លោក ជូង ជូងី មេធាវីការពារសិទ្ធិលោក រ៉ុង ឈុន ទីប្រឹក្សាគណបក្សកម្លាំងជាតិបានដាក់ពាក្យស្នើសាលាដំបូងរាជធានីភ្នំពេញដើម្បីសុំពន្យារពេលសវនាការករណីលោក រ៉ុង ឈុន ដែលគ្រោងធ្វើនៅថ្ងៃទី១៧ ខែមករា ឆ្នាំ២០២៥។ សំណើនេះត្រូវបានលោក ជូង ជូងី ពន្យល់ថា គឺមកពីលោកមានជំងឺផ្តាសាយដែលត្រូវទៅពិនិត្យសុខភាព។

យោងតាមកាសែតក្នុងស្រុកថៃ សមត្ថកិច្ចថៃបានស្នើឱ្យប៉ូលិសអាំងទែប៉ូលចេញនិវេទន៍ក្រហមតាមស្វែងរក និងចាប់ខ្លួនបុគ្គលឈ្មោះ លី រតនរស្មី ជនជាតិខ្មែរដែលសង្ស័យជាអ្នកបញ្ជាផ្ទាល់ឲ្យខ្មាន់កាំភ្លើងបាញ់សម្លាប់លោក លិម គិមយ៉ា អតីត​តំណាងរាស្ត្រនៃអតីតគណបក្សសង្គ្រោះជាតិនៅក្នុងប្រទេសថៃកាលពីថ្ងៃទី ៧ មករា។ ក្រុមសំឡេងប្រឆាំងបានទម្លាយថា បុគ្គលឈ្មោះ លី រតនរស្មី ដែលថៃកំពុងរកមុខនេះមានតួនាទីជាទីប្រឹក្សា លោក ហ៊ុន សែន ប្រធានគណបក្សប្រជាជនកម្ពុជា និងចោទចំៗថា គណបក្សប្រជាជនកម្ពុជាជាប់ពាក់ព័ន្ធនឹងឃាតកម្មបាញ់សម្លាប់លោក លិម គិមយ៉ា។ តែលោក សុខ ឥសាន អ្នកនាំពាក្យគណបក្សប្រជាជនកម្ពុជាមិនអាចបញ្ជាក់បានទេថា តើបុគ្គលឈ្មោះ លី រតនរស្មី ជាទីប្រឹក្សារបស់លោក ហ៊ុន សែន មែន ឬក៏យ៉ាងណាទេ។ អ្វីដែលលោកអាចធានាបានពេលនេះគឺថា គណបក្សប្រជាជនកម្ពុជាមិនការពារមន្ត្រីដែលមានពិរុទ្ធក្នុងឃាតកម្មបាញ់សម្លាប់លោក លិម គិមយ៉ា នោះឡើយ។

ក្រុមប្រឹក្សាអភិវឌ្ឍន៍កម្ពុជាបានប្រកាសនៅថ្ងៃទី១៣ មករាថា ក្នុងឆ្នាំ២០២៤ កម្ពុជាបានអនុម័តគម្រោងវិនិយោគសរុបចំនួន ៤១៤គម្រោងដែលជាចំនួនបំបែកកំណត់ត្រាប្រចាំឆ្នាំ។ ចិននៅតែជាវិនិយោគិនបរទេសឈរលេខរៀងទី១ នៅកម្ពុជា ពោលមានចំនួន ៤៩.៨២% ក្នុងចំនួនវិនិយោគិនបរទេសសរុប។ ក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៦ មករានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាកត់សម្គាល់ថា វិនិយោគិនចិនកាន់តែច្រើនមកវិនិយោគនៅកម្ពុជាក៏ព្រោះតែពួកគេមើលឃើញឱកាស និងបូកផ្សំជាមួយទំនាក់ទំនងស្អិតរមួតរវាងកម្ពុជា និងចិន។

បើ​តាម​កាតា​ដែល​​ជា​អន្តរការី​ដ៏​ចម្បង អ៊ីស្រាអែល​និង​ចលនា​ហាម៉ាស​ បាន​​ព្រមព្រៀង​នៅក្រុង​ដូហានៅរសៀល​ថ្ងៃពុធ​ទី​១៥​មករា​ម្សិលមិញ ទទួល​យក​បទ​​​ឈប់​បាញ់​និងការ​​ដោះ​លែង​ចំណាប់​ថ្នូរ។​ ​​​ប្រធានាធិបតី​អាមេរិក លោក​ដូណាល់​ត្រាំ និង​​ ​លោក​ចូបៃដិន ក៏​បាន​បញ្ជាក់​តាម​ក្រោយ​ជា​បន្តបន្ទាប់ អំពី​ការសម្រេច​បាន​នូវ​កិច្ច​​ព្រមព្រៀង​ឈប់​បាញ់​នៅ​ហ្កាហ្សានេះ​ដែរ។ ថ្វីបើ​ពុំ​ទាន់​មាន​ការចុះ​ហត្ថលេខា​លើ​កិច្ចព្រមព្រៀង​ទាំង​ស្រុង ហើយ​​​អ៊ីស្រាអែល​ថា​នៅ​មាន​ចំណុច​ត្រូវជជែក​ទៀតក៏​ដោយ ក៏ក្រុម​អន្តរការី​បាន​ព្រលយ​ឱ្យ​ដឹង​ថា​ កិច្ចព្រមព្រៀង​មាន​ច្រើន​ដំណាក់កាល។ កិច្ចព្រមព្រៀង​ដំបូង​ ​ត្រូវ​ចូលជា​ធរមាន​នៅ​ថ្ងៃ​អាទិត្យ​ទី​១៩​មករា​២០២៥ និង​មាន​រយៈ​ពេល​៤២​ថ្ងៃ។

ក្រោយពីមានការតវ៉ារបស់ប្រជាពលរដ្ឋជុំវិញការធ្លាក់ចុះតម្លៃស្រូវ រដ្ឋាភិបាលកម្ពុជាតាម​រយៈធនាគារអភិវឌ្ឍន៍ជនបទ និងកសិកម្ម (ARDB) សម្រេចទម្លាក់ថវិកាចំនួន ៣០លានដុល្លារ ដើម្បីជួយរក្សាលំនឹងតម្លៃស្រូវរបស់កសិករ។ ចំណែកក្រសួងកសិកម្មបានអំពាវនាវ​ឲ្យកសិករងាកទៅដាំពូជស្រូវសែនក្រអូបរបស់ខ្មែវិញជំនួសពូជស្រូវ OM របស់វៀតណាមដែលកំពុងធ្លាក់ថ្លៃ។ អ្នកជំនាញសេដ្ឋកិច្ច និងកសិកម្មយល់ថា ដំណោះស្រាយដោយបញ្ចេញទុនពិសេសរបស់រដ្ឋាភិបាលពេលនេះគ្រាន់ជាដំណោះស្រាយរយៈពេលខ្លីប៉ុណ្ណោះ។ តើរដ្ឋាភិបាល​គួរមានយន្តការអ្វីខ្លះដើម្បីដោះស្រាយបញ្ហាតម្លៃស្រូវធ្លាក់ថ្លៃ?។

​អាល្លឺម៉ង ដែល​ជា​ក្បាលម៉ាស៊ីន​​ទី១​នៃ​​តំបន់​សេដ្ឋកិច្ច​ចាយប្រាក់​អឺរ៉ូ​​ បន្ត​ជួប​​វិបត្តិ​សេដ្ឋកិច្ច ​២ឆ្នាំជាប់គ្នា ហើយ​ឆ្នាំថ្មីក៏​មានសញ្ញា​មិនល្អដែរ​។ ច្រើន​ខែមកនេះ​ រដ្ឋាភិបាល​ក្រុង​ប៊ែរឡាំង​ បាន​ខំប្រឹង​ដាក់​ចេញនូវ​​វិធានការ​ជាច្រើន​ ដើម្បី​លើកកម្ពស់​សន្ទុះ​វឌ្ឍនភាព​សេដ្ឋកិច្ច​។​ បញ្ហា​សេដ្ឋកិច្ច​ បានរាលដាល​​ជះឥទ្ធិពល​ដល់​នយោបាយ ហើយ​​ក៏​ជា​ផ្នែក​ធំមួយ​ជំរុញ​ឲ្យ​អាល្លឺម៉ង់​រៀបចំ​បោះ​ឆ្នោត​សភា​មុន​អាណត្តិ​។ តើវិបត្តិនៅអាល្លឺម៉ង់​​នេះ បណ្តាល​មកពី​កត្តា​អ្វីខ្លះ​? 

ប៉ូលិសអន្តរជាតិអាំងទែប៉ូលបានចេញនិវេទន៍ក្រហមស្វែងរក និងឃាត់ខ្លួន ពេជ្រ គឹមស្រ៊ិន ជនសង្ស័យដែលឱ្យតម្រុយខ្មាន់កាំភ្លើងបាញ់សម្លាប់លោក លិម គិមយ៉ា តំណាងរាស្ត្រនៃអតីតគណបក្សសង្គ្រោះជាតិ។ និវេទន៍ក្រហមរបស់ប៉ូលិសអាំងទែប៉ូលនេះធ្វើឡើងតាមការស្នើសុំរបស់ភាគីថៃដែលជារដ្ឋសមាជិក។ ប៉ូលិសថៃជឿជាក់ថា ប៉ូលិសអន្តរជាតិអាំងទែប៉ូល និងភាគីកម្ពុជាអាចចាប់ខ្លួន ពេជ្រ គឹមស្រ៊ិន បញ្ជូនឲ្យប្រទេសថៃបាន។ នេះបើតាមការចុះផ្សាយរបស់កាសែតថ្ងៃទី១៥ មករានេះ។

​បន្ទាប់ពី​ចូល​កាន់តំណែង​បាន​២០ថ្ងៃ នាយករដ្ឋមន្ត្រីបារាំង ហ្វ្រង់ស័រ បៃរូ បាន​ថ្លែងសុន្ទរកថា​នៅក្នុង​រដ្ឋសភាជាតិ​ ស្តីពី​​ គោលនយោបាយដឹកនាំទូទៅ របស់​រដ្ឋាភិបាល​ថ្មី។ ខ្លឹមសារ​រួមផ្តោត​ទៅលើវិស័យ​សិក្សាធិការជាតិ សុខាភិបាល សង្គមកិច្ច និង​អភិបាលកិច្ច​ ជាដើម។​ ក៏ប៉ុន្តែ សមាជិកសភាមួយចំនួន​​របស់បណ្តាក្រុម​​​គណបក្ស​ប្រឆាំង​ ហាក់​មិនពេញចិត្ត​នឹង​គោលនយោបាយ​នោះឡើយ ពិសេស​បញ្ហា​កំណែទម្រង់​ចូល​និវត្តន៍​ ហើយបក្សប្រឆាំង​បាន​ប្រកូក​ប្រកាស​​ធ្វើ​ញត្តិ​ទម្លាក់​នាយករដ្ឋមន្ត្រី​។

នៅថ្ងៃទី១៥ ខែមករា ឆ្នាំ២០២៥ នេះ សាលាខណ្ឌមានជ័យ និងសាលាខណ្ឌដង្កោបាននិមន្តព្រះសង្ឃជាច្រើនអង្គធ្វើពិធីសូត្រមន្តរំដោះគ្រោះនៅលើផ្លូវ៦០ម៉ែត្រ។ ពិធីសាសនានេះធ្វើឡើង ក្រោយមានគ្រោះថ្នាក់ចរាចរណ៍ញឹកញាប់ ដែលភាគច្រើនបណ្តាលមកពីការបើកបរលើសល្បឿនកំណត់។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៥ ខែមករានេះ លោកស្រី ដោ សម្ផស្ស អ្នកនាំពាក្យសាលារាជធានីភ្នំពេញបានថ្លែងថា ពិធីសាសនានេះធ្វើឡើងដើម្បីរំងាប់អារម្មណ៍ពលរដ្ឋ និងក៏ជាជំនឿក្នុងការជំរះគ្រោះចង្រៃតាមប្រពៃណីផងដែរ។ តាមលោកស្រី ដោ សម្ផស្ស សមត្ថកិច្ចនឹងពង្រឹងការអនុវត្តន៍ច្បាប់ចរាចរណ៍បន្ថែមទៀត ក្រោយដាក់កាម៉េរាចាប់ល្បឿនរួចរាល់៕

គ្មានទីផ្សារ តម្លៃស្រូវចុះថោក ជីឡើងថ្លៃ គ្មានទឹកធ្វើស្រែគ្រប់គ្រាន់ នេះសុទ្ធសឹងជាបញ្ហាដែលកសិករក្នុងស្រុកបាទី ខេត្តតាកែវបានលើកឡើង ខណៈដែលពួកគេកំពុងជួបប្រទះនឹងការធ្វើស្រែប្រាំងឆ្នាំនេះ។ កសិករខ្លះខកចិត្តនឹងតម្លៃស្រូវប្រភេទ OM ដែលឈ្មួញកំពុងទម្លាក់តម្លៃ និងបានធ្វើពួកគេបាក់ទឹកចិត្ត លែងចង់បន្តធ្វើស្រែនៅឆ្នាំក្រោយ ហើយងាកទៅធ្វើការរោងចក្រ សំណង់ ឬចំណាកស្រុកវិញ។ ចំណែកកសិករខ្លះទៀតបានបញ្ជាក់ពីការកាត់បន្ថយដីធ្វើស្រែ។

បន្ទាប់​ពី​បរាជ័យ​ម្តង​កាលពី​ដើម​ខែ នៅ​ថ្ងៃពុធ​ទី​១៥​មករា​២០២៥នេះ​​ ក្រុម​ភ្នាក់ងារអង្កេត​ប្រឆាំង​​​នឹង​អំពើ​ពុក​រលួយ​​កូរ៉េខាង​ត្បូង អាច​ចាប់​ខ្លួន លោក​​ប្រធានាធិបតី​ព្យួរ​អំណាច យូន ស៊ុកយោល បាន ហើយ​​ឃុំខ្លួនលោក​​ជា​បណ្តោះ​អាសន្នរយៈ​ពេល​៤៨​ម៉ោង​។ អាជ្ញាធរ​ទំនង​ត្រូវ​ចេញ​ដីកា​ថ្មី​មួយ​ទៀត​ ​ដើម្បី​អាច​បន្ត​ឃុំឃាំង​លោក​ យូន ស៊ុកយោល លើស​ពី​​ពីរ​ថ្ងៃ។

រដ្ឋាភិបាលកម្ពុជាតាមរយៈក្រសួងព័ត៌មាន និងក្រសួងទេសចរណ៍បានសហការគ្នារៀបចំកម្មវិធីផ្សព្វផ្សាយលើកកម្ពស់វិស័យទេសចរណ៍ និងប្រឆាំងព័ត៌មានក្លែងក្លាយស្តីពីប្រទេសកម្ពុជា។ កម្មវិធីនេះមានគោលបំណងផ្សព្វផ្សាយឲ្យកាន់តែទូលំទូលាយជាងមុនដល់អ្នកសារព័ត៌មាន និងអ្នកបង្កើតមាតិកាក្នុងបណ្តាញសង្គមនូវសក្តានុពលទេសចរណ៍របស់កម្ពុជា។

ស្ថានទូតបារាំង និងវិទ្យាស្ថានបារាំងប្រចាំនៅកម្ពុជាប្រកាសដាក់ឲ្យដំណើរការគម្រោងថ្មីមួយឈ្មោះ «ចតុ» ជាផ្លូវការ ដើម្បីជួយគាំទ្រដល់ការតែងនិពន្ធ និងការបង្កើតស្នាដៃថ្មីៗរបស់យុវជនកម្ពុជាដែលមានទេពកោសល្យនៅក្នុងឧស្សាហកម្មវប្បធម៌ និងច្នៃប្រឌិតនៅកម្ពុជា។ តាមស្ថានទូតបារាំង គម្រោងនេះមានគោលដៅពង្រឹងសមត្ថភាពយុវជន និងយុវនារីខ្មែរដែលមានទេពកោសល្យក្នុងវិស័យសំខាន់ៗចំនួន៤ គឺគំនូរជីវចល ភាពយន្ត តន្ត្រី និងការរាំ រួមទាំងការផ្តោតលើសារៈសំខាន់នៃការតែងនិពន្ធក្នុងដំណើរការច្នៃប្រឌិត។

រយៈពេល ​៦ ខែចុងក្រោយ នាយករដ្ឋមន្ត្រីវៀតណាម​និង​រុស្ស៊ី​ បានជួប​សន្ទនាគ្នាដោយផ្ទាល់ចំនួន ៣ ដង។ នេះបើ​​គិត​ចាប់ពី លោកប្រមុខរដ្ឋរុស្ស៊ី វ៉ាឌីមៀរ ពូទីន ដាក់ជើង​ជាន់ដីវៀតណាម កាលពីកន្លះឆ្នាំមុន​​​។ ​ក្នុង​ដំណើរ​ទស្សនកិច្ច ចំនួន ២ ថ្ងៃ​​របស់នាយករដ្ឋមន្ត្រីរុស្ស៊ី ​នៅរដ្ឋធានី​ហាណូយ ​ថ្នាក់ដឹកនាំ​ប្រទេសសម្ព័ន្ធ​មិត្ត​ចាស់វស្សា​​ទាំង ២ បានចុះ​កិច្ចព្រមព្រៀង​ស្តីពី​ថាមពល​នុយក្លេអ៊ែរ​​។

ប្រទេសសមាជិកអូតង់បានរួមដៃ សហការគ្នាដើម្បីតាមដាន​សកម្មភាព​ប៉ុនប៉ង​បំផ្លាញ​ខ្សែកាប​ក្រោមសមុទ្របាល់ទិក។ នៅក្នុងសេចក្តីប្រកាស​រួមកាលពីថ្ងៃអង្គារ​ទី ១៤មករា ក្រុមប្រទេស​ជាប់សមុទ្រ​បាល់ទិក ដែលជាសមាជិក​របស់​អូតង់អះអាង​បញ្ជូន យន្តហោះ នាវាចម្បាំង និងដ្រូនជាច្រើនគ្រឿង​ទៅ​បើកឆ្វែល​ល្បាត​នៅ សមុទ្រ​បាល់ទិក បន្ទាប់ពី​ខ្សែកាប​៦ខ្សែ តភ្ជាប់ពី​ហ្វាំងឡង់ទៅ​អេស្តូនី​ត្រូវ​បំផ្លាញ​ ដោយ​សកម្មភាពទុច្ចរិត។ រុស្ស៊ី​បានរងការចោទប្រកាន់ថា អាច​នៅពីក្រោយ​វិច្ឆេទកម្មក្រោមសមុទ្រ បន្ទាប់ពី​​កប៉ាល់​ខ្មោចដឹកប្រេងរបស់រុស្ស៊ី​មានវត្តមាននៅក្នុងតំបន់ទឹកដែលមាន​ខ្សែកាបក្រោមសមុទ្រ​ត្រូវ​បំផ្លាញ។

លោក រ៉ុង ឈុន ទីប្រឹក្សាគណបក្សកម្លាំងជាតិបានដឹកនាំសមាជិកបក្សទៅជួបជាមួយបណ្ដាស្ថានទូតនានាប្រចាំនៅកម្ពុជា។ បន្ទាប់ពីបានជួបជាមួយស្ថានទូតអាមេរិកកាលពីថ្ងៃទី១៣ មករា លោករ៉ុង ឈុនបានដឹកនាំសមាជិកបក្សទៅជួបជាមួយស្ថានទូតសហភាពអឺរ៉ុបនៅថ្ងៃទី១៤ មករានេះ។ ក្នុងជំនួបទាំងពីរនេះត្រូវបានលោក រ៉ុង ឈុន ប្រាប់វិទ្យុបារាំងអន្ដរជាតិ RFI នៅថ្ងៃទី១៤មករានេះថា តំណាងគណបក្សកម្លាំងជាតិបានលើកឡើងពីក្តីបារម្ភរបស់ខ្លួនជុំវិញបញ្ហាសិទ្ធិមនុស្ស និងប្រជាធិតេយ្យកម្ពុជាដែលនៅតែបន្តមានការគំរាមកំហែង និងចាប់ខ្លួនសំឡេងប្រឆាំងជាបន្តបន្ទាប់នារយៈពេលចុងក្រោយនេះ។

ក្រសួងសេដ្ឋកិច្ច និងហិរញ្ញវត្ថុគ្រោងបោះផ្សាយលក់មូលបត្ររដ្ឋក្នុងឆ្នាំ២០២៥ ក្នុងទឹកប្រាក់ចំនួន៥០០ពាន់លានរៀល ឬស្មើប្រមាណ ១២០លានដុល្លារអាមេរិក។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចចេញផ្សាយនៅថ្ងៃទី១៣ ខែមករា ឆ្នាំ២០២៥។

លោក ចូ បៃដិន បាន​ថ្លែងកោតសរសើរនយោបាយការបរទេស​អាមេរិក ដែល​ឋិតក្រោមអំណាច​ដឹកនាំរបស់​ខ្លួន​។   ប្រធានាធិបតីអាមេរិក​​ផុត​អាណត្តិ​រូបនេះ ​​អះអាង​ថា សហរដ្ឋអាមេរិក​ខ្លាំង​ក្លា​ជាង​៤ឆ្នាំមុន ហើយ​សម្ព័ន្ធមិត្ត​អាមេរិក​ក៏​ខ្លាំង​ពូកែ​ជាងមុន​ដែរ។ លោក បៃដិន ក៏​បាន​ឌឺដង​ចំអក​ឲ្យ​ប្រមុខរដ្ឋ​រុស្ស៊ី​ថា កម្មវត្ថុសង្គ្រាម​របស់​លោក ពូទីន បរាជ័យធ្លាក់​ទឹក​​ ​និងបញ្ជាក់​ថា សេដ្ឋកិច្ច​របស់​រដ្ឋអំណាច​ចិន ពុំ​អាច​វ៉ាដាច់​ សហរដ្ឋ​អាមេរិក​ឡើយ។ ប្រសាសន៍របស់​លោក ចូ បៃដិន ​ដែល​ថ្លែង​លើកសរសើរ​ខ្លួន​ឯងយ៉ាងដូច្នេះ ធ្វើឡើង​មួយ​សប្តាហ៍មុននឹង​ប្រគល់​សេតវិមាន​អាមេរិក​ទៅ​ឲ្យ​លោក ដូណាល់​ ត្រាំ។

ក្រសួងការពារជាតិអ៊ីរ៉ង់កាលពីថ្ងៃចន្ទទី ១៣ខែមករា ឆ្នាំ ២០២៥បានតាំងបង្ហាញដ្រូនវាយប្រហារប្រមាណ១ពាន់គ្រឿងដែលត្រូវយកទៅបំពាក់ឲ្យទីតាំងកងទ័ពរបស់អ៊ីរ៉ង់នៅទូទាំងប្រទេស។ ការតាំងសម្ញែងដ្រូនទំនើបៗ និងរៀបចំសមយុទ្ធជាច្រើនខែ ជាពិសេស នៅជុំវិញមជ្ឈមណ្ឌលចម្រើនសារធាតុអ៊ុយរ៉ានីញ៉ូមពេលនេះធ្វើឡើង មួយសប្តាហ៍មុន លោកដូណាល់ ត្រាំស្បថចូលកាន់តំណែងប្រធានាធិបតីអាមេរិក នៅថ្ងៃទី២០ មករាសប្តាហ៍ក្រោយ។ ចំពោះអ៊ីរ៉ង់ លោកដូណាល់ ត្រាំជាប្រធានាធិបតីអាមេរិកដែលអរិភាព ស្អប់អ៊ីរ៉ង់ និងជាសម្ព័ន្ធមិត្តចាក់ទឹកមិនលិចរបស់អ៊ីស្រាអែលដែលជាសត្រូវរបស់អ៊ីរ៉ង់។

ថ្ងៃអង្គារ ទី ១៤ ខែមករា ឆ្នាំ ២០២៥ ទីតាំងថាមពល និង រោងចក្រឧស្សាហកម្ម មួយចំនួន ដែលស្ថិតក្នុងខេត្តពីរផ្សេងគ្នាក្នុងសហព័ន្ធរុស្ស៊ី បានរងការវាយប្រហារ ដោយដ្រូនផ្ទុកគ្រាប់ផ្ទុះរបស់អ៊ុយក្រែន។ ផ្អែកតាមសេចក្តីរាយការណ៍ របស់អាជ្ញាធររុស្ស៊ី និង រូបភាព ដែលបានបង្ហោះផ្សព្វផ្សាយក្នុងបណ្តាញសង្គម ការវាយប្រហារលើទីតាំងយុទ្ធសាស្ត្ររុស្ស៊ី ពីសំណាក់អ៊ុយក្រែនលើកនេះ បានបង្កឲ្យមានការខូតខាត ដោយអគ្គិភ័យយ៉ាងសន្ធោសន្ធៅ។

វប្បធម៌នៃការសាក់យ័ន្ត្រ​​​វេទមន្តតាមបែបបុរាណខ្មែរធ្លាប់មានប្រវត្តិយូរលង់នៅក្នុងសង្គមខ្មែរតាំងពីសម័យបុរាណមកដល់ពេលបច្ចុប្បន្ន។ តែគេមិនត្រូវភ្លេចនិយាយទេថា ប្រពៃណីមួយនេះវិះនឹងបាត់បង់នៅក្នុងរបបខ្មែរក្រហម និងហាក់កំពុងត្រូវបានគ្របដោយវប្បធម៌ប្រពៃណីដ៏សម្បូរបែបនៃសម័យទំនើបសព្វថ្ងៃ។ អ៊ីចឹងហើយបានជាក្នុងរយៈពេលជាង ១០ឆ្នាំចុងក្រោយនេះ សហពន្ធ័ខ្មែរសាក់យ័ន្ត្រ​​​បានរួបរួមគ្នាខិតខំបន្តថែរក្សា ចងក្រងឯកសារ បង្ហាត់បង្រៀន និងជាពិសេស គឺការផ្សព្វផ្សាយដល់មហាជនទូទៅជាថ្មីដើម្បីបន្តកេរដំណែលបុរាណខ្មែរមួយឲ្យបាននៅគង់វង្សសម្រាប់ក្មេងៗជំនាន់ក្រោយ៕

នៅ​ថ្ងៃ​ចន្ទទី​១៣​មករា​២០២៥​នេះ បាតុករ​ហ្វីលីពីន​ជាង​មួយ​លាន​នាក់​ដែល​ជា​សមាជិកសាសនា​​និកាយ Iglesia ni Cristo ​(Eglise pour le Christ) បាន​ប្រមូល​ផ្តុំ​គ្នា​ជា​ច្រើន​កន្លែង​ ក្នុង​​ផ្ទៃ​ប្រទេស។ បុព្វហេតុ​នៃ​បាតុកម្ម ​គឺ​ ដើម្បីប្រឆាំង​នឹង​គម្រោងរៀប​ចំ​​ទម្លាក់​​លោកស្រី ​អនុប្រធានាធិបតី​ចេញ​ពី​តំណែង។ លោកស្រីសារ៉ា ឌុយទែរតេ បាន​ក្លាយ​ជា​​អនុប្រធានាធិបតី​នៅឆ្នាំ​២០២២។

ថ្ងៃទី១៣ ខែមករា ឆ្នាំ២០២៥ នេះជាខួប៧ថ្ងៃនៃឃាតកម្មលោក លិម គិមយ៉ា សមាជិកសភានៃអតីតគណបក្សសង្គ្រោះជាតិនៅក្នុងទីក្រុងបាងកក ប្រទេសថៃកាលពីល្ងាចថ្ងៃទី៧ មករា។ ក្នុងខួប ៧ថ្ងៃនេះ បក្សនយោបាយខ្មែរខ្លះ រួមទាំងសង្គមស៊ីវិលនៅកម្ពុជា និងនៅក្រៅប្រទេសបានរៀបចំពិធីបុណ្យរៀងៗខ្លួន។ តែពីខាងរដ្ឋាភិបាលកម្ពុជាវិញ អ្នកនាំពាក្យលោកប៉ែន បូណាបានអះអាងថា ក្នុងនាមជាខ្មែរតែមួយ និងនៅពេលដែលមានករណីបែបនេះ ខ្មែរតែងតែមានសម្មានចិត្តចូលរួមរំលែកទុក្ខ និងសោកស្តាយ ព្រោះនេះជាគុណធម៌របស់ខ្មែរទូទៅ និងថា រដ្ឋាភិបាលកម្ពុជាមានជំហរចូលរួមយ៉ាងសកម្មនៅក្នុងរឿងឃាតកម្មនេះ។ តើរដ្ឋាភិបាលកម្ពុជាគួររួមចំណែកយ៉ាងណាដើម្បីរកយុត្តិធម៌ឱ្យលោកលិម គិមយ៉ា?

នាយករដ្ឋមន្ត្រីអង់គ្លេស លោក​ គៀរ ស្តារមឺ កំពុងតែ​រងសម្ពាធរិះគន់ពីសំណាក់​គណបក្សប្រឆាំង ដែល​ទាមទារ​ឲ្យដកតំណែងរដ្ឋមន្ត្រីប្រឆាំងអំពើពុករលួយ។ នេះក៏ព្រោះតែសំណុំរឿង​​ស៊ើប​អង្កេត​ប្រឆាំងអំពើពុករលួយ​នៅ​បង់ក្លាដែស ដែល​មាន​ជាប់​ពាក់ព័ន្ធ​នឹង​ក្រុម​គ្រួសារ​របស់​អតីត​នាយករដ្ឋមន្ត្រី​​ លោកស្រី ​ឆេក ហាស៊ីណា។ ក្មួយ​ស្រីម្នាក់​​របស់​លោកស្រី ហាស៊ីណា ជា​មន្ត្រី​ជាន់​ខ្ពស់​របស់រដ្ឋាភិបាល​អង់គ្លេស។

ពល​រដ្ឋ​ខ្មែរ​នៅ​ក្រៅ​ប្រទេស​បាន​ធ្វើ​បុណ្យ​គម្រប់​៧​ថ្ងៃ​នៅ​ទី​កន្លែង​ផ្សេងៗ​គ្នា​ជូន​សព​ លោក លិម គិមយ៉ា តំណាង​រាស្ត្រ​នៃ​អតីត​គណ​បក្ស​សង្គ្រោះជាតិ​ដែល​ត្រូវ​បាន​បាញ់​សម្លាប់​នៅ​ទីក្រុង​បាងកក​ប្រទេស​ថៃ​កាល​ពី​ថ្ងៃ​ទី​៧ ខែ​មករា ឆ្នាំ​២០២៥​។​ ចំណែក​នៅ​ប្រទេស​កម្ពុជា គណ​បក្ស​កម្លាំង​ជាតិ​បាន​រៀប​ចំ​បុណ្យ៧​ថ្ងៃជូន​សព​អ្នក​នយោបាយ​ប្រឆាំង​រូប​នេះ​នៅ​ថ្ងៃ​ទី​១៣​ ខែ​មករា​នេះ​ក្នុង​ទី​ស្នាក់​គណបក្ស​នៅ​រាជ​ធានី​ភ្នំ​ពេញ​។

នៅ​ព្រឹក​ថ្ងៃ​ទី​១៣ ខែ​មករា ឆ្នាំ​២០២៥ សមត្ថកិច្ចថៃ​សម្រេច​បញ្ជូន​ជន​សង្ស័យ អេកាឡាក់ ភាណយ (Ekkalak Pheanou) ដែល​បាញ់​សម្លាប់​លោក លិម គិមយ៉ា តំ​ណាង​រាស្ត្រនៃ​អតីត​គណ​បក្ស​សង្គ្រោះជាតិ​ទៅតុលាការ​ព្រហ្ម​ទណ្ឌថៃ​ដើម្បី​បន្ត​នីតិ​វិធី​តាម​ច្បាប់​។ បើ​តាម​សារ​ព័ត៌មាន​ក្នុង​ស្រុក​របស់​ថៃ ជនល្មើស​រូប​នេះ​ប្រឈម​នឹង​បទ​ចោទ​ឃាតកម្ម​គិត​ទុក​ជាមុន និង​បទ​ល្មើស​ប្រើប្រាស់​អាវុធ​បាញ់​បោះ​នៅ​ទីសា​ធារណៈ​។

នៅប្រទេស​​​ចិន មន្ទីររដ្ឋបាល​ពន្ធគយ ប្រកាសរបាយការណ៍ថ្មី​ ដោយ​បញ្ជាក់​ថា ក្នុង​ឆ្នាំ២០២៤ ការ​​នាំចេញទំនិញចិន​ បាន​កើនឡើង​ខ្ពស់​បំផុត បើ​គិត​ចាប់ពីពេល​​ផ្ទុះ​ជំងឺ​រាតត្បាតសកល​កូវីដ​១៩​។ ចំណែក​ ការ​នាំចូល​ទំនិញ​វិញ​ ក៏​កើនឡើង គួរ​ឲ្យ​កត់​សម្គាល់​ដែរ។ កត្តា​ទាំង​នេះ​​ជំរុញ​សុខភាព​សេដ្ឋកិច្ច​ចិន​ ឲ្យ​មាន​ភាព​ធន់ និង​មាន​លំនឹង​​ស្ថិរភាព​ល្អ នាប៉ុន្មាន​ខែចុងក្រោយ​នេះ​។ ផ្ទុយទៅវិញ ការ​វិលត្រឡប់​មកកាន់អំណាចសេតវិមាន​​ជាថ្មី​របស់​លោក ដូណាល់ ត្រាំ អាច​នឹង​បង្កហានិភ័យ​ថ្មី​ និងនាំឲ្យ​ស្រពិចស្រពិល​ចំពោះ​វឌ្ឍនភាពសេដ្ឋកិច្ច​ចិន។​​

មហា​កុម្ភមេលា​ ធម្មយាត្រាក្នុង​សាសនា​ហិណ្ឌូ ដ៏​ធំ​ជាង​គេ​បំផុតនៅ​លើ​ពិភពលោក ​ដែល​តែង​រៀប​ចំ​ធ្វើ​ជា​រៀង​រាល់​១២​ឆ្នាំ​ម្តង បាន​ចាប់​ផ្តើម​នៅ​ថ្ងៃ​ចន្ទទី ១៣​មករា​រហូត​ដល់​ថ្ងៃទី​២៦​កុម្ភៈ​ នៅ​ក្នុង​ប្រទេស​ឥណ្ឌា។ ជា​​ពិធី​បុណ្យ​​​​​ដែល​ប្រមូល​ផ្តុំ​មនុស្ស​យ៉ាង​ច្រើន​បំផុត​ ដល់​ទៅប្រមាណ​ជាង​៤០០លាន​នាក់។ ​បរិស័ទ​​ហិណ្ឌូ ក្រុម​ដំបូង​គេ​​​ បាន​មក​ដល់​ទីបុណ្យ និង​ចុះ​លាង​បាប​ក្នុង​ទន្លេ​គង្គា តាំងពី​ព្រលឹម​ថ្ងៃ​មិន​ទាន់​រះ។

លទ្ធផលជំរឿនឆ្នាំ២០២៣ ដែលចេញផ្សាយដោយអង្គការជីវិតធម្មជាតិនៅកម្ពុជាបង្ហាញថា សត្វក្រៀលនៅសល់តែ ១៨០ក្បាលប៉ុណ្ណោះ។ តែដើម្បីជួយបង្កើនសត្វក្រៀលឡើងវិញ អង្គការជីវិតធម្មជាតិនៅកម្ពុជាបានសហការជាមួយកសិករនៅក្នុងតំបន់អន្លង់ព្រីង ស្រុកកំពង់ត្រាច ខេត្តកំពតដោយបង្កើត«គម្រោងស្រូវមិត្តក្រៀល»ក្នុងឆ្នាំ២០១៩។ ជាគម្រោងដែលជំរុញឲ្យមានការដាំដុះពូជស្រូវដែលសត្វក្រៀលចូលចិត្តស៊ីដោយមិនប្រើថ្នាំគីមីកសិកម្ម ឬជីគីមីកសិកម្ម។ នៅក្នុងកិច្ចសម្ភាសន៍ជាមួយវិទ្យុបារាំងអន្តរជាតិ RFI នាថ្ងៃទី១៣ ខែមករា ឆ្នាំ២០២៥នេះ លោក ឆេង មករា អគ្គនាយកក្រុមហ៊ុនដាវ៉ាន់បានឲ្យដឹងថា បើមានការគាំទ្រពីមហាជនដល់«អង្ករមិត្តក្រៀល» នោះសត្វក្រៀលនៅកម្ពុជានឹងស្ថិតនៅគង់វង្សយូរអង្វែង៕

គ្រោះមហន្តរាយភ្លើងឆេះព្រៃនៅទីក្រុង Los Angeles ​ហាក់មិន​ថមថយចុះទាល់តែសោះ។ បន្ទាប់ពីសង្ឃឹមបាន​មួយភ្លែត​នៅ​ពេល​ខ្យល់ចាប់ចុះខ្សោយ​បន្តិច ​នៅល្ងាចថ្ងៃសុក្រ ក្រុមពន្លត់អគ្គិភ័យ​ត្រូ​វប្រយុទ្ធ​នឹង​អំណាចភ្លើងឆេះសន្ធោសន្ធៅ ដោយសារ​តែ​កម្លាំងខ្យល់ចាប់បក់​លឿនខ្លាំងឡើងវិញ នៅថ្ងៃសៅរ៍។ គិតត្រឹម​ព្រឹកថ្ងៃអាទិត្យ ភ្លើងឆេះព្រៃ​ដែលផ្ទុះឡើង​ជាលើកដំបូង​នៅថ្ងៃអង្គារ​ ទី ៧មករា បាន​សម្លាប់មនុស្ស​១៦នាក់ ដុតបំផ្លាញសំណង់អគារ ​ប្រមាណ ១២០០០ និង​បណ្តាល​ឲ្យ​មនុស្ស​ជាង ១សែន​៥ម៉ឺននាក់​ត្រូវ​ជម្លៀសចេញពី​ផ្ទះសម្បែង។

ក្រូចថ្លុងកោះទ្រង់ជាដំណាំផ្លែឈើមួយប្រភេទដែលមានឈ្មោះល្បីល្បាញប្រចាំខេត្តក្រចេះ។ក្រូចថ្លុងកោះទ្រង់មានរសជាតិផ្អែម និងកំពឹសទន់ មានឱជារសឆ្ងាញ់ពិសា។ ប៉ុន្តែ នៅចុងឆ្នាំកន្លងទៅនេះក្រូចថ្លុងកោះទ្រង់ជួបបញ្ហាមួយចំនួន ដែលធ្វើឱ្យការទទួលផលមិនសូវបានល្អ។ ទាំងអាជីវករនិងអ្នកដាំក្រូចបានលើកឡើងដូចគ្នាបែបនេះ និងថា ត្រូវរង់ចាំដល់ប៉ុន្មានខែខាងមុខ ក្រែងទិន្នផលបានល្អប្រសើរឡើងវិញ។

នៅឆ្នាំ២០២៤ មានទេសចរចិនជាង៨៤ម៉ឺននាក់ បានមកទស្សនានៅកម្ពុជា ពោលគឺកើនឡើង៥៥% បើធៀបនឹងឆ្នាំ២០២៣។ ថ្មីៗនេះ លោក វ៉ាង វិនពីន(Wang Wenbin) ឯកអគ្គរដ្ឋទូតចិនប្រចាំនៅកម្ពុជា បានអះអាងថា ក្នុងឆ្នាំ២០២៥នេះ ទេសចរជនជាតិចិននឹងមកប្រទេសកម្ពុជាកាន់តែច្រើនជាងឆ្នាំមុន ។ លោកស្រី ហ៊ុន ដានី រដ្ឋលេខាធិខា និងជាអ្នកនាំពាក្យក្រសួងទេសចរណ៍បានប្រាប់វិទ្យុបារាំងអន្ដរជាតិRFI នៅថ្ងៃទី១២ ខែមករា ឆ្នាំ២០២៥ថា ក្រសួងបានដាក់ចេញនូវផែនការយុទ្ធសាស្ត្រជាច្រើនដើម្បីទាក់ទាញភ្ញៀវទេសចរចិនឱ្យមកទស្សនាកម្ពុជា។

ការផ្សាយកម្មវិធីព័ត៌មានប្រចាំថ្ងៃរបស់វិទ្យុបារាំងអន្ដរជាតិ ថ្ងៃអាទិត្យ ទី១២ ខែមករា ឆ្នាំ២០២៥ រៀបចំដោយ សាំ ឧត្តម

ភ្នាក់ងារចារកិច្ច​​កូរ៉េខាង​ត្បូង បាន​បញ្ជាក់​នៅ​ថ្ងៃ​អាទិត្យ​ទី​១២មករា​២០២៥ថា​ អ៊ុយក្រែន​ពិត​ជា​ចាប់​ខ្លួន​ទាហាន​កូរ៉េខាង​ជើង​បាន​ពីរ​នាក់​ នៅក្នុង​ដែន​ដី​រុស្ស៊ី​គួរស្ក៍។ ក្រុមចារកិច្ច​កូរ៉េខាងត្បូង​​បាន​ថែម​ទាំងចូល​រួម​សួរ​ចម្លើយ​​ឈ្លើយ​សង្គ្រាម​ជាមួយ​ភ្នាក់ងារ​អ៊ុយក្រែន​ទៀត។