦​​​ ដើម្បី​ឱ្យពិនិត្យ​ភាព​មិនប្រក្រតី​​លើនគរបាលយុត្តិធម៌​​ចំនួន ២នាក់ដែលជាមន្ត្រីមន្ទីរបរិស្ថានខេត្តស្ទឹងត្រែង។ ថ្លែងប្រាប់វិទ្យុបារាំងអន្តរជាតិ RFI នៅព្រឹកថ្ងៃទី២ ខែតុលា ឆ្នាំ២០២៦ លោក ណុះ សូឡេះ ប្អូនថ្លៃរបស់លោក ស្លេះ ហ្វឺត បានបញ្ជាក់ថា ការដាក់ពាក្យបណ្តឹងប្រឆាំងនឹងមន្ត្រីទាំង​ ២នាក់នេះ គឺប្រធានមន្ទីរបរិស្ថាន និង​នាយកដែន​នៃ​​​មន្ទីរបរិស្ថាន​​​ខេត្តស្ទឹងត្រែង ធ្វើឡើងក្នុងគោលបំណងឱ្យ​​មានការពិនិត្យឡើងវិញ​លើភាពមិនប្រក្រតី​​ និងនីតិវិធីស៊ើបអង្កេត​​​ក្នុងដំណាក់កាលកសាងសំណុំរឿងក្តីក្តាំ​លោក ស្លេះ ហ្វឺត ដោយមន្ទី​​របរិស្ថានកាលពីឆ្នាំ​​២០២៣​។ បើតាម​លោក ណុះ សូឡេះ លោក ស្លេះ ហ្វឺត គឺ​ជាអ្នកនេសាទ និងមិនធ្លាប់ប្រព្រឹត្តបទល្មើសពាក់ព័ន្ធនឹងការកាប់គាស់ ឬរុករានដីព្រៃនោះឡើយ។