ក្រុមហ៊ូទីវាយប្រហារលើទីតាំងក្រុមហ៊ុនប្រេង Saudi Aramco ធ្វើឲ្យអារ៉ាប៊ីសាអូឌីតកាន់តែទ័លច្រក
សំឡេងផ្ទុះត្រូវបានគេលាន់ឮកក្រើក នៅយប់ថ្ងៃអង្គារនិងព្រឹកថ្ងៃពុធនេះ នៅទីក្រុងរីយ៉ាដ និងតំបន់ភាគខាងកើតអារ៉ាប៊ីសាអូឌីត។ ក្រុមហ៊ូទីយេម៉ែន បានបើកការវាយប្រហារកាន់តែខ្លាំងឡើង ដោយដ្រូន និងមីស៊ីល មកលើទីតាំងសំខាន់ៗ ក្នុងនោះមានទីស្នាក់ការកណ្តាលនៃក្រុមហ៊ុន Saudi Aramco ដែលជាក្រុមហ៊ុនប្រេងកាតជាតិអារ៉ាប៊ីសាអូឌីត។ ការសំរុកវាយប្រហារនេះ បានធ្វើឲ្យអារ៉ាប៊ីសាអូឌីត កាន់តែទ័លច្រក ខណៈគម្រោងវិនិយោគសេដ្ឋកិច្ចធំៗរបស់ព្រះអង្គម្ចាស់បិនសាល់ម៉ាន់ អាចនឹងត្រូវរាំងស្ទះ ដោយសារតែសង្គ្រាមចលាចលនេះ។