នៅថ្ងៃទី២ ខែសីហា ឆ្នាំ២០២៤នេះ អ្នកនាំពាក្យអគ្គនាយកដ្ឋានពន្ធនាគារលោក នុត សវនា បានប្រាប់វិទ្យុបារាំងអន្ដរជាតិ RFI ថាអគ្គនាយកដ្ឋានពន្ធនាគារកំពុងវាយតម្លៃសភាពការណ៍ជាក់ស្ដែងនៃទឹកជំនន់ និងបានត្រៀមរួចរាល់ ដើម្បីឆ្លើយតបទៅនឹងទឹកជំនន់ដែលអាចកើតមាន នៅតាមពន្ធនាគារ និងមណ្ឌលអប់រំកែប្រែ។ Read more
នៅក្នុងចំណោមអ្នកស្ម័គ្រចិត្តអន្តរជាតិជាង៤ម៉ឺន៥ពាន់នាក់ ដែលធ្វើការយ៉ាងសកម្មនៅក្នុងការប្រកួតកីឡាប៉ារ៉ាឡាំពិកនៅទីក្រុងប៉ារីស មានយុវជនស្ម័គ្រចិត្តកម្ពុជាប្រុសស្រី ៧រូប។ មានប្រភពចេញពីអង្គការ សមាគមក្នុងប្រទេសកម្ពុជា យុវជនស្ម័គ្រចិត្តខ្មែរវ័យក្មេងទទួលបេសកកម្មបម្រើការនៅភូមិអូឡាំពិក។ នៅទីនោះ ពួកគេត្រូវបានបែងចែកគ្នាជាច្រើនក្រុម ដើម្បីផ្តល់សេវា ជំនួយដល់គណៈប្រតិភូកីឡាមកពីបណ្តាប្រទេសផ្សេងគ្នា ដែលនៅក្នុងនោះមានផងដែរ គណៈប្រតិភូកីឡាប៉ារ៉ាឡាំពិកកម្ពុជា។
នៅដើមបូព៌ា បញ្ហាអសន្តិសុខបានរាលដាលទៅដល់ព្រំដែនអ៊ីស្រាអែលជាមួយហ្សកដានី។ នៅថ្ងៃអាទិត្យ ខ្មាន់កាំភ្លើងដែលជាអ្នកបើកឡានកាំម៉្ញុងម្នាក់បានលើកកាំភ្លើងបាញ់សម្លាប់ឆ្មាំសន្តិសុខអ៊ីស្រាអែល ៣នាក់នៅច្រកទ្វារព្រំដែនហ្សកដានីជាមួយតំបន់ស៊ីហ្សកដានីរបស់ប៉ាឡេស្ទីន ដែលអ៊ីស្រាអែលចូលគ្រប់គ្រងដោយខុសច្បាប់តាំងពីឆ្នាំ ១៩៦៧។ នៅក្រោយហេតុការណ៍បាញ់សម្លាប់បុគ្គលិកជនជាតិរបស់ខ្លួន អ៊ីស្រាអែលប្រកាសបិទគ្រប់ច្រកទ្វារព្រំដែនជាមួយហ្សកដានី។ ហ្សកដានីដែលជាសម្ព័ន្ធមិត្តរបស់អាមេរិក និងមានទំនាក់ទំនងល្អជាមួយអ៊ីស្រាអែលបានសន្យាបើកការស៊ើបអង្កេត។
លោក Edmundo Gonzalez Urrutia មេបក្សប្រឆាំងវ៉េណេស៊ុយអេឡា ត្រូវបានរដ្ឋាភិបាលអេស្ប៉ាញផ្តល់សិទ្ធិជ្រកកោននយោបាយ បន្ទាប់ពីលោកបានធ្វើទៅដល់អេស្ប៉ាញ កាលពីថ្ងៃអាទិត្យទី៨កញ្ញា។ លោក Edmundo គឺជាបេក្ខជនប្រធានាធិបតី ប្រជែងនឹងលោក នីកូឡា ម៉ាឌូរ៉ូ កាលពីពេលបោះឆ្នោតចុងខែកក្កដា។ ដោយតវ៉ាបដិសេធមិនទទួលលទ្ធផលបោះឆ្នោត មេបក្សប្រឆាំងរូបនេះ ត្រូវបានរដ្ឋអាជ្ញាវ៉េណេស៊ុយអេឡា ចេញដីកាតាមចាប់ខ្លួន ពីបទធ្វើវទ្ធង្សនា បង្កអស្ថិរភាពសង្គមជាតិ។
មូលនិធិជនពិការ កាលពីពេលថ្មីៗកន្លងទៅនេះ បានស្នើឱ្យអាជ្ញាធរមានសមត្ថកិច្ចជួយអន្ដរាគម និងចាត់វិធានការផ្លូវច្បាប់ ទៅលើក្រុមណាមួយដែលបន្លំប្រើឈ្មោះ “មូលនិធិជនពិការ” ដើម្បីរៃអង្គាសថវិកានៅតាមស្ដុប ឬផ្លូវចរាចរណ៍សាធារណៈ។ មូលនិធិជនពិការរកឃើញថា មានបុគ្គលឯកជនមួយចំនួនបានប្រើប្រាស់ឈ្មោះមូលនិធិ ទៅបន្លំរៃអង្គាសលុយ នៅតាមទីសាធារណៈដើម្បីប្រយោជន៍ផ្ទាល់ខ្លួន ខណៈមូលនិធិគ្មានកម្មវិធីដើរចល័តរៃអង្គាសនោះទេ។
កូដករណាហ្គាវើលដ៍រំពឹងថា ភាគីថៅកែក្រុមហ៊ុននឹងដោះស្រាយ បិទបញ្ចប់វិវាទការងារដែលបានអូសបន្លាយ ជិត១ពាន់ថ្ងៃមកនេះ។ ក្រុមកូដករចាប់មានក្តីសង្ឃឹមឡើងវិញ ខណៈពេលដែលតុលាការត្រៀមដោះលែងមេដឹកនាំសហជីពណាហ្គាវើលដ៍ កញ្ញាឈឹម ស៊ីថរចេញពីពន្ធនាគារ នៅពាក់កណ្តាលខែកញ្ញា ឆ្នាំ២០២៤។
នៅចុងសប្តាហ៍នេះ ក្រសួងសន្តិសុខសាធារណៈរបស់ចិនបានប្រកាសថា ក្រុមការងារ «Fox Hunt» ប្រែក្រៅផ្លូវការថា ក្រុមប្រមាញ់សត្វកញ្ច្រូង បាននាំខ្លួនជនសង្ស័យជនជាតិចិនចំនួន ៥នាក់ត្រឡប់ទៅកាន់ប្រទេសចិនវិញ បន្ទាប់ពីរកឃើញថា ពួកគេបានប្រព្រឹត្តឧក្រិដ្ឋកម្មលាងលុយកង្វក់ក្នុងប្រទេសកម្ពុជា។ នេះបើតាមការចុះផ្សាយរបស់សារព័ត៌មានចិន China daily កាលពីថ្ងៃសុក្រទី ៦ខែកញ្ញា។
បើគ្មានអ្វីប្រែប្រួល ចិននឹងផ្តល់ជំនួយនាវាចម្បាំងចំនួន២គ្រឿងមកឱ្យកម្ពុជា នៅឆ្នាំក្រោយ ឆ្នាំ២០២៥។ បើតាមការអះអាងរបស់អ្នកនាំពាក្យក្រសួងការពារជាតិកម្ពុជា ជំនួយរបស់ចិនធ្វើឡើងតាមការស្នើសុំរបស់កម្ពុជា ដើម្បីពង្រឹងសមត្ថភាព និងសន្តិសុខកម្ពុជា។ ការផ្តល់ជំនួយនាវារបស់ចិន បាននាំឲ្យប្រទេសលោកខាងលិចកាន់តែបារម្ភអំពីឥទ្ធិពលរបស់ចិនលើវិស័យការពារជាតិកម្ពុជាបន្ថែមទៀត និងជាពិសេសវត្តមានកងទ័ពចិននៅកម្ពុជា។ ក៏ប៉ុន្តែអ្នកជំនាញខ្លះយល់ថា នេះគឺជាទំនាក់ទំនងដ៏ប្រសើររវាងកម្ពុជា-ចិន ក្នុងការអភិវឌ្ឍវិស័យការពារជាតិ។
ក្រុមការងារអង្គការសហប្រជាជាតិ Unitad ដែលមានបេសកកម្មស៊ើបអង្កេត ស្តីពីឧក្រិដ្ឋកម្មបង្កឡើងដោយក្រុមជីហាតអង្គការរដ្ឋឥស្លាម បានចាកចេញពីប្រទេសអ៊ីរ៉ាក់ហើយ ទៅតាមការស្នើសុំរបស់ភាគីរដ្ឋាភិបាលអ៊ីរ៉ាក់។ លោកស្រី Ana Peyro Llopis ប្រធានបេសកកម្មនេះ បានលើកឡើងថា ៧ឆ្នាំមកនេះ ក្រុមការងារបានប្រមូលភស្តុតាង និងបានចងក្រងឯកសារសក្ខីកម្មជាច្រើន ស្តីអំពីអំពើឧក្រិដ្ឋដ៏ឃោរឃៅ ក្នុងពេលដែល ក្រុមជីហាតអង្គការរដ្ឋឥស្លាមគ្រប់គ្រងដែនដីអ៊ីរ៉ាក់។ តែទន្ទឹមនឹងនេះ លោកស្រីបានសម្តែងក្តីសោកស្តាយដែរ ដែលមានការយល់ច្រឡំ មិនយល់គ្នា រវាងក្រុមការងារ និងភាគីអ៊ីរ៉ាក់។
អាជ្ញាធរខេត្តតាកែវ បានចេញសេចក្តីជូនដំណឹងមួយ នៅថ្ងៃទី៧ ខែកញ្ញា ឆ្នាំ២០២៤ ដោយប្រាប់ពលរដ្ឋកុំឲ្យមានការភ័យខ្លាច ខណៈដែលអាកាសយានដ្ឋានអន្តរជាតិតេជោនៅក្រុងតាខ្មៅ ដែលជាប់នឹងភូមិសាស្ត្រខេត្តតាកែវដែរនោះ ចាប់ផ្តើមធ្វើការហោះហើរសាកល្បងរយៈពេល៥ថ្ងៃ ដើម្បីត្រៀមបើកប្រតិបត្តិការហោះហើរពេញលេញ នៅពាក់កណ្តាលឆ្នាំ២០២៥។
នៅថ្ងៃទី៨ ខែកញ្ញានេះ គឺជាទិវាអក្ខរកម្មជាតិ។ នាយករដ្ឋមន្រ្តីកម្ពុជា លោក ហ៊ុន ម៉ាណែត បានប្តេជ្ញាចិត្តថា រដ្ឋាភិបាលរបស់លោកដែលចាប់កំណើតបានជាងមួយឆ្នាំមកនេះ នឹងសម្រេចឲ្យបាននូវអត្រាអក្ខរកម្ម៩១%នៅឆ្នាំ២០២៨។ នេះបើតាមសារលិខិតរបស់ប្រមុខរដ្ឋាភិបាលកម្ពុជា ចុះថ្ងៃទី២៨ ខែសីហា ឆ្នាំ២០២៤ ដើម្បីអបអរទិវាអក្ខរកម្មជាតិ ៨ កញ្ញា ឆ្នាំ២០២៤។
ចេញពីអាល្លឺម៉ង់ លោកប្រធានាធិបតីអ៊ុយក្រែន បានបន្តដំណើរមកដល់ភាគខាងជើងអ៊ីតាលី កាលពីថ្ងៃសៅរ៍ ទី៧កញ្ញា ដើម្បីចូលរួមក្នុងវេទិកាសេដ្ឋកិច្ចមួយ។ លោកវ្លូឌីមៀរ ហ្សេឡេនស្គី បានថ្លែងសារជាបន្តបន្ទាប់ អំពាវនាវឲ្យប្រទេសសម្ព័ន្ធមិត្ត ជួយផ្តល់អាវុធបន្ថែមទៀតមកឲ្យអ៊ុយក្រែន និងជាពិសេសនោះ គឺត្រូវតែអនុញ្ញាតឲ្យអ៊ុយក្រែនអាចប្រើគ្រឿងសព្វាវុធទាំងនោះ វាយប្រហារទីតាំងយោធាក្នុងទឹកដីរុស្ស៊ី។ លោកស្រីម៉េឡូនី ប្រមុខរដ្ឋាភិបាលអ៊ីតាលី បានធានាប្រាប់លោកហ្សេឡេនស្គីសាជាថ្មី អំពីការជួយគាំទ្រដោយឥតរាថយរបស់អ៊ីតាលី ចំពោះអ៊ុយក្រែន។
បន្ទាប់ពីជួបបញ្ហាបច្ចេកទេសក្នុងពេលតភ្ជាប់ជាមួយស្ថានីយ៍យានអវកាសអន្តរជាតិកាលពីខែ មិថុនាកន្លងទៅ យានអវកាស Starliner របស់ក្រុមហ៊ុនប៊ូអ៊ីងបានផ្តាច់ខ្លួន និងវិលត្រលប់មកផែនដីវិញ ដោយសុវត្ថិភាពកាលពីយប់ថ្ងៃសុក្រទី ៧ កញ្ញា។ ប៉ុន្តែជាការកត់សំគាល់ អវកាសយាននិកពីរនាក់របស់ទីភ្នាក់ងារណាសា ដែលយាន Starlinerបានដឹកទៅដាក់ស្ថានីយ៍អវកាសកាលពីមិថុនា គ្មានវត្តមាននៅក្នុងយានដែលវិលត្រលប់មកផែនដី។ ទីភ្នាក់ងារអវកាសណាសាធ្លាប់បានធ្វើសន្និសីទកាសែតកាលពីចុងខែសីហាកន្លងទៅ ដើម្បីបញ្ជាក់ថា អវកាសយានិករបស់ក្រុមហ៊ុនប៊ូអ៊ីងនឹងបន្តរស់នៅ ស្ថានីយ៍អវកាសរហូតដល់កុម្ភៈឆ្នាំ ២០២៥ មុននឹងអាចត្រលប់មកផែនដីវិញ ជាមួយ យានរបស់ក្រុមហ៊ុនSpace X ដែលជាគូប្រជែងរបស់ក្រុមហ៊ុនប៊ូអ៊ីង។
ចាប់ពីថ្ងៃទី២ កញ្ញាមក ពលរដ្ឋដែលបង្កបង្កើនផលនៅតំបន់ ២ នៃបឹងទន្លេសាបក្នុងស្រុកព្រះនេត្រព្រះ ខេត្តបន្ទាយមានជ័យចំនួន ២២០គ្រួសារបានចេញមកតវ៉ាលើចំណាត់ការដោះដូរទៅទីតាំងថ្មីរបស់អាជ្ញាធរខេត្ត។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី៦ កញ្ញានេះ លោក អ៊ិន គង់ជិត ប្រធានការិយាល័យអង្គការលីកាដូប្រចាំខេត្តបន្ទាយមានជ័យបានលើកឡើងថា មូលហេតុនៃការចេញតវ៉ារបស់ពលរដ្ឋទាំងជាង ២០០គ្រួសារដោយសារទីតាំងដោះដូរនោះមានចម្ងាយឆ្ងាយពីទីតាំងចាស់ និងក្រោយពីពលរដ្ឋសង្កេតឃើញមានភាពមិនប្រក្រតីមួយចំនួននៅក្នុងដំណើរការដោះដូរ។ ក្នុងនាមជាមន្ត្រីឃ្លាំមើលបញ្ហាសិទ្ធិមនុស្សម្នាក់ លោកអ៊ិន គង់ជិតចង់ឃើញចំណាត់ការដោះដូរដីអាស្រ័យផលនៅបឹងទន្លេសាបរបស់អាជ្ញាធរនេះប្រកបដោយតម្លាភាព៕
នៅក្នុងរបាយការណ៍របស់ខ្លួនដែលចេញផ្សាយ នៅថ្ងៃទី៦ ខែកញ្ញា ឆ្នាំ២០២៤ អង្គការសមាគមធាងត្នោតបានលើកឡើងថា ទីក្រុងភ្នំពេញត្រូវតែរកវិធីដាក់បញ្ចូលទីធ្លាសាធារណៈបន្ថែម ជាពិសេសនៅតាមសហគមន៍ក្រីក្រ ពីព្រោះទីធ្លាសាធារណៈទាំងនោះអាចជួយជំរុញឱ្យប្រសើរឡើងនូវលទ្ធភាពរស់នៅរបស់ប្រជាជនក្រីក្រ។ អ្នកនាំពាក្យសាលាក្រុងភ្នំពេញបញ្ជាក់ថា សាលាក្រុងបានគិតគូររួចរាល់ហើយ និងមានគម្រោងបង្កើតទីធ្លាសាធារណៈបន្ថែមទៀតផងដែរ។
ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+3 (AMRO) ព្យាករកំណើនសេដ្ឋកិច្ចកម្ពុជាក្នុងរង្វង់៥,៦% សម្រាប់ឆ្នាំ២០២៤នេះ ខណៈរដ្ឋាភិបាលតាមរយៈក្រសួងសេដ្ឋកិច្ចរំពឹងកំណើនសេដ្ឋកិច្ចឆ្នាំ២០២៤នេះស្ទុះងើបឡើងដល់៦,៦%។ ចំពោះអ្នកវិភាគសេដ្ឋកិច្ច ការព្យាកររបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+3 នៅវិជ្ជមានដដែល ព្រោះថាសេដ្ឋកិច្ចកម្ពុជាក្នុងឆ្នាំ២០២៣កន្លងទៅ កើនក្នុងអត្រាតែ៥%ប៉ុណ្ណោះ។
ខ្យល់ព្យុះទីហ្វុងដ៏កំណាច ឈ្មោះ យ៉ាជី (YAGI) បានបោកសង្គ្រុប មកលើភាគខាងជើងប្រទេសវៀតណាម នៅព្រឹកថ្ងៃសៅរ៍ទី៧កញ្ញា។ មានល្បឿនខ្យល់ប្រមាណ២៣០គីឡូម៉ែត្រក្នុងមួយម៉ោង នេះគឺជាព្យុះសង្ឃរាដ៏ខ្លាំងក្លា ដែលវៀតណាមកម្របានធ្លាប់ជួបប្រទះ។ មុននឹងមកដល់វៀតណាម ព្យុះនេះបានបក់ឆ្លងកាត់ កោះហៃណាន ភាគខាងត្បូងប្រទេសចិន បណ្តាលឲ្យស្លាប់មនុស្សយ៉ាងហោច២នាក់ និងរបួសជិត១០០នាក់ទៀត។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្ដរាយ បានប្រាប់វិទ្យុបារាំងអន្ដរជាតិ RFI នៅថ្ងៃទី៧ ខែកញ្ញា ឆ្នាំ២០២៤នេះថា គណៈកម្មាធិការជាតិគ្រប់គ្រងគ្រោះមហន្ដរាយ កំពុងតាមដានគ្រប់ប្រភព និងត្រៀមខ្លួនរួចរាល់ដើម្បីបង្ការគ្រោះថ្នាក់ ក្នុងករណីឡាវបើកទំនប់បង្ហូរទឹក។ ប្រទេសឡាវបានប្រកាសថា នឹងបើកទំនប់អគ្គិសនីនៅថ្ងៃសៅរ៍នេះ ដើម្បីបង្ការទឹកជំនន់ដែលបង្កឡើងដោយព្យុះសង្ឃរាយ៉ាកជី។
អនុក្រឹត្យរបស់រដ្ឋាភិបាលចុះថ្ងៃទី៤ ខែមិថុនា ឆ្នាំ ២០២៤ ដែលសមាគមឧកញ៉ាកម្ពុជាបានចុះផ្សាយកាលពីពេលថ្មីៗនេះ បានកំណត់ថា ដើម្បីទទួលគោរមងារជា«លោកអ្នកឧកញ៉ា» គឺទាល់តែអ្នកនោះបានចំណាយថវិកាជួយជាតិយ៉ាងតិច៤លានដុល្លារអាមេរិក។ ចំណែកគោរមងារជា «អ្នកឧកញ៉ា» គឺត្រូវបានចំណាយថវិកាជួយជាតិយ៉ាងតិច១លានដុល្លារ ខណៈគោរមងារជា«ឧកញ៉ា» គឺត្រូវបានចំណាយថវិកាជួយជាតិយ៉ាងតិច៥០ម៉ឺនដុល្លារ។ លើសពីនេះ នៅក្នុងអនុក្រឹត្យថ្មីនេះ រដ្ឋាភិបាលបានតម្រូវឲ្យ«លោកអ្នកឧកញ៉ា»ត្រូវបង់វិភាគទានប្រចាំឆ្នាំ១០ម៉ឺនដុល្លារ។ ចំណែក«អ្នកឧកញ៉ា» ត្រូវបង់វិភាគទានប្រចាំឆ្នាំ១ម៉ឺន៥ពាន់ដុល្លារ និង «ឧកញ៉ា»ត្រូវបង់វិភាគទានប្រចាំឆ្នាំ៨ពាន់ដុល្លារ។
កម្ពុជា-ចិន បានប្តេជ្ញាចិត្តរួមគ្នាក្នុងការពង្រឹងកិច្ចសហការផ្នែកសន្តិសុខ ដើម្បីទប់ស្កាត់បទឧក្រិដ្ឋកម្មឆ្លងដែន។ ការប្តេជ្ញានេះ ធ្វើឡើងតាមរយៈជំនួបផ្លូវការរវាងលោក ស សុខា រដ្ឋមន្ត្រីក្រសួងមហាផ្ទៃ និងលោក វ៉ាង ស៊ាវហុង រដ្ឋមន្ត្រីក្រសួងសន្តិសុខសាធារណៈ នៅប្រទេសចិន កាលពីថ្ងៃទី០៦កញ្ញា។
អនាគតប្រធានាធិបតីឥណ្ឌូណេស៊ី លោក ប្រ៉ាបូវ៉ូ ស៊ូប៊ីយ៉ាតូ Prabowo Subianto បានមកបំពេញទស្សនកិច្ចជាផ្លូវការនៅកម្ពុជា កាលពីថ្ងៃសុក្រទី០៦កញ្ញា។ ការមកបំពេញទស្សនកិច្ចនៅកម្ពុជា ធ្វើឡើងនៅមុនពេលលោកត្រៀមខ្លួនក្លាយជាប្រធានាធិបតីឥណ្ឌូណេស៊ី នាអំឡុងខែតុលាខាងមុខ និងចួនចំពេលដែលឥណ្ឌូណេស៊ីទើបផ្តល់ជំនួយសព្វាវុធដល់កម្ពុជា។
នៅថ្ងៃទី៦ ខែកញ្ញា ឆ្នាំ២០២៤ នេះ រដ្ឋាភិបាលជប៉ុន តាមរយៈស្ថានទូតរបស់ខ្លួនប្រចាំប្រទេសកម្ពុជាបានចុះហត្ថលេខាផ្ដល់កម្ចីសម្បទានដល់កម្ពុជាចំនួន ៧ ៩៨៨លានយ៉េន ឬស្មើប្រមាណ ៥៥លានដុល្លារអាមេរិកដើម្បីឱ្យកម្ពុជាពង្រីកបណ្ដាញអគ្គិសនីក្នុងទីក្រុងភ្នំពេញ។ ការផ្ដល់កម្ចីនេះត្រូវបានទីភ្នាក់ងារសហប្រតិបត្តិការអន្ដរជាតិជប៉ុន JICA អះអាងថា គឺដើម្បីជួយសម្រេចគោលបំណងរបស់កម្ពុជាក្នុងការពង្រឹងអគ្គិសនីក្នុងទីក្រុងភ្នំពេញ។
នៅក្នុងកិច្ចប្រជុំលើកទី៣ ស្ដីពីប្រាក់ឈ្នួលអប្បរមាសម្រាប់ឆ្នាំ២០២៥ នាថ្ងៃទី៦ ខែកញ្ញា ឆ្នាំ២០២៤នេះ ភាគីកម្មករបានបន្ថយការទាមទារប្រាក់ឈ្នួលរបស់ខ្លួនមកត្រឹម១០ដុល្លារវិញ បន្ទាប់ពីទាមទារដល់១៤ដុល្លារកាលពីកិច្ចប្រជុំលើកទី២។ ចំណែកភាគីថៅកែបានអះអាងថានឹងដំឡើងប្រាក់ឈ្នួលដល់កម្មករពី១ដុល្លារ ទៅ២ដុល្លារប៉ុណ្ណោះលើប្រាក់ឈ្នួលបច្ចុប្បន្នសម្រាប់ឆ្នាំ២០២៥ខាងមុខ។
ចិននិងសហរដ្ឋអាមេរិក នឹងរួមគ្នាផ្តួចផ្តើមរៀបចំជំនួបកំពូលអន្តរជាតិមួយ ស្តីពីឧស្ម័នពុលផ្សេងទៀតក្រៅពីឧស្ម័នកាបូនិក ដូចជាឧស្ម័នម៉េតានជាដើម។ នេះបើផ្អែកតាមការលើកឡើង របស់លោករដ្ឋមន្ត្រីអាមេរិកទទួលបន្ទុកអាកាសធាតុ ពីទីក្រុងប៉េកាំង កាលពីថ្ងៃទី៦សីហា។ មិនខុសពីឧស្ម័នកាបូនិក ចិននិងសហរដ្ឋអាមេរិក គឺជាអ្នកបញ្ចេញចោលនូវឧស្ម័នពុលប្រភេទផ្សេងៗទៀត ច្រើនជាងគេបង្អស់ បើប្រៀបធៀបទៅបណ្តាប្រទេសដ៏ទៃទៀតទូទាំងពិភពលោក។
មុននឹងចុះពីកៅអីប្រមុខរដ្ឋាភិបាលជប៉ុន ចុងខែកញ្ញានេះ នាយករដ្ឋមន្ត្រី ហ្វូមីអូ គីស៊ីដា បានអញ្ជើញបំពេញទស្សនកិច្ចនៅកូរ៉េខាងត្បូង ជាលើកចុងក្រោយ។ ថ្នាក់ដឹកនាំជាតិទាំង២បានលើកឡើងអំពីជំនឿទុកចិត្តគ្នាទៅវិញទៅមក បានធ្វើឲ្យចំណងមេត្រីភាពរវាងប្រទេសទាំង២ ទទួលផលផ្លែផ្កាចម្រើនជឿនលឿនជាខ្លាំង នាប៉ុន្មានឆ្នាំចុងក្រោយ។ ប្រឈមមុខនឹងឥទ្ធិពលពីមហាយក្សចិន និងការគំរាមកំហែងកាន់តែខ្លាំងទៅៗពីសំណាក់របបកុម្មុយនិស្តកូរ៉េខាងជើង, រដ្ឋបាលទីក្រុងសេអ៊ូលនិងតូក្យូ បានប្តេជ្ញាបន្តរឹតចំណងទាក់ទងឲ្យកាន់តែខ្លាំងឡើងជាលំដាប់។
ធាតុអាកាសក្តៅខ្លាំង ជាប់បន្តគ្នាពីឆ្នាំមុន មកដល់ឆ្នាំនេះ មិនថមថយសោះ។ រដូវក្តៅឆ្នាំ២០២៤ ត្រូវអ្នកជំនាញអាកាសធាតុបញ្ជាក់ថា ជារដូវក្តៅខ្លាំង ពុំធ្លាប់ជួបសោះ នៅលើពិភពលោក។ មូលហេតុបណ្តាលមកពីការប្រែប្រួលអាកាសធាតុ ដែលជះផលវិបាកកាន់តែធ្ងន់ធ្ងរឡើង រួមនិងបាតុភូតអេលនីញ៉ូ។
លោកយាយ ធូ គឹមអេង វ័យ៧៦ឆ្នាំ និងលោកយាយទួត វ័យ៩៥ឆ្នាំត្រូវជាម្ដាយកូននឹងគ្នារស់នៅភូមិព្រែកតាឡុង២ សង្កាត់ចាក់អង្រែ ខណ្ឌមានជ័យ រាជធានីភ្នំពេញ។ ស្រ្តីជរាទាំង ២រូបនេះកំពុងរស់ពឹងលើចៅអាយុ ៣១ឆ្នាំម្នាក់ដែលមានពិការភាព គ-ថ្លង់កំពុងប្រកបរបរធ្វើបដិមាថ្ម។ តាមពិត គឺលោកយាយ ធូ គឹមអេងជាអ្នកបង្រៀនចៅតាំងពីចៅនៅអាយុជាង ១០ឆ្នាំ។ សព្វថ្ងៃនេះ ចៅវ័យ ៣១ឆ្នាំដែលមានពិការភាពមានសមត្ថភាពអាចធ្វើបដិមាថ្មដោយខ្លួនឯង។ តែបញ្ហានៅត្រង់ថា គឺមិនសូវមានទីផ្សារសម្រាប់លក់ចេញ។
នៅរដ្ឋស្ហានភាគឦសានភូមា កងទ័ពជាតិភូមាបានវាយប្រហារដោយការទំលាក់គ្រាប់ពីលើអាកាស បណ្តាលឲ្យស្លាប់ជនស៊ីវីលយ៉ាងហោច១១នាក់ កាលពីយប់ថ្ងៃព្រហស្បតិ៍ឈានចូលថ្ងៃសុក្រទី៦សីហា។ នេះបើផ្អែកតាមការអះអាង របស់ “កងទ័ពជាតិរំដោះតាអាង” ដែលជាកងកម្លាំងបះបោរប្រឆាំងរបបសិក នៅក្នុងតំបន់នេះ។ តំបន់មួយភាគធំក្នុងរដ្ឋស្ហានជាប់ព្រំដែនខេត្តយូណានរបស់ចិន បានធ្លាក់ទៅក្នុងដៃគ្រប់គ្រង របស់កងកម្លាំងបះបោរប្រឆាំងរបបសិកភូមា តាំងតែពីខែតុលាឆ្នាំ២០២៣មកម្លេះ។
លោកយ៉ង សាំងកុមារ រដ្ឋលេខាធិការក្រសួងកសិកម្ម និងជាម្ចាស់គម្រោងកសិកម្មសម្បូរសប្បាយបានស្នើសុំការយោគយល់ពីពលរដ្ឋ និងសុំឱ្យពលរដ្ឋរង់ចាំការដោះស្រាយពីភាគីម្ចាស់គម្រោង។ តាមការបញ្ជាក់មកវិទ្យុបារាំងអន្តរជាតិនាព្រឹកថ្ងៃទី០៦ កញ្ញានេះ លោកយ៉ង សាំងកុមារសន្យាទូទាត់សំណងជូនពលរដ្ឋទាំងអស់ តែសុំធ្វើតាមដំណាក់កាល ដ្បិតក្រុមហ៊ុនក៏កំពុងជួបបញ្ហាហិរញ្ញវត្ថុដូចគ្នា។ ការចេញមុខបញ្ជាក់របស់ម្ចាស់គម្រោងដូច្នោះធ្វើឡើង បន្ទាប់ពីពលរដ្ឋដែលអះអាងកំពុងរងគ្រោះបានចោទលោកយ៉ង់ សាំងកុមារពីបទបានបង្កើតគម្រោងខ្យល់ និងមិនបានផ្តល់ទិន្នផលកសិកម្មដូចការសន្យា។
ថ្ងៃព្រហស្បតិ៍ ទី ៥ ខែ កញ្ញា ប្រធានាធិបតីរុស្ស៊ី លោក វ៉្លាឌីមៀរ ពូទីន បានបញ្ជាក់ថា រុស្ស៊ី ត្រៀមខ្លួនជានិច្ច ដើម្បីចរចាជាមួយអ៊ុយក្រែន។ តែ លោក ពូទីន បន្ថែមទៀតថា កិច្ចចរចានេះដែរ ត្រូវធ្វើឡើង ដោយយក ការចរចារទី១ វាងរុស្ស៊ី និង អ៊ុយក្រែន ក្នុងឆ្នាំ ២០២២ ជាគោល។ សូមបញ្ជាក់ថា គិតមកទល់ពេលនេះ ខ្លឹមសារ នៃកិច្ចចរចា ឆ្នាំ ២០២២ នោះ នៅពុំទាន់បានលាតត្រដាងជាសាធារណៈ នៅឡើយទេ។ ផ្អែកតាមសំដីរបស់ មេដឹកនាំរុស្ស៊ី ដែលបានបន្លឺឡើងកាលពីខែ មិថុនា ឆ្នាំ ២០២៤ ថ្មីៗនេះ រុស្ស៊ីនឹងយល់ព្រមបញ្ចប់សង្គ្រាមនៅអ៊ុយក្រែន ដរាបណាអ៊ុយក្រែនយល់ព្រម កាត់ទឹកដី ខេត្តចំនួន ៤ ទៅឲ្យរុស្ស៊ី និង បោះបង់មហិច្ឆតារបស់ខ្លួន ចង់ចូលជាសមាជិកបក្សសម្ព័ន្ធអូតង់។
ថ្មីៗកន្លងទៅនេះ ក្រុមហ៊ុនអេមរុរ៉ាយស៍បានចុះហត្ថលេខាលើកិច្ចសន្យាផលិតកម្មកសិកម្មសរីរាង្គជាមួយសហគមន៍កសិករចំនួន ២៨នៅក្នុងខេត្តព្រះវិហារក្នុងការទិញលក់ស្រូវចំនួន ២៥ ០០០តោន ក្នុងមួយឆ្នាំដើម្បីកែច្នៃជាអង្ករនាំចេញទៅក្រៅប្រទេស។ ជាមួយគ្នានេះ អង្ករកម្ពុជាក៏ទទួលបានការចាប់អារម្មណ៍ពីប្រទេសឥណ្ឌូណេស៊ីដែរ។ តែបើតាមការចុះផ្សាយរបស់កាសែតវៀតណាមមួយក្នុងថ្ងៃទី៤ កញ្ញា ឥណ្ឌូណេស៊ីកំពុងពិចារណាលើសមត្ថភាពផលិត និងហេដ្ឋារចនាសម្ព័ន្ធកម្ពុជាដែលនៅមានកម្រិត។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី០៦ កញ្ញា ឆ្នាំ២០២៤នេះ លោកឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុនអេមរុរ៉ាយស៍យល់ឃើញថា កម្ពុជាមានសមត្ថភាពគ្រប់គ្រាន់ក្នុងការឆ្លើយតបទៅនឹងតម្រូវការអង្ករពីឥណ្ឌូនេស៊ី៕
នៅក្នុងពិធីបើកវេទិកាសហប្រតិបត្តិការចិន អាហ្វ្រិកនៅទីក្រុងប៉េកាំង កាលពីថ្ងៃព្រហស្បតិ៍ ប្រធានាធិបតីចិន លោកស៊ី ជីនពីងបានប្រកាសសន្យាកញ្ចប់លុយ ជាង៥០ពាន់លានដុល្លារដើម្បីជួយអាហ្វ្រិក។ ក្រៅពីផ្តោតលើការសាងសង់ហេដ្ឋារចនាសម្ព័ន្ធ ជំរុញសេដ្ឋកិច្ចក្នុងទឹកដីអាហ្វ្រិក ចិនបានប្រកាសផ្តល់ជំនួយថវិកាជាង១៤០លានដុល្លារដល់វិស័យយោធា និងសន្យាបណ្តុះបណ្តាលទាហាន ប៉ូលិសអាហ្វ្រិក៧ពាន់នាក់ ក្នុងរយៈពេល៣ឆ្នាំទៅមុខ។ នៅក្នុងក្រសែភ្នែករបស់អាមេរិក ជាមួយកញ្ចប់លុយដ៏សន្ធឹកសន្ធាប់សម្រាប់ទ្វីបអាហ្វ្រិក ចិនមិនត្រឹមចង់បានប្រយោជន៍សេដ្ឋកិច្ច ប៉ុន្តែ សម្លឹងឃើញផលប្រយោជន៍ភូមិសាស្រ្តនយោបាយសន្តិសុខ តាមរយៈការបោះទីតាំងនៅមូលដ្ឋានទ័ពជើងទឹកថ្មីមួយទៀតនៅទឹកដីអាហ្រ្វិក នៅហ្គីណេអេក្វាទ័រ ក្នុងមហាសមុទ្រអាត្លង់ទិក។
ទីបំផុតទៅ ប្រទេសបារាំងមាននាយករដ្ឋមន្ត្រីថ្មីហើយ ក្រោយពីអតីតប្រមុខរដ្ឋាភិបាល ហ្កាប៊្រីយែល អាតតាល់ បានលាចុះពីតំណែង។ ក្រោយពីពិគ្រោះប្រឹក្សាយោបល់ជាមួយអ្នកជំនាញនិងអ្នកនយោបាយជាច្រើននិន្នាការ, លោក អេម៉ានុយអែល ម៉ាក្រុង ប្រធានាធិបតីបារាំង បានសម្រេចចិត្តតែងតាំង លោក មីស្ហែល បាញេ ឲ្យធ្វើជានាយករដ្ឋមន្ត្រីថ្មី ដើម្បីឲ្យរៀបចំគណៈរដ្ឋមន្ត្រី និងដឹកនាំរដ្ឋាភិបាល ដើម្បីបម្រើផល ប្រយោជន៍ជាតិ។ តើប្រមុខរដ្ឋាភិបាលបារាំងថ្មីមានប្រវត្តិនយោបាយបែបណា?
នាយករដ្ឋមន្រ្តីកម្ពុជាលោកហ៊ុន ម៉ាណែតបានឯកភាពលើសំណើរបស់អ្នកស្រីពោធិតី សាវត្ថី ប្រធានគណបក្សធម្មាធិបតេយ្យ និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលស្នើឲ្យលោកឡាំ ជា រដ្ឋមន្រ្តីទទួលបន្ទុកកិច្ចការព្រំដែនធ្វើបទបង្ហាញអំពីព្រំដែនស្របច្បាប់របស់កម្ពុជាជាមួយប្រទេសឡាវ វៀតណាម និងថៃ។
