យុវសិស្សបារាំងពួតដៃជាមួយក្រុមបាតុករផ្សេងទៀត ធ្វើបាតុកម្មទ្រង់ទ្រាយធំ
នៅប្រទេសបារាំង បាតុករប្រមូលផ្តុំគ្នាពីច្រើនមជ្ឈដ្ឋាន ដើម្បីធ្វើបាតុកម្មទ្រង់ទ្រាយធំនៅទីក្រុងប៉ារីស និងនៅបណ្តាទីក្រុងធំៗផ្សេងទៀត។ ក្រុមសិស្សវិទ្យាល័យបារាំង បានធ្វើបាតុកម្មច្រើនសប្តាហ៍មកនេះ ដើម្បីទាមទារកំណែទម្រង់អប់រំ បង្កើនថវិកាសម្រាប់សាលារៀន និង លុបចោលលក្ខខណ្ឌមួយចំនួន។ល។ ថ្ងៃសៅរ៍ ទី១៧តុលានេះ យុវសិស្សបាតុករ បានពួតដៃជាមួយក្រុមសហជីព ក្រុមសកម្មជនបរិស្ថាន ក្រុមកសិករ អតីតបាតុករអាវកាក់លឿង ហើយនិង សកម្មជននយោបាយខ្លះផង។ បាតុកម្មទ្រង់ទ្រាយធំ នៅក្រុងប៉ារីស គ្រោងចាប់ផ្តើមនៅវេលាម៉ោង ២រសៀល(ម៉ោងក្នុងស្រុក) ដែលគេរំពឹងថា អាចនឹងមានមនុស្សចូលរួម យ៉ាងតិច ២០ ម៉ឺននាក់។