អ្នកធាក់កង់ឆ្លងទ្វីប ជនជាតិបារាំង លោក Sofiane Shehili ដែលត្រូវបាន អាជ្ញារធររុស្ស៊ី ឃាត់ខ្លួន កាលពីដើមខែកញ្ញា នឹងត្រូវបន្តស្ថិតនៅក្នុងមន្ទីរឃុំឃាំង រហូតដល់ថ្ងៃទី ៤ ខែ តុលាខាងមុខ។ នេះ បើយោងតាមការផ្សព្វផ្សាយ នៅថ្ងៃពុធទី ១៧ កញ្ញា ពីសំណាក់ទីភ្នាក់ងារព័ត៌មានរដ្ឋរុស្ស៊ី RIA Novosti ។

ក្រុម​ចោរព័ត៌មា​នវិទ្យា​របស់​រុស្ស៊ីនិង​ចិន បានព្រួត​ដៃគ្នា​​វាយប្រហារបច្ចេកវិទ្យា​ព័ត៌មាន​វិទ្យា​ ទៅលើ​ក្រុមហ៊ុន​អាល្លឺម៉ង់ និង​បាន​ធ្វើឲ្យ​ហិចហោច​សេដ្ឋកិច្ចអាល្លឺម៉ង់ យ៉ាងខ្លាំងក្លា។ នេះបើតាម ទីភ្នាក់ងារចារកិច្ចអាល្លឺម៉ង់ ដោយ​បញ្ជាក់ថា ក្រុមហ៊ុន​អាល្លឺម៉ង់ខាតបង់​យ៉ាងហោច ២៨៩ ពាន់​លាន​អឺរ៉ូ ក្នុងឆ្នាំ២០២៥​នេះ​​។ ​ ​

ដូចកាលពីឆ្នាំកន្លងទៅដែរ ស្ថានទូតបារាំងប្រចាំកម្ពុជា នឹងបើកទ្វារស្វាគមន៍ដល់សាធារណជន ចូលទស្សនាក្នុងស្ថានទូតបារាំង ក្នុងឱកាសនៃទិវាបេតិកភណ្ឌនាថ្ងៃទី៤ ខែតុលា ឆ្នាំ២០២៥។ ទិវាបេតិកភណ្ឌនៅក្នុងស្ថានទូតបារាំងនេះ គឺជាឱកាសផ្តល់ឲ្យអ្នកទស្សនាបានស្វែងយល់ពីសំណង់អគារប្រវត្តិសាស្ត្រនានា និងបានទស្សនាសួនឧទ្យានដ៏ធំល្វឹងល្វើយនៅកណ្តាលក្រុងភ្នំពេញ រុក្ខជាតិ និងជីវៈចម្រុះដ៏សម្បូរបែប។

វៀតណាមគ្រោងដាក់បញ្ចូលភាសាខ្មែរទៅក្នុងកម្មវិធីសិក្សាភាសាបរទេសរបស់ខ្លួនដោយអនុវត្តជំហានដំបូងនៅក្នុងសាលារៀនតាមព្រំដែនចាប់ពីឆ្នាំ ២០២៨ តទៅ។ នេះបើតាមការចុះផ្សាយរបស់កាសែតវៀតណាម VN Express កាលពីថ្ងៃទី១៤ ខែកញ្ញា ឆ្នាំ២០២៥។ អ្នកជំនាញសង្គម និងវប្បធម៌ខ្មែរមើលឃើញពីអត្ថប្រយោជន៍មួយចំនួននៃការបញ្ចូលភាសាខ្មែរទៅក្នុងកម្មវិធីសិក្សាវៀតណាម។ តែពួកគេក៏បារម្ភខ្លាចវៀតណាមឆ្លៀតឱកាសនេះដើម្បីបំពេញមហិច្ឆតាឈ្លានពានទឹកដីខ្មែរដូចដែលធ្លាប់មាននៅក្នុងប្រវត្តិសាស្ត្រ។

នៅថ្ងៃព្រហស្បតិ៍ទី១៨ ខែកញ្ញានេះ ភាគីថៃបានបន្តបញ្ជូនទាហានចំនួន ១៨ឡានដើម្បីចល័តកងទ័ពទៅប្រឈមមុខនឹងបញ្ហាព្រំដែនជាមួយកម្ពុជាក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នេះបើតាមការបញ្ជាក់របស់លោក លី សុវណ្ណារិទ្ធ អភិបាលរង និងជាអ្នកនាំពាក្យរដ្ឋបាលខេត្តបន្ទាយមានជ័យ។ នៅក្នុងបទសម្ភាសជាមួយវិទ្យុបារាំងអន្តរជាតិ RFI លោក លី សុវណ្ណារិទ្ធ បញ្ជាក់ថា ស្ថានភាពនៅភូមិព្រៃចាន់ នៅមិនទាន់មានការប៉ះទង្គិចបន្តទៀតទេ តែអ្វីដែលអាជ្ញាធរខេត្តបារម្ភ គឺថៃចង់ប្រើល្បិចយកពលរដ្ឋរបស់ខ្លួន មកតទល់ជាមួយពលរដ្ឋខ្មែរ នៅភូមិព្រៃចាន់។

កាលពីថ្ងៃពុធ​ទី​១៧​កញ្ញាម្សិលមិញ លោកស្រី យូលីយ៉ា ណាវ៉ាល់ណាយ៉ា ដែលជាភរិយារបស់​លោកអាឡិចសី ណាវ៉ាល់នី បានចេញមុខ​ប្រកាស​អះអាងថា ស្វាមីលោកស្រីដែលស្លាប់​ក្នុងមន្ទីរឃុំឃាំងរុស្ស៊ី កាលពីថ្ងៃទី​១៦កុម្ភៈឆ្នាំ​២០២៤នោះ គឺស្លាប់​ដោយត្រូវគេដាក់ថ្នាំបំពុល។ លោកស្រីបាន​បញ្ជាក់ថា ការ​អះអាងរបស់​លោកស្រីនេះ គឺ​ផ្អែក​លើ​ការសន្និដ្ឋាន​ឯករាជ្យ​ របស់​មន្ទីរពិសោធន៍ចំនួន​២។ 

​ថ្ងៃព្រហស្បតិ៍ ទី១៨កញ្ញា​ អ្នកនយោបាយជាតិនិយមជប៉ុន លោកស្រី តាកាអ៊ីជី សាណាអេ បានប្រកាសឈរឈ្មោះជា​នាយករដ្ឋមន្ត្រីថ្មី។ ក្នុង​ប្រវត្តិសាស្ត្រជប៉ុន ពុំធ្លាប់​​មាន​អ្នក​នយោបាយស្រី​​ណាម្នាក់ ឈានទៅ​អង្គុយ​កៅអី​នាយករដ្ឋមន្ត្រីសោះឡើយ ​។ ​តើលោកស្រី តាកាអ៊ីជី សាណាអេ អាច​នឹង​មាន​ឱកាស​ក្លាយជា នាយករដ្ឋមន្ត្រីស្រី ជាលើកដំបូងនៅជប៉ុន​ ឬទេ? ​

នៅ​យប់​ ថ្ងៃ​ពុធ​ ទី​១៧ ​ខែ​កញ្ញា ឆ្នាំ​២០២៥​ ក្រុម​អ្នក​សង្កេត​ការណ៍​អន្តរ​កាល ​(IOT)​ បាន​ចុះទៅ​សង្កេត​ការណ៍ដោយ​ផ្ទាល់​នៅភូមិ​ព្រៃចាន់​ ឃុំ​អូរ៣ជាន់​ ស្រុក​អូរជ្រៅ ខេត្ត​បន្ទាយ​មាន​ជ័យ​ដើម្បី​សង្កេត ​ផ្ទៀង​ផ្ទាត់​ និង​រាយការណ៍ ​បន្ទាប់​ពី​មាន​ការ​ប៉ះទង្គិច​គ្នា​រវាង​កង​កម្លាំង​ថៃ ​និង​ប្រជាជន​កម្ពុជា​។ ​មាន​ប្រ​​ពល​រដ្ឋ​ខ្មែរ​យ៉ាង​ហោច ​២៤​នាក់ បាន​រង​របួស ​ក្នុង​នោះ ​មាន​ទាំង​ព្រះសង្ឃ​មួយ​អង្គ​ផង​នៅ​ក្នុង​ហេតុ​ការណ៍​ប៉ះ​ទង្គិច​ជា​មួយ​កម្លាំង​សមត្ថ​កិច្ច​ថៃ​។

ផ្លាស្ទិក ដែលហោះពីដីគោកជា​​រៀងរាល់ថ្ងៃកំពុងតែ​បំផ្លាញ​គុណភាពទន្លេ និងសមុទ្រ។ ក្រៅពីយាយីដល់គុណភាពទឹក ផ្លាស្ទិកក៏ក្លាយជាបញ្ហាធំ ដោយការ​បំពុល​ជីវចម្រុះក្នុងទឹក និងការបំផ្លាញសុខភាព​មនុស្សដែរ​​។​  ​​អង្គការសំអាតទន្លេសមុទ្រ ដែលមានបេសកកម្ម​​​​សំអាតសំរាមនៅក្នុងទឹកទន្លេដ៏​ធំទាំង ៣​របស់កម្ពុជា​ ​បានអំពាវនាវ​ឱ្យ​​គ្រប់គ្នា​ស្រឡាញ់បរិស្ថានឱ្យដូច​ជីវិតខ្លួនឯងដែរ។

​គណៈកម្មការអឺរ៉ុប បានស្នើ​ទៅ​រដ្ឋសមាជិក​ទាំង​២៧ ដើម្បីដាក់ទណ្ឌកម្មក្រុម​​មេដឹកនាំអ៊ីស្រាអែល និង​ពួកធ្វើ​​អាណានិគមកិច្ច​លើដែនដី​ស៊ីហ្សកដានីរបស់​ប៉ាឡេស្ទីន។ ​​ បញ្ជីទណ្ឌកម្ម​ ​មានទាំង​ផ្នែក​​នយោបាយ​និង​ពាណិជ្ជកម្ម​។ នេះ​ជា​លើកទី១ដែល​សហភាព​អឺរ៉ុប​គំរាម​ដាក់​សម្ពាធធ្ងន់ធ្ងរ​ ចំពោះ​អ៊ីស្រាអែល គិត​ចាប់តាំងពីផ្ទុះ​សង្គ្រាម​នៅហ្កាហ្សា។​ គួរ​បញ្ជាក់​ថា ទណ្ឌកម្ម​អឺរ៉ុប ក៏ធ្លាក់​ទៅលើ​បណ្តា​មេដឹកនាំពួក​ប្រដាប់​អាវុធ​ហាម៉ាស ដែរ​។​ 

ថ្ងៃទី​១៧កញ្ញា យ៉ាងហោចណាស់ មាន​ប្រជាពលរដ្ឋខ្មែ​រ២៤នាក់ ក្នុងនោះមានព្រះសង្ឃមួយអង្គផង បានរងរបួស នៅក្នុងហេតុការណ៍​ប៉ះទង្គិចជាមួយ​កម្លាំងសមត្ថកិច្ច​ថៃ នៅត្រង់ចំណុចព្រំដែន​កម្ពុជាថៃ ភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ការប៉ះទង្គិចគ្នាបន្ទាប់ពី​ភាគីថៃ បានបន្តរាយ​បន្លាលួស នៅលើដីភូមិ​ប្រជាជនកម្ពុជា​។ កម្លាំងសមត្ថកិច្ច​​ថៃបាន​ប្រើឭឧស្ម័នបង្ហូរទឹកភ្នែក​​ និង​បាញ់គ្រាប់កាំភ្លើងកៅស៊ូ ដើម្បី​បំបែកការតវ៉ារបស់ប្រជាពលរដ្ឋខ្មែរ ដែលមានតែដំបងឈើកាន់នឹងដៃ​។ អ្នកនាំពាក្យរាជរដ្ឋាភិបាល​កម្ពុជា បានចេញសេចក្តីថ្លែងការណ៍​ ថ្កោលទោស​ការបំពាន​របស់ភាគីថៃ និងសូមអំពាវនាវឲ្យថៃ គោរពកិច្ចព្រមព្រៀង​​ឈប់បាញ់ដែលមានជាធរមាន​។

ប៉ុន្មានថ្ងៃចុងក្រោយនេះ មានការជជែកវែកញែក និង​រិះគន់ចំៗ​តាមបណ្តាញសង្គម​ទៅលើ​​ការផ្សាយពាណិជ្ជកម្ម​គ្រឿងស្រវឹង​​​​​​របស់ក្រុមហ៊ុនមួយឈ្មោះថា ​«ហនុមាន»។ ក្រុមហ៊ុននេះ បាន​ប្រកូក​​​ប្រកាសឱ្យយុវជន​​​ទៅចាក់សាក់ ដោយសរសេរឈ្មោះក្រុមហ៊ុនខ្លួនដើម្បីប្តូរ​យក​រង្វាន់ជា​ស្រាបៀរ​។ ​អ្នកឃ្លាំមើល​សង្គមមួយចំនួនសម្តែង​​ការសោកស្តាយ និងបាន​​ចាត់ទុក​ការ​ធ្វើទីផ្សាររបស់ក្រុមហ៊ុនផលិតផលគ្រឿងស្រវឹង​​បែបនេះជាការជំរុញ ឬពង្វក់​​ឱ្យយុវជន​​​​ទទួលគ្រឿងស្រវឹងខុសរបៀប ដែលអាចបង្កហានិភ័យដល់សង្គម​។ តើកម្ពុជាត្រូវពង្រឹងបទ​បទប្បញ្ញត្តិ នៃក្រមប្រតិបត្តិក្រុមហ៊ុនផលិតគ្រឿងស្រវឹងបែបណា?

ប្រមុខការទូតកម្ពុជា លោក ប្រាក់ សុខុន នៅថ្ងៃពុធទី១៧ ខែកញ្ញានេះ បានអរគុណអង្គការយូណេស្កូ ដែលផ្តល់ជំនួយបច្ចេកទេសដល់កម្ពុជា ក្នុងការការពារ និងអភិរក្សប្រាសាទព្រះវិហារ ដែលរងផលប៉ះពាល់ដោយសារជម្លោះព្រំដែនកម្ពុជា-ថៃ។ ការបញ្ជាក់នេះ ធ្វើឡើងអំឡុងពេលលោកប្រាក់ សុខុន ជួប​ជាមួយលោក Sardar Umar Alam តំណាងអង្គការយូណេស្កូប្រចាំកម្ពុជា ដែលត្រូវបញ្ចប់បេសកកម្មនៅកម្ពុជា។

ជនសង្ស័យឈ្មោះ Tyler Robinson ដែលជាឃាតករបាញ់​សម្លាប់​ លោក Charlie Kirk កាលពីថ្ងៃពុធទី​១០កញ្ញា នៅរដ្ឋយូតា ត្រូវបាន​គេនាំខ្លួន​ចូលទៅកាន់សវនាការជាលើកទី​១​។ រដ្ឋអាជ្ញា​អាមេរិក បានសម្រេច​ចោទប្រកាន់ជនសង្ស័យរូបនេះ​ពីបទមនុស្សឃាត និង​បានទាមទារទោសប្រហារជីវិត​។ ឃាតកម្ម​លើ​រូបលោក លោក Charlie Kirk ដែល​ជាអ៊ីនហ្វ្លូអិនស៊ឺស្តាំនិយមជ្រុល ស្និទ្ធនឹងលោកដូណាល់ ត្រាំ​ បានមក​ហែកហួរសង្គមក៏ដូចជា​​នយោបាយ​​​​អាមេរិក ឲ្យ​កាន់តែប្រឈមមុខ​ដាក់គ្នាយ៉ាងហិង្សាបំផុត​។

សមាគម​គ្រូ​បង្រៀន​កម្ពុជា​ឯក​រាជ្យ​​បានស្នើសុំអភិ​បាល​នៃ​គណៈអភិ​បាល​រាជ​ធានី​ភ្នំពេញ​កាលពីពេលថ្មីៗនេះ ​ដើម្បី​ប្រារព្ធ​ទិ​វា​គ្រូ​បង្រៀនពិភព​លោក​​​នៅ​ថ្ងៃ​ទី​​៥​ តុលា​ ឆ្នាំ២០២៥​ នៅទីលានប្រជាធិបតេយ្យ។​ ប្រធានបទសម្រាប់ឆ្នាំនេះ​នឹងផ្តោតលើការលើកកម្ពស់លក្ខខណ្ឌគ្រូបង្រៀន។ ពោលគឺសមាគម ចង់ឃើញគ្រូបង្រៀនមិនត្រូវបាន​គេដាក់ឲ្យស្ថិតក្រោមគំនាបនយោបាយ។

ប្រមុខការពារជាតិកម្ពុជាលោក ទៀ សីហា បានដឹកនាំគណៈប្រតិភូយោធាជាន់ខ្ពស់កម្ពុជា ទៅចូលរួមវេទិកាប៉េកាំងសៀងសានលើកទី១២ នៅរដ្ឋធានីប៉េកាំង ប្រទេសចិន ចាប់ពីថ្ងៃទី១៧ ដល់ថ្ងៃទី១៩ ខែកញ្ញា ឆ្នាំ២០២៥។ នៅក្នុងវេទិកានេះ លោក ទៀ សីហា​ ក៏នឹងមានជំនួបទ្វេភាគីដាច់ដោយឡែកជាមួយរដ្ឋមន្រ្តីការពារជាតិចិន វៀតណាម ឡាវ ម៉ាឡស៊ី និងសិង្ហបុរី ដើម្បីពង្រឹង និងពង្រីកទំនាក់ទំនងកិច្ចសហប្រតិបត្តិការការពារជាតិ និងសន្តិសុខរួម។ 

ពិធី​បុណ្យ​កាន់​បិណ្ឌ និង​ភ្ជុំ​បិណ្ឌនៅ​ឆ្នាំនេះត្រូវ​បាន​ប្រារព្ធ​ធ្វើ​ឡើង​ ចាប់​ពី​ថ្ងៃ​ទី​៨​ ខែ​កញ្ញា និង​ត្រូវ​បញ្ចប់​នៅ​ថ្ងៃ​ទី​២៣ ​ខែ​កញ្ញា ឆ្នាំ​២០២៥​។​ នេះ​ជា​ពិធី​បុណ្យ​ប្រពៃណី​មួយ​របស់​ខ្មែរ​ដែល​មិន​អាច​ខក​ខាន​បាន​។​ អ្នក​ជំនាញ​សេដ្ឋ​កិច្ច​បាន​ប៉ាន់​ស្មាន​ថា​ ពល​រដ្ឋ​មួយ​គ្រួសារ​អាច​ចំណាយ​ចន្លោះ​ពី​ ១០០​ដុល្លារ​ ទៅ​៣០០​ដុល្លារ ​អំឡុង​រដូវ​កាល​ពិធី​កាន់​បិណ្ឌ និង​ភ្ជុំបិណ្ឌ​ នា​ឆ្នាំ ២០២៥​នេះ​។​ តើ​ការ​ចំណាយ​របស់​ពលរដ្ឋ​ក្នុង​រដូវ​ភ្ជុំ​បិណ្ឌ​ជះ​ឥទ្ធិពល​យ៉ាង​ណាដល់​សេដ្ឋកិច្ច​?

នៅថ្ងៃទី១៦ ខែកញ្ញា ឆ្នាំ២០២៥ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានជួបពិភាក្សាការងារជាមួយ រដ្ឋមន្ត្រីការបរទេសចិន លោក វ៉ាង យី នៅរដ្ឋធានីប៉េកាំង ប្រទេសចិន។ ជំនួបនេះមានគោលបំណងលើកកម្ពស់ និងពង្រឹងកិច្ចសហប្រតិបត្តិការរវាងកម្ពុជា និងចិន ជាពិសេស គម្រោងអភិវឌ្ឍហេដ្ឋារចនាសម្ព័ន្ធដ៏សំខាន់ៗដូចជា គម្រោងព្រែកជីកហ្វូណនតេជោ និងការពង្រីកទីផ្សារនាំចេញតាមរយៈកិច្ចព្រមព្រៀងពាណិជ្ជកម្មសេរី។ ស៊ឹម ចាន់សំណាង ជូនសេចក្តីរាយការណ៍៖

​ប្រធានាធិបតី​អាមេរិក លោក ដូណាល់ ត្រាំ និង​លោកជំទាវទី១​ បានអញ្ជើញ​ទៅដល់​ចក្រភពអង់គ្លេស ដើម្បី​បំពេញ​ដំណើរទស្សនកិច្ច​ផ្លូវ​រដ្ឋ ​ចំនួន​ ២ថ្ងៃ។ ​ព្រះមហាក្សត្រ​អង់គ្លេស រៀបចំ​ពិធីផ្លូវការ​ទទួល​ស្វាមគមន៍​ប្រមុខ​រដ្ឋអាមេរិក​។ ប្រទេស​ទាំង​ ២ ប្រកាស​ចុះ​កិច្ចព្រមព្រៀង​ពាណិជ្ជកម្ម និង​​វិនិយោគទុន​ ជាច្រើន​វិស័យ ក្នុង​តម្លៃ​ទឹកប្រាក់​ ជាង ៥០០ ពាន់​លាន​ដុល្លារ សម្រាប់​រយៈពេល​ ៤ ឆ្នាំ​។ ​

គណៈកម្មការស៊ើបអង្កេតឯករាជ្យមួយ ក្នុងក្របខណ្ឌអង្គការសហប្រជាជាតិ បាន​ចេញសេចក្តីសន្និដ្ឋាន​ចោទប្រកាន់ដោយចំពោះ ទៅលើអ៊ីស្រាអែលថាបានធ្វើអំពើប្រល័យពូជសាសន៍ ទៅលើប្រជាជនប៉ាឡេស្ទីននៅតំបន់​ហ្កាហ្សា។ ​គណៈកម្មការនេះ បានចោទថា​គឺថ្នាក់ដឹកនាំអ៊ីស្រាអែលមួយចំនួន ដូចជាលោក​នាយករដ្ឋមន្ត្រីនេតាន់យ៉ាហ៊ូ ជាដើម បានប្រើសំដី​​និងធ្វើសកម្មភាពញុះញង់ ឲ្យ​មានការ​សម្លាប់រង្គាលនៅតំបន់​ហ្កាហ្សា​។ 

បាតុកម្ម​ហិង្សានៅ​នេប៉ាល់ កាលពី​សប្តាហ៍​កន្លងទៅ ដែល​ឈានទៅ​ផ្តួល​រំលំ​រដ្ឋាភិបាល គឺ​បាន​បណ្តាល​ឲ្យ​បាត់បង់​ជីវិត​មនុស្ស​ជាង ៧០នាក់ និង​របួស​ច្រើន​រយនាក់ ហើយ​ក៏​បង្ក​ឲ្យ​ខូច​ខាត​ទ្រព្យ​សម្បត្តិ​រដ្ឋ​និងឯកជន ទំហំ​រាប់​រយ​លាន​ដុល្លារ។​ នេះបើតាម អ្នក​ជំនាញ ​និង​ ​​​រដ្ឋាភិបាលអន្តរកាលនេ​​ប៉ា​ល់ ដោយ​ឆ្លៀតបញ្ជាក់ថា គេ​ចាំបាច់​ត្រូវ​ការ​ពេល​វេលា​យូរ និង​មធ្យោបាយ​ច្រើន ដើម្បី​ជួសជុល​ការខូច​ខាត។​

កងទ័ពជើងទឹកថៃបានប្រកាសតវ៉ាដោយចោទកម្ពុជាថាបានចូលទន្ទ្រានទឹកដីថៃចំនួន ៣ចំណុច ក្នុងខេត្តត្រាតដែលមានព្រំប្រទល់ជាប់ខេត្តកោះកុងប្រទេសកម្ពុជា។ ថៃបានយកផែនទីគូសជាឯកតោភាគី ខ្នាត ១/៥០,០០០ មកធ្វើជាសំអាងដើម្បីចោទកម្ពុជា។ នេះបើតាមសេចក្តីប្រកាសព័ត៌មានរបស់កងទ័ពជើងទឹកថៃនៅថ្ងៃទី១៦ ខែកញ្ញា ឆ្នាំ២០២៥នេះ។ ក្រសួងការពារជាតិកម្ពុជា តាមរយៈអ្នកនាំពាក្យបានបញ្ចេញប្រតិកម្មភ្លាមៗតបនឹងការចោទរបស់កងទ័ពជើងទឹកថៃ។ 

ក្រសួងការពារជាតិចិនបានប្រកាសនៅថ្ងៃទី១៥ ខែកញ្ញា ឆ្នាំ២០២៥ ថា កងទ័ពចិន និងថៃនឹងធ្វើសមយុទ្ធកងទ័ពអាកាសរួមគ្នានៅខែកញ្ញានេះដែលមានឈ្មោះថា «Falcon Strike 2025» នៅប្រទេសថៃ។ បើតាមក្រសួងការពារជាតិចិន សមយុទ្ធរួមគ្នានេះមានគោលដៅពង្រឹងសមត្ថភាពបច្ចេកទេស និងយុទ្ធសាស្ត្ររបស់កងទ័ពដែលចូលរួម ក៏ដូចជាការបង្កើនទំនុកចិត្ត និងកិច្ចសហប្រតិបត្តិការជាក់ស្តែងរវាងកងទ័ពនៃប្រទេសទាំងពីរ។ អ្នកវិភាគនយោបាយនានារបស់កម្ពុជាមើលឃើញផ្សេងៗគ្នាអំពីគម្រោងសមយុទ្ធទ័ពអាកាសរវាងប្រទេសចិន និងប្រទេសថៃ។ តើសមយុទ្ធទ័ពអាកាសចិន-ថៃនឹងជះឥទ្ធិពលដល់ជម្លោះព្រំដែនខ្មែរ-ថៃដែរ ឬទេ?

បន្ទាប់ពី​ចរចា​គ្នា​អស់​២ថ្ងៃ​ នៅក្នុង​ប្រទេស​អេស្ប៉ាញ ទីបំផុត​ទៅ ក្រុម​ប្រតិភូតំណាងចរចា​អាមេរិក​និង​ចិន បាន​យល់ព្រមព្រៀង​គ្នា​ ជាគោលការណ៍ ទៅលើសំណុំ​រឿង​ក្រុមហ៊ុន​បណ្តាញ​សង្គម​ TikTok។ ជាគោលការណ៍​​រួម​ TikTok ត្រូវ​ផ្តាច់​ពីក្រុមហ៊ុន​ចិន ByteDance ​ ​ ហើយ​ត្រូវលក់​ឲ្យ​ក្រុមហ៊ុន​អាមេរិក ដើម្បីត្រួតពិនិត្យ​ និង​គ្រប់គ្រងប្រតិបត្តិការ​នៅលើទឹកដី​អាមេរិក​។​ ប្រធានាធិបតី​អាមេរិក លោក ដូណាល់ ត្រាំ អបអរសាទរ​ និង​ប្រកាសថា លោក​ត្រូវ​ជជែកគ្នា​តាម​ទូរស័​ព្ទ​ ដើម្បី​​សម្រេច​ជាចុងក្រោយ​ ជាមួយ​ប្រធានាធិបតី​ចិន លោក ស៊ី​ ជីនពីង នៅ​ថ្ងៃ​សុក្រ​ ខាង​មុខ​នេះ។​ ​

ប្រទេសចិនជាមិត្តដែលតែងឈរប្រកៀកស្មាកម្ពុជា មិនថានៅក្នុងស្ថានភាពងងឹត តាមរយៈការផ្តល់ជំនួយសុខាភិបាលជារឿយៗដល់មាតា និងទារកនៅកម្ពុជា។ នេះជាការលើកឡើងរបស់លោកស្រី ឱ វ៉ាន់ឌីន រដ្ឋលេខាធិការក្រសួងសុខាភិបាលកម្ពុជាក្នុងវេទិកាមួយនៅទីក្រុងណាននីង ប្រទេសចិននាថ្ងៃទី១៥ ខែកញ្ញា ឆ្នាំ២០២៥។ មន្ត្រីជាន់ខ្ពស់ក្រសួងសុខាភិបាលរូបនេះលើកឡើងថា កម្ពុជាមានជំហររួមគ្នាជាមួយចិនដើម្បីធានាថា មាតា និងទារកខ្មែរគ្រប់រូបទទួលបានការថែទាំប្រកបដោយគុណភាព និងការយកចិត្តទុកដាក់។

កម្ពុជាកំពុងស្វែងរក និងជំរុញវិនិយោគិនវៀតណាមឱ្យមកបណ្តាក់ទុនក្នុងវិស័យចម្បងមួយចំនួននៅកម្ពុជា។ នេះបើតាមកាសែតក្នុងស្រុកវៀតណាម VN Economy ចេញផ្សាយក្នុងថ្ងៃទី១៦ ខែកញ្ញា ឆ្នាំ២០២៥នេះ។ ការជំរុញធុរកិច្ចជនវៀតណាមនៅកម្ពុជាដូចនេះធ្វើឡើងនៅក្នុងសន្និសីទស្តីពីការតភ្ជាប់សហគ្រាស ផលិតកម្ម ចែកចាយ និងភស្តុភាររវាងវៀតណាម និងកម្ពុជាដើម្បីរួមចំណែកក្នុងការបង្កើនទំហំពាណិជ្ជកម្មទ្វេភាគីចំនួន ២០ពាន់លានដុល្លារនៅត្រឹមឆ្នាំ ២០៣០។

អ្នកនាំពាក្យសាលាខេត្តស្ទឹងត្រែង លោក ម៉ែន គុង បានឲ្យដឹងនៅថ្ងៃអង្គារ ទី១៦ ខែកញ្ញា ឆ្នាំ២០២៥ ថា កម្រិតទឹកជំនន់នៅក្នុងខេត្តស្ទឹងត្រែងកំពុងស្ថិតក្នុងស្ថានភាពអាចគ្រប់គ្រងបាន ទោះបីមានផលប៉ះពាល់មួយចំនួនលើដីបង្កបង្កើនផលកសិកម្មរបស់ពលរដ្ឋក្តី។ បើតាមលោក ម៉ែន គុង អាជ្ញាធរខេត្តបានអន្តរាគមន៍ និងផ្តល់ស្បៀងអាហារដល់ប្រជាពលរដ្ឋដែលរងផលប៉ះពាល់ពីទឹកជំនន់នេះ។ គិតត្រឹមថ្ងៃទី១៦ ខែកញ្ញានេះ កម្រិតទឹកជំនន់នៅក្នុងខេត្តស្ទឹងត្រែងនៅមិនទាន់មានសភាពអាក្រក់ ឬប្រកាសអាសន្ននៅឡើយទេ។

កម្លាំងបាតុកម្មរបស់យុវជននេប៉ាល់ ប្រឆាំងនឹងអំពើពុករលួយបក្សពួកនិយមរបស់ថ្នាក់ដឹកនាំ​​ បានញ៉ាំង​ឲ្យ​រដ្ឋាភិបាល​ដួល​រលំ កាលពីសប្តាហ៍​កន្លងទៅ​។ យ៉ាងហោច​ណាស់ មានយុវជន​បាតុករនេប៉ាល់ ស្លាប់ចំនួន​​៧២នាក់ និងរបួស​ច្រើនរយនាក់។ យ៉ាងណាក៏ដោយ​ យុវជនដែលរងរបួស បានអះអាងថាពួកគេមិនស្តាយ​ក្រោយឡើយ ព្រោះ​ចលនាសាមគ្គីរបស់ពួកគេ​ បាន​ចូលរួម​ធ្វើ​ឲ្យ​ប្រទេសជាតិ​ ឈានទៅមាន​ការ​ផ្លាស់ប្តូរ​ កសាងសង្គម​មួយដែលយុត្តិធម៌។

រដ្ឋមន្ត្រីការបរទេស​អាមេរិក លោក​ ម៉ារកូ រ៉ូប៊ីយ៉ូ កំពុង​តែបន្ត​បំពេញ​ដំណើរទស្សនកិច្ច​នៅ​អ៊ីស្រាអែល​។ ដំណើរ​ទស្សនកិច្ច​របស់ប្រមុខ​ការទូត​អាមេរិក​នេះ ធ្វើឡើង​ដើម្បីបញ្ជាក់ពីការគាំទ្រ​ចំពោះ​អ៊ីស្រាអែល ហើយ​ពិភាក្សាអំពីផលវិបាក និង​ចំណាត់​ការ​បន្តទៀត ក្រោយពី​កងទ័ព​អ៊ីស្រាអែល បានបាញ់ប្លោងគ្រាប់សម្លាប់ពួកមេដឹកនាំក្រុម​ប្រដាប់​អាវុធ​​ហាម៉ាស ក្នុង​ទឹកដី​កាតា។ ​ប្រតិបត្តិការវាយប្រហារ​នោះ ធ្វើ​ឲ្យប្រធានាធិបតី​អាមេរិក ​លោក​ដូណាល់ ត្រាំ មិន​សប្បាយចិត្ត និង​បាន​ទូន្មាន​ឲ្យ​អ៊ីស្រាអែល​ប្រុង​ប្រយ័ត្ន ព្រោះ ប្រទេស​កាតា ក៏​​ជាមហាមិត្ត​របស់​អាមេរិកដែរ​។​​ ​

នៅថ្ងៃទី១៥ កញ្ញានេះ ថ្នាក់ដឹកនាំ និងតំណាងនៃអង្គការសង្គមស៊ីវិលមួយចំនួន រួមទាំងអ្នកសិក្សាស្រាវជ្រាវ និងអ្នកច្បាប់បានជួបជជែកគ្នាជុំវិញការអនុវត្តលទ្ធិប្រជាធិបតេយ្យនៅកម្ពុជា និងការយល់ដឹងរបស់ពលរដ្ឋខ្មែរស្តីពីដំណើរការប្រជាធិបតេយ្យ។ មន្ត្រីសង្គមស៊ីវិលខ្លះថ្លែងថា ដំណើរការប្រជាធិបតេយ្យនៅកម្ពុជាមិនទាន់មានភាពប្រសើរនៅឡើយ ខណៈពលរដ្ឋជាច្រើនហាក់គ្មានឆន្ទៈតាមដានការបំពេញការងាររបស់មន្ត្រីអនុវត្តច្បាប់ ឬចំណុចខ្វះខាតរបស់រដ្ឋាភិបាល។

កម្មវិធីប្រណាំងកង់អន្តរជាតិ Vuelta ដែលត្រូវបិទបញ្ចប់នៅទីក្រុង​ម៉ាឌ្រីដ ប្រទេសអេស្ប៉ាញកាលពីថ្ងៃអាទិត្យទី​១៤កញ្ញា ត្រូវខូចដំណើរការចប់មុនការកំណត់ ដោយសារក្រុមបាតុករគាំទ្រប៉ាឡេស្ទីនប្រមាណ​១សែននាក់ បានរុញផ្តួលរនាំង សំរុកចូលទៅលើផ្លូវប្រណាំងកង់។​ បាតុករអេស្ប៉ាញ បាន​ប្រឆាំង​នឹងវត្តមានរបស់​ក្រុមប្រណាំងកង់អ៊ីស្រាអែលនៅក្នុងកម្មវិធីនេះ និងបានស្រែក​ជេរប្រមាទ​ថ្កោលទោសថាអ៊ីស្រាអែល កំពុងតែ​ធ្វើអំពើប្រល័យពូជសាសន៍ទៅលើប្រជាជនប៉ាឡេស្ទីន។