អ្នកនាំពាក្យរងក្រសួងមហាផ្ទៃលោក ទូច សុឃៈ បានថ្លែងឲ្យដឹងថា មន្ត្រីទាំងបីប្រភេទរបស់ក្រសួងមហាផ្ទៃ នឹងត្រូវបណ្តេញចេញពីក្របខណ្ឌក្រសួងប្រសិនបើពួកគេបើកបរក្រោមឥទ្ធិពលនៃជាតិស្រវឹង ហើយបង្កគ្រោះថ្នាក់ចរាចរណ៍ ឬបង្ករឿងជាមួយអ្នកដទៃ។ ការបញ្ជាក់របស់អ្នកនាំពាក្យរូបនេះ គឺផ្តើមចេញពីការលើកឡើងរបស់លោក ស សុខា រដ្ឋមន្ត្រីក្រសួងមហាផ្ទៃនៅក្នុងកិច្ចប្រជុំមួយ នៅថ្ងៃពុធទី២៦ ខែសីហានេះ ស្តីពីការងារចុះពិនិត្យតាមប៉ុស្តិ៍នគរបាលរដ្ឋបាល និងការងារត្រៀមសម្រាប់កិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦។ ជាការកត់សម្គាល់ កន្លងមកតែងកើតមានជារឿយៗ មន្ត្រីរាជការស៊ីវិល និងកងកម្លាំងប្រដាប់អាវុធ ដែលបានបើកបរក្នុងស្ថានភាពស្រវឹង ហើយបង្កគ្រោះថ្នាក់ចរាចរណ៍នៅតាមដងផ្លូវ។ គ្រោះថ្នាក់ចរាចរណ៍ទាំងនោះ​បាន​ទាក់ទាញ​ការរិះគន់ខ្លាំងពីមហាជន ជាពិសេសនៅតាមបណ្តាញសង្គម ទាក់ទងទៅនឹងភាពជាគំរូរបស់មន្ត្រី ឬសមត្ថកិច្ច ចំពោះ​ប្រជាពលរដ្ឋទូទាំងប្រទេស

អង្គការសង្គមស៊ីវិល​នៅកម្ពុជាកំពុងប្រឈមនឹងភាព​មិនច្បាស់លាស់​ផ្នែកហិរញ្ញវត្ថុ ដោយសារតែជំនួយអភិវឌ្ឍន៍អន្តរជាតិបានថយចុះ។ នេះបើតាមរបាយការណ៍សន្ទស្សន៍ប្រតិបត្តិល្អ​ឆ្នាំ២០២៦ ចេញផ្សាយដោយមជ្ឈមណ្ឌលសប្បុរសធម៌ និងសង្គមអាស៊ី និងវេទិកានៃអង្គការមិនមែនរដ្ឋាភិបាលស្តីពីកម្ពុជា នាថ្ងៃពុធទី២៦ខែសីហា ឆ្នាំ២០២៦។

ចិន​ចង់​បង្ហាញថា ខ្លួន​ក៏យកចិត្តទុកដាក់​លើគុណភាព និង​សុវត្ថិភាព​របស់ទំនិញ​ផលិត​នៅ​ប្រទេស​ចិន។ ជាក់ស្តែង ដើម្បី​លើកកម្ពស់បទដ្ឋាន​សុវត្ថិភាព អាជ្ញាធរ​ចិនទើប​បាន​​ចេញ​បញ្ជា​ឲ្យ​ក្រុមហ៊ុន​​ផលិត​រថយន្ត​អគ្គិសនី​ទាំងអស់​ដែលស្ថិតក្នុងប្រទេសចិន​ ត្រូវ​តែ​ប្រមូល​យកឡានអគ្គិសនីមកវិញ ដើម្បី​​ត្រួត​ពិនិត្យ និង​កែសម្រួល​បច្ចេកទេស។ ចំណាត់ការរបស់​អាជ្ញាធរ​ចិន​នេះកើតឡើង ក្រោយ​ពី ​អាជ្ញាធរ​អាមេរិក​ទទួល​បន្ទុក​សុវត្ថិភាព​ចរាចរណ៍ បាន​បើកការ​ស៊ើប​អង្កេត​លើទ្វារ​ឡានអគ្គិសនី​របស់​ក្រុម​ហ៊ុនអាមេរិក​ Tesla។ ​  

អង្គការសហប្រជាជាតិ និងគណៈកម្មាធិការអន្តរជាតិនៃកាកបាទក្រហម បានព្រមានអំពីហានិភ័យបណ្ដាល​មកពី​​អាវុធស្វ័យប្រវត្តិ (Killer Robot)។ ការអភិវឌ្ឍន៍ដ៏លឿនរហ័សនៃ​អាវុធស្វ័យប្រវត្តិអាចនឹងនាំឱ្យមនុស្សជាតិ «ឆ្លងកាត់បន្ទាត់ក្រហមសីលធម៌» ក្នុងពេលដ៏ខ្លីខាងមុខ ដោយទុកឱ្យម៉ាស៊ីនរ៉ូបូ ជាអ្នកសម្រេចចិត្តសម្លាប់មនុស្ស។

រដ្ឋបាលសហរដ្ឋអាមេរិក បានប្រកាស​នៅថ្ងៃចន្ទ ទី​២៤សីហា ដាក់វិធានការទណ្ឌកម្ម​ថ្មីបន្ថែមទៀត ដើ​ម្បីកាត់​ផ្តាច់ទាំងស្រុងនូវប្រភពចំណូលរបស់​អ៊ីរ៉ង់​។ ទណ្ឌកម្ម​វគ្គនេះ ​មិនដាក់​ទៅលើអ៊ីរ៉ង់​ដោយផ្ទាល់ទេ​ តែដាក់ទៅលើ​ប្រទេសដែលជាដៃគូរកស៊ីជាមួយរបបផ្តាច់ការ​​អ៊ីរ៉ង់។ អ៊ីរ៉ង់បាន​​ចំអកតបមកវិញថា វិធានការទណ្ឌកម្មបន្ថែមនេះ គឺវា​បញ្ជាក់ អំពី​បរាជ័យ​របស់សហរដ្ឋអាមេរិក​ ក្នុងការកាច់​បំបាក់អ៊ីរ៉ង់​។

អាល្លឺម៉ង់បានចាប់បញ្ជូនបុរសជនជាតិអាហ្វហ្កានីស្ថានចំនួន ២៣នាក់ ទៅកាន់ទីក្រុងកាប៊ូលវិញ នៅព្រឹកថ្ងៃអង្គារ ទី ២៥ ខែសីហា។ បើតាមរដ្ឋមន្ត្រីក្រសួងមហាផ្ទៃអាល្លឺម៉ង់ ជនជាតិអាហ្វហ្កានីស្ថានដែលត្រូវចាប់បញ្ជូនទៅប្រទេសកំណើតវិញ សុទ្ធតែជាឧក្រិដ្ឋជនដែលត្រូវបាន​តុលាការអាល្លឺម៉ង់កាត់ទោសពីបទប្រព្រឹត្តឧក្រិដ្ឋកម្ម​ធ្ងន់ធ្ងរ ជាពិសេសបទល្មើសផ្លូវភេទ និង អំពើហិង្សាដែលបណ្តាលឲ្យអ្នកដទៃ​រងរបួស។

នៅ​ក្នុងពិធី​សម្ពោធបើកឱ្យប្រើប្រាស់ជាផ្លូវការនូវ​កំណាត់​ផ្លូវចំនួន​​ ៣​ខ្សែ​ក្នុង​ខេត្ត​ក្រចេះ ​នា​ព្រឹក​ថ្ងៃ​អង្គារ ទី២៥ ខែ​សីហា​ ឆ្នាំ២០២៦​នេះ​ លោកនាយករដ្ឋមន្ត្រី ហ៊ុន ម៉ាណែត បានអះអាងជាថ្មីថា រដ្ឋាភិ​បាល​របស់​លោក​នឹង​មិន​បង្រួម​ក្រសួង​-ស្ថាប័ន​បញ្ជូល​គ្នា​នោះទេ ​តែ​ត្រូវពង្រឹងផ្ទៃ​ក្នុង​ និ​ង​ថែ​រក្សា​អ្វី​ដែល​មាន​ស្រាប់។​ លោក ហ៊ុន​ ម៉ា​ណែត​ បញ្ជាក់​ថា​ រដ្ឋ​នៅ​តែ​យក​​រូប​មន្ត ឬ​ម៉ូ​ដែល​ «​ពង្រឹង​ជាជាង​ពង្រីក» និង​មិន​យក​តាម​គំរូ​នៃ​ការ​រៀប​ចំ​រចនា​សម្ព័ន្ធប្រទេស​ឱ្យ​ដូច​ប្រទេស​ដទៃ​ទេ​។​

នៅថ្ងៃចន្ទទី២៤ ខែសីហា ឆ្នាំ២០២៦ ក្រុមអ្នកនយោបាយប្រឆាំងនៅឯក្រៅប្រទេស ដែលធ្វើសកម្មភាពក្រោមឈ្មោះ «រដ្ឋាភិបាលឯករាជ្យ ២៣តុលា» បានអះអាងពីការចូលផ្តល់សក្ខីកម្មនៅតុលាការព្រហ្មទណ្ឌអន្តរជាតិ ជុំវិញពាក្យបណ្តឹងទាមទារឲ្យចាប់ខ្លួនមេដឹកនាំថៃ ពាក់ព័ន្ធនឹងឧក្រិដ្ឋកម្មសង្រ្គាម។ ក្រុមមន្ត្រីរដ្ឋាភិបាល២៣តុលា បានលើកឡើងពីជោគជ័យ នៅក្នុងជំនួបជាមួយរដ្ឋអាជ្ញានៃតុលាការព្រហ្មទណ្ឌអន្តរជាតិ នៅទីក្រុងឡាអេ មុន​នឹង​រំពឹងថា ICC នឹងកោះហៅមេដឹកនាំថៃទៅសាកសួរ។ ក៏ប៉ុន្តែ អ្នកតាមដាននយោបាយកម្ពុជាខ្លះហាក់​គ្មានជំនឿ និងខ្លះទៀតមានជំនឿតិចតួចថា ICC នឹងមានចំណាត់ការលើមេដឹកនាំថៃ ក្រោយការស្តាប់សក្ខីកម្ម ដែលផ្តល់ដោយក្រុមអ្នកនយោបាយប្រឆាំងកម្ពុជា។

ក្នុង​សប្តាហ៍នេះ មហោស្រព​ភាពយន្ត​និយាយភាសា​បារាំងនៅក្រុង​អង់ហ្គូឡែម ប្រទេស​បារាំង បាន​ឧទ្ទិសកិត្តិយស​ដល់​ប្រទេស​កម្ពុជា​ ក្នុង​​វិស័យជាច្រើន​។​ ក្រៅពីចាក់​បញ្ចាំងកុនខ្មែរ ចំនួន​៩ ស្តីអំពី​សម័យ​កាលផ្សេងៗគ្នា​ ក៏​មាន​ពិព័ណ៌រូប​ថ​ត​ដ៏កម្រ ​ជាង​៤០សន្លឹក ឆ្លុះបង្ហាញ​ពី​​ជីវភាព​ប្រជាជន​ និងភាព​ដ៏សម្បូរបែបរបស់​កម្ពុជា នាសម័យសង្គម​រាស្ត្រនិយម​​​។ លើសពីនេះ មហោស្រព​ភាពយន្ត​និយាយភាសា​បារាំងលើកទី​១៩ ​ក៏ជា​​ស្ពានភ្ជាប់​ទំនាក់ទំនង​និងកិច្ចសហការក្នុង​ផ្នែកជា​ច្រើន​ រវាង​ក្រុង​ អង់ហ្គូឡែម និង​ខេត្ត​កំពង់​ធំ ។ សូមស្តាប់​សេចក្តីរាយការណ៍​របស់​ ហេង ឧត្តម  

ប្រទេសស៊ីរីត្រូវបានអាមេរិក​សម្រេច​ដកចេញជាផ្លូវការពីបញ្ជីខ្មៅ បញ្ជី“ក្រុមប្រទេសគាំទ្រភេរវកម្ម”។ សេចក្តីសម្រេច​ជាផ្លូវការ​ដែល​ក្រសួង​ការបរទេសអាមេរិក​បាន​ប្រកាស នៅថ្ងៃចន្ទ ទី ២៤ ខែសីហា ត្រូវបានគេមើលឃើញថា ជា​ជំហាន​សំខាន់​មួយ​សម្រាប់​បន្ធូរ​ទណ្ឌកម្ម និង​ការបើកផ្លូវឲ្យសេដ្ឋកិច្ចស៊ីរីអាចភ្ជាប់ខ្លួនឡើងវិញជាមួយពិភពលោក។

ធនាគារជាតិនៃកម្ពុជា និងអង្គការសហប្រជាជាតិប្រចាំនៅកម្ពុជា(UN) អះអាងថា សកម្មភាពអាទិភាពចំនួន ១៦ ក្នុងចំណោម ២២ សម្រាប់កែលម្អវិស័យមីក្រូហិរញ្ញវត្ថុ ត្រូវបានអនុវត្តយ៉ាងពេញលេញ។ យ៉ាងណាក៏ដោយ អ្នកជំនាញផ្នែកសេដ្ឋកិច្ចជំរុញឱ្យភាគីពាក់ព័ន្ធបន្តផ្តោតលើការពង្រឹងប្រព័ន្ធទិន្នន័យឥណទាន ការការពារអតិថិជន និងការប្រឹក្សាបំណុល ដើម្បីកាត់បន្ថយហានិភ័យបំណុលរបស់អ្នកខ្ចីប្រាក់នៅកម្ពុជា។ នេះបើតាម​ការចុះផ្សាយ​របស់​អង្គការ​សហប្រជាជាតិ​នៅកម្ពុជា នៅថ្ងៃ​អង្គារ​ទី ២៥​សីហានេះ។ ស៊ឹម ចាន់សំណាង រាយការណ៍ព័ត៌មាននេះ៖

ប្រធានាធិបតីរុស្ស៊ី លោក វ្លាឌីមៀរ ពូទីន កំពុងរង់ចាំដំណើរទស្សនកិច្ចរបស់ប្រធានព្រឹទ្ធសភាកម្ពុជា លោក ហ៊ុន សែន ទៅកាន់រុស្ស៊ីនាពេលដ៏ឆាប់ខាងមុខនេះ។ នេះជាការបញ្ជាក់របស់អនុរដ្ឋមន្ត្រីការបរទេសរុស្ស៊ី លោក Andrew Rudenko ក្នុងជំនួបជាមួយ លោក ហ៊ុន សែន កាលពីរសៀលថ្ងៃទី២៤ ខែសីហា ឆ្នាំ២០២៦នៅវិមានព្រឹទ្ធសភា។ នេះបើតាមការថ្លែងរបស់ លោក ជា ធីរិទ្ធ អ្នកនាំពាក្យព្រឹទ្ធសភាកម្ពុជា។

រដ្ឋមន្ត្រីអង់គ្លេសទទួលបន្ទុកតំបន់ឥណ្ឌូប៉ាស៊ីហ្វិក លោកស្រី Rosie Winterton កំពុងបំពេញទស្សនកិច្ចលើកដំបូងរយៈពេល ៣ថ្ងៃនៅកម្ពុជា ចាប់ពីថ្ងៃទី២៥ ដល់ទី២៧ ខែសីហា ឆ្នាំ​២០២៦។ អំឡុងពេលទស្សនកិច្ចនេះ លោកស្រី Winterton នឹងអំពាវនាវឲ្យមានកិច្ចសន្ទនាដោយ​សន្តិ​វិធី អំពីជម្លោះព្រំដែនកម្ពុជា-ថៃ។ នេះបើតាម​សេចក្តី​ប្រកាសព័ត៌មាន​របស់ស្ថានទូតចក្រភពអង់គ្លេស នៅថ្ងៃអង្គារទី២៥ ខែសីហា។

រដ្ឋបាលខេត្តកោះកុងនៅថ្ងៃទី២៤ ខែសីហា ឆ្នាំ២០២៦ បានច្រានចោលការចោទប្រកាន់ដែលថា អាវុធត្រូវបានដឹកចេញពីកម្ពុជា ចូលទៅក្នុងប្រទេសថៃ និងអះអាងថា ការចោទប្រកាន់នេះគ្មានមូលដ្ឋានច្បាស់លាស់។ ប្រតិកម្មរបស់រដ្ឋបាលខេត្តកោះកុងដូចនេះ ធ្វើឡើងបន្ទាប់ពីអាជ្ញាធរថៃបានចាប់ខ្លួនជនសង្ស័យម្នាក់ ព្រមទាំងរឹបអូសអាវុធប្រភេទ AK-47 ចំនួន ២ដើម និងគ្រាប់កាំភ្លើងជាង ២៤ ០០០គ្រាប់ នៅខេត្តត្រាត កាលពីថ្ងៃទី២១ ខែសីហាកន្លងទៅ។

កម្ពុជាមានដំរីស្រុកប្រមាណជាង ៧០ក្បាល និងមានដំរីព្រៃចន្លោះពី ៦០០ ទៅ ៨០០ក្បាល ដែលកំពុងរស់នៅក្នុងព្រៃធម្មជាតិនៃភូមិភាគឦសាន តំបន់ជួរភ្នំក្រវាញ និងតំបន់ព្រៃឡង់។ ដោយឡែក សត្វដំរីស្រុកចំនួន ៧ក្បាល ដែលរស់​តាម​បែប​ធម្មជាតិ នៅជ្រលងដំរីប្រៀបបានជាឆ័ត្រការពារធនធានធម្មជាតិ និងវប្បធម៌របស់ជនជាតិដើមភាគតិចពូនង។ គម្រោងជ្រលងដំរី​ បានក្លាយជាតំបន់អេកូទេសចរណ៍ដ៏ទាក់ទាញ ប៉ុន្តែការធ្លាក់ចុះចំនួនភ្ញៀវទេសចរអន្តរជាតិក្នុងឆ្នាំ២០២៦នេះ កំពុងរំខានដល់សកម្មភាពថែទាំសត្វដំរីស្រុក៕

ក្នុង​ពេល​ទទួល​ជួប​មហាក្សត្រ​ហ្សកដានី អាប់ឌូឡា ២ ​នៅទីក្រុង​ប៉េកាំង លោកប្រធានាធិបតី​ចិន ស៊ី ជីនពីង បាន​អំពាវនាវ​ឱ្យដោះស្រាយ​វិបត្តិ​នៅ​មជ្ឈិមបូព៌ា តាម​ផ្លូវការ​ទូត និង​គោរព​អធិបតេយ្យភាព​នៃ​គ្រប់​ប្រទេស​ទាំង​អស់ នៅក្នុង​តំបន់។ ចំណែក​ហ្សកដានី ចង់​ឃើញ​ចិន​លូក​ដៃ​ក្នុង​សំណុំ​រឿង​ប៉ាឡេស្ទីន ច្រើន​ជាងនេះ។

ជនល្មើស ឈ្មោះ ឆេង ភារុណ ដែលបានយកដបស្រាវាយលើគូទំនាស់កាលពីយប់ថ្ងៃទី២២សីហាកន្លងទៅ ហើយរត់គេចខ្លួនចូលទៅប្រទេសវៀតណាម ត្រូវបានសមត្ថកិច្ចវៀតណាមឃាត់ខ្លួន និងប្រគល់មកកម្ពុជាវិញនៅថ្ងៃទី២៤ ខែសីហា ឆ្នាំ២០២៦នេះ ដើម្បីអនុវត្តទោស។ ការឃាត់ខ្លួននេះ ធ្វើឡើងបន្ទាប់ពីរដ្ឋមន្ត្រីក្រសួងមហាផ្ទៃ លោក ស សុខា បានទុកពេលឲ្យជនដៃដល់ ឆេង ភារុណ ចំនួន ​៤៨ម៉ោង ដើម្បីចូលខ្លួនមកសារភាព និងអនុវត្តនីតិវិធីច្បាប់។

ក្នុងសេចក្តីជូនដំណឹងនៅថ្ងៃចន្ទ ទី២៤ ខែសីហា ឆ្នាំ២០២៦ និយ័តករទូរគមនាគមន៍កម្ពុជា បានព្រមានប្រាប់សាធារណជនឱ្យប្រុងប្រយ័ត្នចំពោះបុគ្គល ដែលអះអាងថាអាច «ការពារគណនី» ឬ«ការពារទំព័រ» បណ្តាញសង្គមជាថ្នូរនឹងប្រាក់។ និយ័តករទូរគមនាគមន៍កម្ពុជាបញ្ជាក់ថា ការអះអាងបែបនេះអាចជាការបោកប្រាស់ ដោយអ្នកប្រើប្រាស់អាចប្រឈមនឹងការបាត់បង់ប្រាក់ ការលួចព័ត៌មានសម្ងាត់ និងបាត់បង់ការគ្រប់គ្រងគណនី ឬទំព័ររបស់ខ្លួន។ 

គណបក្សនយោបាយក្រៅរដ្ឋាភិបាលចំនួន៥ បានស្នើទៅកាន់លោក​ ហ៊ុន សែន ប្រធានព្រឹទ្ធសភាកម្ពុជា អន្តរាគមន៍កែសម្រួលឡើងវិញ លើសេចក្តីព្រាងច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាលឃុំ-សង្កាត់ ដែលរដ្ឋសភាទើបតែអនុម័ត។ ក្នុងលិខិតចំហ ដាក់ទៅកាន់លោក ហ៊ុន សែន នាថ្ងៃទី២៣សីហា គណប​ក្សនយោបាយទាំង៥ យល់ថា ការធ្វើវិសោធនកម្មច្បាប់ស្តីពីការគ្រប់គ្រងរដ្ឋបាលឃុំ-សង្កាត់ បានធ្វើឲ្យបាត់បង់តម្លៃប្រជាធិបតេយ្យ និងតុល្យភាពអំណាចនៅថ្នាក់មូលដ្ឋាន។

មន្ត្រីជាន់ខ្ពស់វៀតណាមលើកឡើងថា ការបណ្តុះបណ្តាល និងការដោះដូរបទពិសោធន៍រវាងមន្ត្រីវ័យក្មេង មានសារៈសំខាន់ក្នុងការពង្រឹងការយល់ដឹង ការជឿទុកចិត្ត និងចំណងមិត្តភាពរវាងវៀតណាម ឡាវ និងកម្ពុជា។ ការលើកឡើងនេះធ្វើឡើងក្នុងពេលដែលមន្ត្រីវ័យក្មេងមកពីគណបក្សកាន់អំណាចនៃប្រទេសទាំងបី កំពុងចូលរួមកម្មវិធីបណ្តុះបណ្តាលនៅទីក្រុងហាណូយ កាលពីថ្ងៃទី២២ សីហា ឆ្នាំ២០២៦។ អ្នកវិភាគនយោបាយយល់ថា កិច្ចសហប្រតិបត្តិការដែលពាក់ព័ន្ធនឹងគណបក្សកុម្មុយនិស្តបែបនេះ មិនគួរប៉ះពាល់ដល់រដ្ឋធម្មនុញ្ញ និងគោលការណ៍ប្រជាធិបតេយ្យរបស់កម្ពុជាឡើយ។

Saint Raphael (សាំង រ៉ាហ្វាអ៊ែល) ទីក្រុង​ភាគខាងត្បូង​បារាំង​ជ្រើសរើស​ប្រវត្តិសាស្រ្ត​ខ្មែរក្រហម​របស់កម្ពុជា​សម្រាប់កម្មវិធីប្រារព្ធរំលឹកខួបជនរងគ្រោះ​ដោយសារពួកផ្តាច់ការ​កុម្មុយនិស្តនៅក្នុងពិភពលោក។ នៅក្នុងកម្មវិធី​រយៈពេល​ពីរថ្ងៃ (ពីថ្ងៃសៅរ៍ដល់ថ្ងៃអាទិត្យទី​២៣​សីហា)  សាលាក្រុង​Saint Raphaël បានរៀបចំ​កម្មវិធី​សិល្បៈ ប្រវត្តិសាស្រ្ត ទាក់ទង​នឹង​ប្រទេស​កម្ពុជា​សម្រាប់​ប្រជាជន​និងអ្នកទេសចរណ៍។ ឈាង បុប្ផា​ជូនព័ត៌មាននេះផ្ទាល់ពី​ទីក្រុង​ Saint Raphaël។

កញ្ញា កឹម មនោវិទ្យា ប្រេសិតពិសេសរបស់នាយករដ្ឋមន្ត្រី​កម្ពុជា បានចាប់​ផ្តើម​ការងាររបស់ខ្លួន ដោយ​ជួបឯកអគ្គរដ្ឋទូតសហភាពអឺរ៉ុបប្រចាំកម្ពុជានៅក្នុងសប្តាហ៍នេះ។ តាមកូនស្រីច្បងរបស់លោក កឹម សុខា រូបនេះ ភាគីទាំងពីរបានលើកឡើងអំពីជម្លោះកម្ពុជា-ថៃ និងអំពីសក្តានុពលរបស់កម្ពុជាក្នុងការទាក់ទាញការ​វិនិយោគពីអឺរ៉ុប។ សហភាពអឺរ៉ុបដែលបានដកហូតការអនុគ្រោះពន្ធ(EBA)ពីកម្ពុជា២០% តាំងពីឆ្នាំ២០២០ បន្ទាប់ពីចាប់ខ្លួន លោក កឹម សុខា និងរំលាយគណបក្សសង្គ្រោះជាតិ។ តើបេសសកម្មរបស់កញ្ញា កឹម មនោវិទ្យា អាចធ្វើឲ្យសហភាពអឺរ៉ុបផ្តល់​EBA ២០%មកវិញ និងជួយគាំទ្រកម្ពុជាក្នុងជម្លោះព្រំដែនកម្ពុជា-ថៃឬទេ?

ដំណើរការបូកសរុបពិន្ទុបេក្ខជនប្រឡងបាក់ឌុប ប្រព្រឹត្តទៅដោយរលូន គ្មានបញ្ហាអ្វីគួរឲ្យកត់សម្គាល់ឡើយ។ នេះគឺជាអះអាងរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ នាថ្ងៃអាទិត្យទី២៣សីហា។ បើគ្មានបញ្ហាអ្វីកើតឡើងទេ លទ្ធផលនៃការប្រឡងបាក់ឌុបឆ្នាំ២០២៦ នឹងត្រូវប្រកាសនាថ្ងៃទី២កញ្ញាខាងមុខ។

នៅសប្តាហ៍​ក្រោយ ចិននឹង​​បង្ហោះយានអវកាស​ ទៅ​បំពេញ​​បេសកកម្ម​ដ៏​ស្មុគស្មាញ​បំផុត​ បើ​គិត​តាម​បែប​បច្ចេកទេស៖​ គឺ​ជាការ​ស្វែង​រក​ប្រភព​ទឹក​ត្រជាក់កក​នៅ​ក្នុងរូងរណ្តៅ​​ ជិត​តំបន់​ប៉ូល​នៃ​ភព​ព្រះចន្ទ ដែល​គ្មាន​ទទួល​​ពន្លឺ​​សោះ។ បេសកកម្មនេះ​ជា​ដំណាក់កាល​ដ៏ចម្បង​មុន​នឹង​ឈាន​ទៅ​សម្រេច​កម្មវត្ថុ​ដាក់​វត្តមាន​មនុស្ស​ជា​ប្រចាំ​នៅ​ឋាន​ព្រះចន្ទ នៅមុន​ឆ្នាំ​២០៣០ និង​ការ​ដាក់​ឱ្យ​ដំណើរការ​ស្ថានីយ៍​ស្រាវជ្រាវ​រួម​ជាមួយ​រុស្ស៊ី​នៅ​ឆ្នាំ​២០៣៥។

ប្រធានាធិបតីអ៊ុយក្រែន លោក វ្លូឌីមៀរ ហ្សេឡេនស្គី បានច្រានចោលសំណើរៀបចំការបោះឆ្នោត និងបានចាត់ទុកការបោះឆ្នោត ក្នុងអំឡុងប្រទេសកំពុងមានសង្រ្គាម ថានឹងអាចបង្កគ្រោះថ្នាក់ដល់អ៊ុយក្រែន។ លោក ហ្សេឡេនស្គី បានបញ្ជាក់ជំហរ នៅថ្ងៃអាទិត្យ ទី២៣ សីហា បន្ទាប់ពីអតីតរដ្ឋមន្រ្តីការពារជាតិ បានបង្ហោះសារវីដេអូអំពាវនាវឲ្យរៀបចំការបោះឆ្នោត ជ្រើសរើមេដឹកនាំថ្មីនៅអ៊ុយក្រែន។

ភាព​តានតឹង​កំពុង​កើត​មាន​រវាង​អ៊ីស្រាអែល​ តួកគី និង​សហរដ្ឋ​អាមេរិក។ ឯកអគ្គរដ្ឋ​ទូត​និង​ជា​ប្រេសិត​ពិសេស​អាមេរិកនៅ​តួកគី​បាន​រិះគន់ទង្វើ​វាយប្រហារ​របស់​​អ៊ីស្រាអែល​លើ​ស៊ីរី​​ថាជា​ការ​បង្កើតជម្លោះ​ឥតប្រយោជន៍។ ចំណែក​តួកគី​បាន​ចេញ​ដីកា​អន្តរជាតិ​តាម​ចាប់​ខ្លួន​នាយករដ្ឋមន្ត្រី​អ៊ីស្រាអែល នេតាន់យ៉ាហ៊ូ តែម្តង។ ប៉ុន្តែ​អ៊ីស្រាអែល​បាន​បញ្ចេញ​ប្រតិកម្មច្រានចោល​ពាក្យ​រិះគន់​អាមេរិក ហើយ​ចាត់​ទុក​ប្រធានាធិបតី​តួកគី​ថាជា​ជន​ផ្តាច់ការរើងអើង​​អ៊ីស្រាអែល។ ហេតុ​អ្វី​បាន​ជា​តួកគី​និង​អ៊ីស្រាអែល​តាន​តឹង​នឹង​គ្នា​កាន់​តែ​ខ្លាំង​យ៉ាង​ដូច្នេះ?

អំពើ​ហិង្សា​នៅភាគ​ខាង​ត្បូង​ប្រទេស​ថៃ​ បាន​កំរើក​ឡើង​វិញ ដោយ​មាន​ការ​វាយប្រហារ​ដុតបំផ្លាញ​អគារសាធារណៈ​ ជាច្រើនកន្លែងប្រដាក់​គ្នា និង មានករណីប្លន់ប្រដាប់អាវុធ ដែរ។ េហតុការណ៍នេះកើតឡើង នាយប់ថ្ងៃសៅរ៍ ទី២២ សីហា នៅខេត្តណារា៉ធីវ៉ាត់ ខេត្តយ៉ាឡា និងខេត្តប៉ាតានី។ ភ្លាមៗនោះ អាជ្ញាធរមូលដ្ឋានបានចុះទៅដល់កន្លែងកើតហេតុ និងប្រកាសដាក់បម្រាមគោលចរ ក្នុងខេត្តទាំងបី រហូតដល់ម៉ោង ៦ព្រឹកថ្ងៃអាទិត្យ។

អង្គភាពប្រឆាំងអំពើពុករលួយ (ACU) នឹងបញ្ជូនលោក ថូ សំណាង អតីតអគ្គនាយកក្រសួងការបរទេស និងគ្នីគ្នា ២នាក់ទៀតទៅកាន់អយ្យការអមសាលាដំបូងរាជធានីភ្នំពេញ នៅរសៀលថ្ងៃអាទិត្យនេះ ពាក់ព័ន្ធការលួចបញ្ចេញសន្លឹកទិដ្ឋាការខុសច្បាប់យកទៅផ្តល់ឱ្យជនបរទេសប្រើប្រាស់ក្នុងប្រតិបត្តិការឆបោកតាមអនឡាញ។ នេះបើតាមអ្នកនាំពាក្យ ACU លោក សយ ចាន់វិចិត្រ ប្រាប់វិទ្យុបារាំងអន្តរជាតិ RFI នៅព្រឹកថ្ងៃទី២៣ ខែសីហា ឆ្នាំ២០២៦។

នៅថ្ងៃទី២២សីហា ឯកអគ្គរដ្ឋទូតចិនប្រចាំកម្ពុជា លោក វ៉ាង វិនពីន បានចុះទៅខេត្តបាត់ដំបងដើម្បីពិនិត្យមើលសក្តានុពលនៃវិស័យកសិ-ឧស្សាហកម្មរបស់ខេត្តនេះ។ បើតាមទីភ្នាក់ងារព័ត៌មាន AKP​ លោក វ៉ាង វិនពីន ត្រូវបានអមដំណើរដោយមន្ត្រីសំខាន់ៗរបស់កម្ពុជា រួមមានរដ្ឋមន្ត្រីក្រសួងឧស្សហកម្ម លោក ហែម វណ្ណឌី រដ្ឋមន្ត្រីក្រសួងយុត្តិធម៌ លោក កើត រិទ្ធ រដ្ឋមន្ត្រីក្រសួងធនធានទឹក លោក ថោ ជេដ្ឋា និងអភិបាលខេត្តបាត់ដំបង លោក សុខ លូ​ ព្រមទាំងមន្ត្រីពាក់ព័ន្ធផ្សេងទៀត។

គិតត្រឹមថ្ងៃទី២២ ខែសីហា ឆ្នាំ២០២៦នេះ ខេត្តស្ទឹងត្រែង ក្រចេះ ត្បូងឃ្មុំ និងកំពង់ចាមដែល​ស្ថិតនៅជាប់ដងទន្លេមេគង្គបាន និងកំពុងរងផលប៉ះពាល់ដោយសារជំនន់ទឹកភ្លៀង និងជំនន់ទន្លេមេគង្គ ដោយបាន​ប៉ះពាល់ដល់ពលរដ្ឋជាង​ ១ម៉ឺន​គ្រួសារ ក្នុងនោះ​១ ​៣០០គ្រួសារ ត្រូវបានជម្លៀសចេញទៅកាន់ទីទួលសុវត្ថិភាព។ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយឱ្យដឹង​​នៅថ្ងៃទី​២៣សីហា​នេះ​​ ខេត្តក្រចេះត្រូវ​រងផលប៉ះពាល់ធ្ងន់ធ្ងរជាងគេក្នុងចំណោមខេត្តទាំង ៤។

ចំណូលពន្ធលើល្បែងស៊ីសងបានធា្លក់ចុះប្រមាណ ២៥.៨% ក្នុងរយៈពេល ៦ខែ ឆ្នាំ២០២៦ បើធៀបនឹង៦ខែកាលពីឆ្នាំ២០២៥។ ជាការកត់សម្គាល់ ការធ្លាក់ចុះនៃចំណូលពន្ធលើល្បែងស៊ីសងកើតឡើងនៅអំឡុងពេលដែលរដ្ឋាភិបាលកម្ពុជាកំពុងរឹតបន្តឹងច្បាប់លើកាស៊ីណូល្បែងស៊ីសង ដោយសារតែរកឃើញមានកាស៊ីណូមួយចំនួនពាក់ព័ន្ធនឹងឧក្រិដ្ឋកម្មឆបោកអនឡាញ។