លោក ញ៉ឹម ឆាយឡុង និស្សិតកំពុងសិក្សាជំនាញមេកានិកបានឆ្លៀតពេលទំនេរពីការសិក្សាដើម្បីគូរគំនូររូបត្លុកនៅខាងមុខព្រះបរមរាជវាំងនៅរៀងរាល់ចុងសប្តាហ៍។ លោកចូលចិត្តគូរគំនូរបែបនេះតាំងពីក្មេងដោយសិក្សាស្វែងយល់ខ្លួនឯងបន្ថែមតាមរយៈការមើលវីដេអូក្នុងយូធូប។ សម្រាប់លោក ញ៉ឹម ឆាយឡុង ការគូរគំនូរត្លុកនេះបង្ហាញពីសេរីភាពដែលកើតចេញពីគំនិតច្នៃប្រឌិត។ តែលោករំពឹងនឹងទទួលបានការគាំទ្រច្រើនពីសាធារណជន។

នៅថ្ងៃទី៣១ ខែមីនា ឆ្នាំ២០២៥នេះ ក្រសួងអប់រំ យុវជន និងកីឡាបានចេញសេចក្តីថ្លែងការណ៍មួយច្រានចោលការដាក់ចំណាត់ថ្នាក់អប់រំរបស់កម្ពុជានៃគេហទំព័រ World Population Review 2025 នៅលេខរៀងទី១២០ ក្នុងចំណោម ២០៣ប្រទេសកាលពីពេលថ្មីៗនេះ ពោលទាបជាងប្រទេសឡាវ និងទីម័រខាងកើត។ ក្រសួងអប់រំបានអះអាងថា វិស័យអប់រំកម្ពុជាមានវឌ្ឍនភាពទាំងបរិមាណ និងគុណភាព ហើយមិនអន់ជាងឡាវ និងទីម័រខាងកើតឡើយ។

ក្រុមហ៊ុន​ប្រេង​CNOOC របស់​ចិន បាន​ប្រកាស​ នៅថ្ងៃ​ចន្ទទី​៣១​មីនា២០២៥ រក​ឃើញ​កំណប់​អណ្តូង​ប្រេង​ដ៏​ធំ​មួយ នៅ​តំបន់​ប៉ែក​​ខាង​កើត​នៃ​សមុទ្ទ​ចិន​ខាង​ត្បូង។ បើ​តាម​ទី​ភ្នាក់ងារ​សារព័ត៌មាន​ផ្លូវការ​ចិន ​អណ្តូងរក​ឃើញ​ថ្មី​មានកប់​ប្រេង​ក្នុង​បរិមាណ​ដល់​ទៅ​ជាង​១០០លាន​តោន។

ពលករខ្មែរ១រូប ឈ្មោះ មាស សាវ៉ាង អាយុ២៣ឆ្នាំ រស់នៅក្នុងខេត្តបន្ទាយមានជ័យ ត្រូវបានរកឃើញនៅថ្ងៃទី៣១ ខែមីនានេះថាបានស្លាប់នៅក្នុងគ្រោះរញ្ជួយដីក្នុងប្រទេសថៃ ដែលបានកើតឡើងកាលពីថ្ងៃទី២៨ ខែមីនា ឆ្នាំ២០២៥។ ឯកអគ្គរាជទូតកម្ពុជាប្រចាំនៅប្រទេសថៃ ក្រសួងការបរទេស និងតំណាងក្រសួងការងារកំពុងរៀបចំសម្របសម្រួលបែបបទដើម្បីដឹកសពជនរងគ្រោះត្រលប់មកប្រទេសកម្ពុជាវិញ។ ភ្លាមបន្ទាប់ពីទទួលដំណឹងលោកនាយករដ្ឋមន្ត្រី ហ៊ុន​ ម៉ាណែត ក៏បានចេញសាររំលែកទុកនៅថ្ងៃនេះ ដល់ក្រុមគ្រួសារសពផងដែរ។ លោក កត្តា អ៊ន អ្នកនាំពាក្យក្រសួងការងារកម្ពុជាបានឲ្យដឹងនៅថ្ងៃទី៣១ ខែមីនា ឆ្នាំ២០២៥នេះថាក្រុមការងារក្រសួងការងារ និងអាជ្ញាធរដែនដីកំពុងរៀបចំឲ្យបានសមរម្យក្នុងការធ្វើបុណ្យសពតាមប្រពៃណី និងជួយសម្របសម្រួលជាមួយនិយោជកថៃឲ្យមានការទទួលខុសត្រូវនិងផ្តល់នូវប្រាក់សំណងអត្ថប្រយោជន៍ផ្សេងៗ។ សូមស្តាប់ការលើកឡើងរបស់លោក កត្តា អ៊ន ដែលរៀបចំដោយ ញឹម សុផល៖

មន្ទីរ​ប្រឆាំង​គ្រឿង​ញៀន​បាន​បង្ក្រាប​ករណី​ជួញ​ដូរ​គ្រឿង​ញៀន​ដែល​ប្រព្រឹត្ត​ដោយ​ជន​ជាតិ​ចិន​៣​នាក់ និង​ជន​ជាតិ​ភូមា​២នាក់​ដោយ​រឹប​អូស​បាន​គ្រឿង​ញៀន​ជាង​១០០​គីឡូ​ក្រាម​កាល​ពី​ថ្ងៃទី​២៦ ខែ​មីនា​ ឆ្នាំ២០២៥​។ ប្រតិបត្តិការ​បង្ក្រាប​គ្រឿង​ញៀន​នេះ គឺ​ជា​ការ​រួម​សហការ​រវាង​កម្លាំង​ជំនាញ​នៃ​ស្នងការ​ដ្ឋាននគរបាល​រាជ​ធានី​ភ្នំពេញ និង​ខេត្ត​ព្រះសីហនុ​។​ ចំណែក​គ្រឿង​ញៀន​ទម្ងន់ ១០១​គីឡូក្រាម​ដែល​រឹប​អូស​បាន​មាន​ប្រភព​មក​ពី​តំបន់​ត្រីកោណមាស​ដែល​គ្រោង​ដឹក​បន្ត​ទៅប្រទេស​ទី​៣ តាម​លម្ហសមុទ្រ​កម្ពុជា​។

ដើម្បី​ផ្តល់​ភាព​កក់​ក្តៅដល់​សម្ព័ន្ធមិត្ត​នៅ​អាស៊ី រដ្ឋមន្ត្រីក្រសួងការពារ​ជាតិ​​អាមេរិក​បាន​ប្រកាស​នៅ​ថ្ងៃ​អាទិត្យ​ទី ៣០មីនា ពី​ទី​ក្រុង​តូក្យូ​ថា នឹង​ដំឡើង​កម្មវិធី​រារាំង​ដ៏​គួរ​ឱ្យ​ទុក​ចិត្តនិង​ខ្លាំងក្លា​បំផុត នៅ​តំបន់​អាស៊ីប៉ាស៊ីហ្វិក និង​នៅ​​ច្រក​សមុទ្ទ​តៃវ៉ាន់។ តំបន់​ដែល​ចិន​បង្កើន​សកម្មភាព​យោធា​កាន់​តែ​ខ្លាំង​ឡើងៗ គំរាម​ប្រទេស​ខាង។

នៅថ្ងៃអាទិត្យ ទី៣០ មីនា អ៊ីស្រាអែលបានបន្តវាយប្រហារតំបន់ហ្កាហ្សា និង បានសម្លាប់ប្រជាជនប៉ាឡេស្ទីន យ៉ាងហោចណាស់ ១៩នាក់បន្ថែមទៀត។ លោកនាយករដ្ឋមន្រ្តីអ៊ីស្រាអែល ក៏បានប្រាប់ក្រុមហាម៉ាសឲ្យទម្លាក់អាវុធចុះចាញ់។ បើសិនយល់ព្រមតាមសំណើនេះ អ៊ីស្រាអែលនឹងយល់ព្រមឲ្យមេដឹកនាំក្រុមហាម៉ាសចាកចេញពីតំបន់ហ្កាហ្សា។

សមាគមស្វាយចន្ទីកម្ពុជាបានឱ្យដឹងថា មានក្រុមហ៊ុនតៃវ៉ាន់មួយឈ្មោះ Ju Hu Chang International Co., LTD បានចុះកិច្ចព្រមព្រៀងបញ្ជាទិញគ្រាប់ស្វាយចន្ទីកែច្នៃរួចពីកម្ពុជាចំនួន ៣ពាន់តោនក្នុង ១ឆ្នាំក្នុងរយៈពេល ៣ឆ្នាំ។ តែសមាគមព្រួយបារម្ភថា ការផ្គត់ផ្គង់ឱ្យក្រុមហ៊ុនអាចនឹងមិនគ្រប់គ្រាន់ ដោយសារតែទិន្នផលគ្រាប់ស្វាយចន្ទីឆ្នាំនេះធ្លាក់ចុះបណ្តាលមកពីវិបត្តិអាកាសធាតុ។ សមាគមយល់ថា ការណ៍នេះជាហេតុធ្វើឱ្យគ្រាប់ស្វាយចន្ទីឡើងថ្លៃ ខណៈក្រុមហ៊ុនកែច្នៃពិបាកក្នុងការប្រមូលទិញ។

ក្រោយគ្រោះ​​រញ្ជួយ​ដី​ដ៏​កំណាចដែលសម្លាប់​មនុស្ស​អស់​យ៉ាង​ហោច​​១៧០០នាក់​និង​របួស​ជិត​បួន​ពាន់​​នាក់ ក្រុម​ឧទ្ទាម​ប្រដាប់​អាវុធ​ជនជាតិ​ភាគ​តិច​នៅ​ភូមា បាន​ប្រកាស​ផ្អាកប្រយុទ្ធ​ប្រឆាំង​នឹង​​យោធា​រដ្ឋាភិបាល​ ដើម្បី​សម្រួល​ប្រតិបត្តិការ​សង្គ្រោះ។ ការ​ផ្អាក​បាញ់មាន​​រយៈ​ពេល​ពីរ​សប្តាហ៍ ​ដោយ​គិតចាប់​ពី​ថ្ងៃ​អាទិត្យ​ទី​៣០​មីនា​ទៅតែម្តង។

ថ្មីៗនេះ មានករណីហៅទៅសួរនាំ និងឃាត់ខ្លួនអ្នករិះគន់បញ្ហាសង្គមជាហូរហែ។ ជាក់ស្ដែងនៅថ្ងៃទី២៧ មីនា មានការឃាត់ខ្លួនម្ចាស់គេហទំព័រ Business Advisor ដោយមិនទាន់ដឹងពីមូលហេតុច្បាស់លាស់។ ចំណែកស្នងការនគរបាលរាជធានីភ្នំពេញបានកោះហៅលោក ប៊ុន ផាក ដែលជាអ្នកមានឥទ្ធិពលលើបណ្ដាញសង្គមម្នាក់ទៅសួរនាំ ក្រោយពីលោកបានរិះគន់បញ្ហាអសន្ដិសុខសង្គម។ អ្នកជំនាញសិទ្ធិមនុស្ស និងប្រជាធិបតេយ្យចាត់ទុកទង្វើនេះថាជាការរំលោភលើសិទ្ធិបញ្ចេញមតិ។ តែគណៈកម្មាធិការសិទ្ធិមនុស្សកម្ពុជាលើកឡើងថា ការឃាត់ខ្លួន និងហៅបុគ្គលមួយចំនួនទៅសួរនាំ គឺជាការអនុវត្តច្បាប់ ពោលមិនមែនជាការរំលោភសិទ្ធិសេរីភាពនោះទេ។

ថ្ងៃទី៣០ មីនា ឆ្នាំ ២០២៥ នេះជាខួប ២៨ឆ្នាំនៃព្រឹត្តិការណ៍គប់គ្រាប់បែកដៃចំនួន ៤គ្រាប់នៅខាងមុខអគាររដ្ឋសភាកាលពីថ្ងៃទី៣០ មីនា ឆ្នាំ ១៩៩៧។ ព្រឹត្តិការណ៍កាលណោះបានបណ្តាលឲ្យស្លាប់មនុស្ស ១៦នាក់ និងរបួសជាង ១០០នាក់។ នៅព្រឹកថ្ងៃទី៣០ មីនា ឆ្នាំ២០២៥ដែលជាខួបគម្រប់ ២៨ឆ្នាំ មានការជួបជុំគ្នាតាមបែបព្រះពុទ្ធសាសនាដូចរៀងរាល់ឆ្នាំនៅមុខចេតិយមួយកន្លែងក្បែរវត្តបទុមវតីដែលជាទីតម្កល់អដិ្ឋធាតុជនរងគ្រោះ។ គណបក្សក្រៅរដ្ឋាភិបាលមួយចំនួនដែលមានវត្តមាននៅក្នុងពិធីរំលឹកវិញ្ញាណក្ខន្ធលើកឡើងថា ពួកគេមិនអាចភ្លេចព្រឹត្តិការណ៍ថ្ងៃទី៣០ មីនា ឆ្នាំ ១៩៩៧ និងបន្តអំពាវនាវឲ្យរដ្ឋាភិបាលស្វែងរកឃាតករទៅកាត់ទោស។ 

គិតមកត្រឹមថ្ងៃអាទិត្យ ទី៣០ មីនា ភ្លើងឆេះព្រៃនៅភាគអាគ្នេយ៍ប្រទេសកូរ៉េខាងត្បូង ដែលបានចាប់ ឆាបឆេះកាលពីថ្ងៃសៅរ៍ ទី២២ មីនា បានសម្លាប់មនុស្សអស់ប្រមាណ ៣០នាក់ និង ដុតបំផ្លាញផ្ទះសម្បែងជាច្រើនសិបខ្នង រួមទាំងសំណង់បុរាណមួយចំនួន។ អាជ្ញាធរមូលដ្ឋានបានបើកការស៊ើបអង្កេតជាបឋម និងសង្ស័យលើបុរសជនជាតិកូរ៉េមានវ័យចំណាស់ម្នាក់ ថាជាអ្នកបង្កគ្រោះមហន្តរាយនេះ។

អ្នក​ឧក​ញ៉ា សំ សុខនឿន​ គឺ​ជា​ប្រធាន​សម្ព័ន្ធ​ក្រុម​ហ៊ុន​ SAM SN Group ​ដែល​វិនិយោគ​លើ​អចន​ទ្រព្យ​នៅកម្ពុជា​។​ លោក​ចាប់​ផ្តើម​ចូល​ប្រឡូក​ក្នុង​វិស័យ​នេះ ​តាំង​ពី​អំឡុង​ឆ្នាំ​២០០៨​ ពោល​តាំង​ពី​នៅ​សិក្សា​ថ្នាក់​បរិញ្ញា​បត្រ​នៅ​ឡើយ​។ ​មាន​អាយុ​៣៨​ឆ្នាំ ​លោក សំ សុខនឿន បាន​បញ្ចប់​ថ្នាក់​បណ្ឌិត​ពី​ប្រទេស​អង់​គ្លេស ​និង​ទទួល​បាន​ជោគ​ជ័យ​ផ្នែក​អចលន​ទ្រព្យ​ ដោយ​ចាប់​ផ្តើម​តាំង​ពី​ជិះ​ទូក​ដើរ​ទិញ​ដី​។

អាជ្ញាធរ​ភូមា បាន​ផ្តល់​តុល្យការ​ថ្មី​ ថា​ការ​រញ្ជួយដី​បាន​សម្លាប់​មនុស្ស​ជាង​១៦០០នាក់ គិត​ត្រឹម​​​រសៀល​ថ្ងៃ​សៅរ៍​ទី​២៩​មីនា​២០២៥។ ហើយ​ការ​សង្គ្រោះ​និង​រុក​រក​ជន​បាត់​ខ្លួន​ក្នុង​គំនរ​បែកបាក់ នៅ​តែ​បន្ត។ ប៉ុន្តែ​សម្រាប់​​អ្នក​ជំនាញ​អាមេរិក និង​អង់គ្លេស ដោយ​យោង​តាម​រូបមន្ត​​វិភាគមហន្តរាយវិញ ជន​រងគ្រោះស្លាប់​ ក្នុង​ហេតុ​​​ការណ៍​​រញ្ជួយ​ដី​ដ៏​កំណាច​ខ្លាំងនៅ​ភូមា​កាលពី​ថ្ងៃ​សុក្រទី​២៨​មីនា​ អាច​មាន​ចំនួន​​ដល់​​​រាប់​ម៉ឺន​នាក់។ ហេតុអ្វី​​អ្នក​ជំនាញ​​គិត​ឃើញ​ច្រើន​ម្ល៉េះ? តើអ្នក​ជំនាញ​​ពន្យល់​យ៉ាងដូច​ម្តេច​ខ្លះ? 

នៅជប៉ុន នាថ្ងៃសៅរ៍ ទី២៩ មីនា ក្នុងឱកាសពិធីរំលឹកខួប ៨០ឆ្នាំ នៃសមរភូមិប្រយុទ្ធបង្ហូរឈាមគ្នារវាងជប៉ុន និង សហរដ្ឋអាមេរិក នៅលើកោះ Iwo Jima អំឡុងសង្រ្គាមលោកលើកទី២ រដ្ឋាភិបាលនៃប្រទេសទាំងពីរបានប្រកាសបន្តពង្រឹង​កិច្ចសហប្រតិបត្តិការ​យោធា។

អង្គ​ការ​សង់​ត្រាល់ បាន​រាយការណ៍​ថា គិត​ត្រឹម​ម៉ោង​២:៣០នាទី​រសៀលថ្ងៃ​ទី ២៩ ខែ​មីនា ឆ្នាំ​២០២៥​នេះ​ក្រុម​ការ​ងារ​របស់​ខ្លួន​ប្រចាំ​ប្រទេស​ថៃ បាន​ឲ្យ​ដឹង​ថា មាន​ពលករ​ខ្មែរ​២​នាក់​ ប្តី​ប្រពន្ធ​បាន​បាត់​ខ្លួន​ក្នុង​អាគារ​បាក់​រំលំ ដោយសារ​រញ្ជួយ​ដី នៅ​ថ្ងៃ​ទី​២៨​ខែ​មីនា ក្នុង​ទី​ក្រុង​បាង​កក​។​

នៅថ្ងៃទី២៨ ខែមីនា ឆ្នាំ២០២៥ ក្រសួងបរិស្ថានបានអះអាងថា គុណភាពខ្យល់នៅកម្ពុជា មិនទាន់មានហានិភ័យប៉ះពាល់ដល់សុខភាពសាធារណជននៅឡើយទេ បើទោះបីជាប៉ុន្មានថ្ងៃកន្លងមកនេះ ផ្ទៃមេឃមានភាពអ័ព្ទអួក៏ដោយ។ តាមក្រសួងបរិស្ថាន ការអ័ព្ទអួរនេះ គឺបណ្ដាលមកពីអាកាសធាតុប្រែប្រួល។  

នៅថ្ងៃទី២៩ ខែមីនា ឆ្នាំ២០២៥នេះ មានករណីភ្ជង់អ្នក​បើក​រថយន្ដមួយ​គ្រឿង នៅតាមបណ្ដោយផ្លូវល្បឿនលឿនភ្នំពេញ​-ក្រុង​ព្រះសីហនុ ត្រង់ចំណុច​ស្រុក​អង្គស្នួល ខេត្តកណ្ដាល។  ក្នុង​សេចក្តី​បំភ្លឺ​របស់​ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានឱ្យដឹងថា ករណីនេះ គឺបណ្ដាលមកពីការរត់គេចខ្លួនរបស់ជនសង្ស័យ បន្ទាប់ពីសមត្ថកិច្ចដេញតាម​ចាប់​ខ្លួន ក្នុងករណីឆក់នៅផ្លូវជាតិលេខ៤។

លោក សម រង្ស៊ី ដែល​ទើប​ត្រូវ​បាន​ពលរដ្ឋ​ខ្មែរ​នៅក្រៅ​ប្រទេស​គាំទ្រ​ឲ្យ​ធ្វើ​ជា​ប្រធាន​« ក្រុម​ប្រឹក្សា​ជាតិ​តស៊ូ »  បាន​សរ​សេរ​សារ​ចូល​រួម​រំលែក​ទុក្ខ​ជា​មួយ ​លោក ហ៊ុន សែន ប្រធាន​គណ​បក្ស​ប្រជាជន​កម្ពុជា​ នៅ​គ្រា​ដែល​បង​ប្រុស​របស់​គាត់​ គឺ​លោក​ ហ៊ុន សាន ​បាន​ទទួល​មរណៈ​ភាព​ នៅ​ថ្ងៃ​ទី​២៨ ខែ​មីនា ​ឆ្នាំ​២០២៥​ ដោយ​រោគាពាធ។

ចំនួន​មនុស្ស​ស្លាប់​ ​ដោយសារគ្រោះរញ្ជួយដី​នៅភូមា​បានកើនឡើង​ដល់​​១៥០នាក់ និង​របួស​យ៉ាងតិច​៧៣២នាក់ ទាំង​នៅប្រទេស​ភូមា និង​ប្រទេសថៃ។ ថ្លែងតាម​កញ្ចក់​ទូរទស្សន៍រដ្ឋ​កាលពី​យប់​ថ្ងៃសុក្រ មេដឹកនាំ​របបសឹក​បានព្រមាន​ថា ចំនួនមនុស្ស​ស្លាប់​​​នៅភូមា​នឹង​អាចច្រើនជាង១៤៤នាក់ ដោយមើល​ទៅលើ​ស្ថានភាពសំណង់អគារផ្ទះសម្បែង​ដែល​បាក់រលំ ខូចខាត​យ៉ាងធ្ងន់ធ្ងរ​ដោយសារ​កម្លាំងរញ្ជួយព្រះធរណី។ នៅទីក្រុង​បាងកក ក្រុមជួយសង្រ្គោះបន្ទាន់នៅបន្តរុករក​ទាំងយប់ ដើម្បីស្វែងរក​មនុស្ស​នៅ​ក្រោម​គំនរថ្មអគារ៣០ជាន់ដែលបាក់ដួលរលំដល់​ដី ដោយសារ​កម្លាំង​រញ្ជួយដីពីប្រទេស​ភូមា។ អាជ្ញាធរ​ថៃ​ជឿថា មានមនុស្ស​ជិត​១០០នាក់ ដែល​អាច​បាត់ខ្លួននៅក្រោមគំនរអគារបាក់បែក។ ឈាង បុប្ផា​រាយការណ៍ព័ត៌មាននេះ៖

ចក្រភពអង់គ្លេសបានជំរុញឲ្យកម្ពុជាចុះកិច្ចព្រមព្រៀងស្តីពីពាណិជ្ជកម្មតាមប្រព័ន្ធអេឡិចត្រូនិច ឬហៅ E-Commerce ជាមួយខ្លួនដើម្បីកាត់ផ្តាច់រនាំងពាណិជ្ជកម្មឆ្លងដែនដែលមានលក្ខណៈស្មុគស្មាញ។ តាមរដ្ឋាភិបាលទីក្រុងឡុងដ៏ កិច្ចព្រមព្រៀងនេះនឹងជួយឲ្យកម្ពុជាទទួលបាននូវផលប្រយោជន៍សម្រាប់ការអភិវឌ្ឍសេដ្ឋកិច្ចសង្គម។

គ្រោះរញ្ជួយដីកំរិត ៧,៧រិចទ័រ នៅថៃ បណ្តាលឲ្យសំណង់អគារខ្ពស់មួយកន្លែងនៅទីក្រុងបាងកកដួលរលំដែលជាហេតុធ្វើឲ្យមានការបារម្ភថា អាចមានពលករខ្មែរកំពុងធ្វើការនៅការដ្ឋានសំណង់នោះ ខណៈពលករសរុបដែលកំពុងធ្វើការនៅទីនោះមានជាង ៣០០នាក់ ក្នុងនោះ ៨០នាក់ទាក់ទងមិនបាន។ នេះជាការលើកឡើងរបស់អង្គការសង់ត្រាល់នៅថ្ងៃទី២៨ ខែមីនា ឆ្នាំ២០២៥ នេះ។ លោក លឹង សុផុន មន្ត្រីគម្រោងផ្នែកការពារសិទ្ធិពលករប្រចាំប្រទេសថៃនៃអង្គការសង់ត្រាល់បានឲ្យដឹងថា លោកកំពុងបន្តតាមដានបញ្ហានេះយ៉ាងដិតដល់ដើម្បីឲ្យច្បាស់ថា តើមានពលករខ្មែរដែរឬទេនៅក្នុងឧប្បទ្ទវហេតុនេះ។ជាមួយគ្នានេះ ក្រសួងការបរទេសកម្ពុជាក៏បានចេញសេចក្តីប្រកាសព័ត៌មានទាក់ទងនឹងគ្រោះរញ្ជួយដីនៅថៃនេះដែរដោយបានបញ្ជាក់ថា ស្ថានទូតកម្ពុជាប្រចាំប្រទេសថៃមិនទាន់ទទួលបានព័ត៌មានណាមួយដែលថា តើមាន ឬមិនមានពលករ ឬពលរដ្ឋខ្មែររងគ្រោះដោយសារហេតុការណ៍រញ្ជួយដីនៅប្រទេសថៃ និងភូមានៅឡើយទេ។ លើសពីនេះ ស្ថានទូតបានត្រៀមលក្ខណៈសហការជាមួយអាជ្ញាធរប្រទេសម្ចាស់ផ្ទះដើម្បីផ្តល់ជំនួយដល់ពលរដ្ឋខ្មែររងគ្រោះ ឬត្រូវការជំនួយឲ្យអស់ពីលទ្ធភាព ព្រមទាំងអំពាវនាវឲ្យពលរដ្ឋខ្មែរទាំងអស់នៅប្រទេសថៃ និងភូមា មានការប្រុងប្រយ័ត្នខ្ពស់៕

គ្រោះរញ្ជួយដីដ៏ធំមួយបានកើតឡើង​នៅភាគកណ្តាល​ប្រទេស​ភូមា នៅ​ថ្ងៃ​សុក្រទី២៨ខែមីនា ដោយ​បានបណ្តាល​មនុស្ស​របួសជាច្រើនរយនាក់។ យោងតាម​ទីភ្នាក់ងារ​​របស់​អាមេរិក​ឈ្មោះ US Geological Survey (USGS) ការរញ្ជួយដីក្នុងកម្រិត​៧,៧មាត្រដ្ឋានរិចទែរនៅក្នុងប្រទេស​ភូមា​បាន​ទៅអង្រួនរង្គើ​ដល់​ប្រទេស​ជិតខាងរបស់ភូមា ដូចជា​ថៃ ចិន ឥណ្ឌា បង់ក្លាដែស ឡាវ។ នៅ​ប្រទេស​ថៃ រដ្ឋាភិបាល​បានប្រកាស​ស្ថានភាព​អាសន្ន បន្ទាប់ពី​អគារ​កំពស់​៣០ជាន់ក្នុង​ការដ្ឋានសាងសង់​បាក់រលំ សម្លាប់មនុស្ស​យ៉ាងតិច​១នាក់ និង​របួស​បាត់ខ្លួនជាង​៤០នាក់។ នេះបើតាម​តួលេខ​បឋម​របស់​ក្រុមជួយសង្រ្គោះថៃ គិតត្រឹម​រសៀលថ្ងៃសុក្រនេះ។

ជ័យលាភីរង្វាន់ណូបែលសន្តិភាពឆ្នាំ២០០៦ លោកបណ្ឌិត​ មូហាម៉ាដ យូនូស​ បាន​ជ្រើស​រើស​ប្រទេស​ចិន ដើម្បី​បំពេញ​ទស្សនកិច្ច​នៅបរទេស ​ជាលើកទី១​ ក្នុងនាម​ជា​ប្រមុខរដ្ឋាភិបាល​បង់ក្លាដែស​។ ប្រធានាធិបតីចិន ស៊ី ជីនពីង បា​នទទួលស្វាគមន៍​នាយករដ្ឋមន្ត្រីបង់ក្លាដែស​យ៉ាងកក់ក្តៅ នៅ​វិមាន​ប្រជាជនចិន​​ ហើយ​ប្រកាស​រឹតចំណង​មេត្រីភាព​នៃប្រជាជាតិ​ទាំង​២​ឲ្យ​កាន់តែ​រឹង​មាំ និង​ស៊ីជម្រៅ​។

អង្គភាពស៊ីម៉ាកបាន និងកំពុងបើកប្រតិបត្តិការបោសសម្អាតសំណល់យុទ្ធភ័ណ្ឌមិនទាន់ផ្ទុះនៅទីតាំងនៃគម្រោងព្រែកជីកហ្វូណន។ ប្រធានអង្គភាពស៊ីម៉ាក់ លោក ហេង រតនា បានប្រាប់វិទ្យុបារាំងអន្តរជាតិ RFI នៅថ្ងៃទី២៧ មីនាថា ប្រតិបត្តិការនេះនឹងបិទបញ្ចប់នៅមុនការចាប់ផ្តើមសាងសង់គម្រោងព្រែកជីកហ្វូណនជាផ្លូវការដើម្បីធានាសុវត្ថិភាពសម្រាប់ដំណើរការជីកព្រែកដ៏ធំមួយនេះ។

ក្នុងឱកាសចូលឆ្នាំខ្មែរចាប់ពីថ្ងៃទី ១៤-១៦ មេសាខាងមុខ​ សហភាពសហព័ន្ធយុវជនកម្ពុជានឹងរៀបចំព្រឹត្តិការណ៍អង្គរសង្ក្រាន្ត​ ២០២៥ ក្នុងខេត្តសៀមរាប ក្រោមប្រធានបទ «ញញឹមសាទរសង្ក្រាន្តឆ្នាំថ្មី»។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី២៨​ មីនានេះ លោក សោម រតនា ប្រធានក្រុម​ការងារផ្សព្វផ្សាយ និងទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្តឲ្យដឹងថា ដំណើររៀបចំព្រឹត្តិការណ៍អង្គរសង្ក្រាន្ត ២០២៥ សម្រេចបានប្រមាណ ៦០ភាគរយ ខណៈការរៀបចំល្បែងប្រជាប្រិយនានានឹងត្រូវបង្កើនឲ្យច្រើនជាងលើកមុនៗ។ ទន្ទឹមគ្នានេះ និងបើតាមលោក សោម រតនា «ព្រឹត្តិការណ៍អង្គរសង្ក្រាន្ត ២០២៥» នឹងត្រូវការពារសន្តិសុខសណ្តាប់ធ្នាប់ខ្ពស់ដើម្បីបញ្ចៀសហេតុការណ៍អាក្រក់ណាមួយដែលអាចកើតមានជាយថាហេតុ។

រញ្ជួយដីនៅប្រទេសជិតខាងកម្ពុជារួមមានថៃ វៀតណាម និងភូមា បង្កជាការព្រួយបារម្ភមកដល់ប្រទេសកម្ពុជាដោយសារតែមានការបញ្ជូនរូបភាពនៃការបាក់រលំសំណង់អគារខ្ពស់នៅថៃតាមបណ្តាញសង្គមអំឡុងពេលនៃការរញ្ជួយដីនៅថ្ងៃទី២៨ ខែមីនា ឆ្នាំ២០៣៥នេះ។ បុគ្គលិកក្រុមហ៊ុនឯកជន ធនាគារនៃអគារខ្ពស់មួយចំនួននៅក្នុងប្រទេសកម្ពុជាត្រូវបានប្រកាសឲ្យចាកចេញពីអគារបណ្តោះអាសន្ន ដើម្បីការពារសុវត្ថិភាពបើទោះណាជានៅមិនទាន់មានសញ្ញា ឬមិនទាន់មានភាពច្បាស់លាស់នៃការរញ្ជួយដីកើតឡើងក៏ដោយ។ លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់វិទ្យុបារាំង RFI ថាមកទល់រសៀលថ្ងៃសុក្រនេះថានៅកម្ពុជាជាពិសេសនៅភ្នំពេញមិនទាន់មានសញ្ញានៃការរង្គើនៅឡើយ និងថាក្រុមជំនាញរបស់គណៈកម្មាធិការជាតិគ្រប់គ្រងគ្រោះមហន្តរាយកំពុងបន្តតាមដានយ៉ាងយកចិត្តទុកដាក់។ សូមស្តាប់ការលើកឡើងរបស់លោក សុទ្ធ គឹមកុលមុនី ដែលរៀបចំដោយ ញឹម សុផល៖

សម្ព័ន្ធអង្គការសារព័ត៌មានអន្តរជាតិ Forbidden Stories ​បាន​ផ្សាយ​របាយការណ៍​ស៊ើប​អង្កេត​ថ្មី ស្តីពី​ទុក្ខវេទនា​របស់​អ្នក​កាសែតដែល​ធ្វើការ​នៅ​ក្រោម​ផ្សែងភ្លើង​សង្គ្រាម​ នៅ​តំបន់​ហ្កាហ្សា។   នៅ​ហ្កាហ្សា តាំងពីផ្ទុះសង្គ្រាម​ជា​ង​មួយ​ឆ្នាំមកនេះ  ​អ្នកសារព័ត៌មាន​ យ៉ាងតិច ១៧០ នាក់ បាន​ស្លាប់​បង់ជីវិត។​​

បារាំង អង់គ្លេស​នឹង​បញ្ជូន​ប្រតិភូ​ទៅ​អ៊ុយក្រែន​ដើម្បីត្រៀម​ពង្រាយទ័ព​របស់​សម្ព័ន្ធ​ប្រទេស​ស្ម័គ្រចិត្ត ដោយ​មិនទន្ទឹងរង់ចាំ​លទ្ធផល​នៃ​ការចរចា​រវាង​អាមេរិក និង​រុស្ស៊ី​ស្តីពី​ការបិទបញ្ចប់​សង្រ្គាម​នៅអ៊ុយក្រែន ថ្នាក់ដឹកនាំ​របស់ប្រទេស​អឺរ៉ុបភាគច្រើនដែលជា​សម្ព័ន្ធមិត្ត​របស់អ៊ុយក្រែន​បាន​ជួប​​ប្រជុំគ្នា​នៅទីក្រុង​ប៉ារីស កាលពីថ្ងៃព្រហស្បតិ៍ទី ២៧ មីនា នៅក្នុង​គោលដៅបិទបញ្ចប់​ការពិភាក្សា​ស្តីពី​ការធានា​សន្តិសុខ​ឲ្យ​អ៊ុយក្រែន។ ជាថ្មីម្តងទៀត ជំនួបកំពូលអឺរ៉ុប​ជាមួយ​អ៊ុយក្រែន​នៅទីក្រុង​ប៉ារីសប្រព្រឹត្តទៅ​ដោ​យគ្មានភាគីអាមេរិក​ចូលរួម។ ឈាង បុប្ផា​រាយការណ៍ព័ត៌មាននេះ៖

អគ្គនាយកដ្ឋានពន្ធនាគារ តាមរយៈអ្នកនាំពាក្យលោក ឃៀង សុណាឌីនបានបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃទី២៧ មីនា ឆ្នាំ២០២៥ នេះថា គ្មានករណីបណ្តែតបណ្តោយទុកទណ្ឌិតចោលរហូតដល់ស្លាប់នោះទេ។ ការបញ្ជាក់យ៉ាងដូច្នេះរបស់លោក ឃៀង សុណាឌីនធ្វើឡើង ក្រោយមានការចុះផ្សាយតាមបណ្តេញសង្គមនាពេលថ្មីៗនេះថា មន្ត្រីពន្ធនាគារព្រៃសបានទុកចោលអ្នកទោសរហូតដល់ដាច់ដង្ហើមស្លាប់។ តាមអគ្គនាយកដ្ឋានពន្ធនាគារ នៅពេលដែលរូបទណ្ឌិតនោះកំពុងមានបញ្ហាសុខភាព មន្ត្រីពន្ធនាគារបានបញ្ជូនរូបគេទៅសង្រ្គោះបន្ទាន់នៅមន្ទីរពេទ្យខាងក្រៅភ្លាមៗ។ តែជាអកុសលមិនអាចជួយសង្រ្គោះបានទាន់ពេល។ សូមស្តាប់ប្រសាសន៍លោក ឃៀង សុណាឌីន អ្នកនាំពាក្យអគ្គនាយកដ្ឋានពន្ធនាគារដែលរៀបចំដោយស៊ឹម ចាន់សំណាង៖

នៅថ្ងៃទី២៧ ខែមីនា ឆ្នាំ២០២៥ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានបើកកិច្ចប្រជុំស្តីពីការប្រយុទ្ធប្រឆាំងអំពើជួញដូរមនុស្សឆ្នាំ២០២៤ និងលើកទិសដៅសម្រាប់ឆ្នាំ ២០២៥។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២៧ ខែមីនា ឆ្នាំ២០២៥ នេះ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានថ្លែងថា អំពើជួញដូរមនុស្សនៅក្នុងឆ្នាំ២០២៤ កន្លងទៅមានការកើនឡើងដល់ទៅ ២០% ធៀបនឹងឆ្នាំ២០២៣។ កំណើននេះត្រូវបានលោកស្រី ជូ ប៊ុនអេង បញ្ជាក់ថាគឺជាបញ្ហាប្រឈមសម្រាប់ពិភពលោក ពោលមិនចំពោះតែប្រទេសណាមួយទេ៕

លោក អ៊ាង សុផល្លែត រដ្ឋមន្រ្តីក្រសួងបរិស្ថានបានលើកឡើងថា កម្ពុជានឹងទទួលបានការគាំទ្រពីមូលនិធិអាកាសធាតុបៃតងសកល ឬ Green Climate Fund ក្នុងទំហំទឹកប្រាក់ ៤០លានដុល្លារសម្រាប់ការអនុវត្តកម្មវិធីរេដបូកជាតិ។ ការលើកឡើងរបស់លោករដ្ឋមន្ត្រីក្រសួងបរិស្ថានដូច្នេះធ្វើឡើងនៅក្នុងជំនួបជាមួយតំណាងធនាគារពិភពលោកនាថ្ងៃទី២៦ មីនា។

ទីផ្សារ​ភាគហ៊ុន​អាស៊ី​ត្រូវ​រញ្ជួយ​ដោយសារ​នយោបាយ​ដំឡើងពន្ធថ្មី​របស់លោកដូណាល់ ត្រាំ។ នៅជប៉ុន និងកូរ៉េខាងត្បូង​តម្លៃភាគហ៊ុន​របស់​ក្រុមហ៊ុន​ផលិតរថយន្ត​បាន​ធ្លាក់ចុះ​គួរ​ឲ្យ​កត់សម្គាល់ បន្ទាប់ពីលោកដូណាល់ ត្រាំ ប្រកាស​កាលពីថ្ងៃពុធទី ២៦ មីនា ដំឡើងពន្ធ​២៥%​លើ​រថយន្ត​នាំចូលទៅ​អាមេរិក។ នៅក្នុងការប្រកាស​នៅសេតវិមាន នៅថ្ងៃពុធម្សិលមិញ លោកប្រធានាធិបតី​ដូណាល់ ត្រាំ​បានបង្ហើរ​ពី​ករណីលើកលែង លើរថយន្ត​ចិន បើសិន​ប៉េកាំង​យល់ព្រម​ឲ្យ​ក្រុមហ៊ុន​ចិន ByteDance លក់​កម្មវិធី​Tik Tok ឲ្យអាមេរិក។