ក្រសួងការបរទេសថៃបានឲ្យដឹងកាលពីថ្ងៃទី១០​ ខែសីហា ឆ្នាំ២០២៥នេះថា តំណាងអចិន្ត្រៃយ៍របស់រដ្ឋាភិបាលថៃនៅការិយាល័យអង្គការសហប្រជាជាតិនាទីក្រុងហ្សឺណែវ បានប្តឹងកម្ពុជាទៅប្រធានចាត់តាំងនៃកិច្ចប្រជុំលើកទី២២របស់រដ្ឋភាគី អនុសញ្ញាទីក្រុងអូតាវ៉ា ចំពោះការដាក់គ្រាប់មីនប្រឆាំងម​នុស្សដែលបានបណ្តាលឲ្យទាហានថៃ១១នាក់របួសធ្ងន់ស្រាលលើទីតាំងដែលភាគីថៃអះអាងថា ជាទឹកដីរបស់ខ្លួន។ តែកម្ពុជាបានបដិសេធដាច់អហង្ការចំពោះការចោទប្រកាន់របស់​ភាគីថៃម្តងហើយម្តងទៀតនេះ។

​បេក្ខជនប្រធានាធិបតីកូឡុំប៊ី​ លោក មីរ៉ែល អ៊ុយរីប តួរបៃ បាន​ទទួលអនិច្ចកម្ម នៅថ្ងៃ​ចន្ទ ទី១១សីហា​​ បន្ទាប់ពីទទួល​ការ​ព្យាបាល​និង​​វះកាត់​ជាច្រើន​លើក។ អ្នក​នយោបាយ​វ័យក្មេងរូបនេះ ​​រងរបួស​ធ្ងន់​ធ្ងរ​ ព្រោះតែ​​ខ្មាន់​កាំភ្លើង​បាញ់​ត្រូវ ៣ គ្រាប់ កាលពីខែមិថុនា​ ​ក្នុង​ពេល​​កំពុង​ធ្វើយុទ្ធនាការ​បោះឆ្នោត​។ ក្រោយទទួល​ដំណឹង​មរណទុក្ខ សហរដ្ឋអាមេរិក​​សម្តែងក្តីសោកស្តាយ និង​ទាមទារ​ឲ្យ​ស្វែង​រក​យុត្តិ​ធម៌​ជូន​ចំពោះ​ខ្មោចអ្នក​នយោបាយ​ស្តាំនិយម រូបនេះ។​  

នៅប៉ុន្មានថ្ងៃមកនេះ ប្រទេស​លោកខាងលិច​ជាបន្តបន្ទាប់គ្នា​បាន​ប្រកាសត្រៀម​ខ្លួនទទួលស្គាល់​រដ្ឋប៉ាឡេស្ទីន​ នៅក្នុង​ឱកាស​មហាសន្និបាតអង្គការ​សហប្រជាជាតិ​នៅ​ខែ​កញ្ញា​ខាងមុខ។ លើកលែងតែ​សហរដ្ឋអាមេរិក ប្រទេស​លោកខាងលិចដែលជា​សម្ព័ន្ធមិត្ត​របស់អ៊ីស្រាអែល​បាន​សន្យា​ទទួលស្គាល់​ប៉ាឡេស្ទីនជារដ្ឋមួយនឹងគេ នៅបន្ទាប់ពី​រដ្ឋាភិបាល​អ៊ីស្រាអែល​ប្រកាសពីផែនការ​ចូលទៅច្បាម គ្រប់គ្រង​ទីក្រុង​ហ្កាហ្សា។ នៅ​ថ្ងៃ​ចន្ទទី ១១​សីហា អូស្ត្រាលី​ជាសម្ព័ន្ធមិត្ត​ចុងក្រោយគេ​របស់អាមេរិក​ដែល​ងាកចេញពី​នយោបាយ​ការពារអ៊ីស្រាអែល ទៅ​ទទួល​រដ្ឋបាឡេស្ទីន។ តើ​ការប្រកាស​ទទួលស្គាល់​ពីសំណាក់​ប្រទេស​មហាអំណាច​ឧស្សាហកម្ម ដូចជា​បារាំង អង់គ្លេស​ កាណាដា និង​ចុងក្រោយ​គឺ​អូស្ត្រាលី នឹង​អាច​ទៅផ្លាស់ប្តូរ​ខ្សែទឹក​ ឬ​លក្ខខណ្ឌ​ជីវិត​របស់​របស់​ប្រជា​ជន​ប៉ាឡេស្ទីន​ដែរ​ឬទេ?

នៅថ្ងៃសៅរ៍ទី៩សីហា យោធាភូមិភាគ២ថៃ បានអះអាងថា ទាហានថៃ៣រូប បានរងរបួសក្នុងហេតុការណ៍ផ្ទុះមីនតាមតំបន់ព្រំដែនកម្ពុជា-ថៃ អំឡុងពេលពួកគេកំពុងដើរល្បាត។ អ្នកវិភាគនៅកម្ពុជា បង្ហាញក្តីបារម្ភថា ករណីផ្ទុះមីនជាថ្មីនេះអាចជាលេសរបស់ភាគីថៃ ដើម្បីបង្កការប៉ះទង្គិចឡើងវិញជាមួយកម្ពុជា។

ស្លឹកត្នោត មានអត្ថប្រយោជន៍សម្រាប់ដេរប្រក់លំនៅដ្ឋាន ត្បាញកន្ទេល ដេរមួក ធ្វើកន្ត្រក និងខ្ចប់ស្ករផែនជាដើម។ ដោយឡែកលោក រឿម ប៊ុនហាក់ ជាវិចិត្រករខ្មែរតែម្នាក់គត់ មានគំនិត​​ប្រើ​ដែក​ដុត​កម្ដៅទៅរោល​កម្លោច(ឬឆ្លាក់)លើបណ្ដូលស្លឹកត្នោតឱ្យចេញជារូបភាពផ្សេងៗ ដែលហៅថា សិល្បៈ​គំនូរ​កម្លោច​ស្លឹក​ត្នោត។ ក្រោយមាន​បទពិសោធ​ន៍ជិត ២០ ឆ្នាំ និង​កេរ្តិ៍ឈ្មោះ​ល្បី​ផ្នែក​វិចិត្រកម្ម​ដ៏កម្រ​នេះ លោក រឿម ប៊ុនហាក់ អាចលក់គំនូររបស់លោកបាន​​ចាប់ពី ៣០ ​ដុល្លារ​ទៅ​ដល់ ៣០០ ​ដុល្លារ ក្នុង១ផ្ទាំង។

លោក ហ៊ុន សែន ប្រធានគណបក្សកាន់អំណាចនៅថ្ងៃទី១១ ខែសីហា ឆ្នាំ២០២៥នេះ បាន​ប្រតិកម្មទៅកាន់​លោក សម រង្ស៊ី មេដឹកនាំនយោបាយប្រឆាំងដោយសារ លោក សម រង្ស៊ី បានលើក​​សរសើរដល់កងទ័ពថៃ និងបន្តុះបង្អាប់​កងទ័ពខ្មែរ​។ ប្រតិកម្មរបស់លោក ហ៊ុន សែន នាពេលនេះ ធ្វើឡើង​​​ក្រោយលោក សម រង្ស៊ី​ បានថ្លែងទៅកាន់សមាជិករបស់ខ្លួននៅក្នុង​ទីក្រុង Chambéry ប្រទេសបារាំង នាថ្ងៃទី១០ ខែសីហាម្សិលមិញ ពាក់ព័ន្ធទៅនឹងការវាយប្រហារគ្នា ដោយអាវុធរវាងកងទ័ពកម្ពុជា និងកងទ័ព​ថៃកាលពីពេលថ្មីៗនេះ​។

ទឹក​ជំនន់​នា​ប៉ុន្មាន​ថ្ងៃ​មក​នេះ ​បាន​ធ្វើ​ឲ្យ​មាន​ផល​ប៉ះ​ពាល់​ដល់​ក្រុង ​និង​ស្រុក​ចំនួន​៦​ ក្នុង​ខេត្ត​ក្រចេះ ​ដោយ​ប៉ះ​ពាល់​ដំណាំ​ស្រូវ​ចំនួន​ ៣​ ៣៤០​ហិកតា ​និង​ខូច​ខាត​សរុប​ចំនួន​ ២ ​៣៥០​ហិកតា ​រួម​ទាំង​ប៉ះ​ពាល់​ដំណាំ​ទ្រទ្រង់​សេដ្ឋ​កិច្ច​ផ្សេង​ទៀត​ចំនួន​១ ៣១២​ហិកតា​។​ នេះ​បើ​តាម​មន្ត្រី​ក្រសួង​កសិកម្ម​ដែល​បាន​លើក​ឡើង​នៅ​ក្នុង​កិច្ច​ប្រ​ជុំ​នៅ​មន្ទីរ​កសិកម្ម ​ខេត្ត​ក្រចេះ នា​ថ្ងៃ​ទី​៩ ​ខែ​សីហា​។

មជ្ឈមណ្ឌលសកម្មភាពកំចាត់មីនកម្ពុជា(ស៊ីម៉ាក់) បានរកឃើញសំណល់គ្រាប់បែកចំនួនជាង ១ពាន់គ្រាប់នៅក្នុងភូមិសាស្ត្រខេត្តឧត្តរមានជ័យ ដែលសុទ្ធសឹងជាគ្រាប់ដែលត្រូវបានទម្លាក់ដោយកងទ័ពអាកាសថៃ។ លោក ហេង រតនា អគ្គនាយកនៃអង្គភាពស៊ីម៉ាក់ បានអះអាងនៅថ្ងៃទី១០ ខែសីហា ឆ្នាំ២០២៥ថា ស៊ីម៉ាក់កំពុងបន្តស្វែងរក និងបោសសម្អាតគ្រាប់បែកធំៗ ដែលថៃបានប្រើក្នុងការឈ្លានពានមកលើទឹកដីកម្ពុជា។

ចំនួន​ប្រជាពលរដ្ឋ​​ជប៉ុន​នៅ​ឆ្នាំ​២០២៥ បាន​ធ្លាក់​ចុះ​យ៉ាង​ខ្លាំង​មិន​ធ្លាប់​មានទេ ​គិត​តាំង​ពី​ប្រទេស​ផ្តើម​ធ្វើ​​កំណត់​ត្រា​​ជំរឿនប្រជាជន​មក។ លទ្ធផល​នៃ​ជំរឿននេះ​ ​បាន​បញ្ជាក់​ឱ្យ​ឃើញកាន់​តែ​ច្បាស់​​អំពី​​ស្ថានភាព​​ចាស់​ជរា​របស់​ប្រជាជន​ជប៉ុន ដែល​រដ្ឋាភិបាល​បាន​ចាត់​ទុក​ជា ស្ថាន​ភាពបន្ទាន់​។

ថៃអះអាងថាទាហានរបស់ខ្លួន៣រូប បានរងរបួសក្នុងហេតុការណ៍ផ្ទុះមីនតាមតំបន់ព្រំដែនកម្ពុជា-ថៃ កាលពីថ្ងៃសៅរ៍ទី៩សីហា អំឡុងពេលពួកគេដើរល្បាតដោយរាយបន្លាលួស។ ក្រសួងការបរទេសថៃក៏បានចេញសេចក្តីថ្លែងការណ៍ថ្កោលទោស និងបានចោទប្រកាន់មកភាគីកម្ពុជាថា បានដាក់មីនថ្មីនៅតាមព្រំដែនដែលរំលោភមកលើដែនអធិបតេយ្យភាពរបស់ខ្លួន។ តែព័ត៌មាននេះ ត្រូវបានបដិសេធដោយភាគីកម្ពុជា។ អ្នកជំនាញកិច្ចការអន្តរជាតិ បង្ហាញកង្វល់ថា ហេតុការណ៍ផ្ទុះមីនជាថ្មីនេះ អាចជាចេតនារបស់ថៃ ចិញ្ចឹមចិត្តចង់ឈ្លានពានកម្ពុជាជាថ្មីម្តងទៀត។

បណ្តាញសារព័ត៌មានអាមេរិកបានរាយការណ៍កាលពីថ្ងៃសុក្រ ទី៨ សីហា ថា លោកប្រធានាធិបតី ដូណាល់ ត្រាំ បានចេញបញ្ជាឲ្យយោធាទាំងអស់ត្រៀមខ្លួនចេញទៅបង្ក្រាបក្រុមជួញដូរគ្រឿងញៀន នៅអាមេរិកឡាទីន។ ក្រោយពីទទួលបានដំណឹងនេះភ្លាម លោកស្រីប្រធានាធិបតីម៉ិកស៊ិកបានជំទាស់យ៉ាងដាច់អហង្ការចំពោះប្រតិបត្តិការបង្ក្រាបគ្រឿងញៀនរបស់យោធាអាមេរិក នៅលើទឹកដីរបស់ខ្លួន។

កិច្ចប្រជុំ​អន្តរជាតិ​នៅ​ក្រុង​ហ្សឺណែវ ដើម្បី​តាក់តែង​សន្ធិសញ្ញាពិភពលោក​​ប្រឆាំង​ប្លាស្ទិក​ គ្មានការ​ជឿន​លឿន​ទៅ​មុខ​​ទេ។ នេះ​បើ​តាម​តំណាង​ការទូត​អេក្វាទ័រ ដែល​ជា​ប្រធាន​ដឹកនាំ​កិច្ចប្រជុំ​អង្គការ​សហប្រជាជាតិស្តីពី​ប្លាស្ទិក។ ក្រុម​ប្រទេស​ផលិត​ប្រេង​បន្ត​រារាំង​ ហើយ​ប្រឆាំង​នឹង​ការ​កាត់​បន្ថយ​ប្លាស្ទិក​នៅ​លើ​ពិភពលោក​យ៉ាង​ខ្លាំង។ ហេតុអ្វី? ព្រោះ​តែ​ប្រយោជន៍​ហិរញ្ញវត្ថុឬ?

លោកប្រធានាធិបតី​​ដូណាល់ត្រាំនឹង​ជួបសមភាគី​រុស្ស៊ី​​លោក​ពូទីន​ នៅ​ថ្ងៃ​ទី​១៥​សីហា​ នៅរដ្ឋ​​អាឡាស្កា របស់​សហរដ្ឋ​អាមេរិក។ ម៉ូស្គូ​ក៏​បាន​បញ្ជាក់ថា​ពិត​ជា​នឹង​មាន​ជំនួប​រវាង​មេដឹកនាំកំពូល​ទាំង​ពីរ ដើម្បី​ជជែក​ដោះស្រាយ​អំពី​សង្គ្រាម​នៅ​អ៊ុយក្រែន។ ​ការ​ធ្វើ​សម្បទាន ទឹក​ដី ជាចំណុច​ដ៏​សំខាន់​មួយ​នៃកិច្ច​ពិភាក្សានេះ។ នេះ​​​បើ​តាម​ការ​អះអាង​របស់​លោកដូណាល់​ត្រាំ។ គ្មាន​ចំណែក​ក្នុង​ជំនួប​ លោកប្រធានាធិបតី​អ៊ុយក្រែន បាន​ព្រមាន​នៅ​ថ្ងៃ​សៅរ៍​នេះ ថា អ៊ុយក្រែន​មិន​ព្រម​បោះបង់​ទឹក​ដីរងការ​ឈ្លានពាន​​ទេ ឯ​ការ​សម្រេចចិត្ត​​ដោយ​គ្មាន​អ៊ុយក្រែន ជា​សេចក្តី​សម្រេច​ប្រឆាំង​សន្តិភាព។

ជំនួប​រវាង​​លោក​ដូណាល់ត្រាំ​និង​លោក​ពូទីន នៅ​ថ្ងៃទី​១៥​សីហា ដើម្បី​ស្វែង​រក​ដំណោះស្រាយ​បិទ​បញ្ចប់​សង្គ្រាម ដោយ​​ឱ្យ​អ៊ុយក្រែនធ្វើ​សម្បទាន​ទឹក​ដី កំពុង​ធ្វើ​ឱ្យ​ក្រុង​កៀវ​ព្រួយ​បារម្ភ​យ៉ាង​ខ្លាំង។ លោក​ប្រធានាធិបតី​អ៊ុយក្រែន​ហ្សេឡេនស្គី​បាន​ប្រកាស​ច្រាន​ចោល​ជា​ស្រេចមិន​ទទួល​យក​កិច្ចព្រមព្រៀង​ដែល​ធ្វើ​បាត់បង់​ទឹក​ដី​ទេ។ ចំណែក​អឺរ៉ុប​​ក៏​កំពុង​ខ្នះ​ខ្នែង​បញ្ចេញ​សំឡេង និង​បញ្ជាក់​អំពី​ការ​គាំទ្រ​ឥតងាករេ​​ជាមួយ​អ៊ុយក្រែន​។

ប្រជាជានអ៊ីស្រាអែលរាប់រាប់ម៉ឺននាក់ ដែលភាគច្រើនជាក្រុមគ្រួសារចំណាប់ខ្មាំងបានចេញធ្វើបាតុកម្ម នៅថ្ងៃសៅរ៍ ទី៩ សីហា ទាមទារឱ្យបិទបញ្ចប់សង្រ្គាមនៅហ្កាហ្សា និងដោះលែងចំណាប់ខ្មាំងជាបន្ទាន់ដែលឋិតក្នុងដៃក្រុមហាម៉ាស។ បាតុករបានផ្ទុះកំហឹងកាន់តែខ្លាំងឡើងប្រឆាំងនឹងផែនការវាយលុកចូលគ្រប់គ្រងតំបន់ហ្កាហ្សារបស់រដ្ឋាភិបាលអ៊ីស្រាអែល ព្រោះយល់ថា គម្រោងការថ្មីនេះ នឹងនាំគ្រោះថ្នាក់ដល់អាយុជីវិតរបស់ចំណាប់ខ្មាំងទៅវិញទេ។

លោកប្រធានាធិបតីអាមេរិក ដូណាល់ត្រាំ បានប្រកាសនៅសេតវិមាន កាលពីថ្ងៃសុក្រ ទី៨ សីហា ថា អាមេនី និងអាស៊ែបៃហ្សង់ យល់ព្រមបិទបញ្ចប់ជម្លោះដណ្តើមទឹកដីគ្នា ជាង៣០ឆ្នាំ។ នៅក្នុងពិធីចុះហត្ថលេខាលើកិច្ចព្រមព្រៀងសន្តិភាព ជានិរន្តរ៍ មេដឹកនាំនៃប្រទេសទំាងពីរបានថែមទាំងស្នើដាក់លិខិតគាំទ្របេក្ខភាព លោក ដូណាល់ ត្រាំ សម្រាប់ពានរង្វាន់ណូបែលសន្តិភាពផង។

លោក​ ហ៊ុន សែន ប្រធាន​ព្រឹទ្ធ​សភា​កម្ពុជា បាន​បញ្ចេញ​ប្រតិ​កម្ម​នៅ​យប់​ថ្ងៃ​ទី​៨​ ខែ​សីហាថា​ សង្គ្រាម​ព្រំដែន​កម្ពុជា-ថៃ បាន​ផ្ទេរ​ពី​សង្គ្រាម​ប្រើ​ប្រាស់​អាវុធ​ មក​ជា​សង្រ្គាម​ប្រើ​ប្រាស់​ជំពាម​កៅ​ស៊ូ​បាញ់​ដោយ​គ្រាប់​ឃ្លី និង​កូន​ដុំ​ដែក​។​ តាម​អតីត​នាយក​រដ្ឋ​មន្ត្រី​កម្ពុជា​ រឿង​នេះ​បើ​មើល​មួយ​ភ្លែត​ដូច​ជា​រឿង​កំប្លែង​ ឬ​ជា​រឿង​តូច​តាច​ តែ​បើ​ពិនិត្យ​ឲ្យ​ស៊ី​ជម្រៅ វា​ជា​រឿង​ធំ​ ប្រសិន​បើ​មិន​ទប់​ស្កាត់​បាន​ទេ​នោះ​។

មានវត្តមានជាពិសេសនៅទឹកដីបារាំងនៅក្នុងក្របខ័ណ្ឌនៃការជួសជុល និងការតាំងពិព័រណ៌នៅសារមន្ទីរជាតិបារាំងហ្គីមេ រហូតដល់ខែកញ្ញា ប្រតិមាព្រះវិស្ណុផ្ទំធ្វើពីសំរឹទ្ធមកពីប្រាសាទមេបុណ្យខាងលិចត្រូវបានអ្នកជំនាញបារាំងសិក្សាវិភាគរកឃើញជាច្រើនចំណុច។ ការរកឃើញដែលបានជួយបញ្ចប់ចម្ងល់មួយចំនួន និងបង្កើតភាពភ្ញាក់ផ្អើលក្នុងចំណោមអ្នកស្រាវជ្រាវបារាំង។ នៅក្នុងបទយកការណ៍របស់ឈាង បុប្ផានៅថ្ងៃនេះ លោកអ្នកនាងអាចស្តាប់ការពន្យល់របស់អ្នកជំនាញបារាំងម្នាក់ទៀត គឺ លោក David Bourgarit សាស្ត្រាចារ្យ និងជាវិស្វករផ្នែកលោហៈនៃមជ្ឈមណ្ឌលស្រាវជ្រាវ និងជួសជុលនៃសារមន្ទីរបារាំង C2RMF។

រដ្ឋាភិបាល​អាល្លឺម៉ង់​បាន​ចាត់វិធានការ​ដាក់ពិន័យ​អ៊ីស្រាអែល បន្ទាប់ពីប្រមុខ​រដ្ឋាភិបាល​របស់​ប្រទេស​នេះបញ្ជាឲ្យកងទ័ពចូលគ្រប់គ្រងហ្កាហ្សាទាំងមូល។ ប្រតិកម្ម​ទៅនឹង​ផែនការវាយលុកចូលគ្រប់គ្រង​ទឹកដីហ្កាហ្សា នាយករដ្ឋមន្រ្តីអាល្លឺម៉ង់​កាលពីថ្ងៃ​សុក្រទី ៨ សីហាបាន​ប្រកាស​​ផ្អាកការនាំចេញអាវុធទៅអ៊ីស្រាអែល។ សង្ស័យថា ​យុទ្ធសាស្រ្ត​របស់​អ៊ីស្រាអែលគ្មាន​ប្រសិទ្ធភាព​ដើម្បី ​រំដោះចំណាប់ខ្មាំង និង​ដកអាវុធ​ពីក្រុមហាម៉ាស ប្រមុខរដ្ឋាភិបាលអាល្លឺម៉ង់នៅបាន​ព្រមាន​អ៊ីស្រាអែល​កុំ​ឲ្យរាលដាល​ភ្លើងសង្រ្គាម​ចូលទៅក្នុង​ទឹកដី​ស៊ីហ្សកដានី​របស់​ប៉ាឡេស្ទីន។

នៅប៉ែក​ខាង​ត្បូង​ប្រទេស​បារាំងជាប់​នឹង​​​អេស្ប៉ាញ​ ភ្លើង​ឆេះព្រៃ​រាប់​ម៉ឺនហិកតារ​ បាន​បណ្តាល​ឲ្យ​ស្លាប់​មនុស្សម្នាក់ និង​របួស​ច្រើន​នាក់​។ អគ្គិភ័យចាប់ផ្តើម​ឆេះ​ តាំងពីថ្ងៃអង្គារ បន្ត​រហូត​ដល់​ថ្ងៃ​សុក្រ ទី​៨ សីហា ហើយ​នៅតែ​ពុំ​ទាន់​រលត់​ទៀត​។​

គិតត្រឹមថ្ងៃទី៨ ខែសីហា ឆ្នាំ២០២៥នេះ ពលករខ្មែរជាង ៨០ម៉ឺននាក់បានវិលត្រឡប់មកកាន់មាតុប្រទេសវិញ ដោយសារជម្លោះព្រំដែនកម្ពុជា-ថៃ។ ក្រសួងការងារកម្ពុជា តាមរយៈអ្នកនាំពាក្យ លោក ស៊ុន មេសា បានធានាថា ពលករខ្មែរដែលមកពីថៃទាំងអស់នឹងទទួលបានការងារធ្វើគ្រប់ៗគ្នា។ ក្រសួងការងារកម្ពុជាបានចេញមុខមកធានាសាជាថ្មី ថានឹងដាក់ទោសទណ្ឌលើជនឆ្លៀតឱកាស ដែលចង់ទារប្រាក់ពីពលរដ្ឋ ជាថ្នូរនឹងការទទួលបានការងារ នៅក្នុងប្រទេសកម្ពុជា។

យោងតាមអនុក្រឹត្យស្តីពី​ការ​ដាក់ឱ្យអនុវត្ត​អត្រាពន្ធគយលើទំនិញ​​នាំចូល​ពីសហរដ្ឋអាមេរិក​ចុះថ្ងៃទី​៨សីហានេះ រដ្ឋាភិបាលកម្ពុជា​បានសម្រេច​ដាក់ឱ្យអនុវត្តអត្រាពន្ធគយសូន្យ​ភាពរយ​ចំពោះមុខទំនិញ​ ដែលមានដើមកំណើត​នៅសហរដ្ឋអាមេរិក និងនាំចូល​មកកម្ពុជាពីសហរដ្ឋអាមេរិកផ្ទាល់។ ​តាមអនុក្រឹត្យ ​​​ទំនិញអាមេរិកដែលកម្ពុជា​មិនយកពន្ធគឺ​ មិនមែនជា​ទំនិញជជុះ ឬទំនិញ​ប្រើប្រាស់រួច​ហើយ​​នោះទេ​។ លោក​បណ្ឌិត ឌុច ដារិន្ទ អ្នកវិភាគសេដ្ឋកិច្ចយល់ថា ការសម្រេច​ឱ្យអនុវត្តអត្រាពន្ធ​គយសូន្យភាគរយចំពោះមុខទំនិញ ដែលបាន​កំណត់ខាងលើនេះនឹងចូលរួម​​ដល់ការរីកចម្រើនសេដ្ឋកិច្ចកម្ពុជា។ ​​​អ្នកវិភាគសេដ្ឋកិច្ចរូបនេះ​បានសម្តែងការគាំ​​ទ្រផងដែរ ចំពោះ​ការ​បន្តយកពន្ធ​លើទំនិញជជុះ​ពី​សហរដ្ឋ​​អាមេរិក​ ដោយលោកយល់ថា​ទោះទំនិញប្រភេទនេះ​​តម្លៃថោក តែវាបង្កផល​ប៉ះពាល់ដល់​សុខភាព​សាធារណៈ និងបរិស្ថានកម្ពុជា​​​។

នាយករដ្ឋមន្ត្រី​អ៊ីស្រាអែល​ លោក បេនចាមិន នេតាន់យ៉ាហ៊ូ​ បាន​សម្រេច​បញ្ជា​ឲ្យ​កងទ័ព​អ៊ីស្រាអែល​វាយលុក​ចូល​គ្រប់​គ្រង​ទឹកដីហ្កាហ្សា​ទាំងមូល​។ ​ អង្គការ​សហប្រជាជាតិ ​មហា​អំណាច​អង់គ្លេសនិង​ចិន​ បានបង្ហាញ​ជំហរ​​ជំទាស់ និង​ប្រាប់​អ៊ីស្រាអែល​ឲ្យ​បញ្ចប់​សកម្មភាព​សឹកចម្បាំង​​ជាបន្ទាន់។​  

កម្មវិធីព័ត៌មានប្រចាំថ្ងៃសុក្រ ទី៨ ខែ​សីហា ឆ្នាំ២០២៥ ដោយ សាំ ឧត្តម

កម្ពុជា និង​ថៃសម្រេចបាននូវ​​ការឯកភាពគ្នាចំនួន ១៣ចំណុច នៅក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ GBC នៅទីក្រុងគូឡាឡាំពួរ ប្រទេសម៉ាឡេស៊ី នាថ្ងៃព្រហស្បតិ៍ទី៧សីហាម្សិលមិញ​។ ១៣ចំណុចនោះមានទាក់ទងនឹងការអនុវត្តបទឈប់បាញ់ឲ្យខ្ជាប់ខ្ជួន និងយន្តការនានាដើម្បីបញ្ចៀសស្ថានការណ៍តានតឹង​ក្នុងជម្លោះ​​ព្រំដែនកម្ពុជា-ថៃ។ ទោះជាយ៉ាងនេះក្តី អ្នកជំនាញកិច្ចការអន្តរជាតិ យល់ថា កិច្ចព្រមព្រៀងទាំង ១៣ចំណុចនៃ GBC មិនទាន់អាចធានា​បានទាំងស្រុងនូវដំណោះស្រាយជម្លោះព្រំដែនកម្ពុជា-ថៃនៅឡើយ។ 

មេដឹកនាំបណ្តាប្រទេសមួយចំនួនទាំងក្នុងទ្វីបអាស៊ី និងលោកខាងលិចបានចេញមកស្វាគមន៍កិច្ចព្រមព្រៀងកម្ពុជា-ថៃ តាមរយៈកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ GBC នៅទីក្រុងគូឡាឡាំពួរ ប្រទេសម៉ាឡេស៊ី នៅថ្ងៃទី៧ ខែសីហា ឆ្នាំ២០២៥។ ចំពោះបណ្តាប្រទេសទាំងនោះ កិច្ចព្រមព្រៀងដែលសម្រេចបាន​នោះ​ជាជំហានដំបូងប្រកបដោយការស្ថាបនា និងសំខាន់បំផុតក្នុងការអនុវត្តបទឈប់បាញ់រវាងកម្ពុជា និងថៃ។

កម្មវិធីព័ត៌មានប្រចាំថ្ងៃពុធ ទី៦ ខែ​សីហា ឆ្នាំ២០២៥ ដោយ ស៊ឹម ចាន់សំណាង

រដ្ឋាភិបាល​ថ្មីរបស់អាល្លឺម៉ង់ទំនង​មិន​បោះបង់ចោលនយោបាយ​ប្រយុទ្ធប្រឆាំង​នឹង​ជនអន្តោប្រវេសន៍។ ខណៈពេល​ដែល​យុទ្ធនាការ​រឹតបន្តឹង​ការត្រួតពិនិត្យ​ច្រកព្រំដែន​ត្រូវ​ចប់​នៅ​ថ្ងៃទី ១៦​កញ្ញា​ខាងមុខ រដ្ឋមន្រ្តីក្រសួងមហាផ្ទៃអាល្លឺម៉ង់ កាលពីថ្ងៃ​ព្រហស្បតិ៍​ទី ៧ សីហា​បាន​អះអាងថា អាល្លឺម៉ង់​នឹង​ពន្យារវិធានការត្រួតពិនិត្យ​ច្រកព្រំដែន សម្រាប់​រយៈពេល​៦ខែ​ទៅមុខទៀត។ ការរឹតបន្តឹង​ច្រកព្រំដែន​ក្នុង​ហេតុផល​ប្រយុទ្ធប្រឆាំង​នឹង​ជនអន្តោប្រវេសន៍ខុសច្បាប់ បានធ្វើឲ្យ​ប្រទេស​ជិតខាងរបស់អាល្លឺម៉ង់មាន​ការអាក់អន់ ថ្នាំងថ្នាក់ចិត្ត​ជាខ្លាំង។ ប៉ូឡូញ​ផ្ទាល់​ដែលប្រឆាំង​នឹង​ការស្តាររបាំងរនាំងរវាងប្រទេស​អឺរ៉ុប​ក្នុង​លំហស្ហិនហ្កិន ក៏បាន​ប្រតិកម្ម​តប​នឹង​អាល្លឺម៉ង់ ដោយ​ការរឹតបន្តឹង​ច្រកចេញចូល​នៅ​ព្រំដែន​របស់ខ្លួនជាមួយអាល្លឺម៉ង់។

ចាប់តាំងពីការផ្ទុះសង្គ្រាមរវាងកម្ពុជា-ថៃ កាលថ្ងៃទី២៤ ខែកក្កដា ឆ្នាំ២០២៥ សហរដ្ឋអាមេរិកដែលជាបងធំទី១ពិភពលោកបានចេញមុខភ្លាមៗមកសម្របសម្រួលឱ្យមានបទឈប់បាញ់រវាងភាគីជម្លោះទាំងពីរ និងបានបន្តតាមដានការអនុវត្តបទឈប់បាញ់គ្នានោះយ៉ាងដិតដល់ថែមទៀតផង។ ជាមួយគ្នានេះ នៅថ្ងៃទី៧ ខែសីហា មេបញ្ជាការកងកម្លាំងប្រចាំតំបន់ឥណ្ឌូប៉ាស៊ីហ្វិករបស់សហរដ្ឋអាមេរិក ក្នុងគ្រាដែលជួបជាមួយរដ្ឋមន្ត្រីក្រសួងការពារជាតិកម្ពុជាលោកទៀ សីហា ក៏បានអះអាងថា អាមេរិកនឹងផ្តល់ជំនួយចំបាច់នានាក្នុងការអនុវត្តបទឈប់បាញ់រវាងកម្ពុជា-ថៃឱ្យមានប្រសិទ្ធិភាព ឈានទៅដល់ការកសាងសន្តិភាពឋិតថេរមួយ នៅតាមបន្ទាត់ព្រំដែនរបស់ប្រទេសទាំងពីរ។ អ្នកជំនាញកិច្ចការអន្តរជាតិយល់ថា អាមេរិកកំពុងបង្ហាញពីឥទ្ធិពលរបស់ខ្លួនក្នុងការរក្សាសណ្តាប់ធ្នាប់ពិភពលោក ក្នុងនាមជាប្រទេសមហាអំណាចដែលស្រឡាញ់សន្តិភាព តែមិនមែនក្នុងន័យទប់ឥទ្ធិពលរបស់ចិនដែលកំពុងរីកធំក្នុងតំបន់ឥណ្ឌូប៉ាស៊ីហ្វិកនោះឡើយ។ 

អត្រាពន្ធគយ​ថ្មី​របស់​សហរដ្ឋ​​អាមេរិក​ បានចូលជាធរមាន នៅ​ថ្ងៃទី​៧សីហានេះ​។ ក្នុង​​នោះ លោក​ប្រធានាធិបតី​ ដូណាល់ ត្រាំ បានសម្រេចដំឡើង​ពន្ធគយបន្ថែម ដល់ទៅ​ ៥០% ​ចំពោះ​ទំនិញ​នាំចូល​ពី​ឥណ្ឌា។ នេះក៏ព្រោះតែចៅហ្វាយ​សេតវិមាន​អាមេរិកចង់​សំដៅ​ដាក់​សម្ពាធលើវិមាន​ក្រេមឡាំង​ ​ដ្បិ​តថា ឥណ្ឌាជា​ដៃគូ​ពាណិជ្ជកម្ម​របស់រុស្ស៊ី និង​ជួយ​ទិញប្រេង​ពីរុស្ស៊ី​។​ នៅ​ពេល​ភ្លាមៗនេះ សហគ្រិនឥណ្ឌា និង​ធុរជនបរទេស​​នៅស្រុក​ឥណ្ឌា កំពុងតែព្រួយ​បារម្ភ​អំពីការ​ក្ស័យ​ធន​។​ ​

ប្រេសិតពិសេស​របស់​លោកដូណាល់ ត្រាំ គឺ​លោក Steve Witkoff​​បានទៅដល់ទីក្រុង​ម៉ូស្គូ កាលពីថ្ងៃ​ពុធទី ៦សីហា ដើម្បី​ជួប​មេដឹកនាំ​រុស្ស៊ី លោក​វ្លាឌីមៀរ ពូទីន។ នៅក្នុង​សេចក្តីប្រកាស​ វិមានក្រេមឡាំងចាត់ទុក ការពិភាក្សារវាង មេដឹកនាំរុស្ស៊ី លោក វ៉្លាឌីមៀរ ពូទីន និង លោក Steve Witkoff បេសកជនរបស់លោក  ប្រធានាធិបតី អាមេរិក ដូណាល់ ត្រាំថា ”មានប្រយោជន៍និងស្ថាបនា”។ ជំនួប​នៅទីក្រុង​ម៉ូស្គូ ប្រព្រឹត្តទៅ នៅតែ​ពីរថ្ងៃទៀតប៉ុណ្ណោះ មុន​ផុតកាលកំណត់ នៃឱសានវាទអាមេរិក សំដៅបញ្ចប់ សង្គ្រាម នៅ អ៊ុយក្រែន។។

សាលាដំបូងរាជធានីភ្នំពេញ នៅថ្ងៃព្រហស្បតិ៍ទី៧សីហានេះ បានបើកសវនាការកោះហៅអនុប្រធានគណបក្សភ្លើងទៀន លោក ថាច់ សេដ្ឋា ឲ្យចូលបំភ្លឺលើសំណុំរឿងថ្មីមួយទៀត ដែលទាំងមេធាវី និងសាច់ញាតិរបស់អ្នកនយោបាជំទាស់រូបនេះ មិនទាន់ដឹងច្បាស់នៅឡើយ។ ទោះយ៉ាងណា មន្ត្រីជាន់ខ្ពស់បក្សភ្លើងទៀន និងមេធាវីការពារក្តី​ យល់ថា លោក ថាច់ សេដ្ឋា អាចប្រឈមនឹងបទចោទប្រកាន់ថ្មីបន្ថែមទៀត ក្រោយការចូលបំភ្លឺនៅសាលាដំបូងនាព្រឹកនេះ។

ប្រមុខការពារជាតិកម្ពុជា និងថៃ បានឯកភាពគ្នាចំនួន១៣ចំណុចសំខាន់ៗទាក់ទងនឹងជម្លោះព្រំដែនរវាងប្រទេសទាំងពីរ ដែលបានឈានដល់ការប្រើប្រាស់កម្លាំងយោធាវាយប្រយុទ្ធគ្នាយ៉ាងខ្លាំងក្លា កាលពីខែកក្កដា កន្លងទៅ។ ការឯកភាពគ្នាចំនួន១៣ចំណុចរវាងកម្ពុជា-ថៃ ធ្វើឡើងតាមរយៈកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ GBC ដោយមានការចូលរួមសង្កេតការណ៍ពី តំណាងរបស់ម៉ាឡេស៊ី សហរដ្ឋអាមេរិក និងសាធារណរដ្ឋប្រជាមានិតចិន នាថ្ងៃទី៧ ខែសីហា ឆ្នាំ២០២៥ នៅឯទីក្រុងគូឡាឡាំពួរ ប្រទេសម៉ាឡេស៊ី។

នៅរសៀលថ្ងៃទី​៧ ខែ​សីហា ឆ្នាំ​២០២៥​នេះ​​ កិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ GBC កំពុងចាប់ផ្តើម ​​នៅទីក្រុង​​គូ​ឡាឡាំពួរ ​ដោយមាន​ការចូលរួមរបស់​តំណាង​ប្រទេសទី៣ គឺម៉ាឡេស៊ី អាមេរិក និងចិន។ ​តែមុនកិច្ចប្រជុំនេះបើកទ្វារ អ្នកនាំពាក្យក្រសួងការបរទេស លោក ជុំ សន្ទរី​ ​​បានបញ្ជាក់ថា កម្ពុជាស្រងាកចិត្ត ​ដែលថៃនៅតែបន្ត​ធ្វើយុទ្ធនាការ​ផ្សព្វផ្សាយព័ត៌មានមិនពិត ដើម្បី​​បំភ្លៃ​​ឆន្ទៈ​របស់កម្ពុជាដែលចង់បានតែសន្តិភាព​។ ​តាម​លោក ជុំ សុន្ទរី យុទ្ធនាការនេះជាការប៉ុនប៉ងបំភាន់សហគមន៍អន្តរជាតិ ​និងបង្វែរ​ការចាប់អារម្មណ៍ពីសកម្មភាពឈ្លានពានរបស់ថៃខ្លួនឯងផ្ទាល់មកលើកម្ពុជា។