នៅថ្ងៃទី ១ឧសភា២០២៤ ខួបទី១៣៨នៃទិវាពលកម្មអន្តរជាតិ សហភាពការងារកម្ពុជា បានរៀបចំកម្មវិធីជួបជុំជាមួយកម្មករ ក្នុងវិស័យកាត់ដេរ វិស័យទេសចរណ៍ និងវិស័យសំណង់ ដើម្បីលើកឡើងពីបញ្ហាប្រឈម និងការរំលោភសិទ្ធិការងារដែលពួកគេជួបប្រទះ។ នៅបទសម្ភាសន៍ជាមួយ វិទ្យុបារាំងអន្តរជាតិ កម្មករសំណង់និយាយថា បើប្រៀបធៀបនឹងកម្មករក្នុងវិស័យកាត់ដេរជាដើម ពួកគេជួបបញ្ហាប្រឈមខ្ពស់ ទាំងក្នុងរំលោភសិទ្ធិការងារ គ្មានប្រាក់ខែគោលដែលមានចែងក្នុងច្បាប់ និងមិនបានទទួលសេវាសុខមាលភាពសង្គម។

ប្រមុខរាជរដ្ឋាភិបាលកម្ពុជា លោក ហ៊ុន ម៉ាណែត បានចេញមកអះអាងនៅថ្ងៃទី១ខែឧសភានេះថា ករណីផ្ទុះគ្រាប់នៅបន្ទាយទាហាន នៃយោធភូមិភាគទី៣ ខេត្តកំពង់ស្ពឺ គឺជា«បញ្ហាបច្ចេកទេស» មិនមែនជាបញ្ហាកងទ័ពបះបោរ ដូចក្រុមប្រឆាំងលើកឡើងឡើយ។ ការអះអាងរបស់នាយករដ្ឋមន្ត្រីបែបនេះ គឺបន្ទាប់ពីលោក សម រង្ស៊ី បានលើកឡើងថា ចលនាផ្ទៃក្នុងរបស់គណបក្សប្រជាជនកម្ពុជា និងកងកម្លាំងប្រដាប់អាវុធ ចាប់ផ្តើមផ្ទុះហើយ។ លោក សម រង្ស៊ី និយាយសំដៅដល់ករណីផ្ទុះឃ្លាំងគ្រាប់នៅខេត្តកំពង់ស្ពឺ កាលពីថ្ងៃទី ២៧ ខែមេសា ២០២៤។

សហភាពសហជីពកម្ពុជា បានស្នើឲ្យដំឡើងប្រាក់ខែគោលដល់កម្មករ និយោជិត ឲ្យបាន៣០០ដុល្លារអាមេរិក ខណៈប្រាក់ខែអប្បបរមារបស់កម្មករក្នុងវិស័យកាត់ដេរសម្រាប់ឆ្នាំ២០២៤នេះ គឺ ២០៤ដុល្លារ ក្នុង១ខែ។ ការទាមទារនេះធ្វើនៅក្នុងឱកាសប្រារព្ធទិវាពលកម្មអន្តរជាតិថ្ងៃទី១ខែឧសភាឆ្នាំ២០២៤នេះ ដោយសហភាពសហជីពកម្ពុជា។

​ស្ថានទូត​អាមេរិក​ប្រចាំកម្ពុជា​បាន​បញ្ជាក់ប្រាប់​វិទ្យុបារាំង​ RFI​ នៅថ្ងៃ​ពុធ ទី​០១ ​ខែឧសភា​នេះថា ​អាមេរិក​មិនពាក់ព័ន្ធនឹង​បញ្ហា​ព្រែកជីក​ហ្វូណន​ទេ ក៏ប៉ុន្តែ​អាមេរិក​ស្នើឲ្យ​កម្ពុជា​អនុវត្ត​ការជីកព្រែក​នេះ ប្រកបដោយ​តម្លាភាព​។ ​ការលើកឡើង​របស់​សហរដ្ឋអាមេរិក ​ស្របពេល​ដែល​នាយករដ្ឋមន្ត្រី​កម្ពុជា ​លោក​ ហ៊ុន ម៉ាណែត ​បាន​ប្រកាសជំហរ​សាជាថ្មីថា ​កម្ពុជា​ត្រូវតែ​ជីកព្រែក​ហ្វូណន​នេះឲ្យ​បាន​។

នៅ​សហរដ្ឋអាមេរិក​ នគរបាល​ក្រុង​ញូវយ៉ក បាន​ចាប់ខ្លួន​ពួក​យុវជន​និស្សិត​បាតុករ​ជាច្រើន​នាក់ ដែល​បោះជំរំ​និង​ធ្វើ​បាតុកម្ម​សម្តែង​មតិ​គាំទ្រ​ពលរដ្ឋ​ប៉ាឡេស្ទីន​ នៅសកលវិទ្យាល័យ Columbia។ ក្រៅពីចាប់​ខ្លួនហ្វូងនិស្សិត​បាតុករ, ប៉ូលិស​អាមេរិកក៏​​បាន​បោសសម្អាត​ជំរំ​ប្រមូល​ផ្តុំ​ក្នុងបរិវេណ​កន្លែងសិក្សា​ ហើយដាក់​ពង្រាយ​កង​ក​ម្លាំង​សមត្ថកិច្ច​ប្រចាំការ ដើម្បី​យាម​ឃ្លាំមើល កុំឲ្យ​មាន​សកម្មភាព​បោះជំរំ​ជាថ្មី។​ អន្តរាគមន៍​របស់​នគរបាលក្រុង​ញូវ​យ៉កនេះ​ ត្រូវរងការ​រិះគន់​យ៉ាងខ្លាំងពីសំណាក់​ក្រុម​ការពារ​សិទ្ធិមនុស្ស ថាប៉ូលិស​អាមេរិក​​«ប្រព្រឹត្ត​ឃោរ​ឃៅហួសហេតុ» ក្នុង​សង្គម«​បិតាប្រជាធិបតេយ្យ»។​ ​

ផ្អែកតាមរបាយការណ៍ ដែលចេញផ្សាយថ្មីៗនេះ ដោយក្រុមប្រឹក្សាសន្តិសុខ របស់អង្គការសហប្រជាជាតិ បានឲ្យដឹងថា អំបែងគ្រាប់ ដែលគេបានរកឃើញនៅទីក្រុង កាគីវ ប្រទេសអ៊ុយក្រែន នៅពីថ្ងៃទី ២ មករា ឆ្នាំ ២០២៤ កន្លងទៅ គឺជា បំណែករបស់គ្រាប់មីស៊ីលបាលីស្ទិក ប្រភេទ វ៉ាសុង ១១ (Hwasong 11) ដែលផលិតដោយ កូរ៉េខាងជើង ពិតប្រាកដមែន។ នេះ ជាតឹកតាងថ្មីមួយទៀត ដែលស្តែងឲ្យឃើញ អំពីការរំលោភ បំពានរបស់ កូរ៉េខាងជើង លើបម្រាមនៃក្រុមប្រឹក្សាសន្តិសុខ តាំងពីឆ្នាំ ២០០៦ ដែលហាមមិនឲ្យប្រទេសនេះ នាំអាវុធចូល ឬ ចេញទៅក្រៅប្រទេស។  របាយការណ៍ថ្មីនេះ បង្ហាញ កាន់តែច្បាស់ ពីដំណើរផ្ទេរគ្រឿងសព្វាវុធ រវាងកូរ៉េខាងជើង និង រុស្ស៊ី ដែលជាប្រទេស ២ កំពុងជាប់ក្នុង ទណ្ឌកម្មអន្តរជាតិ ដូចគ្នា។

បណ្តាប្រទេសទាំងអស់នៃ​ពិភពលោក ​បានសន្យាគ្នាថា នឹងស្វែងរកឲ្យ​បាន​នូវ​សន្ធិសញ្ញា​អន្តរជាតិមួយ ដើម្បី​កាត់បន្ថយ​ការបំពុល​បរិស្ថានដោយ​ប្លាស្ទិក នៅរវាង​ចុងឆ្នាំ​២០២៤នេះ​។ តែការប្រជុំចរចាគ្នា​ ក្នុងក្របខណ្ឌអង្គការសហប្រជាជាតិ ដែល​បានប្រព្រឹត្តិធ្វើទៅនៅ​ទីក្រុង​អូតាវ៉ា ប្រទេសកាណាសា បានបិទបញ្ចប់ទៅ​កាលពីថ្ងៃចន្ទ ទី​​២៩​មេសា ដោយ​គ្មានបានលទ្ធផលអ្វីទាំងអស់​។ ប្រទេសខ្លះបានបដិសេធ​ មិនព្រម​​កំណត់​ការដាក់កំហិត ​កាត់បន្ថយ​​ការ​ផលិត​​ទំនិញ​ប្លាស្ទិក​ទេ ដោយ​គាំទ្រតែទៅលើវិធានការ​ពង្រីកសមត្ថភាពកែច្នៃសំរាម​។​

នាវាចម្បាំងចិនចំនួន២គ្រឿងត្រូវបានប្រទះឃើញនៅកំពង់ផែរាមអស់រយៈពេលជាង៤ខែកន្លងមក។ រូបភាពពីប្រព័ន្ធផ្កាយរណបរបស់មជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិបានបង្ហាញថា នាវាចម្បាំងចិនចំនួន ២គ្រឿងបានចូលចតនៅមូលដ្ឋានកងទ័ពជើងទឹករាមកម្ពុជាតាំងពីថ្ងៃទី៣ ខែធ្នូ ឆ្នាំ ២០២៣។ អ្នកជំនាញការអាមេរិកបានអះអាងថា នេះជាជំហានដំបូងដែលបញ្ជាក់ពីការចាប់ផ្តើមមានវត្តមានកងទ័ពចិនជាផ្លូវការលើទឹកដីកម្ពុជា។

នៅថ្ងៃអង្គារ ទី៣០ ខែមេសានេះ លោកនេត្រ ភក្ត្រា រដ្ឋមន្ត្រីក្រសួងព័ត៌មានបានបង្ហាញជាសាធារណៈនូវរបាយការណ៍ស្តីពីស្ថានភាពសេរីភាពសារព័ត៌មាននៅកម្ពុជាដែលមានភាពល្អប្រសើរ។ ល្អប្រសើរព្រោះបើតាមលោកនេត្រ ភក្រ្តា មានចំនួន ៧៩.៨% នៃអ្នកសារព័ត៌មានដែលជួបសម្ភាសបានអះអាងថា សេរីភាពសារព័ត៌មាននៅកម្ពុជាក្នុងពេលបច្ចុប្បន្នមានភាពល្អប្រសើរជាងពីមុន។

ថ្ងៃចន្ទទី ២៩ មេសា បក្សកាន់អំណាចក្នុងប្រទេសហ្សកហ្ស៊ី បានប្រមូលសមាជិកបក្សរបស់ខ្លួន ទៅជួបជុំគ្នានៅមុខរដ្ឋសភាហ្សកហ្ស៊ី ដើម្បីសម្តែងការចម្លើយតប ទល់នឹងបាតុកម្ម ទ្រង់ទ្រាយធំមួយ ដែលធ្វើឡើងដោយពលរដ្ឋហ្សកហ្ស៊ីរាប់ពាន់នាក់ កាលពីថ្ងៃអាទិត្យទី ២៨ មេសា ក្នុងបំណងប្រឆាំង គម្រោងច្បាប់ស្តីពី "ភ្នាក់ងារបរទេស” ដែលពួកគេចាត់ទុកថា ជាការគំរាមកំហែង ដល់សិទ្ធិបញ្ចេញមតិ។ គួរបញ្ជាក់ថា គម្រោងច្បាប់ថ្មីនេះ កំពុងបង្ក ការបែកបាក់ប្រេះឆាក្នុងស្រទាប់មហាជន ពោលគឺមាន ប្រជាជនហ្សកហ្ស៊ីរាប់ម៉ឺននាក់ នាំគ្នាធ្វើបាតុកម្មតវ៉ា ដោយបង្ហាញទំនោររបស់ពួកទៅកាន់សហភាពអឺរ៉ុប។  ហ្វូងបាតុករប្រឆាំងច្បាប់ថ្មីនេះ ទាមទារការរក្សាសិទ្ធិបញ្ចេញមតិដោយគ្មានការរាំងខ្ទប់ ហើយរិះគន់ខ្លាំងៗ លើបក្សកាន់អំណាចនៅហ្សកហ្ស៊ី ថាកំពុងខិតទៅរកការដឹកនាំប្រទេស​តាមបែប រុស្ស៊ី។

ការ​ចាក់​ដី​លុប​ចូល​ទន្លេ​បាន​កើត​ឡើង​ជា​ថ្មី​ទៀត​នៅ​ខេត្ត​កំពង់ចាម​ដោយ​អាជ្ញាធរ​ខេត្ត​បញ្ជាក់​ថា ​សកម្មភាព​នេះ​ធ្វើ​ឡើង​ដោយ​គ្មាន​ច្បាប់​អនុញ្ញាត​។​ តែ​នៅពេល​មន្ត្រី​ចុះ​ត្រួត​ពិនិត្យ​នៅ​ថ្ងៃទី​២៩​ ខែ​មេសាបែរ​ជា​រដ្ឋបាល​ខេត្ត​អះអាង​ថា ការ​វាយ​តម្លៃ​បឋម​លើការ​ចាក់​ថ្ម​នៅ​ច្រាំង​ទន្លេ​ប្រវែង​១៦៥​ម៉ែត្រ​ក្នុង​ឃុំ​មានជ័យ ស្រុក​ស្រីសន្ធរ​ មិន​នាំ​ឲ្យ​មាន​ការ​ខូច​ខាត​ច្រាំង​ទន្លេ​ ឬ​ប៉ះ​ពាល់​លំហូរ​ទឹក​ឡើយ​។​ ទោះ​ជា​យ៉ាង​ណា អាជ្ញាធរ​ខេត្ត​បាន​បញ្ជា​ឲ្យ​ផ្អាក​សកម្មភាព​នេះ​សិន​ដោយ​រង់​ចាំការ​វាយ​តម្លៃ​ពី​ក្រសួង​ធន​ធាន​ទឹក​។​ តែ​អ្នកការ​ពារ​បរិស្ថាន​ចង់​ឃើញ​រដ្ឋាភិបាល​មាន​យន្តការ​ជាក់​លាក់​ក្នុង​រឿង​ចាក់​ដី​ទប់​ច្រាំង​ទន្លេ​ដើម្បី​ជៀស​វាង​ការ​រំលោភ​យក​សម្បត្តិ​រដ្ឋ​ធ្វើ​ជា​កម្មសិទ្ធិ​ឯក​ជន​។

ក្រុម​ហ៊ុន​Microsoft នឹងវិនិយោគទឹកប្រាក់ចំនួន​ ១៧០០លានដុល្លារ នៅឥណ្ឌូណេស៊ី ក្នុងវិស័យ​បច្ចេកវិទ្យា​បញ្ញាសិប្បនិម្មិត ដែលកំពុងតែរីកចម្រើនខ្លាំង​។ នេះបើផ្អែកតាមការប្រកាស របស់​លោក Satya Nadella អគ្គនាយក​Microsoft ដែលបានទៅជួប​លោក​ប្រធានាធិបតីឥណ្ឌូណេស៊ី ចូកូ វីដូដូ នៅថ្ងៃ​អង្គារទី​៣០មេសានេះ។ សូមបញ្ជាក់ថា ជាមួយ​នឹងប្រជាជន​ប្រមាណ​​២៨០លាននាក់ ឥណ្ឌូណេស៊ីគឺជាទីផ្សារ​ដ៏មានសក្តានុពល​បំផុត​នៅតំបន់អាស៊ីអាគ្នេយ៍​ ក្នុងវិស័យសេដ្ឋកិច្ច​បច្ចេកវិទ្យាទំនើប​។

ភូមិពងទាខ្មែរជាឈ្មោះសិប្បកម្មរបស់អ្នកស្រី ម៉ោង ស្រីពៅដែលបានទិញពងទាពីកសិករដើម្បីកែច្នៃធ្វើជាចំណីអាហារលក់។ តាមអ្នកស្រីម៉ោង ស្រីពៅ ការបង្កើតសិប្បកម្មនេះឡើង ក្រោយមើលឃើញបញ្ហាប្រឈមរបស់កសិករ​ក្នុងការរកទីផ្សារ និងតម្លៃពងទាលក់បានថោក។ ដូច្នេះសម្រាប់ម្ចាស់សិប្បកម្មូរូបនេះ ការទិញផលិតផលពីភូមិពងទាខ្មែរជាការរួមចំណែកជួយកសិករដែលចិញ្ចឹមទាយកស៊ុតលក់។

សង្រ្គាមនៅ​ហ្កាហ្សា​អូសបន្លាយជាង​៧ខែ ដោយ​សហគមន៍អន្តរជាតិ នៅក្នុង​​អាមេរិក​ នៅតែ​មិនអាច​ជួយអន្តរាគម បញ្ចុះបញ្ចូល​​អ៊ីស្រាអែលឲ្យឈប់​ធ្វើសង្រ្គាមមនុស្សនៅហ្កាហ្សា។ នៅចំពោះមុខ​ភាពទាល់ច្រក ដោយសារ​ភាគីជម្លោះ អ៊ីស្រាអែល​និងក្រុមហាម៉ាស​ប៉ាឡេស្ទីន​នៅតែចរចាមិនត្រូវគ្នារឿង​ដោះលែង​ចំណាប់ខ្មាំង អាមេរិក​ តាមរយៈ​រដ្ឋមន្រ្តីការបរទេស លោក​អង់តូនី ប្លីងកិនចាប់ផ្តើម​ងាក​ទៅអន្ទងចិត្ត​សម្ព័ន្ធអារ៉ាប់​វិញ ដែលនៅក្នុងនោះមាន អារ៉ាប៊ី សាអូឌីត​ជាប្រទេសមានទម្ងន់នយោបាយ​ខ្លាំងជាងគេ នៅក្នុង​តំបន់។ អាមេរិកចង់ខ្ចីដៃ​អារ៉ាប៊ី សាអូឌីត​ដើម្បីដាក់សម្ពាធដោយប្រយោល​ទៅ​លើរដ្ឋាភិបាល​​អ៊ីស្រាអែលរបស់លោក​​នាយករដ្ឋមន្រ្តីនេតាន់យ៉ាហ៊ូ ឲ្យ​​យល់ព្រម​ទទួលស្គាល់ការបង្កើតរដ្ឋប៉ាឡេស្ទីន។​ តើប្រទេស​អារ៉ាប់ ដូចជា​អារ៉ាប៊ី សាអូឌីត​មានអ្វីនៅក្នុងដៃ ដើម្បីទាក់ចិត្ត​អ៊ីស្រាអែល​ឲ្យស្តាប់ ធ្វើតាម​ខ្លួ​ន? យើងស្តាប់ឈាង បុប្ផា  ​

ថ្ងៃអាទិត្យទី ២៨ មេសា អាជ្ញាធររុស្ស៊ី បានចាប់ឃុំខ្លួនអ្នកកាសែតរុស្ស៊ីម្នាក់ ពីបទប្រព្រឹត្តអំពើ ជ្រុលនិយម។ លោក Serguei Kareline ត្រូវបានតុលាការចោទប្រកាន់ ថាបានចូលរួមផលិតវីដេអូ ដែលបម្រើឲ្យក្រុមការងារ របស់លោក អាឡិកសី ណាវ៉ាល់នី សកម្មជនប្រឆាំងទី១ ដែលបានស្លាប់ក្នុងពន្ធនាគារ កាលពីខែកុម្ភៈកន្លងទៅ។ គួរបញ្ជាក់ថា នៅមួយថ្ងៃមុន ពោលគឺថ្ងៃសៅរ៍ទី ២៧ មេសា អ្នកកាសែតរុស្ស៊ីម្នាក់ទៀត លោក Konstantin Gabov ក៏ត្រូវបានអាជ្ញាធររុស្ស៊ី ចាប់ឃុំខ្លួន ក្រោមបទចោទប្រកាន់តែមួយដែរ។ គួររំឭកថា ក្នុងអំឡុងពេលប៉ុន្មានខែចុងក្រោយនេះ រដ្ឋាភិបាលររុស្ស៊ី បានរឹតបន្តឹងគំនាប លើបណ្តាប្រព័ន្ធសារព័ត៌មានឯករាជ្យក្នុងស្រុក និង គ្រប់ប្រព័ន្ធផ្សព្វផ្សាយបរទេស ដែលប្រចាំការក្នុងប្រទេសនេះ ដោយមានគោលបំណងបង្ក្រាប រាល់មតិរិះគន់នានា ជុំវិញការចូលវាយលុក របស់រុស្ស៊ី ទៅក្នុងទឹកដីអ៊ុយក្រែន កាលពីជាង ២ ឆ្នាំ មុន។

ក្រោយហេតុការណ៍ផ្ទុះឃ្លាំងស្តុកគ្រាប់របស់បញ្ជាការដ្ឋានយោធភូមិភាគទី៣ខេត្តកំពង់ស្ពឺ ពលរដ្ឋរងគ្រោះដែលមានផ្ទះសម្បែរខូចខាត និងដាក់រលំបានសំណូមពរឱ្យរដ្ឋាភិបាលគិតគូផ្តល់សំណង ឬជួយជួសជុលកន្លែងខូចខាតឡើងវិញ។ ក្នុងចំណោមពលរដ្ឋរងគ្រោះជិត៣០គ្រួសារ ពលរដ្ឋខ្លះរៀបរាប់ថា បច្ចុប្បន្នពួកគេកំពុងជួបបញ្ហាសេដ្ឋកិច្ច និងបំណុល ខណៈទ្រព្យសម្បត្តិដែលខំរកតាំងពីយូរត្រូវរលាយត្រឹមមួយប៉ប្រិចភ្នែក។ សំណងដែលពលរដ្ឋចង់បាននាពេលនេះ គឺមិនច្រើនលើសលុបឡើយ ពោលត្រឹមសំណងជួសជុលផ្ទះ ដែលខូចខាច៕ ពីទីតាំង ក្បែរបញ្ជាការដ្ឋានយោធភូមិភាគទី៣ សូមស្តាប់បទយកការណ៍របស់ សាំ ឧត្តម៕ 

លោក​ប្រធានាធិបតីបារាំង អេម៉ានុយអែល ម៉ាក្រុង កំពុងតែរងការរិះគន់ជាខ្លាំង ពីបណ្តា​អ្នកនយោបាយ​បារាំង ទាក់ទិននឹង​អាវុធនុយក្លេអ៊ែរ។ បន្ទាប់ពី​បា​នថ្លែងក្នុងសុន្ទរកថា​កាលពីថ្ងៃព្រហស្បតិ៍​សប្តាហ៍មុន អំពី​ទស្សនវិស័យ​ចង់ឲ្យ​អឺរ៉ុប​មានប្រព័ន្ធការពារជាតិ​​រួមគ្នាដ៏រឹងមាំ លោក​ម៉ាក្រុងបានថ្លែងកាលពីថ្ងៃសុក្រ ថា​លោកគាំទ្រគំនិត បង្កើតឲ្យមាន​ការជជែកគ្នា ស្តីពីការយក​អាវុធនុយក្លេអ៊ែរបារាំងទៅប្រើ ដើម្បីធ្វើជាខែលការពារអឺរ៉ុបទាំងមូល​។ សម្តីនេះ បាន​ធ្វើឲ្យ​មានមតិរិះគន់ខ្លាំងៗ ថាលោក​ម៉ាក្រុង កំពុងតែបំផ្លាញ​​យុទ្ធសាស្ត្រអាវុធនុយក្លេអ៊ែរ​បារាំង​។​

រដ្ឋមន្ត្រីថាមពលនិងបរិស្ថាន នៃ​បណ្តាប្រទេសសេដ្ឋកិច្ចនាំមុខ​ទាំង​៧ ហៅកាត់ថា G7 បាន​បើកកិច្ចប្រជុំនៅទីក្រុងទូរ៉ាំង​ ភាគខាងជើងអ៊ីតាលី​។​ ជាកិច្ចប្រជុំដ៏មានសារៈសំខាន់ ដើម្បីបូក​សរុប ព្រមទាំងកំណត់ទិសដៅ ឈានទៅដោះស្រាយវិបត្តិអាកាសធាតុ។ នៅពីខាងក្រៅកិច្ចប្រជុំនេះ សកម្មជនបរិស្ថានអាកាសធាតុ ព្រមទាំង​អង្គការសហប្រជាជាតិ​ផង បានអំពាវនាវឲ្យ​ក្រុមប្រទេសសេដ្ឋកិច្ចនាំមុខទាំង​៧ ត្រូវ​តែកំណត់វិធានការឲ្យ​បានក្លាហានបំផុត ដើម្បី​ប្រយុទ្ធប្រឆាំងនឹងបម្រែបម្រួលអាកាសធាតុ។

ប្រឈម​នឹង​អាកាស​ធាតុ​ដែល​កំពុង​ឡើង​កម្តៅ​ខ្លាំង​ មាន​ប្រទេស​អាស៊ី​មួយ​ចំនួន​បាន​សម្រេច​បិទ​សា​លារៀន​។ ​នៅ​កម្ពុជា ក្រសួង​អប់រំ​តាម​រយៈ​អ្នក​នាំ​ពាក្យ ​លោកស្រី ​ឃួន វិច្ឆិកា ​បាន​បញ្ជាក់ពី​ការ​ពិចារណាលើ​វិធាន​ការ​ដូច​គ្នា​នេះ​ តែ​ថា​ស្ថាន​ភាព​នៅ​កម្ពុជា​មិន​ទាន់​ឈាន​ដល់​កម្រិត​នៃ​ការ​បិទ​សា​លារៀន​នៅ​ឡើយ​ទេ​។​ តាម លោកស្រី ឃួន វិច្ឆិកា ក្រសួង​អប់រំ បាន​ដាក់​ចេញ​នូវ​វិធាន​ការ​ចាំបាច់​ដូចជា​ឲ្យ​អ្នក​ពាក់​ព័ន្ធ​រាយការណ៍​ជា​ប្រចាំ​ដើម្បី​ដឹង​ពី​ស្ថានភាព​សិស្ស​នៅតាម​សាលា​រៀន​ក្នុង​គ្រាដែល​អាកាស​ធាតុ​កំពុង​តែ​ឡើង​កម្តៅ​។​ អ្នក​នាំពាក្យ​ក្រសួង​អប់រំ​រូប​នេះ ដដែល​បាន​បន្ថែម​ថា ​ក្នុង​ករណី​ដែល​សាលារៀន​មិន​អាច​ទប់​ទល់​នឹងស្ថាន​ភាព​កម្តៅ​បាន​ គឺ​ត្រូវ​រាយការណ៍​ជា​បន្ទាន់​ទៅ​មន្ទីរ​អប់រំ​នៅ​តាម រាជ​ធានី និង​ខេត្ត​។

លោក ​ហ៊ុន សែន ​ប្រធាន​ព្រឹទ្ធសភា​កម្ពុជា​បាន​ប្រកាស​នៅលើ​ហ្វេសប៊ុក​របស់លោក​នៅថ្ងៃ​ចន្ទ ​ទី​២៩ ​ខែ​មេសា ​ឆ្នាំ​២០២៤​នេះ​ថា ​លោក​ទទួលបាន​ថវិកា​ឧបត្ថម្ភពី​សប្បុរសជន​ជាង ​៤,៨​លានដុល្លារ​ សម្រាប់​ការរៀបចំ​ប្រកួត​បាល់ទាត់​សប្បុរសធម៌​មួយ​នៅថ្ងៃ​ទី​០១ ​ខែ​ឧសភា ​ខាងមុខ​។ ​ការទទួលបាន​ថវិកា​បរិច្ចាក​ដ៏ច្រើន​សន្ធឹកសន្ធាប់​ត្រឹម​រយៈពេល​តែ​៥​ថ្ងៃនេះ​ ធ្វើឡើង​ក្រោយ ​លោក​ ​ហ៊ុន សែន ​ប្រកាស​ដឹកនាំ​ការប្រកួត​បាល់ទាត់ ​(Cambodia football​ super ​stars) ​កាលពី​ថ្ងៃទី​ ២៥ ​ខែ មេសា ​កន្លងទៅ​។

នៅថ្ងៃទី២៩ ខែមេសា ឆ្នាំ២០២៤នេះ រដ្ឋបាលខេត្តកោះកុងបានចេញមុខច្រានចោលលើការចោទប្រកាន់របស់ក្រុមមាតាធម្មជាតិដែលថា រដ្ឋបាលខេត្តកោះកុងយកដែនជម្រកសត្វព្រៃពាមក្រសោបធ្វើជាទីលានចាក់សំរាម។ បើតាមសេចក្តីប្រកាសរបស់រដ្ឋបាលខេត្ត ទីតាំងចាក់សំរាមដែលស្ថិតក្នុងភូមិសាស្ត្រស្រុកសីមា ខេត្តកោះកុងមិនស្ថិតក្នុងតំបន់ការពារធម្មជាតិរបស់ក្រសួងបរិស្ថានទេ។

ស្ថានការណ៍​នៅក្នុងសមរភូមិអ៊ុយក្រែន​កាន់តែយ៉ាប់យ៉ឺនធ្លាក់ដុនដាបខ្លាំង នៅចំពោះមុខ​ការវាយប្រហារ​កាន់តែសន្ធឹក​របស់រុស្ស៊ី ដែលសំបូរទាំងអាវុធ និងកងទ័ព។ នៅថ្ងៃ​អាទិត្យ​ម្សិលមិញ មេទ័ពអ៊ុយក្រែនបាន​ចេញមុខសាជាថ្មី ទទួលស្គាល់ថា កងទ័ពអ៊ុយក្រែន​បានធ្លាក់ដៃប្រយុទ្ធ និងត្រូវបង្ខំចិត្ត​ដកថយ​ចេញពីទីតាំង​សមរភូមិ​មួយចំនួន ដែល​មានការវាយប្រហារ​ខ្លាំង​របស់​រុស្ស៊ី។ នៅថ្ងៃអាទិត្យដដែល រុស្ស៊ី​​អះអាងថា​ កងទ័ពរបស់ខ្លួនទើប​វាយយកបាន​ភូមិ​មួយទៀតរបស់អ៊ុយក្រែន ​នៅក្នុងតំបន់ប្រយុទ្ធយុទ្ធសាស្រ្ត​ភាគខាងកើតអ៊ុយក្រែន។

អេមីរ៉ាតអារ៉ាប់រួមនឹងមាន​អាកាសយានដ្ឋានដ៏ធំជាងគេក្នុងលោក ដែលមានសមត្ថភាពអាច​ទទួល​អ្នកដំណើរប្រមាណ ២៦០លាននាក់​ក្នុងមួយឆ្នាំ។ នៅ​ក្នុងសារ ចុះផ្សាយ​លើបណ្តាញ X កាលពីថ្ងៃអាទិត្យ​ទី ២៨​មេសា នាយករដ្ឋមន្រ្តីរបស់​អេមីរ៉ាតអារ៉ាប់រួម លោក​មូហាម៉េដ បិន រ៉ាស៊ីដ អាល់ ម៉ាកធូម បាន​សរសេរ​ថា លោកទើប​អនុម័តផែនការសាងសង់​ព្រលានយន្តហោះថ្មី​ដែលត្រូវការចំណាយទឹកប្រាក់ជាង ៣៤ពាន់លាន​ដុល្លារ។

នៅក្នុងវេទិការសំឡេងសង្រ្គោះជាតិ នាយប់ថ្ងៃទី២៧ មេសា មន្រ្តីជាន់ខ្ពស់នៃអតីតគណបក្សសង្រ្គោះជាតិមួយចំនួនដូចជា លោក អេង ឆៃអ៊ាង ជាដើម បានចេញមុខមកបញ្ជាក់ថាខ្លួននៅតែរក្សាជំហរដើរតាមលោក សម រង្ស៊ី ដើម្បីទាមទារសិទ្ធិសេរីភាព និងលទ្ធិប្រជាធិបតេយ្យសម្រាប់កម្ពុជា។ លោក អេងឆៃអ៊ាងចេញមុខមកបញ្ជាក់ នៅបន្ទាប់ពីមានមន្រ្តីជាន់ខ្ពស់នៃអតីតគណបក្សសង្រ្គោះជាតិខ្លះ បានសុំទោសរដ្ឋាភិបាល និងប្រកាសផ្ដាច់ខ្លួនពីលោក សម រង្ស៊ី។

នៅឆ្នាំនេះ រដូវប្រាំងអូសអន្លាយ មេឃក្តៅមិនទាន់ធ្លាក់ភ្លៀង អំណោយផលដល់ឲ្យការធ្វើស្រែអំបិលរហូតធ្វើឲ្យកសិករទទួលបានផលល្អ ខុសពីឆ្នាំមុនៗ។ ម្ចាស់ស្រែអំបិលក្នុងខេត្តកំពត បាននិយាយថា ដោយសារមេឃក្តៅ ស្រែអំបិលឆាប់ស្ងួតលឿន ទិន្នផលអំបិលក្នុងឆ្នាំនេះកើនឡើងខ្ពស់។ តែទោះជាយ៉ាងណា ម្ចាស់ស្រែអំបិលនៅតែត្អូញត្អែរថា តម្លៃអំបិលនៅតែថោកដដែល ដោយសារ មានការនាំចូលអំបិលពីក្រៅប្រទេស ជាពិសេសពីវៀតណាម និងថៃ។ ពីស្រែអំបិល ក្នុងខេត្តកំពត យើងស្តាប់បទយកការណ៍របស់ជួប នរក្សា៖

ប្រទេស​ជាច្រើន​ ក្នុង​តំបន់​អាស៊ីអាគ្នេយ៍និងអាស៊ីខាងត្បូង ទទួល​រងរលកកម្តៅ​ក្តៅខ្លាំង។ នៅថៃ ក្តៅ​ជាច្រើន​ថ្ងៃ​ជាប់ៗគ្នា ហើយ​កម្តៅ​ហក់​ឡើង​ដល់​ជា​ង​ ៤៤ អង្សារ។ បង់ក្លាដែស ក្តៅខ្លាំង ដល់ថ្នាក់​ប្រកាស​អាសន្ន​។ ​​ ប្រទេស​ហ្វីលីពីន បានសម្រេចបិទសាលា និង​ឲ្យ​កូន​សិស្ស​រៀន​ពីចម្ងាយ​តាម​អនឡាញ។ ភូមាដែល​ជួប​សង្គ្រាម​ស៊ីវិល ​ពលរដ្ឋ​ជាច្រើន​ត្រូវ​ទ្រាំ​លំបាក​រង​កម្តៅ ដោយ​គ្មាន​កង្ហារ ឬម៉ាស៊ីនត្រជាក់។ ​​វៀតណាម នៅប៉ែក​ខាងជើង​ប្រទេស​ដែល​ធ្លាប់​តែល្បីត្រជាក់ ពេលនេះ​កម្តៅ​ក្តៅ​ជាង​៤៣អង្សា។​ រីឯ ​កម្ពុជា អាជ្ញាធរ​ឧតុនិយម បាន​​ប្រកាស​ឲ្យ​ពលរដ្ឋ​បង្កើន​ក្តីប្រុងប្រយ័ត្ន​។  

លោកនាយករដ្ឋមន្រ្តីកម្ពុជា ហ៊ុន ម៉ាណែត បានបង្ហើបឲ្យដឹងនៅថ្ងៃអាទិត្យទី២៨មេសាថា មានក្រុមហ៊ុនចំនួន២ គ្រោងបោះទុនវិនិយោគជាង១ពាន់លានដុល្លារ នៅក្នុងការផលិតសំបកកង់ឡាននៅកម្ពុជា ដើម្បីនាំចេញទៅលក់នៅបរទេស។ បើតាមលោកនាយករដ្ឋមន្រ្តី បច្ចុប្បន្ននេះ កម្ពុជាកំពុងមានក្រុមហ៊ុនធំៗផលិតកង់ឡាននាំយកទៅលក់នៅទីផ្សារអឺរ៉ុប។ ត្រង់ចំណុចនេះ លោក ហ៊ុន ម៉ាណែតចង់បង្ហាញថា រដ្ឋាភិបាលថ្មីបាននិងកំពុងធ្វើ មិនមែនចេះតែអួត ដូចមតិរិះគន់មួយចំនួនឡើយ។

ការចេញមុខរបស់អតីតនាយករដ្ឋមន្រ្តី លោក ហ៊ុន សែន ដោយហ៊ាននិយាយជាសាធារណៈ ប្រឆាំងចំៗទៅកាន់ប្រទេសវៀតណាម ក្នុងសំណុំរឿងសាងសង់ព្រែកជីកហ្វូណននៅកម្ពុជា បានបណ្តាលមានមតិលើកឡើងផ្សេងៗគ្នា មិនចេះដាច់។ អ្នកខ្លះថា ភាពក្លាហានរបស់លោក ហ៊ុន សែន ប្រឆាំងនឹងវៀតណាមជាលើកដំបូង ជាការបង្កើនប្រជាប្រិយភាពដល់លោក ហ៊ុន ម៉ាណែត ដែលកំពុងដឹកនាំរដ្ឋាភិបាលថ្មី  ចំណែកអ្នកខ្លះថា ជាការគិតគូរយកចិត្តទុកដាក់ដើម្បីផលប្រយោជន៍ជាតិ។

ព្រះរាជាណាចក្រ​សេដ្ឋីប្រេង​ អារ៉ាប៊ីសាអូឌីត បានព្រមាន​ជាថ្មីអំពី​វិបត្តិសេដ្ឋកិច្ច​ ដែល​ដរចេញពី​សង្គ្រាម​នៅ​ហ្កាហ្សា​ ហើយ​និង​អំពាវនាវឲ្យ​ថ្នាក់ដឹកនាំ​ប្រទេស​ទាំងឡាយ រួប​រួម​គ្នា​ទប់​ស្កាត់​វិបត្តិ​ ព្រមទាំង​ជំរុញ​ស្ថិរភាព​ក្នុង​តំបន់​ដើមបូព៌ា។ សេចក្តី​ព្រមាន​និងការ​អំពាវនាវរបស់​អារ៉ាប៊ីសាអូឌីត​នេះ ធ្វើឡើង​នៅ​ថ្ងៃ​អាទិត្យ ទី​២៨មេសា ​ក្នុងនាមជា​​ម្ចាស់ផ្ទះ​រៀប​ចំ​វេទិកាសេដ្ឋកិច្ច​ពិភពលោក។ ​វេទិកាសេដ្ឋកិច្ច​ពិភព​លោក​ ដែលត្រូវ​​រៀប​ចំ​ធ្វើ​ចំនួន ២ថ្ងៃ នៅ​រាជធានី​រីយ៉ាដ​។

ម៉ូស្គូចាត់វិធានការ ដាក់សាខាក្រុមហ៊ុនបស្ចិមលោក ឲ្យនៅក្រោមការត្រួតត្រារបស់រុស្ស៊ី។ ចំពោះម៉ូស្គូ ចំណាត់ការរបស់រុស្ស៊ីជាចម្លើយតបទៅនឹងការដាក់សម្ពាធ ទណ្ឌកម្ម​ពីខាងប្រទេសខាងលិចមកលើ​បណ្តាក្រុមហ៊ុនរុស្ស៊ី។ ចំណែក បស្ចិម លោក និង សហគ្រាសខ្លះនៃប្រទេសខាងលិច នាំគ្នាបរិហារវិធានការរបស់រុស្ស៊ី ថាជា” ការធ្វើជាតូបនីយកម្មទ្រព្យសម្បត្តិរបស់ប្រទេសដទៃ”។

វត្ថុបុរាណខ្មែរចំនួន២៧ ដែលមានតម្លៃសរុបប្រមាណជិត៣លានដុល្លារ នឹងត្រូវបញ្ចូនមកកម្ពុជាវិញនាពេលដ៏ឆាប់ខាងមុខ។ នេះបើតាមសេចក្តីថ្លែងការណ៍កាលពីថ្ងៃទី២៦មេសារបស់រដ្ឋអាជ្ញាអាមេរិក ប្រចាំតំបន់មាហាតាន់ លោក AlVin Bragg។ វត្ថុបុរាណខ្មែរទាំង២៧នេះ ត្រូវបានគេលួចយកចេញពីកម្ពុជា មុននឹងធ្លាក់ក្នុងដៃរបស់ឈ្មួញជួញដូរវត្ថុបុរាណខុសច្បាប់ ក្នុងទីក្រុងញូវយ៉ក។ នៅក្នុងពិធីប្រគល់វត្ថុបុរាណដល់អ្នកតំណាងកម្ពុជានៅទីក្រុងញូវយ៉ក លោករដ្ឋអាជ្ញា Braggអះអាងថា អាជ្ញាធរអាមេរិកនឹងបន្តបើកការស៊ើបអង្កេត ស្វែងរកវត្ថុបុរាណរបស់កម្ពុជាបន្ថែមផ្សេងទៀត។

នៅសប្តាហ៍នេះ ប្រទេស​នៅអឺរ៉ុប​ចំនួន ២ គឺ​អាល្លឺម៉ង់ និងអង់គ្លេស​បាន​ចាប់ឃាត់ខ្លួន​ជាបន្តបន្ទាប់ ចារបុរស​ចិន និងជនជាតិ​របស់ខ្លួន​ដែល​លួចយកការណ៍ ទៅប្រគល់​ឲ្យ​ទីភ្នាក់ងារស៊ើបការសម្ងាត់ចិន។ នៅថ្ងៃ​សុក្រទី ២៦ មេសា តុលាការ​អង់គ្លេស​ទើបចោទប្រកាន់​ជនជាតិអង់គ្លេស​២នាក់ នៅក្នុងបទលួចលក់​ព័ត៌មានទៅ​​ឱ្យរដ្ឋបរទេស។ ករណី​ចាប់ខ្លួន​អ្នកលួចយកការណ៍​ទៅឲ្យចិន នៅក្នុង​ទឹកដីអាល្លឺ​ម៉ង់ ឬ​អង់គ្លេស ឆ្លុះបញ្ចាំង​​ពីការលូកដៃចូលកាន់តែជ្រៅ​របស់​បណ្តាញចារកម្មចិននៅទឹកដីអឺរ៉ុប ខណៈពេល​អឺរ៉ុប​ខ្លួនឯងនៅទន់ខ្សោយ មិនទាន់ត្រៀមលក្ខណៈការពារ​ខ្លួន នៅចំពោះមុខ​បណ្តាញស៊ើបការណ៍សម្ងាត់ចិន។