គិតចាប់តាំងពីសង្រ្គាមនៅមជ្ឈិមបូព៌ាបានផ្ទុះឡើង តម្រូវការដ្រូនអ៊ុយក្រែន កើនឡើងខ្លាំង។ ប្រធានាធិបតីអ៊ុយក្រែន លោក វ្លូឌីមៀរ ហ្សេឡេនស្គី បានចាប់ផ្តើមពង្រឹងការគ្រប់ក្រុមហ៊ុនក្នុងស្រុក ពាក់ព័ន្ធនឹងការលក់ដ្រូន ចេញទៅក្រៅប្រទេស។ លោក ហ្សេឡេនស្គី ក៏បានសន្យាជួយបណ្តាប្រទេស នៅមជ្ឈិមបូព៌ា ដោយបញ្ជូនអ្នកជំនាញដ្រូន ដើម្បីរៀបចំប្រព័ន្ធការពារនឹងការវាយប្រហារ ពីដ្រូនអ៊ីរ៉ង់។ ចំណែក រដ្ឋាភិបាលអ៊ីរ៉ង់វិញ បានចាត់ទុកទង្វើរបស់រដ្ឋាភិបាលក្រុងកៀវ ជារឿងគួរឲ្យអស់សំណើច។ អ៊ីរ៉ង់ក៏បានព្រមានថា ដែនដីអ៊ុយក្រែនទាំងមូល នឹងក្លាយជាផ្ទាំងស៊ីបស្របច្បាប់ នៃការវាយប្រហាររបស់អ៊ីរ៉ង់។

ការបើកច្រកសមុទ្រ​អកមូហ្សដើម្បីឲ្យកប៉ាល់ដឹកប្រេងអាច​ធ្វើចរាចរឡើងវិញប្រកបដោយសុវត្ថិភាពជាអាទិភាពចំបង​របស់​រដ្ឋបាលលោកដូណាល់ត្រាំ។ កាលពីថ្ងៃសៅរ៍ ទី​១៤មីនាប្រធានាធិបតីអាមេរិករូបនេះបាន​ប្រាប់ប្រទេស​ធំៗដូចជា ចិន អង់គ្លេស​បារាំង ឬ​ជប៉ុនឲ្យជួយបញ្ជូននាវាចម្បាំងទៅធានា​សុវត្ថិភាពចរាចរណ៍​របស់កប៉ាល់ដឹកប្រេង​នៅ​ច្រកសមុទ្រ​អកមូហ្ស។ បើតាម​លោកត្រាំ​ច្រកសមុទ្រ​ដ៏សំខាន់មួយនេះកំពុងត្រូវ​អ៊ីរ៉ង់​យកធ្វើជាចំណាប់ខ្មាំង ដើម្បីវាយប្រហារ​លើ​កប៉ាល់ដឹកប្រេងដែលឆ្លងកាត់នៅទីនោះ។ ការទាមទាររបស់លោកត្រាំដើម្បី​រកជំនួយពីប្រទេស​ដទៃ​​បានធ្វើឲ្យ​អ៊ីរ៉ង់​សើចចំអកពី​ឆ័ត្រ​ការពារ​ដ៏ធ្លុះធ្លាយ​របស់អាមេរិកនៅដើមបូព៌ា។ អ៊ីរ៉ង់​បានឆ្លៀតបញ្ជាក់ថា អ៊ីរ៉ង់​មិន​បាន​បិទច្រកសមុទ្រអកមូហ្សដូចការចោទប្រកាន់របស់អាមេរិក។ ប៉ុន្តែ អ៊ីរ៉ង់​វាយប្រហារ​តែ​កប៉ាល់​ដឹកប្រេង​របស់អាមេរិក អ៊ីស្រាអែល និងប្រទេសដែល​មានប្រយោជន៍រកស៊ីជាមួយ​អាមេរិក។

ប្រឈមនឹងវិបត្តិប្រេង និងទំនិញឡើងថ្លៃ បាតុករគុយបាផ្ទុះកំហឹង និងនាំគ្នាសម្រុកចូលបំផ្លាញការិយាល័យបក្សកុម្មុយនិស្ត ខណៈប្រធានាធិបតីគុយបាអះអាង ថាទើបបាននិយាយទាក់ទងជាមួយអាមេរិក ដែលដាក់ទណ្ឌកម្មបិទដង្ហើមសេដ្ឋកិច្ចគុយបា។ បាតុកម្មហិង្សានេះបានកើតឡើង នៅយប់ថ្ងៃសុក្រ ឆ្លងចូលថ្ងៃសៅរ៍ ទី១៤ មីនា នៅភាគកណ្តាលនៃប្រទេសគុយបា។ ប្រធានាធិបតីគុយបាបានថ្កោលទោស ចំពោះសកម្មភាពហិង្សា ដែលបានបំផ្លិចបំផ្លាញទ្រព្បសម្បតិ្តសាធារណៈ។

អគ្គនាយករងអាជ្ញាធរជាតិព្រះវិហារ បានអះអាងថា ប្រាសាទព្រះវិហាររបស់កម្ពុជាបានរងការខូចខាតប្រមាណ ៨០% ដោយសារយោធាថៃបានបាញ់ផ្លោងគ្រាប់ធុនធ្ងន់ជាច្រើនប្រភេទមកចំប្រាង្គប្រាសាទ។​ បើតាម អាជ្ញាធរជាតិព្រះវិហារ មន្ត្រីជំនាញបានរកឃើញស្នាមប្រេះ ខួងសាច់ និងបាក់រលំចំនួន ៥៦២ទីតាំង ខណៈមន្ត្រីស៊ីម៉ាក់ក៏បានរកឃើញគ្រាប់បែកគ្រប់ប្រភេទចំនួនជាង ១ ៣០០គ្រាប់ ដែលបន្សល់ទុកដោយយោធាថៃបាញ់ស្រោចមកលើប្រាសាទព្រះវិហារ។

គិតចាប់តាំងពីអ៊ីស្រាអែលសហការជាមួយអាមេរិកវាយប្រហារអ៊ីរ៉ង់ អំពើស្អប់ខ្ពើមមកលើសហគមន៍ជនជាតិជ្វីហ្វ បានរីករាលដាល នៅលើទឹកដីអឺរ៉ុប។ នៅទីក្រុងអាំស្ទែរដាម ប្រទេសហូឡង់ នាយប់ថ្ងៃសុក្រ ឆ្លងចូលថ្ងៃសៅរ៍ ទី១៤ មីនា មានករណីបំផ្ទុះគ្រាប់បែកមួយ បានកើតឡើង នៅមុខសាលារៀនជនជាតិជ្វីហ្វ។ បើផ្អែកតាមអាជ្ញាធរហូឡង់ ហេតុការណ៍នេះមិនបានបង្កឲ្យមានអ្នករបួស ឬអ្នកស្លាប់ឡើយ។ មិនដល់មួយសប្តាហ៍ផង នេះជាលើកទី៣ ដែលមានករណីបំផ្ទុះគ្រាប់បែក នៅអឺរ៉ុប ប្រឆាំងនឹងជនជាតិជ្វីហ្វ។

អាមេរិកកាន់តែលង់ជាប់ក្នុង​សង្រ្គាម​វាយប្រហារលើអ៊ីរ៉ង់។ ដើម្បី​ផលប្រយោជន៍របស់ខ្លួន​ ដូចជា​មូលដ្ឋានទ័ព នៅ​តំបន់ដើមបូព៌ា អាមេរិក​បាន​រើ ដឹកបញ្ជូនសព្វាវុធ នាវាចម្បាំង​និង​ប្រព័ន្ធ​ខែលមីស៊ីល​ចេញពីជប៉ុន និងកូរ៉េខាងត្បូង។ កាលពីពេលថ្មីៗនេះ កាសែតអាមេរិក​ និងកាសែតក្នុងស្រុកកូរ៉េខាងត្បូង​បានចុះផ្សាយ​ពី​ការដឹកជញ្ជូន​ប្រព័ន្ធខែលមីស៊ីល​អាមេរិកចេញពីកូរ៉េខាងត្បូង ដើម្បី​យកទៅពង្រាយ​នៅតំបន់ដើមបូព៌ា។ នៅថ្ងៃអង្គារទី​១០មីនា ដើមសប្តាហ៍ប្រធានាធិបតី​កូរ៉េខាងត្បូង​បាន​ឆ្លើយបញ្ជាក់ទៅនឹង​ពាក្យចចាមអារ៉ាម​ ដោយថា កូរ៉េខាងត្បូងបាន​ប្រឆាំងដែរ ប៉ុន្តែ មិនអាចហាមឲ្យអាមេរិក​ឈប់ដកយកប្រព័ន្ធខែលមីស៊ីលពីកូរ៉េខាងត្បូង ទៅដាក់​នៅ​តំបន់ដើមបូព៌ាបាននោះទេ។ គ្មានប្រព័ន្ធខែលមីស៊ីល​របស់អាមេរិក តើ​កូរ៉េខាងត្បូងត្រូវបារម្ភពីសុវត្ថិភាពការពារដែនអាកាសរបស់ខ្លួន នៅចំពោះមុខ​ការគំរាមកំហែង​របស់​កូរ៉េខាងជើងដែរឬទេ? 

កូរ៉េខាងជើងបានបាញ់សាកល្បងមីស៊ីលបាលីស្ទិកជាង១០គ្រាប់ នៅសមុទ្រជប៉ុន នាថ្ងៃសៅរ៍ ទី១៤ មីនា ដើម្បីព្រមានរដ្ឋាភិបាលក្រុងសេអ៊ូល និងវ៉ាស៊ីនតោន ដែលហ៊ានធ្វើសមយុទ្ធយោធា នៅកូរ៉េខាងត្បូង។ ការបាញ់សាកល្បងមីស៊ីលរបស់របបក្រុងព្យុងយ៉ាង ធ្វើឡើងតែប៉ុន្មានម៉ោងប៉ុណ្ណោះ ក្រោយពីនាយករដ្ឋមន្ត្រីកូរ៉េខាងត្បូង បានធ្វើដំណើរទៅដល់សហរដ្ឋអាមេរិក។ ចំណែក ជប៉ុនកំពុងដុតដៃដុតជើងប្រមូលព័ត៌មាន ពាក់ព័ន្ធនឹងមីស៊ីលបាលីស្ទិករបស់កូរ៉េខាងជើង និងត្រៀមខ្លួនទប់ទល់រាល់ការគំរាមកំហែងរបស់របបព្យុងយ៉ាង។

លោក ឆៃ ស៊ីណារិទ្ធ ប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាបានព្រមានថា ក្រោយខែមេសា ឆ្នាំ២០២៦ ប្រសិនបើរកឃើញថា ទីតាំងណាមួយនៅបន្តអនុញ្ញាតឲ្យមានបទល្មើសឆបោកតាមអនឡាញ នោះអាជ្ញាធរដែលជាអ្នកទទួលខុសត្រូវទីតាំងនោះ អាចប្រឈមនឹងការដកតំណែង។ អ្នកតាមដានសង្គម បានគាំទ្រការលើកឡើងនេះ តែពួកគេចង់ឃើញមានការអនុវត្តន៍វិធានការម៉ឺងម៉ាត់ជាក់ស្តែងចំពោះទីតាំងណា ដែលនៅបន្តមានបទល្មើសឆបោកអនឡាញ៕

រដ្ឋាភិបាលកម្ពុជាបានរៀបចំឲ្យមានទារកដ្ឋានជាបណ្តើរៗ នៅតាមសហគមន៍ដែលមានតម្រូវការចាំបាច់ និងឈានដល់ការបង្កើនចំនួនអ្នកមើលថែទាំកុមារឲ្យបានច្រើនថែមទៀត ដើម្បីសម្រាលបន្ទុករបស់ឪពុកម្តាយ និងដើម្បីជំរុញឲ្យកុមារមានភាពលូតលាស់ទាំងកាយសម្បាទា និងបញ្ញាស្មារតី។ នេះបើតាមការបញ្ជាក់របស់អ្នកនាំពាក្យក្រសួងអប់រំ យុវជន និងកីឡា។ អ្នកពាក់ព័ន្ធក្នុងកម្មវិធីពង្រីកទារកដ្ឋាននេះ បានមើលឃើញពីភាពចំាបាច់នៅក្នុងការបង្កើតមជ្ឈមណ្ឌលថែទាំកុមារ តែក៏បានលើកឡើងអំពីបញ្ហាប្រឈមមួយចំនួន ដែលពាក់ព័ន្ធនឹងការកសាងទំនុកចិត្ត និងធនធានមនុស្សជាដើម។

មន្ត្រីអង្គការលីកាដូប្រចាំខេត្តបន្ទាយមានជ័យ លោក អ៊ិន គង់ជិត បានអំពាវនាវឱ្យសាលាឧទ្ធរណ៍ខេត្តបាត់ដំបង ទទួលយកសំណើរបស់អ្នកកាសែតលោក ផន សុភាព និងលោក ភាព ភារ៉ា ដែលទទូចសុំ រួចផុតពីបទចោទប្រកាន់ស្តីពី «ការប្រគល់ឱ្យរដ្ឋបរទេសនូវព័ត៌មានជាអាទិ៍ ដែលធ្វើឱ្យអន្តរាយការការពារជាតិ»។ បើតាមមន្ត្រីអង្គការលីកាដូ ដែលបានចូលស្តាប់សវនាការ កាលពីថ្ងៃទី ១៣ ខែមីនា ឆ្នាំ២០២៦ ពិរុទ្ធជនជាអ្នកសារព័ត៌មានទាំងពីរ បានអះអាងថា ខ្លួនពុំមានគំនិតទុច្ចរិតដូចការចោទប្រកាន់របស់តុលាការឡើយ។

សង្រ្គាមនៅ​ដើមបូព៌ា​នៅ​តែ​ក្តៅគគុក ព្រោះថា អ៊ីរ៉ង់នៅតែ​មិន​ព្រមចុះចាញ់នៅចំពោះមុខ​ការវាយប្រហារ​យ៉ាងសន្ធប់របស់​អាមេរិក និង​អ៊ីស្រាអែល នៅ​២សប្តាហ៍មកនេះ។ ប្រធានាធិបតីអាមេរិក លោកដូណាល់ ត្រាំ នៅថ្ងៃសុក្រទី ១៣​មីនា​បាន​គំរាមថា នឹង​វាយប្រហារ​លើទីតាំងប្រេង​របស់អ៊ីរ៉ង់​នៅលើ​កោះ Kharg បើសិន​អ៊ីរ៉ង់នៅតែបន្ត​ខ្ទប់​ច្រកសមុទ្រ អកមូហ្ស។ ដោយមិនចាញ់ពាក្យគំរាមរបស់លោកត្រាំ របបអ៊ីស្លាមអ៊ីរ៉ង់​បាន​តបវិញថា នឹង​អ៊ីរ៉ង់​នឹង​ដៅកម្ទេច​ទីតាំងប្រេង​របស់ប្រទេស​នៅក្នុងតំបន់ដែលជា​ដៃគូរបស់អាមេរិក បើសិន​លោកត្រាំធ្វើពិតដូចពាក្យគំរាម។ ឈាង បុប្ផា​រាយការណ៍ព័ត៌មាននេះ។

លោកនាយករដ្ឋមន្ត្រី ហ៊ុន ម៉ាណែត បានឲ្យដឹងថា យុទ្ធនាការបង្ក្រាបការឆបោកតាមប្រព័ន្ធបច្ចេកវិទ្យា ឬអនឡាញ មិនមែនជាសកម្មភាព ដែលធ្វើឲ្យល្អមើល ឬធ្វើត្រឹមពិធីបុណ្យចូលឆ្នាំខ្មែរ ដូចមតិមួយចំនួនបានលើកឡើងនោះឡើយ។ ការបញ្ជាក់របស់លោកនាយករដ្ឋមន្ត្រី ធ្វើឡើងអំឡុងពេលនៃកិច្ចប្រជុំគណៈរដ្ឋមន្ត្រីកាលពីថ្ងៃទី១៣ ខែមីនា ឆ្នាំ២០២៦។ តាមរយៈកិច្ចប្រជុំដ៏សំខាន់នេះ គណៈរដ្ឋមន្ត្រីក៏បានពិភាក្សា និងអនុម័តសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យាផងដែរ។

នៅថ្ងៃសុក្រទី ១៣ ខែមីនា ម៉ូស្គូបានថ្លែងទាមទារឲ្យក្រុងវ៉ាស៊ីនតោនដកចេញបន្ថែមទៀត នូវ ទណ្ឌកម្មលើការនាំចេញប្រេងឆៅរុស្ស៊ី ដើម្បីធានាផ្តល់ស្ថិរភាពដល់ទីផ្សារប្រេងពិភពលោក ដែលច្របូកច្របល់ ក៏ព្រោះតែសង្គ្រាមនៅមជ្ឈិមបូព៌ា។ អឺរ៉ុបឯណោះវិញនាំមុខ​ដោយអាល្លឺម៉ង់​បាន​រិះគន់ និង​ស្វះស្វែងរារាំងដល់ការបន្ធូរបន្ថយទណ្ឌកម្មលើរុស្ស៊ី។ 

​លោក​ហ្សេឡេនស្គី ប្រធានាធិបតីអ៊ុយក្រែន បានធ្វើដំណើរមកជួបលោក​ម៉ាក្រុងនៅទីក្រុងប៉ារីស កាលពីថ្ងៃទី​១៣មីនា នៅក្នុងបរិបទដែល​ពិភពលោក កំពុងតែងាកទៅតាមដាននិងព្រួយបារម្ភខ្លាំង​​ តែពីបញ្ហា​សង្គ្រាមនៅដើមបូព៌ា។ នៅក្នុងពេលជួបគ្នា លោក​ម៉ាក្រុងបានធានាអះអាងប្រាប់​លោកហ្សេឡេនស្គីថា ការជួយទំនុកបម្រុង​អ៊ុយក្រែន គឺជាអាទិភាព​ធំបំផុត​របស់​បារាំង ក៏ដូចជារបស់អឺរ៉ុប ហើយ​គ្មានអ្វីអាចមកបង្វែរ​ការតាំងចិត្តនេះបានឡើយ​។

នៅនេប៉ាល់ គណបក្សជាតិឯករាជ្យរបស់អ្នកចម្រៀងរែប(Rap) លោក បាឡែនដ្រា ស្ហា បានទទួល​ជ័យ​ជម្នះ ក្នុងការ​បោះឆ្នោត​ជ្រើសរើស​សមាជិករដ្ឋ​សភា​។ អតីត​អ្នក​ចម្រៀងញាក់កន្ត្រាក់អារម្មណ៍ និង​ជាអភិបាល​រដ្ឋធានី​រូបនេះ នឹងក្លាយ​ជា​នាយករដ្ឋមន្ត្រី​វ័យ​ក្មេង នៅអំលុងពេល​​១សប្តាហ៍​ខាងមុខ​។ បញ្ហា​ធំ​ដែល ​មេដឹកនាំវ័យក្មេងនេប៉ាល់ ត្រូវ​ដោះស្រាយ​ចំពោះ​មុខ គឺ​កង្វះការងារធ្វើ​សម្រាប់​យុវជន ​និងកំណែទម្រង់​សង្គម ដែលពោរពេញ​ដោយ​អំពើ​ពុករលួយ​។​ ​

ប្រធានពន្ធនាគារខេត្តស្ទឹងត្រែង និងមន្ត្រី ៣នាក់ផ្សេងទៀត ដែលមានតួនាទីជាប្រធាន និងអនុប្រធានការិយាល័យប្រតិបត្តិ និងប្រធានផ្នែកគ្រប់គ្រងជនជាប់ឃុំ ត្រូវបានក្រសួងមហាផ្ទៃព្យួរតួនាទីជាបណ្តោះអាសន្ន និងបង្គាប់ឲ្យពួកគេទៅបម្រើការងារនៅនាយកដ្ឋានរដ្ឋបាលសរុប ចំណុះអគ្គនាយកដ្ឋានពន្ធនាគារវិញ។ ប៉ុន្តែ លិខិតដែលចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស សុខា នៅថ្ងៃទី១០ ខែមីនា ឆ្នាំ២០២៦ មិនបានបញ្ជាក់ពីមូលហេតុនៃការព្យួរតួនាទីរបស់មន្ត្រីពន្ធនាគារខេត្តស្ទឹងត្រែងទាំង ៤រូបនេះទេ។ តែលោក ឃៀង សុណាឌីន អ្នកនាំពាក្យអគ្គនាយកដ្ឋានពន្ធនាគារបានប្រាប់វិទ្យុបារាំង RFI នៅថ្ងៃទី១៣ មីនានេះថា ការព្យួរតួនាទីជាបណ្តោះអាសន្នរបស់មន្ត្រីពន្ធនាគារខេត្តស្ទឹងត្រែងទាំង ៤នាក់ គឺដោយសារក្រុមប្រឹក្សាវិន័យក្រសួងមហាផ្ទៃកំពុងបន្តស៊ើបអង្កេតពាក់ព័ន្ធនឹងជនជាប់ឃុំ ដែលបានបង់ប្រាក់ជាថ្នូរនឹងការប្រើទូរស័ព្ទដៃដោយខុសច្បាប់នៅក្នុងពន្ធនាគារខេត្តស្ទឹងត្រែងកាលពីថ្ងៃទី១២ ខែកុម្ភៈ ឆ្នាំ២០២៦។

តុលាការរុស្ស៊ី សម្រេចកាត់ទោសបុរស ១៥ នាក់ ឲ្យជាប់ពន្ធនាគារអស់មួយជីវិត ពីបទភេរវកម្មយ៉ាងសាហាវព្រៃផ្សៃ នៅក្នុងសាលប្រគំតន្រ្តីមួយកន្លែង ស្ថិតនៅជាយទីក្រុងម៉ូស្គូ កាលពីឆ្នាំ ២០២៤ ។ សាលក្រមដកហូត​សេរីភាពមួយ​ជីវិត​នេះ ធ្លាក់​មកនៅថ្ងៃព្រហស្បតិ៍ ទី១២ ខែមីនា។ គួររំឭកថា ការវាយប្រហារភេរវកម្មជីហាតទ្រង់ទ្រាយធំខាងលើនេះ បានផ្តាច់ជីវិតមនុស្សសរុបចំនួន ១៥០ នាក់ ។

នៅក្នុងវេទិកាតុមូលស្តីពី «សណ្តាប់ធ្នាប់ពិភពលោកក្នុងបរិបទថ្មី» ដែលរៀបចំដោយរាជបណ្ឌិត្យសភាកម្ពុជា វាគ្មិនចូលរួមបានកត់សម្គាល់ថា បញ្ហាក្នុងប្រព័ន្ធអភិបាលកិច្ចនៅកម្ពុជាដែលកើតចេញពីបុគ្គលផង និងពីការអនុវត្តគោលនយោបាយផងនោះត្រូវការ ការវះកាត់ជាបន្ទាន់ ពិសេសនៅក្នុងស្ថានភាពដែលកម្ពុជាកំពុងមានវិបត្តិ។ សម្រាប់អ្នកវិភាគសង្គម ហេតុផលដែលនាំឱ្យប្រព័ន្ធអភិបាលកិច្ចកម្ពុជាបន្តមានបញ្ហា ក៏ព្រោះតែលទ្ធិប្រជាធិបតេយ្យ និងប្រព័ន្ធនីតិរដ្ឋស្ទើរ រលត់បាត់ពីកម្ពុជា។ ក្នុងន័យនេះ អ្នកវិភាគបានស្នើឲ្យរដ្ឋាភិបាលវះកាត់មន្ត្រីដែលប្រៀបបាននឹងត្រីស្អុយក្នុងកន្ត្រក បើមិនដូច្នោះទេ កម្ពុជានឹង​រង​វិបត្តិនិទណ្ឌភាពក្នុងសង្គមកាន់តែខ្លាំង។ សូមស្តាប់សេចក្តីរាយការណ៍លម្អិតរបស់ សាំ ឧត្តម

ប្រឈម​នឹងការ​ឡើងថ្លៃប្រេងសាំង​​ដោយសារតែសង្គ្រាម​អ៊ីរ៉ង់ សហរដ្ឋអាមេរិក​បា​នសម្រេច​បើកភ្លើង​ខៀវឲ្យរុស្ស៊ីអាច​លក់ប្រេងឡើងវិញ។ ការ​អនុញ្ញាតនេះ ធ្វើឡើង​ចំពោះ​តែប្រេង​រុស្ស៊ី​ ដែល​មា​នរក្សា​ស្តុក​នៅលើនាវា​តែប៉ុណ្ណោះ និង​សម្រាប់​រយៈពេលខ្លី​ ​ចាប់ពីពេលនេះ រហូត​ដល់ត្រឹម​ថ្ងៃទី១១មេសា។ ​ការបន្ធូរបន្ថយ​ទណ្ឌកម្មរុស្ស៊ី​បែបនេះ ធ្វើឲ្យ ​បារាំង ​មិនពេញចិត្ត​ទេ។​ ​

កាលពីយប់ថ្ងៃព្រហស្បតិ៍ទី​១២មីនា មាន​ទាហាន​បារាំងម្នាក់បាន​ស្លាប់ និងរបួសច្រើននាក់ នៅក្នុងការវាយប្រហារដោយ​ដ្រូនមួយ នៅឯមូលដ្ឋានទ័ពបារាំង ក្នុង​​​តំបន់អ៊ែរប៊ីល ភាគខាងជើងអ៊ីរ៉ាក់​។ តាម​ការសង្ស័យ ការវាយប្រហារនេះ អាចជាស្នាដៃរបស់កងកម្លាំងប្រដាប់អាវុធ​កូនចៅអ៊ីរ៉ង់ ដែលមានច្រើនក្រុមនៅក្នុងទឹកដី​អ៊ីរ៉ាក់ បន្ទាប់ពី​មេដឹកនាំថ្មីរបស់អ៊ីរ៉ង់ បានប្រកាសហៅ​ឲ្យ​រួមគ្នាសងសឹង​។ តើស្ថានការណ៍ថ្មីនេះ ​នឹងធ្វើ​ឲ្យ​ប្រែប្រួលបែបណា​ចំពោះគោលជំហរបារាំង ព្រោះថាបារាំង​ បាន​​ប្រកាស​មិនចូលរួមពាក់ព័ន្ធ​ ​​​ក្នុង​សង្គ្រាម​នៅ​អ៊ីរ៉ង់​ឡើយ។

តុលាការរុស្ស៊ី សម្រេចកាត់ទោសបុរស ១៥ នាក់ ឲ្យជាប់ពន្ធនាគារអស់មួយជីវិត ពីបទភេរវកម្មយ៉ាងសាហាវព្រៃផ្សៃ នៅក្នុងសាលប្រគំតន្រ្តីមួយកន្លែង ស្ថិតនៅជាយទីក្រុងម៉ូស្គូ កាលពីឆ្នាំ ២០២៤ ។ សាលក្រមដកហូត​សេរីភាពមួយ​ជីវិត​នេះ ធ្លាក់​មកនៅថ្ងៃព្រហស្បតិ៍ ទី១២ ខែមីនា។ គួររំឭកថា ការវាយប្រហារភេរវកម្មជីហាតទ្រង់ទ្រាយធំខាងលើនេះ បានផ្តាច់ជីវិតមនុស្សសរុបចំនួន ១៥០ នាក់ ។

សហគមន៍ទេសចរណ៍ធម្មជាតិកំពង់ឃ្លាំងជារមណីយដ្ឋាននៅបឹងទន្លេសាបដ៏ស្រស់​ស្អាត។ តែបែរជាមិនសូវមានភ្ញៀវទេសចរទៅទស្សនាកម្សាន្តប៉ុន្មានទេ។ មគ្គុទេសក៍ទេសចរណ៍ និងសហគមន៍បានមើលឃើញដូចគ្នាថា សហគមន៍ទេសចរណ៍ធម្មជាតិមួយនេះមានភូមិសាស្ដ្រនៅឆ្ងាយដាច់តែឯងពីក្រុងសៀមរាប និងខ្វះការផ្សព្វផ្សាយ៕

ក្រសួងព័ត៌មាននឹងអនុវត្តយុទ្ធនាការលុបបំបាត់ព័ត៌មានក្លែងក្លាយ រយៈពេល ១ឆ្នាំពេញជាមួយបណ្តាប្រទេសទាំងអស់នៅតាមបណ្តោយទន្លេមេគង្គ លើកលែងប្រទេសថៃ។ ការអនុវត្តគម្រោងនេះ ជាការប្រយុទ្ធប្រឆាំងព័ត៌មានបំភ្លៃ ពិសេសព័ត៌មានដែលបង្កើតឡើងដោយបញ្ញាសិប្បនិម្មិត (AI) ក្នុងតំបន់ទន្លេមេគង្គ។ នេះបើតាមសេចក្តីប្រកាសរបស់ក្រសួងព័ត៌មានដែលចេញផ្សាយនៅថ្ងៃទី១២ ខែមីនា ឆ្នាំ២០២៦។ 

តំណាងពាណិជ្ជកម្មសហរដ្ឋអាមេរិក នៅថ្ងៃទី១២ ខែមីនា ឆ្នាំ២០២៦ បានប្រកាសបើកការស៊ើបអង្កេតលើកម្ពុជា ពាក់ព័ន្ធនឹងបញ្ហាផលិតកម្មលើសសមត្ថភាព និងការដោះស្រាយបញ្ហាពលកម្មដោយបង្ខំ។ ការស៊ើបអង្កេតនេះអាចនាំឲ្យមានការបន្ថែមពន្ធលើទំនិញមួយចំនួនរបស់កម្ពុជា។

សាលាដំបូងខេត្តព្រះសីហនុបានប្រកាសកាលពីថ្ងៃទី១១ ខែមីនា ឆ្នាំ២០២៦ថា ជនជាតិចិនចំនួន ៣នាក់ និងជនជាតិវៀតណាម ១នាក់ ត្រូវបានផ្តន្ទាទោស ដោយជាប់ពន្ធនាគារ​អស់មួយជីវិត និងពិន័យជាប្រាក់ម្នាក់ៗចំនួន ២០០លានរៀល។ ការផ្តន្ទាទោសធ្ងន់ធ្ងររបស់តុលាការខេត្តព្រះសីហនុទៅលើជនបរទេសទាំងនេះ ធ្វើឡើងក្រោយរកឃើញថា ​ពួកគេជាប់ពាក់ព័ន្ធនឹងបទល្មើសផលិត ជួញដូរដោយខុសច្បាប់នូវសារធាតុញៀន សម្អាតប្រាក់ និងប្រើប្រាស់អាវុធខុសច្បាប់។

ល្ងាចថ្ងៃព្រហស្បតិ៍​ទី​១២មីនា បណ្តាញទូរទស្សន៍ជាតិអ៊ីរ៉ង់ បាន​ផ្សាយខ្លឹមសារ​នៃសារ​លើកទី​១​របស់ លោក មុត្ឆតាបា ខាមេណី ​បន្ទាប់ពីត្រូវបានតែងតាំងជា​អគ្គមគុទេសក៍​កំពូលអ៊ីរ៉ង់។ ក្នុងសារ​នេះ អគ្គមគុទេសក៍​កំពូលអ៊ីរ៉ង់ បានប្រកាសថាអ៊ីរ៉ង់នឹងសងសឹក​​។ លោក មុត្ឆតាបា ខាមេណី ដែលរហូតពេលនេះ​មិន​ទាន់​បង្ហាញមុខជាសាធារណៈនេះ បាន​ប្រកាសទៀតថា អ៊ីរ៉ង់​នឹងបន្ត​​បិទខ្ទប់ច្រកសមុទ្រអកមូហ្ស ដើម្បីដាក់សម្ពាធលើអាមេរិកនិងអ៊ីស្រាអែល​។

នៅ​ក្នុង​តំបន់​អាស៊ីអាគ្នេយ៍​ គណនី​បណ្តាញ​សង្គម ចំនួន ១៥០ ០០០ ​ត្រូវក្រុមហ៊ុន​ Meta សម្រេច​​​លុប​ចោល​ ព្រោះតែ​មាន​ជាប់​ពាក់ព័ន្ធបណ្តាញក្រុម​ឧក្រិដ្ឋកម្មឆបោកអនឡាញ។ ​ការ​លុប​ចោលនេះ ឋិតក្រោម​កិច្ចសហការស៊ើបអង្គេត​​របស់​ក្រុមហ៊ុនបណ្តាញសង្គម Meta ជាមួយ​និង​ ​អាជ្ញាធរប្រទេស​ជាច្រើន ក្នុងនោះមាន ប៉ូលិស​ថៃ អាមេរិក និង​អង់គ្លេស ចូលរួម​ផង។  

កាលពីថ្ងៃពុធ ទី​១១មីនា ក្រុមប្រឹក្សាសន្តិសុខនៃអង្គការសហប្រជាជាតិ បាន​បោះឆ្នោតអនុម័ត​សេចក្តីសម្រេចចិត្តរួមមួយ ដោយ​បានហៅ​ឲ្យ​អ៊ីរ៉ង់ ត្រូវតែឈប់វាយប្រហារ​មកលើ​បណ្តាប្រទេសនៅក្នុងតំបន់ឈូងសមុទ្រពែក្ស​។ ក៏ប៉ុន្តែ នៅយប់ថ្ងៃពុធឈានចូលថ្ងៃព្រហស្បតិ៍​ គេសង្កេតឃើញថា អ៊ីរ៉ង់​បានសំរុកវាយ​ប្រហារកាន់តែខ្លាំង មកលើនាវាដឹកប្រេង ទីតាំងស្តុកប្រេងឆៅ ព្រមទាំងទីក្រុងធំៗ នៅតាម​បណ្តាប្រទេសក្នុងតំបន់នេះ។

ថ្ងៃ ពុធ ទី ១១ ខែ មីនា វិមានក្រេមឡាំងបានថ្លែងអះអាងថា ការកាត់ផ្តាច់ និង ដំណើររអាក់រអួល នៃ ប្រព័ន្ធអ៊ីនធឺនែតនៅក្នុងប្រទេស នឹងអាចពន្យារពេលយូរថ្ងៃបន្តទៅមុខទៀត ដើម្បីធានាសន្តិសុខ សុវត្ថិភាព ដល់ប្រជាជនរុស្ស៊ី  ។ អាជ្ញាធររុស្ស៊ី អះអាងដូច្នេះ បន្ទាប់ពីបានសង្កេតឃើញគ្រោះថ្នាក់ ដែលអាចបង្កឡើងដោយ ការវាយប្រហារវិស័យបច្ចេកទេសវិទ្យា ពីសំណាក់អ៊ុយក្រែន ។

សភាប្រជាជន​ចិន​ អនុម័តច្បាប់​ថ្មី ស្តីពី​ការ​បង្រួបបង្រួមជាតិពន្ធុ ដែល​មាន​វត្ថុបំណង​ពង្រឹងសុខដុមនីយកម្មក្នុង​សង្គម និង​ទប់ស្កាត់​វិច្ឆេទកម្ម​ជាតិសាសន៍​ ដែល​ទាមទារ​ផ្តាច់ខ្លួន​បំបែកទឹកដី។ វិធានការ​ច្បាប់​ថ្មីនេះ ​បាន​កំណត់យកភាសាគោលផ្លូវការតែមួយ សម្រាប់ប្រើប្រាស់​ក្នុង​​វិស័យ​សិក្សាធិការ ធុរកិច្ច និង​ទីសាធារណៈ​។ ​អង្គការ​សង្គមស៊ីវិល​បានរិះគន់ ច្បាប់ថ្មី​នេះ ថា​ ផ្តាច់​ឫសគល់ក្មេង​ៗ ចេញ​ពី​អត្តសញ្ញាណជាតិ​សាសន៍​ដូនតារបស់ខ្លួន។​​ ​

នៅថ្ងៃទី១១មីនា ក្រសួងសុខាភិបាលបានសម្រេចបិទមន្ទីរពហុព្យាបាលឥន្ទ្រទេវី១ ក្រោមមូលហេតុថា ទីកន្លែងព្យាបាលឯកជនមួយនេះបានប្រព្រឹត្តខុសក្រមសីលធម៌វិជ្ជាជីវៈធ្ងន់ធ្ងរ។ អ្នកពាក់ព័ន្ធក្នុងវិស័យសុខាភិបាលបានសាទរនឹងការសម្រេចរបស់ក្រសួងសុខាភិបាល និងបានស្នើឲ្យមានការពង្រឹងក្រមសីលធម៌របស់បុគ្គលិកដែលបម្រើការក្នុងវិស័យសុខាភិបាលបន្ថែមទៀត។

ក្នុងបទសម្ភាសជាមួយទីភ្នាក់ងារព័ត៌មានបារាំង AFP ដែលចេញផ្សាយនៅថ្ងៃទី១១មីនាម្សិលមិញ លោក ឆៃ ស៊ីណារិទ្ធ ប្រធានគណៈកម្មការ គ.ប.ឆ.ប បានបញ្ជាក់ថា អាជ្ញាធរកម្ពុជាបានបង្កកទ្រព្យសម្បត្តិរបស់មេឧក្រិដ្ឋជនអនឡាញ ចេន ហ្ស៊ី ដែលរួមមានអចលនទ្រព្យ និងអាជីវកម្មជាច្រើនទៀតនៅក្នុងប្រទេសកម្ពុជា។ តាមលោក ឆៃ ស៊ីណារិទ្ធ ទោះបីជាកម្ពុជាបានធ្វើបត្យាប័ន​ឧក្រិដ្ឋជនរូបនេះទៅឱ្យ​ចិន តែរូបគេនៅតែត្រូវ​ប្រឈមនឹងការផ្តន្ទាទោសនៅកម្ពុជា នាពេលខាងមុនផងដែរ។

ថ្ងៃ ពុធ ទី ១១ ខែ មីនា វិមានក្រេមឡាំងបានថ្លែងអះអាងថា ការកាត់ផ្តាច់ និង ដំណើររអាក់រអួល នៃ ប្រព័ន្ធអ៊ិនធឺនែតនៅក្នុងប្រទេស នឹងអាចពន្យារពេលយូរថ្ងៃបន្តទៅមុខទៀត ដើម្បីធានាសន្តិសុខ សុវត្ថិភាព ដល់ប្រជាជនរុស្ស៊ី  ។ អាជ្ញាធររុស្ស៊ី អះអាងដូច្នេះ បន្ទាប់ពីបានសង្កេតឃើញគ្រោះថ្នាក់ ដែលអាចបង្កឡើងដោយ ការវាយប្រហារវិស័យបច្ចេកទេសវិទ្យា ពីសំណាក់អ៊ុយក្រែន ។

ថ្ងៃទី​១១ ខែ​មីនា ឆ្នាំ២០២៦ ជា​ទិវា​ខួប១៥ឆ្នាំគត់​ នៃគ្រោះថ្នាក់មហន្តរាយនុយក្លេអ៊ែរនៅហ្វ៊ូគូស្ហ៊ីម៉ា ដែលបង្កឡើង​ដោយ​រលកយក្សស៊ូណាមិ និងគ្រោះរញ្ជួយដី។  គ្រោះថ្នាក់មហន្តរាយនុយក្លេអ៊ែរនៅហ្វ៊ូគូស្ហ៊ីម៉ា  ​បាន​សម្លាប់ និងធ្វើឲ្យមនុស្សរងគ្រោះ រាប់ម៉ឺននាក់ ព្រម​ទាំង​បង្កផលវិបាក​ខ្លាំង ​ដោះស្រាយមិនទាន់​ចប់ មកទល់​សព្វថ្ងៃ​​។ ​ទោះម្តេច​ក្តី នុយក្លេអ៊ែរស៊ីវិល នៅតែ​បន្ត​ជាស្នូលយុទ្ធសាស្ត្រ ដើម្បីឯករាជ្យ​ភាពថាមពល របស់​រដ្ឋាភិបាល​ជប៉ុនបច្ចុប្បន្ន​។​​ 

ប្រឈមនឹងវិបត្តិ​តម្លៃប្រេងឡើងថ្លៃ នៅទូទាំងពិភពលោក ក្រោយផ្ទុះសង្គ្រាមនៅដើមបូព៌ា ក្រុមប្រទេសទាំង៣២​ សមាជិកនៃទីភ្នាក់ងារថាមពលអន្តរជាតិ បានមូលមតិគ្នាសុខចិត្ត​បញ្ចេញស្តុកប្រេង​បម្រុង សរុបចំនួន​៤០០លានធុងបារីល។ ទោះជាយ៉ាងណា អ្នកជំនាញអះអាងថា សម្រាប់ពេលនេះ ពិភពលោក​មិនទាន់ខ្វះប្រេងឥទ្ធនៈប្រើនោះទេ តែការបញ្ចេញស្តុក​ប្រេង​បម្រុង យក​មក​​ចាក់បញ្ជូលមកក្នុងទីផ្សារ គឺជាវិធានការ​ដើម្បី​ជួយ​ទាញតម្លៃ​ប្រេង​ឲ្យធ្លាក់ចុះប៉ុណ្ណោះ។