នៅថ្ងៃ​ចន្ទ នាយករដ្ឋមន្ត្រីអង់គ្លេស ​អញ្ជើញទៅ​ប្រទេស​​អ៊ីតាលី​ ដើម្បីជជែកពី​​សំណុំរឿង​ជនអន្តោប្រវេសន៍ និង​ឈ្វេងយល់​ដកស្រង់បទពិសោធ​ពី​នយោបាយ​ទប់​ស្កាត់​ជនភៀសខ្លួន​ របស់​ថ្នាក់ដឹកនាំអ៊ីតាលី។ អ៊ីតាលី ជាទី​ដែល ​នាយករដ្ឋមន្ត្រីអង់គ្លេស ​​កោត​សរសើរថា នយោបាយ​ទប់ស្កាត់​ជនអន្តោប្រវេសន៍ ​បាន​រីកចម្រើន​ខ្លាំង។ ​ដំណើរ​ឈ្វេងយល់ពី​ចំណាត់​ការ​ទប់​ស្កាត់​ជនភៀសខ្លួន​នេះ ​ធ្វើឡើងតែ​​១ថ្ងៃ ក្រោយ​ពី​ជនអន្តោប្រវេសន៍​ខុសច្បាប់ជាច្រើននាក់ លង់ទឹកស្លាប់​​បាត់បង់ជីវិត​ ព្រោះ​តែ​ព្យាយាម​ឆ្លង​សមុទ្រ​ចូលទឹកដីអង់គ្លេស។​ ​

ថ្ងៃទី​១៦កញ្ញា គឺជាថ្ងៃខួបគម្រប់​២ឆ្នាំ នៃ​បាតុកម្មបះបោររបស់ស្ត្រីអ៊ីរ៉ង់ ដែលបានងើបតវ៉ាប្រឆាំងនឹងការកៀបសង្កត់ ពីសំណាក់របបផ្តាច់ការសាសនាជ្រុលនិយម​អ៊ីរ៉ង់​។ បាតុកម្មបះបោរ ដែល​បាន​​ផ្ទុះឡើងក្រោយ​​​ការស្លាប់របស់​ស្ត្រីឈ្មោះ Mahsa Amini បន្តាប់ពីនគរបាលសិលធម៌អ៊ីរ៉ង់ចាប់ខ្លួន​យកទៅ ដោយចោទថាទទួលក្រណាត់​រុំមិនជិត​ក្បាលត្រឹមត្រូវ​។ នៅក្នុងថ្ងៃខួប​២ឆ្នាំនេះ លោកស្រី Narges Mohammadi ជ័យលាភីពានរង្វាន់ណូបែលសន្តិភាព ដែលបច្ចុប្បន្នកំពុងជាប់ក្នុងពន្ធនាគារ​នៅអ៊ីរ៉ង់ បាន​ផ្ញើសារវីដេអូ អំពាវនាវឲ្យ​ពិភពលោកទាំងមូល ជាពិសេសអង្គការសហប្រជាជាតិ ត្រូវតែ​ចូលរួមជួយស្រែក ជួយឈឺឆ្អាល ចំពោះទុក្ខវេទនា​របស់ស្ត្រីអ៊ីរ៉ង់​។

ពេលនេះ បេក្ខជន​ប្រធានាធិបតី ដូណាល់ ត្រាំ «មា​នសុវត្ថិភាព​ និង​សុខសប្បាយ​ជាធម្មតា» ក្រោយពី​ព្រឹត្តិការណ៍ផ្ទុះ​អាវុធច្រើនគ្រាប់ នៅ​ទីលាន​វាយ​កូនហ្កោលរបស់​លោក ត្រាំ ក្នុង​រដ្ឋ​ហ្វ័រីដា។ ២ខែមុន លោក ត្រាំ ត្រូវ​រងរបួស​ដាច់​ត្រចៀក តែលើកទី២នេះ គ្មាន​របួស​អ្វីឡើយ ហើយ​ជនសង្ស័យ​ម្នាក់ ត្រូវ​នគរបាលអាមេរិក​​ចាប់ខ្លួន​បាន រួម​នឹង​វត្ថុតាងកាំភ្លើង ប្រភេទ«AK-47» ១ដើម​។ ​នគរបាល​ស៊ើបអង្កេត​រដ្ឋ​​សហព័ន្ធអាមេរិក​ FBI ​បើក​សំណុំរឿង​ស៊ើប​អង្កេត​អំ​ពី​បទ​ប៉ុន​ប៉ងធ្វើឃាត និងកំពុងសួរ​ចម្លើយ​ជន​សង្ស័យ​។ ​​ ​

ព្រឹកថ្ងៃចន្ទទី​១៦កញ្ញា ខ្យល់​ព្យុះកំណាចទីហ្វុង បេប៊ីន​កា បាន​​​បោកសង្គ្រុប​លើ​ទីក្រុង​សៀងហៃ និងតំបន់មួយចំនួន​ទៀត នៅភាគខាងកើត​ប្រទេសចិន​។ ផ្អែកតាមអាជ្ញាធរឧតុនិយមចិន ខ្យល់ព្យុះសង្ឃរានេះ​ មានកម្លាំងខ្លាំងក្លា​ ដែល​តំបន់ភាគខាងកើតចិន មិនបានជួបប្រទះ​ប្រមាណ​៧០ឆ្នាំមកហើយ​។ ស្ថានីយ៍រថភ្លើង និង​ព្រលានយន្តហោះច្រើនទីតាំង ត្រូវបិទទ្វារផ្អាកលែងដំណើលការ ខណៈពេលនេះ​ គឺចំពេលបុណ្យ​សែន​ព្រះខែប្រពៃណីចិន​​ ដែលមានមនុស្ស​ធ្វើដំណើរច្រើន​។

ស្ថានទូត​ស៊ុយអែត​ប្រចាំ​ទីក្រុង​ភ្នំពេញ​បានប្រកាស​តាមហ្វេសប៊ុក​នៅថ្ងៃ​ទី​១៦ ខែ​កញ្ញា ឆ្នាំ​២០២៤​នេះ​ថា ស្ថានទូត​នឹង​បិទទ្វារ​ជាផ្លូវការ​ចាប់ពី​ថ្ងៃទី​៣០ ខែ​កញ្ញា ឆ្នាំ​២០២៤ ​នេះតទៅ​។ ការ​ប្រកាស​លែងដំណើរការ​ការងារ​របស់ស្ថានទូត​ស៊ុយអែត​នៅទីក្រុង​ភ្នំពេញ ​ធ្វើឡើង​តាមការ​សម្រេច​របស់​រដ្ឋាភិបាល​ស៊ុយអែត​ក្នុងការ​បញ្ចប់​កិច្ចសហប្រតិបត្តិការ​អភិវឌ្ឍន៍​ទ្វេភាគី​ជាមួយ​កម្ពុជា​។

លោក ​ជា មុនី​ អតីត​អនុប្រធាន​គណបក្សកម្លាំងជាតិ​ត្រូវបាន​សមាជវិសាមញ្ញ​ផ្តល់​សេចក្តីទុកចិត្ត​ឲ្យធ្វើ​ជាប្រធាន​គណបក្ស​កាលពីថ្ងៃទី​១៥ ខែ​កញ្ញា ​ឆ្នាំ​២០២៤​។ ​សមាជវិសាមញ្ញ​ដែលមាន​សមាជិក​ចូលរួមប្រមាណ ​២០០​នាក់ ធ្វើឡើង​ដើម្បី​ជ្រើសរើស​ប្រធានថ្មី​ជំនួស​លោក​ ស៊ុន ចន្ធី ​ដែល​កំពុង​ជាប់ឃុំ​។ ​លោកជា មុនី ​ដែលទើប​ត្រូវបាន​សមាជវិសាមញ្ញ​ជ្រើសឲ្យ​ធ្វើជា​ប្រធាន​បានឲ្យដឹង​ថា កិច្ចការ​ជា​អាទិភាព​របស់លោក ​និង​សហការី​គឺ​បន្ត​ការងារ​ដែល​គណបក្ស​បាន​ធ្វើ​កន្លងមក ​ពោល​បញ្ចប់​នូវ​ការរៀបចំ​រចនាសម្ព័ន្ធ​គណបក្ស​តាម​ខេត្ត ​រាជធានី​ឲ្យបាន​ពេញលេញ​នៅមុន​ដំណាច់ឆ្នាំ ​២០២៤នេះ​។ ​សូមស្តាប់លោក ជា មុនី ដែល​រៀបចំ​ដោយ ញឹម សុផល៖

«មាសម្តាយ» ជាឈ្មោះស្នាដៃសិល្បៈ ដែលបង្កើតឡើងដោយការប្រើប្រាស់សំណល់ក្រដាសកែច្នៃឲ្យចេញជារូបភាព 3D របស់សិល្បការិនី ស៊ូ សុភី។ សិល្បការិនី ស៊ូ សុភី បានបង្កើតស្នាដៃរូបភាព3D «មាសម្តាយ» ដើម្បីបង្ហាញប្រាប់ក្មេងៗ ពីទឹកចិត្តស្រលាញ់របស់ឪពុកម្តាយចំពោះកូនៗ តាំងពីនៅក្នុងផ្ទៃរហូតដល់ធំពេញរូបពេញរាង។ យើងមានបទយកការណ៍របស់ ជួប នរក្សា៖

ក្នុងរយៈពេល ៦ខែដើមឆ្នាំ២០២៤ គណៈកម្មាធិការប្រយុទ្ធប្រឆាំងអំពើជួញដូរមនុស្សបានបង្រ្កាប និងដោះស្រាយករណីជួញដូរមនុស្ស និងកេងប្រវ័ញ្ចផ្លូវភេទបានចំនួន ១០៤ ក្នុងនោះមាន ២២ ករណីជាប់ពាក់ព័ន្ធនឹងការជួញដូរមនុស្ស និង៨២ ករណីជាប់ពាក់ព័ន្ធនឹងការកេងប្រវ័ញ្ចផ្លូវភេទ។

កញ្ញាឈឹម ស៊ីថរ អតីតមេដឹកនាំសហជីពក្នុងក្រុមហ៊ុនកាស៊ីណូណាហ្កាវើលដ៍ត្រូវបានដោះលែងពីពន្ធនាគារព្រៃសនៅព្រឹកថ្ងៃទី១៦​កញ្ញានេះ ក្រោយបញ្ចប់ការអនុវត្តទោសរយៈពេល ២ឆ្នាំ។ កញ្ញាបានជាប់ចោទពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម និងបទចោទបន្តបន្ទាប់តាមបទបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។ ក្នុងបទសម្ភាសជាមួយវិទ្យុបារាំងអន្តរជាតិRFI នៅថ្ងៃទី១៦​ កញ្ញានេះ​ កញ្ញា ឈឹម ស៊ីថរបានបញ្ជាក់ពីការមិនប្តូរជំហរការពារសិទ្ធិ និងការងារតស៊ូមតិឱ្យបុគ្គលិកកម្មករនៅកាស៊ីណូណាហ្កាវើលដ៍ជាដាច់ខាត។ ទន្ទឹងគ្នានេះ កញ្ញាក៏បានប្តេជាថានឹងដឹកនាំក្រុមសហជីពក្នុងក្រុមហ៊ុនកាស៊ីណូណាហ្កាវើលដើម្បីទាមទារនូវអ្វីដែលពួកគេបានធ្វើជាច្រើនឆ្នាំកន្លងមករហូតទទួលបានដំណោះស្រាយសមស្របមួយដែលអាចទទួល​យក​បាន៕

ព្រឹត្តិ​ការណ៍ Gumball 3000 នៅ​កម្ពុជា​ត្រូវ​បាន​រៀប​ចំ​ឡើង​រយៈ​ពេល​៣​ថ្ងៃ​ពី​ថ្ងៃ​ទី​១៥ ដល់​ថ្ងៃ​ទី​១៧ ​ខែកញ្ញា ឆ្នាំ២០២៤។ ព្រឹត្តិ​ការណ៍​មួយ​នេះ​មាន​ការ​ចូល​រួម​ពី​មហា​សេដ្ឋី អ្នក​មាន​ឥទ្ធិពល​លើ​បណ្តាញ​សង្គម កីឡាករ និង​តារារ៉េប​ល្បីៗ​។​ អ្នក​រៀប​ចំព្រឹត្តិ​ការណ៍​អះអាង​ថា នេះមិន​មែន​ជា​ព្រឹត្តិការណ៍​ដើម្បី​បង្អួត​រថយន្ត​ទំនើប​ៗ​ពី​សំណាក់​អ្នក​មាន​នៅ​កម្ពុជា​ទេ តែ​វា​ជា​ព្រឹត្តិ​ការណ៍​ដើម្បីជំរុញ​វិស័យ​ទេសចរណ៍​នៅ​កម្ពុជា ការ​រក​មូល​និធិ​ជួយ​មន្ទីរ​ពេទ្យ​កុមារ​អង្គរ ការ​បើក​ឱកាស​ឲ្យអ្នក​វិនិយោគ​បាន​ជួប​គ្នា និង​ជាការ​បង្កើត​កំណត់​ត្រាពិភព​លោក​ហ្គីណេស​ដែល​មាន​ការ​ចត​រថយន្ត​ច្រើន​ជាង​គេ​នៅមុខ​ប្រាសាទ​អង្គរ​វត្ត​។ ​តែ​អ្នក​តាម​ដាន​សង្គម​វិញ​យល់​ឃើញ​ថា ព្រឹត្តិ​ការណ៍​នេះ​មាន​ទាំង​ផល​ប្រយោជន៍ និង​ផល​ប៉ះ​ពាល់​។

បណ្តាមន្ត្រី​ការទូត​ស៊ុយអែត បាន​នាំគ្នា​ចូល​រដ្ឋធានី​ព្យុងយ៉ាង វិញ​ហើយ ក្រោយ​ពី​បាន​អវត្តមាន​ ប្រមាណ ៤ ឆ្នាំ គិត​ចាប់ពី​ របបដឹកនាំកូរ៉េខាង​ជើង បិទខ្ទប់​ប្រទេសជិតឈឹង​ ក្នុងរដូវ​កាល​ជំងឺ​រាតត្បាត​កូវីដ​១៩ រហូត​មកទល់​ពេលនេះ​​។ ពេលនេះ​ ស៊ុយអែត ជា​ប្រទេស​បស្ចិមលោក​ទី១ដែល​ទទួល​ការ​អនុញ្ញាត​ឲ្យ​បើក​ដំណើរការ​ទូត​ឡើងវិញ នៅក្នុង​រដ្ឋ​កុម្មុយនិស្ត​កូរ៉េខាង​ជើង។ នេះជា​សញ្ញា​វិជ្ជមាន​ថ្មី​ បង្ហាញពី​ឆន្ទៈ​បើក​ព្រំដែនរបស់​​ក្រុង​ព្យុងយ៉ាង។

បើគ្មានការប្រែប្រួលទេ នៅថ្ងៃទី១៦ ខែកញ្ញា ឆ្នាំ២០២៤ កញ្ញា ឈឹម ស៊ីថរ ជាមេដឹកនាំសហជីពម្នាក់ នឹងត្រូវដោះលែងពីពន្ធនាគារ ក្រោយអនុវត្តទោស២ឆ្នាំ។ សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានប្រកាសនៅថ្ងៃ១៥ កញ្ញានេះថា តំណាងកម្មករ រួមទាំងកម្មករនិយោជិតក្រុមហ៊ុនណាហ្គាវើលដ៍ ដែលកំពុងធ្វើកូដកម្មនឹងទៅទទួល កញ្ញា ឈឹម ស៊ីថរ ដោយផ្ទាល់នៅមុខពន្ធធនាការព្រៃស។

Plastic Odyssey កប៉ាល់ប្រយុទ្ធប្រឆាំងនឹងប្លាស្ទីក កំពុងចុះចតនៅកម្ពុជាចាប់តាំងពីថ្ងៃទី១១ ខែកញ្ញា ឆ្នាំ២០០២៤ កប៉ាល់Plastic Odyssey ដែលមានបេសកកម្មធ្វើដំណើរជុំវិញពិភពលោក ដើម្បីចូលរួមផ្សព្វផ្សាយ​និងស្វែងរកដំណោះស្រាយ​រួមគ្នា​ក្នុងការប្រយុទ្ធប្រឆាំង​នឹងការបំពុលរិស្ថាន​ដោយបញ្ហាប្លាស្ទីក កំពុងចុះចតនិងបំពេញកិច្ចការរបស់ខ្លួននៅទីក្រុងភ្នំពេញ រហូតដល់ថ្ងៃទី២៣ ខែកញ្ញា ឆ្នាំ២០២៤។

នាពេលថ្មីៗនេះ ក្រុមហ៊ុនស្រាបៀមួយចំនួនធំ បានប្តូរយុទ្ធសាស្ត្រទីផ្សាររបស់ខ្លួន ដោយផ្តល់រង្វាន់ទឹកប្រាក់ផ្សងសំណាងជាប្រចាំខែ ដល់អ្នកនិយមសេពគ្រឿងស្រវឹង។ ការប្តូរយុទ្ធសាស្ត្រថ្មីនេះ គឺក្រោយពេលការផ្សព្វផ្សាយពាណិជ្ជគ្រឿងស្រវឹងនៅតាមទីសាធារណៈត្រូវអាជ្ញាធរខេត្តមួយចំនួនហាមឃាត់។ ចំណែកយុទ្ធសាស្ត្រផ្តល់ប្រាក់រង្វាន់ជាប្រចាំខែដល់អ្នកសេពគ្រឿងស្រវឹង ត្រូវអ្នកតាមដានសង្គម យល់ឃើញថា ជាការពង្វក់ស្មារតី និងបំផុសទឹកចិត្តឲ្យយុវជនខ្មែរ កាន់តែភ្លើតភ្លើនទៅនឹងការសេពគ្រឿងស្រវឹងកាន់តែខ្លាំងតាមរយៈការចង់ឈ្នះទឹកប្រាក់ដែលក្រុមហ៊ុនស្រាបៀរផ្តល់ជូន។

រុស្ស៊ី និង អ៊ុយក្រែន ប្រកាសថ្ងៃសៅរ៍ ទី១៤កញ្ញា ថាបានបំពេញប្រតិបត្តិការដោះដូរគ្នា ឈ្លើយសង្គ្រាម សរុប ចំនួន ២០៦ នាក់។ ភាគីម្ខាងៗ​បាន​ទទួល​ចំណាប់ថ្នូរ​ស្មើៗគ្នា។​​ នៅក្នុងចំណោមឈ្លើយ​សង្គ្រាម​ទាំង​នោះ មានពួកទាហានរុស្ស៊ី  ដែលត្រូវ​កងទ័ពអ៊ុយក្រែនចាប់ខ្លួន​បាន នៅពេលពួក​គេ​បាន​វាយលុកសម្រុក​ចូល​ តាមតំបន់ជាប់ព្រំដែនអ៊ុយក្រែន ។  ​​ សូមស្តាប់ កែវ ឆាយា ពីក្រុង​ម៉ូស្គូ៖

អាជ្ញាធរ​វ៉េណេស៊ុយអេឡា ​ ចាប់ឃាត់​ខ្លួនជនបរទេស​ ចំនួន ៦នាក់​ ដោយ​ចោទប្រកាន់​ពី​បទ​រួម​គំនិត​ក្បត់ ចង់​​ផ្តួលរំលំ​រដ្ឋាភិបាល។ ក្នុងនោះ មាន​ជនជាតិ​​អាមេរិក ៣នាក់ អេស្ប៉ាញ២នាក់​ និង​ឆែកូស្លូវ៉ាគី ម្នាក់។ ភ្លាមៗ រដ្ឋបាល​ទីក្រុង​វ៉ាស៊ីនតោន បាន​ច្រានចោល​ថា​ពុំ​​មាន​ពាក់ព័ន្ធ​នឹង​ខ្លួនឡើយ ហើយ​ ក្រសួង​ការបរទេស​អេស្ប៉ាញ​ ក៏​អះអាង​ថា​ ជនជាតិ​អេស្ប៉ាញ​ដែលត្រូវ​រដ្ឋអំណាច​វ៉េណេស៊ុយអេឡា ពុំ​មែន​ជា​ក្រុម​ភ្នាក់ងារ​សម្ងាត់​របស់រាជធានី​​ម៉ាឌ្រីដ នោះឡើយ។ ​​  

មាន​អាយុ​ ៤៤ ឆ្នាំ ​លោក អ៊ុំ ប៊ុនរ៉េត បាន​ចំណាយ​ពេល​ជិះ​ម៉ូតូ​ផ្សង​ព្រេង​ជិត​២០​ឆ្នាំ​មក​ហើយ​។​បទ​ពិ​សោធន៍​នេះ​បាន​ធ្វើ​ឲ្យ​ប្រធាន​ក្លឹប​ម៉ូតូ ​BMW ​កម្ពុជា​រូប​នេះ ​ជួប​គ្រោះ​ថ្នាក់​ជា​ច្រើន​សារ​រហូត​ពិការ​ជើង​រយៈ​ពេល​ខ្លី។​ ទោះជា​បែប​នេះ​ក្តី ​ក៏​អនុប្រធាន​ក្លឹប​ម៉ូតូ​ BMW ​Asia ​និង​ជា​អគ្គលេខា​ធិការ​រង​នៃ​សហព័ន្ធ​កីឡា​យាន​យន្ត​កម្ពុជា​រូប​នេះ ​នៅ​តែ​មិន​ព្រម​បោះ​បង់ចោល ​ក្តី​ស្រមៃ​របស់​ខ្លួន​ ក្នុង​ការ​សម្រេច​ឲ្យ​បាន​ជើង​ឯក​អ្នក​ជិះ​ម៉ូតូ​ឆ្លង​ទ្វីប​ចំ​ងាយ​ ​២៥០០០​គីឡូ​ម៉ែត្រ​។​ បេសកម្ម​របស់​ លោក​ អ៊ុំ ប៊ុនរ៉េត ​មិន​ត្រឹម​តែ​ជា​ការ​កំសាន្ត​អារម្មណ៍​ប៉ុណ្ណោះទេ​ តែ​ជា​គោល​ដៅ​រក​មូល​និធិ​​ដើម្បី​មន្ទីរ​ពេទ្យ​គន្ធ​បុផ្ផា​ឲ្យ​បាន​១០​ម៉ឺន​ដុល្លារ​។​

​មេដឹកនាំរបបសឹក​ភូមា លោក មីន អ៊ុងឡាំង បានអំពាវនាវ​សុំ​ជំនួយ​អន្តរជាតិ​ ដើម្បី​ជួយស្រោចស្រង់​ជនរងគ្រោះ ព្រោះតែ​ទឹកជំនន់។ គ្រោះទឹកជំនន់​និង​បាក់ដី បណ្តាលមកពី​ការ​រងឥទ្ធិពល​ខ្យល់ព្យុះ​សង្ឃរា យ៉ាគី (Yagi) កាលពីសប្តាហ៍មុន​ បាន​សម្លាប់​មនុស្ស​ជាច្រើន​ក្នុង​ប្រទេសភូមា​ និង​ប្រទេស​ផ្សេងទៀត ក្នុង​តំបន់​អាស៊ីអាគ្នេយ៍​​។​ ទោះយ៉ាងនេះក្តី ការ​អំពាវនាវ​របស់​ថ្នាក់ដឹកនាំភូមា សុំ​ជំនួយ​បរទេស នៅ​ក្នុងករណី​ដូច្នេះ ជារឿង​ដ៏កម្រ​បំផុត ហើយ​លើកនេះ ជាអ្វី​​ដែល​អន្តរជាតិ​លំបាក​នឹងយល់​។​

មន្ត្រីក្រសួងកសិកម្មរំពឹងថា កម្ពុជានឹងក្លាយជាអធិរាជនាំចេញគ្រាប់ស្វាយចន្ទីច្រើនជាងគេលេខ១នៅលើពិភពលោកនាឆ្នាំ២០៣០ខាងមុខ ពោលគឺនៅក្រោយពេលបញ្ចប់គោលនយោបាយជាតិស្តីពីស្វាយចន្ទីឆ្នាំ២០២២-២០២៧។ តាមមន្ត្រីក្រសួងកសិកម្ម មហិច្ឆតាចង់ក្លាយជាអធិរាជស្វាយចន្ទីនឹងអាចទៅរួច ព្រោះថាបច្ចុប្បន្នកម្ពុជាកំពុងឈរចំណាត់ថ្នាក់លេខ២លើការនាំចេញស្វាយចន្ទីច្រើនជាងគេនៅលើពិភពលោក​ បន្ទាប់ពីវៀតណាម។ តែប្រធានសមាគមស្វាយចន្ទីកម្ពុជាស្នើឱ្យរដ្ឋាភិបាលដោះស្រាយបញ្ហាពីរ គឺទុនបង្វិល និងកាត់បន្ថយថ្លៃដើមផលិត។

ក្រសួងរ៉ែ និងថាមពល តាមរយៈអគ្គនាយកដ្ឋានធនធានរ៉ែ បានសម្រេចផ្អាកអាជីវកម្មក្រុមហ៊ុនរុករករ៉ែមាសមួយកន្លែងឈ្មោះ សឹងយន្ដគ័ងយិក (Xing Yuan Kanng Yeak CO., LTD.) ដែលមានមូលដ្ឋាននៅតំបន់អូរខ្លិកខ្លក់ ក្នុងស្រុកសំបូរ ខេត្តក្រចេះ។ ការផ្អាកបណ្តោះអាសន្ននេះ គឺចាប់ពីថ្ងៃទី១០កញ្ញា ឆ្នាំ២០២៤ ដោយមូលហេតុមានកម្មករម្នាក់បាត់បង់ជីវិត ក្នុងឧបទ្ទវហេតុបាក់ថ្មសង្កត់នៅការរដ្ឋានអាជីវកម្មរុករករ៉ែមួយនេះ។

លោក ហ៊ុន ឡាក់ អ្នកនាំពាក្យសមាគមឧកញ៉ាកម្ពុជា បានប្រាប់វិទ្យុបារាំងអន្ដរជាតិRFI នៅថ្ងៃទី១៤ ខែកញ្ញា ឆ្នាំ២០២៤នេះថា ការសម្រេចដាក់ទណ្ឌកម្មពីរតនាគារសហរដ្ឋអាមេរិកលើលោកលី យ៉ុងផាត់ ដែលជាប្រធានសមាគមឧកញ៉ាកម្ពុជា មិនបង្កឱ្យប៉ះពាល់ដល់សមាគមឧកញ៉ានោះទេ។ មិនបង្កផលប៉ះពាល់ដោយលោកអះអាងថា សមាគមគឺជានីតិបុគ្គលដែលបង្កើតឡើងដោយព្រះរាជក្រឹត្យ ដូច្នេះមិនអាចរង្គោះរង្គើរដល់សមាគមឡើយ។ តែយ៉ាងណា អ្នកនាំពាក្យរូបនេះសម្ដែងការសោកស្ដាយដែលសហរដ្ឋអាមេរិកដាក់ទណ្ឌកម្មដោយអយុត្តិធម៌បែបនេះលោកប្រធានសមាគម៕

នាយករដ្ឋមន្ត្រី​អង់គ្លេស  ​លើកឡើង​សំណុំ​បញ្ហាសង្គ្រាមអ៊ុយក្រែន ទៅជជែក​ដោយ​ផ្ទាល់​ជាមួយ​ប្រធានាធិបតី​សហរដ្ឋអាមេរិក ​ជុំវិញការ​បើកភ្លើងខៀវឲ្យ កងទ័ពក្រុងកៀវ ប្រើមីស៊ីលបាញ់រយៈចម្ងាយឆ្ងាយចូលទឹកដី រុស្ស៊ី។ សហរដ្ឋអាមេរិក ​និង​ អង់គ្លេស ថា​នឹង​ត្រូវ​ពិគ្រោះយោបល់​ជាមួយ​សម្ព័ន្ធមិត្ត​ដទៃផ្សេងទៀត នៅក្នុង​ឱកាស​កិច្ចប្រជុំ​មហាសន្និបាត​អង្គការ​សហប្រជាជាតិ​។ ក៏ប៉ុន្តែ  ​អាល្លឺម៉ង់​ ជាម្ចាស់ជំនួយ​យោធា​ធំមួយ​ដែរ បាន​រក្សាជំហរ​បដិសេធ ខុសពីប្រទេស​ប៉ូឡូញ ដែល​នៅជាប់ព្រំដែន​នឹងអ៊ុយក្រែន បាន​ប្រកាស​យល់ស្រប​យ៉ាងទទូច។ 

ស្ថាប័នស៊ើបការណ៍សម្ងាត់រុស្ស៊ី បានប្រកាសថ្ងៃសុក្រ ទី ១៣ កញ្ញា  លុបចោលការទទួលស្គាល់ អ្នកការទូតអង់គ្លេស ៦ នាក់ ឲ្យប្រចាំនៅក្រុងម៉ូស្គូ ដោយចោទអ្នកទាំងនោះថាប្រព្រឹត្តចារកម្ម ប្រឆាំងរុស្ស៊ី ក្នុងបរិបទនៃទំនាក់ទំនងតានតឹងស្រាប់ទៅហើយជាមួយក្រុងឡុងដ្រ៏។ វិមានក្រេមឡាំង បរិហារអង់គ្លេសដែលគាំទ្រអ៊ុយក្រែនឲ្យប្រើជាយថាហេតុ មីស៊ីលបាញ់ទៅចម្ងាយឆ្ងាយ ទល់នឹងផ្ទាំងស៊ីបនានា នៅជ្រៅក្នុងដែនដីប្រទេសរុស្ស៊ីតែម្តង។

កាលពីថ្ងៃសុក្រ ទី​១៣កញ្ញា អង្គការសុខភាពពិភពលោក បានប្រកាសអនុញ្ញាត ឲ្យ​ប្រើវ៉ាក់សាំងប្រភេទ MVA-BN ដើម្បីបង្ការជំងឺ​Mpox ដែលកំពុងឆ្លងរាលដាល​គួរ​ឲ្យ​បារម្ភ នៅតាមបណ្តាប្រទេសអាហ្វ្រិក​។ គួរបញ្ជាក់ថា គិតត្រឹមពេលនេះ មិនទាន់មាន​វ៉ាក់សាំងណាមួយដែលគេផលិតជាពិសេស ដើម្បីតម្រូវ​ជំងឺMpox ឬជំងឺអុតស្វាឡើយ។ តែ​ក្រុមអ្នកជំនាញ​បាន​សម្រេចប្រើ​ប្រាស់​វ៉ាក់សាំង ដែល​ MVA-BN ដែលគេប្រើសម្រាប់ជំងឺអុត​ធម្មតា បន្ទាប់​ពីបានសាកល្បងទៅ​ឃើញថាមាន​ប្រសិទ្ធភាព​ខ្ពស់​ លើជំងឺMpox។

ការចរចាជាដំណោះស្រាយ​តែ​មួយគត់​ដើម្បី​បិទបញ្ចប់​សង្រ្គាម​ហ្កាហ្សា សង្រ្គាមអ៊ុយក្រែន។ នេះជា​ប្រសាសន៍​របស់​ប្រមុខការពារជាតិ​ចិន លោក​Dong Jun នៅចំពោះ​មុខ​គណៈប្រតិភូជាង ៥០០នាក់​នៅក្នុង​វេទិកាស្តីពី​សន្តិសុខ ដែលរៀបចំ​រយៈពេល​៣ថ្ងៃ ពីថ្ងៃ​ព្រហស្បតិ៍រហូត​​ដល់ថ្ងៃសៅរ៍ ទី ១៤​កញ្ញា។ នៅក្នុង​ចំណោម​គណៈប្រតិភូដែលចូលរួម​នៅក្នុងវេទិកា​នៅទីក្រុង​ប៉េកាំង មាន​​មន្រ្តីជាន់ខ្ពស់​យោធា​​​មកពី​ប្រទេស ​រុស្ស៊ី ប៉ាគីស្ថាន សិង្ហបុរី អ៊ីរ៉ង់ ​ភូមា និងអាល្លឺម៉ង់។

ជប៉ុន​បញ្ជូន​​យន្តហោះចម្បាំង​ជាច្រើនគ្រឿង​ទៅហោះ​នៅ​អាកាស បន្ទាប់ពី​ចាប់បាន​សញ្ញាយន្តហោះ​ល្បាត​របស់​រុស្ស៊ីពីរគ្រឿង កាលពីថ្ងៃ​ព្រហស្បតិ៍​ទី ១២​ កញ្ញា។ យោងតាម​សេចក្តីប្រកាស​របស់​ក្រសួងការពារជាតិ​ជប៉ុន យន្តហោះ​យោធា​ទាំងពីរគ្រឿង​របស់​រុស្ស៊ី​​មិន​បានហោះ​​រំលោភចូលក្នុងដែនអាកាស​របស់​ជប៉ុនទេ ប៉ុន្តែហោះ​ជុំវិញប្រទេស​ជប៉ុន និង​ហោះនៅពីលើ​តំបន់ប្រជុំ​កោះជាប់ជម្លោះ ជប៉ុន និង​រុស្ស៊ី។ នេះជាលើកទី​២ ដែល​យន្តហោះចម្បាំង​ជប៉ុន​បើកប្រតិបត្តិការ​ប​ន្ទាន់ បន្ទាប់ពី​ធ្លាប់ចេញ​ទៅ​បណ្តេញ​យន្តហោះស៊ើបការណ៍សម្ងាត់​របស់ចិន​ដែល​ហោះរំលោភចូល​ក្នុងដែនអាកាសរបស់ជប៉ុន​កាលពីខែ សីហាកន្លងទៅ។

ស្រូវដែលកសិករកំពុងប្រមូលផលក្នុងរដូវវស្សាឆ្នាំ២០២៤ នេះត្រូវបានគេកត់សម្គាល់ថា មានតម្លៃធ្លាក់ចុះ បើធៀបនឹងឆ្នាំ ២០២៣។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី១៣ កញ្ញានេះ លោកបណ្ឌិតយ៉ង សាំងកុមារ អនុរដ្ឋលេខាក្រសួងកសិកម្មកម្ពុជាបានពន្យល់ថា តម្លៃស្រូវដែលកំពុងធ្លាក់ថ្លៃនេះជាពូជ ឬប្រភេទស្រូវវៀតណាម OM ដែលមានតម្លៃទាបបំផុតត្រឹម ៩២០រៀលក្នុងមួយគីឡូក្រាម។ តែផ្ទុយទៅវិញ និងបើតាមលោកបណ្ឌិតយ៉ង សាំងកុមារ ពូជ ឬប្រភេទស្រូវរបស់ខ្មែរបែរជាហក់ឡើងខ្ពស់ជាងឆ្នាំមុនៗទៅវិញ។ សម្រាប់អ្នកជំនាញកសិកម្មរូបនេះ ស្រូវពូជរបស់ខ្មែរមិនពិបាកដាំ និងនៅតែជាជម្រើសល្អរបស់កសិករខ្មែរ៕

បណ្តាញផ្សព្វផ្សាយ​ផ្លូវការ​កូរ៉េខាងជើង បាន​បង្ហោះផ្សាយជាសាធារណៈ នៅថ្ងៃសុក្រទី​១៣កញ្ញានេះ នូវរូបភាពប៉ុន្មានសន្លឹក ដែល​គេឃើញលោកគីម ជុងអ៊ុន ចូលទៅពិនិត្យ​រោងចក្រចម្រាញ់ធាតុអារ៉ានីញ៉ូម។ នេះគឺជាលើកទី​១ហើយ ដែលរបបផ្តាច់ការកូរ៉េខាងជើង បង្ហាញ​ឲ្យគេឃើញ នូវទីតាំងក៏ដូចជា​​ហេដ្ឋារចនាសម្ព័ន្ធ ផលិត​អាវុធ​នុយក្លេអ៊ែរ​របស់ខ្លួន​។ ការបង្ហាញរូបភាពទាំងនេះ​ គឺត្រូវបាន​ធ្វើ​ឡើង​២ថ្ងៃក្រោយ​ គីម ជុងអ៊ុន បានប្រកាសថា​កូរ៉េខាងជើងនឹងប្រឹងប្រែងផលិត​អាវុធនុយក្លេអ៊ែរឲ្យ​បានច្រើន ដើម្បីត្រៀមទប់ទល់​សត្រូវ។

ក្រសួងសេដ្ឋកិច្ចអាមេរិកបានដាក់ទណ្ឌកម្មដោយបង្កកទ្រព្យសម្បត្តិក្រុមហ៊ុនរបស់លោកលី យ៉ុងផាត់ដោយសារតែមានជាប់ពាក់ព័ន្ធនឹងការរំលោភសិទ្ធិមនុស្សធ្ងន់ធ្ងរ ដូចជាការជួញដូរមនុស្ស និងពលកម្មដោយបង្ខំក្នុងប្រតិបត្តិការបោកប្រាស់តាមប្រព័ន្ធអ៊ីនធឺនែត។ ការដាក់ទណ្ឌកម្មរបស់អាមេរិកលើឧកញ៉ាខ្មែរ និងជាសមាជិកព្រឹទ្ធសភារូបនេះត្រូវបានស្ថាប័ននានារបស់រដ្ឋាភិបាលកម្ពុជាចេញមុខច្រានចោល និងចាត់ទុកជាការរំលោភបំពានអធិបតេយ្យភាពប្រទេសកម្ពុជា។

នៅថ្ងៃទី១២ កញ្ញា ក្រសួងសេដ្ឋកិច្ចអាមេរិកបានដាក់ទណ្ឌកម្មបង្កកទ្រព្យសម្បត្តិក្រុមហ៊ុនរបស់លោកលី យ៉ុងផាត់ដោយចោទពីបទជាប់ពាក់ព័ន្ធនឹងការបំពានសិទ្ធិមនុស្ស និងប្រតិបត្តិការឆបោកតាមប្រព័ន្ធអនឡាញយ៉ាងធ្ងន់ធ្ងរ។ អ្នកតាមដានសង្គមយល់ថា នេះជាចំណាត់ការរបស់អាមេរិកចំពោះជនមានប្រាក់ និងអំណាចមួយចំនួនដែលហ៊ានប្រព្រឹត្តអំពើពុករលួយ និងរំលោភសិទ្ធិមនុស្ស។ គណបក្សប្រជាជនកម្ពុជា ក្នុងនាមជាគណបក្សកាន់អំណាចបានថ្កោលទោសលើការសម្រេចរបស់ក្រសួងសេដ្ឋកិច្ចអាមេរិកដោយចាត់ទុកជាការបំពានអធិបតេយ្យភាពកម្ពុជា។

លោក​អាល់ប៊ែរតូ ហ្វូជីម៉ូរី ជនជាតិ​ជប៉ុន​ដែល​ដឹកនាំ​ប្រទេស​ប៉េរូ​ដោយ​កណ្តាប់ដៃដែក ពី​ឆ្នាំ ១៩៩០ ដល់​ឆ្នាំ ២០០០ បាន​ស្លាប់កាលពី​ថ្ងៃ​ពុធទី ១១​ កញ្ញា ក្នុង​វ័យ ៨៦ឆ្នាំ។ នេះបើតាម​ការប្រកាស​របស់​កូន​ប្រុសស្រី​របស់​លោក​ហ្វូជីម៉ូរី​ពី ពីរដ្ឋធានី លីម៉ា​។ ក្រៅពីផ្ញើសាររំលែកទុក្ខជាមួយ ក្រុមគ្រួសារ​របស់​លោក​អាល់ប៊ែរតូ ហ្វូជីម៉ូរី ប្រធានាធិបតី ប៉េរូ បានប្រកាស​កាន់ទុក្ខជាតិរយៈពេល​៣ថ្ងៃ គិត​ចាប់តាំងពីថ្ងៃព្រហស្បតិ៍នេះ។ ប៉េរូ​កាន់ទុក្ខជាតិឲ្យសពអតីត​ប្រធានាធិបតី​ចម្រូងចម្រាស​ដែលមានឥទ្ធិពល​ធ្វើ​ឲ្យប្រជាជន​​ប៉េរូបែកបាក់ ចែកគ្នា​ជា២ក្រុម។

ចិនបានប្រកាសគំរាម​ជាឱឡាឫក កងទ័ពចិននឹង​កម្ទេច នូវរាល់ការ​រំលោភបំពាន​ណាមួយ មកលើអធិបតេយ្យភាពដែនដីចិន នៅក្នុងតំបន់សមុទ្រចិនខាងត្បូង។ នេះ​គឺជាសម្តី​របស់មេបញ្ជាការកងទ័ពចិន​ម្នាក់​ នៅក្នុងឱកាស​វេទិកាស្តីពីសន្តិសុខនៅទីក្រុងប៉េកាំង​ ថ្ងៃទី​១២កញ្ញានេះ​។ សូម​បញ្ជាក់ថា មាន​បញ្ហាតាន​តាំងខ្លាំងឡើងៗ ប៉ុន្មានខែចុងក្រោយនេះ​នៅក្នុងតំបន់សមុទ្រចិនខាងត្បូង ដែលចិនអះអាងថាជារបស់ខ្លួនសឹងទាំងអស់ ខណៈវៀតណាម ម៉ាឡេស៊ី ប៊្រុយណេ និង​ហ្វីលីពីនជាដើម ក៏អះអាងថា គេមានចំណែកអធិបតេយ្យ​ភាពដែរ​​។

នៅថ្ងៃ​ទី​១១ ​កញ្ញា ​ឆ្នាំ ២០២៤​ ក្រសួងពាណិជ្ជកម្ម ​និងក្រសួងកសិកម្ម​បានសម្រេច​បន្តអនុវត្តរយៈពេល​ ៦ខែ​បន្ថែមទៀត​នូវវិធានការ​ហាមការនាំចូល​ជាបណ្តោះអាសន្ន​នូវថ្លើមជ្រូក​បង្កក ​ភាគ​បំណែក​សាច់ និង​គ្រឿងក្នុង​ផ្សេងទៀត។ ការសម្រេចដូចនេះ​ដោយក្រសួង​ទាំងពីរ​មើលឃើញថា ​ការអនុវត្ត​វិធានការ​រយៈពេល​៦ខែ​ដំបូង​ទទួលបាន​លទ្ធផលល្អ ​ព្រោះអាចជួយ​សង្គ្រោះ​ផលិតកម្ម​ចិញ្ចឹញសត្វ​នៅកម្ពុជា​។ ​ទោះយ៉ាងនេះក្តី ​ការនាំចូល​ថ្លើមសត្វជ្រូក​បង្កក និង​ភាគបំណែក​សាច់ និង​គ្រឿងក្នុង​ផ្សេងទៀត ​ក្រៅពី​ថ្លើមជ្រូក ​ដែលអាច​បរិភោគបាន​នៅតែ​បណ្តាលឲ្យ​ផលិតកម្ម​ជ្រូកនៅ​កម្ពុជាបន្ត​រង​ការគំរាមកំហែង ​និង​ឈានទៅដល់​ការ​ខូចខាត​ទាំងស្រុង​៕

ជាលើកទី១​នៅក្នុង​ប្រវត្តិអវកាសពិភពលោក អវកាសយានិក​មិន​អាជីព​២រូប​បាន​បណ្តែតខ្លួន​ក្នុងលំហអវកាស។ នៅថ្ងៃព្រហស្បតិ៍ អវកាសយានិក​ពីរនាក់បានអណ្តែតចេញពី​​យាន​អវកាស​របស់​ក្រុមហ៊ុន​SpaceX ដើម្បីដាក់ខ្លួន​ចូលទៅក្នុង​លំហអវកាស​ដែលស្ថិតនៅចម្ងាយ ប្រមាណ ៧០០គីឡូម៉ែត្រ​ពីផែនដី។ បេសកកម្ម​ថ្មី​របស់​ក្រុមហ៊ុន​SpaceX  ដែលមានឈ្មោះថា Polaris Dawn មាន​គោលដៅ​ធ្វើតេស្ត​សំលៀកបំពាក់​របស់​អវកាសយានិក ដែលជាផ្នែកមួយនៃ​គម្រោងការ​ធំ​របស់​​ក្រុមហ៊ុន​​SpaceX។ ដូចជា​ក្រុមហ៊ុន​អវកាសឯកជនផ្សេងទៀត ដូចជា Blue Origine ឬ​ប៊ូអ៊ីង ក្រុមហ៊ុន​Space X របស់​មហាសេដ្ឋី Elon Muskអភិវឌ្ឍ​យាន​សម្រាប់​​ហោះហើរ​ពាណិជ្ជកម្ម ដើម្បី​គោលដៅទេសចរណ៍ នៅថ្ងៃអនាគត។