សហគមន៍ឆ្នេរនេសាទជ្រោយស្វាយ ជាតំបន់ការពារព្រៃកោងកាង និងជីវៈចម្រុះក្នុងដែនសមុទ្រទឹករាក់ ដែលស្ថិតក្នុងឃុំជ្រោយស្វាយ ស្រុកស្រែអំបិល ខេត្តកោះកុង។ ក្នុងឆ្នាំ២០២២ សហគមន៍មួយនេះ បានប្រឹងអភិវឌ្ឍន៍ខ្លួនទៅជាសហគមន៍អេកូទេសចរណ៍។ តែទោះមានការអភិវឌ្ឍជាង ៤ឆ្នាំកន្លងទៅក៏ដោយ ក៏សហគមន៍ឆ្នេរនេសាទជ្រោយស្វាយមួយនេះ មិនទាន់មានលទ្ធភាពគ្រប់គ្រាន់ ក្នុងការអភិវឌ្ឍខ្លួនជាសហគមន៍អេកូទេសចរណ៍ពេញលេញនៅឡើយ៕

នាយករដ្ឋមន្ត្រីអូស្រ្តាលីលោក អង់តូនី អាល់បានីស៊ី និងនាយករដ្ឋមន្ត្រីវ៉ានូទូ លោក Jotham Napat បានចុះហត្ថលេខាលើកិច្ចព្រមព្រៀងសេដ្ឋកិច្ច និងសន្តិសុខនៅថ្ងៃចន្ទ ទី ២៩ ខែមិថុនា។ តែកិច្ចព្រមព្រៀងសន្តិសុខបានហាមមិនឲ្យមានការបង្កើតមូលដ្ឋានយោធាបរទេសនៅលើទឹកដីវ៉ានូទូទេ។ ចិនបានបញ្ចេញប្រតិកម្មភ្លាមៗដោយព្រមានអូស្ត្រាលីកុំឲ្យប្រើប្រាស់កិច្ចសហប្រតិបត្តិការជាមួយប្រទេសកូនកោះនៅប៉ាស៊ីហ្វិកខាងត្បូងមួយនេះ ដើម្បីលេងល្បែងភូមិសាស្រ្តនយោបាយជាមួយខ្លួន។ 

រដ្ឋាភិបាលកូរ៉េខាងត្បូ​ងបានប្រកាស​គម្រោងវិនិយោគ​ ដ៏ធំមហាសាលក្នុងទឹកប្រាក់​ ប្រមាណ​​១០០ម៉ឺនលានអឺរ៉ូ ទៅលើវិស័យ​បញ្ញាសិប្បនិ​ម្មិត។ ក្នុងរយៈពេល​១០ឆ្នាំទៅមុខ ក្រុមហ៊ុន​បច្ចេកវិទ្យា​ធំៗរបស់​កូរ៉េខាងត្បូង គ្រោងសាងសង់រោងចក្រផលិត​បន្ទះ​សឺមីកុងឌុកទ័រឈានមុខគេបំផុត ព្រមទាំង​ទីតាំងស្តុកទិន្នន័យ​ AI ​ច្រើនកន្លែងទៀត​។

ថ្មីៗនេះ ថៃបានអះអាងពីការសាងសង់របងព្រំដែនកម្ពុជា-ថៃក្នុងភូមិសាស្ត្រខេត្តចាន់ថាបុរីជាប់ខេត្តបាត់ដំបងរបស់កម្ពុជាដែលសម្រេចបាន ៤៥% ក្នុងដំណាក់ទី១ ឬស្មើប្រវែងសរុប ១,៣គីឡូម៉ែត្រ។ រដ្ឋាភិបាលកម្ពុជា តាមរយៈរដ្ឋលេខាធិការដ្ឋានកិច្ចការព្រំដែន និងក្រសួងការបរទេសបានចេញតវ៉ាភ្លាមៗចំពោះការសាងសង់របងព្រំដែនរបស់ថៃដោយបញ្ជាក់ថា ប្រាសាទខ្នារដែលថៃសង់របងព័ទ្ធយកនោះស្ថិតក្នុងទឹកដីកម្ពុជា។ អ្នកជំនាញកិច្ចការអន្តរជាតិខ្លះយល់ថា ថៃកំពុងបន្តប្រើកម្លាំងយោធា និងយុទ្ធសាស្ត្រការទូតមួលបង្គាច់ដើម្បីបង្កើតភាពស្របច្បាប់នៅតំបន់កំពុងមានជម្លោះជាមួយកម្ពុជា។ តែអ្នកខ្លះទៀតហាក់ចង់ស្តីបន្ទោសរដ្ឋាភិបាលកម្ពុជាដែលកំពុងបន្តប្រើប្រាស់យុទ្ធសាស្ត្រការទូតទន់ភ្លន់ជ្រុលជាមួយនឹងភាពគឃ្លើនរបស់ថៃ។ តើកម្ពុជាគួរធ្វើអ្វីបន្ថែមទៀតដើម្បីបញ្ឈប់សកម្មភាពគឃ្លើនរបស់ថៃនៅតំបន់មានជម្លោះ?។

រដ្ឋមន្ត្រីការបរទេសកម្ពុជា លោក ប្រាក់ សុខុន បានចាកចេញពីប្រទេសកម្ពុជាទៅកាន់ប្រទេសបារាំងនាថ្ងៃទី២៩ ខែមិថុនា ឆ្នាំ២០២៦ នេះ។ គោលដៅនៃទស្សនកិច្ចក្នុងប្រទេសបារាំង គឺដើម្បីដឹកនាំសន្និសីទវិសាមញ្ញថ្នាក់រដ្ឋមន្ត្រីហ្វ្រង់កូហ្វូនីលើក​ទី៤៧ នៅថ្ងៃទី៣០ មិថុនា។ ទន្ទឹមគ្នានេះ កិច្ចប្រជុំវិសាមញ្ញក៏នឹងពិភាក្សាផងដែរពីដំណើរការជ្រើសរើសអគ្គលេខាធិការហ្វ្រង់កូហ្វូនីថ្មីសម្រាប់អាណត្តិឆ្នាំ ២០២៧ ដល់ ២០៣០។

នៅយប់ថ្ងៃអាទិត្យឆ្លងចូលថ្ងៃចន្ទទី ២៩ មិថុនា កងទ័ពប៉ាគីស្ថានបានបើកការវាយប្រហារផ្លូវអាកាសទៅលើតំបន់ប៉ែកខាងកើតអាហ្វហ្កានីស្ថាន។ រដ្ឋាភិបាលប៉ាគីស្ថានបានបញ្ជាក់ថា ផ្ទាំងស៊ីបនៃការវាយប្រហាររបស់ខ្លួនគឺក្រុមប្រដាប់អាវុធតាលីបង់ប៉ាគីស្ថាននៅលើទឹកដីអាហ្វហ្កានីស្ថានដោយសម្លាប់បានពួកនេះចំនួន ២៥នាក់។ តែរដ្ឋាភិបាលអាហ្វហ្កានីស្ថានបានលើកឡើងពីការស្លាប់ជនស៊ីវិលចំនួន ៣៦នាក់ និងរបួសចំនួន១៦៣នាក់ផ្សេងទៀត។

មហាក្សត្រថៃ ព្រះចៅមហា វិជ្ជរ៉ាឡុងកនកំពុងបំពេញព្រះរាជទស្សនកិច្ចក្នុងប្រទេស​បារាំងដែលព្រះអង្គបានយាងដល់នាថ្ងៃទី២៨ ខែមិថុនា ឆ្នាំ២០២៦។ វត្តមានដ៏កម្ររបស់ព្រះមហាក្សត្រថៃលើទឹកដីបារាំងត្រូវបានអ្នកជំនាញកម្ពុជាមើលឃើញថា ជាការធ្វើពិពិធកម្មការទូតកម្រិតខ្ពស់រវាងថៃ និងបណ្តាប្រទេសផ្សេងទៀត និងក៏ជាព្រះរាជដំណើរមួយដែលមានជាប់ពាក់ព័ន្ធនឹងជម្លោះព្រំដែនកម្ពុជា ថៃដែរ។

ថ្ងៃអាទិត្យ ទី ២៨ ខែ មិថុនា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានទទួលស្គាល់ជាសាធារណៈថា រុស្ស៊ីកំពុងប្រឈមមុខនឹងស្ថានការណ៍តានតឹងមួយ បន្ទាប់ពីកងទ័ពអ៊ុយក្រែនបានបើកប្រតិបត្តិការ វាយប្រហារចូលជ្រៅក្នុងទឹកដីរុស្ស៊ី អំឡុងពេលថ្មីៗនេះ ។ ពីចំណែកខ្លួន ភាគីអ៊ុយក្រែន បានបង្ហើបឲ្យដឹងអំពីការបើកយុទ្ធនាការ ៤០ ថ្ងៃ សម្រុកវាយប្រហារលើបណ្តាញហេដ្ឋារចនាសម្ព័ន្ធ ក្នុងប្រទេសរុស្ស៊ី ។

ទោះ​ត្រូវប្រឈមខ្យល់ភ្លៀង និងហានិភ័យនៅលើសមុទ្រជាង ១០ឆ្នាំ អ្នកស្រី នង លឹមហ៊ាង នៅតែតស៊ូ​បន្តដំណើរការពារធនធានធម្មជាតិ និងផលប្រយោជន៍អ្នកនេសាទក្នុងសហគមន៍ជ្រោយស្វាយ ខេត្តកោះកុង។ ពីអ្នកផ្តួចផ្តើមបង្កើតសហគមន៍នេសាទដើម្បីទប់ស្កាត់ការបំផ្លាញធនធានជលផល រហូតក្លាយជាប្រធានសហគម  ន៍ឆ្នេរនេសាទជ្រោយស្វាយអាណត្តិទី៥ ឆ្នាំ២០២៤ដល់ឆ្នាំ២០២៩។ អ្នកស្រីបានបង្ហាញថា ស្ត្រីក៏អាចដឹកនាំ និងឈរជួរមុខក្នុងការការពារធនធានធម្មជាតិសហគមន៍បានដែរ៕

នៅទូទាំងពិភពលោក ករណីឃាតកម្មលើសកម្មជនការពារសិទ្ធមនុស្ស នៅតែមានចំនួនច្រើន ក្នុងឆ្នាំ២០២៥។ បើយោងតាមរបាយការណ៍របស់អង្គការការពារសិទ្ធិមនុស្ស Front Line Defenders យ៉ាងហោច មានអ្នកការពារសិទ្ធិមនុស្សជាង ៣៥០នាក់ ត្រូវគេធ្វើឃាត។ នៅក្នុងនោះ១ភាគ៤ ជាអ្នកការពារបរិស្ថាន ដែលបានពលីជីវិត ក្នុងបុព្វហេតុការពារធនធានធម្មជាតិ ហើយចំនួនអ្នកស្លាប់ភាគច្រើន ស្ថិតនៅតំបន់អាមេរិកឡាទីន។

ផលិតផល​គ្រឿងសម្អាងដែលមានផ្ទុកសារធាតុគីមីខុសស្តង់ដារបានក្លាយជាប្រធានបទនៃការជជែកវែកញែកយ៉ាងផុសផុល​លើបណ្តាញទំនាក់ទំនង​សង្គមនាប៉ុន្មានថ្ងៃចុងក្រោយនេះ ក្រោយ​ក្រសួងសុខាភិបាល រកឃើញផលិតផលដែលផ្ទុកសារធាតុគីមីបារត និងសាលីស៊ីលិច លើសកម្រិតចំនួន ៥ប្រភេទ​។ អ្នកជំនាញសុខាភិបាលនានា​កត់សម្គាល់ឃើញ​ថា បច្ចុប្បន្នផលិតផល​គ្រឿងសម្អាង​​​ជាច្រើនដែលប្រើប្រាស់សារធាតុគីមីប៉ះពាល់ដល់សុខភាព កំពុងចរាចរនៅលើទីផ្សារ។ បាតុភាពនេះ​​តម្រូវឱ្យ​មានការរឹតបន្តឹង​​​​ការពិនិត្យគុណភាព​​ ​និងការចែកចាយ​​​​​​ផលិតផលស្របតាម​ស្តង់ដារ​បច្ចេកទេស​។ តើកម្ពុជាគួរធ្វើអ្វីខ្លះ ដើម្បីលុបបំបាត់ការដាក់លក់គ្រឿងសម្អាងដែលគ្មានគុណភាព ឬខុសស្តង់ដារ?

ក្នុង​រយៈ​ពេលជាង​​១០​ថ្ងៃចុង​ក្រោយ​នេះ ​បារាំង​រង​អាកាសធាតុ​ក្តៅ​អាក្រក់ និង​​ខ្លាំង​ហួស​ហេតុ​ ជាង​បណ្តាប្រទេសជិត​ខាង​​ផ្សេងៗនៅ​អឺរ៉ុប​។ គិត​ចាប់​តាំងពី​ថ្ងៃពុធ​ទី​២៤​មិថុនា​មក​ បារាំង​បាន​ស្រង់​ឃើញ​មាន​ករណី​ស្លាប់​​ច្រើន​លើស​ធម្មតា ប្រមាណ​ជាង​១ពាន់​នាក់​។ នេះ​បើ​តាមតួលេខ​បឋម​ផ្តល់​ដោយ​ទី​ភ្នាក់ងារ​សុខភាព​សាធារណៈ​បារាំង នៅ​ថ្ងៃ​អាទិត្យ​ទី​២៨​មិថុនា​២០២៦។

ការវាយប្រហារសងសឹកគ្នា រវាងអាមេរិកនិងអ៊ីរ៉ង់ បានផ្ទុះឡើងសាជាថ្មី។ ភាគីទាំងពីរបានចោទដាក់គ្នាទៅវិញទៅមក ថាបានរំលោភកិច្ចព្រមព្រៀងបឋមបិទបញ្ចប់សង្រ្គាម ដែលបានចុះហត្ថលេខា កាលពីថ្ងៃពុធ ទី១៧ មិថុនា។ អាមេរិកថាអ៊ីរ៉ង់ជាអ្នកបាញ់នាវាដឹកប្រេងមួយគ្រឿង ដែលបើកឆ្លងកាត់ច្រកសមុទ្រអកមូហ្ស ទើបអាមេរិកសម្រេចវាយប្រហារ ទៅលើទីតាំងយោធារបស់អ៊ីរ៉ង់ នៅថ្ងៃសៅរ៍ ទី២៧ មិថុនា។ រីឯ នៅថ្ងៃអាទិត្យ ទី២៨ មិថុនា អ៊ីរ៉ង់បានវាយបកវិញ ដោយបានបាញ់ប្លោង សំដៅលើមូលដ្ឋានទ័ពអាមេរិកជាច្រើនកន្លែង នៅកូវែត និងនៅបារ៉ែន។

ថ្ងៃទី២៨ ខែមិថុនា ឆ្នាំ​២០២៦ គឺជាខួប៧៥​ឆ្នាំ​នៃថ្ងៃ​បង្កើតគណបក្សប្រជាជនកម្ពុជាដែលជាគណបក្សកំពុងកាន់អំណាចនៅកម្ពុជា។ គណបក្សកាន់អំណាចចាស់វស្សាមួយនេះបានទទួលស្គាល់ថា មានតែការរួបរួមគ្នា ខិតខំធ្វើ​ឲ្យ​កម្ពុជាមានកម្លាំង​ខ្លាំង ទាំងសេដ្ឋកិច្ច យោធា និងនយោបាយប៉ុណ្ណោះ ទើបអាចការពារ​បូរណភាពទឹកដី និងអត្តសញ្ញាណជាតិខ្មែរបាន។ ការ​លើកឡើង​របស់បក្សកាន់អំណាចគឺស្របពេល​ដែល​យោធាថៃនៅបន្តសកម្មភាពឈ្លានពានទឹកដីកម្ពុជា ចាប់តាំងពីមានបទឈប់​បាញ់​ចុង​ឆ្នាំ​២០២៥។

នៅថ្ងៃទី​២៧មិថុនាម្សិលមិញនេះ លោកនាយករដ្ឋមន្ត្រី ហ៊ុន ម៉ាណែត​​ បានប្រាប់ទៅក្រសួងស្ថាប័នពាក់ព័ន្ធឱ្យរួមគ្នាគិតគូ​រឡើងវិញពីការបង្កើត​ស្ថាប័នរួមដើម្បី​ទទួលខុសត្រូវលើការងារពិនិត្យគុណភាពចំណីអាហារ។ ​លោក ហ៊ុន ម៉ាណែត ​ជឿជាក់ថា ​ស្ថាប័នរួមថ្មី​នេះនឹងអាចជួយ​កាត់បន្ថយភាពស្មុគ្រស្មាញ​ក្នុងកិច្ចការងាររបស់មន្ត្រី និងថែមទាំងអាចបង្កើន​ទំនុកចិត្ត​ពលរដ្ឋ​លើ​សុវត្ថិភាពចំណីអាហា​រ​នៅ​កម្ពុជា​។

ជា​ថ្មីម្តង​ទៀត​ កម្ពុជា ​តាម​រយៈក្រសួង​ការ​បរទេស ​បាន​ប្រកាស​មិន​ទទួល​ស្គាល់​ដាច់ខាត ចំពោះ​ខ្សែ​បន្ទាត់​ព្រំ​ដែន​ ដែល​ថៃ​ទាមទារជា​​ឯក​តោ​ភាគី។​ នេះបើ​តាមសេចក្តីប្រកាស​របស់ក្រសួង​ការ​បរទេសចេញផ្សាយ​នៅ​ថ្ងៃ​ទី២៧​ ខែមិថុនា​ ឆ្នាំ២០២៦​។​ តាម​ក្រសួង​ការ​បរទេស​កម្ពុជា​ តាំង​ពីដើម​ខែមិថុនា​ ឆ្នាំ​២០២៦​មក​ ថៃ​បាន​​រំគិល​ព្រំ​ដែនចូល​ទឹក​ដីកម្ពុជា​ នៅ​ស្រុក​បន្ទាយ​អំពិល​ ខេត្ត​ឧត្តរ​មាន​ជ័យ​។  

យោធាថៃបានអះអាងថា របងព្រំដែនកម្ពុជា-ថៃក្នុងភូមិសាស្ត្រខេត្តចាន់ថាបុរី ជាប់ខេត្តបាត់ដំបងរបស់កម្ពុជា បានសាងសង់រួចរាល់ចំនួន ៤៥% ក្នុងដំណាក់ទី១ ​ប្រវែងសរុប ១.៣គីឡូម៉ែត្រ។ នេះបើតាមអត្ថបទចុះផ្សាយដោយសារព័ត៌មានថៃ Khoasod English នៅថ្ងៃទី២៧ ខែមិថុនា ឆ្នាំ២០២៦។ ការសាងសង់របងព្រំដែនពីសំណាក់ភាគីថៃយ៉ាងដូច្នេះ ត្រូវបានយោធាថៃបញ្ជាក់ថា មិនមែនធ្វើឡើងដោយឯកតោភាគីឡើយ ពោលគឺថៃបានអញ្ចើញតំណាងភាគីកម្ពុជាចូលមកសង្កេតមើលដំណាក់កាលទាំងអស់នៃការសាងសង់របង ដើម្បីធានាបាននូវតម្លាភាព និងអនុលោមតាមច្បាប់អន្តរជាតិ។

រដ្ឋាភិបាលអូស្ត្រាលីបានចេញសេចក្តីប្រកាសបង្កើនការផាកពិន័យ ក្នុងទំហំទឹកប្រាក់ដ៏ច្រើនមហាសាល រហូតដល់១០០លានដុល្លារអូស្ត្រាលី ចំពោះក្រុមហ៊ុនណា ដែលហ៊ានល្មើសនឹងច្បាប់ហាមក្មេងក្រោមអាយុ១៦ឆ្នាំ ប្រើបណ្តាញសង្គម។ អូស្ត្រាលីក៏បានដាក់កំហិតឲ្យក្រុមហ៊ុនបណ្តាញសង្គមទាំងអស់ ត្រួតពិនិត្យនិងផ្ទៀងផ្ទាត់អាយុពិតរបស់ម្ចាស់គណនី ដើម្បីទប់ស្កាត់ការក្លែងបន្លំ។

ចំនួន​ជន​រងគ្រោះបាត់​បង់​ជីវិត​ នៅវ៉េណេស៊ុយអេឡា បាន​កើន​ឡើង​ជា​លំដាប់។ ភាព​អស់​​សង្ឃឹម​កាន់​តែ​រីក​ធំ​ នៅ​ចំពោះ​មុខ​សមត្ថភាព​សង្គ្រោះ​ដ៏​មានកំរិត​របស់​អាជ្ញាធរ។ បើ​តាម​តុល្យការ​បណ្តោះ​អាសន្ន ​គិត​ត្រឹម​ព្រឹក​ថ្ងៃ​សៅរ៍​ទី​២៧​មិថុនា ​ គ្រោះ​រញ្ជួយ​ដី​មរណៈនៅ​វ៉េណេស៊ុយអេឡា​ បាន​ផ្តាច់​ជីវិត​​មនុស្ស​អស់​​យ៉ាង​ហោច​៩២០នាក់ និង​ជាង​៥​ម៉ឺន​នាក់​បាត់​ខ្លួន។ ប្រជាជន​ប្រមាណ៨​លាន​នាក់​​អាច​នឹង​រង​ផល​ប៉ះពាល់​​ពី​គ្រោះ​រញ្ជួយ​ដី​នេះ។ នៅ​ចំពោះ​មុខ​មហន្តរាយ​ដ៏​ធំធេង សហគមន៍​អន្តរជាតិទាំង​មូល​បាន​ប្រមូលផ្តុំ​កម្លាំង​​និងជំនួយ​​សម្រាប់​​វ៉េណេស៊ុយអេឡា ដោយ​គ្មាន​បង្អង់។

លោកនាយករដ្ឋមន្ត្រី ហ៊ុន ម៉ាណែត បាន​បញ្ជាឲ្យក្រសួងស្ថាប័នពាក់ព័ន្ធឆ្លើយតបជាមួយបាតុភូតធម្មជាតិ អែល នីញ៉ូ (El Niño) ដែលប្រទេសកម្ពុជាកំពុងទទួលរងឥទ្ធិពល។​ មន្ត្រីជាន់ខ្ពស់កសិកម្មកម្ពុជា បានបញ្ជាក់ឲ្យដឹងនៅថ្ងៃសៅរ៍ទី២៧មិថុនានេះថា ក្រសួងកសិកម្មបាន និងកំពុងសហការជាមួយក្រសួងស្ថាប័នពាក់ព័ន្ធក្នុងការត្រៀមវិធានការអន្តរាគមន៍ទុកជាមុន ដើម្បីឆ្លើយតបនឹងគ្រោះរាំងស្ងួតដែលអាចកើតមានឡើង។

ជា​លើក​ទីមួយ​ គិត​ចាប់​តាំងពី​ថ្ងៃ​ចុះ​ហ​ត្ថលេខា​លើ​ពិធីសារ​កិច្ចព្រមព្រៀងបឋម​រវាង​អាមេរិក​និង​អ៊ីរ៉ង់ នៅ​​ថ្ងៃ​ទី​១៧​មិថុនា​មក ដែល​មាន​ករណី​រំលោភ​បទ​ឈប់​បាញ់​យ៉ាង​ដូច្នេះ។ ដោយ​បរិហារការ​វាយប្រហារ​អាមេរិក​លើ​ទីតាំងស្តុក​មីស៊ីល​និង​ដ្រូន​អ៊ីរ៉ង់ ​​ថា​ជា​ការ​រំលោភ​បទ​ឈប់​បាញ់ -នៅ​ថ្ងៃ​សៅរ៍​ទី​២៧​មិថុនា​នេះ អ៊ីរ៉ង់​បាន​បាញ់​ប្លោងដៅ​​តប​តវិញ​​ លើផលប្រយោជន៍​អាមេរិក ​នៅ​តំបន់​ឈូង​សមុទ្ទពែក្យ។ ប៉ុន្តែ​នៅ​ម្ខាង​ទៀត សហរដ្ឋ​អាមេរិក​បាន​ប្រកាស​ចុះ​កិច្ចព្រមព្រៀង​គោល​ ដើម្បី​ឈាន​ឆ្ពោះ​ទៅ​រក​សន្តិភាព និង​សុវត្ថិភាព​ ​ជា​និរន្តរ៍​រវាង ​លីបង់​និងអ៊ីស្រាអែល ដែល​ជាប្រទេស​មាន​សង្គ្រាម​នឹង​គ្នា​​។

នៅថ្ងៃទី២៦​មិថុនា ​ប្រធានាធីបតីចិន ​លោក ស៊ី ជីនពីង ​បានប្រាប់​លោក ហ៊ុន សែន ប្រធានព្រឹទ្ធសភា​កម្ពុជាថា ចិនចង់ឃើញប្រទេសកម្ពុជាឈរលើគោលការណ៍អហិង្សា ក្នុងការដោះស្រាយជម្លោះព្រំដែនជាមួយថៃ។ នេះបើតាមការបញ្ជាក់របស់​លោក ជា ធីរិទ្ធ អ្នកនាំពាក្យលោក ហ៊ុន សែន​នៅថ្ងៃទី២៧មិថុនានេះ​។ គួរជ្រាបថា ថៃ​នៅតែ​រក្សាកងកម្លាំងយោធាខ្លួនឲ្យត្រួតត្រាទឹកដីកម្ពុជាដោយខុសច្បាប់ជាច្រើនទីតាំង គិតចាប់តាំងពីការប្រកាសបទឈប់បាញ់ថ្ងៃទី២៧ ខែ​ធ្នូ ឆ្នាំ២០២៥។

ប្រឈមនឹងការគំរាមកំហែងកាន់តែខ្លាំងឡើងៗរបស់កូរ៉េខាងជើង កូរ៉េខាងត្បូងបានបង្ហាញពីមហិច្ឆតា ផលិតដ្រូនក្នុងស្រុក រហូតដល់ជាង ១០ម៉ឺនគ្រឿង ពីពេលនេះ ដល់ឆ្នាំ២០២៩។ កូរ៉េខាងត្បូងក៏គ្រោងទិញដ្រូនយោធាប្រមាណជាង ២ម៉ឺនគ្រឿង នៅឆ្នាំ២០២៦ និងបង្វឹកអ្នកបញ្ជាដ្រូន ៥០ម៉ឺននាក់។ នេះបើតាមការអះអាងរបស់ក្រសួងការពារជាតិកូរ៉េខាងត្បូង នៅថ្ងៃសុក្រ ទី២៦ មិថុនា។ ក្រុងសេអ៊ូលក៏ត្រៀមដាក់ពង្រាយប្រព័ន្ធការពារដែនអាកាស រាប់ពាន់គ្រឿង ដើម្បីស្ទាក់ចាប់ដ្រូនសត្រូវ នៅតាមព្រំដែនកូរ៉េទាំងពីរ។

នៅថ្ងៃទី២៦ ខែមិថុនា ក្រសួងសុខាភិបាលបានចេញសេចក្តីជូនដំណឹងដោយប្រកាសរកឃើញផលិតផលគ្រឿងសម្អាងចំនួន ៥មុខដែល​កំពុងចរចាលក់នៅលើទីផ្សារមានផ្ទុកសារធាតុគីមីបារត និងសារធាតុគីមី អាស៊ីត សាលីស៊ីលិច លើសកម្រិតស្តង់ដារកំណត់។ បើតាមសេចក្តីជូនដំណឹងរបស់ក្រសួងសុខាភិបាល ផលិតផលគ្រឿងសម្អាងទាំង ៥មុខនោះ ពុំមានលេខប្រវេទន៍ទទួលស្គាល់ជាផ្លូវការពីក្រសួងសុខាភិបាលឡើយ។

នៅថ្ងៃសុក្រទី ២៦ មិថុនា ឧត្តមស្នងការអង្គការសហប្រជាតិទទួលបន្ទុកសិទ្ធិមនុស្ស លោក វ៉ុលក័រ តួកបានអំពាវនាវឲ្យអាជ្ញាធរអាមេរិកបើកការស៊ើបអង្កេតដោយឯករាជ្យលើករណីស្លាប់មនុស្សដែលជាប់ក្នុងមន្ទីរឃុំឃាំងរបស់ប៉ូលិសអន្តោប្រវេសន៍អាមេរិក ICE។ ចំនួនអ្នកស្លាប់បានកើនឡើងគួរឲ្យព្រួយបារម្ភ ខណៈអ្នកជាប់ឃុំជាច្រើនកំពុងប្រឈមនឹងស្ថានភាពរស់នៅ និងការថែទាំមិនសមរម្យ។ ក្នុងន័យនេះ អង្គការសហប្រជាជាតិជំរុញឲ្យសហរដ្ឋអាមេរិកពង្រឹងការត្រួតពិនិត្យមណ្ឌលឃុំឃាំង និងប្រើការឃុំខ្លួនតែក្នុងករណីចាំបាច់។ 

លោករ៉ាហ្វាអ៊ែល ហ្ក្រូស៊ី អគ្គនាយកទីភ្នាក់ងារថាមពលបរមាណូអន្តរជាតិ បាន​លើកឡើងថាកិច្ចព្រមព្រៀងបឋម ដែល​សហរដ្ឋអាមេរិក​បានចុះហត្ថលេខាជាមួយអ៊ីរ៉ង់​ កាលពីសប្តាហ៍​កន្លងទៅ បាន ប្រគល់តួនាទីត្រួតពិនិត្យ​នុយក្លេអ៊ែរអ៊ីរ៉ង់ មក​ឲ្យ​ស្ថាប័នរបស់លោក។ លោក​អគ្គនាយក AIEA បានគូសបញ្ជាក់ថា ដូច្នេះដើម្បី​ឲ្យ​ច្បាស់ថាអ៊ីរ៉ង់​នឹងគ្មានអាវុធនុយក្លេអ៊ែរ គឺត្រូវតែមាន​យន្តការតាមដានត្រួតពិនិត្យ​ឲ្យ​បាន​ហ្មត់ចត់បំផុត​។​

ប្រធានព្រឹទ្ធសភា និងជាប្រធានគណបក្សប្រជាជនកម្ពុជា លោក ហ៊ុន សែន បានស្នើឲ្យក្រុមហ៊ុនចិនយកចិត្តទុកដាក់លើគម្រោងនានាដែលកំពុងអនុវត្តដោយក្រុមហ៊ុនចិននៅក្នុងប្រទេសកម្ពុជា។ សំណើរបស់លោក ហ៊ុន សែនដូចនេះធ្វើឡើងនៅក្នុងដំណើរទស្សនកិច្ចរបស់លោកក្នុងប្រទេសចិនពីថ្ងៃទី២៥ ដល់ ២៧ ខែមិថុនា ឆ្នាំ២០២៦។ លោក ហ៊ុន សែនបានជួបជាមួយប្រធានក្រុមហ៊ុន CCCC ដែលទទួលការសាងសង់ហេដ្ឋារចនាសម្ព័ន្ធនៅកម្ពុជា មានដូចជាព្រែកជីកហ្វូណន និងផ្លូវល្បឿនលឿនជាដើម។

  នៅក្នុងជំនួបជាមួយប្រធានាធិបតីចិន លោក ស៊ី ជីនពីង នាថ្ងៃទី២៦ ខែមិថុនា ឆ្នាំ២០២៦ នៅទីក្រុងប៉េកាំង លោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាបានបញ្ជាក់ថា មិត្តភាពរវាងកម្ពុជា និងចិនមិនប្រែប្រួលឡើយ ទោះជាស្ថានភាពពិភពលោកប្រែប្រួលយ៉ាងណាក៏ដោយ។ នេះបើតាមការឲ្យដឹងបឋមពីលោក ជា ធីរិទ្ធ អ្នកនាំពាក្យលោក ហ៊ុន សែន។ ការបញ្ជាក់របស់លោក ហ៊ុន សែន ដូចនេះជាការឆ្លើយតបទៅនឹងការលើកឡើងរបស់លោក ស៊ី ជីនពីង ដែលចាត់ទុក លោក ហ៊ុន សែន ជាស្ថាបនិកដ៏សំខាន់មួយរូប ដែលរួមចំណែកកសាងទំនាក់ទំនងមិត្តភាពកម្ពុជា-ចិន ឲ្យរឹងមាំមកដល់បច្ចុប្បន្ន។បើតាមលោក ជា ធីរិទ្ធ លោក ហ៊ុន សែន ក៏បានថ្លែងបញ្ជាក់នៅចំពោះមុខ លោក ស៊ី ជីនពីង ដែរថា ចិនជាមិត្តចាស់ និងជាមិត្តពិតប្រាកដដែលជាទីទុកចិត្តរបស់កម្ពុជា។ ក្រៅពីការបញ្ជាក់ពីជំហរគ្នាទៅវិញ ទៅមក ជំនួបរវាងលោក ហ៊ុន សែន និងលោក ស៊ី ជីនពីង ក៏បានលើកឡើងនូវចំណុចសំខាន់ៗជាច្រើនទៀត ដូចជាការពង្រីកកិច្ចសហប្រតិបត្តិការរវាងប្រទេសទាំងពីរក្នុងវិស័យសេដ្ឋកិច្ច សន្តិសុខ ការគាំទ្ររបស់ចិនក្នុងការអភិវឌ្ឍហេដ្ឋារចនាសម្ព័ន្ធក្នុងប្រទេសកម្ពុជា ការពិភាក្សា និងការគាំទ្រគ្នាលើបញ្ហាតំបន់ និងអន្តរជាតិ រួមទាំងជជែកគ្នានៅក្នុងក្របខណ្ឌរវាងគណបក្សប្រជាជនកម្ពុជា និងគណបក្សកុម្មុយនិស្តចិន៕

សកម្មភាពរបស់កងទ័ពចិន កាន់តែខ្លាំងឡើង​​ នៅក្នុងតំបន់ប៉ាស៊ីហ្វិកខាងត្បូង កំពុងតែធ្វើ​ឲ្យ​ប្រទេស​ក្នុង​តំបន់នេះព្រួយបារម្ភ​។ ​ឯកសារ​ផ្ទៃក្នុងមួយ​​របស់នូវែសសេឡង់ បានទាញសញ្ញាអាសន្ន ស្តីពីសកម្មភាពលុកលុយដោយមិនគោរព កាន់តែញឹកញាប់ របស់កងទ័ពជើងទឹកចិន នៅក្នុងតំបន់​ដែលជាដែនយុទ្ធសាស្ត្ររបស់នូវែសេឡង់​។ ក្រៅពីវត្តមាននាវាចម្បាំងចិនច្រើនគ្រឿង នូវែលសេឡង់ព្រួយបារម្ភអំពីការបាញ់សាកល្បងមីស៊ីល​បាលីស្ទីក​របស់​ចិន​ផងដែរ​។​

ការិយាល័យប្រឆាំងឧក្រិដ្ឋកម្ម និងគ្រឿងញៀនរបស់អង្គការសហប្រជាជាតិហៅកាត់ជាភាសាអង់គ្លេស UNODC បានព្រមានពីការជួញដូរគ្រឿងញៀនសំយោគប្រភេទថ្មីដែលកំពុងកើនឡើងគួរឲ្យព្រួយបារម្ភនៅទូទាំងពិភពលោក។ របាយការណ៍ថ្មីរបស់ UNODC ចេញផ្សាយថ្ងៃសុក្រ ទី ២៦ មិថុនាបញ្ជាក់ថា គ្រឿងញៀនសំយោគថ្មីច្រើនប្រភេទមានឥទ្ធិពលខ្លាំង និងគ្រោះថ្នាក់ជាងមុន។ នាយិកា UNODC លោកស្រី Monica Juma បានអំពាវនាវឲ្យពិភពលោកយកចិត្តទុកលើបញ្ហាដ៏គួរឲ្យព្រួយបារម្ភនេះ ព្រោះវាអាចបង្កផលប៉ះពាល់ធ្ងន់ធ្ងរដល់សុខភាពសាធារណៈ។

ក្រោយពីសង្រ្គាម និងការរង់ចាំនៅលើសមុទ្រអស់រយៈពេលជាច្រើនខែមក ការជម្លៀសនាវាដែលជាប់គាំងនៅច្រកសមុទ្រអកមូហ្ស បានចាប់ផ្តើមប្រតិបត្តិការនៅថ្ងៃពុធ ទី ២៤ មិថុនា ដោយមាននាវិកជាង ១១ ០០០នាក់។ ឥណ្ឌាជាប្រទេសមាននាវិកធ្វើការច្រើនជាងគេនៅក្នុងតំបន់។ បច្ចុប្បន្ន មាននាវិកឥណ្ឌាចំនួន ១៥ ០០០នាក់កំពុងជាប់កុននៅលើកប៉ាល់ដែលកំពុងជាប់គាំងនៅច្រកសមុទ្រអកមូហ្ស។ រដ្ឋាភិបាលទីក្រុងញូដែលីកំពុងតាមដានប្រតិបត្តិការជម្លៀសកប៉ាល់ពេលនេះយ៉ាងយកចិត្តទុកដាក់ជាទីបំផុត។