អេមីរ៉ាតអារ៉ាប់រួមនឹងមាន​អាកាសយានដ្ឋានដ៏ធំជាងគេក្នុងលោក ដែលមានសមត្ថភាពអាច​ទទួល​អ្នកដំណើរប្រមាណ ២៦០លាននាក់​ក្នុងមួយឆ្នាំ។ នៅ​ក្នុងសារ ចុះផ្សាយ​លើបណ្តាញ X កាលពីថ្ងៃអាទិត្យ​ទី ២៨​មេសា នាយករដ្ឋមន្រ្តីរបស់​អេមីរ៉ាតអារ៉ាប់រួម លោក​មូហាម៉េដ បិន រ៉ាស៊ីដ អាល់ ម៉ាកធូម បាន​សរសេរ​ថា លោកទើប​អនុម័តផែនការសាងសង់​ព្រលានយន្តហោះថ្មី​ដែលត្រូវការចំណាយទឹកប្រាក់ជាង ៣៤ពាន់លាន​ដុល្លារ។

នៅក្នុងវេទិការសំឡេងសង្រ្គោះជាតិ នាយប់ថ្ងៃទី២៧ មេសា មន្រ្តីជាន់ខ្ពស់នៃអតីតគណបក្សសង្រ្គោះជាតិមួយចំនួនដូចជា លោក អេង ឆៃអ៊ាង ជាដើម បានចេញមុខមកបញ្ជាក់ថាខ្លួននៅតែរក្សាជំហរដើរតាមលោក សម រង្ស៊ី ដើម្បីទាមទារសិទ្ធិសេរីភាព និងលទ្ធិប្រជាធិបតេយ្យសម្រាប់កម្ពុជា។ លោក អេងឆៃអ៊ាងចេញមុខមកបញ្ជាក់ នៅបន្ទាប់ពីមានមន្រ្តីជាន់ខ្ពស់នៃអតីតគណបក្សសង្រ្គោះជាតិខ្លះ បានសុំទោសរដ្ឋាភិបាល និងប្រកាសផ្ដាច់ខ្លួនពីលោក សម រង្ស៊ី។

នៅឆ្នាំនេះ រដូវប្រាំងអូសអន្លាយ មេឃក្តៅមិនទាន់ធ្លាក់ភ្លៀង អំណោយផលដល់ឲ្យការធ្វើស្រែអំបិលរហូតធ្វើឲ្យកសិករទទួលបានផលល្អ ខុសពីឆ្នាំមុនៗ។ ម្ចាស់ស្រែអំបិលក្នុងខេត្តកំពត បាននិយាយថា ដោយសារមេឃក្តៅ ស្រែអំបិលឆាប់ស្ងួតលឿន ទិន្នផលអំបិលក្នុងឆ្នាំនេះកើនឡើងខ្ពស់។ តែទោះជាយ៉ាងណា ម្ចាស់ស្រែអំបិលនៅតែត្អូញត្អែរថា តម្លៃអំបិលនៅតែថោកដដែល ដោយសារ មានការនាំចូលអំបិលពីក្រៅប្រទេស ជាពិសេសពីវៀតណាម និងថៃ។ ពីស្រែអំបិល ក្នុងខេត្តកំពត យើងស្តាប់បទយកការណ៍របស់ជួប នរក្សា៖

ប្រទេស​ជាច្រើន​ ក្នុង​តំបន់​អាស៊ីអាគ្នេយ៍និងអាស៊ីខាងត្បូង ទទួល​រងរលកកម្តៅ​ក្តៅខ្លាំង។ នៅថៃ ក្តៅ​ជាច្រើន​ថ្ងៃ​ជាប់ៗគ្នា ហើយ​កម្តៅ​ហក់​ឡើង​ដល់​ជា​ង​ ៤៤ អង្សារ។ បង់ក្លាដែស ក្តៅខ្លាំង ដល់ថ្នាក់​ប្រកាស​អាសន្ន​។ ​​ ប្រទេស​ហ្វីលីពីន បានសម្រេចបិទសាលា និង​ឲ្យ​កូន​សិស្ស​រៀន​ពីចម្ងាយ​តាម​អនឡាញ។ ភូមាដែល​ជួប​សង្គ្រាម​ស៊ីវិល ​ពលរដ្ឋ​ជាច្រើន​ត្រូវ​ទ្រាំ​លំបាក​រង​កម្តៅ ដោយ​គ្មាន​កង្ហារ ឬម៉ាស៊ីនត្រជាក់។ ​​វៀតណាម នៅប៉ែក​ខាងជើង​ប្រទេស​ដែល​ធ្លាប់​តែល្បីត្រជាក់ ពេលនេះ​កម្តៅ​ក្តៅ​ជាង​៤៣អង្សា។​ រីឯ ​កម្ពុជា អាជ្ញាធរ​ឧតុនិយម បាន​​ប្រកាស​ឲ្យ​ពលរដ្ឋ​បង្កើន​ក្តីប្រុងប្រយ័ត្ន​។  

លោកនាយករដ្ឋមន្រ្តីកម្ពុជា ហ៊ុន ម៉ាណែត បានបង្ហើបឲ្យដឹងនៅថ្ងៃអាទិត្យទី២៨មេសាថា មានក្រុមហ៊ុនចំនួន២ គ្រោងបោះទុនវិនិយោគជាង១ពាន់លានដុល្លារ នៅក្នុងការផលិតសំបកកង់ឡាននៅកម្ពុជា ដើម្បីនាំចេញទៅលក់នៅបរទេស។ បើតាមលោកនាយករដ្ឋមន្រ្តី បច្ចុប្បន្ននេះ កម្ពុជាកំពុងមានក្រុមហ៊ុនធំៗផលិតកង់ឡាននាំយកទៅលក់នៅទីផ្សារអឺរ៉ុប។ ត្រង់ចំណុចនេះ លោក ហ៊ុន ម៉ាណែតចង់បង្ហាញថា រដ្ឋាភិបាលថ្មីបាននិងកំពុងធ្វើ មិនមែនចេះតែអួត ដូចមតិរិះគន់មួយចំនួនឡើយ។

ការចេញមុខរបស់អតីតនាយករដ្ឋមន្រ្តី លោក ហ៊ុន សែន ដោយហ៊ាននិយាយជាសាធារណៈ ប្រឆាំងចំៗទៅកាន់ប្រទេសវៀតណាម ក្នុងសំណុំរឿងសាងសង់ព្រែកជីកហ្វូណននៅកម្ពុជា បានបណ្តាលមានមតិលើកឡើងផ្សេងៗគ្នា មិនចេះដាច់។ អ្នកខ្លះថា ភាពក្លាហានរបស់លោក ហ៊ុន សែន ប្រឆាំងនឹងវៀតណាមជាលើកដំបូង ជាការបង្កើនប្រជាប្រិយភាពដល់លោក ហ៊ុន ម៉ាណែត ដែលកំពុងដឹកនាំរដ្ឋាភិបាលថ្មី  ចំណែកអ្នកខ្លះថា ជាការគិតគូរយកចិត្តទុកដាក់ដើម្បីផលប្រយោជន៍ជាតិ។

ព្រះរាជាណាចក្រ​សេដ្ឋីប្រេង​ អារ៉ាប៊ីសាអូឌីត បានព្រមាន​ជាថ្មីអំពី​វិបត្តិសេដ្ឋកិច្ច​ ដែល​ដរចេញពី​សង្គ្រាម​នៅ​ហ្កាហ្សា​ ហើយ​និង​អំពាវនាវឲ្យ​ថ្នាក់ដឹកនាំ​ប្រទេស​ទាំងឡាយ រួប​រួម​គ្នា​ទប់​ស្កាត់​វិបត្តិ​ ព្រមទាំង​ជំរុញ​ស្ថិរភាព​ក្នុង​តំបន់​ដើមបូព៌ា។ សេចក្តី​ព្រមាន​និងការ​អំពាវនាវរបស់​អារ៉ាប៊ីសាអូឌីត​នេះ ធ្វើឡើង​នៅ​ថ្ងៃ​អាទិត្យ ទី​២៨មេសា ​ក្នុងនាមជា​​ម្ចាស់ផ្ទះ​រៀប​ចំ​វេទិកាសេដ្ឋកិច្ច​ពិភពលោក។ ​វេទិកាសេដ្ឋកិច្ច​ពិភព​លោក​ ដែលត្រូវ​​រៀប​ចំ​ធ្វើ​ចំនួន ២ថ្ងៃ នៅ​រាជធានី​រីយ៉ាដ​។

ម៉ូស្គូចាត់វិធានការ ដាក់សាខាក្រុមហ៊ុនបស្ចិមលោក ឲ្យនៅក្រោមការត្រួតត្រារបស់រុស្ស៊ី។ ចំពោះម៉ូស្គូ ចំណាត់ការរបស់រុស្ស៊ីជាចម្លើយតបទៅនឹងការដាក់សម្ពាធ ទណ្ឌកម្ម​ពីខាងប្រទេសខាងលិចមកលើ​បណ្តាក្រុមហ៊ុនរុស្ស៊ី។ ចំណែក បស្ចិម លោក និង សហគ្រាសខ្លះនៃប្រទេសខាងលិច នាំគ្នាបរិហារវិធានការរបស់រុស្ស៊ី ថាជា” ការធ្វើជាតូបនីយកម្មទ្រព្យសម្បត្តិរបស់ប្រទេសដទៃ”។

វត្ថុបុរាណខ្មែរចំនួន២៧ ដែលមានតម្លៃសរុបប្រមាណជិត៣លានដុល្លារ នឹងត្រូវបញ្ចូនមកកម្ពុជាវិញនាពេលដ៏ឆាប់ខាងមុខ។ នេះបើតាមសេចក្តីថ្លែងការណ៍កាលពីថ្ងៃទី២៦មេសារបស់រដ្ឋអាជ្ញាអាមេរិក ប្រចាំតំបន់មាហាតាន់ លោក AlVin Bragg។ វត្ថុបុរាណខ្មែរទាំង២៧នេះ ត្រូវបានគេលួចយកចេញពីកម្ពុជា មុននឹងធ្លាក់ក្នុងដៃរបស់ឈ្មួញជួញដូរវត្ថុបុរាណខុសច្បាប់ ក្នុងទីក្រុងញូវយ៉ក។ នៅក្នុងពិធីប្រគល់វត្ថុបុរាណដល់អ្នកតំណាងកម្ពុជានៅទីក្រុងញូវយ៉ក លោករដ្ឋអាជ្ញា Braggអះអាងថា អាជ្ញាធរអាមេរិកនឹងបន្តបើកការស៊ើបអង្កេត ស្វែងរកវត្ថុបុរាណរបស់កម្ពុជាបន្ថែមផ្សេងទៀត។

នៅសប្តាហ៍នេះ ប្រទេស​នៅអឺរ៉ុប​ចំនួន ២ គឺ​អាល្លឺម៉ង់ និងអង់គ្លេស​បាន​ចាប់ឃាត់ខ្លួន​ជាបន្តបន្ទាប់ ចារបុរស​ចិន និងជនជាតិ​របស់ខ្លួន​ដែល​លួចយកការណ៍ ទៅប្រគល់​ឲ្យ​ទីភ្នាក់ងារស៊ើបការសម្ងាត់ចិន។ នៅថ្ងៃ​សុក្រទី ២៦ មេសា តុលាការ​អង់គ្លេស​ទើបចោទប្រកាន់​ជនជាតិអង់គ្លេស​២នាក់ នៅក្នុងបទលួចលក់​ព័ត៌មានទៅ​​ឱ្យរដ្ឋបរទេស។ ករណី​ចាប់ខ្លួន​អ្នកលួចយកការណ៍​ទៅឲ្យចិន នៅក្នុង​ទឹកដីអាល្លឺ​ម៉ង់ ឬ​អង់គ្លេស ឆ្លុះបញ្ចាំង​​ពីការលូកដៃចូលកាន់តែជ្រៅ​របស់​បណ្តាញចារកម្មចិននៅទឹកដីអឺរ៉ុប ខណៈពេល​អឺរ៉ុប​ខ្លួនឯងនៅទន់ខ្សោយ មិនទាន់ត្រៀមលក្ខណៈការពារ​ខ្លួន នៅចំពោះមុខ​បណ្តាញស៊ើបការណ៍សម្ងាត់ចិន។

យ៉ាងហោច​ កងកម្លាំង​យោធា ២០ នាក់ ​បាន​ស្លាប់​បាត់​បង់​ជីវិត និង​របួស​ជាច្រើន​នាក់​ទៀត នៅ​ក្នុង​ហេតុការណ៍​ផ្ទុះ​មួយ នៅ​បន្ទាយ​ទាហាន ភូមិភាគ​៣ ក្នុង​ខេត្ត​​កំពង់ស្ពឺ។ ហេតុការណ៍​នេះ បាន​កើតឡើង​ វេលា​ម៉ោង ២និង​២៥នាទី​ រសៀល ថ្ងៃ​សៅរ៍ ទី​២៧មេសា។ ក្រោយពី​បាន​ទទួលដំណឹងអំពីឧបទ្ទវហេតុ​ផ្ទុះគ្រាប់, នាយករដ្ឋមន្ត្រីកម្ពុជា បានសម្តែង​​ក្តី«រន្ធត់ក្តុកក្តួល» ហើយ​លោក ហ៊ុន ម៉ាណែត ប្រកាស​ថា រដ្ឋាភិបាល​ទទួល​រ៉ាប់រងចាត់ចែង​​​ចំណាយ​បុណ្យសព​ ឲ្យ«សក្តិសម​នឹង​ពលីកម្ម»។

សហគមន៍ត្រពាំងសង្កែជាសហគមន៍នេសាទនិងទេសចរណ៍ដែលបានបង្កើតឡើងក្នុងឆ្នាំ២០០៩។ លោក ស៊ឹម ហ៊ីម ប្រធានសហគមន៍គឺជាបុគ្គលម្នាក់ក្នុងចំណោមមនុស្ស១៨នាក់ដែលបានផ្តួចផ្តើមឲ្យមានគំនិតរៀបចំសហគមន៍ត្រពាំងសង្កែ ក្រោយបានមើលឃើញបញ្ហាទន្រ្ទានដីព្រៃកោងកាងក្នុងតំបន់ត្រពាំងសង្កែ ពីសំណាក់ជនទុច្ចរិត។ ជាការងារស្ម័គ្រចិត្ត គ្មានប្រាក់កម្រៃ លោកស៊ឹម ហ៊ីមបានការពារ និងដាំដុះព្រៃកោងកាងបានរហូតជាង៥៨ហិកតា។ តើព្រៃកោងកាងមានសារសំខាន់យ៉ាង ណាចំពោះលោក និងសហគមន៍នេសាទក្នុងតំបន់ ហើយថា ហេតុអ្វីលោកមិនរារែកចិត្ត ដើម្បីការពារព្រៃកោងកាង? ពីឃុំត្រពាំងសង្កែ ស្រុកទឹកឈូ ខេត្តកំពត យើងស្តាប់បទយកការណ៍របស់ ជួប នរក្សា៖

នៅល្ងាចថ្ងៃទី២៦ មេសា ប្រធានព្រឹទ្ធសភា លោក ហ៊ុន សែន បានបញ្ជាក់ច្បាស់ៗរឿងគម្រោងព្រែកជីកហ្វូណនថា កម្ពុជានឹងមិនចរចាជាមួយវៀតណាម ឬប្រទេសជាសមាជិកនៃគណៈកម្មាការទន្លេមេគង្គ។ បើតាមលោក ហ៊ុន សែន កម្ពុជាត្រូវតែធ្វើគម្រោងព្រែកជីកនេះឲ្យបានជាដាច់ខាត ដោយគ្មានការរាថយឡើយ។ ការថ្លែងសារបញ្ជាក់របស់លោក ហ៊ុន សែន ធ្វើឡើង ក្រោយពេលដែលវៀតណាមតែងតែចេញមកប្រតិកម្មប្រឆាំងនឹងគម្រោងព្រែកជីករបស់កម្ពុជាថា វានឹងធ្វើឲ្យប៉ះពាល់ដល់សេដ្ឋកិច្ច បរិស្ថាន និងសន្តិសុខក្នុងតំបន់។ 

រដ្ឋាភិបាល​ស្រីលង្កា ​ប្រកាសនៅ​ថ្ងៃសុក្រទី២៦មេសា ​ថា​បាន​ជួល​អាកាសយានដ្ឋានដែល​សាងសង់ពី​លុយ​កម្ចីចិន ទៅឲ្យ​សហក្រុមហ៊ុន​ឥណ្ឌា​និងរុស្ស៊ី។ ព្រលានយន្តហោះដែល​ខ្ចីលុយ​ចិនសាងសង់​នេះ មិនទាន់​ស្ថាបនាជួសជុល​​រួចនិង​មានដំណើរការស្រួល​បួល​​នៅឡើយទេ​​ ប៉ុន្តែ​រដ្ឋាភិបាល​ស្រីលង្កា ត្រូវ​​បង្ខំ​ចិត្ត​ជួល​ឲ្យ​ក្រុម​ហ៊ុន​បរទេស​ បន្ត​គម្រោង​សាងសង់​​បង្ហើយនិង​ចាត់ចែង​ដំណើរការ​ជើង​ហោះហើរ​ ព្រោះតែ​​ក្រុម​ហ៊ុនសាធារណៈ​របស់​​រដ្ឋាភិបាល​ស្រីលង្កា ជួប​​វិបត្តិ​​ក្ស័យ​ធន​។​ ​

អ្នកនាំពាក្យរងរបស់ក្រសួងមហាផ្ទៃ លោក ទូច សុឃៈ នៅថ្ងៃទី២៧ ខែមេសានេះ បានអះអាងប្រាប់វិទ្យុបារាំងអន្ដរជាតិRFIថា ក្រសួងមហាផ្ទៃនឹងបន្ដបង្ក្រាបបទល្មើសឆបោកតាមប្រព័ន្ធអនឡាញ នៅក្នុងករណីរកឃើញមុខសញ្ញាថ្មីទៀត។​

រុស្ស៊ីបង្កើនការវាយប្រហារលើ បណ្តាញផ្លូវដែកអ៊ុយក្រែន ដើម្បី “ធ្វើឲ្យពិការ” ដល់ការដឹកស្បៀងយោធា និងសព្វាវុធប្រទេសខាងលិច ទៅផ្គត់ផ្គង់កងទ័ពអ៊ុយក្រែន នៅឯសមរភូមិជួរមុខ។ នេះជា​យុទ្ធសាស្រ្តថ្មី​របស់​រុស្ស៊ី នៅក្នុងក្របខណ្ឌនៃគម្រោងពង្រីក​ប្រតិបត្តិការវាយលុកដំណាក់កាលថ្មី នៅអ៊ុយក្រែន។ នេះបើតាម​មន្ត្រីជាន់ខ្ពស់នៃសន្តិសុខអ៊ុយក្រែន ស្រង់សំដី និងចុះផ្សាយ​ដោយ​ទីភ្នាក់ងារព័ត៌មានបារាំង AFP កាលពី ថ្ងៃសុក្រទី ២៦ មេសា។

ទីក្រុង​រីយ៉ូដឹចាណេរ៉ូ លើឆ្នេរខ្សាច់កូប៉ាកាបាណា មនុស្ស​ម្នាស្រែកហ៊ោកញ្ចៀវសប្បាយអឺងកង អបអរការប្រកាសដំណឹង ថាទីក្រុង​នេះ ត្រូវបាន​គេជ្រើសរើស​ឲ្យ​ធ្វើជាម្ចាស់ផ្ទះ រៀបចំការប្រកួតកីឡាអូឡាំពិក​ឆ្នាំ​២០១៦​។ ជាលើកទី​១ក្នុងប្រវត្តិសាស្ត្រ ដែលទីក្រុង​នៅតំបន់អាមេរិក​ខាងត្បូង ត្រូវបាន​ជ្រើស​ឲ្យ​រៀប​ចំការប្រកួតកីឡាដ៏ធំបំផុត​នៃពិភពលោក​។​ « Cidade Maravilhosa » នៅចន្លោះ​ព្រៃភ្នំនិង​សមុទ្រធំល្វឹងល្វើយ មាន​ពេល​៧ឆ្នាំ​ ដើម្បីរៀបចំខ្លួន​ឲ្យ​ក្លាយ​ជាមហាទីក្រុងអូឡាំពិក​។

នៅប្រទេស​​ចិន ក្នុង​សប្តាហ៍​នេះ បណ្តាក្រុមហ៊ុន​​រថយន្ត​អគ្គិសនីបាន​នាំគ្នា​ជួប​ជុំ​បង្អួត​បច្ចេកវិទ្យា​រថយន្តថ្មី​ៗ​ទំនើប​ៗ​​របស់ខ្លួន នៅ​ទីក្រុង​ប៉េកាំង។​ ទីផ្សារ​រថយន្ត​អគ្គិសនីក្នុងស្រុកចិន កំពុងតែ​មាន​ការប្រកួត​ប្រជែង​ខ្លាំង។​ ការ​ស្ទង់មតិ​ថ្មី​ចុងក្រោយ​ បង្ហាញឲ្យ​ឃើញថា​ ​ចំនួនអ្នក​ប្រើ​​​រថយន្ត​អគ្គិសនីនៅចិន កាន់​កើនឡើងៗ​ ជាលំដាប់ ជារៀងរាល់​ឆ្នាំ​។ ទិដ្ឋភាពនេះ ផ្ទុយ​ខុស​ពី​នៅប៉ែក​ខាង​អឺរ៉ុប និង​សហ​រដ្ឋ​អាមេរិក​​។ ​

លោកអង់តូនី ប្លីងកិន ប្រមុខការទូតអាមេរិក​ បានទៅ​បំពេញទស្សនកិច្ច​នៅប្រទេសចិន តាំងតែពី​ថ្ងៃពុធ​ ទី​២៤មេសា។ សំណុំរឿងដ៏តានតឹង​ជាច្រើន ដែល​អាមេរិក​និងចិន​ត្រូវនិយាយគ្នា តួយ៉ាងបញ្ហារុស្ស៊ី តៃវ៉ាន់ បញ្ហាពាណិជ្ជកម្ម​ និង​ការ​ជួញដូរ​សារធាតុញៀន Fentanyl ជាដើម​។​ ​កាលពីថ្ងៃសុក្រ២៦មេសា​ ​លោក​ប្រធានាធិបតីចិន ស៊ី ជីនពីង ទទួល​ជួប​លោក​អង់តូនី ប្លីងកិន​​ នៅប៉េកាំង​ ដែល​ក្នុងជំនួប​នេះ លោក​ស៊ី​ ជីនពីងបាន​អំពាវនាវ​ប្រាប់ទៅ​ភាគីអាមេរិក​ថា សូមធ្វើខ្លួន​ឲ្យក្លាយ​​​ជាដៃគូសហការ ជាជាង​ជាគូប្រជែង​នឹងចិន​។

លោកអង់តូនី ប្លីងកិន ប្រមុខការទូតអាមេរិក​ បានទៅ​បំពេញទស្សនកិច្ច​នៅប្រទេសចិន តាំងតែពី​ថ្ងៃពុធ​ ទី​២៤មេសា។ សំណុំរឿងដ៏តានតឹង​ជាច្រើន ដែល​អាមេរិក​និងចិន​ត្រូវនិយាយគ្នា តួយ៉ាងបញ្ហារុស្ស៊ី តៃវ៉ាន់ បញ្ហាពាណិជ្ជកម្ម​ និង​ការ​ជួញដូរ​សារធាតុញៀន Fentanyl ជាដើម​។​ ​កាលពីថ្ងៃសុក្រ២៦មេសា​ ​លោក​ប្រធានាធិបតីចិន ស៊ី ជីនពីង ទទួល​ជួប​លោក​អង់តូនី ប្លីងកិន​​ នៅប៉េកាំង​ ដែល​ក្នុងជំនួប​នេះ លោក​ស៊ី​ ជីនពីងបាន​អំពាវនាវ​ប្រាប់ទៅ​ភាគីអាមេរិក​ថា សូមធ្វើខ្លួន​ឲ្យក្លាយ​​​ជាដៃគូសហការ ជាជាង​ជាគូប្រជែង​នឹងចិន​។

សីតុណ្ហភាព​នៅក្នុង​ប្រទេស​កម្ពុជា​នៅតែ​បន្តឡើង​កំដៅខ្លាំង​ខុសពីឆ្នាំមុនៗ​។​ ស្ថានភាពនេះ​ធ្វើឲ្យ​តំបន់មួយចំនួន​ប្រឈមនឹង​គ្រោះរាំងស្ងួត ​និង​កង្វះខាត​ទឹក​សម្រាប់​ប្រើប្រាស់​ជាបណ្តើរៗ​។ នៅក្នុង​កិច្ច​សម្ភាស​ជាមួយ​វិទ្យុបារាំង​អន្តរជាតិ ​RFI​ នៅថ្ងៃទី​២៦​ ខែ​មេសា ឆ្នាំ​២០២៤​នេះ លោក​ សុទ្ធ គឹមកុលមុនី ​អ្នកនាំពាក្យ​គណៈកម្មាធិការជាតិ​គ្រប់គ្រង​គ្រោះមហន្តរាយ​បានឲ្យដឹងថា​លោក​នាយករដ្ឋមន្ត្រី ​ហ៊ុន ម៉ាណែត ​បានចេញ​បទបញ្ជា​នៅក្នុង​កិច្ច​ប្រជុំ​គណៈរដ្ឋមន្ត្រី​នាព្រឹក​ថ្ងៃសុក្រ​នេះ ឲ្យ​គណៈកម្មាធិការជាតិ​គ្រប់គ្រង​គ្រោះមហន្តរាយ​ដឹកនាំ​អន្តរាគមន៍​ចំពោះ​ការខ្វះខាត​ទឹក​របស់​ប្រជាពលរដ្ឋ​ជាបន្ទាន់​។

អតីតតារាចម្រៀង លោក សាពូន មីដាដា បានចេញមុខសារភាពកំហុស ជុំវិញសំណេរខុសពីការពិតរបស់ខ្លួនដែលថាលោកធ្លាប់ទទួលបានលុយជាង៦លានដុល្លារពីលោក ហ៊ុន សែន។ ការចេញមកទទួលកំហុស និងដាក់ជីវិតបម្រើលោក ហ៊ុន សែនដូច្នេះ ធ្វើឡើងក្រោយលោកហ៊ុន សែន សរសេរបកស្រាយវិញថា លោកមិនបានផ្តល់លុយរហូតដល់ទៅជាង៦លានដុល្លារឱ្យទៅអតីតតារាចម្រៀងរូបនេះនោះទេ ពោលធ្លាប់ជួយត្រឹមលុយជាង៣០ម៉ឺនដុល្លារប៉ុណ្ណោះ។

២៦ មេសា ២០១២-២៦ មេសា ២០២៤ ថ្ងៃនេះជាខួប១២ឆ្នាំនៃការសម្លាប់សកម្មជនបរិស្ថានប្រឆាំងនឹងការកាប់បំផ្លាញព្រៃឈើខុសច្បាប់លោក ឈុត វុទ្ធី។ ក្នុងឱកាសនេះ សង្គមស៊ីវិលចំនួន ៩ស្ថាប័ន និងគណបក្សនយោបាយបានស្នើឱ្យរដ្ឋមន្ដ្រីក្រសួងយុត្តិធម៌ផ្ដល់យុត្តិធម៌ដល់សកម្មជនបរិស្ថានរូបនេះ និងអ្នកកាសែត The Cambodia Daily ចំនួនពីររូបដែលត្រូវបានខ្មាន់កាំភ្លើងបាញ់សម្លាប់ក្នុងភូមិសាស្ដ្រឃុំថ្មដូនពៅ ស្រុកថ្មបាំង ខេត្តកោះកុង។ តែអ្នកនាំពាក្យក្រសួងយុត្តិធម៌ លោក ជិន ម៉ាលីនបានឆ្លើយថា បើចង់ឱ្យបើកការស៊ើបអង្កេតលើករណីដែលបានបិទបញ្ចប់ហើយមួយនេះ សង្គមស៊ីវិលដែលស្នើសុំត្រូវមានសក្ខីកម្ម ឬភស្ដុតាងថ្មីដែលមានមូលដ្ឋានរឹងមាំនៅក្នុងរឿងនេះ។

នៅថ្ងៃទី២៦ ខែមេសានេះ អយ្យការអមសាលាដំបូងខេត្តកំពង់ស្ពឺបានចោទប្រកាន់បុគ្គលឈ្មោះ ជួន គន្ធា និងឈ្មោះ មិន ផាន្នី រួមនឹងបក្សពួក ក្រោយរកឃើញថា ពួកគេបានឆបោកពលរដ្ឋពីការផ្តល់ដីចំនួន៦០០០ឡូតិ៍លើទំហំដីរបស់រដ្ឋទំហំ៤២០ហិកតាស្ថិតនៅស្រុកឱរ៉ាល់ ខេត្តកំពង់ស្ពឺ។ នេះបើតាមសេចក្តីប្រកាសព័ត៌មានរបស់អយ្យការអមសាលាដំបូងខេត្តកំពង់ស្ពឺ។

នៅថ្ងៃទី២៦ ខែមេសានេះ ប្រមុខរដ្ឋាភិបាលកម្ពុជា លោក ហ៊ុន ម៉ាណែតបានចេញសារតាមហ្វេសប៊ុកតបទៅលោក សម រង្ស៊ីដោយចាត់ទុកមេប្រឆាំងរូបនេះជាមនុស្សដែលប្រឆាំងនឹងសមិទ្ធផលជាតិ។ ចម្លើយតបរបស់លោកហ៊ុន ម៉ាណែតទៅលោកសម រង្ស៊ីដូច្នេះធ្វើឡើង ក្រោយពីលោក សម រង្ស៊ី បានធ្វើការរិះគន់ និងមិនគាំទ្រដល់គម្រោងព្រែកជីកហ្វូណនដែលភ្ជាប់ការដឹកជញ្ជូនផ្លូវទឹកពីទន្លេបាសាក់ទៅសមុទ្រ។

កងទ័ព​ជើង​ទឹក​សហរដ្ឋអាមេរិក បាន​​ផ្តើម​សាងសង់​ផែបណ្តែត ​ដើម្បីផ្តល់​ជំនួយ​ដល់​ប្រជាពលរដ្ឋ​នៅ​ហ្កាហ្សា។ នេះបើតាម​ការ​ប្រកាស​បញ្ជាក់​របស់​មន្ទីរបញ្ចកោណអាមេរិក នៅថ្ងៃព្រហស្បតិ៍ ម្សិលមិញ។​ ​គំនិត​ផ្តួច​ផ្តើម​សាងសង់​ផែ​បណ្តែត​នេះ ត្រូវ​លោកប្រធានាធិបតី​ ចូ បៃដិន បាន​បង្ហើប​ឡើង​តាំងតែ​ពីដើម​ខែមីនាមកម្ល៉េះ​​ បន្ទាប់​ពីកងទ័ព​​អ៊ីស្រាអែល បដិសេធ​ដាច់​អហង្ការ មិន​ឲ្យ​ដឹក​ជំនួយ​មនុស្សធម៌​តាម​ផ្លូវ​គោក។ ​

លោក​ម៉ាក្រុងបាន​លើកឡើងថា ដើ​ម្បី​ពង្រឹងសមត្ថភាព​ការពារខ្លួនដោយ​ខ្លួនឯង គឺអឺរ៉ុបត្រូវតែមានប្រព័ន្ធការពារជាតិរួម​គ្នា និងមានអាវុធទំនើបដូចគ្នា ផលិតដោយខ្លួនឯង​ ដោយ​មិនចាំបាច់ពឹងផ្អែក តែ​លើអាវុធ​ដែលទិញពីបរទេស​​។​ គឺក្នុង​ក្របខណ្ឌទស្សនវិស័យនេះហើយ បារាំងនិងអាល្លឺម៉ង់បានផ្តួចផ្តើម​គម្រោង​ រួមគ្នា​​ផលិត​រថក្រោះដ៏​​ទំនើប​បំផុតមួយ​ ឈ្មោះថា MGCS ។ យ៉ាងណាមិញ នៅថ្ងៃ​សុក្រទី​២៦មេសា​នេះ រដ្ឋមន្ត្រីក្រសួងការពារជាតិបារាំងនិងអាល្លឺម៉ង់ បានចាប់ផ្តើម​ការប្រជុំពិសេសមួយ ដើម្បី​បែងចែកការងារគ្នា ទៅ​ឲ្យ​ក្រុមហ៊ុន​​ឧស្សាហកម្ម​សព្វាវុធទាំងសងខាង ដើម្បីសម្រេច​ផែនការ​នេះ​។

នៅថ្ងៃទី២៥ ខែមេសា ឆ្នាំ២០២៤ សាលាដំបូងខេត្តកំពត សម្រេចបង្កកគណនីធនាគារ និងគ្រឹះស្ថានមីក្រូហិរញវត្ថុរបស់ក្រុមហ៊ុន ជា សារ៉ន​ចំនួន៩៥គណនី រួមនឹងបង្កកអចលនវត្ថុប្រភេទដីធ្លីចំនួន១ ៧៩១ក្បាលដី។ បន្ថែមពីនេះ តុលាការក៏បានចេញដីកាចាត់ឱ្យស៊ើបសួរជំនួស ដោយបង្គាប់ឱ្យសមត្ថកិច្ចស្រាវជ្រាវរកអត្តសញ្ញាណបុគ្គលដែលពាក់ព័ន្ធផ្សេងទៀត និង​ទ្រព្យសម្បត្តិរបស់ជនត្រូវចោទដើម្បីចាត់ការតាមនីតិវិធីច្បាប់។ 

ជាង៦ខែមកនេះ ហួត ស្រីយេនធ្វើដំណើរចុះសឹងគ្រប់ខេត្តក្រុងក្នុងប្រទេស​បារាំង នៅក្នុង​ក្របខណ្ឌ​ការងារស្ម័គ្រចិត្ត​របស់នាង​នៅអង្គការ​កុមារមេគង្គ។ នៅក្នុង​បេសកកម្ម​៩ខែ​នៅប្រទេស​បារាំង ដែលត្រូវ​បញ្ចប់​នៅចុងខែ​មិថុនា​ខាងមុខ ការងារ​របស់ហួតស្រីយេនគឺ​ចុះតាម​សាលារៀន​ ដើម្បីពន្យល់​ក្មេងសិស្សសាលា​បារាំង​ឲ្យ​យល់ដឹង​ពី​ទុក្ខលំបាក​របស់​ក្មេងៗនៅអាស៊ី ដែលមិនអាច​ទៅសាលារៀន​ដោយសារ​គ្រួសារក្រីក្រ។ ​កម្មវិធីរបស់​អង្គការ​កុមារមេគង្គ ដែលមានឈ្មោះថា “ខ្ញុំ​មាន​ក្តីស្រមៃមួយ” មានគោលបំណងតែមួយគត់គឺ​បញ្ជ្រាបចំណេះដឹង ឲ្យសិស្សសាលាបារាំង​ឃើញថា មានក្មេងច្រើននៅក្នុង​ប្រទេស​ដទៃ​ដែលគ្មានសំណាង​បាន​ទៅ​សាលារៀនដោយសារ​ជីវភាពខ្វះខាត គ្រួសារ​ក្រីក្រ។

លោក​ប្រធានាធិបតី​បារាំង អេម៉ានុយអែល ម៉ាក្រុង បានថ្លែងសុន្ទរកថាស្តីពីអឺរ៉ុប កាលពី​ថ្ងៃព្រហស្បតិ៍​ទី​២៥មេសា នៅ​ឯសកលវិទ្យាល័យ​សកបូនទីក្រុងប៉ារីស។ ក្នុងសុន្ទរកថាជិត​២ម៉ោង លោកម៉ាក្រុង បានអំពាវនាវ ឲ្យ​ប្រទេសសមាជិក​អឺរ៉ុបទាំង​២៧ ត្រូវងើបស្ទុះឡើងរួមកម្លាំងគ្នានៅពេលនេះ ដើម្បីស្រោចស្រង់អឺរ៉ុបពីសេចក្តីស្លាប់។ លោក​ប្រធានធិបតីបារាំង បាន​ហៅ​ឲ្យ​ប្រទេសអឺរ៉ុប ត្រូវតែ​រៀបចំផែនការសកម្មភាពជាបន្ទាន់ មិនថាសន្តិសុខការពារ​ជាតិ សេដ្ឋកិច្ច ពាណិជ្ជកម្ម​ និង​អន្តោប្រវេសន៍ ដើម្បីធ្វើ​ឲ្យ​អឺរ៉ុប​ក្លាយ​ជា «មហាអំណាច​»។​

លោក ​សម រង្ស៊ី ​ប្រធានស្តីទី​អតីត​គណបក្ស​សង្គ្រោះជាតិ​កាលពី​ថ្ងៃ​ទី​២៤ ​ខែ​មេសា ​ឆ្នាំ​២០២៤ ​បានបង្ហាញ​នូវការ​មិនគាំទ្រ​រដ្ឋាភិបាល​កម្ពុជា​ចំពោះ​គម្រោង​ព្រែកជីក​ហ្វូណន ​ដែល​ភ្ជាប់​ពី​ទន្លេបាសាក់​ទៅកាន់​សមុទ្រ។ ​ការចេញសារ​ប្រឆាំងនឹង​គម្រោងព្រែកជីក​របស់​លោក ​សម រង្ស៊ី ដូច្នេះ ​ធ្វើឡើង​ស្របពេល​ដែល​រដ្ឋាភិបាល​កម្ពុជា​ប្រកាស​ជំហរមិនដកថយ​ចំពោះ​គម្រោងជីកព្រែក​នេះ បើទោះជា​មានការ​រិះគន់​ពី​សំណាក់អ្នក​នយោបាយ​ប្រឆាំង​ខ្មែរ ​និង​មាន​ប្រតិកម្ម​ដោយ​ប្រយោល​ពី​វៀតណាម​ក៏ដោយ​។

នៅថ្ងៃទី២៤ ខែមេសា សង្គមស៊ីវិលចំនួន​៣ស្ថាប័ន រួមមានសមាគមការពារសិទ្ធិមនុស្សអាដហុក មជ្ឈមណ្ឌលសិទ្ធិមនុស្សកម្ពុជា និងមជ្ឈមណ្ឌលសាមគ្គីភាពបានចេញរបាយការណ៍​មួយស្ដីពីការឃ្លាំមើលសេរីភាពមូលដ្ឋាននៅកម្ពុជាឆ្នាំ២០២៣។ របាយការណ៍រួមបានបង្ហាញថា ក្នុង នាំ​២០២៣ ហេតុការណ៍រឹតត្បិត និងរំលោភ បំពានសេរីភាពមូលដ្ឋានមានការកើនឡើង១១% បើធៀបនឹងឆ្នាំ២០២២។ តែមន្ត្រីជាន់ខ្ពស់រដ្ឋាភិបាលបានទាត់ចោលរបាយការណ៍នេះ។