នៅពេលសង្គ្រាមព្រំដែនកម្ពុជា-ថៃ បានផ្ទុះឡើងជាលើកទី២ នៅអំឡុងខែធ្នូ ឆ្នាំ២០២៥ ប្រជាជនភៀសសឹកកម្ពុជាប្រមាណជាង ៦៤ម៉ឺននាក់ត្រូវបង្ខំចិត្តជាថ្មីម្តងទៀត ចេញពីលំនៅឋានដ៏កក់ក្តៅរបស់គេទៅរកទីទួលសុវត្ថិភាពទាំងការភ័យខ្លាច និងគ្មានអ្វីសោះ។ ជាអ្នកថតរូបកាសែតអាជីព ដែលមានបទពិសោធន៍ ៤០ឆ្នាំ នៅក្នុងការថតរូបជនភៀសសឹកសង្គ្រាមនៅលើពិភពលោក លោក John Vink បានតាមស្វែងរកជនភៀសសឹកកម្ពុជាដើម្បីបន្តចងក្រងឯកសារ និងបង្កើតគម្រោងរូបថតភៀសសឹកមួយដែលមានចំណងជើងថា « Their Name is PIEHSAK» ឬជាភាសាខ្មែរ «ឈ្មោះរបស់ពួកគេ គឺភៀសសឹក» ។ គម្រោងរូបថតអំពីជនភៀសសឹករបស់លោក John Vink ដែលរួមមានការបោះពុម្ពផ្សាយសៀវភៅ ការតាំងពិព័ណ៍ ការចាក់បញ្ចាំងរូបថត ព្រមទាំងការជជែកពិភាក្សាគ្នា ត្រូវបានធ្វើឡើងចាប់ពីថ្ងៃទី៣០ ខែមករា ឆ្នាំ២០២៦ និងបន្តរហូតដល់ចុងខែកុម្ភៈ ឆ្នាំ២០២៦ខាងមុខ នៅតាមទីកន្លែងផ្សេងៗ។ លោក John Vink បង្កើតគម្រោងរូបថតមួយនេះឡើងដើម្បីផ្សព្វផ្សាយអំពីជីវិតតស៊ូ និងការលំបាករបស់ជនភៀសសឹកកម្ពុជា ដោយសារតែវិបត្តិព្រំដែន និងដើម្បីរៃអង្គាសប្រាក់ជួយពួកគេនៅតាមជំរំនានា។ សូមទស្សនាបទយកការណ៍របស់ ចាន់ លីដា

ជនបរទេសជាង ២ពាន់នាក់ត្រូវកម្លាំងសមត្ថកិច្ចនគរបាលជាតិកម្ពុជាចាប់ឃាត់ខ្លួន ក្នុង​ប្រតិបត្តិការចុះបង្ក្រាបទីតាំងឆបោកអនឡាញទ្រង់ទ្រាយធំ​ ក្នុងភូមិសាស្ត្រក្រុងបាវិត ​​ខេត្តស្វាយរៀង​ នៅព្រឹកថ្ងៃទី ៣១មករាម្សិលមិញ​។ បើតាមសេចក្តីប្រកាសព័ត៌មានរបស់អគ្គស្នងការនគរបាលជាតិ​ ក្នុងប្រតិបត្តិការនេះ​ អគ្គស្នងការនគរបាលជាតិបានប្រើកម្លាំងសមត្ថកិច្ចសរុប ៧០០នាក់ ក្រោមកិច្ច​សហការជាមួយព្រះរាជអាជ្ញានៃអយ្យការអមសាលាដំបូងខេត្តស្វាយរៀងផ្ទាល់។

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរស៍ បានប្រកាសអាសន្ន អំពីកង្វះថវិកាយ៉ាងច្រើនសន្ធឹកសន្ធាប់។ ប្រសិនបើរដ្ឋសមាជិកមិនព្រមបង់ប្រាក់វិភាគទានឲ្យបានទៀងទាត់នោះទេ ស្ថាប័នអន្តរជាតិកំពូលមួយនេះនឹងប្រឈមហានិភ័យដួលរលំ។

ព្រឹទ្ធសភាអាមេរិកបានអនុម័តច្បាប់ថវិកា នៅថ្ងៃសុក្រ ទី៣០ មករា ដែលធ្វើឡើងតែប៉ុន្មានម៉ោងប៉ុណ្ណោះ មុនឱសានវាទវិបត្តិគ្មានថវិកាចំណាយរបស់រដ្ឋាភិបាល។ តែបញ្ហាដោះស្រាយមិនទាន់ចប់ទេ ដ្បិតថា រដ្ឋាភិបាលក្រុងវ៉ាស៊ីននឹងគ្មានថវិកាចំណាយ នៅចុងសប្តាហ៍នេះទេ ដោយត្រូវរង់ចាំការបោះឆ្នោតសម្រេច នៅសភាខុនហ្ក្រេស នាថ្ងៃចន្ទ ទី២ កុម្ភៈ បន្ថែមទៀត។

​ថ្ងៃ​ទី​៣០​ ខែ​មករា​ ឆ្នាំ​២០២​៦​ ស្នងការដ្ឋាន​នគរបាលខេត្តពោធិ៍សាត់បានអះអាងថា ​​គ្មានការស្ទាក់យកលុយតាមផ្លូវអំឡុងពេលចុះបង្ក្រាប​បទល្មើសអនឡាញ​ឡើយ។ ការអះអាងរបស់ស្នងការដ្ឋាន​នគរបាលខេត្តពោធិ៍សាត់បែបនេះគឺជាការបំភ្លឺ​ចំពោះ​​​ការចុះផ្សាយរបស់គណនីហ្វេសប៊ុកចំនួន ២​​ដែលបានបង្ហោះ​វីដេអូ​ ភ្ជាប់ជាមួយខ្លឹមសារថា មន្ត្រីខេត្តពោធិ៍សាត់​​​ប្រដេញចាប់​ជនជាតិចិន​យកលុយរាប់ម៉ឺនដុល្លា​រ។

លោកនាយករដ្ឋមន្ត្រី​ ហ៊ុន​ ម៉ាណែត អះអាងថា​ រដ្ឋាភិបាលកម្ពុជា​បានដាក់ចេញនូវវិធានការចាំបាច់ចំនួន ៣ ដើម្បីជួយសម្រាលទុក្ខលំបាករបស់ជនភៀសសឹក។ នេះបើតាមទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន ម៉ាណែត នៅថ្ងៃទី​​​៣១មករានេះ​។​ សម្រាប់លោក ហ៊ុន​ ម៉ាណែត ​ ​វិធានការ ៣នេះ គឺមានភាពជាក់លាក់ ដើម្បីជួយពលរដ្ឋ​ភៀសសឹក​។ ​

នៅ​ទីក្រុង​តូក្យូ ​ថ្ងៃ​សៅរ៍​ ទី​៣១មករា​ នាយករដ្ឋមន្ត្រីអង់គ្លេស លោក គៀ ស្តារមឺ បាន​​ជួប​ពិភាក្សា​ផ្ទាល់ជាមួយ​លោកស្រី តាកាអ៊ីជី សាណាអេ ប្រមុខរដ្ឋាភិបាល​​ជប៉ុន។ ភាគី​ទាំង២​បាន​​ចុះ​កិច្ចព្រមព្រៀង​ពង្រឹងកិច្ចសហការ​វិស័យ​យោធា ​និង​ការទូត​​។ ​ការ​ចុះកិច្ចព្រមព្រៀងនៅ​តូក្យូ​នេះ ធ្វើឡើង​ក្រោយ​ពីលោក គៀ ស្តារមឺ បាន​​បញ្ចប់​ទស្សនកិច្ចចំនួន​ ៤ថ្ងៃ​​​នៅប្រទេស​ចិន និង​បាន​​ចុះកិច្ចព្រមព្រៀង​ពាណិជ្ជកម្ម​ជាច្រើន​ជាមួយ​មេដឹកនាំចិន​។ 

នៅថ្ងៃ​សៅរ៍​ ទី​៣១មករា នាយករដ្ឋមន្ត្រីអង់គ្លេស លោក គៀ ស្តារមឺ បន្ត​ដំណើរ​ទៅ​ជប៉ុន និង​ត្រូវ​ជួប​ពិភាក្សា​ផ្ទាល់ជាមួយ​លោកស្រី តាកាអ៊ីជី សាណាអេ នាយករដ្ឋមន្ត្រី​ជប៉ុន។ ការ​ដំណើរ​បន្ត​បេសកកម្មទៅទីក្រុង​​តូក្យូនេះ ធ្វើឡើង​ក្រោយ​ពីលោក គៀ ស្តារមឺ បាន​​បញ្ចប់​ទស្សនកិច្ច​ផ្លូវ​ការ​ ចំនួន ៤ ថ្ងៃ នៅប្រទេស​ចិន។ នៅរដ្ឋធានីប៉េកាំង​ ប្រមុខ​ដឹកនាំ​អង់គ្លេស​និង​ចិន បាន​ចុះ​ហត្ថលេខា​លើសំណុំ​រឿង​ជាច្រើន​ទាក់ទង​នឹង​សេដ្ឋកិច្ចពាណិជ្ជកម្ម​ ព្រម​ទាំង​សន្យា​បង្កើន​ទំនាក់ទំនង​ល្អ​នឹង​គ្នាឡើងវិញ ក្រោយ​ពី​រអាក់រអួល ៨ ឆ្នាំរួចមក។​

ព្រឹទ្ធសភាអាមេរិកបានអនុម័តច្បាប់ថវិកា នៅថ្ងៃសុក្រ ទី៣០ មករា ដែលធ្វើឡើងតែប៉ុន្មានម៉ោងប៉ុណ្ណោះ មុនឱសានុវាទវិបត្តិគ្មានថវិកាចំណាយរបស់រដ្ឋាភិបាល។ តែបញ្ហាដោះស្រាយមិនទាន់ចប់ទេ ដ្បិតថា រដ្ឋាភិបាលក្រុងវ៉ាស៊ីននឹងគ្មានថវិកាចំណាយ នៅចុងសប្តាហ៍នេះទេ ដោយត្រូវរង់ចាំការបោះឆ្នោតសម្រេច នៅសភាខុនហ្ក្រេស នាថ្ងៃចន្ទ ទី២ កុម្ភៈ បន្ថែមទៀត។

នៅ​យប់​ថ្ងៃទី​៣០​ ខែមករា​ ឆ្នាំ​២០២៦​ ច្រាំង​ទន្លេកោះពេជ្រ ក្រុង​កំពង់​ចាម​ ​រង​ការ​បាក់​ស្រុត​ចូល​ក្នុង​​ទន្លេ​ទាំង​ស្រុង ​ក្នុងជម្រៅ​​៧០ម៉ែត្រ​។​ នេះ​ជា​ការ​បញ្ជាក់របស់​លោក​ អ៊ុន​ ចាន់​ដា ​អភិ​បាល​ខេត្ត​កំពង់​ចាម​​​ ដែល​ប្រាប់​វិទ្យុបារាំងអន្តរជាតិ RFI ​​ ​ នៅ​ព្រឹក​ថ្ងៃ​ទី​៣១​មករា​នេះ​។​ តាម​លោក​ អ៊ុន​ ចាន់​ដា​ ហេតុ​ការណ៍​បាក់​ស្រុត​ច្រាំង​ទន្លេកាលពីយប់មិញនេះបាន​​បណ្តាលឱ្យ​ហេដ្ឋារចនា​សម្ព័ន្ធជាប់ច្រាំង​​​មួយចំនួន​រង​ការ​ខូច​ខាត ប៉ុន្តែ​មិន​បានបង្កឱ្យ​​ពល​រដ្ឋ​រង​របួសនោះ​​ទេ​។​ យ៉ាង​ណាមិញ ​អភិ​បាល​ខេត្ត​កំពង់​ចាមរូប​នេះ​បាន​ស្នើ​ឱ្យ​ពល​រដ្ឋ​កុំ​ទៅ​​​ក្បែរ​​​​កន្លែង​កើត​ហេតុ​ ដើម្បីរក្សា​​សុវត្ថិ​ភាព ខណៈ​អ្នកជំនាញកំពុងស្តារច្រាំងទន្លេដែលបាក់ស្រុត​នេះឡើងវិញ​​។​

ប្រទេសបារាំងនៅប​ន្តតាមដានស្ថានការណ៍ព្រំដែនខ្មែរ និងថៃ ក្រោយសម្រេចបានបទឈប់បាញ់ចុងក្រោយមួយកាលពីថ្ងៃទី២៧ ខែ​ធ្នូ ឆ្នាំ២០២៥។ រដ្ឋាភិបាលបារាំង​បានស្នើជាថ្មីឲ្យពលរដ្ឋ​​បារាំងដែលកំពុងស្ថិតនៅក្នុងប្រទេសកម្ពុជា​ រក្សាការធ្វើដំណើរ​​ឱ្យឆ្ងាយ​ប្រមាណ ៣០គីឡូម៉ែត្រពីតំបន់​ព្រំដែន។ នេះបើតាមសារអំពាវនាវនៅក្នុងគេហទំព័រ​ក្រសួងការបរទេសបារាំង​។

ករណីស្នូរផ្ទុះគ្រាប់ពី​ភូមិសាស្ត្រ ភូមិព្រៃគប់ និងភូមិអូរនាង​ដែលជាតំបន់ស គឺបណ្តាលមកពីភ្លើងឆេះព្រៃ។ នេះ​ជា​ការអះអាងរបស់​លោក ប៉ាន់ ខែមប៊ុនថន នាយករងខុទ្ទកាល័យលោកនាយករដ្ឋមន្ត្រីហ៊ុន ម៉ាណែត និងជា​ប្រធានក្រុមការងាររដ្ឋាភិបាលចុះជួយក្រុងប៉ោយប៉ែត ​​នៅថ្ងៃទី៣១ ខែមករានេះ។ ក្នុងវីដេអូជាង ២នាទី លោក ប៉ាន់ ខែមប៊ុនថន បាន​ទទូចកុំ​ឱ្យពលរដ្ឋព្រួយបារម្ភពី​ព្រោះថា គ្រាប់ដែលផ្ទុះទាំងនោះជា​គ្រាប់​បន្សល់ទុកតាំង​ពីសង្គ្រាមកន្លងៗមក។

ប្រធានាធិបតីកូរ៉េខាងត្បូង លោក លី ចែម្យ៉ុង នៅថ្ងៃសុក្រទី៣០ខែមករា បានបង្ហោះសារព្រមានធ្ងន់ៗចំពោះ​​ឧក្រិដ្ឋជនឆបោកអនឡាញ​​​ ដែលហ៊ានប៉ះពាល់​ជនជាតិកូរ៉េ។ ក៏ប៉ុន្តែសាររបស់លោក លី ចែម្យ៉ុង នេះ​​បានលុបចេញពីបណ្តាញសង្គម X វិញ​នៅល្ងាចនៅថ្ងៃសុក្រដដែល។ ទោះយ៉ាងណា អ្នកតាមដាននយោបាយ យល់ថា សារព្រមានរបស់លោក លី ចែម្យ៉ុង បានជះឥទ្ធិពលដល់មុខមាត់ប្រទេសកម្ពុជា ព្រោះថា សារនោះបានសរសេរជាភាសាខ្មែរ និងមានភ្ជាប់រូបវិមានឯករាជ្យដែលស្ថិតក្នុងទីក្រុងភ្នំពេញ។ តើសំណេរលោក លី ចែម្យ៉ុង ទាក់ទងនឹងឧក្រិដ្ឋកម្មឆបោកអនឡាញជះឥទ្ធិពលអ្វីខ្លះដល់កម្ពុជា?

កាលពីថ្ងៃសុក្រទី​៣០មករា អាជ្ញាធរអ៊ីស្រាអែល បានប្រកាសថាគេសុខចិត្ត​ព្រមបើកច្រកព្រំដែន​រ៉ាហ្វា ដែលជាច្រកតែមួយគត់ រវាង​តំបន់ហ្កាហ្សា​និង​ប្រទេសអេស្ស៊ីប ចាប់ពីអាទិត្យទី​១កុម្ភៈ​ទៅ​​។ ក៏ប៉ុន្តែ អ៊ីស្រាអែល បាន​ដាក់កំហឹត​​នូវលក្ខខណ្ឌ​ដ៏តឹងតែបំផុត នៅក្នុងនីតិវិធី​ឆ្លងច្រកព្រំដែននេះ ដោយអនុញ្ញាត​ឲ្យ​តែមនុស្ស​ឆ្លងកាត់ប៉ុណ្ណោះ ហើយត្រូវមានលិខិតអនុញ្ញាតជាមុន​។​

ជនជាតិខ្មែរ​៥រូប​ដែលជាអ្នកនិពន្ធ អ្នកធ្វើការដើម្បី​ថែរក្សា ការពារវប្បធម៌ និងការចងចាំប្រវត្តិសាស្រ្តខ្មែរ នៅប្រទេសបារាំង ឬ​ដើម្បី​ជួយប្រជាជន​ខ្មែរ​ នៅប្រទេស​កម្ពុជា ប្រធានសមាគមអភិរក្ស​វប្បធម៌ខ្មែរនៅបារាំង ​បានទទួលមេដាយ​រដ្ឋសភាបារាំង។ ពិធីប្រគល់មេដាយកាលពីថ្ងៃចន្ទទី ២៦​មករានៅ​រដ្ឋសភាបារាំង ក្នុងទីក្រុងប៉ារីស កើតចេញមកពីគំនិតផ្តួចផ្តើម​របស់​អ្នកតំណាងរាស្រ្ត កូនកាត់កាត់ខ្មែរបារាំង លោក​Thomas Lam។

នៅមិនដល់១០ថ្ងៃទៀតទេ ថៃ​នឹង​រៀបចំការបោះឆ្នោត​ជាតិ​ដើម្បី​ជ្រើសរើស​សមាជិកសភា​អាណត្តិថ្មី។ ការបោះឆ្នោត​ថៃ ដែល​មាន​ការចូលរួម​ពី​បេក្ខជន​ជាង​៥០០០ មកពីគណបក្សជាង​៥០ គ្របដណ្តប់​​បញ្ហា​សេដ្ឋកិច្ច និង​សន្តិសុខ នៅក្នុងកាលៈទេសៈដែល​ថៃ​កំពុង​ជាប់ជម្លោះព្រំដែន​ជាមួយកម្ពុជា។ នៅ​ជាង​១សប្តាហ៍​មុនការបោះឆ្នោត ដែលត្រូវ​ប្រព្រឹត្តទៅ​នៅថ្ងៃទី ៨កុម្ភៈ ការស្ទង់មតិ​ កាលពីថ្ងៃ​សុក្រទី ៣០ បាន​បង្ហាញថា គណបក្ស​ប្រាឆាឈុនរបស់​ចលនាយុវជន​បានទទួល​សំឡេង​គាំទ្រ​ច្រើន​ជាងគេ ច្រើនជាង​គណបក្ស​ភូមិចៃថៃ​របស់​នាយករដ្ឋមន្រ្តីចាំផ្ទះ លោក​អនុធីន ឆានវីរៈគូន។ 

នៅថ្ងៃសុក្រទី៣០ខែមករានេះ ប្រធានាធិបតីកូរ៉េខាងត្បូង លោក លី ចែម្យ៉ុង បានចេញមុខព្រមានឧក្រិដ្ឋជនអនឡាញ ដែលហ៊ានប៉ះពាល់ពលរដ្ឋកូរ៉េខាងត្បូង។ ដោយភ្ជាប់ជាមួយនឹងអត្ថបទមួយដែលនិយាយពីឧក្រិដ្ឋកម្មឆបោកអនឡាញនៅកម្ពុជា ប្រធានាធិបតីកូរ៉េត្បូងបានបញ្ជាក់ថា ការលើកឡើងរបស់លោកបែបនេះមិនមែនជាការគំរាមកំហែងលេងៗទេ ព្រោះថា កូរ៉េខាងត្បូង បើថាធ្វើហើយ គឺធ្វើដល់ទីបញ្ចប់។

រដ្ឋមន្ត្រីក្រសួងមហាផ្ទៃហ្វីលីពីនបានឲ្យដឹងនៅថ្ងៃព្រហស្បតិ៍ទី២៩ខែមករា​ថា ហ្វីលីពីនបានបញ្ជូនមន្ត្រីជំនាញរបស់ខ្លួនមកកាន់ប្រទេស​កម្ពុជា ដើម្បីតាមប្រមាញ់ឧកញ៉ាល្បែងមួយរូបឈ្មោះ Atong Ang។ Atong Ang ត្រូវរដ្ឋាភិបាលហ្វីលីពីនចោទប្រកាន់ពីបទចាប់ជំរិត និងសង្ស័យថាកំពុងមានវត្តមាននៅក្នុងប្រទេសកម្ពុជា។

ការផ្សាយប្រចាំថ្ងៃសុក្រ ទី ៣០​ មករា ២០២៦ ដោយស៊ឹម ចាន់សំណាង

ក្រសួងអប់រំនៅថ្ងៃទី២៨ ខែមករា ឆ្នាំ២០២៦ បានចេញសេចក្តីណែនាំស្តីពីការគ្រប់គ្រងគ្រូបង្រៀននៅតាមគ្រឹះស្ថានសិក្សាសាធារណៈ សំដៅលើកកម្ពស់គុណភាពអប់រំ និងក្រមសីលធម៌ វិជ្ជាជីវៈគ្រូបង្រៀន នៅតាមគ្រឹះស្ថានអប់រំ ក្នុងប្រទេសកម្ពុជា។ អ្នកតាមដានសង្គមសាទរចំពោះការពង្រឹងវិន័យគ្រូបង្រៀន នៅតាមគ្រឹះស្ថានសិក្សាសាធារណៈ តាមរយៈនិយាមថ្មីនេះ។ ក៏ប៉ុន្តែ ចំពោះទំនោររបស់គ្រូក្របខណ្ឌរដ្ឋ ដែលឆ្លៀតទៅបង្រៀនថែមម៉ោង នៅតាមសាលាឯកជន ក្នុងពេលបច្ចុប្បន្ននេះ អ្នកស្រាវជ្រាវសង្គមស្នើឱ្យក្រសួងអប់រំយកចិត្តទុកដាក់បន្ថែម តាមរយៈការដាក់ចេញចំណាត់ការបន្ទាន់មួយ ដើម្បីបង្ការផលប៉ះពាល់ដល់វិស័យអប់រំនៅកម្ពុជា។ តើវប្បធម៌ឆ្លៀតបង្រៀនបន្ថែមម៉ោងនៅតាមសាលាឯកជន គួរតែត្រូវបញ្ឈប់ជាបន្ទាន់ ឬយ៉ាងណា?

លោករដ្ឋមន្ត្រីការបរទេសអ៊ីរ៉ង់ បានធ្វើដំណើរទៅជួបរដ្ឋមន្ត្រីតួកគី នៅក្រុងអ៊ីស្តង់ប៊ូល នៅថ្ងៃសុក្រទី​​៣០​មករា​ ដើម្បី​ជជែកគ្នារកដំណោះស្រាយ​ ទាក់ទិនការគំរាមកាន់តែខ្លាំងឡើង ពីសំណាក់លោកដូណាល់ ត្រាំ។ លោកដូណាល់ ត្រាំ បានសម្រេចបញ្ជូននាវាផ្ទុកយន្តហោះចម្បាំងច្រើនគ្រឿងទៅក្បែរអ៊ីរ៉ង់ និងបានគំរាម​ថាអាចវាយប្រហារ​​​គ្រប់ពេលវេលា​ ប្រសិនបើអ៊ីរ៉ង់មិនចរចា​។ ដើម្បីបន្ធូរបន្ថយស្ថានការណ៍នេះ តួកគីបានស្នើខ្លួនធ្វើជាអ្នកសម្របសម្រួល​ បើកការចរចារវាងអ៊ីរ៉ង់ និងសហរដ្ឋអាមេរិក​។

ភាគីកម្ពុជា-ថៃ សម្រេចពន្យារពេលការអនុវត្តបទឈប់បាញ់ រយៈពេល ៣ខែថែមទៀត រហូតដល់ខែឧសភា ឆ្នាំ២០២៦។ នេះជាការបញ្ជាក់របស់ប្រមុខការទូតថៃលោក ស៊ីហាស័ក ភួងកេតកែវ ក្នុងបទសម្ភាសន៍ជាមួយកាសែតជប៉ុន Nikkie Asia ដែល​ចេញផ្សាយ​នាថ្ងៃទី២៩ មករា ឆ្នាំ២០២៦ ក្រៅកិច្ចចង្អៀតប្រជុំរដ្ឋមន្រ្តីការបរទេសអាស៊ាន នៅទីក្រុង Cebu ប្រទេសហ្វីលីពីន។ ការសម្រេចបន្តនេះ និងបើតាមលោក ស៊ីហាស័ក គឺដោយសារភាគីទាំង២មើលឃើញថា បទឈប់បាញ់ដែលសម្រេចបានកាលពីខែធ្នូ ឆ្នាំ២០២៥កន្លងទៅ នៅមានភាពផុយស្រួយ ខណៈ​ភាពតានតឹងតាមបណ្តោយព្រំដែនក៏បន្តកើតមានឡើង។

ឆ្នាំ២០២៥ មន្ទីរពេទ្យគន្ធបុប្ផា នៅភ្នំពេញ និងមន្ទីរពេទ្យជ័យវរ្ម័នទី៧ នៅខេត្តសៀមរាប បានពិនិត្យព្យាបាលកុមារ និងស្ត្រីមានផ្ទៃពោះ ដោយឥតគិតថ្លៃ បានជាង ១,៤លានករណី កើន២៥% បើធៀបទៅនឹងរយៈពេលដូចគ្នា ក្នុងឆ្នាំ ២០២៤។ នេះបើតាមការចេញផ្សាយរបស់មន្ទីរពេទ្យគន្ធបុប្ផា កាលពីថ្ងៃទី២៨ ខែមករា ឆ្នាំ២០២៦កន្លងទៅ និងថា ក្នុងឆ្នាំ២០២៥ មន្ទីរពេទ្យបានចំណាយថវិកាសរុបជាង ៤៦លានដុល្លារ។

ខុសប្លែកពីខែមុនៗ ស្បៀងអាហារ និងជំនួយដែលជារបស់របរចាំបាច់សម្រាប់ជនភៀសសឹកតាមតំបន់ព្រំដែនហាក់ធ្លាក់ ថមថយខ្លាំង។ ធ្លាប់តែស្តុកទុកជំនួយហូរហៀ នៅក្នុងអំឡុងសង្រ្គាមប្រយុទ្ធគ្នានៅតាមព្រំដែនខ្មែរ-ថៃ ទីតាំងទទួលជំនួយ Eat More បានប្រែជាស្រក លែងសូវសម្បូរជំនួយដូចមុន។ អ្នករៀបចំកម្មវិធីទទួលជំនួយប្រាប់វិទ្យុបារាំងអន្តរជាតិថា ការផ្តល់ជំនួយបានធ្លាក់ថយចុះ បន្ទាប់ពីកម្ពុជា-ថៃសម្រេចអនុវត្តបទឈប់បាញ់ និងបន្ទាប់ពីពលរដ្ឋភៀសសឹកខ្មែរមួយចំនួនធំ បានវិលត្រឡប់ទៅលំនៅឋានវិញ។ 

ប្រធានាធិបតីស៊ីរី លោក អាម៉េដ អាល់ ឆារ៉េ បានទៅធ្វើទស្សនកិច្ច នៅវិមានក្រេមឡាំង នៅថ្ងៃ ពុធ ទី ២៨ ខែ មករា ។ នេះ ជាលើកទី ២ ហើយ ដែលមេដឹកនាំស៊ីរីរូបនេះ បានជួបជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន គិតតាំងពីលោក បានឡើងកាន់អំណាចនៅស៊ីរី កាលពីដើមឆ្នាំ ២០២៥ កន្លងទៅ ។ នៅក្នុងជំនួបថ្មីនេះ លោក ពូទីន និង លោក អាម៉េដ អាល់ ឆារ៉េ បានពិភាក្សាគ្នា អំពីការបន្តកិច្ចសហប្រតិបត្តិការទ្វេភាគីរវាងប្រទេសទាំងពីរ ជាពិសេសអំពីវត្តមាន នៃកងទ័ពរុស្ស៊ី នៅប្រទេសស៊ីរី ។

អ្នកទោស​១១នាក់​ដែលជា​សមាជិក​របស់​ក្រុមគ្រួសារ​ត្រកូលMing ដែលធ្លាប់មាន​អំណាច​ ឥទ្ធិពល​នៅ​ភូមា ត្រូវ​តុលាការចិន​កាត់ទោសពីបទ​ឃាតកម្ម​ ដោយចេតនា បន្លំបោកប្រាស់ និង​បង្កើតកាស៊ីណូខុសច្បាប់ កាលពីថ្ងៃ​ព្រហស្បតិ៍។ នៅក្នុង​សំណុំរឿងឧក្រិដ្ឋកម្ម​អនឡាញ ដែលបាន​ប៉ះពាល់ធ្វើឲ្យ​ប្រជាជន​ចិន​រងគ្រោះ ទាំងខាតបង់លុយ និង​អាយុជីវិត រដ្ឋអំណាចប៉េកាំង​បាន​បើកប្រតិបត្តិការ​តាមចាប់​មេខ្លោងឧក្រិដ្ឋកម្មអនឡាញជាច្រើន​នាក់ ពី​ប្រទេស​ភូមា ថៃ និង​កម្ពុជា តួយ៉ាងអតីត​ឧកញ៉ា ចេនហ្ស៊ីដែលទើបត្រូវ​ចាប់បញ្ជូន​ទៅ​ចិន កាលពី​ពាក់កណ្តាល​ខែ​ធ្នូឆ្នាំមុន។

​​កម្ពុជា​ គ្មានការលក់កោះ​ណាមួយ​នៅលើដែនសមុទ្រខ្លួន​ទៅឱ្យ​ក្រុមហ៊ុន​ឯកជនឡើយ​​។ នេះជាការអះអាងរបស់ក្រុមប្រឹក្សា​អភិវឌ្ឍន៍កម្ពុជា​​នៅថ្ងៃទី​២៨មករាម្សិលមិញ​បន្ទាប់ពីមានការលើកឡើងថា ​រដ្ឋាភិបាលកម្ពុជា​​​បានលក់កោះ​ចំនួន២ នៅក្នុងខេត្តព្រះសីហនុ និងខេត្តកំពត ទៅឱ្យក្រុមហ៊ុន​ឯកជនរបស់​ឧកញ៉ាខ្មែរ​ម្នាក់។ ​

សារហ្វេសប៊ុករបស់នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះនៃកងទ័ពកម្ពុជា កាលពីថ្ងៃទី២៨ ខែមករា ឆ្នាំ២០២៦ បានក្លាយជាកម្មវត្ថុនៃការលើកយកមកពិភាក្សាគ្នា លើបណ្តាញសង្គម។ ការចាប់អារម្មណ៍ពីសំណាក់មហាជនចំពោះសាររបស់មេទ័ពខ្មែរដូច្នេះ ធ្វើឡើងបន្ទាប់ពីមានការចែកចាយតៗគ្នា នៅលើបណ្តាញសង្គម នូវសៀវភៅមួយក្បាល ដែលមានឈ្មោះថា «កម្ពុជាឈ្នះថៃ សម័យតេជោធិបតី»  និពន្ធដោយមន្ត្រីជាន់ខ្ពស់១រូប នៃក្រសួងមហាផ្ទៃ។ 

ជនរងគ្រោះពីគម្រោងបុរី ឡេង ណាវ៉ាត្រា ដាក់ក្តីរំពឹងថា ក្រសួងដែនដីនឹងអាចដោះស្រាយបញ្ចប់វិវាទ ឱ្យបានឆាប់រហ័ស ក្នុងឆ្នាំ២០២៦ បន្ទាប់ពី រដ្ឋមន្ត្រីក្រសួងដែនដី លោក សាយ សំអាល់ ចេញមុខ ប្រកាស លក់ទ្រព្យសម្បត្តិរបស់ ឧកញ៉ា ឡេង ណាវ៉ាត្រា ដើម្បីបញ្ចប់គម្រោងដែលមានបញ្ហា។ លោក ឡាយ ហេងតុង ជនរងគ្រោះម្នាក់ ក្នុងគម្រោងបុរី ឡេង ណាវ៉ាត្រា ផ្លូវជាតិ 6A បានបញ្ជាក់ប្រាប់វិទ្យុបារាំងអន្តរជាតិនៅរសៀលថ្ងៃទី២៩ ខែមករាថា ជនរងគ្រោះទាំងអស់កំពុងរង់ចាំមើលដំណោះស្រាយពីក្រសួងដែនដី ជាមួយក្តីសង្ឃឹមថា ពួកគេអាចមានផ្ទះរស់នៅបានសមរម្យដូចពលរដ្ឋដទៃ។ តាមលោក ឡាយ ហេងតុង ការសន្យារបស់លោករដ្ឋមន្ត្រី សាយ សំអាល់ ធ្វើឱ្យពលរដ្ឋរងគ្រោះមានសង្ឃឹមច្រើន ដ្បិត កន្លងមក ពួកគេជួបរឿងកុហក បោកប្រាស់ច្រើនដងពីសំណាក់ក្រុមហ៊ុន។

ប្រមុខការទូតកម្ពុជា លោក ប្រាក់ សុខុន បានអះអាងថា ដើម្បីឱ្យភូមាមានស្ថិរភាពនយោបាយយូរអង្វែង គឺមានតែការបោះឆ្នោតដែលអាចជឿទុកចិត្តបាន តម្លាភាព និងការគាំទ្រពីពលរដ្ឋភូមា។ ការលើកឡើងយ៉ាងដូច្នេះរបស់ប្រមុខការទូតកម្ពុជា ធ្វើឡើងក្នុងកិច្ចពិគ្រោះយោបល់ក្រៅផ្លូវការ ស្តីពីការអនុវត្តកិច្ចព្រមព្រៀងជាឯកច្ឆន្ទប្រាំចំណុច ដែលប្រព្រឹត្តទៅនៅប្រទេសហ្វីលីពីន កាលពីថ្ងៃទី២៨ ខែមករា។ បើតាមភាគីកម្ពុជា កិច្ចព្រមព្រៀងជាឯកច្ឆន្ទ ៥ចំណុច នៅតែជាឯកសារគោលរបស់អាស៊ានក្នុងការជួយឲ្យភូមាអាចវិលទៅរកប្រក្រតីភាពឡើងវិញ តាមរយៈដំណើរការនយោបាយដែលដឹកនាំ និងគ្រប់គ្រងដោយភូមាខ្លួនឯង។

អគ្គទេសាភិបាលធនាគារជាតិនៃកម្ពុជា លោកស្រី ជា សិរី កាលពីពេលថ្មីៗនេះ បានបង្ហាញក្តីបារម្ភរបស់ខ្លួន ចំពោះការរំកិលធ្លាក់ចំណាត់ថ្នាក់របស់កម្ពុជាទៅក្នុងបញ្ជីប្រផេះរបស់ក្រុមការងារហិរញ្ញវត្ថុអន្តរជាតិ ហៅកាត់ជាភាសាអង់គ្លេសថា FATF។ អគ្គទេសាភិបាលធនាគារជាតិកម្ពុជាកំពុងកើតក្តីបារម្ភ ក្នុងកាលៈទេសៈមួយដែលរូបភាពនៃឧក្រិដ្ឋកម្មអនឡាញក្នុងប្រទេសកម្ពុជាកំពុងធ្វើឲ្យសហគមន៍អន្តរជាតិចាប់អារម្មណ៍។ ចំពោះលោកស្រី ជា សិរី កម្ពុជាត្រូវជៀសវាងការធ្លាក់ទៅក្នុងបញ្ជីប្រផេះសាជាថ្មីនៅក្នុងរបាយការណ៍របស់ក្រុមការងារហិរញ្ញវត្ថុ FATF ដើម្បីការពារ ការផ្តល់ទំនុកចិត្តរបស់សាធារណជន និងទំនុកចិត្តរបស់វិនិយោគិនក្នុងស្រុក និងបរទេស។ តើកម្ពុជាត្រូវធ្វើបែបណា ដើម្បីបញ្ចៀសកុំឲ្យធ្លាក់ទៅក្នុងបញ្ជីប្រផេះរបស់ក្រុមការងារហិញ្ញវត្ថុ FATF?

សំណុំរឿងព្រំដែនកម្ពុជា-ថៃ កំពុងក្លាយ​ជាប្រធានបទក្តៅគគុកម្តងទៀតនៅលើឆាកការទូតក្នុងតំបន់។ រដ្ឋមន្រ្តីការបរទេសសិង្ហបុរី លោក Vivian Balakrishnan បានអំពាវនាវឲ្យមានការពិភាក្សាគ្នាបន្ថែមលើបញ្ហាជម្លោះព្រំដែនខ្មែរ-ថៃ នៅក្នុងកិច្ចប្រជុំចង្អៀតរដ្ឋមន្រ្តីការបរទេសអាស៊ាននាថ្ងៃទី២៩ ខែមករា ឆ្នាំ២០២៦នេះ។ ក្រៅតែពីសំណុំរឿងជម្លោះខ្មែរ-ថៃ ប្លុកអាស៊ានក៏កំពុងប្រឈមនឹងបញ្ហាស្មុគស្មាញជាច្រើនទៀត រួមមាន ជម្លោះ​សមុទ្រចិនខាងត្បូង និងវិបត្តិនយោបាយនៅភូមា​ជាដើម។

កិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥ របស់កម្ពុជា និងកងទ័ពភូមិភាគទី១ របស់ថៃ ដែលគ្រោងធ្វើនៅថ្ងៃទី២៩ ខែមករា ឆ្នាំ២០២៦នេះ មិនអាចប្រ​ព្រឹត្តទៅតាមការគ្រោងទុកបានទេ។ ការខកខានមិនអាចបើកកិច្ចប្រជុំ RBC នៅថ្ងៃនេះ ត្រូវបាន​ក្រសួងការពារជាតិកម្ពុជាបញ្ជាក់ថា បណ្តាលមកពីក្រុមលេខា RBC នៃភាគីទាំងពីរ ដែលបានជជែកគ្នាអស់រយៈពេល ៣ថ្ងៃកន្លងទៅនេះ មិនទាន់អាចរកចំណុចរួមបាន។

ប្រធានាធិបតីអាមេរិក លោកដូណាល់ត្រាំ កាលពីថ្ងៃពុធទី​២៨​មករា​បាន​ដំឡើង​សំឡេង​គំរាមអ៊ីរ៉ង់ តាមរយៈ​ការអះអាងថា នាវាចម្បាំង​ដ៏ធំមួយ​គ្រឿងទៀត​របស់អាមេរិក​កំពុង​ធ្វើដំណើរ​ទៅ​កាន់​ឈូង​សមុទ្រ​ពែរ្ស។ លោកត្រាំបាន​ប្រាប់អ៊ីរ៉ង់​ឲ្យប្រញាប់​ចុះកិច្ចព្រមព្រៀង​ គ្មាន​អាវុធនុយក្លេអ៊ែរ បើសិន​អ៊ីរ៉ង់​មិន​ចង់ធ្លាក់​ក្នុងការវាយប្រហារ​ដ៏ដំណំ​របស់​អាមេរិក។

ក្រសួងការពារជាតិចិន បានប្រកាសកាលពីថ្ងៃសៅរ៍ទី២៤មករា បើកការស៊ើបអង្កេត លើអគ្គមេបញ្ជាការកំពូល២រូបនៃកងទ័ពចិន គឺលោក ចាង យូសៀ អនុប្រធានគណៈកម្មការកងទ័ពមជ្ឈឹម និងលោក លីវ ចេនលី នាយសេនាធិការអន្តរកងទ័ពចិន។ អ្នកទាំង២ត្រូវបានដកហូតពីមុខតំណែងភ្លាមៗ បន្ទាប់ពីជាប់ចោទថា បានបំពានច្បាប់វិន័យកងទ័ព។ ផ្អែកតាមការវិភាគ ការដកហូតតំណែងអគ្គមេបញ្ជាការកងទ័ពទាំងពីរនេះ គឺជាការបោសសំអាតក្នុងជួរថ្នាក់ដឹកនាំធំៗនៃកងទ័ពចិន ដែលលោកស៊ី ជីនពីង ចង់ទុកតែមនុស្ស ដែលមានភក្តីភាពនឹងលោក ហើយធ្វើតាមលោកគ្រប់រឿងដោយគ្មានការជំទាស់។