លោក មីន អ៊ុងឡាំង ប្រធានាធិបតីភូមា នឹងមកបំពេញទស្សនកិច្ចនៅកម្ពុជានាពេលខាងមុខ។នេះបើតាមការផ្សាយរបស់ព្រឹទ្ធសភាកម្ពុជានៅលើ​បណ្តាញសង្គម​នៅថ្ងៃចន្ទទី ១៧​សីហា។ គោល​បំណង​នៃដំណើរទស្សនកិច្ចនេះ មិនត្រូវបានគេបង្ហើបឲ្យដឹងនៅឡើយ។ តែអ្នកវិភាគមើលឃើញថា ទស្សនកិច្ចរបស់លោក មីន អ៊ុងឡាំង នៅកម្ពុជាជាការពង្រឹងទំនាក់ទំនងទ្វេភាគី និងការពង្រឹងភាពស្របច្បាប់នៃរដ្ឋាភិបាលក្រុងណៃពិដោ ដែលបន្តរងការរិះគន់យ៉ាងខ្លាំងអំពីការរំលោភសិទ្ធិមនុស្ស។

ប្រព័ន្ធផ្សព្វផ្សាយក្នុងស្រុកថៃបានរាយការណ៍ថា ទាហានថៃម្នាក់បានរងរបួសដាច់ជើងម្ខាងដោយសារការផ្ទុះមីន អំឡុងពេលទាហានថៃធ្វើប្រតិបត្តិការបោសសម្អាតមីន នៅជិតតំបន់ Chong An Ma ក្នុងខេត្ត​អ៊ូប៊ុន រ៉ាត់ឆាត់ថានី(Ubon Ratchathani)។ បើតាមអ្នកនាំពាក្យកងទ័ពថៃថា ភាគីកម្ពុជាធ្លាប់ឈរជើង នៅទីតាំងនោះ។ មន្ត្រីក្រសួងការពារជាតិកម្ពុជាបានប្រតិកម្មភា្លម និងស្នើឲ្យភាគីថៃកុំទម្លាក់កំហុសមកលើកម្ពុជា។ 

គណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល បានរកឃើញ​ចំណុច​ខ្វះខាត​មួយចំនួន​ក្នុងការ​ចុះឈ្មោះ​ និង​ពិនិត្យ​បញ្ជី​ឈ្មោះ​បោះឆ្នោត កាលពីឆ្នាំ​២០២៥។ ការរកឃើញនេះ​ត្រូវបាន​ខុមហ្វ្រែល ចាត់ទុកថា ជាកញ្ចក់សម្រាប់បំភ្លឺផ្លូវ ដល់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ ដែលនឹងត្រូវអនុវត្ត​ចាប់ពីថ្ងៃទី៧ ខែតុលា ដល់ថ្ងៃទី៣០ ខែវិច្ឆិកាខាងមុខ។

នៅថ្ងៃអង្គារ ទី ១៨ ខែសីហា រដ្ឋាភិបាលស្រីលង្កា​ប្រកាស​ធ្វើកំណែទម្រង់​ប្រព័ន្ធ​តុលាការ​ក្នុងទ្រង់ទ្រាយធំមួយ​ដើម្បី​ដោះស្រាយ​សំណុំរឿងជាងមួយលានករណី ដែលកំពុងជាប់កកស្ទះ។ ប៉ុន្តែ ផែនការ​នេះកំពុងប្រឈមនឹងការប្តឹងជំទាស់ពីសមាគមមេធាវីដែលបារម្ភថា ការកែប្រែច្បាប់អាចប៉ះពាល់ដល់ឯករាជ្យភាពរបស់តុលាការស្រីលង្កា។

ថ្ងៃចន្ទ ទី​១៧សីហា រដ្ឋាភិបាល​ចិនបាន​រៀបចំពិធី​ប្រារព្ធរំឭក​ខួបកំណើត ១០០ឆ្នាំរបស់អតីតប្រធានាធិបតី លោក ចាង ហ្សេមីង ដែលបាន​កាន់អំណាចកំពូល​របស់​​បក្ស​និង​រដ្ឋ​ ​ចន្លោះឆ្នាំ១៩៨៩ ដល់​ឆ្នាំ​២០០៣។​ ប្រធានាធិបតី​ចិនបច្ចុប្បន្ន លោក ស៊ី ជីនពីង រំឭកអំពីគំរូដឹកនាំ​របស់​លោក ចាង ហ្សេមីង ដែល​ជំរុញប្រទេសជាតិឲ្យ​​ដើរ​ចេញពី​វិបត្តិ ស្មោះត្រង់​នឹង​ទិសដៅបក្ស ហើយ​រក្សាតម្លៃស្ថិរភាពជាតិ​ មុន​អ្វីៗទាំងអស់។​ 

ប្រធានាធិបតីតៃវ៉ាន់លោក ឡៃ ឈីងទឿ បានប្រកាសនៅថ្ងៃចន្ទ ទី ១៧ ខែសីហា ថា រដ្ឋាភិបាលរបស់ខ្លួននឹងស្នើសុំថវិកាការពារជាតិសម្រាប់ឆ្នាំ ២០២៧ ដល់ចំនួនទឹកប្រាក់ ៣៥ពាន់លានដុល្លារអាមេរិក។ ការប្រកាសប្តេជ្ញាបង្កើនថវិកាការពារជាតិនេះបង្ហាញពីការពង្រឹងសមត្ថភាពការពារខ្លួនរបស់តៃវ៉ាន់ ខណៈចិនកំពុងតែដាក់សម្ពាធយោធា។

កាលពី៤ឆ្នាំកន្លះមុន សង្គ្រាម​នៅអ៊ុយក្រែនបាន​ផ្ទុះឡើង បន្ទាប់ពីរុស្ស៊ី​បាន​លើកទ័ពចូលឈ្លានពានទឹកដី​អ៊ុយក្រែន​។ ចាប់ពីពេលនោះមក ​គ្មាន​នរណាអាចស្មានដឹងមុនទេ ថាភាគីខាងណា ដែលនឹងអាចឈ្នះសង្គ្រាមនៅសមរភូមិ និងថាតើ នឹង​អាចមាន​​ដំណោះស្រាយការទូ​តដែរឬទេ។ តែគិតមកត្រឹមពេលនេះ អ៊ុយក្រែន​ដែលត្រូវរុស្ស៊ី​វាយប្រហារឈ្លានពាន​នោះ​ បានរលាស់ខ្លួន​រៀបចំយុទ្ធសាស្ត្របានយ៉ាងល្អ ធ្វើ​ឲ្យ​ភ្លើងសង្គ្រាមត្រលប់ទៅឆេះនៅក្នុងទឹកដីរុស្ស៊ីវិញ តាមរយៈការ​វាយ​ប្រហារដោយ​ដ្រូន​ច្រើនរយគ្រឿងសឹងជារៀងរាល់ថ្ងៃ។

រដ្ឋាភិបាលកម្ពុជាឯករាជ្យ២៣តុលា កាលពីពេលថ្មីៗនេះ បានបញ្ជាក់ថា ខ្លួនបានស្នើទៅកាន់ព្រឹទ្ធសភាអាមេរិកឲ្យបង្កើតច្បាប់រុះរើឧក្រិដ្ឋកម្មឆបោកអនឡាញនៅក្នុងប្រទេសកម្ពុជា។ ការបញ្ជាក់នេះធ្វើឡើងក្នុងសេចក្តីថ្លែងការណ៍ជាចំហមួយ ដែលរដ្ឋាភិបាលកម្ពុជាឯករាជ្យ២៣តុលា អំពាវនាវឲ្យសហគមន៍អន្តរជាតិមានសកម្មភាពបង្ក្រាបឧក្រិដ្ឋកម្មឆបោកអនឡាញដ៏ធំពីទឹកដីកម្ពុជា។

មកទល់រសៀលថ្ងៃទី១៧ ខែសីហា ឆ្នាំ២០២៦នេះ អាជ្ញា​ធរ​ខេត្តកណ្តាលរក​ឃើញ​សាកសព​ក្មេង​ប្រុស​ ២​នាក់ ក្នុង​ចំណោម​ក្មេង​ប្រុស​​​ ៣នាក់ដែលបាត់ខ្លួនក្នុង​ហេតុការណ៍​លិច​ទូក​ង​ខ្នាត​អន្តរ​ជាតិ​កាល​ពី​ថ្ងៃទី​១៥​សីហា​កន្លងទៅ ស្ថិតក្នុងស្រុកកៀនស្វាយ ខេត្តកណ្តាល។​ ទោះយ៉ាងណាអាជ្ញាធរខេត្តកណ្តាល ​​កំពុងស្វែងរកយ៉ាងសកម្ម ក្មេងប្រុស ១នាក់ទៀត ដែលបន្តបាត់ខ្លួននៅឡើយ​។ លោក គួច ចំរើន អភិបាលខេត្តកណ្តាលបានប្រាប់វិទ្យុបារាំងអន្តរជាតិ RFI បន្ថែមនៅថ្ងៃចន្ទទី១៧សីហា​នេះ​ថា ក្មេងប្រុសដែលជាកូនម្ចាស់ទូក បានបបួលគ្នីគ្នាមកអុំទូកលេង ដោយពួកគេមិនមានពាក់អាវពោងសុវត្ថិភាពឡើយ។

អាមេរិកបានដាក់ក្តីរំពឹងថា នាវាចម្បាំងរបស់ខ្លួននឹងអាចមកបំពេញទស្សនកិច្ចកាន់តែច្រើន ក្រោយរដ្ឋបាលលោក ដូណាល់ ត្រាំ និងរដ្ឋាភិបាលលោក ហ៊ុន ម៉ាណែត បានជជែកគ្នាពីការបង្កើនកិច្ចសហប្រតិបត្តិការយោធា។ នេះបើតាមខ្លឹមសារដែលបង្ហោះដោយស្ថានទូតអាមេរិកប្រចាំទីក្រុងភ្នំពេញ នៅថ្ងៃចន្ទទី១៧សីហា ឆ្នាំ២០២៦នេះ។

នៅអេហ្ស៊ីប​ ថ្ងៃទី១៧សីហានេះ​ លោកចារ៉េត គូឆនែរ កូនប្រសាលោកដូណាល់ ត្រាំ នឹង​ជួបប្រជុំជាមួយ​គណៈប្រតិភូតំណាងក្រុមហាម៉ាសប៉ាឡេស្ទីន ដើម្បី​និយាយ​ពី ផែនការសន្តិភាពសម្រាប់តំបន់ហ្កាហ្សា ដែល​រដ្ឋបាល​លោកដូណាល់ ត្រាំបានស្នើមក។ ក្រុមហាម៉ាសបានប្រកាសទទួលយកផែនការនេះ តែលោក​នាយករដ្ឋមន្ត្រីអ៊ីស្រាអែលវិញ បានបដិសេធ​ ដោយ​អះអាងថាមិនជឿថា​ក្រុមហាម៉ាសនឹងរំសាយអាវុធ។

នៅថ្ងៃ​ចន្ទ ទី​១៧សីហា សហរដ្ឋអាមេរិក​និង​កូរ៉េ​ខាងត្បូង ត្រូវ​បើកសមយុទ្ធយោធាប្រចាំ​ឆ្នាំរួមគ្នា។​ ​តែ​លោកប្រធានាធិបតី ដូណាល់ ត្រាំ ​បានប្រកាស​កាត់​បន្ថយ​ចំណាយ​ឲ្យ​ច្រើន​បំផុតក្នុង​សមយុទ្ធ​ ដោយ​​ចោទប្រកាន់ថា ទង្វើនេះ បំផុស​ការ«​ញុះញង់» និង​«ចំណាយ​លុយសន្ធឹកសន្ធាប់​ពេក»​​។ មិនតែប៉ុណ្ណេះ លោក ត្រាំ​ ហាក់ដូចជា​អន់ចិត្ត​នឹង​ កូរ៉េខាងត្បូង ដោយ​រំឭកថា  ប្រទេស​នេះ​បដិសេធមិនព្រម​​ពួតដៃ​ជាមួយ​អាមេរិក​និង​អ៊ីស្រាអែល ក្នុង​​ប្រតិបត្តិការយោធាវាយប្រហារ​អ៊ីរ៉ង់។

ជំនួបរវាង លោក ហ៊ុន សែន និងក្រុមគ្រួសារលោក កឹម សុខា នៅថ្ងៃទី១៦ ខែសីហា ឆ្នាំ​២០២៦ បានទាញចំណាប់អារម្មណ៍យ៉ាងខ្លាំងពីក្រសែភ្នែកអ្នកតាមដានសង្គម និងនយោបាយខ្មែរ ព្រមទាំងមានការវិភាគផ្សេងៗគ្នាពីសេណារីយ៉ូនៃជំនួបរវាងអ្នកនយោបាយ ដែលធ្លាប់ជាគូបដិបក្ខនឹងគ្នា។ ដោយឡែក​សម្រាប់​ក្រសែភ្នែក​សហគមន៍អន្តរជាតិវិញ តើពួកគេយល់ឃើញយ៉ាងណាដែរចំពោះជំនួបមួយនេះ?

មេធាវីការពារក្តីឲ្យប្រជាពលរដ្ឋក្នុងសំណុំរឿងក្រុមហ៊ុនពិភពដីមាសលោកស្រី តាំង ស៊ីនហុង ប្រាប់វិទ្យុបារាំងអន្តរជាតិ RFI នៅថ្ងៃទី ១៧សីហានេះថា សាលាដំបូងរាជធានីភ្នំពេញ បានសម្រេចផ្តន្ទាទោស អតីតឧកញ៉ា ហ៊ី គិមហុង និងអ្នករួមគំនិតសំខាន់ ២នាក់ផ្សេងទៀត ឲ្យជាប់ពន្ធនាគារចំនួន ៥ឆ្នាំ។ តាមមេធាវីរូបនេះដដែល លោក ហ៊ី គិមហុង និងបក្ខពួក ក៏ត្រូវបានតុលាការបញ្ជាឲ្យសងប្រាក់ចំនួនជាង ៣៣លានដុល្លារ ទៅប្រជាពលរដ្ឋ។ ជាសំណងសម្រាប់ករណីមួយ ក្នុងចំណោម ៣ករណី ដែលមានប្រជាពលរដ្ឋរងគ្រោះជាង ១ពាន់គ្រួសារជាដើមបណ្តឹង។

អ៊ីរ៉ង់បានអះអាងនៅថ្ងៃសៅរ៍ទី ១៥​សីហា ថាកាតាបានចាប់ឃុំ​អ្នកបើកយន្តហោះចម្បាំង​​​អ៊ីរ៉ង់​៣នាក់ តាំងតែពីខែមីនា។ ការចោទដែលត្រូវបានអាជ្ញាធរកាតា បដិសេធទាំងស្រុង។ ទោះយ៉ាងណា ភាគីអ៊ីរ៉ង់​បានបន្ត​ចោទថាកាតាបានរារាំងការស៊ើបអង្កេត ក្នុងគោលបំណងបិទបាំងការពិត។

​អង្គការ​​សមាគម​ការពារ​ធម្មជាតិ ចំនួន​ជាង​១០ ​​បាន​បង្ហាញ​ក្តី​បារម្ភចំពោះ​វិធានការរឹតបន្តឹងកិច្ចការពារបរិស្ថាន​របស់​សហភាព​អឺរ៉ុប ដែល​​ហាក់​កំពុងតែ​ដើរថយក្រោយ គួរឲ្យព្រួយបារម្ភ។ ការ​ដើរថយក្រោយនេះ មាន​កត្តារារាំង​ជាច្រើន រាប់ទាំង​បញ្ហា​នយោបាយផ្ទៃក្នុង និង​ការជ្រៀតជ្រែកឥទ្ធិពល​ពី​ប្រទេស​ក្រៅ​។​​ 

​ក្នុង​ឱកាស​បុណ្យ​ឯករាជ្យជាតិ​ឥណ្ឌា កាល​ថ្ងៃទី​១៥ សីហា លោកនាយករដ្ឋមន្ត្រី ​​ ណារិនដ្រា ម៉ូឌី ​​បាន​ស្នើឲ្យបើក​​បង្រៀន​ត្រៀម​ប្រលងសម្រាប់​ការ​ប្រកួត​ប្រជែង​នានា​​ ដោយ​ឥតគិត​ថ្លៃ​ ហើយ​​ត្រូវ​ប្រើប្រាស់​មធ្យោបាយ​សម្ភារៈ​និងគ្រូ​របស់​រដ្ឋ។ ការប្រកាស​នេះ ក៏​ដើម្បី​សម្រន់​កំហឹង​របស់​យុវជនឥណ្ឌាដែល​បាន​ធ្វើ​បាតុកម្ម​ជាច្រើន​សប្តាហ៍​។​ បាតុកម្មយុវជន​បាន​សម្រេច​រហូត​រដ្ឋមន្ត្រី​អប់រំ ត្រូវ​បង្ខំចិត្ត​លាចុះពីតំណែង​​។  

អតីតជនរងគ្រោះនៃរបបខ្មែរក្រហម ឬជនរងគ្រោះក្នុងអតីតមន្ទីរឃុំឃាំង ស-២១​ (គុកទួលស្លែង) លោក​ ប៊ូ​ ម៉េង​ បានទទួលអនិច្ចកម្ម ក្នុងវ័យ ៨៥ឆ្នាំ​ នាល្ងាចថ្ងៃសុក្រទី១៤សីហា។ សម្រាប់តុលាការខ្មែរក្រហម ការស្លាប់របស់លោក ប៊ូ ម៉េង គឺជាការបាត់បង់សាក្សីរស់ដ៏សំខាន់នៃរបបយង់ខ្នងប្រល័យពូជសាសន៍កម្ពុជាប្រជាធិបតេយ្យ។ អតីតជនរងគ្រោះនៃរបបខ្មែរក្រហម ឬជនរងគ្រោះក្នុងអតីតមន្ទីរឃុំឃាំង ស-២១​ (គុកទួលស្លែង) លោក​ ប៊ូ​ ម៉េង​ បានទទួលអនិច្ចកម្ម ក្នុងវ័យ ៨៥ឆ្នាំ​ នាល្ងាចថ្ងៃសុក្រទី១៤សីហា។ សម្រាប់តុលាការខ្មែរក្រហម ការស្លាប់របស់លោក ប៊ូ ម៉េង គឺជាការបាត់បង់សាក្សីរស់ដ៏សំខាន់នៃរបបយង់ខ្នងប្រល័យពូជសាសន៍កម្ពុជាប្រជាធិបតេយ្យ។

លោកនាយករដ្ឋមន្រ្តី ហ៊ុន ម៉ាណែត កាលពីថ្ងៃទី១៣សីហា បានចុះជួបតំណាងសហគមន៍ ទេទឹកពុះ នៅឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ដើម្បីជួយរៀបចំគម្រោងលម្ហែបៃតង «ទេទឹកពុះ» នៅពេលខាងមុខ។ សម្រាប់លោក ហ៊ុន ម៉ាណែត ​គម្រោងនេះនឹងជួយកែលម្អ​​​​​ហេដ្ឋារចនាសម្ព័ន្ធរមណីយដ្ឋាន «ទេទឹកពុះ» នាពេលនេះ ពិសេស​ជួយពង្រឹងភាពជាម្ចាស់របស់សហគមន៍ ដើម្បី​ទាញយកផលប្រយោជន៍ជាអតិបរមាពីការអភិវឌ្ឍន៍នៅហ្នឹងកន្លែង។ លោក​ ផល នឿន ជា​ប្រធានសហគមន៍តំបន់ការពារធម្មជាតិកោដូនតី ដែលទទួលខុសត្រូវក្នុងរមណីយដ្ឋានទេទឹកពុះនេះ ​​​ប្រាប់វិទ្យុបារាំងអន្តរជាតិ Rfi នៅ​ថ្ងៃទី​១៦សីហានេះថា ​​ពលរដ្ឋសហគមន៍ ដែលជា​ជនជាតិដើមភាគតិចសួយជួប​បញ្ហា​ប្រឈម​មួយចំនួ​នក្នុងការកសាងតំបន់​ទេសចរណ៍មួយនេះ។ ​សូមស្តាប់​​​លោក​ ផល នឿន ប្រធានសហគមន៍តំបន់ការពារធម្មជាតិកោដូនតី៖ ​

គិតមកទល់ពេលនេះ រោងចក្រចំនួន ៣កន្លែងនៅក្រុងប៉ោយប៉ែត ខេត្តបន្ទាយមានជ័យ បានប្រកាសបិទទ្វារលែងដំណើរការដោយសារ​ការបញ្ជាទិញធ្លាក់ចុះ និងការដឹកជញ្ចូនឡើងថ្លៃ អំឡុងវិបត្តិនៃជម្លោះព្រំដែនកម្ពុជា-ថៃ។ នេះបើតាមការបញ្ជាក់ឱ្យដឹងពីអ្នកនាំពាក្យក្រសួងការងារ លោក ស៊ុន មេសា នៅថ្ងៃទី១៦ ខែសីហា​ ឆ្នាំ២០២៦​ និងថា កម្មករ-កម្មការិនីប្រមាណ ៤ពាន់នាក់ រងផលប៉ះពាល់​ដោយសារការបិទរោងចក្រទាំង៣​។  តែយ៉ាងណាមន្ត្រីនាំពាក្យក្រសួងការងាររូបនេះមិនបារម្ភថា ​កម្មករ-កម្មការិនី​ទាំងនោះ​គ្មានឱកាសការងារថ្មីនោះទេ​ពីព្រោះរោងចក្រនៅជុំវិញខេត្តបន្ទាយមានជ័យទើប​បានទទួលយកពួកគេ​ឱ្យចូលបំពេញការងារ ខណៈក្រសួងក៏នៅសល់ឱកាសការងារប្រមាណជាង ៩ម៉ឺនកន្លែងផ្សេងទៀត។

គិតត្រឹមរសៀលថ្ងៃទី១៦ខែសីហានេះ​ អាជ្ញាធរមិនទាន់បានរកឃើញអ្នកបាត់ខ្លួននៅក្នុងហេតុការណ៍លិចទូកង ខ្នាតអន្តរជាតិ ដែលស្ថិតនៅចំណុចភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល នៅឡើយទេ។ ​នេះបើតាមលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ប្រាប់វិទ្យុបារាំងអន្តរជាតិ ​Rfi នៅរសៀលថ្ងៃទី​១៦សីហានេះ។

នៅថ្ងៃអាទិត្យទី១៦សីហានេះ លោក ហ៊ុន សែន ប្រធានព្រឹទ្ធសភាកម្ពុជា បានចាយពេល៣ម៉ោង ដើម្បីជជែកជាមួយលោក កឹម សុខា មេដឹកនាំអតីតបក្សសង្រ្គោះជាតិ និងកូនស្រីច្បងរបស់លោក គឺកញ្ញា កឹម មនោវិទ្យា។ តាមបណ្តាញសង្គមហ្វេសប៊ុក លោក ហ៊ុន សែន បានបញ្ចេញរូបថតចាប់ដៃយ៉ាងស្និទ្ធស្នាលជាមួយលោក កឹម សុខា និងកោតសរសើរកញ្ញា កឹម មនោវិទ្យា ថា ជាធនធានមនុស្សដ៏ល្អសម្រាប់ជាតិ។

នៅក្នុងសេចក្តីជូនដំណឹងមួយចុះថ្ងៃទី១៣សីហា​ ក្រសួងការពារជាតិបានស្នើឲ្យគ្រប់ស្ថាប័ន និងអង្គភាពចំណុះក្រសួង ចាប់ផ្តើមរៀបចំបើកគណនីធនាគារជូនយោធិនក្នុងសាមីអង្គភាពខ្លួន ឲ្យបានត្រឹមថ្ងៃទី៣០ ខែមិថុនា ឆ្នាំ​២០២៧។ នេះគឺជាយន្តការ​​​​  ​ដើម្បីបង្កើនតម្លាភាព គណនេយ្យភាព ប្រសិទ្ធភាព និងសុវត្ថិភាពក្នុងការគ្រប់គ្រងបៀវត្ស​ក្នុងជួរកងទ័ព។​

មន្ត្រី​នគរបាលជាន់ខ្ពស់កម្ពុជា​អះអាងថា គ្រឿងញៀនជាង​ ១.៣តោនដែលច្រក​​ក្នុងបាវអង្ករខ្មែរ និង​​​​ត្រូវបាន​សមត្ថកិច្ចរបស់ឥណ្ឌូណេស៊ី​​ចាប់បាន​​​​​​កាលពីពេលថ្មីៗនេះ ​​​​មិនមែននាំចេញពីប្រទេស​កម្ពុជានោះទេ។ ​តាមស្នងការដ្ឋាននគរបាលជាតិនៅថ្ងៃទី​​១៦សីហានេះ ​មន្ត្រីនគរបាលជាន់ខ្ពស់កម្ពុជាដាក់ការសន្និដ្ឋានថា​​ ​​​​​ពួកឧក្រិដ្ឋជន​អាចទិញ​បាវអង្ករ​​​ពីព្រំដែនកម្ពុជា-ថៃ ឬត្រូវបានបោះពុម្ព​នៅក្នុងប្រទេសថៃ​​​ រួច​យកទៅដាក់​​គ្រឿងញៀនដ៏ច្រើនសន្ធឹកនោះ​​​​​ ក្នុងគោលបំណង​​សម្អុយឈ្មោះប្រទេសកម្ពុជាប៉ុណ្ណោះ​។ ​អោ ស្រីពេជ្រ​៖

កងទ័ពអ៊ុយក្រែន បាន​វាយប្រហារ​ទៅ​លើ​រោងចក្រ​មួយរបស់រុស្ស៊ី ដែល​ផលិត​គ្រឿងផ្សំ​ឧស្សាហកម្ម​អវកាស ដូចជា​ផ្កាយរណប និងមីស៊ីលជាដើម​​។ នេះបើផ្អែកតាមការប្រកាស របស់​លោក​ហ្សេឡេនស្គី នៅរសៀលថ្ងៃសៅរ៍ទី​១៥សីហា​។ អភិបាលក្រុង Samara ទីតាំងរោងចក្រនេះ បាន​លើកឡើងថា​ពិតជាមាន​ការវាយប្រហារទ្រង់ទ្រាយធំ​។

នៅថ្ងៃសៅរ៍ ទី​១៥សីហា លោក លី ចែម្យុង​ ប្រធានាធិបតីកូរ៉េខាងត្បូង បាន​ស្នើចរចាជាមួយប្រទេស​ផ្តាច់​ការ​កូរ៉េខាងជើង ដើម្បីបញ្ចប់សង្គ្រាមជាអចិន្ត្រៃយ៍​។​ រាល់លើក ការ​ចរចាគ្នា​រវាង​បងប្អូន​គូសត្រូវ​កូរ៉េទាំង២ ​តែងតែ​មាន​ភ្ជាប់​លក្ខខណ្ឌថា​ត្រូវ​រំសាយ​អាវុធនុយក្លេអ៊ែរ។​ តែ​គ្រានេះ​ មេដឹកនាំកូរ៉េខាងត្បូង ​ប្រកាសស្នើចរចា​ជា​ចំហ និង​ដោយ​គ្មាន​​​លក្ខខណ្ឌ ដូច​មុន​នោះឡើយ។ ​​ ​

ថ្ងៃទី​១៥សីហា ក្រុមតាលីបង់​ប្រារព្ធពិធីបុណ្យខួប​គម្រប់៥ឆ្នាំ ​នៃការវិលត្រលប់មកកាន់អំណាចវិញ ដែល​ក្រុមនេះហៅថាជា ការវិលត្រលប់មកវិញ ​នូវឯករាជ្យភាពរបស់អាហ្វហ្កានីស្ថាន​។ ៥ឆ្នាំមកនេះ របបតាលីបង់​ បាន​ដឹកនាំ​អាហ្វហ្កានីស្ថានក្នុងកណ្តាប់ដៃដែក ដោយ​យកច្បាប់អ៊ីស្លាម​ផ្តាច់ការ​ជាត្រីមុខ​។ បន្ថែមពីកត្តាសេដ្ឋកិច្ច ​ជីវភាព​ក្រីក្រលំបាក​ជាទីបំផុត សិទ្ធិសេរីភាព​របស់ប្រជាជនអាហ្វហ្កានីស្ថាន បានធ្លាក់ចុះដុនដាប​ជាខ្លាំង។ ស្ត្រីអាហ្វហ្កានីស្ថាន ត្រូវបានរបប​ផ្តាច់ការអ៊ីស្លាមជ្រុលនិយមនេះ ជាន់ពន្លិច​ឲ្យ​ក្លាយជាទាសករនៅបាតសង្គម ​សង្គម​​ដែល​មានតែមនុស្ស​ប្រុសនិងភាពហិង្សា​ជាកម្លាំងកៀបសង្កត់។

អ្នកនាំពាក្យ​ក្រសួង​បរិស្ថានបានអះអាងនៅថ្ងៃទី១៥ខែសីហានេះថា មន្ត្រីជំនាញបាន និងកំពុងចុះទៅ​ស្រាវជ្រាវ​ករណីរថយន្ត​ធំៗជាច្រើនគ្រឿង ដែលបានដឹកឈើឆ្លងកាត់ផ្លូវជាតិលេខ៧៦ ក្នុងខេត្តមណ្ឌលគិរីកាលពីពេលថ្មីៗនេះ។ ការអះអាងនេះ បន្ទាប់ពីមានការផ្សព្វផ្សាយ ​វីដេអូ បង្ហាញពីរថយន្តសណ្តោងធុនធំជាច្រើនគ្រឿងកំពុងសម្រុកដឹកជញ្ជូនឈើអារ ចេញ-ចូលទីតាំងក្រុមហ៊ុនចំនួន ២ នៅក្នុងស្រុកកោះញែក ខេត្តមណ្ឌលគិរី។

ប្រមុខរដ្ឋាភិបាលកម្ពុជា លោក ហ៊ុន​ ម៉ាណែត នៅថ្ងៃសុក្រទី១៤សីហា បានបង្ហោះរូបថតមួយសន្លឹកជាមួយកញ្ញា កឹម មនោវិទ្យា កូនស្រីច្បងរបស់លោក កឹម សុខា​​ ប្រធានអតីតគណបក្សសង្រ្គោះជាតិ។ លោក ហ៊ុន ម៉ាណែត បានសរសេរថា ក្នុងនាមជាអ្នកនយោបាយជំនាន់ថ្មីដូចគ្នា គឺមានកិច្ចការមួយចំនួនដែលលោក និងកញ្ញា កឹម មនោវិទ្យា អាចរួមសហការគ្នាធ្វើ ដើម្បីឧត្តមប្រយោជន៍របស់ប្រទេសជាតិ។ អ្នកតាមដាននយោបាយស្រុកខ្មែរ បានបង្ហាញការចាប់អារម្មណ៍ចំពោះជំនួបដ៏កម្ររបស់ប្រមុខរដ្ឋាភិបាលកម្ពុជា និងកូនស្រីច្បងរបស់លោក កឹម សុខា។ ពួកគេយល់ថា នេះជាសញ្ញានៃរបត់នយោបាយថ្មីរបស់អ្នកនយោបាយជំនាន់ថ្មីរវាងគណបក្សកាន់អំណាច និងគណបក្សប្រឆាំង។

នៅឥណ្ឌូណេស៊ី​ ​មនុស្ស​យ៉ាងហោច ៣៨ នាក់ ស្លាប់​ព្រោះតែ​គ្រោះរញ្ជួយដីដ៏កាច​សាហាវ កម្រិត​៧,៧ រ៉ិចទ័រ ដែល​កើត​ឡើង​នៅ​ព្រលឹម​​ថ្ងៃសៅរ៍ ទី​១៥សីហា​​នេះ ឯភាគ​ខាងកើត​ប្រទេស​។​ ប្រជាជនច្រើន​ពាន់​នាក់ត្រូវ​ជម្លៀស​រកកន្លែងសុវត្ថិភាព។​ អាជ្ញាធរ​មូលដ្ឋាន​ និង​ក្រុម​ភ្នាក់ងារ​សង្គ្រោះ​ កំពុងតែ​ដុតដៃដុត​ជើង ក​កាយគំនរបាក់បែក ដើម្បី​​សង្គ្រោះមនុស្ស​​ដែល​ជាប់​គាំង​។​  

កាលពីពេលថ្មីៗនេះ មន្រ្តីជាន់ខ្ពស់ពន្ធដារបានអះអាងថា ការចុះធ្វើសវនកម្មពន្ធដារដល់ទីតាំងសហគ្រាស ឬអាជីវកម្មនានាមិនមែនជាការចុះទៅចាប់ទោសកំហុសរបស់អ្នកជាប់ពន្ធនោះទេ តែជាការ​ជួយអ្នកជាប់ពន្ធ តាមរយៈការផ្តល់សេវាអប់រំដល់កន្លែង ជួយ​ត្រួតពិនិត្យ និងកែតម្រូវកំហុសឆ្គងក្នុងកិច្ចការស្វ័យប្រកាសពន្ធនាពេលកន្លងមករបស់សហគ្រាសទាំងនោះ។ សម្រាប់​អ្នកតាមដានសេដ្ឋកិច្ច និង​សង្គម ការធ្វើសវនកម្ម​ពន្ធដារ​ជារឿងត្រឹមត្រូវ តែរឿងដែលត្រូវប្រុងប្រយ័ត្ននោះ​គឺ ​​ដំណើរការ​ធ្វើសវនកម្ម​​ដែលមានស្តង់ដារពីរ។

អាជ្ញាធរថៃបានឃាត់ខ្លួនពលរដ្ឋ​ខ្មែរ​​ចំនួន ១៧នាក់ ក្នុងនោះកុមារ ៧នាក់ ក្នុងប្រតិបត្តិការបង្ក្រាបការ​ដើរសុំទាន នៅតាមបណ្តោយឆ្នេរខ្សាច់ប៉ាតាយ៉ា។ នេះបើតាមកាសែតថៃ Khaosod English ​ចុះផ្សាយថ្ងៃទី១៤សីហា។ តាមរយៈវិទ្យុបារាំងអន្តរជាតិ Rfi នៅថ្ងៃទី​​១៥សីហានេះ មន្ត្រីជាន់ខ្ពស់នៅក្រសួងការបរទេសកម្ពុជាអះអាងថានឹង​ស្នើ​ឱ្យ​មន្ត្រីទូតនៅប្រទេសថៃ​​ស្រាវជ្រាវករណីនេះ។ ​