ទីស្តីការគណៈរដ្ឋមន្ត្រីកម្ពុជា នៅថ្ងៃទី២១ ខែឧសភា ឆ្នាំ២០២៦ បានស្នើទៅរដ្ឋមន្ត្រីក្រសួងមហាផ្ទៃ ដើម្បីសុំគោលការណ៍កំណត់ឋានន្តរសក្តិមន្ត្រីនគរបាលជាតិបន្តវេនស្របតាមមុខតំណែងនីមួយៗ ក្នុងរចនាសម្ព័ន្ធអគ្គស្នងការនគរបាលជាតិ និងអង្គភាពនគរបាលថ្នាក់ប្រហាក់ប្រហែល។ ការកំណត់ឋានន្តរសក្តិសម្រាប់មន្ត្រីនគរបាលបន្តវេននេះត្រូវបានអ្នកតាមដានសង្គមសាទរ និងស្នើឲ្យកំណែទម្រង់នេះ ដំណើរការទៅមុខប្រកបដោយភាពច្បាស់លាស់។

ថ្លៃងក្នុងសភាថៃនាថ្ងៃទី២១ ខែឧសភា ឆ្នាំ២០២៦ មេដឹកនាំគណបក្សប្រឆាំងថៃ លោក ណាថាភុង រឿងបញ្ញាវុធ បានជំរុញឲ្យនាយករដ្ឋមន្ត្រីថៃ លោក អនុធិន ឆានវីរៈគូន អញ្ជើញ​ប្រធានាធិបតីបារាំង លោក អេម៉ានុយអែល ម៉ាក្រុង បំពេញទស្សនកិច្ចនៅប្រទេសថៃ មុនធ្វើ​ដំណើរមក​​កម្ពុជា។ មេបក្សប្រឆាំងថៃរូបនេះជឿថា វត្តមាន​ប្រធានាធិបតីបារាំងនៅក្នុងប្រទេសថៃ​នឹង​ជួយសម្រួលដល់កិច្ចពិភាក្សាពាក់ព័ន្ធបញ្ហាព្រំដែនរវាងកម្ពុជា និងថៃ។ 

​សង្គ្រាម​​និងវិបត្តិ​​ប្រេង​ឡើង​ថ្លៃ​ខ្លាំង បាន​មក​បាំង​បិទ​សំណុំ​រឿង​អាកាសធាតុ​ ឱ្យ​ក្លាយ​ជា​ប្រធានបទ​បន្ទាប់​បន្សំ។ ប៉ុន្តែជា​ដំណឹង​ល្អ មហាសន្និបាត​អង្គការ​សហប្រជាជាតិ​ ថ្ងៃ​ទី ២០​ឧសភា បាន​អនុម័ត ​​សេចក្តី​សម្រេច​ចិត្ត​ ពង្រឹង​កាតព្វកិច្ច​​អាកាសធាតុ​របស់​រដ្ឋ​ជា​សមាជិក​នីមួយៗ។ ជាងនេះ​ទៅទៀត បើតាម​របាយការណ៍​​របស់​អង្គការ​កិច្ចសហប្រតិបត្តិការ​និង​អភិវឌ្ឍន៍​សេដ្ឋកិច្ច​ ហៅកាត់​ថា OCDE ចេញផ្សាយ​នៅថ្ងៃព្រហស្បតិ៍​ទី ២១​ឧសភា ​ការ​ប្រមូល​​ជំនួយ​ហិរញ្ញវត្ថុពី​​ក្រុមប្រទេស​អ្នក​មានទៅ​ជួយ​ក្រុមប្រទេសក្រីក្រ​​ បាន​សម្រេច​លើស​កម្មវត្ថុ​កំណត់​ ក្នុង​រយៈ​ពេល​បី​ឆ្នាំ​ជាប់​គ្នា។

នៅក្នុងប្រទេសអង់គ្លេស ការិយាល័យស្ថិតិជាតិបានប្រកាសឲ្យដឹងក្នុងថ្ងៃទី២១ ឧសភាថា ចំនួនជនអន្តោប្រវេសន៍បានធ្លាក់ចុះ ១៧១ ០០០នាក់ក្នុងឆ្នាំ ២០២៥ ដែលជាតួលេខទាបបំផុតគិតតាំងពីឆ្នាំ ២០២១។ មូលហេតុចម្បងនៃការធ្លាក់ចុះចំនួនជនអន្តោប្រវេសន៍នេះ គឺការកាត់បន្ថយការផ្តល់ទិដ្ឋាការ ការងារឲ្យជនបរទេសក្រៅពីតំបន់អឺរ៉ុប។ នាយករដ្ឋមន្រ្តីអង់គ្លេសលោក គៀរ ស្តារមឺ បានបញ្ចេញប្រតិកម្មសាទរចំពោះការធ្លាក់ចុះចំនួនជនអន្តោប្រវេសន៍នេះដោយបានបញ្ជាក់បន្ថែមថា កម្មវត្ថុដែលលោកបានសន្យាបានសម្រេចហើយ។

នៅថ្ងៃទី២១ ខែឧសភា ឆ្នាំ២០២៦នេះ អគ្គនាយកដ្ឋានពន្ធនាគារនៃក្រសួងមហាផ្ទៃបានប្រកាសថា ទណ្ឌិតជាអនីតិជន ដែលជាប់ពាក់ព័ន្ធនឹងករណីក្មេងទំនើងជាបុរសចំនួន ៧៩០នាក់ ត្រូវបានផ្ទេរដោយផ្អែកលើគោលការណ៍ស្ម័គ្រចិត្ត ពីរាជធានី និងខេត្តមួយចំនួនទៅកាន់ខេត្តពោធិ៍សាត់ និងខេត្តឧត្តរមានជ័យ។ ក្នុងចំណោមទណ្ឌិតជិត ៨០០នាក់ខាងលើ ៦៥១នាក់ ត្រូវបានផ្ទេរទៅពន្ធនាគារខេត្តពោធិ៍ធិសាត់ ដើម្បីអនុវត្តទោសបន្ត រួមទាំងបំពាក់បំប៉នបន្ថែមលើមុខជំនាញកសិកម្ម រួមមានការដាំបន្លែ និងការចិញ្ចឹមសត្វ។ ចំណែក ១៣៩នាក់ផ្ទេរទៅពន្ធនាគារខេត្តឧត្តរមានជ័យ ដើម្បីអនុវត្តទោសបន្ត រួមទាំងបណ្តុះបណ្តាលបន្ថែមលើជំនាញសំណង់។ តែលោក ឃៀង សុណាឌីន អ្នកនាំពាក្យអគ្គនាយកដ្ឋានពន្ធនាគារ មិនភ្លេចបញ្ជាក់បន្ថែមថា ការផ្ទេរអ្នកទោសពីពន្ធនាគារភ្នំពេញ និងតាមខេត្តមួយចំនួនទៅកាន់ពន្ធនាគារក្នុងខេត្តពោធិ៍ធិសាត់ និងឧត្តរមានជ័យក៏ព្រោះតែភាពចង្អៀតណែន និងងាយស្រួលផ្តល់ការគ្រប់គ្រងជំនាញដល់ទណ្ឌិត ពិសេស ជំនាញសំណង់ចាក់គម្របលេណដ្ឋាននៅខេត្តឧត្តរមានជ័យ។ 

នៅក្នុងប្រទេសអ៊ីស្រាអែល រូបភាពនៅវីដេអូដែលបង្ហោះដោយរដ្ឋមន្រ្តីសន្តិសុខជាតិស្តាំនិយមជ្រុល លោក អ៊ីតាម៉ារ បិនវារ នៅលើបណ្តាញសង្គម X កំពុងបង្កឲ្យមានប្រតិកម្មរិះគន់យ៉ាងព្រោងព្រាត។ នៅក្នុងវីដេអូនោះ គេឃើញសកម្មជននៃនាវាមនុស្សធម៌សម្រាប់តំបន់ហ្កាហ្សាត្រូវបានគេចងស្លាបសេក បង្ខំឲ្យលុតជង្គង់ និងក្រាបក្បាលដល់ដី។ លើសពីនេះ រូបលោករដ្ឋមន្រ្តីសន្តិសុខជាតិស្តាំនិយមជ្រុលក៏មានវត្តមាននៅក្នុងរូបភាពវីដេអូនោះដែរ។ បណ្តាប្រទេសអឺរ៉ុបនិងអង្គការមនុស្សធម៌ជាច្រើនបានបញ្ចេញប្រតិកម្មរិះគន់ខ្លាំងៗ និងទាមទារឲ្យមានការដោះលែងក្រុមសកម្មជនមនុស្សធម៌ទាំងអស់ជាបន្ទាន់។ ប្រតិកម្មក៏មានដែរពីសំណាក់ថ្នាក់ដឹកនាំអ៊ីស្រាអែលគ្នាឯង។

លោក​ស្រី​នាយករដ្ឋមន្ត្រី​ជប៉ុន ទើប​បញ្ចប់​ទស្សនកិច្ច​ពីរ​ថ្ងៃ​នៅ​ប្រទេ​សកូរ៉េខាង​ត្បូង នៅ​ថ្ងៃ​ទី​២០​ឧសភា​ម្សិលមិញ។ ​ក្នុង​បរិបទ​នៃ​ស្ថានភាព​អន្តរជាតិ​មិនជាក់​លាក់ ប្រមុខ​ដឹកនាំ​ប្រទេស​ទាំងពីរ បាន​ប្តេជ្ញា​​រឹត​ចំណង​ទំនាក់ទំនងរវាង​គ្នា​ ដោយ​ប្រកាស​​ឆន្ទៈ​ពង្រឹង​កិច្ចសហប្រតិបត្តិការ​​ក្នុង​វិស័យ​សន្តិសុខ​និង​ថាមពល។

បណ្តាទីភ្នាក់ងាររបស់អង្គការសហប្រជាជាតិទទួលបន្ទុកជួយជនភៀសខ្លួនរ៉ូហ៊ីងយ៉ាដែលជាជនជាតិភាគតិចភូមានៅជំរំក្នុងប្រទេសបង់ក្លាដែស កំពុងប្រឈមនឹងការខ្វះថវិកាចំនួន ៦១០លានដុល្លារ។ បើគ្មានទឹកប្រាក់ជំនួយនេះទេ ជីវិតរបស់ជនភៀសខ្លួនទាំងនោះនឹងអាចប្រឈមគ្រោះថ្នាក់ នេះជាការព្រមានរបស់អ.ស.បនៅថ្ងៃពុធ ទី ២០ ឧសភា។

អគ្គនាយកដ្ឋានគយ និងអគ្គនាយកដ្ឋានសុខភាពសត្វបានសម្រេចក្នុងថ្ងៃទី១៨ ខែឧសភា ឆ្នាំ២០២៦ ឲ្យក្រុមហ៊ុនចំនួន ៥ ថែមទៀតនាំចូលសាច់បង្កកមកលក់នៅកម្ពុជា។ ការសម្រេចថ្មីនេះបានធ្វើឲ្យចំនួនក្រុមហ៊ុននាំចូលសាច់បង្កកកើនឡើងដល់ប្រមាណជាង ៥០ក្រុមហ៊ុន។ តំណាងអ្នកចិញ្ចឹមសត្វបារម្ភថា កំណើនក្រុមហ៊ុននាំចូលសាច់បង្កកពេលនេះនឹងធ្វើឲ្យប៉ះពាល់ដល់កិច្ចខិតខំប្រឹងប្រែងបង្កើនការចិញ្ចឹមសត្វក្នុងស្រុក បន្ទាប់ពីកម្ពុជាមានជម្លោះព្រំដែនជាមួយថៃ។

អ្នក​ជំនាញ​សត្វ​ព្រៃបាន​ព្រលែង​ក្រពើ​ភ្នំចំនួន​ ១០​ក្បាល​ចូល​ទៅដែន​ជម្រក​សត្វព្រៃ​ស្រែពក​ ក្នុងខេត្ត​មណ្ឌល​គិរី បន្ទាប់ពីបានវាយតម្លៃ​ និង​រៀប​ចំផែន​ការ​អភិរក្ស​អស់​រយៈ​ពេល​ជា​ច្រើន​ឆ្នាំ។​ នេះតាម​​​សេចក្តីប្រកាស​ព័ត៌មានរបស់ក្រសួង​បរិស្ថានចេញដែល​ផ្សាយ​​នៅ​ថ្ងៃទី​២១ ខែ​ឧសភា ឆ្នាំ២០២៦​។​ ការ​ព្រលែង​​ក្រពើ​ភ្នំចូល​ដែន​ធម្ម​ជាតិ​វិញ​នា​ពេល​នេះ​ គឺជា​​ការ​សហ​ការគ្នារវាង​ក្រសួង​បរិស្ថាន​ អង្គការ​ WWF អង្គការ​ Fauna & Flora International និង​​រដ្ឋបាល​ខេត្ត​មណ្ឌល​គិរី​ ក្នុង​គោល​បំណង​អភិ​រក្ស និង​ពង្រឹង​ប្រព័ន្ធ​អេកូឡូ​ស៊ី​ទឹក​សាប​ក្នុង​តំបន់​ខ្ពស់​រាប​ភាគ​ខាង​កើត​ប្រទេស​កម្ពុជា​។ 

រដ្ឋាភិបាលកម្ពុជាកំពុងបន្តជំរុញកំណែទម្រង់ស្ថាប័នរដ្ឋ តាមរយៈគម្រោងកែសម្រួល និងកាត់បន្ថយអគ្គនាយកដ្ឋាន និងនាយកដ្ឋានមួយចំនួននៅតាមក្រសួងស្ថាប័នផ្សេងៗ ក្នុងគោលដៅបង្កើនប្រសិទ្ធភាពការងារ កាត់បន្ថយការចំណាយថវិកាជាតិ និងឆ្លើយតបទៅនឹងវិវត្តសង្គមឌីជីថល។ នេះជាការលើកឡើងរបស់​លោកនាយករដ្ឋមន្ត្រី ហ៊ុន ម៉ាណែត ក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារទីស្នាក់ការកណ្តាលថ្មីនៃអគ្គនាយកដ្ឋានពន្ធដារនាព្រឹកថ្ងៃទី២១ ខែឧសភា ឆ្នាំ២០២៦។ 

ការវាយសម្លាប់សត្វព្រៃនៅកម្ពុជា មិនថាសត្វកាច ឬសត្វស្លូតតែងកើតឡើងជាបន្តបន្ទាប់ ក្រោយពីសត្វព្រៃទាំងនោះវង្វេងហ្វូងរត់ចូលភូមិឋានប្រជាជន។ ថ្មីចុងក្រោយនេះ មានករណីវាយសម្លាប់ពីរផ្ទួនៗគ្នាលើសត្វប្រើស និងក្តាន់។ អង្គការអភិរក្សសត្វព្រៃនានាក៏ដូចជាក្រសួងបរិស្ថាន បានសម្តែងការសោកស្តាយ ចំពោះការសម្លាប់សត្វព្រៃជិតផុតពូជដោយសារជំនឿ និងមូលហេតុផ្សេងៗ និងថា មហាជនគួរជ្រើសរើសដំណោះស្រាយផ្សេង ក្រៅពីការវាយសម្លាប់។

បណ្តាទីភ្នាក់ងាររបស់អង្គការសហប្រជាជាតិទទួលបន្ទុកជួយជនភៀសខ្លួនរ៉ូហ៊ីងយ៉ាដែលជាជនជាតិភាគតិចភូមានៅជំរំក្នុងប្រទេសបង់ក្លាដែស កំពុងប្រឈមនឹងការខ្វះថវិកាចំនួន ៦១០លានដុល្លារ។ បើគ្មានទឹកប្រាក់ជំនួយនេះទេ ជីវិតរបស់ជនភៀសខ្លួនទាំងនោះនឹងអាចប្រឈមគ្រោះថ្នាក់ នេះជាការព្រមានរបស់អ.ស.បនៅថ្ងៃពុធ ទី ២០ ឧសភា។

ប្រធានាធិបតី​ឥណ្ឌូណេស៊ី លោក​ប្រាបូវ៉ូ ស៊ូប្រ៊ីយ៉ាតូ ​បាន​ប្រកាស​នៅ​ថ្ងៃពុធទី​២០​ឧសភា​នេះ ​ពង្រឹង​វិធានការ​ត្រួត​ពិនិត្យ​ការ​នាំ​ចេញ​វត្ថុ​ធាតុ​ដើម​ ដូច​យ៉ាង ធ្យូង​ថ្ម ឬ​ប្រេង​ដូង។ សេចក្តីសម្រេចនេះ ធ្វើ​ឡើង​ក្នុង​ខណៈ​ដែលប្រទេស​កំពុង​ជួប​ការ​លំបាក​ផ្នែក​សេដ្ឋកិច្ច​ បង្ក​ឡើង​ដោយ​សង្គ្រាមនៅមជ្ឈិមបូព៌ា។

បន្ទាប់​ពី​ប្រធានាធិបតី​អាមេរិក​ដូណាល់ត្រាំ នៅ​ថ្ងៃ​ពុធ​ទី​២០​ឧសភា​នេះ ប្រធានាធិបតីចិន​លោក​ស៊ីជីនពីង បាន​ទទួល​ស្វាគមន៍​សមភាគី​​រុស្ស៊ី​លោក​វ្លាឌីមៀ ពូទីន ម្តង។ ពី​ទីក្រុង​​ប៉េកាំង​ ប្រមុខ​រដ្ឋ​​ចិន​និង​រុស្ស៊ី​បាន​បង្ហាញ​​​អំពី​ទំនាក់ទំនង​ដ៏​រឹង​មាំ​​ នៃមហាអំណាច​ពីរនៅ​ចំពោះស្ថានការណ៍អន្តរជាតិ​​ច្របូក​ច្របល់​​។

នៅក្នុងប្រទេសភូមា របបសឹកបានបញ្ជាក់ក្នុងថ្ងៃទី២០ ឧសភានេះពីការវាយដណ្តើមកាន់កាប់បានវិញនូវស្រុកមួយជាប់ព្រំដែនថៃពីក្រុមប្រឆាំងប្រដាប់អាវុធជនជាតិភាគតិច។ តែទំរាំទទួលបានជោគជ័យមួយនេះ កងទ័ពភូមាបានចំណាយពេលត តាំងផ្លូវអាវុធទល់នឹងក្រុមប្រឆាំងរយៈពេល ២សប្តាហ៍ដែលបានបណ្តាលឲ្យបាត់បង់ជីវិតមនុស្សជាច្រើននាក់។

អ្នកប្រើប្រាស់បណ្តាញសង្គម និងមហាជនជាច្រើនបាននាំគ្នាបញ្ចេញប្រតិកម្មចំពោះភាពអនាធិបតេយ្យតាមដងផ្លូវដែលបង្កឡើងដោយក្រុមម៉ូតូធំ តាមរយៈការជិះបង្ហោះ និងវ៉ាជែងមិនគោរពច្បាប់ចរាចរណ៍។ ទន្ទឹមគ្នានេះ ពលរដ្ឋថែមទាំងបានរិះគន់អាជ្ញាធរដែលមិនព្រមចាត់វិធានការលើក្រុមម៉ូតូធំទាំងនោះ ដូចដែលបានអនុវត្តទៅលើក្រុមក្មេងទំនើង។ អ្នកសិក្សាស្រាវជ្រាវសង្គមក៏យល់ឃើញដូច្នេះដែរ និងទទូចឱ្យសមត្ថកិច្ចចាត់វិធានការឱ្យបានម៉ឺងម៉ាត់ និងតម្លាភាព។ តើអាជ្ញាធរគួរមានវិធានការអ្វីខ្លះលើបុគ្គល ឬក្រុមជិះម៉ូតូគ្មានសណ្តាប់ធ្នាប់លើដងផ្លូវ?

ថ្ងៃ អង្គារ ទី ១៩ ខែ ឧសភា កងទ័ពរុស្ស៊ី បានចាប់ផ្តើមធ្វើសមយុទ្ធយោធា ដោយប្រើប្រាស់ អាវុធនុយក្លេអ៊ែរ ។ មានរយៈពេល ៣ ថ្ងៃ លំហាត់សឹកនេះ បានប្រមូលផ្តុំ ទាហានរុស្ស៊ី រាប់ម៉ឺននាក់ មកពីទូទាំងប្រទេស ។ គួរគូសបញ្ជាក់ដែរថា ប្រតិបត្តិការសម្ញែងគ្រឿងសព្វាវុធខាងលើ ធ្វើឡើងចំពេល ដែលប្រធានាធិបតីរុស្ស៊ី លោក វ៉្លាឌីមៀរ ពូទីន បានទៅធ្វើទស្សនកិច្ច នៅក្នុងប្រទេសចិន ។

គណបក្សប្រជាជនកម្ពុជានឹងមិនអនុញ្ញាតឲ្យចូលរួមក្នុងសម័្ពន្ធភាពទៀតទេសម្រាប់រាល់គណបក្សនយោបាយបង្កើតថ្មីណាដែលកើតចេញពីសមាជិកបក្សនយោបាយមានក្នុងសម្ព័ន្ធភាពស្រាប់។ នេះជាការបញ្ជាក់របស់លោក ជា ធីរិទ្ធ អ្នកនាំពាក្យគណបក្សប្រជាជនកម្ពុជានៅក្នុងសន្និសីទសារព័ត៌មានស្ដីពីលទ្ធផលនៃកិច្ចប្រជុំប្រធានគណបក្សនយោបាយក្នុងសម្ព័ន្ធភាពនាព្រឹកថ្ងៃទី២០ ខែឧសភា ឆ្នាំ២០២៦។ បើតាមលោក ជា ធីរិទ្ធ ការធ្វើដូចនេះគឺដើម្បីជៀសវាងការបង្កើតគណបក្សនយោបាយច្រើន។ អ្នកនាំពាក្យគណបក្សប្រជាជនកម្ពុជារូបនេះដដែលបានបន្ថែមថា ជំនួបរវាងលោក ហ៊ុន សែន និងគណបក្សនយោបាយក្នុងសម្ព័ន្ធភាពក្នុងថ្ងៃទី២០ ឧសភានេះក៏មានការផ្លាស់ប្តូរយោបល់គ្នាអំពីស្ថានការណ៍នៅតាមព្រំដែនកម្ពុជា-ថៃដែរ៕

លោក ជេហ្វ មូន ជាស្ថាបនិក និងជានាយកប្រតិបត្តិនៃរមណីយដ្ឋាន ថ្ងៃបាំងឆ័ត្រ នៅក្នុងខេត្តកែប ដែលបានមករស់នៅប្រទេសកម្ពុជារយៈពេលជាង ២០ឆ្នាំមកហើយ។ ជាសហគ្រិន និងជាអ្នកវិនិយោគជនជាតិប៊ែលហ្សិក មានសញ្ជាតិខ្មែរ លោក ជេហ្វ មូន កំពុងបង្កើតគម្រោងអភិវឌ្ឍន៍ថ្មីៗដែលមានចក្ខុវិស័យវែងឆ្ងាយក្នុងការប្រែក្លាយឆ្នេរសមុទ្រកែបទៅជាវិចិត្រសាលមហា​សមុទ្រអាស៊ីអាគ្នេយ៍ និងជាសារមន្ទីរក្រោមទឹកដ៏ធំបំផុតមួយនៅអាស៊ី។ សម្រាប់លោក ជេហ្វ មូន គម្រោងវិចិត្រសាលមហា​សមុទ្រដ៏ធំបំផុតនៅអាស៊ី គឺជាគម្រោងគោលដៅទេសចរណ៍សិល្បៈ និងអេកូឡូស៊ីលំដាប់ខ្ពស់ ដែលផ្តោតលើការថែរក្សាបរិស្ថាន សុខុមាលភាព និងវប្បធម៌ជាចម្បង។ 

ពលរដ្ឋមួយចំនួននៅក្រុងសៀមរាបបានសម្តែងការព្រួយបារម្ភចំពោះការបំពុលដោយសំឡេងដែលពួកគេអះអាងថា កំពុងប៉ះពាល់យ៉ាងធ្ងន់ធ្ងរដល់ការរស់នៅប្រចាំថ្ងៃ សុខភាព និងអាជីវកម្មទេសចរណ៍ ជាពិសេសទៅលើភ្ញៀវទេសចរ។ តាមលិខិតមួយដែលវិទ្យុបារាំងអន្តរជាតិ RFI ទើប​ទទួលបានពីពលរដ្ឋដែល​សុំមិនបញ្ចេញអត្តសញ្ញាណ ការរំខានដោយសំឡេងនៅពេលរាត្រី និងនៅ​ពេលព្រឹកព្រលឹមនៅតែបន្តកើតមាន ទោះបីអាជ្ញាធរខេត្តបានចេញសេចក្តីណែនាំស្តីពីការគ្រប់គ្រងសំឡេងរំខានក៏ដោយ។ 

នៅព្រឹកថ្ងៃពុធ ទី២០ ខែឧសភា ឆ្នាំ២០២៦នេះ លោក កឹម​ សុខា ប្រធានអតីតគណបក្សសង្រ្គោះជាតិត្រូវបានព្រះរាជអាជ្ញាអនុញ្ញាតឲ្យទៅជួបសួរសុខទុក្ខម្តាយរបស់លោកដែលកំពុងមានវ័យចាស់ជរា។ ការអនុញ្ញាតនេះគឺបន្ទាប់ពីលោក កឹម សុខា បានសរសេរលិខិតស្នើសុំទៅកាន់ព្រះរាជអាជ្ញាសាលាដំបូងក្រុងភ្នំពេញឲ្យរូបលោកបានទៅជួបសួរសុខទុក្ខអ្នកម្តាយដែលកំពុងដេកសម្រាកស្តាប់ព្រះធម៌។

រដ្ឋាភិបាលថៃបានសម្រេចកាត់បន្ថយរយៈពេលស្នាក់នៅដោយមិនចាំបាច់មានទិដ្ឋាការសម្រាប់ភ្ញៀវទេសចរមកពី ៩០ប្រទេស។ រដ្ឋមន្រ្តីក្រសួងទេសចរណ៍ថៃបានអះអាងថា វិធានការថ្មីដែលសម្រេចនៅថ្ងៃទី ១៩ ឧសភានេះមានគោលដៅទប់ស្កាត់ការកើនឡើងនៃបទល្មើសផ្សេងពាក់ព័ន្ធនឹងឧក្រិដ្ឋកម្មឆ្លងដែនដែលកំពុងក្លាយជាកង្វល់សម្រាប់រដ្ឋាភិបាល។

សង្គ្រាម​រវាងសហរដ្ឋអាមេរិកនិងអ៊ីរ៉ង់ មិនមែនធ្វើឡើងតែតាមរយៈគ្រឿងសព្វាវុធបណ្ណោះទេ តែរូបភាពនិងការឃោសនា​ ក៏ជាមធ្យោបាយ​មួយដែរ ដែលភាគីទាំង២បា​នប្រើ ដើម្បី​គំរាម និងសើចចំអកដាក់គ្នាទៅវិញទៅមក​។ នៅលើបណ្តាញសង្គម Truth Social លោកដូណាល់ ត្រាំ​បានបង្ហោះរូបថត និងវីដេអូ​​ បង្កើតឡើង​ដោយ​បច្ចេកវិទ្យា​​បញ្ញាសិប្បនិម្មិត​​ បង្ហាញ​ឲ្យ​ឃើញ​លោក ​ត្រៀមចុចប៊ូតុងក្រហម​ បញ្ជាគ្រាប់បែក​បរមាណូកម្ទេចអ៊ីរ៉ង់។ ចំណែកអ៊ីរ៉ង់វិញ មិនថានៅតាមទីសាធារណៈឬតាមទូរទស្សន៍​រដ្ឋ របបអ៊ីរ៉ង់​បានផ្សព្វផ្សាយឃោសនា​ ​នូវជ័យជំនះ​របស់អ៊ីរ៉ង់ ក៏ដូចជា​ការសាមគ្គីជាធ្លុងមួយរបស់ប្រជាជនអ៊ីរ៉ង់ នៅពីក្រោយថ្នាក់ដឹកនាំ​។

រដ្ឋាភិបាលថៃបានសម្រេចកាត់បន្ថយរយៈពេលស្នាក់នៅដោយមិនចាំបាច់មានទិដ្ឋាការសម្រាប់ភ្ញៀវទេសចរមកពី ៩០ប្រទេស។ រដ្ឋមន្រ្តីក្រសួងទេសចរណ៍ថៃបានអះអាងថា វិធានការថ្មីដែលសម្រេចនៅថ្ងៃទី ១៩ ឧសភានេះមានគោលដៅទប់ស្កាត់ការកើនឡើងនៃបទល្មើសផ្សេងពាក់ព័ន្ធនឹងឧក្រិដ្ឋកម្មឆ្លងដែនដែលកំពុងក្លាយជាកង្វល់សម្រាប់រដ្ឋាភិបាល។

អង្គការសុខភាពពិភពលោកហៅកាត់ជាភាសាអង់គ្លេស WHO បានបើក មហាសន្និបាតលើកទី៧៩ នៅក្នុងទីក្រុងហ្សឺណែវ ប្រទេសស៊្វីសនាថ្ងៃទី១៨ ខែឧសភា ឆ្នាំ២០២៦។ អគ្គនាយក WHO បានលើកឡើងដោយទាញសញ្ញាអាសន្ននៅក្នុងមហាសន្និបាតថា ការផ្ទុះឡើងនូវជំងឺអេបូឡានៅប្រទេសកុងហ្គោ និងហាន់តាវីរុសនៅលើនាវាទេសចរណ៍ MV Hondius គឺជាសញ្ញាដែលបង្ហាញថា ពិភពលោកកំពុងស្ថិតក្នុងស្ថានភាពគ្រោះថ្នាក់កាន់តែខ្លាំង។

មួយថ្ងៃបន្ទាប់ពីគំរាមថានឹងទម្លាក់គ្រាប់បែកសាជាថ្មី ដើម្បី​​​កម្ទេចអ៊ីរ៉ង់​ឲ្យរលាយ​ក្លាយជាឆេះ នៅទីបំផុត លោកដូណាល់ ត្រាំ បានប្រកាសនៅ​​ថ្ងៃចន្ទទី​១៨ឧសភា ថា​លោក​បានសម្រេចផ្អាកប្រតិបត្តិការ​នេះវិញ ព្រោះ​ប្រទេស​ក្នុងតំបន់ឈូងសមុទ្រពែក្សបានស្នើសុំ​។ ជាថ្មីម្តងទៀត លោកដូណាល់ ត្រាំ​ បាន​អះអាងថា ការចរចាជាមួយ​អ៊ីរ៉ង់​កំពុងដំណើរការទៅយ៉ាង​ល្អ ហើយ​​លោកជឿជាក់ថាអាចនឹងមានកិច្ចព្រមព្រៀងឆាប់ៗ​។

​មហោស្រព​ភាពយន្ត​អន្តរជាតិ​កាន​បាន​វិលត្រលប់មកវិញសាជាថ្មី ​តាមទម្លាប់​ប្រចាំឆ្នាំ ដោយ​ចាប់ផ្តើម​បើកទ្វារ​កាលពីថ្ងៃទី ១២​ឧសភា រហូត​ដល់​ថ្ងៃទី ២៣​ឧសភា។ ខុសពីឆ្នាំមុនៗ ​មហោស្រពភាពយន្តកានលើកទី​៧៩​ខ្សត់ខ្សែភាពយន្ត​ហូលីវូដ និង​សំបូរ​ដោយ​សាច់រឿងដែលនិយាយពី​បញ្ហា​ទាក់ទង​នឹង​សង្រ្គាមលោក និង​សិទ្ធិមនុស្ស​ស្រី។ ឈាង បុប្ផា​រាយការណ៍​ព័ត៌មាននេះផ្ទាល់​​ពី​ទីក្រុងកាន ក្រុង​ជាប់មាត់សមុទ្រ​ភាគខាងត្បូង​ប្រទេស​បារាំង។

នៅថ្ងៃចន្ទ ទី១៨ ឧសភា ឧត្តមស្នងការដ្ឋានសិទ្ធិមនុស្សអន្តរជាតិបានចេញផ្សាយរបាយការណ៍ថ្មីស្តីពីស្ថានភាពសិទ្ធិមនុស្សនៅដែនដីប៉ាឡេស្ទីនក្នុងតំបន់ហ្កាហ្សា និងស៊ីហ្សកដានី។ របាយការណ៍បានលើកឡើងថា ទង្វើរបស់ទាហានអ៊ីស្រាអែលនៅតំបន់ហ្កាហ្សាតាំងពីសង្រ្គាមថ្ងៃទី៧ តុលា ឆ្នាំ ២០២៣ បានបំពានធ្ងន់ធ្ងរលើច្បាប់អន្តរជាតិ និងបានជំរុញឲ្យអ៊ីស្រាអែលចាត់វិធានការគ្រប់យ៉ាងដែលអាចធ្វើបានដើម្បីបញ្ជៀសអំពើប្រល័យពូជសាសន៍។

រដ្ឋាភិបាលកម្ពុជាបានប្តេជ្ញាបោសសម្អាតឧក្រិដ្ឋកម្មឆបោកអនឡាញឲ្យអស់នៅត្រឹមខែមេសា ឆ្នាំ២០២៦។ តែរហូតមកដល់ខែឧសភានេះ ការបង្ក្រាបបទល្មើសមួយនេះនៅតែបន្តកើតមានមិនចេះដាច់។ នៅក្នុងករណីខ្លះ គេឃើញជនសង្ស័យជាជនបរទេសបានប្រើអាវុធតដៃជាមួយនឹងសមត្ថកិច្ចកម្ពុជាទៀតផង។ អ្នកវិភាគខ្លះមើលឃើញថា វិធានការបង្ក្រាបកន្លងមកគ្រាន់តែជាវិធីស្អំស្ថានការណ៍ និងបន្សាបប្រតិកម្មរបស់សហគមន៍អន្តរជាតិ និងអ្នកខ្លះទៀតយល់ថា អាជ្ញាធរពិតជាបានប្រឹងប្រែងប្រាកដមែន រួមទាំងបានបង្កើតច្បាប់ស្តីពីការប្រឆាំងនឹងឧក្រិដ្ឋកម្មអនឡាញនេះដែរ។ តើកម្ពុជាគួរមានយុទ្ធសាស្ត្រអ្វីទៀតដើម្បីពន្លឿនការបោសសម្អាតឧក្រិដ្ឋកម្មឆបោកអនឡាញ?

នៅថ្ងៃទី១៨ ខែឧសភា ឆ្នាំ២០២៦ តំណាងក្រសួងការពារជាតិ​កម្ពុជា និងឡាវបានជួបប្រជុំគ្នានៅក្នុង​ខេត្ត​ស្ទឹង​ត្រែងដែលកម្ពុជាធ្វើជាម្ចាស់ផ្ទះនៃកិច្ចប្រជុំលើកទី៤ របស់គណៈកម្មាធិការកិច្ចសហប្រតិបត្តិការរក្សាសន្តិសុខ តាមបណ្តោយព្រំដែន នៃប្រទេសទាំងពីរ ប្រចាំឆ្នាំ២០២៦។ យោងតាម​កំណត់​ហេតុ​ដែល​ចុះផ្សាយ​ដោយសារព័ត៌មានស្និទ្ធនឹងរដ្ឋាភិបាលកម្ពុជា ភាគីទាំងពីរបាន​ប្តេជ្ញាចិត្តរួមគ្នា ក្នុងការបញ្ចៀសឲ្យបាននូវការប៉ះទង្គិចគ្នាដោយអាវុធតាមព្រំដែននៃប្រទេសទាំងពីរ។

កងទ័ពថៃកំពុងធ្វើសមយុទ្ធយោធានៅខេត្តស្រះកែវជាប់ព្រំដែនកម្ពុជា ដោយផ្តោតលើប្រតិបត្តិការសឹក ការប្រើប្រាស់យន្តហោះគ្មានមនុស្សបើក និងការឆ្លើយតបរហ័ស។ កងទ័ពភូមិភាគទី១ថៃអះអាងថា សមយុទ្ធទ្រង់ទ្រាយ​នេះមានគោលបំណងពង្រឹងសមត្ថភាពការពារអធិបតេយ្យភាព និងត្រៀមទប់ទល់នឹងការគំរាមកំហែងនានាតាមបណ្តោយព្រំដែននាពេលអនាគត។ ដោយឡែក ក្រសួងការពារជាតិកម្ពុជានៅពុំទាន់មានប្រតិកម្មយ៉ាងណានៅឡើយ។ 

ថ្ងៃទី​១៨ឧសភា រដ្ឋាភិបាលអូស្ត្រាលី បានចេញ​សេចក្តីប្រកាស តម្រូវ​ឲ្យ​ម្ចាស់ភាគហ៊ុន​ដែល​ពាក់ព័ន្ធជាមួយចិន ត្រូវលក់ភាគ​​ហ៊ុន​ទាំងអស់​របស់ខ្លួន ចេញពី​ក្រុមហ៊ុន​រ៉ែកម្រ​អូស្ត្រលី Northern Minerals។ អូស្ត្រាលីអះអាងថា ខ្លួននឹងអនុវត្តច្បាប់​ដោយ​គ្មានការរើសអើង ដើម្បីការពារវវិស័យ​ឧស្សាហកម្មរ៉ែកម្រ ព្រោះវិស័យនេះគឺ​ជា​វិស័យ​យុទ្ធសាស្ត្រ​ជាតិ​។