មានការផ្សព្វផ្សាយអនុក្រឹត្យមួយចុះថ្ងៃទី២២ ខែមីនា ឆ្នាំ២០២៤ ដោយមានហត្ថលេខារបស់លោក ហ៊ុន ម៉ាណែត ដោយបានផ្ទេរដីមួយកន្លែងដែលជាទ្រព្យសម្បត្តិសាធារណៈរបស់រដ្ឋ ឱ្យក្លាយជាកម្មសិទ្ធិរបស់គណបក្សប្រជាជនកម្ពុជា។ ក្នុងទំហំផ្ទៃដីជិត១០ម៉ឺនម៉ែត្រការ៉េនោះ ប្រមុខរដ្ឋាភិបាលកម្ពុជា បានបញ្ជាក់ថា ត្រូវធ្វើអនុប្បយោគទៅជាទ្រព្យសម្បត្តិឯកជនរបស់រដ្ឋ និងផ្ទេរការកាន់កាប់ជូនគណៈកម្មាធិការបក្សប្រជាជនកម្ពុជា ជាម្ចាស់កម្មសិទ្ធិវិញ។ បន្ទាប់ពីការ​ផ្សព្វផ្សាយនៅតាមបណ្តាញសង្គមបែបនេះ នាំឲ្យមានសំណួរចោទឡើងថា តើរដ្ឋាភិបាលមានសិទ្ធិផ្ទេរទ្រព្យសម្បត្តិរបស់រដ្ឋទៅជាកម្មសិទ្ធិរបស់គណបក្សនយោបាយឬទេ?

​នៅប្រទេស​អង់គ្លេស ចៅហ្វាយក្រុង​ឡុងដ្រ៍ លោក សាឌិក ខាន់​​ ​​មកពី​គណបក្ស​ពលករ បានជាប់ឆ្នោត​ជាថ្មី សម្រាប់​អាណត្តិទី៣។ លទ្ធផល​បោះ​ឆ្នោត​ក្រុម​ប្រឹក្សា​ឃុំសង្កាត់​និងក្រុង​ នៅចុងសប្តាហ៍​នេះ ​​បង្ហាញ​ឲ្យឃើញថា ​​គណបក្សពលករ បាន​យកឈ្នះគណ​​បក្សអភិរក្សនិយម​ ជាបក្ស​កាន់អំណាច នៅបណ្តា​ទី​ក្រុង​សំខាន់​ៗចំនួន​ជាង​១០ និង​បាន​ទទួល​អាសនៈក្រុមប្រឹក្សា ជាង​ ១៨០​ បន្ថែម។ សូម្បីតែមណ្ឌល​បោះឆ្នោត​របស់នាយករដ្ឋមន្ត្រី​អភិរក្សនិយម លោក រីស៊ី ស៊ូណាក់ ក៏ធ្លាក់​ក្នុង​ដៃបក្សពលករ ដែរ។​​​​ ជ័យជម្នះក្នុងការ​បោះឆ្នោត​ថ្នាក់​ក្រោម​ជាតិ​នេះ ក៏​បាន​ធ្វើឲ្យ​គណបក្ស​ពលករ​កាន់តែ​រីកមុខ​រីកមាត់ ​ហើយ​និង​សង្ឃឹម​ឈានទៅរក​ការ​ឈ្នះឆ្នោត​ថ្នាក់ជាតិ ដែល​​នឹង​ខិត​ចូល​មកដល់​​។​ 

តាមការគ្រោងទុក លោក​ប្រធានាធិបតីចិន ស៊ី ជីនពីង ត្រូវធ្វើដំណើរមក​ដល់​ទីក្រុងប៉ារីសប្រទេសបារាំង នៅរសៀលថ្ងៃអាទិត្យ​ ទី​៥ឧសភា។ ទស្សនកិច្ចនៅបារាំង របស់​លោក​ស៊ី ជីនពីង គឺធ្វើឡើង​ក្នុងឱកាសខួប​៦០ឆ្នាំ​ នៃទំនាក់ទំនងការទូត​ រវាង​​បារាំងនិងចិន។ បើគិតពីឆ្នាំ​២០១៩មក ពោល​គឺមុន​វិបត្តិកូវីដ​១៩ គឺនេះជាលើកទី​១ហើយ ដែល​ហើយ​ ដែល​លោកស៊ី ជីនពីង ធ្វើដំណើរ​មកទស្សនកិច្ចនៅអឺរ៉ុប។ មានសំណុំរឿងជាច្រើន ដែល​ចិននិងអឺរ៉ុប ត្រូវនិយាយគ្នា ក្នុងនោះមានបញ្ហាសេដ្ឋកិច្ចពាណិជ្ជកម្ម និងបញ្ហាសិទ្ធិមនុស្ស​នៅចិន ហើយជាពិសេសនោះ គឺសំណុំរឿង​សង្គ្រាមនៅអ៊ុយក្រែន ដែលគ្រប់គ្នាដឹងច្បាស់​ ថាចិនគឺជា​សម្ព័ន្ធមិត្តជួយ​រុស្ស៊ីពីក្រោយ​។

ភ្ញៀងធ្លាក់មួយមេធ្វើឲ្យតំបន់មួយចំនួននៅក្នុងរាជធានីភ្នំពេញចាប់ផ្ដើមលិចទឹកជាបណ្ដើរៗហើយ ដែលបញ្ហានេះជាក្ដីព្រួយបារម្ភរបស់ប្រជាពលរដ្ឋនារដូវ​វស្សាឆ្នាំនេះ។ ប៉ុន្តែ លោក កើត ឆែ អភិបាលរងរាជធានីភ្នំពេញ បន្តបដិសេធថាការលិចទឹកនៅតំបន់មួយចំនួនក្នុងរាជធានីភ្នំពេញ មិនមែនកើតឡើងដោយសារតែការលុបបឹងឡើយ។ បើតាមអភិបាលរងរូបនេះ អាជ្ញាធរបានត្រៀមខ្លួនរួចជាស្រេចក្នុងការរំដោះទឹកចេញ ដែលកើតឡើងដោយសារតែការប្រែប្រួលអាកាសធាតុនេះ។

ក្រសួងរ៉ែនិងថាមពល ប្តេជ្ញាជាថ្មីទៀត បញ្ចប់សកម្មភាពធ្វើអាជីវកម្មរ៉ែខុសច្បាប់អណាធិបតេយ្យ ដើម្បីជំរុញការធ្វើអាជីវកម្មរ៉ែស្របច្បាប់វិញសម្រាប់ទាញចំណូលចូលជាតិបន្ថែម និងទប់​ស្កាត់ផលប៉ះពាល់ដល់បរិស្ថាន។ នេះបើតាមការជូនដំណឹងរបស់ក្រសួងរ៉ែ និងថាមពល កាលពីថ្ងៃទី០៤ ឧសភា។ តាមក្រសួងរ៉ែ ចំពោះទីតាំងដែលបង្ក្រាបបាន ក្រុមការងារបច្ចេកទេសកំពុងរកវិធីសាស្ត្របន្សាបជាតិអាស៊ីត និងសារធាតុពុលផ្សេងទៀតដើម្បីទប់ស្កាត់នូវផលប៉ះពាល់នានា។

ការ​ចរចាគ្នា​រវាង​គណៈ​ប្រតិភូ​ក្រុម​ហាម៉ាសនិងប្រទេស​​អន្តរការី​ សហ​រដ្ឋ​អាមេរិក កាតារ និង អេហ្ស៊ីប គ្មាន​បាន​លទ្ធផល​ផ្លែផ្កាទេ​ កាលពី​ថ្ងៃសៅរ៍ និងដែល​តម្រូវចាំបាច់​ឲ្យ​បន្ត​ជជែក​ពិភាក្សា​គ្នា​បន្ថែម​ទៀត នៅថ្ងៃអាទិត្យ ទី៥ឧសភា​។​ កិច្ច​​ចរចា​ស្វែង​រក​បទឈប់​បាញ់និង​ដោះលែង​ចំណាប់​ខ្មាំង រៀបចំ​ធ្វើឡើង​នៅ​រដ្ឋធានី​គែរ ​ដោយ​គ្មាន​ភាគីជម្លោះ​​អ៊ីស្រាអែលនៅក្នុង​តុចរចាទេ ជំនួស​ដោយ​សម្ព័ន្ធមិត្ត​សហរដ្ឋអាមេរិក​។ ​ក្នុង​ប្រទេស​អ៊ីស្រាអែលវិញ​ បាតុករ​រាប់​ពាន់នាក់ ធ្វើបាតុករ​នៅក្រុង​ធំៗ ដើម្បី​ដាក់​សម្ពាធ​ទាមទារឲ្យ​រដ្ឋអំណាច​អ៊ីស្រាអែល​បញ្ចប់​សង្គ្រាម និង​ឈាន​ទៅដោះដូរ​​ចំណាប់ខ្មាំងឲ្យ​បានឆាប់​។ ​

ក្រសួងធនធានទឹក និងឧតុនិយម បានព្យាករថា ស្ថានភាពធាតុអាកាសនៅកម្ពុជា ដែល​ក្តៅ​បំផុត ធ្លាក់មក​ត្រឹម​៣៩​អង្សា ចាប់ពីថ្ងៃទី៥ ដល់​ថ្ងៃទី៧ ខែឧសភា ឆ្នាំ២០២៤ បន្ទាប់ពី​កម្តៅបានកើនឡើង​ដល់ជាង៤០អង្សា​កាលពីខែមេសា។

​ក្រុមប្រដាប់​អាវុធ​ហាម៉ាស បានប្លន់ធនាគារប៉ាឡេស្ទីន និង​​បំផ្ទុះ​ម៉ាស៊ីន​ដកប្រាក់ ព្រមទាំងគាស់​ទូម៉ាស៊ីន​ATM ​​ជាច្រើន​កន្លែង​ នៅទីប្រជុំជន​ក្រុង​​ហ្កាហ្សា។ គ្រាន់តែ​​ក្នុង​ខែ​មេសា ពួកគេ​នោះ​​អាច​ប្រមូល​លុយ​សរុបជា​​ទឹកប្រាក់ ប្រមាណ ៦៦ លានអឺរ៉ូ​។ នេះបើតាម​ប្រភព​ពី​កាសែតបារាំង​ឡឺម៉ុង​ និងដែលត្រូវ​ទីភ្នាក់ងារ​ព័ត៌មាន​បារាំងអាអែហ្វប៉េ យកទៅ​ផ្សាយ​ព្រោង​ព្រាត។ ​តាមប្រភព​ដដែល, នៅតំបន់​ហ្កាហ្សា កងទ័ព​ខាងអ៊ីស្រាអែល​ក៏​បាន​រឹប​​អូស​ថវិកា​ពី​ធនាគារ​ខ្លះដែ​រ​ ក្នុង​បំណង​មិនចង់ឲ្យ​លុយ​ធ្លាក់​ទៅដៃ​ពួក​ហាម៉ាស។ ​​​ ​

ស្របពេលដែលប្រទេសសឹងតែទាំងអស់​ នៅតំបន់អាស៊ីបាន​ឆ្លងកាត់រលកកម្តៅ ក្តៅហួតហែងក្នុងខែមេសាកន្លងទៅ នៅប៉ាគីស្ថានឯនោះ គឺទឹកភ្លៀងបាន​ធ្លាក់យ៉ាងច្រើនសន្ធឹក​មិនធ្លាប់មាន បើគិតចាប់ពីឆ្នាំ​១៩៦១មក។ ជំនន់ទឹកភ្លៀង ព្រមទាំងការបាក់ដី​ផង បាន​ផ្តាច់ជីវិតមនុស្ស​ យ៉ាងហោច​១៤៤នាក់ ក្នុងខែមេសាកន្លងទៅនៅប៉ាគីស្ថាន​។ ប៉ាគីស្ថានគឺជាប្រទេសក្រីក្រមួយ ដែលរងគ្រោះធ្ងន់ធ្ងរបំផុត ដោយ​កត្តាបម្រែបម្រួលអាកាសធាតុ។

អង្គការសង្គមស៊ីវិលចំនួន១១ស្ថាប័នបានចេញសេចក្ដីថ្លែងការណ៍រួមគ្នា ដោយអំពាវនាវដល់រដ្ឋាភិបាលកម្ពុជា ធានាសុវត្ថិភាពរបស់អ្នក​សារព័ត៌មាន ពិសេសពេល រាយការណ៍ពីបញ្ហាបរិស្ថាន។ បញ្ហាសុត្ថិភាពនេះគឺចំណុចអាទិភាពមួយ​ក្នុង​ចំណោមសំណើចំនួន៦ចំណុច ដែល​ត្រូវបាន​លើកឡើងដោយអង្គការសង្គមស៊ីវិល សម្រាប់ទិវាសេរីភាពសារព័ត៌មាន នៅថ្ងៃទី៣ ខែឧសភា ឆ្នាំ២០២៤។

នៅថ្ងៃទី០៣​ ខែឧសភា ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានចេញមកទាមទារឱ្យតុលាការ​​ដោះលែងមេដឹកនាំសហជីពនៅក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ជាបន្ទាន់ និងដោយឥតលក្ខខណ្ឌ។ ការទាមទារសារជាថ្មីនេះ ធ្វើឡើងក្រោយតុលាការកំពូលសម្រេចតម្កល់សាលដីកា របស់សាលាឧទ្ធរណ៍ទុកជាបានការ និងតម្រូវឱ្យកញ្ញា ឈឹម ស៊ីថរ បន្តជាប់ពន្ធនាគាររយៈពេល២ឆ្នាំ ក្រោមបទចោទ«ញុះញង់»។

នៅថ្ងៃទី៣ ខែឧសភា ឆ្នាំ២០២៤ សាលាដំបូង និងអយ្យការអមសាលាដំបូងខេត្តសៀមរាប បានសម្រេចដោះលែងឪពុកក្មេងស្រីដែលត្រូវបានគេរំលោភបូកដល់ទៅ២០នាក់ ឱ្យនៅក្រៅឃុំបណ្ដោះអាសន្ន។ ការសម្រចដោះលែងឪពុកក្មេងស្រីរងគ្រោះ ធ្វើឡើងបន្ទាប់ពីលោក កើត រិទ្ធ រដ្ឋមន្ដ្រីក្រសួងយុត្តិធម៌បានស្នើឱ្យសាលាដំបូងខេត្តសៀមរាបពិចារណាឱ្យបុគ្គលរូបនេះនៅក្រៅឃុំ តែស្ថិតក្រោមការពិនិត្យរបស់តុលាការ។

ប្រទេស​អេហ្ស៊ីប បា​នបញ្ជាក់​ថាគណៈ​ប្រតិភូ​ក្រុម​ហាម៉ាស បាន​មកដល់​រដ្ឋធានី​គែរ នៅថ្ងៃ​សៅរ៍ ទី​៤ឧសភា​​  ដើម្បី​ពិភាក្សា​ចំពោះ​សំណើចរចា​ ដែល​អ៊ីស្រាអែលបាន​សម្រេច​យល់ព្រម។ ចំណែក​​សហរដ្ឋអាមេរិកសម្ព័ន្ធមិត្ត​អ៊ីស្រាអែល គឺតំណាង​ដោយ​ប្រធាន​ក្រុម​ចារកិច្ច​ស៊ីអាយអេ ដែល​បានអញ្ជើញ​​ទៅ​ដល់​ប្រទេស​អេហ្ស៊ីប តាំងតែពី​ល្ងាច​ថ្ងៃសុក្រ​មកម្ល៉េះ។ ជាមួយ​គ្នា​នេះដែរ ប្រមុខ​ទូត​អាមេរិក លោក អង់តូនី ប្ល៊ីងកិន បាន​ថ្លែងក្នុង​វេទិកាមួយ​ ​នៅ​រដ្ឋ​អារីហ្សូណា ថា លើក​នេះ សំណើនិងការ​សន្យាព្រមព្រៀង​របស់​អ៊ីស្រាអែល ល្អខ្លាំងណាស់។​​​​

វិស័យអវកាសចិន កំពុងតែបោះជំហាន​ទៅមុខ​យ៉ាងខ្លាំង ជាមួយ​នឹងបេសកកម្ម​ដ៏ក្លាហាន និង​មុនដំបូងគេ​។ កាលពីថ្ងៃសុក្រ ទី​៣ឧសភា ចិនបានបង្ហោះយានឆាងអឺ៦ (​ Chang’e 6 ) ឆ្ពោះទៅកាន់ព្រះចន្ទ នៅ​ត្រង់ផ្នែក​ដែល​បែរខ្នងមកភពផែនដី ដែលនេះគឺជាលើកទី១ហើយ​។ ទីភ្នាក់ងារអវកាសចិនបានឲ្យដឹងថា បេសកកម្មនេះគឺដើម្បី​ស្រង់យកសំណាកដី ថ្ម និងរ៉ែ ដែលស្ថិតនៅតំបន់នោះ យក​មកសិក្សាស្រាវជ្រាវលំអិត អំពីសមាសធាតុ ព្រមទាំង​ប្រវត្តិនៃការកកើត​របស់ព្រះចន្ទ​។

លោក ស៊ុន ចាន់ថុល ​អនុ​ប្រធាន​ទី​១​នៃ​ក្រុម​ប្រឹក្សា​អភិ​វឌ្ឍន៍​កម្ពុជា​នៅ​បន្ត​ចេញ​ពន្យល់​សាធារ​ណ​ជន​ពី​គម្រោង​ព្រែក​ហ្វូណន​បន្ថែម​ទៀត ​នៅថ្ងៃ​សៅរ៍​នេះ ​ធ្វើ​ឡើង​នៅ​វិទ្យា​ស្ថាន​ពហុ​ច្ចេក​វិទ្យា​(តិចណូ)។​ ការ​បន្ត​ចេញ​មុខ​ពន្យល់​ពី​គម្រោង​នេះ ​ខណៈ​ដែល​គណៈ​កម្មា​ការ​ទន្លេ​មេគង្គ​វៀត​ណាម​ នៅ​ថ្ងៃ​ទី​០៣ ​ឧសភា​ បាន​បន្ត​ស្នើ​ឱ្យ​កម្ពុជា​ផ្តល់​ព័ត៌មាន​លម្អិត​ពី​គម្រោង​ព្រែក​ជីក​នេះ ​និង​ជំរុ​ញ​ឱ្យមាន​កិច្ច​សហការ​វាយ​តម្លៃ​ពី​ផលប៉ះ​ពាល់ និង​ស្វែង​រក​ដំណោះស្រាយ​រួម​គ្នា​។​​

រដ្ឋអំណាច​ចិន ធ្វើចារកម្មលួច​យកការណ៍​តាមប្រព័ន្ធ​បច្ចេកវិទ្យា​អ៊ីនធ័រនែត ទ្រង់ទ្រាយ​ធំ ទូទាំង​ពិភពលោក​។ នេះជា​ការ​ចោទប្រកាន់ជាថ្មី​របស់​បណ្តាអ្នក​តំណាងរាស្ត្រ​និង​ព្រឹទ្ធសមាជិកបារាំង ក្នុង​សេចក្តីដូចគ្នានឹង​ការ​ចោទប្រកាន់​របស់​សហរដ្ឋអាមេរិកនិង​ប្រទេស​អឺរ៉ុប​ផ្សេងទៀតដែរ​​។ ក្រៅពី​បាន​ប្រកាស​អាសន្នឲ្យ​ប្រុង​ប្រយ័ត្ន​ចំពោះ​ចោរព័ត៌មាន​វិទ្យា​ចិន, ​អ្នក​តំណាងរាស្ត្រ​បារាំងក៏បានស្តីបន្ទោស​រដ្ឋាភិបាល​បារាំងខ្លួនឯង​​ដែល​មិនព្រមចាត់វិធានការ​ឲ្យ​ធ្ងន់ធ្ងរ​ចំពោះ​«សកម្ម​ភាព​បង្ក​សង្គ្រាម»របស់ចិន។ ការព្រមាន​​យ៉ាងដូច្នេះ​ ធ្វើឡើង​តែ២​ថ្ងៃ​ប៉ុណ្ណោះ មុន​ដំណើរ​មក​ដល់​របស់ប្រធានាធិបតី​ចិន ស៊ី ជីនពីង នៅ​ទីក្រុង​ប៉ារីស​។​​ ​

កងទ័ពរុស្ស៊ី​បាន​អះអាងថា វាយដណ្តើម​យកភូមិអ៊ុយក្រែនជាបន្តបន្ទាប់នៅក្នុងតំបន់ភាគខាងកើត។ នៅ ថ្ងៃទី ៣​ឧសភា រដ្ឋមន្រ្តីការពារ​ជាតិ​រុស្ស៊ី លោក​សេហ្គេយ ស្ហ័ហ្គូ និយាយ​នៅក្នុងកិច្ចប្រជុំក្នុង​ទីក្រុង​ម៉ូស្គូថា គិតចាប់តាំងពី​ដើមឆ្នាំនេះ កងទ័ពរុស្ស៊ី​វាយយកបានដីអ៊ុយក្រែន ប្រមាណ ៥៤៧​គីឡូម៉ែត្រ​ការ៉េ។  ដោយសារ​ការវាយប្រហារដ៏សន្ធប់​របស់​រុស្ស៊ី ទៅលើ​ទីក្រុង ហេដ្ឋារចនាសម្ព័ន្ធ​របស់អ៊ុយក្រែន និង​ការបោះជំហាន រុលទៅមុខ​របស់​រុស្ស៊ី​ក្នុងសមភូមិប្រយុទ្ធ អនុប្រធាន​ក្រុមស៊ើបការណ៍សម្ងាត់​អ៊ុយក្រែន លោក​វ៉ាឌីម ស្គីប៊ីតស្គី​បាននិយាយប្រាប់​ទស្សនាវដ្តីThe Economist ថា នៅពេលណាមួយ អ៊ុយក្រែនត្រូវ​ចរចាជាមួយ​រុស្ស៊ី​ដើម្បី​បញ្ចប់​សង្រ្គាម​ជាង២ឆ្នាំ​មក​នេះ។

គណៈកម្មាការទន្លេមេគង្គវៀតណាមបន្តស្នើឱ្យភាគីកម្ពុជាផ្តល់ព័ត៌មានលម្អិតពីគម្រោងព្រែកជីកហ្វូណនតេជោ និងជំរុញឱ្យមានកិច្ចសហការវាយតម្លៃពីផលប៉ះពាល់ រួមនឹងការស្វែងរកដំណោះស្រាយរួមគ្នាមួយ។ នេះបើតាមការចុះផ្សាយរបស់កាសែតវៀតណាម Vietnam Net នៅថ្ងៃទី០៣ ឧសភា។ អ្វីដែលភាគីវៀតណាមស្នើសុំនាពេលនេះ គឺដើម្បីឱ្យប្រាកដជាក់ច្បាស់ថា គម្រោងព្រែកជីកហ្វូណនរបស់កម្ពុជាពិតជាមិនបង្កផលប៉ះពាល់ដល់បរិស្ថាន។ 

នៅថ្ងៃសុក្រ ទី៣ ខែឧសភា ឆ្នាំ២០២៤ នេះ លោកហ៊ុន សែនបានបញ្ចេញសារថ្លែងអំណរគុណដល់សភាប្រទេសនានាដែលបានផ្ញើសារអបអរលោកសម្រាប់តំណែងប្រធានព្រឹទ្ធសភាកម្ពុជា។ ដោយឡែក សារសម្រាប់ប្រធានសភាអ៊ុយក្រែន Ruslan STEFANCHUK លោកហ៊ុន សែនបានប្ដេជ្ញាគាំទ្រកិច្ចប្រឹងប្រែងស្ដារសន្ដិភាពនៅអ៊ុយក្រែនឡើងវិញ។ គួររម្លឹកថា នៅក្នុងសារអបអរលោកហ៊ុន សែន លោក Ruslan STEFANCHUK ក៏បានអរគុណកម្ពុជាដែលបានគាំទ្រអ៊ុយក្រែននៅក្នុងសង្គ្រាមឈ្លានពានរបស់រុស្ស៊ី។

បារាំង និង​ជប៉ុនបាន​ព្រមព្រៀង​គ្នា​ដើម្បីបើកការចរចា​ជាផ្លូវការ​ស្តីពីការ​ចូលទៅប្រើព័ត៌មានកងទ័ពគ្នាទៅវិញ ទៅមក។ នេះបើតាម​ការប្រកាស​របស់​វិមានប្រធានាធិបតីបារាំង នៅបន្ទាប់ពី​លោកប្រធានាធិបតី​បារាំង លោកម៉ាក្រុង​ទទួល​ជួបនាយករដ្ឋមន្រ្តីជប៉ុន ហ្វូមីអូ គីស៊ីដា កាលពីថ្ងៃ​ព្រហស្បតិ៍​ទី ២​ឧសភា នៅ​វិមានអេលីហ្សេ។ មានដែនដីកោះរបស់ខ្លួន​នៅ​មហាសមុទ្រ​ប៉ាស៊ីហ្វិក បារាំង​បានដៅពង្រឹង​តួនាទីរបស់ខ្លួន នៅ​អាស៊ីប៉ាស៊ីហ្វិក ដោយ​​ខិតចូលទៅ​ជិត​​ជប៉ុន តាមរយៈ​ការធ្វើសមយុទ្ធរួមគ្នា​ជាច្រើនលើក។ បារាំងទទួលនាយករដ្ឋមន្រ្តី​ជប៉ុន និង​ប្រកាស​រឹតចំណងមិត្តភាពជាមួយ​ជប៉ុន ក្នុងវិស័យយោធា នៅតែ ៣ថ្ងៃ​មុន​ដែលបារាំង​ត្រូវ​ទទួល​ប្រធានាធិបតី​ចិន លោក​ស៊ី ជីនពីង​ដែលត្រូវ​ធ្វើទស្សនកិច្ច​ផ្លូវ​រដ្ឋ​នៅ​បារាំង ចាប់ពីថ្ងៃចន្ទទី ៦​ឧសភា។

នៅថ្ងៃទី២ ខែឧសភានេះ លោកហ៊ុន សែន ប្រធានព្រឹទ្ធសភា និងលោកហ៊ុន ម៉ាណែត នាយករដ្ឋមន្ដ្រីបានចេញមុខការពារលោកស្រី ពេជ ចន្ទមុនី ភរិយាលោកហ៊ុន ម៉ាណែតដែលបានរងការវាយប្រហារពីកាសែត The Cambodia Daily វាយប្រហារ។ តាមការចុះផ្សាយរបស់កាសែត The Cambodia Daily ចុះផ្សាយក្នុងថ្ងៃទី២ ឧសភា លោកស្រីពេជ ចន្ទមុនីត្រូវបានលោកគុណ ញឹម មេគយកម្ពុជាសូកប៉ាន់ដើម្បីពន្យារពេលចូលនិវត្តន៍។ សម្រាប់មេដឹកនាំត្រកូល «ហ៊ុន» ការផ្សាយដូចនេះរបស់កាសែត The Cambodia Daily ជាអំពើថោកទាប និងឆោតល្ងង់។

ឆ្នាំ​២០២៤នេះ សេរីភាព​សារព័ត៌មានជាទូទៅ ក្នុង​ពិភពលោក ធ្លាក់​ចុះ​ ប្រមាណ​ជា ៧,៦ ពិន្ទុ។​ នេះបើតាម​របាយការណ៍​របស់​អង្គការ​អ្ន​កកាសែតគ្មាន​ព្រំដែន ដោយ​បាន​បញ្ជាក់​ឲ្យដឹង​ថា ​សិទ្ធិសេរីភាព​សារព័ត៌មាន​ស្ទើរតែ​គ្រប់​ទ្វីប​ រងការ​គំរាមកំហែង។ បណ្តាញ​ប្រព័ន្ធផ្ស​ព្វផ្សាយ​​ច្រើនឡើងៗ ​ត្រូវ​ អាជ្ញាធរ​រដ្ឋអំណាច​ ទាញ​មកគ្រប់គ្រង​ និង​​ធ្វើ​ជា​ឧបករណ៍​នយោបាយ​។ ចំណែក​អ្នក​កាសែត​ត្រូវ​រង​សម្ពាធនិងរង​វាយប្រហារ​ ហើយ​និងត្រូវ​សម្លាប់​ក្នុង​ពេល​បំពេញ​វិជ្ជា​ជីវៈ​​​។ ជាមួយ​គ្នា​នេះ អ្នក​សារព័ត៌មាន​ជំនាញ​បរិស្ថាន ស្ទើរតែ​៧០% ជា​ផ្ទាំង​ស៊ីបនៃការ​វាយ​ប្រហារ​​គាបសង្កត់។​ 

ខែឧសភា​នេះ សង្គ្រាម​រវាង​ពួក​ប្រដាប់​អាវុធ​ហាម៉ាសនិង​កងទ័ពអ៊ីស្រាអែល បើកទំព័រ​ចូល​ខែ​ទី​៧ហើយ។ អង្គការ​សហប្រជាជាតិ​ បាន​វាយតម្លៃព្យាករ​ថា សង្គ្រាម​នៅ​ហ្កាហ្សា​នេះ បង្កការ​ខូច​ខាតបាត់បង់​ធ្ងន់ធ្ងរ​ខ្លាំង​ ហើយ​និង​បានបង្កឲ្យ​អគារបាក់បែក ក្នុង​ទំហំ​​ចំនួន​ច្រើន​ជាង​សង្គ្រាម​នៅ​អ៊ុយក្រែន​។​ មិនតែប៉ុណ្ណោះ​ គ្រាប់​ច្រើន​សន្ធឹក​នៅមិនទាន់​ផ្ទុះ ហើយសារធាតុ​គីមី​បង្កជំងឺ​មហារីក នឹង​បន្តតាម​​​យាយី​ព្យាបាទ​អាយុ​ជីវិត​​ពលរដ្ឋ​ប៉ាឡេស្ទីន ជា​ច្រើន​ឆ្នាំ​ទៅមុខ​ទៀត​។ 

នៅប្រទេស​កូនកោះ​ដ៏តូច កោះសាឡូម៉ុង នៅមហាសមុទ្រ​ប៉ាស៊ីហ្វិក រដ្ឋមន្រ្តី​ការបរទេស​ដែលមាន​និន្នាការ​ទៅខាងប្រទេស​ចិន​ បាន​ជាប់ឆ្នោត​ក្លាយជា​នាយករដ្ឋមន្រ្តី​ថ្មី។ ដោយ​​ទទួលបាន​​សំឡេងគាំទ្រ​ពី​អ្នកតំណាងរាស្រ្ត​ចំនួន ៣១រូប​ ក្នុងចំណោម​អ្នកតំណាង​រាស្រ្ត​សរុប ៥០រូបនៅសភា លោកJeremiah Manele បាន​ការគាំទ្រ​ច្រើន​ជាង​គូប្រជែងមកពីគណបក្ស​ប្រឆាំងដែលមាន​ជំហរ​មិន​ស្វាគម​វត្តមាន​ចិន​ នៅលើដីកោះសាឡូម៉ុង។ ជ័យជំនះឆ្នោត​របស់​អ្នកនយោបាយស្និទ្ធនឹង​ទីក្រុងប៉េកាំង ស្ថិតក្រោមក្រសែភ្នែកតាមដាន​របស់​អាមេរិក និង​អូស្ត្រាលីដែលធ្លាប់ជា​សម្ព័ន្ធចាស់ឆ្នាំ​របស់​កោះសាឡូម៉ុង។

ខែឧសភា​នេះ សង្គ្រាម​រវាង​ពួក​ប្រដាប់​អាវុធ​ហាម៉ាសនិង​កងទ័ពអ៊ីស្រាអែល បើកទំព័រ​ចូល​ខែ​ទី​៧ហើយ។ អង្គការ​សហប្រជាជាតិ​ បាន​វាយតម្លៃព្យាករ​ថា សង្គ្រាម​នៅ​ហ្កាហ្សា​នេះ បង្កការ​ខូច​ខាតបាត់បង់​ធ្ងន់ធ្ងរ​ខ្លាំង​ ហើយ​និង​បានប្រើប្រាស់​សព្វាវុធ​គ្រាប់​បែក​គ្រាប់ផ្ទុះ ក្នុង​ទំហំ​​ចំនួន​ច្រើន​ជាង​សង្គ្រាម​នៅ​អ៊ុយក្រែន​។​ មិនតែប៉ុណ្ណោះ​ គ្រាប់​ច្រើន​សន្ធឹក​នៅមិនទាន់​ផ្ទុះ ហើយសារធាតុ​គីមី​បង្កជំងឺ​មហារីក នឹង​បន្តតាម​​​យាយី​ព្យាបាទ​អាយុ​ជីវិត​​ពលរដ្ឋ​ប៉ាឡេស្ទីន ជា​ច្រើន​ឆ្នាំ​ទៅមុខ​ទៀត​។ 

លោក​ហ៊ុន ម៉ាណែត នាយករដ្ឋមន្ដ្រី​កម្ពុជា​បាន​ប្រកាស​នៅ​ថ្ងៃទី២ ខែឧសភា ឆ្នាំ២០២៤ នេះ​ថា ទោះ​បី​ចំណូល​ពន្ធគយ​ដែល​បាន​ពី​ការ​នាំចូល​បាន​ធ្លាក់​ចុះ​ក៏​ដោយ​ក៏​មិនមែន​ជា​បញ្ហា​សម្រាប់​កម្ពុជា​ដែរ។ មិនមែន​ជា​បញ្ហា ព្រោះ​ក្រុមហ៊ុន ឬ​រោងចក្រ​ដែល​បាន​នាំ​ចូល​ទាំង​នោះ​បានមក​បើក​ដំណើរ​ការ​ផលិត​នៅ​កម្ពុជា​ដោយ​បាន​បង្កើត​ការងារ​ឲ្យ​ពលរដ្ឋ និង​នាំ​ឱ្យ​ពន្ធដារ​អាច​ប្រមូល​ពន្ធអាករ​បាន​វិញ។

ថ្ងៃទី ០៣ ឧសភាជាខួបលើកទី៣១នៃទិវាសេរីភាពសារព័ត៌មានពិភពលោក។ នៅក្នុងបទសម្ភាសជាមួយវិទ្យុបារាំងអន្តរជាតិ លោក ប៉ាទ្រីក ម័រហ្វី ឯកអគ្គរដ្ឋទូតអាមេរិកប្រចាំកម្ពុជាបានលើកឡើងពីសារៈសំខាន់ និងបញ្ហាប្រឈមនៃការប្រកបអាជីពសារព័ត៌មាន។ តែលោកកត់សម្គាល់ឃើញថា ស្ថានភាពសេរីភាពសារព័ត៌មាននៅកម្ពុជា និងនៅលើពិភពលោកកំពុងធ្លាក់ចុះ និងស្ថិតក្រោមការឡោមព័ទ្ធ។ សម្រាប់កម្ពុជា លោកប៉ាទ្រីក ម័រហ្វីបានមើលឃើញថា ការបិទស្ថាប័នសារព័ត៌មានឯករាជ្យមួយចំនួន ដូចជាសំឡេងប្រជាធិបតេយ្យ ឌឹខេមបូឌាដេលី និងវិទ្យុអាស៊ីសេរីបានឲ្យធ្វើឲ្យពលរដ្ឋមានការនឹកនា ព្រោះជាប្រភពព័ត៌មានដ៏ល្អ។ តាមលោកប៉ាទ្រីក ម័រហ្វី ការបើកលំហសេរីភាពសារព័ត៌មានជារឿងល្អសម្រាប់លទ្ធិប្រជាធិបតេយ្យដើម្បីឆ្លុះបញ្ចាំងពីទំនួលខុសត្រូវរបស់រដ្ឋាភិបាល។

សារព័ត៌មានជប៉ុន Nikkia Asia បានចុះផ្សាយកាលពីថ្ងៃទី២៩ ខែមេសាថា ក្រុមហ៊ុនឯកជនក្នុងប្រទេសកម្ពុជាកំពុងទាក់ទាញអ្នកវិនិយោគមកពីប្រទេសក្នុងតំបន់អាស៊ាន បន្ទាប់ពីអ្នកវិនិយោគចិនមួយចំនួនកំពុងរៀបចំចាកចេញពីទឹកដីកម្ពុជា។ ដោយមិនបានប្រតិកម្មទៅនឹងការចុះផ្សាយរបស់ Nikkia Asia អ្នកនាំពាក្យរដ្ឋាភិបាលកម្ពុជា លោកប៉ែន បូណាថា រដ្ឋាភិបាលតែងតែធ្វើការទូតសេដ្ឋកិច្ចជាមួយបណ្ដាប្រទេសនានាដើម្បីឲ្យកម្ពុជាក្លាយជាប្រទេសមានចំណូលមធ្យមនៅឆ្នាំ២០៣០ និងចំណូលខ្ពស់នៅឆ្នាំ២០៥០។

លោកស្រី ម៉ៅ ចំណាន ភរិយាមហាសេដ្ឋីខ្មែរដ៏មានឥទ្ធិពលគឺលោក គិត ម៉េង បានជាប់ជាប្រធានសមាគមសិល្បៈករខ្មែរសម្រាប់អាណត្តិទី៦។ នៅក្នុងការបោះឆ្នោតនាថ្ងៃទី០២ ខែឧសភា ឆ្នាំ២០២៤នេះ អតីតសិល្បៈការិនីរូបនេះ ទទួលបានសម្លេ​ងគាំទ្រច្រើនលើសលុបចំនួន ៥២៧សម្លេង លើ៦០០សម្លេង។ លទ្ធផលនេះបានវ៉ាផ្តាច់គូរប្រជែងរបស់លោកស្រី គឺលោក គួច ខេវិន និងលោក ផាត់ តារារ័ត្ន។ លោក សុះ ម៉ាច កូនប្រុសតារាចម្រៀងខ្មែរឥស្លាមដ៏ល្បីល្បាញពីសង្គមចាស់គឺលោក សុះ ម៉ាត់ និងជាអតីតប្រធានសមាគមសិល្បៈករខ្មែរចំនួន ២អាណត្តិ បានគាំទ្រយ៉ាងពេញទំហឹងចំពោះការជាប់ជាប្រធានសមាគមសិល្បៈករខ្មែរអាណត្តិទី៦នេះ។លោក សុះ ម៉ាច បានបញ្ជាក់ប្រាប់វិទ្យុបារាំងបន្ថែមថាលោកស្រី ម៉ៅ ចំណាន មានលក្ខណៈសម្បត្តិគ្រប់គ្រាន់ទាំងអស់ ពោលទាំងធនធាន រូបសម្បត្តិ និងចំណេះដឹង។ កត្តាទាំងអស់នេះហើយដែលសិល្បៈករចម្រៀងជើងចាស់រូបនេះ ដាក់ក្តីរំពឹងថាភរិយាប្រធានសភាពាណិជ្ជកម្មកម្ពុជាលោកស្រី ម៉ៅ ចំណាន អាចនឹងជួយដឹកនាំសមាគមសិល្បៈករខ្មែរឲ្យមានភាពរីចម្រើនទៅមុខបាន។

រដ្ឋាភិបាលកម្ពុជាបានប្រាប់ឲ្យដឹងថា ប្រទេសកម្ពុជាមានរោងចក្រតម្លើងរថយន្តចំនួន៦ ក្នុងនោះក៏មានក្រុមហ៊ុនយក្សផលិតរថយន្តតូយ៉ូតារបស់ជប៉ុនមួយដែរ។ វត្តមានរបស់ក្រុមហ៊ុនតម្លើងរថយន្តនៅក្នុងប្រទេសកម្ពុជាពេលនេះសមល្មមនឹងដល់ពេលដែលរដ្ឋាភិបាលមានវិធានការកាត់បន្ថយការនាំចូលរថយន្តជជុះ ឬរថយន្តមួយទឹកពីបរទេស និងលើកទឹកចិត្តប្រជាជនឲ្យប្រើរថយន្តថ្មីដែលតម្លើងក្នុងស្រុកឬយ៉ាណា?

នៅភាគខាងត្បូងប្រទេស​ចិន មនុស្ស​ជាង​៥០០នាក់កំពុងញាប់ដៃជើង នៅក្នុងសកម្មភាពជួយសង្រ្គោះ បន្ទាប់ពីមាន​គ្រោះថ្នាក់រលំបាក់ផ្លូវល្បឿនលឿនមួយកាលពីយប់​ថ្ងៃ​អង្គារ។ យោងតាម​របាយការណ៍ ចុះផ្សាយ​ដោយ​កាសែតរដ្ឋចិននៅថ្ងៃ​ព្រហស្បតិ៍ទី ២​ឧសភា នៅក្នុង​គ្រោះថ្នាក់បាក់ផ្លូវល្បឿនលឿន ក្នុង​ខេត្ត​ក្វាងទុក ចំនួន​មនុស្សស្លាប់​បាន​កើនឡើង​ដល់​៤៨នាក់​ ចំណែកមនុស្ស​របួស​​៣០នាក់ត្រូវបានបញ្ជូនទៅកាន់មន្ទីរពេទ្យ ​។ តាមការផ្សាយ​របស់​ទូរទស្សន៍រដ្ឋចិនCCTV លោកប្រធានាធិបតី​ចិន ស៊ី ជីនពីង​បានបញ្ជា​ឲ្យ​អាជ្ញាធរក្នុងស្រុក​បង្កើនល្បឿន​ជួយសង្រ្គោះមនុស្ស និង​ស្តារស្ថានការណ៍​នៅ​កន្លែងកើតហេតុ។

រដ្ឋបាល​ទីក្រុង​វ៉ាស៊ីន​តោននិងក្រុង​ម៉ូស្កូ បន្ត​មើលមុខ​គ្នា​មិន​ចំ​។ ថ្ងៃម្សិលមិញនេះ​​ សហរដ្ឋអាមេរិក​ បាន​អង្អុរមុខ​ចោទប្រកាន់​រុស្ស៊ី ដែល​បាន​​ប្រើប្រាស់​សារធាតុ​គីមី​ហាមឃាត់ ចំពោះ​ទាហាន​អ៊ុយក្រែន​។ រដ្ឋបាល​ទីក្រុង​វ៉ាស៊ីន​តោន បាន​សម្រេច​ប្រកាស​ដាក់​ទណ្ឌកម្ម​បន្ថែម ចំពោះ​ក្រុមហ៊ុន​រុស្ស៊ី និង​ភាគីទាំងឡាយ​ដែល​ជ្រោម​ជ្រែង​វិមានក្រេមឡាំង ឲ្យ​ទទួល​បាន​សារធាតុគីមី​ហាមឃាត់​ទាំងនោះ​។ ទណ្ឌកម្ម​ថ្មីបន្ថែម​នេះ ត្រូវ​ក្រសួង​ការបរទេស​អា​មេរិក ប្រកាស​​ឲ្យដឹង ​នៅថ្ងៃទី១ឧសភា​​។​