នាពេលថ្មីៗនេះ មានករណីក្មេងទំនើងមួយក្រុមបានព្រួតគ្នាវាយយុវជន ២នាក់ នៅក្នុងបរិវេណមន្ទីរពេទ្យបង្អែកសិរីសោភ័ណ្ឌ ខេត្តបន្ទាយមានជ័យ។ មន្ត្រីអ្នកនាំពាក្យក្រសួងសុខាភិបាលបានបញ្ជាក់នៅថ្ងៃទី២៧កក្កដានេះថា ក្រសួង​សុខាភិបាល​​កំពុងធ្វើការជាមួយអា​ជ្ញាធរខេត្តបន្ទាយ​​មានជ័យដើម្បីស្វែងរកក្រុមក្មេងទំនើង​​​​ដែលបង្កអំពើ​ហិង្សាទាំងនោះ។ មន្ត្រីសង្គមស៊ីវិលបានស្នើឲ្យអាជ្ញាធរមានសមត្ថកិច្ចចាត់ការសំណុំរឿងនេះឲ្យបានហ្មត់ចត់ ព្រោះបាតុភាពហិង្សានេះឆ្លុះបញ្ចាំងឲ្យឃើញទិដ្ឋភាពអសន្តិសុខនៅកន្លែងព្យាបាលអ្នកជំងឺ។

យោងតាមរបាយការណ៍​​ ក្នុងរយៈពេល ១ឆ្នាំនេះ ​អាជ្ញាធរកម្ពុជាបានបញ្ជូនសំណុំរឿង​ពាក់ព័ន្ធនឹងការឆបោក​អនឡាញ​ចំនួន ២៦៨ករណីទៅកាន់តុលាការ ពាក់ព័ន្ធនឹង​​​ជនសង្ស័យជិត ៣០០០នាក់។ ក្នុងប្រតិបត្តិការ​​បោសសម្អាតបទល្មើសអនឡាញនេះ​​​ លោកនាយករដ្ឋមន្ត្រី ហ៊ុន ម៉ាណែត ថ្មីៗនេះ​បានអះអាងថា ​​​រដ្ឋាភិបាលកម្ពុជា​​ក៏​បានចាត់ការ​​មន្ត្រីមួយចំនួនដែល​ជាប់ពាក់ព័ន្ធជាមួយបណ្តាញ​ឧក្រិដ្ឋជនផងដែរ។ 

សកម្ម​ជន និង​ជា​អ្នក​ការពារ​បរិស្ថាន ​លោក​ ម៉ា ​ចិត្រា ទទូច​​ឱ្យក្រសួង​បរិស្ថាន​មានចំណាត់​ការ​លើ​បទល្មើស​ព្រៃឈើក្នុង​ដែន​ជម្រក​សត្វ​ព្រៃ​ព្រៃ​ឡង់។ ជាការ​ទទូច​ជាថ្មីម្តងទៀត ​ក្រោ​យ​លោក ម៉ា ​ចិត្រា ​រក​ឃើញ​ជន​សង្ស័យ​មួយ​ក្រុមដែលគ្រោង​ដឹក​ឈើប្រភេទក្តារឈើទាលរាប់សិប​បន្ទះ​ ចេញពី​ដែន​ជម្រក​ធម្មជាតិ​កាល​ពី​យប់ថ្ងៃអាទិត្យទី២៦​ ខែកក្កដា​ ឆ្នាំ​២០២៦។ ក្រសួងបរិស្ថាន​បាន​ចេញមុ​ខ​សន្យាចាត់ការ​តាមនីតិវិធី​​ច្បាប់លើ​ជន​សង្ស័យ​។ 

ប្រឈមនឹង​​បញ្ហាខ្វះទាហានប្រយុទ្ធ​នៅសមរភូមិអ៊ុយក្រែន រុស្ស៊ីកំពុងស្វះស្វែងរកកម្លាំង​មកពីបរទេស​ តាមរយៈការព្រមព្រៀងផ្លូវការផង និង​តាមរយៈការឆបោក​ផង​។ លោក​ហ្សេឡេនស្គី បានអះអាងនៅក្នុងសារវីដេអូ​ថ្ងៃទី​អាទិត្យ​ទី​២៦​កក្កដា អះអាងថារុស្ស៊ី​ បានស្នើសុំទៅកាន់កូរ៉េខាងជើង សុំទាហាន​៣ម៉ឺននាក់​បន្ថែមទៀត​ ព្រមទាំង​ប្រព័ន្ធបាញ់មីស៊ីល​​បាលីស្ទីកថែមទៀត​​។

នៅ​ថ្ងៃ​សៅរ៍​ទី​២៥​កក្កដា​​២០២៦ យុវជន​ឥណ្ឌា​បាន​អប​អរ​ជោគជ័យ​​ ក្រោយ​ពី​​រដ្ឋាភិបាល​សុខ​ចិត្ត​​ធ្វើ​តាម​សំណើ​របស់​បាតុករ។ ប៉ុន្តែ​បាតុករ​បាន​ព្រមាន​ថា​ការ​តស៊ូ​ដើម្បី​មាន​កំណែទម្រង់​ប្រព័ន្ធ​អប់រំ និង​តម្លាភាព​ ទើប​តែ​ចាប់ផ្តើម​ប៉ុណ្ណោះ ព្រោះឥណ្ឌា​មាន​ថវិកាជាតិ​​សម្រាប់​វិស័យ​សិក្សាធិការ​តែ​ប្រមាណ​៤%​នៃ​ផលិតផល​ដុល​សរុប​ ហើយ​សាលា​រដ្ឋ​មាន​សេវា​អន់​មិន​គួរ​ឱ្យ​ទុក​ចិត្ត​។ ឯ​ចំនួន​និស្សិត​ធ្វើ​អត្តឃាត​ដោយ​មូល​ហេតុ​ពាក់ព័ន្ធនឹង​ការ​សិក្សា​មាន​កំណើន​ដល់​ទៅ​៦៥%​នៅ​ចន្លោះ​ពី​ឆ្នាំ​២០០៥​ដល់​២០២៥។

នាពេលថ្មីៗនេះ តំណាងពាណិជ្ជកម្មសហរដ្ឋអាមេរិក(USTR) បានប្រកាសពីការដាក់ពន្ធគយថ្មីលើកម្ពុជាក្នុងអត្រាត្រឹម ១០%។ បើធៀបនឹងប្រទេសជិតខាង ដូចជាថៃ និងវៀតណាម កម្ពុជាទទួលបានអត្រាពន្ធគយទាបជាងគេ។ ទោះយ៉ាងណា អ្នកជំនាញនានាក្នុងវិស័យសេដ្ឋកិច្ច បានលើកឡើងពីបញ្ហានៃការប្រកួតប្រជែង និងបញ្ហាប្រឈមជាពិសេសក្នុងវិស័យកាត់ដេរ។ តាមអ្នកជំនាញ អត្រាពន្ធ ១០% របស់អាមេរិក អាចជះឥទ្ធិពលដល់ទំហំពាណិជ្ជកម្មរវាងកម្ពុជា និងអាមេរិក ក្នុងពេលខាងមុខ។ តើអត្រាពន្ធថ្មី១០% របស់អាមេរិកមកលើកម្ពុជា ជាការសាទរ ឬជាការប្រឈម?

ចាប់ពីខែមករា ដល់ខែមិថុនា ឆ្នាំ២០២៦ មជ្ឈមណ្ឌលសកម្មភាពកម្ចាត់មីនកម្ពុជា(CMAC) បានរុករកឃើញ និងកម្ទេចចោលគ្រាប់យុទ្ធភណ្ឌគ្រប់ប្រភេទចំនួនជាង ៨ ៤០០​គ្រាប់​ នៅក្នុងខេត្តចំនួន៧​។ នេះបើយោងតាមរបាយការណ៍ដែល ត្រូវបានផ្សព្វផ្សាយនៅលើបណ្តាញសង្គម កាលពីថ្ងៃទី២៥ ខែកក្កដា ឆ្នាំ២០២៦ ដោយអគ្គនាយក CMAC។

វត្តគិរីរង្ស៊ីថ្មដូន ស្ថិតក្នុងភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ ដែលមានចម្ងាយជិត១គីឡូពីព្រំដែនថៃ បានរងការបំផ្លិចបំផ្លាញស្ទើរតែទាំងស្រុងពីគ្រាប់ផ្លោងរបស់យោធាថៃ អំឡុងពេលផ្ទុះសង្គ្រាមព្រំដែនលើកទី២កាលពីខែធ្នូ ឆ្នាំ២០២៥។ រយៈពេល១ឆ្នាំកន្លងទៅ ព្រះវិហារ សាលាឆាន់ កុដិ និងសាលារៀន បានក្លាយជាសំណង់បាក់បែក ដែលមានកម្ទេចកម្ទីរាយប៉ាយ។ ទាំងអស់នេះជាភស្តុតាងជាក់ស្តែង ដែលបង្កឡើងដោយយោធាថៃ នៅក្នុងជម្លោះព្រំដែនកម្ពុជា-ថៃ។ អាជ្ញាធរស្រុកបន្ទាយអំពិលបញ្ជាក់ថា មានផ្ទះសម្បែងសរុបចំនួន ៨២៣ខ្នង បានរងការខូតខាត តែអាជ្ញាធរក៏បានជួយជួសជុសផ្ទះឲ្យពលរដ្ឋវិញបានចំនួន ១១៤ខ្នងដែរ។ ក្រៅពីនេះ អាជ្ញាធរអះអាងថា នឹងរៀបចំស្តារហេដ្ឋារចនាសម្ព័ន្ធស៊ីវិលឡើងវិញ នៅពេលមានសន្តិភាពជាថ្មីនៅតាមខ្សែបន្ទាត់ព្រំដែន។ ពីវត្តថ្មដូន

ស្របពេលដែល​នៅតាមប្រទេសអឺរ៉ុប កំពុងរងគ្រោះដោយ​​ភ្លើងឆេះព្រៃមហាកំណាច នៅភាគអាគ្នេយ៍​ប្រទេសចិនឯនេះវិញ កំពុងរងគ្រោះដោយ​ខ្យល់ព្យុះទីហ្វុង។ ជាមួយនឹងកម្លាំងខ្យល់បក់ ប្រមាណ​១៦០គីឡូម៉ែត្រ ក្នុងមួយម៉ោង ព្យុះទីហ្វុងឈ្មោះ នូល (Noul) បានបោក​បក់ជាមួយ​ទឹកភ្លៀងយ៉ាងគំហុក នៅខេត្តក្វាងទុង​នៅនៅហុងកុងជាដើម។ យ៉ាងហោចណាស់ មនុស្សចំនួន៧សែន​​នាក់ នៅក្វាងទុង​ ត្រូវភៀសខ្លួនទៅរកកន្លែងមានសុវត្ថិភាព។

តំបន់​ភាគនិរតី​នៃ​ប្រទេស​បារាំង កំពុង​រងគ្រោះ​​ភ្លើង​ឆេះព្រៃ ​ដ៏​សន្ធោសន្ធៅ​ និង​ដ៏​កំណាច​​មិន​ធ្លាប់​មាន​។ ព្រៃ​ស្ងួត អាកាសធាតុ​ក្តៅ បាន​សម្រួល​ឱ្យ​ភ្លើង​ឆាប​ឆេះ​កាន់​លឿន ក្លាយ​ជា​ព្យុះ​ភ្លើង​ បញ្ចេញផ្សែងវិល​គួច​លើ​ផ្ទៃ​មេឃ​ ​និង​បង្កើន​ភាព​កំណាចឱ្យ​អណ្តាត​ភ្លើង​លេប​ត្របាក់​ព្រៃ​។ ​ក្នុង​រយៈ​ពេល​តែ​បីថ្ងៃ​​ និង​គិត​ត្រឹម​ព្រឹក​ថ្ងៃ​អាទិត្យ​ទី​២៦​កក្កដា​វេលា​ម៉ោង​​៤​ព្រឹក​ម៉ោង​នៅ​ក្នុង​ស្រុក ព្រៃ​ជាង​៤ម៉ឺន​ពី​រពាន់​ហិចតា​​បានក្លាយ​ជា​ផេះ និងមនុស្ស​​សរុប​ជាងពីរ​សែន​ពី​រ​ម៉ឺន​នាក់​ត្រូវ​ជម្លៀស​ចេញ​​​ទៅ​រក​កន្លែង​មាន​សុវត្ថិភាព។

ស្នងការនគរបាលខេត្តសៀមរាប នៅថ្ងៃទី២៥ ខែកក្កដា ឆ្នាំ២០២៦នេះ បានព្រមានដាក់វិន័យចំពោះមន្ត្រីនគរបាលណា ដែលបន្តយកអត្តសញ្ញាណបណ្ណនគរបាលជាតិទៅដាក់ជាវត្ថុបញ្ចាំ ឬក្នុងរូបភាពផ្សេងដែលបម្រើផលប្រយោជន៍ផ្ទាល់ខ្លួន។ ការព្រមានរបស់ស្នងការខេត្តសៀមរាប ធ្វើឡើងក្រោយមានមន្ត្រីនគរបាល ៤រូប នៃស្នងការដ្ឋានខេត្តសៀមរាប ត្រូវបានស្ត្រីម្នាក់បង្ហោះរូបភាពភ្ជាប់ជាមួយកាតសម្គាល់ឈ្មោះនគរបាលជាតិ បន្ទាប់ពីពួកគេ គេចវេសមិនព្រមសងបំណុល។

ជា​របត់​ថ្មី​របស់​តុលាការព្រហ្មទណ្ឌ​អន្តរជាតិ។ ក្រុម​ប្រទេស​ជា​សមាជិក​តុលាការ​ព្រហ្មទណ្ឌ​អន្តរជាតិ បាន​បោះឆ្នោត​ ដក​អគ្គ​រដ្ឋ​អាជ្ញា ឈ្មោះ​ ការីម ខាន់ (Karim Khan)ចេញពី​តួនាទី ជាស្ថាពរ​ ក្រោយ​មាន​រឿង​អាស្រូវ​ជាប់​ចោទ​ពី​បទបំពារបំពាន​ផ្លូវ​ភេទ​ លើ​បុគ្គលិក​ក្រោម​បង្គាប់។​ សេចក្តី​សម្រេច​នេះ​ធ្វើ​ឡើង​នៅ​ក្នុង​កិច្ចប្រជុំ​ពិសេស ​នៅ​ល្ងាច​ថ្ងៃសុក្រ​ទី​២៤​កក្កដា នៅ​ទី​ស្នាក់ការ​អង្គការ​សហប្រជាជាតិ​នាទីក្រុង​ញូវយ៉ក។

លោក អង់តូនីញ៉ូ ហ្គូតទែរស៍​ បានធ្វើដំណើរទៅរដ្ឋធានីដាម៉ាស កាលពីថ្ងៃសៅរ៍​ទី​២៥កក្កដា ដើម្បីជួបជាមួយថ្នាក់ដឹកនាំស៊ីរី​ថ្មី​។ នៅទីនោះ លោក​បានថ្លែងអំពាវនាវ​ឲ្យ​សហគមន៍អន្តរជាតិ ជួយ​ប្រទេសស៊ីរី​ នៅក្នុងការកសាង​ស្តានីតិរដ្ឋ និង​សន្តិសុខឡើងវិញ បន្ទាប់ពីចប់សង្គ្រាមស៊ីវីលក្រោយ​របប​ផ្តាច់ការបាស្ហា អាល់អាសាដ ដួលរលំទៅ​។

នៅទី​បំផុត រដ្ឋមន្ត្រី​ក្រសួង​អប់​រំ​ សុខ​ចិត្ត​លាលែង​ចេញ​ពីតំណែង​ ស្រប​តាម​ការ​ទាមទារ​របស់​បាតុករ។ សម្រាប់​ក្រុមបាតុករឥណ្ឌា គ្មាន​អ៊ីនធ័រនែត​ ក៏​ពួក​គេ​មាន​មធ្យោបាយ​ផ្សព្វផ្សាយ​ទាក់​ទង​គ្នា​បាន​ដែរ។ ទោះ​បីជា​អាជ្ញាធរ​ចាត់​​​វិធានការ​​​​ហិង្សា​ និងកាត់​ផ្តាច់​អ៊ីនធ័រនែតក៏​ដោយ ក៏​បាតុករ​និស្សិត​ឥណ្ឌា​នៅ​តែ​​បន្ត​ដាក់​សម្ពាធ​លើ​រដ្ឋាភិបាល និង​បន្ត​កាន់​កាប់​ទីលាន​បាតុកម្ម​កណ្តាលរដ្ឋ​ធានី​ញូវដែលី​ដដែល។

ក្រុមហ៊ូទីយេម៉ែនដែលជាកូនចៅអ៊ីរ៉ង់ បាន​​អះអាងថាបានបាញ់មីស៊ីល ទៅលើអារ៉ាប៊ីសាអូឌីត​​ នៅព្រឹកទៀបភ្លឺថ្ងៃសៅរ៍ទី​២៥កក្កដា​។ ការវាយប្រហារ ដែលក្រុមហ៊ូទីអះអាងថា គឺជាការសងសឹក បន្ទាប់ពីអារ៉ាប៊ីសាអូឌីត បាន​បាញ់ប្លោងគ្រាប់មកលើទីក្រុង ហូដេអ៊ីដា ដែនដីយេម៉ែនដែលស្ថិតក្រោមការគ្រប់គ្រងរបស់ក្រុមហ៊ូទី។ ការផ្ទុះអាវុធរវាងក្រុមហ៊ូទី និង​អារ៉ាប៊ីសាអូឌីតនេះ កំពុងគំរាមសន្តិសុខនៅតំបន់សមុទ្រក្រហម ដែល​ជាច្រកផ្លូវឆ្លងកាត់ដ៏សំខាន់នៃនាវាដឹកទំនិញគ្រប់មុខ​។

នៅថ្ងៃទី២៤ ខែកក្កដា​ ឆ្នាំ​២០២៦ ព្រះមហាក្សត្រកម្ពុជា បានសម្រេចចេញព្រះរាជក្រឹត្យលើកលែងទោស​បន្ថែមមួយកម្រិតទៀត​ដល់ លោក កឹម សុខា នៅត្រង់ចំណុច «ការហាមមិនឲ្យចេញពីប្រទេសកម្ពុជារយៈពេល៥ឆ្នាំ»។ នេះជាការលើកលែងទោសជំហានទី២​ បន្ទាប់ពី លោក កឹម សុខា ប្រធានអតីតគណបក្សសង្គ្រោះជាតិ ត្រូវបានលើកលែងទោសជាប់ពន្ធនាគាររយៈពេល ២៧ឆ្នាំ កាលពីថ្ងៃ២៥ ខែឧសភា ឆ្នាំ​២០២៦។ ប៉ុន្តែមកដល់ពេលនេះ អតីតប្រមុខគណបក្សជំទាស់រូបនេះ នៅជាប់​បម្រាមធ្វើនយោបាយអស់មួយជីវិតនៅឡើយ។ តើមានសេណារីយ៉ូអ្វីខ្លះ នៅពីក្រោយការបន្តលើកលែងទោស លោក កឹម សុខា ជំហានទី២?

នៅថ្ងៃទី២៤ ខែកក្កដា ឆ្នាំ២០២៦ សកម្មជនកិច្ចព្រមព្រៀងសន្តិភាពទីក្រុងបារីស កញ្ញា ភឹង សោភា និងលោក សាន សិទ្ធ ត្រូវបានតុលាការសម្រេចដោះលែងឱ្យមានសេរីភាពឡើងវិញ ក្រោយបញ្ចប់ការអនុវត្តទោស ២ឆ្នាំក្នុងពន្ធនាគារ ពាក់ព័ន្ធនឹងសំណុំរឿងបញ្ចេញមតិជុំវិញតំបន់ត្រីកោណអភិវឌ្ឍន៍ CLV។ប៉ុន្តែ សម្រាប់លោក ស្រ៊ុន ស្រ៊ន ដែលអនុវត្តទោស ២ឆ្នាំ រួចរាល់ដែរនោះ មិនទាន់ត្រូវបានតុលាការដោះលែងនៅឡើយ ដោយហេតុថា សកម្មជនរូបនេះត្រូវប្រឈមនឹងការជាប់ពន្ធនាគាររយៈពេល ២ឆ្នាំទៀត ក្នុងសំណុំរឿង«ញុះញង់» ប្រព្រឹត្តកាលពីឆ្នាំ២០២៣។ លោក សឺន ជុំជួន មេធាវីការពារក្តីឱ្យលោក ស្រ៊ុន ស្រ៊ន បានថ្លែងប្រាប់វិទ្យុបារាំងអន្តរជាតិ RFI នៅថ្ងៃទី២៥ ខែកក្កដានេះថា លោក និងកូនក្តីកំពុងរង់ចាំមើលការសម្រេចរបស់តុលាការនៅថ្ងៃទី២៥ ខែកក្កដានេះ​។ លោកមេធាវី សឺន ជុំជួន យល់ថា កូនក្តីរបស់លោកគួរតែទទួលបានការដោះលែង ពោលមិនគួរយកសំណុំរឿងចាស់ ដែលតុលាការបានកាត់ទោសកំបាំងមុខកាលពីឆ្នាំ២០២៤ មកអនុវត្តទោសបន្តនាពេលនេះឡើយ។

បន្ទាប់ពី​ស្ងាត់មួយ​​រយៈ ​​លោកប្រធានាធិបតី​អាមេរិក​ ដូណាល់​ ត្រាំ បាន​បញ្ឆេះភ្លើងសង្គ្រាម​ពាណិជ្ជកម្ម​ សាជាថ្មី។ ក្រោយ​ពី​ដាក់​ពន្ធគយធ្ងន់​ចំពោះ​កាណាដានិង​ប្រេស៊ីល រដ្ឋាភិបាល​ទីក្រុង​វ៉ាស៊ីនតោន ក៏​ដាក់​រនាំងពន្ធ​គយ​លើ​ ៦០ ប្រទេស​ផ្សេងទៀត​ ដែលកំហិត​​ត្រូវ​ជាប់​ពន្ធគយ ​ចំនួន ១០% ឬ​ ១២,៥% ចំពោះ​ទំនិញ​នាំចូល​ទឹកដីអាមេរិក។

ថ្ងៃសុក្រទី​២៤កក្កដា អាជ្ញាធរអេស្ប៉ាញ​ បានជម្លៀសមនុស្ស​យ៉ាងប្រញាប់ប្រញាល់ ចំនួន​​​ជិត​៣ម៉ឺន​នាក់ ចេញពីតំបន់ក្បែរទីក្រុងម៉ាឌ្រីត ដែលកំពុងតែប្រឈមនឹងភ្លើងឆេះព្រៃដ៏កំណាច។ រវាងពីថ្ងៃព្រហស្បតិ៍ ដល់ថ្ងៃសុក្រទី​២៤កក្កដា ភ្លើងបានលេបត្របាក់ព្រៃឈើអស់ជិត​​ ១ម៉ឺន​​​ហិកតា។ អាជ្ញាធរអេស្ប៉ាញកំពុងព្រួយបារម្ភ ថាភ្លើង​២កន្លែងអាចនឹងឆេះរាល​​តភ្ជាប់គ្នា បង្កការលំបាកកាន់តែខ្លាំងដល់ប្រតិបត្តិការពន្លត់។

២៤ ខែកក្កដា ឆ្នាំ២០២៦ ជាខួប១ឆ្នាំនៃជម្លោះព្រំដែនកម្ពុជា-ថៃ។ ក្រោមក្រសែភ្នែក និងកិច្ចសម្របសម្រួលពីសហគមន៍អន្តរជាតិ កម្ពុជា និងថៃសម្រេចបានបទឈប់បាញ់ចំនួន ២លើក គឺ​​ថ្ងៃទី២៨ កក្កដា និងថ្ងៃទី២៧ ធ្នូ ឆ្នាំ២០២៥។ ប៉ុន្តែស្ថានការណ៍ព្រំដែននៅតែមិនទាន់វិលទៅរកភាពប្រក្រតីវិញឡើយ។ កម្ពុជារាយការណ៍ថា យោធាថៃនៅតែ​បន្តរំលោភបំពានដែនអធិបតេយ្យភាពកម្ពុជាដោយខុសច្បាប់។ ក្នុងរយៈពេល ១ឆ្នាំកន្លងមកនេះ រដ្ឋាភិបាលកម្ពុជាបានប្រើប្រាស់យន្តការការទូត និងច្បាប់អន្តរជាតិដើម្បីទាមទារទឹកដីខ្មែរត្រឡប់មកវិញ។ មកទល់ពេលនេះ​ ពលរដ្ឋខ្មែរជាង ២ម៉ឺននាក់នៅមិនទាន់អាចវិលត្រឡប់ទៅលំនៅឋានរបស់ខ្លួនវិញបាន។

ក្រោយពីចុះកិច្ចព្រមព្រៀងអនុញ្ញាតឲ្យអារ៉ាប៊ីសាអូឌីតអភិវឌ្ឍកម្មវិធីនុយក្លេអ៊ែរស៊ីវិល ប្រធានាធិបតីអាមេរិក លោក ដូណាល់ ត្រាំ បានដាក់លក្ខខណ្ឌបន្ថែមដោយតម្រូវឲ្យទីក្រុងរីយ៉ាដទទួលស្គាល់រដ្ឋអ៊ីស្រាអែល។ តែមិនទាន់អីផង កិច្ចព្រមព្រៀងនុយក្លេអ៊ែរស៊ីវិលរវាងវ៉ាស៊ីនតោន និងរីយ៉ាដបានបង្កឲ្យមានការរិះគន់អំពីអស្ថិរភាពក្នុងតំបន់មជ្ឈិមបូព៌ា និងក្តីព្រួយបារម្ភពីការសាយភាយអាវុធប្រល័យលោក។ ចំណែកបណ្តាអ្នកតំណាងរាស្ត្រប្រឆាំងនៅអាមេរិកក៏បានរិះគន់លោក ត្រាំ ថាកំពុងតែធ្វើរឿងមិនសមហេតុផល ដោយធ្វើសង្គ្រាមហាមឃាត់អ៊ីរ៉ង់មិនឲ្យមាននុយក្លេអ៊ែរ តែបែរជាបើកភ្លើងខៀវឲ្យអារ៉ាប៊ីសាអូឌីតដែលជាសត្រូវអ៊ីរ៉ង់អាចមាននុយក្លេអ៊ែរទៅវិញ។

តំបន់ Gironde ភាគនិរតីប្រទេសបារាំង កំពុងតែរងគ្រោះដោយ​ភ្លើងឆេះព្រៃ​ដ៏ធ្ងន់ធ្ងរបំផុត​។ គិតចាប់ពី​ល្ងាចថ្ងៃពុធមកដល់ថ្ងៃសុក្រទី​២៤កក្កដា ភ្លើងបាន​ឆេះលេបត្របាក់ព្រៃឈើប្រមាណជាង​​១ម៉ឺនហិកតា ខណៈពេលនេះ ក្រុមពន្លត់បន្តប្រយុទ្ធយ៉ាងលំបាកលំបិន។ សមត្ថកិច្ចនិងអាជ្ញាធរបារាំង កំពុងតែជម្លៀសមនុស្សប្រមាណ​៤ម៉ឺននាក់ ចេញពីតំបន់ទេសចរណ៍ Cap Ferret ដែលត្រូវភ្លើងឆេះព័ទ្ធ​​។

គណបក្សកម្លាំងជាតិ តាមរយៈអ្នកនាំពាក្យបានឲ្យដឹងនៅថ្ងៃទី២៤ កក្កដានេះថា គណបក្សគ្រោងសួរនាំអ្នកតំណាងរដ្ឋាភិបាលបារាំងប្រចាំកម្ពុជាពីលិខិតដែលគណបក្សបានសុំឲ្យប្រធានាធិបតីបារាំងអន្តរាគមន៍ និងគាំទ្រការលើកកម្ពស់សិទ្ធិមនុស្ស លទ្ធិប្រជាធិបតេយ្យ និងការបោះឆ្នោតនៅកម្ពុជា។ គួរបញ្ជាក់ថា គណបក្សប្រឆាំងនៅកម្ពុជាមួយនេះបានដាក់លិខិតមួយទៅកាន់ប្រធានាធិបតីបារាំង លោក អេម៉ានុយអែល ម៉ាក្រុង កាលពីខែមិថុនា ឆ្នាំ២០២៦ តាមរយៈស្ថានទូតបារាំងប្រចាំកម្ពុជា។

ព្រឹកព្រលឹមថ្ងៃ សុក្រ​ ទី ២៤ ខែ កក្កដា ជាលើកទីបីក្នុងរយៈពេលតែប៉ុន្មានថ្ងៃ ក្រុមហ៊ុនលក់ទំនិញអនឡាញដ៏ធំមួយនៅរុស្ស៊ី ឈ្មោះ Wildberries បានក្លាយជាគោលដៅនៃការវាយប្រហារដោយដ្រូនអ៊ុយក្រែន ក្បែរទីក្រុង Saint-Pétersbourg ។ មានចម្ងាយជាង ៨០០ គីឡូម៉ែត្រពីព្រំដែន ការវាយប្រហារថ្មីនេះ បានបង្កឱ្យមានអគ្គិភ័យយ៉ាងសន្ធោសន្ធៅ និង បណ្តាលឱ្យមនុស្សយ៉ាងហោចណាស់ ៣ នាក់រងរបួស ។ អាកាសយានដ្ឋានអន្តរជាតិ Saint-Pétersbourg បានផ្អាកដំណើរការ អស់រយៈពេលជាច្រើនម៉ោង ។ 

រដ្ឋមន្ត្រីការបរទេសកម្ពុជា លោក ប្រាក់ សុខុន និងរដ្ឋមន្ត្រីការបរទេសអាមេរិក​ លោក ម៉ារកូ រ៉ូប៊ីយ៉ូ បានលើកឡើងជាថ្មីអំពីកិច្ចសហប្រតិបត្តិការរវាងប្រទេសទាំងពីរ ដោយរំលេចពីគុណតម្លៃនៃកិច្ចព្រមព្រៀងសន្តិភាពទីក្រុងគូឡាឡាំពួរ ក្នុងសំណុំរឿងជម្លោះព្រំដែនកម្ពុជា-ថៃ និងកិច្ចសហការគ្នា ក្នុងការប្រយុទ្ធប្រឆាំងឧក្រិដ្ឋកម្មអនឡាញ។ ជំនួបពិភាក្សារវាងប្រមុខការទូតនៃប្រទេសទាំងពីរ ធ្វើឡើងអំឡុងពេលនៃកិច្ចប្រជុំរដ្ឋមន្ត្រីការបរទេសអាស៊ាននៅប្រទេសហ្វីលីពីន កាលពីថ្ងៃទី២៣ ខែកក្កដា ឆ្នាំ២០២៦។

ក្រសួងមហាផ្ទៃបានប្រកាសសម្រេចផ្អាកការងារ លោក រុន រ័ត្នវាសនា ប្រធាននាយកដ្ឋាននគរបាលទេសចរណ៍ជាបណ្តោះអាសន្នចាប់ពីថ្ងៃទី២៣ ខែកក្កដា ឆ្នាំ​២០២៦ តទៅ។ អ្នកនាំពាក្យក្រសួងមហាផ្ទៃបានឲ្យដឹងនៅថ្ងៃទី២៤កក្កដានេះថា ការសម្រេចបញ្ឈរជើងមេនគរបាលទេសចរណ៍រូបនេះ គឺដើម្បីស្រាវជ្រាវ និងស៊ើបអង្កេតលើភាពមិនប្រក្រតីនាអំឡុងពេលបំពេញការងារក្នុងករណីជម្លោះនៅក្នុងក្រុមហ៊ុនដឹផ្លរ៉ា។

សង្គ្រាមតំបន់មជ្ឈិមបូព៌ា កំពុងតែរីករាលដាល​ទៅជ្រោយ​ម្ខាងទៀត នៃឧបទ្វីបអារ៉ាប់​។ ក្រុម​ហ៊ូទីយេម៉ែន កូនចៅអ៊ីរ៉ង់បានប្រកាសនៅថ្ងៃព្រហស្បតិ៍​ទី​២៣កក្កដា​ ថាបានវាយប្រហារលើនាវាដឹកប្រេង​២គ្រឿង​របសអារ៉ាប៊ីសាអូឌីត​។ បញ្ហា​នេះ កំពុងតែបង្ក​​ឲ្យ​មាន​ការភ័យ​បារម្ភ អំពីសន្តិសុខចរាចរណ៍នាវាដឹកនាំទំនិញ នៅច្រកចេញចូលសមុទ្រក្រហម ស្របពេលដែលច្រកសមុទ្រអកមូហ្សឯនោះ ត្រូវបិទខ្ទប់សឹងទាំងស្រុង​រួចទៅហើយ​។

ទីក្រុងតូក្យូប្រទេសជប៉ុន កំពុងតែរងគ្រោះដោយ​រលកសីតុណ្ហភាព​ក្តៅខ្លាំង មិនធ្លាប់មាន​​ បង្ក​ឲ្យ​មានអ្នកជំងឺ​ច្រើន​សន្ធឹក ដែលត្រូវការសង្គ្រោះបន្ទាន់នៅ​មន្ទីរពេទ្យ​។ សីតុណ្ហភាពក្តៅខ្លាំង​ប្រមាណ​១សប្តាហ៍​​មកនេះ បាន​ផ្តាច់ជីវិត​មនុស្សយ៉ាងតិច ​១៤នាក់ហើយ​​នៅជប៉ុន​។​

សមាគម​ប្រជាជាតិ​អាស៊ី​អាគ្នេយ៍ ហៅកាត់ថា អាស៊ាន ទើប​តែ​បញ្ចប់​កិច្ចប្រជុំ​ថ្នាក់​រដ្ឋមន្ត្រីការបរទេស​ ​​ នៅទីក្រុងម៉ានីល ប្រទេសហ្វីលីពីន ដោយ​សម្រេច​ចេញសេចក្តីថ្លែងការណ៍រួមមួយ កម្រាស​៤២ទំព័រ​។ អាស៊ានទាំង​១១ប្រទេស បាន​ជួប​ផលវិបត្តិ​ខ្វះប្រេង​ ព្រោះតែ​ការ​បិទខ្ទប់​ច្រក​សមុទ្រអកមូស្ស។ ម្ល៉ោះហើយ​​  ទើប​​បណ្តា​រដ្ឋមន្ត្រីការបរទេស​អាស៊ាន​ បា​នមូរមាត់គ្នាអំពាវនាវ​ឲ្យ​​ ​អ៊ីរ៉ង់ បើកច្រកសមុទ្រ​អកមូស្សឡើងវិញ​ រួម​ទាំង អនុញ្ញាត​ឲ្យ​ធ្វើ​នាវាចរណ៍ និង​ហោះហើរនៅ​ច្រកសមុទ្រ​អកមូស្សនេះ​ ​ដោយគ្មានឧបសគ្គ។​ 

នៅព្រឹកថ្ងៃទី២៣ កក្កដានេះ អាជ្ញាធរខេត្តឧត្តរមានជ័យបានរៀបចំពិធីរម្លឹកខួប ១ឆ្នាំនៃសង្គ្រាមឈ្លានពានរបស់ថៃលើកម្ពុជា។ លោក មាន ចាន់យ៉ាដា អភិបាលខេត្តឧត្តរមានជ័យថ្លែងថា ការរៀបចំពិធីនេះមិនត្រឹមតែជាការរម្លឹកខួប ១ឆ្នាំនៃការឈ្លានពានប៉ុណ្ណោះទេ តែវាជាសក្ខីកម្មដែលបញ្ជាក់ពីការចងចាំមិនភ្លេចនូវការពលីរបស់វីរកងទ័ព និងនគរបាលជាតិកម្ពុជាក្នុងបុព្វហេតុការពារជាតិ។ 

សហភាពអឺរ៉ុប (EU) តាមរយៈរបាយការណ៍ចុះថ្ងៃទី១៦ ខែកក្កដា ឆ្នាំ២០២៦ បានវាយតម្លៃថា បញ្ហាសិទ្ធិមនុស្សនៅកម្ពុជានៅតែបន្តរួមតូច បើទោះបីជារដ្ឋមួយនេះបានប្រកាន់ខ្ជាប់នូវសន្ធិសញ្ញាសិទ្ធិមនុស្សរបស់អង្គការសហប្រជាជាតិ និងក្របខ័ណ្ឌគោលនយោបាយសំខាន់ៗមួយចំនួនក៏ដោយ។ EU ព្រមានថា ប្រសិនបើកម្ពុជានៅតែបន្តយាយីដល់សិទ្ធិនយោបាយ និងសិទ្ធបញ្ចេញមតិ ការអនុគ្រោះពន្ធក្រោមប្រព័ន្ធ «គ្រប់យ៉ាងលើកលែងតែសព្វាវុធ» ឬ EBA នឹងនៅតែបន្តព្យួរ។ 

រដ្ឋមន្ត្រីការបរទេសអាមេរិក និងរុស្ស៊ីបានជួបពិភាក្សាគ្នារយៈពេលប្រមាណ ៣០នាទី នៅទីក្រុងម៉ានីល ប្រទេសហ្វីលីពីន នាឱកាសកិច្ចប្រជុំថ្នាក់រដ្ឋមន្ត្រីការបរទេសអាស៊ាន។ ប្រមុខការទូតនៃមហាអំណាចទាំង២ មិនបានប្រកាសផ្ទាល់មាត់អំពីខ្លឹមសារនៃជំនួបទ្វេភាគីនេះទេ។ តែក្រសួងការបរទេសនីមួយៗបានចេញសេចក្តីថ្លែងការណ៍រៀងៗខ្លួន។ ភាគីអាមេរិកបានលើកឡើងថា ជំនួបដាច់ដោយឡែកនេះផ្តោតលើចំណងមេត្រីភាពទ្វេភាគី និងសារៈសំខាន់នៃការបញ្ចប់សង្គ្រាមអ៊ុយក្រែន។ តែរុស្ស៊ីបានព្រមានអាមេរិកដែលចេះតែបន្តបញ្ជូនគ្រឿងសព្វាវុធឲ្យអ៊ុយក្រែនដោយចាត់ទុកទង្វើនេះថាមិនអាចទទួលយកបានទាល់​តែសោះ។​ ​