Абу-Дабигийн гурван талт хэлэлцээнд оролцсон АНУ-ын төлөөлөгчид Путинтэй уулзсаныхаа дараа Зеленскийтэй уулзжээ

АНУ-ын тусгай элч нар болох Жаред Кушнер, Стив Виткофф нар Пүрэв гарагийн орой Ирландад хүрэлцэн иржээ. Тэдний зорилго өчигдөр өглөө Москва хотод ОХУ-ын ерөнхийлөгч Владимир Путинтэй хийсэн уулзалтынхаа талаар Украины ерөнхийлөгч Володимир Зеленскийд мэдээлэл өгөх байв. Энэхүү цуврал айлчлал нь Абу Даби хотод Орос, Украин, Америкийн төлөөлөгчдийн хоёр өдөр үргэлжилсэн яриа хэлэлцээний дараа болж байгаа юм. Хоёрдугаар сараас хойш анх удаа болсон уг гурван талт уулзалт ямар нэгэн дорвитой ахиц дэвшил гаргалгүйгээр өндөрлөсөн билээ. Дублин хотноо болсон уулзалтын дараа Зеленский сэтгүүлчидтэй уулзахдаа сүүлийн өдрүүдэд өрнөсөн яриа хэлэлцээнүүд маш чухал ач холбогдолтой байсныг онцолжээ. "Энэ нь бидэнд дайныг зогсоох найдвар төрүүлж байна. Энэ уулзалтын дараа дахин уулзалтууд болох бөгөөд уулзалт бүр тодорхой үр дүн авчирч, биднийг зорилгодоо улам ойртуулах ёстой" гэж тэр хэлсэн байна. Пүрэв гарагийн орой Виткофф, Кушнер нарын хамт сэтгүүлчдийн өмнө үг хэлэхдээ Зеленский мөн саяхан тохиролцсон олзлогдсон цэргүүдийг солилцох ажиллагаа нь дайн эхэлснээс хойших хамгийн том солилцоо болохыг дурдаад үүнийг "бодит үр дүн" хэмээн нэрлэжээ. Украины дайны дараах аюулгүй байдлыг хангах "үнэхээр гайхалтай" төлөвлөгөөнүүд дээр ажиллаж байгаагаа Кушнер энэ үеэр мэдэгдсэн байна. Москвагаас хөдлөхийн өмнөхөн Внуково нисэх онгоцны буудал дээр CNN сувгийн сэтгүүлч Фредерик Плейтгентэй ярихдаа Виткофф "Бид ахиц дэвшил гаргасан гэж бодож байна. Өнөөдөр өглөө ахиц гарсан. Хүмүүс биднийг гурван талт хэлэлцээг дахин эхлүүлж чадна гэж бодоогүй байсан байх. Гэвч бид үүнийг сэргээж, дараагийн уулзалтыг товлолоо" гэж хэлжээ. "Ерөнхийлөгч Трамп яг ийм үр дүнг харахыг хүсэж байгаа" гэж тэр нэмж хэлсэн байна. Мөн Украины асуудлаар дараагийн яриа хэлэлцээнд Европын төлөөлөгчид нэгдэж магадгүй санааг Виткофф илэрхийлжээ. "Тэд бол бидний түншүүд, тиймээс тэдний оролцоо чухал" гэж тэр сэтгүүлчдэд хэлсэн юм. Хожим Кушнер ч мөн үүнтэй ижил байр суурь илэрхийлж, Зеленскийтэй уулзсаныхаа дараа "Европын тал оролцохгүйгээр бид энэ хэлэлцээрийг эцэслэн шийдвэрлэх боломжгүй" хэмээн мэдэгджээ. Гэвч үүний өмнөхөн ОХУ-ын ерөнхийлөгч Владимир Путиний гадаад бодлогын зөвлөх Юрий Ушаков гурван талт хэлэлцээ цаашид үргэлжлэхийг батлахдаа Европын оролцооны талаар эргэлзээтэй байр суурь илэрхийлсэн юм. “Тэд хэлэлцээнд оролцохын тулд бүхий л хүчин чармайлтаа гаргаж байна. Гэвч манай ерөнхийлөгчийн хэлснээр тэд энх тайвныг хүсэж байна уу, эсвэл дайныг үргэлжлүүлэхийг хүсэж байна уу гэдгээ эхлээд шийдэх хэрэгтэй. Одоогоор тэдний бодит үйлдлүүд яг л хоёр дахь хувилбар буюу дайныг үргэлжлүүлэх чиглэл дээр байна” гэж Ушаков хэлжээ. Энэхүү дипломат үйл явц нь Украины байлдааны үйл ажиллагаанд чухал үүрэг гүйцэтгэдэг Илон Маскийн Starlink үйлчилгээний цэргийн зориулалттай хувилбар болох Starshield системд дахин тасалдал үүсэж буйг Зеленский анхааруулсантай давхцаж байна. Тэрбээр Пүрэв гарагт хэлэхдээ сүүлийн өдрүүдэд уг үйлчилгээнд “ноцтой тасалдал” гарч, үүний улмаас Оросын дронуудыг устгах чадварт нь саад учирч байгааг мэдэгджээ. Түүний хэлснээр Киев “Америкийн талтай хамтран нөхцөл байдлыг бүрэн тодруулахаар” ажиллаж байгаа гэнэ. Пүрэв гарагт Путинтэй уулзах үеэрээ Виткофф дараагийн шатны хэлэлцээнд Европын орнуудыг оролцуулах хүсэлтэй байгаагаа илэрхийлсэн юм байна. АНУ-ын ерөнхийлөгч Дональд Трампын хүргэн, Трампын засаг захиргаанд албан тушаал хашдаггүй ч тус улсын гол дипломат төлөөлөгчдийн нэг болоод буй Кушнер “Европчууд энэ дайныг бүрмөсөн дуусгаж, дараа нь урт удаан үргэлжлэх энх тайвныг тогтоохыг хүсэж байна” гэж уулзалтын үеэр хэлжээ. Үүний хариуд Путин хэлэхдээ Орос улс Европтой “яриа хэлэлцээ хийхэд хэзээ ч татгалзаж байгаагүй” гэсэн байна. Тэрбээр “Та бүхэн энх тайвныг бат бөх, удаан үргэлжлэх ёстой гэж үзэж байгаа бол би үүнтэй санал нэг байна. Цаашлаад хэлэхэд би энэ энх тайвныг мөнхийн, бүрмөсөн тогтсон байгаасай гэж хүсэж байна” хэмээн хэлжээ. Орос улс Европын санаа зорилгод эргэлзэж байгаа эсэх талаар CNN сувгийн сэтгүүлч асуухад ОХУ-ын ерөнхийлөгчийн тусгай элч Кирилл Дмитриев “Европын аюулгүй байдлын төлөө ажиллах нь Европ тивд хийж буй маш чухал, томоохон алхам гэж би бодож байна. Шулуухан хэлэхэд, Европчууд болон тэдний амьдралд санаа тавьдаг хүмүүс Европын аюулгүй байдлыг бат бөх байгаасай гэж хүсэх нь зүйн хэрэг” гэж хариулжээ. Украин улс Европыг хэлэлцээний гол ширээний ард суух ёстой гэсэн байр сууриа удаан хугацааны турш илэрхийлсээр ирсэн ч Оросын тал одоогоор үүнийг эсэргүүцсээр байна. Абу Дабид болсон арга хэмжээний үеэр Оросууд болон Европын Холбооны төлөөлөгчдийн хооронд ямар нэгэн харилцаа байсан эсэхийг асуухад Кремлийн хэвлэлийн төлөөлөгч Дмитрий Песков "Ийм харилцаа төлөвлөгдөөгүй бөгөөд болоогүй" гэж хариулж байв. Үүний зэрэгцээ ирэх сард Хятадад болох АПЕК-ийн дээд хэмжээний чуулганы үеэр Путин, Трамп нар Украины асуудлыг “үргэлжлүүлэн хэлэлцэнэ" гэж Ушаков мэдэгдсэн юм. "Ерөнхийлөгч Дональд Трамп энэ асуудлыг шийдвэрлэхэд хувь хүнийхээ зүгээс анхаарлаа хандуулж байгааг онцлон тэмдэглэсэн. Мэдээж Шэньжэн хотод болох АПЕК-ийн дээд хэмжээний чуулганы үеэр түүнтэй хийхээр төлөвлөсөн уулзалтаар тохиролцооны бүх асуудлыг хэлэлцэх болно” гэж Ушаков хэлжээ. Зеленский өчигдөр АНУ-ын элч төлөөлөгчидтэй уулзахаасаа өмнө Дублин хотод болсон Европын улс төрийн нийгэмлэгийн дээд хэмжээний уулзалтад оролцож, Абу Дабид болсон гурван талт яриа хэлэлцээ, түүнчлэн Оросын эсрэг нэмэлт хориг арга хэмжээний талаар дэлхийн бусад удирдагчидтай хэлэлцсэн байна. Эх сурвалж: Reuters