ተመራጩ ፕሬዝደንት ዶናልድ ትረምፕ ጥፋተኛ በተባሉበት የአፍ ማሳዢያ ክፍያ  ክስ ጉዳይ  ዳኛው የቅጣት ውሳኔያቸውን እንዳያሰሙ እንዲታገድ ጠበቆቻቸው ጠቅላይ ፍ/ቤቱን ጠይቀዋል። ዳኛዋን መርቻን ፣ ትረምፕ ባለፈው ሐምሌ የንግድ ሰነዶችን በማጭበርበር በ34 ክሶች ጥፋተኛ ኾነው በመገኘታቸው የቅጣት ውሳኔያቸውን ከነገ በስቲያ ዐርብ ሊሰጡ  ቀጠሮ ይዘዋል። የቅጣት ውሳኔው መሰማቱ በፕሬዝደንታዊ ተቋሙና በፌዴራል መንግሥቱ ሥራ ላይ ፍትሃዊ ያልሆነ ተጽዕኖ እና ጉዳት ያደርሳል በሚል ጠቅላይ ፍርድ ቤቱ እንዲያግድ የትረምፕ ጠበቆች ጠይቀዋል። ዳኛው በትረምፕ ላይ የእሥርም ኾነ የገንዘብ ቅጣት ወይም   ወይም የአመክሮ ገደብ ያለው ትዕዛዝ እንደማያስተላልፉባቸው አመላክተዋል። ጠቅላይ ፍርድ ቤቱ ዳኛው እስከ ነገ ሐሙስ ድረስ መልስ እንዲሰጡ ጠይቋል። የትረምፕ ጠበቆች ጠቅላይ ፍ/ቤቱ ከዚህ በፊት ሰጥቷቸው የነበረውን ያለመከሰስ መብት በመጥቀስ ዐርብ ሊሰማ ቀጠሮ የተያዘለትን የቅጣት ውሳኔ እንዳይከናወን ጠይቀዋል። የትረምፕ ጠበቆች በተጨማሪም ከክሱ ጋራ ተያይዘው የቀረቡ አንዳንዶቹ ማስረጃዎች በፕሬዝደንታዊ ያለመከሰስ መብት መሠረት ይፋ መውጣት እንደሌለባቸው ቢጠይቁም፣ ዳኛው እንደማይስማሙ አስታውቀዋል።

በኢትዮጵያ፣ 84 የግል ከፍተኛ ትምህርት ተቋማት በመማር ማስተማር ሥራው እንዳይቀጥሉ እንደተወሰነባቸው የሀገሪቱ የትምህርትና ሥልጠና ባለሥልጣን አስታወቀ። ርምጃው የተወሰደው፣ ተቋማቱ ዳግም እንዲመዘገቡ የወጣውን መመሪያ ባለማክበራቸው እንደሆነ የባለሥልጣን መሥሪያ ቤቱ ቃለአቀባይ ማርታ አድማሱ ለአሜሪካ ድምፅ አስታውቀዋል፡፡ አስተያየት የሰጡን፣ የዘርፉ ተዋናዮች ደግሞ ለዳግመ ምዝገባው የተሰጠው ጊዜ አጭር ነው፣ የምዝገባ መመሪያውም ውይይት ያልተደረገበትና የማያሠራ ነው ሲሉ ቅሬታቸውን ገልጸዋል፡፡ /ዝርዝሩን ከተያያዘው ፋይል ይከታተሉ/

የየመን አማፂያን በአሜሪካ የጦር መርከቦች እና የንግድ መርከቦች ላይ ጥቃት ለመፈፀም ሲጠቀሙባቸው የነበሩ የጦር መሣሪያ ማከማቻዎችን መደብደቡን የአሜሪካ ጦር አስታውቋል። በርካታ ድብደባዎች መደረጋቸውንና በአሜሪካ የጦር ኃይል ዓባላትም ሆነ መሣሪያዎች ላይ ጉዳት እንዳልደረሰ የአሜሪካ ጦር ማዕከላዊ ዕዝ አስታውቋል።  የዕዙ መግለጫ ድብደባው የተፈፀመበትን የመሣሪያ ማከማቻ ሥፍራ አላሳወቀም። ድብደባዎቹ በኢራን የሚደገፉት የሁቲ አማፂያን በቀጠናው በሚገኙ አጋሮች፣ በወታደራዊ እና የንግድ መርከቦች ላይ የደቀኑትን ስጋት ለመቀነስ የተፈፀሙ መሆናቸውንም ዕዙ አስታውቋል። በሰሜን ምዕራብ አምራን ግዛትና መዲናዋ ሰነአ በምትገኝበት የሰነአ ግዛት ድብደባ መፈፀሙን አል ማሲራ የተሰኘው የሁቲ ቴሌቪዥን ጣቢያ አስታውቋል። የሁቲ አማፂያን ከፍልስጤማውያን ጋራ ያላቸውን አጋርነት ለማሳየት በሚል ከአንድ ዓመት በላይ በእስራኤልና በቀይ ባሕር እንዲሁም በኤደን ባሕረ ሰላጤ በሚመላለሱ መርከቦች ላይ ሚሳዬሎችን ሲተኩሱ ቆይተዋል።

በአፍሪካ ምሥራቃዊ የውቅያኖስ ጠረፍ ላይ የምትገኘው ትንሿ የደሴት ሀገር ሲሼልስ ሳትጠበቅ ትላልቅ ኃያላን ፉክክር ቦታ ሆናለች፡፡ ቻይና ከሲሼልስ ጋራ ለዓመታት ዲፕሎማሲያዊ ግንኙነቶችን ስትገነባ ቆይታለች፡፡ ዩናይትድ ስቴትስ ግን ወሳኝ ወደ ሆነቸው የህንድ ውቅያኖስ ደሴት የተመለሰችው በቅርቡ ነው። ኬት ባርትሌት ቻይና እና ዩናይትድ ስቴትስ የደሴቲቱን ነዋሪዎች ልብ ለመማረክ ምን እያደረጉ እንደሆነ ለመመልከት ወደሲሸልስ ማሄ ደሴት ተጉዛለች። ዝርዝሩን ከተያያዘው ፋይል ይከታተሉ።

ኬኒያ ውስጥ ካለፈው 2024 ዓመተ ምሕረት መስከረም ወር ወዲህ ባለሥልጣናት የመዘገቧቸው በሴቶች ላይ የተፈጸሙ ወሲባዊ እና ሊሎችም ጾታዊ ጥቃቶች ቁጥር ከሰባት ሺህ አንድ መቶ መብለጡ ተነግሯል። የሀገሪቱ የደኅንነት ሚኒስቴር እየተባባሰ ላለው በሴቶች እና በልጃገረዶች ላይ የሚፈጸም ጥቃት መፍትሔ የሚፈልግ ልዩ ቡድን አቋቁሟል። መሐመድ ዩሱፍ ከናይሮቢ ያጠናቀረውን ዘገባ ከተያያዘው ፋይል ይከታተሉ።

የኢየሱስ ክርስቶስ ልደት - ገና በዓል በልዩ ኹኔታ ከሚከበርባቸው የኢትዮጵያ አካባቢዎች በቀዳሚነት የምትጠቀሰው፣ በዐማራ ክልል ሰሜን ወሎ ዞን ላስታ ወረዳ የምትገኘው የላሊበላ ከተማ ናት። በዩኔስኮ የሰው ልጆች ቅርስ ኾኖ የተመዘገቡት የ11 ውቅር አብያተ መቅደሶች መገኛዋ ላሊበላ፣ በገና በዓል ሰሞን፣ ዐያሌ የአገር ውስጥ እና የውጭ ጎብኚዎችንና ተሳላሚ ምእመናንን በሞቀ አቀባበል ታስተናግዳለች። በዐማራ ክልል የቀጠለው በትጥቅ የተደገፈ ግጭት ከመቀስቀሱና ከመስፋፋቱ በፊት፣ ለክብረ በዓሉ ከተለያዩ ስፍራዎች ወደ ላሊበላ ከተማ የሚጎርፉት ጎብኚዎች ብዛት በሚሊዮኖች የሚቆጠር እንደነበር፣ የከተማዋ አስተዳደር መረጃ ያመለክታል። የከተማዋ ነዋሪዎች፣ «ከወትሮው የተቀዛቀዘ ነው፤» ብለዋል። የሰሜን ወሎ ዞን ባህል እና ቱሪዝም መምሪያ ሓላፊ ገነት ሙሉጌታ ደግሞ፣ በዓሉ በተለመደው መልኩ እንዲከበር አስቀድመው ጥሪ ሲያደርጉ መቆየታቸውን ገልጸው፣ «በዓሉን የሚያከብሩ ሰዎች ወደ ከተማ እየገቡ ነው፤» ብለዋል። በተጨማሪም፣ የበዓሉን ሃይማኖታዊ እና ባህላዊ ይዘት የሚያስረዱ ባለሞያዎች በፕሮግራሙ ላይ መካተታቸውን ጠቁመዋል። የኢትዮጵያ ኦርቶዶክስ ተዋሕዶ ቤተ ክርስቲያን የባሕረ ሐሳብ ሊቃውንት፣ «ተረፍ/ተውሳክ» እያሉ የሚጠሯት ጳጉሜን የምትጨምረውን የቀናት ቁጥር ተከትሎ የኢየሱስ ክርስቶስ ልደት - ገና፣ በየአራት ዓመቱ ታኅሣሥ 28 ቀን ከዚያ በቀር ግን ታኅሣሥ 29 ላይ ይውላል። ዘንድሮም፣ ነገ ታኅሣሥ 29 ቀን ይከበራል። በኢትዮጵያ የክርስትና እምነት ተከታዮች ዘንድ ከሚከበሩት በዓላት፣ ገና በደማቅነቱ ይወሳል፡፡ ስያሜው፣ «ጌና» ከሚለው የግሪክ ቃል የተወረሰ ሲኾን፣ ትርጉሙም ልደት ማለት ነው። ቃሉ የአረብኛም መሠረት እንዳለውና ምስጋና፣ ብልጥግና የሚል ትርጉምም እንዳለው ሊቃውንቱ ያስረዳሉ። በቤተ ልሔም የክርስቶስ መወለድ የተበሠረበት፣ መላእክት እና እረኞች በአንድነት ያመሰገኑበት፣ ሦስቱ የጥበብ ሰዎች እጅ መንሻ ያቀረቡበት ገናናው ገና፣ ከመንፈሳዊ ይዘቱ ባሻገር ያለው ማኅበራዊ እና ባህላዊ ክንዋኔው በብዙኀኑ ዘንድ ተናፋቂ እንደሚያደርገው ሊቃውንቱ ያስረዳሉ። ከወጥ አለት የተፈለፈሉትን ዐሥራ አንዱን ውቅር አብያተ መቅደስ እንዳነፃቸው የሚታመነውና ከ13ኛው መቶ ክፍለ ዘመን የዛጉዌ ነገሥታት አንዱ የነበረው የቅዱስ ላሊበላም ልደት፣ ታኅሣሥ 29 ቀን እንደሚከበር፣ የኢትዮጵያ ኦርቶዶክስ ተዋሕዶ ቤተ ክርስቲያን መዛግብት በሰሜን ወሎ አገረ ስብከት የደብረ ሮሃ የቅዱስ ላሊበላ ገዳም ጽ/ቤት የሕዝብ ግንኙነት ሓላፊ ዲያቆን ተስፋ ውቤ ገና ያስረዳሉ። በላሊበላ የበዓለ ገና አከባበር፣ «ቤዛ ኩሉ» ተብሎ የሚጠራው በጠዋቱ የሚደረገው የሊቃውንቱ ዝማሬ፣ ልዩ እና ታላቅ የክብረ በዓሉ ትዕይንት ነው። የሚከናወነውም ከጸሎተ ቅዳሴው በኋላ ቤተ ማርያም በተባለው ቤተ መቅደስ ሲኾን፣ ከታች ባለነጭ ካባ ካህናት፣ ከላይ ደግሞ ባለጥቁር ካባ ካህናት በቅዱስ ያሬድ ዜማ «ቤዛ ኩሉ ዓለም ዮም ተወልደ» ማለትም «የዓለም ኹሉ መድኃኒት ዛሬ ተወለደ» እያሉ ይዘምራሉ። በጥቅሉ፣ ለኢትዮጵያ ኦርቶዶክስ ተዋሕዶ ቤተ ክርስቲያን እምነት ተከታዮች ቅዱስ መካን በኾነችውና በዓለም አቀፉ ማኅበረሰብ ዘንድ ደግሞ የቅርስ ማእከል ኾና በተመዘገበችው ላሊበላ፣ ገና የገነነ ስፍራ አለው፡፡ አማኞች ከተለያዩ የአገሪቱ ክፍል ወድ ሥፍራው በመሔድ ያከብራሉ። ኾኖም “የዘንድሮውን ገና በጸጥታ መደፍረስና በኑሮ ውድነት ምክንያት በቀድሞ ድምቀቱ ለማክበር ይቸግራል፤” ይላሉ ለአሜሪካ ድምፅ አስተያየታቸውን የሰጡ ምእመናን፡፡ የዐማራ ክልል መንግሥት ደግሞ “በዓሉን አብረን እናክብር” የሚል መልእክት ሲያስተላልፍ አስፈላጊው ቅድመ ዝግጅት መደረጉን በመጥቀስ ነው፡፡ ዘገባውን ከተያያዘው ፋይል ይከታተሉ።  

በህወሓት አመራሮች መካከል የተፈጠረው ልዩነት በድርድር ለመፍታት፣ በክልሉ የጸጥታ አመራር አካላት ለወራት የተካሔደው ጥረት እንዳልተሳካ የክልሉ ምክትል ፕሬዝዳንት እና የፀጥታ ዘርፍ ኃላፊ ሌተናንት ጄኔራል ታደሰ ወረደ ገለጹ። የተከፋፈሉት የህወሓት አመራሮች፣ ሁለቱም አሸናፊ የሚኾኑበትን መንገድ ከመምረጥ ይልቅ አንደኛው አንደኛውን ለማጥፋት በመፈለጋቸው ድርድሩ ሊሳካ አልቻለምም ብለዋል። ከሁለቱም ወገን ምላሽ ለማግነት ያደረግነው ጥረት አልተሳካም።

የካናዳው ጠቅላይ ሚንስትር ጀስቲን ትሩዶ ከለዘብተኛው ፓርቲ መሪነት ራሳቸውን ማግለላቸውን ዛሬ አስታውቀዋል። በአመራራቸው ላይ ተቃውሞ የበረታባቸው ትሩዶ  በተለይም የገንዘብ ሚንስትራቸው ከሥልጣናቸው መልቀቃቸው በመንግሥታቸው ውስጥ ያለው ችግር የበረታ መሆኑን አመላክቶ ነበር። በፓርቲያቸው ውስጥ ያለው መፋተግ የሚያመለክተው በመጪው ምርጫ ለመሳተፍ እርሳቸው ጥሩ አማራጭ አለመሆናቸውን እንደሆነ ትሩዶ ተናግረዋል። ፓርቲው አዲስ መሪ እስከሚመርጥም በጠቅላይ ሚንስትርነት እንደሚቆዩ ትሩዶ አስታውቀዋል። ከሃያ ቀናት በኋላ ሥራውን መልሶ እንደሚጀምር ይጠበቅ የነበረው ፓርላማም እስከ መጋቢት አጋማሽ ድረስ እንደማይመለስ ተነግሯል። ባለው ጊዜም ለዘብተኛ ፓርቲው መሪውን እንደሚመርጥ ይጠበቃል። በካናዳ ሦስቱም ዋና ተቃዋሚ ፓርቲዎች ፓርላማው በሚከፈትበት ወቅት ለዘብተኛ ፓርቲውን የትምምን ድምጽ ነፍገው ከሥልጣን እንደሚያስወግዱ አስታውቀው ነበር። ጀስቲን ትሩዶ ወደ ሥልጣን የመጡት ከአስር ዓመታት በፊት እ፡አ፡አ በ2015 ነበር። ይህም ለ10 ዓመታት የወግ አጥባቂ ፓርቲው ሃገሪቱ ከመራ በኋላ መሆኑ ነው። የምግብ ሸቀጥ ዋጋ እና የመኖሪያ ቤት መወደድ እንዲሁም የስደተኞች ቁጥር መጨመር ድምጽ ሰጪዎች በትሩዶ ላይ እንዲያማርሩ ምክንያት እንደሆነ ተነግሯል።

የአሜሪካ ጦር በፈጸመው የአየር ጥቃት 10 የአል ሻባብ አባላት መገደላቸውን የሶማሊያ መንግሥት አስታውቋል። የሶማሊያ የማስታወቂያ ሚኒስቴር በመግለጫው እንዳለው፣ የአየር ጥቃቱ የተፈጸመው ቢርሃኒ በተባለና ከኪሲማዮ ሰሜን ምዕራብ 60 ኪሎ ሜትር ርቀት ላይ በሚገኝ ሥፍራ ነው። የሚኒስቴሩ መግለጫ የወጣው ትላንት እሑድ ሲኾን፣ የአየር ጥቃቱ መቼ እንደተፈጸመ ግን አላሳወቀም። የሶማሊያው የማስታወቂያ ሚኒስቴር። “ኻዋሪጅ (ወይም አፈንጋጮች) ጥቃት ለማድረስ በማቀድ ላይ ሳሉ  ተደምስሰዋል። በጥቃቱ ሲቪሎች ላይ ጉዳት አልደረሰም” ብሏል  “የሶማሊያ ኅይሎች አሜሪካ ዋናው አካል ከሆነው ዓለም አቀፍ አጋር ጋራ በመተባበር ኻዋሪጆችን ለማጥፋትና በሶማሊያ ሕዝብ ላይ የሚያደርሱትን ጥቃት ለመከላከል ቁርጠኞች ናቸው” ሲል አክሏል የማስታወቂያ ሚኒስቴሩ። ይህ በእንዲህ እንዳለ የሶማሊያ ጦር የአፍሪካ ዕዝ ዛሬ እንዳስታወቀው ከሶማሊያ መንግሥት ጋራ በመተባበር ባደረገው የአየር ጥቃት ሞሃመድ ሚሬ ወይም አቡ አብዲራህማን በሚል ስም የሚታወቅ ከፍተኛ የአል ሻባብ አመራር ዓባል ከሁለት ሳምንታት በፊት በተፈጸመ የአየር ጥቃት መግደሉን አረጋግጧል። የሶማሊያ መንግሥት ሞሃመድ ሚሬ መገደሉን ከአንድ ሳምንት በፊት አስታውቆ ነበር። አፍሪኮም በአወጣው መግለጫ « ሚሬ በሌላ ስሙ አቡ አብዲራህማን  ባለፉት 15 ዓመታት  በአልሻባብ አገዛዝ ሥር ለዋሉት የሶማሊያ  አካባቢዎች ኃላፊው ነበር » ብሎታል። ሚሬ ለአያሌ ዓመታት ከቆዩ የአልሻባብ አባላት አንዱ እንደነበረ የጠቀሰው መግለጫው በቡድኑ  የሀገር አስተዳደር ሚኒስትርነት  እንዲሠራ እና በቡድኑ ስልታዊ ውሳኔዎች ቁልፍ ሚና እንደነበረው መግለጫው አውስቷል። በተወሰደው ጥቃት በሰላማዊ ሰዎች ላይ ጉዳት አለመድረሱን መግለጫው አክሎ አመልክቷል። የአሜሪካው የጦር ኃይል የአፍሪካ ዕዝ አዛዥ ጄኔራል ማይክል ላንግሊ « በብሔራዊ ጸጥታ ስትራተጂያችን በዝርዝር እንደተመለከተው አሜሪካ የሚፈጠሩ የሽብርተኝነት ስጋቶችን በቁርጠኝነት መከላከሏን ትቀጥላለች» ማለታቸውን መግለጫው ጠቅሷል።  እ አ አ የ2024 የዓለም አቀፍ የሽብርተኝነት ሰንጠረዥ ሽብርተኛ ቡድኖች ከባድ ዓለም አቀፍ ስጋት መሆናቸው መቀጠሉን አጉልቶ አሳይቷል። ከእነዚህ ስጋቶች መካከል አንዱ አልሻባብ ነው« ያለው መግለጫው » በቀጣናው ከእኛ ጋራ ተመሳሳይ አመለካከት ካላቸው  አጋሮቻችን ጋራ ኾነን አልሻባብን እና ሌሎችንም አደገኛ አካላት እንዋጋቸዋለን« ብሏል። እነዚህን ድንበር ተሻጋሪ ስጋቶች በትብብር መታገል ለቀጠናው መረጋጋት እና ብልጽግና ይጠቅማል» ሲል  አውስቷል። አፍሪኮም  ስለተካሄደው ጥቃት ለጊዜው በዝርዝር ከመናገር ተቆጥቧል። 

ኢትዮጵያዊው አንጋፋ ፖለቲከኛ እና የንግድ ሰው አቶ ቡልቻ ደመቅሳ በ94 ዓመታቸው ዛሬ ታኅሣሥ 28 ቀን 2017 ዓ.ም ከዚህ ዓለም በሞት መለየታየቸውን የአሜሪካ ድምፅ ከቤተሰባቸው መረዳት ችሏል። አቶ ቡልቻ ከ1995 ዓ.ም ጀምሮ በኢትዮጵያ ፖለቲካ በግንባር ቀደምትነት ከሚሳተፉ የፖለቲካ ሰዎች አንዱ ነበሩ። አቶ ቡልቻ የተቃዋሚው የኦሮሞ ፌደራሊስት ዲሞክራሲያዊ ንቅናቄ መስራቾች አንዱ ሲኾኑ፣ በአንድ ወቅት የሕዝብ ተወካዮች ምክር ቤት አባልም ነበሩ። ከ1990ዎቹ ጀምሮ በሰላማዊ የተቃውሞ ፖለቲካ ውስጥ ሲሳተፉ ቆይተዋል። አቶ ቡልቻ በ1967 ዓ.ም በፋይናንስ ምክትል ሚኒስትርነት፣ ሀገራቸውን ወክለውም በዓለም ባንክ ቦርድ አባልነት አገልግለዋል። የኢትዮጵያው ጠቅላይ ምኒስትር ዐብይ አህመድ  በአቶ ቡልቻ ደመቅሳ ህልፈት የተሰማቸውን ሐዘን በማኅበራዊ ትስስር ገጻቸው አጋርተዋል። ጠቅላት ሚኒስትሩ አቶ ቡልቻ “በሚችሉት ሁሉ ሀገራቸውንና አፍሪካን ያገለገሉ፣ በአቋማቸው ጽኑ፣ ሕዝቦችን ለማቀራረብ የተጉ፣ እውነት ነው ብለው ያመኑትን የትምና መቼም የሚናገሩ” ነበሩ ብለዋል። የአቶ ቡልቻ የቀብር ሥነ-ሥርዓት ፕሮግራም ልጆቻቸው ከሚኖሩበት አሜሪካ ኢትዮጵያ ከደረሱ  በኋላ እንደሚወሰንም ከቤተሰብ ያገኘነው መረጃ ያመለክታል።

ጦርነት ባደቀቃት ሱዳን አብዛኞቹ ሕፃናት የኾኑ ከ30 ሚሊዮን በላይ ሰዎች ርዳታ እንደሚሹ የተባበሩት መንግሥታት ድርጅት ዛሬ አስታውቋል። 30.4 ሚሊዮን ከሚኾኑት ውስጥ 20.9 ለሚሆኑት 4.2 ቢሊዮን ዶላር የገንዘብ ርዳታ የጠየቀው ተመድ፣ በሱዳን ያለውን ሁኔታ “ከዚህ በፊት ታይቶ የማይታወቅ ሰብአዊ ቀውስ” ሲል ገልጾታል። ላለፉት 20 ወራት በሱዳን ሠራዊት እና በፈጥኖ ደራሽ ኃይሉ መካከል ሲካሄድ የቆየው ጦርነት ሕዝቡን ለቸነፈር አጋልጧል። በጦርነቱ በ10ሺሕ የሚቆጠሩ ሰዎች ሲገደሉ፣ 8 ሚሊዮን የሚሆኑት በሃገር ውስጥ ተፈናቅለዋል። ከጦርነቱ ቀደም ብሎም 2.7 ሚሊዮን ሰዎች ተፈናቅለው የነበረ ሲሆን፣ ይህም ሱዳንን በዓለም ትልቁ የሃገር ውስጥ ተፈናቃይ ያለባት ሃገር ያደርጋታል። ተጨማሪ 3.3 ሚሊዮን ሰዎች ደግሞ ሃገር ጥለው ተሰደዋል። በመሆኑም ከጦርነቱ በፊት ይገመት ከነበረው 50 ሚሊዮን የሱዳን ሕዝብ ውስጥ አንድ አራተኛ የሚሆነው ተፈናቅሏል። በአምስት አካባቢዎች ረሃብ የታወጀ ሲሆን፣ እስከ መጪው ግንቦት ድረስ ተጨማሪ አምስት አካባቢዎች ለረሃብ እንደሚጋለጡ ይገመታል። 8.1 ሚሊዮን የሚሆኑ ሰዎች በቅርቡ ረሃብ ሊገጥማቸው እንደሚችል ተነግሯል። በሱዳን ሠራዊት የሚደገፈው መንግሥት ረሃብ መግባቱን ሲያስተባብል፣ ረድኤት ድርጅቶች ደግሞ የቢሮክራሲ ማነቆ እና ሁከት ለተጎጂዎች እንዳይደርሱ ማድረጉን ይናገራሉ። የሱዳን ሠራዊት እና የፈጥኖ ደራሽ ኅይሉ ረሃብን እንደ ጦር መሣሪያ በመጠቀም ክስ ይቀርብባቸዋል። በሱዳን የሚካሂደው ጦርነት ያደረሰው ጉዳት ከፍተኛ ቢሆንም፤ በመካከለኛው ምሥራቅና በዩክሬን በሚካሄዱት ጦርነቶች ምክንያት “የተረሳ ጦርነት” እንደሆነ ይነገራል።  

ባለፈው ሳምንት እሁድ በአንድ መቶ ዓመታቸው በሞት የተለዩት የ39ኛው የዩናይትድ ስቴትስ ፕሬዝደንት ጂሚ ካርተር አስክሬን ሽኝት መርሐ ግብሮች በኖሩበት በጆርጂያ ክፍለ ግዛት ትላንት ቅዳሜ ተጀምሯል። ለስድስት ቀናት በሚዘልቀው የሽኝት ሥነ ሥርዓት አስከሬናቸው ትላንት በትውልድ ከተማቸው በሚገኘው የቤተሰባቸው መኖሪያ እና እርሻ በኩል በክብር አጀብ አልፎ አትላንታ ከተማ ወደሚገኘው የካርተር ፕሬዝደንታዊ ማዕከል ለሐዘንተኞች እና አድናቂዎቻቸው ስንብት ተቀምጧል። በመቀጠል ወደ ዋሽንግተን ይሸኝ እና በተመሳሳይ በዩናይትድ ስቴትስ ምክር ቤት ሕንጻ « ካፒቶል ሮተንዳ» አዳራሽ በክብር አርፎ ስንብት ይደረጋል። ሐሙስ ከጠዋቱ አራት ሰዓት ላይ በዋሽንግተን ብሔራዊ ካቴድራል የሽኝት መርሐ ግብር ይከናወናል። /የአሜሪካ ድምጹ ኬን ፋራቦ የኖቤል የሰላም ተሸላሚውን ፕሬዝደንት ጂሚ ካርተር ሕይወት እና የሕዝባዊ አገልግሎት ታሪክ በሚመለከት ያጠናቀረውን ዘገባ ከተያያዘው ፋይል ይከታተሉ/  

የጣሊያን ጠቅላይ ሚኒስትር ጆርጂያ ሜሎኒ ትላንት ቅዳሜ ከዶናልድ ትራምፕ ጋር ለመገናኘት ወደ ፍሎሪዳ ድንገተኛ ጉዞ አድርገዋል። የአውሮፓ መሪዎች እአአ ጥር 20 ከሚካሄደው በዓለ ሲመት በፊት ከትራምፕ ጋር ያላቸውን ግኑኝነት ለማጠናከር ይፈልጋሉ፡፡ የትራምፕ የማር-አ-ላጎ ሪዞርት አባላት ተመራጩ ፕሬዘዳንት ትራምፕ ሜሎኒን ሲያስተዋውቋቸው በጭብጨባ ሲቀበሏቸው የሚያሳዩ ቪድዮዎች በማህበራዊ ሚድያ ተጋርተዋል፡፡ «ይህ በጣም አስደሳች ነው፡፡ እኔ እዚህ ያለሁት የጣሊያን ጠቅላይ ሚኒስትር ከሆነች ድንቅ ሴት ጋር ነው» ሲሉ ትራምፕ ለማር-አ-ላጎ አባላት መናገራቸውንም ሚድያዎች ዘግበዋል፡፡ ሜሎኒ ከእአአ 2022 መገባደጃ ጀምሮ በጣልያን የቀኝ ክንፍ ጥምረትን በመምራት ያመጡትን መረጋጋት ከግምት ውስጥ በማስገባት ለትራምፕ ጠንካራ አጋር ተደርገው እየተቆጠሩ ነው። ትራምፕ በምርጫው እንዲያሸንፍ ከሩብ ቢሊየን ዶላር በላይ ወጪ ካደረገው ከቢሊየነር የቴክኖሎጂ ዋና ስራ አስፈፃሚ ኤሎን ማስክ ጋርም የቅርብ ግንኙነት መፍጠራቸው ይነገራል፡፡ የአውሮፓ ህብረት እና የክልል ጉዳዮች ሚኒስትር ቶማሶ ፎቲ ዛሬ እሁድ እንደተናገሩት ስብሰባው አስቀድሞ ያልተገለፀ ቢሆንም ጣሊያን «በሁለቱ ዓለማት በሆኑት የአውሮፓ ህብረት እና አሜሪካ መካከል የዲፕሎማሲ ድልድይ » ልትሆን እንደምትችል ያሳያል ብለዋል። የሜሎኒ ጉዞ የዩናይትድ ስቴትስ ፕሬዝዳንት ጆ ባይደን ከመጭው ሃሙስ እስከ ጥር 12 ሮምን ለመጎብኘት ከያዙት ቀጠሮ አስቀድሞ የተደረገ ነው። ትራምፕ በህዳር ምርጫ ባይደንን አሸንፈው ወደ ኋይት ሀውስ ለመመለስ በዝግጅት ላይ ናቸው። ትራምፕና ሜሎኒ ስላደረጉት ውይይት ዝርዝር መረጃ ባይገለጽም ስለ ሩሲያ ዩክሬን ጦርነት፣ ንግድ ነክ ጉዳዮች፣ መካከለኛው ምስራቅ እና በቴህራን ስለታሰረው ጣሊያናዊ ጋዜጠኛ ሁኔታ ለመነጋገር ሜሎኒ አስቀድመው እቅዱ እንደነበራቸው የጣሊያን መገናኛ ብዙሃን ዘግበዋል።  

የሶሪያ የሽግግር መንግስት ሚኒስትሮች ፕሬዝዳንት በሽር አል አሳድን ከስልጣን ካነሱ በኋላ ለመጀመሪያ ጊዜ በኳታር ባደረጉት ጉብኝት ዩናይትድ ስቴትስ በደማስቆ ላይ የጣለችውን ማዕቀብ እንድታነሳ አሳስበዋል፡፡  የኳታር ውጭ ጉዳይ ሚኒስቴር ባወጣው መግለጫ የባህረ ሰላጤው ሀገራት ጠቅላይ ሚኒስትሮች ከሶሪያ ጊዜያዊ የውጭ ጉዳይ ሚኒስትር አሳድ አል-ሻይባኒ፣ የመከላከያ ሚኒስትር ሙርሃፍ አቡ ቃስራ እና ከአዲሱ የስለላ ሃላፊ አናስ ኻታብ ጋር መነጋገራቸውን አስታውቋል።  ኳታር እንደሌሎች አረብ ሀገራት ሶርያ በአሳድ አስተዳደር ስር እያለች የዲፕሎማሲያዊ ግንኙነቷን ወደነበረበት አልመለሰችም።  ከኳታር የውጭ ጉዳይ ሚኒስትር መሐመድ ቢን አብዱላዚዝ አልኩላይፊ ጋር ያደረጉትን ውይይት ተከትሎ የሶሪያ ጊዜያዊ የውጭ ጉዳይ ሚኒስትር አሳድ አል-ሻይባኒ አሜሪካ በሶሪያ ላይ የጣለችው ማዕቀብ እንዲነሳ በድጋሚ ጥሪ አቅርበዋል።  ጊዜያዊ የውጭ ጉዳይ ሚኒስትሩ እርምጃዎቹን ለሃገራቸው ፈጣን ማገገም እንቅፋት ነው ሲሉ መንግስታቸው “ዩናይትድ ስቴትስ እነዚህን ማዕቀቦች እንድታነሳ በድጋሜ ይጠይቃል” ሲሉ ለሃገር ውስጥ መገናኛ ብዙሃን ተናግረዋል።   በታህሳስ ወር መጨረሻ ላይ ኳታር በሶሪያ ላይ የተጣለውን ማዕቀብ በፍጥነት እንዲነሳላት ጥሪ አቅርባ እንደነበረም ዘገባው አስታውሷል፡፡ 

የደቡብ ኮሪያው ፕሬዝዳንት ዩን ሱክ ዮል የጸጥታ ሃላፊ የፖለቲካ ቀውሱን ወደ ሌላ ከፍተኛ ግጭት ሊገፋው ይችላል ባሉት የተከሰሱትን መሪ በቁጥጥር ስር ለማዋል ከሚደረገው ጥረት ጋር መተባበር እንደማይችሉ ዛሬ እሁድ ተናግረዋል፡፡  የእስር ትዕዛዙ ቀነ ገደብ ነገ ሰኞ እኩለ ሌሊት ላይ የሚጠናቀቅ ሲሆን የጸጥታ ሃላፊው ፓርክ ቾንግ-ጁን በትብብር ማዘዣው ዙሪያ ያለውን የሕግ ክርክርም ላለመተባበራቸው ምክንያት አድርገው ጠቅሰዋል።  አስተያየቶቹ የተሰጡት የሴኡል ፍርድ ቤት የእስር ማዘዣው ህገወጥ እና ልክ ያልሆነ ነው በማለት የፕሬዘዳንቱ ጠበቆች ያቀረቡትን ቅሬታ ውድቅ ካደረገ በኋላ ነው ሲሉ የደቡብ ኮርያ ሚድያዎች መዘገባቸውን የጠቀሰው ሮይተርስ ተጨማሪ አስተያየት ለመጠየቅ ወደ ፍርድ ቤት ያደረገው የስልክ ጥሪም ምላሽ እንዳላገኘም ገልጿል፡፡  ዮን እአአ ታህሳስ 3 ቀን ማርሻል ህግን ለማወጅ ባደረጉት ያልተሳካ ሙከራ ምክንያት በቁጥጥር ስር እንዲውሉ የእስር ትዕዛዝ የወጣባቸው የመጀመሪያው የደቡብ ኮሪያ ፕሬዚደንት ሆነዋል፡፡ ይህም በእስያ ባለአራተኛዋ ትልቅ ኢኮኖሚዋና የአሜሪካ ቁልፍ አጋር በሆነችው ደቡብ ኮርያ የውስጥ የፖለቲካ ትርምስ ቀስቅሷል፡፡  የዩናትድ ስቴትስ ውጭ ጉዳይ ሚኒስትር አንቶኒ ብሊንከን ከሃገሪቱ ከፍተኛ ባለስልጣናት ጋር ለመነጋገር ዛሬ እሁድ ሴኡል ይደርሳሉ ተብሏል፡፡  ይህ በእንዲህ እንዳለ በዋና ከተማይቱ ሴኡል ከባድ በረዶ ባለበት በፕሬዘዳንት ዮን መኖሪያ አካባቢ በሺዎች የሚቆጠሩ ተቃዋሚዎች ባደረጉት ሰልፍ የእስር ማዘዣው ውዝግብ ፈጥሯል፡፡  የተወሰኑ ሰልፈኞች ፕሬዘዳንቱ እንዲታሰሩ ሲጠይቁ ሌሎች ሰልፈኞች ደግሞ እስሩን ተቃውመው ድምጻቸውን አሰምተዋል፡፡   

የቀድሞ የግሪክ ጠቅላይ ሚንስትር እና ሀገራቸው ወደ አውሮፓ የጋራ መገበያያ ገንዘብ እንድትቀላቀል ያደረጉት ኮስታስ ሲሚቲስ በ88 አመታቸው መመሞታቸውን የሃገሪቱ የመንግስት መገናኛ ብዙሃን ዘግበዋል፡፡  በሙያቸው የስነህንጻ ባለሙያ የሆኑት ኮስታስ ሲሚቲስ የሶሻሊስት ፓሶክ ፓርቲ መስራችም ናቸው፡፡   ግሪክንም እአአ ከጥር 1996 እስከ 2004 ድረስ ለስምንት አመታት በጠቅላይሚንስትርነት መርተዋል፡፡ ይህም በሀገሪቱ ረዥሙ የስልጣን የቆይታ ጊዜ የነበራቸው መሪም አድርጓቸዋል፡፡  ግሪክ የአውሮፓ ህብረትን እአአ በ 2001 እንድትቀላቀል ከማድረጋቸው በተጨማሪ ትልቅ የመሰረተ ልማት ግንባታ መርሃ ግብር በማካሄድ ሃገራቸው እአአ በ2004 የተካሄደውን የኦሊምፒክ ውድድርን እንድታዘጋጅ በማስቻላቸው ይታወሳሉ ። ቆጵሮስ የአውሮፓ ህብረትን በዚሁ አመት እንድትቀላቀልም ድጋፍ ማድረጋቸውም ይነሳል፡፡ 

በኢትዮጵያ በተደጋጋሚ ርዕደ መሬት በተከሰተበት ማዕከል አዋሳኝ ከሚገኙት አፋር፣ ኦሮሚያ እና አማራ ክልል አካባቢዎች 80 ሺሕ ነዋሪዎችን ማራቁን መንግሥት አስታወቀ። በርዕደ መሬት መለኪያ እስከ 5.8 ሬክተር ስኬል የተመዘገበ መንቀጥቀጥ ዛሬ አርብ ታኅሣሥ 25 ቀን 2017 ዓ.ም ሌሊት መከሰቱን የኢትዮጵያ የአሜሪካ የጂኦሎጂካል ሰርቬይ መሥሪያ ቤት አስታውቀዋል። መሥሪያ ቤቱ በአወጣው መረጃ፣ ቦታው ከኦሮሚያ ክልል አቦምሳ ከተማ 56 ኪሎ ሜትር እና ከአዳማ ከተማ 146 ኪሎ ሜትር ርቀት እንደሚገኝ የዕለት ሁኔታ በሚያወጣበት መረጃ አጋርቷል። ርዕደ መሬቱ በመጠን እና በድግግሞሽ እየጨመረ መምጣቱን የጠቆመው የኮምዩኒኬሽን መስሪያ ቤቱ መግለጫ፣ ዛሬ ቅዳሜ የተመዘገበው 5.8 ሬክተር ስኬል መጠን ከእስካኹኖቹ የጨመረ መኾኑን ያሳያል። ዛሬ ቅዳሜ ውድቅት ሌሊት ላይ የተከሰተው የመሬት መንቀጥቀጥ ንዝረት ከዚኽ ቀደሞቹ ጠንከር ብሎ አዲስ አበባ፣ አዳማ መተሃራ እና ሌሎች ከተሞች መሰማታቸውን ነዋሪዎች ገልጸዋል። ንዝረቱ የተሰማበት መጠን እንደየ አካባቢዎች የተለያየ መኾኑን ከነዋሪዎቹ ያገኘነው መረጃ ያመለክታል።   በአዲስ አበባ ዩኒቨርሲቲ የጂኦ ፊዚክስ ሕዋ ሣይንስ እና አስትሮኖሚ ተቋም የሴስሞሎጂ ትምህርት ክፍል ኃላፊ፣ ፕሮፌሰር አታላይ አየለ ርዕደ መሬቱ አፋር ውስጥ በምስራቅ ሸዋ ፈንታሌ አካባቢ ዶፈን በተባለ ተራራ መሀል ላይ መከሰቱን ለአሜሪካ ድምጽ ተናግረዋል። አክለውም “ርዕደ መሬቱ የተከሰተው እዛው ሰሞኑን ሲከሰትበት በነበረው አፋር ክልል ውስጥ አዋሽ ፈንታሌ እና ዶፈን ተራራ መሀል ነው። ሌሎቹ አካባቢዎች የተሰማው የርዕደ መሬቱ ንዝረት ነው” ብለዋል። የኢትዮጵያ ከርሰ ምድር ጥናት ተቋም ዛሬ የተከሰተው መጠኑ ከፍ ያለው 5.8 የደረሰው የመሬት መንቀጥቀጥ 10 ኪሎ ሜትር እንደሚሸፍን ጠቁሟል። ከዛሬው ክስስተት በኋላ መግለጫ ያወጣው የኢትዮጵያ መንግሥት፣ ለችግሩ ተጋላጭ ናቸው የተባሉ አካባቢዎችን በመለየትም 12 ቀበሌዎች ላይ መንግሥት ከተለያዩ የሞያ ዘርፎች የተውጣጡ የአደጋ ጊዜ ሠራተኞችን በቦታው በማሰማራት የጉዳቱን መጠን አሰሳ በማድረግ ላይ እንደሚገኝ አስታውቋል። 80 ሺሕ  ነዋሪዎችን ርዕደ መሬት ከተሰተባቸው አካባቢዎች እያራቀ መኾኑን ገልጿል። በተያያዘም የኢትዮጵያ አደጋ ስጋት ሥራ አመራር ኮሚሽን ዛሬ ታኅሣሥ 26 ቀን 2017 ዓ.ም በአወጣው መግለጫ፣ በአፋር ክልል አዋሽ ፈንታሌ እና ዱለቻ ወረዳዎች እንዲሁም በኦሮሚያ ክልል ፈንታሌ ወረዳ ነዋሪዎች የርዕደ መሬቱ ክስተት ሊያደርሰው ለሚችል አደጋ ተጋላጭ ናቸው ተብለው መለየታቸውን አስታውቋል።   ኮሚሽኑ በአፋር ክልል በአዋሽ ፈንታሌና ዱለቻ ወረዳዎች ውስጥ 35 ሺሕ የሚኾኑ ነዋሪዎች ለችግሩ ተጋላጭ መሆናቸውን አመልክቶ፣ በአዋሽ ፈንታሌ ስድስት ቀበሌዎች ውስጥ ከሚገኙ 15 ሺሕ ነዋሪዎች እስከ አሁን 7ሺሕ የሚሆኑት ወደ ሌላ ስፈራ ተጓጉዘዋል ብሏል፡፡ በዱለቻ ወረዳ ካሉት 20ሺሕ ተጋላጭ ነዋሪዎችም፣ እስከ አሁን ከ6ሺሕ በላይ ነዋሪዎች አካባቢውን ለቀው መውጣታቸውን አክሏል። በኦሮሚያ ክልል ፈንታሌ ወረዳም ከአምስት ቀበሌዎች 16 ሺሺ 182 ነዋሪዎች ለአደጋው ተጋላጭ መሆናቸውን ጠቅሷል። እስከ አሁን ድረስ 7 ሺህ 350 ነዋሪዎች ከስፍራው መውጣታቸውን አስታውቋል፡ቀሪዎቹ ነዋሪዎችም በሚቀጥሉት ቀናት ውስጥ ከስፍራው እንደሚንቀሳቀሱ የጠቀሰው የኮሚሽኑ መግለጫ፣ በአጠቃላይ ለ70 ሺሕ ነዋሪዎች ድጋፍ እየተደረገ መኾኑን አክሏል። ንዝረቱ የተሰማቸው ነዋሪዎች የአቦምሳ ከተማ ነዋሪ የኾነችው ዙምራ ማሞ፣ አርብ ሌሊት ለቅዳሜ አጥቢያ ዘጠኝ ሰዓት አካባቢ የመሬት መንቀጥቀጡን ንዝረት መስማቷን ለአሜሪካ ድምጽ ገልጻለች። “ልጄ አልተኛ ስላለኝ ይዤው መሬት ላይ ተኝቼ ነበር፣ ከዚያ መሬቱ ተንቀጠቀጠ፣ የቤቴ መስታዎት አኹን ረግፏል” ስትል ገልፃለች። ዙመራ ክስተቱ ለደቂቃ መቆየቱን ገልጻ ከዚህ ቀደም ከተነገረው የጠነከረ እንደነበር ተናግራለች። ሌላው በፈንታሌ ወረዳ ነዋሪ የኾነው አቶ አባይኔ ኡርጎ፣ የተሰማው ንዝረት ከዚኽ ቀደሞቹ ከፍ ያለ እንደነበር ተናግሯል። አቶ አባይነህ የሌሊቱ ንዝረት ለአንድ ደቂቃ ያህል መቆየቱን ገልጸው፣ ኃይሉም ከዚኽ ቀደሞቹ ጠንከር ያለ እንደነበር ጠቁመዋል። ክስተቱ በአፋር ክልልና በፈንታሌ አካባቢዎች በተደጋጋሚ እንደሚከሰት አቶ አባይነህ ጠቅሰው፣ የአካባቢው ነዋሪዎች በፍራቻ ከቤታቸው እያደሩ እንደኾነም ተናግረዋል።   ሌላው ንዝረቱ የተሰማበት አዲስ አበባ ከተማ ሲኾን ያነጋገርናቸው ነዋሪዎች ከዚኽ ቀደሞቹ ኹሉ ጠንከር ያለ ያለና ዘለግ ላለ ሰከንዶች የቆየ መኾኑን ገልጸውልናል። አዲስ አበባ ከተማ ኮተቤ አካባቢ ነዋሪ የኾነው አዲስ ወንድሙ፣ ሕምፃ ላይ አራተኛ ፎቅ እንደሚኖር ገልጾ፣ በሰዓቱ ወንበር ላይ ተቀምጦ የጹሑፍ ሥራ እየሠራ እንደነበር ገልጾልናል። “ድንገት ነው የተከሰተው እንደ መወዝወዝ ነው የምቆጥረው። ለጥቂት ሰከንዶች ሕንፃው ቦታውን የለቀቀ ነገር መሰለኝ። ልክ እንደ ፔንዱለም ዐይነት ነገር ነው የተሰማኝ። ከዚኽ ቀደሞቹ የአኹኑ ትንሽ ጠንከር ያለ ነው። እንቅልፍ ላይ የነበረችው ባለቤቴም በንዝረቱ ነቅታ ወደ እኔ መጣች”  ብሎናል። ኤፍሬም ዋቅጅራ  የተባለ በአዲስ አበባ መካኒሳ አካባቢ ነዋሪ፣ የመሬት መንቀጥቀጥ ንዝረቱ ላለፉት አምስት ቀናት በተለያየ ጊዜ ሲሰማው እንደነበር ገልጾ፣ የትላንት ምሽቱ ግን “ከእንቅልፌ የቀሰቀሰኝ ከባድ ነበር” ሲል ጠቅሷል። በአፋር ክልል ርዕደ መሬቱ ሲከሰት የመጀመሪያ አይደለም። እስካኹን በነዋሪዎች ላይ ጉዳት መድረሱን የሚያሳዩ ሪፖርቶች አልወጡም። ኾኖም በአፋር ክልል በዐሥሮች የተቆጠሩ ቤቶች መፍረሳቸው ተዘግቧል። ከዚኹ ጋራ በተያያዘም፣ በኢትዮጵያ አፋር ክልል፣ አዋሽ ፈንታሌ የእሳተ ገሞራ መፈንዳት ምልክቶችን እንዳሳየ የኢትዮጵያ ከርሰ ምድር ጥናት ተቋም ዛሬ ትላንት በፌስ ቡክ ገጹ ላይ ከአጭር ቪዲዮ ጋራ ባጋራው መረጃ አስታወቀ። ተቋሙ በአዋሽ ፈንታሌ ጭስ ሲወጣ ከሚያሳየው የቪዲዮ ምስል ጋራ ባጋራው መረጃም፣ «ሰሞኑን ሲጠበቅ የነበረው አዋሽ ፈንታሌ በአሁኑ ሰዓት በአፋር ክልል ዱላቻ ወረዳ ዶፋን ተራራ ላይ የታመቀ ውሃ እና እንፋሎት ተከሰተ» ብሏል። በዚህም ምክኒያት ባለሥልጣናት ነዋሪዎችን ወደ ጊዜያዊ መጠለያ እንዲያዘዋውሩ ማድረጋቸውን የሀገር ውስጥ ብዙኅን መገናኛ ዘግበዋል። በመንግሥት የሚደገፈው ፋና ብሮድ ካስቲንግ በአፋር ክልል የጋቢ ረሱ ዞን ዋና አሥተዳዳሪ አብዱ ዓሊ ጠቅሶ በአወጣው ዘገባ፣ በአካባቢው ነዋሪዎች ላይ ጉዳት እንዳይደርስ ነዋሪዎችን ወደ ጊዜያዊ መጠለያ የማጓጓዝ ሥራ እየተሠራ መኾኑን ጠቅሷል። «ፍንዳታ ለመሆኑ በእርግጠኝነት መናገር ባይቻልም፣ ባለሥልጣናት ጥንቃቄ ማድረግን መርጠዋል» ሲሉ የኢትዮጵያ የአደጋ ስጋት አመራር ኮሚሽነር ሽፈራው ተክለማሪያም ማስታወቃቸውን ደግሞ ሮይተርስ ዘግቧል። ከአንዳንድ ሥፍራዎች ሰዎች መውጣት መጀመራቸውንና በትንበያው መሠረት ሰዎችን ሥርዐት ባለው መንገድ እንደሚያስወጡም ኮሚሽነሩ ጨምረው አስታውቀዋል።አካባቢው ከመስከረም ወር ጀምሮ መሬት መንቀጥቀጥ ሲስተዋልበት ቆይቷል። የኢትዮጵያ መንግሥት እስካኹን የመሬት መንቀጥቀጡ በዋና ከተሞች እስካኹን የጎላ ተጽዕኖ እንዳላሰደረ ገልጾ፣በባለሞያዎች የሚሰጡ የጥንቃቄ መልዕክቶችን እንዲከታተሉ እና በጥብቅ እንዲተገብሩ አሳስቧል።   በሌላ በኩል በኢትዮጵያ አብዛኞቹ ህንፃዎች ለርእደ መሬት ተጋላጭ መኾናቸውን ባለሞያዎች ገለጸዋል። በኢትዮጵያ ያሉት አብዛኞቹ ህንፃዎች በዲዛይን ወቅት በሚፈጠር ክፍተትና በግንባታ ጥራት ጉድለት የተነሳ ለርዕደ መሬት አደጋ የተጋላጡ እንደሆኑ የአዲስ አበባ ዩኒቨርሲቲ ባለሞያዎች ተናግረዋል፡፡ ኢትዮጵያ ከ1976 ዓ.ም ጀምሮ ህንፃዎች ርዕደ መሬትን እንዲቋቋሙ በሚያስችል መልኩ ዲዛይን እንዲደረጉ አስገዳጅ የህንፃ ኮድ ብታዘጋጅም፣ መስፈርቱን ከመከተል አኳያ ክፍተቶች አሉ ብለዋል፡፡ መንግሥት በበኩሉ፣ “በህንፃዎች ግንባታ ወቅት፣ መስፈርቱ እንዲተገበር ጥብቅ ክትትል እየተደረገ ነው፣ ህንፃዎቹም የተወሰነ የርዕደ መሬት መጠንን የመቋቋም አቅም አላቸው” ብሏል። 

በ100 ዓመታቸው እሑድ ታኅሣሥ 20 ቀን 2017 ዓ.ም. ከዚህ ዓለም በሞት የተለዩት የቀድሞው የአሜሪካ ፕሬዝደንት ጂሚ ካርተር፣ ስድስት ቀናት የሚቆየው የቀብር እና የሽኝት ሥነ ሥርዐት ዛሬ ጀመረ። የቀብር ሥነ ሥርዓታቸው ጥር 1 ቀን 2017 ዓ/ም እንደሚፈፀም ታውቋል። የአሜሪካው ፕሬዝደንት ጆ ባይደን ለጂሚ ካርተር ብሔራዊ የሐዘን ቀን ባወጁበት ጥር 1 ቀን 2017 ዓ/ም፣ የቀብራቸውም ሥነ ሥርዓት በዛው ዕለት እንዲፈፀም ፕሮግራም እንዲያዝ አድርገዋል። በተጨማሪም የመንግሥት ሕንፃዎች ሰንደቅ ዓላማቸውን ለ30 ቀናት ዝቅ አድርገው እንዲሰቅሉ መመሪያ አስተላልፈዋል። የጂሚ ካርተር ሕይወት ወደ ኋላ ሲቃኝ ጂሚ ካርተር ፕሬዝደንት ከመሆናቸው በፊት፣ የለውዝ ገበሬ እንዲሁም የጆርጂያ ግዛት አገረ ገዥ ነበሩ። በእ.አ.አ ጥር 20 ቀን 1977 ዓ.ም ቃለ መሃላ በመፈጸም ሥልጣን ሲረክከቡ፣ 39ኛው የአሜሪከ ፕሬዝደንት ጂሚ ካርተር “እንደ ሕዝቡ መልካም የኾነ” ያሉትን መንግሥት እንደሚያቋቁሙ ቃል ገብተው ነበር። “በዚህ አዲስ ምዕራፍ በምንከፍትበት ዕለት፣ ፍትህና ሰላም የሰፈነበት ዓለምን ከመቅረጽ የበለጠ የተከበረና ከባድ ተግባር የለም፣” ሲሉ በቃለ መሃላ ሥነ ሥርዐታቸው አከባበር ላይ ተናግረዋል። ይህን ቃላቸውን ከአንድ የሥልጣን ዘመን በኋላም በነበራቸው ሕይወት ቀጥለውት ነበር። የኖቤል የሠላም ሽልማት አሸናፊ ከመሆናቸው በተጨማሪ በስማቸው የተሰየመውንና ለትርፍ ያልተቋቋመውን ዓለም አቀፍ ድርጅት፣ የካርተር ማዕከልን መርተዋል። “ሠላምን ማስፈን፣ በሽታን ማጥፋት እና ተስፋን ማለምለም” የማዕከሉ ተልዕኮዎች ናቸው። “የካርተር ማዕከልን ሥራ የምመለከተው ፕሬዝደንት በነበርኩበት ወቅት ለመሥራት የሞከርኩት ተቀጽላ እንደሆነ አድርጌ ነው” ብለዋል ካርተር። ጂሚ ካርተር ፕሌይንስ በተሰነች የጆርጂያ ከተማ በእ.አ.አ 1924 ተወለዱ። ከአሜሪካው የባሕር ኃይል ማሰልጠኛ በ1946 ተመረቁ። የአባታቸውን ሞት ተከትሎ የቤተሰቡን የግብርና ሥራ ለማስተዳደር በ1953 ወደ ትውልድ ከተማቸው ፕሌይንስ እስኪመለሱ ድረስ በባሕር ኃይሉ በሰብመሪን ኦፊሰርነት አገልግለዋል። ካርተር ወደ ፖለቲካው ዓለም የገቡት በ1960ዎቹ የሰብአዊ መብት ንቅናቄዎች በሚካሄዱበት ወቅት ነበር። በጆርጅያ ግዛት ምክር ቤት ለሁለት የሥራ ዘመን አገልግለው ከዛም በ1971 የግዛቲቱ አገረ ገዥ ለመሆን በቅተዋል። በወቅቱ ስለነበረውና በዘር መድልኦ ላይ የሚደረገውን ትግል በተመለከተ ሲናገሩም፣ “በግልጽ የምነግራችሁ ቢኖር የዘር መድልኦ ዘመን አብቅቷል” ብለው ነበር። በ1971 ብዙም ያልታወቁትና በደቡብ የሃገሪቱ ክፍል አገረ ገዥ የነበሩት ካርተር፣ በ1976 ሪፐብሊካኑን ጀራልድ ፎርድ በጠባብ ውጤት በማሸነፍ ፕሬዝደንት ሆኑ። በሶስተኛው ዓመት፣ 1979 “የካምፕ ዴቪድ ስምምነት” ተብሎ የሚጠራውን፣ በግብጽ እና በእስራኤል መካከል የሰላም ስምምነት እንዲፈጸም አስቻሉ። ይህም የፕሬዝደንትነት ዘመናቸው ዋና ስኬት ተደርጎ ይታያል። “ወደ ፕሬዝደንትነት ከመምጣቴ በፊት በአረቦች እና በእስራኤል መካከል በ25 ዓመታት ውስጥ የተደረጉ አራት ጦርነቶች ነበሩ። በሶቪዬት ኅብረት የምትደገፈው ግብጽ በዚህ ውስጥ የመሪነት ሚና ነበራት፡፡ እነዚህ ሃገራት እስራኤልን በወታደራዊ መንገድ ሊገዳደሩ የሚችሉ ብቸኛ ሃገራት ነበሩ” ሲሉ ካርተር ተናግረዋል። ካርተር በተጨማሪም የፓናማ መተላለፊያ በፓናማ ቁጥጥር ሥር እንዲሆን እና ከቻይና ሕዝባዊ ሪፐብሊክ ጋራ የዲፕሎማሲ ግንኙነት እንዲመሠረት አድርገዋል። በ1979 በኢራን የተከሰተው የእስልምና አብዮት ግን የፕሬዝደንታዊ አስተዳደራቸውን አቅጣጫ እንዲቀይር አድርጓል። በሻይት የእስልምና መሪዎች የተመራው ተቃውሞ በአሜሪካ የሚደገፉትን ሻህ ወይም መሪ ከስልጣን ገርስሶ፣ ሻሁም ሃገር ጥለው እንዲወጡ አድርጓል። በ1979 ጥቅምት ወር መጨረሻ ላይ እስላማዊ ነውጠኞቹ ቴህራን ውስጥ የሚገኘውን የአሜሪካን ኤምባሲ ሰብረው በመግባት 66 አሜሪካውያንን አገቱ፡፡ ከአስር ቀናት በኋላ 13 የሚሆኑትን ቢለቁም የተቀሩትን ግን ለ 444 ቀናት አግተው ቆዩ። የቀሩትን ታጋቾች ለማስለቀቅ በሚያዚያ 1980 ካርተር ወታደራዊ እርምጃ እንዲወሰድ አዘዙ። ሙከራው ሳይሳካ ቀርቶ ስምንት የኤምባሲው ሠራተኞች ሕይወታቸውን አጡ። ካርተር በሃገር ውስጥም ፈተና ገጠማቸው። የዋጋ ግሽበትና እየጨመረ የመጣው ሥራ አጥነት ኢኮኖሚውን አንገዳገደው። ይህም በ1980 በተደረገው ምርጫ በሪፕብሊካኑ ሮናልድ ሬገን እንዲረቱ አስተዋጽኦ አድርጓል። ሬገን ቃለ መሃላ በፍጸሙበት ዕለት፣ ኢራን አሜሪካውያን ታጋቾቹን ለቀቀች፡፡ ሽንፈቱ እና ድባቴ የተጫናቸው ካርተር፣ ፕሬዝደንታዊ ቤተ መጽሃፍት ለመገንባት ወደ ትውልድ ከተማቸው አቀኑ። ሐሳባቸው ከቤተ መጻሕፍት ግንባታም አልፎ ወደ ታወቀ ዓለም አቀፍ ትርፋማ ያልሆነ ድርጅትነት ተሸጋገረ። የካርተር ማዕከል ከመቶ በላይ ምርጫዎችን ታዘበ። ከሰሜን ኮሪያ ጋራ ከነበረውን የኑክሌር ፍጥጫ ከመሸምገል፣ በዩጋንዳ እና ሱዳን መካከል የሰላም ስምምነት እንዲፈረም እስከማድረግ ባሉ ተግባራት ሚና ተጫወተ። በጤና መስክ ደግሞ የጊኒ ዎርም በከፍተኛ ደረጃ ቀንሶ ወደ መጥፋት ደረጃ እንዲደርስ አድርጓል። ካርተር በሰብአዊ መስክ ላደረጉት አስተዋጽኦ በእ.አ.አ 2002 የኖቤል የሰላም ሽልማት ተበርክቶላቸዋል። የካርተር ማዕከል በእ.አ.አ 1989 በወቅቱ በኤርትራ የነበሩትን የአማጺያን መሪዎች በኢትዮጵያ ከነበሩት የደርግ መሪዎች ጋራ ለመጀመሪያ ጊዜ በአሜሪካ አትላንታ እና ኬንያ እንዲወያዩ አመቻችቷል። ማዕከሉ በኢትዮጵያም ሠላም እና ጤናን ለማስፈን፣ ግጭቶች እንዲቆሙ በማሸማገል፣ ምርጫን በመታዘብና የሰብአዊ መብትን በተመለከቱ ጉዳዮች ላይ ለረጅም ዓመታት ሲሰራ ቆይቷል። ጂሚ ካርተር ከአሜሪካ ፕሬዝደንቶች ሁሉ ረጅም ዕድሜ የኖሩ ናቸው። ከባለቤታቸው ራዝሊን ጋራ የቆዩበት የትዳር ዘመንም እንደ አሜሪካ ፕሬዝደንት እና ቀዳማዊ እመቤት ረጅሙ ነው።

ሚያንማር ከብሪታንያ ነጻ የወጣችበትን 77ኛ ዓመት ምክንያት በማድረግ የሀገሪቱ ወታደራዊ መንግሥት ከ6 ሺሕ በላይ እስረኞች በምህረት ለቀቀ። የሌሎች እስረኞች ቅጣት መጠንም ቀንሷል። ወታደራዊው መንግሥት በሕዝብ ከተመረጠው የኦንግ ሳን ሱ ቺን አስተዳደር ሥልጣን ከነጠቀበት የአውሮፓዊያኑ የካቲት 2021 ዓ.ም ጀምሮ በወታደራዊ አገዛዝ ከታሰሩ በመቶዎች የሚቆጠሩ የፖለቲካ እስረኞች መካከል በአኹኑ ምህረት የተካተቱት ጥቂቶቹ ናቸው። ወታደራዊው አገዛዝ ሥልጣን ላይ የወጣበት ሂደት በወቅቱ ከፍተኛ ሰላማዊ ተቃውሞ የገጠመው ሲኾን ፣ አሁን ላይ ግን ወደተንሰራፋ የትጥቅ ትግል ተቀይሯል። በመንግሥት የሚተዳደረው ኤምአርቲቪ ቴሌቪዥን የወታደራዊው መንግሥት መሪ ከፍተኛ ጄኔራል ሚን አንግ ህላይንግ፣ለ5 ሺሕ የሀገሪቱ ዜጋ እስረኞች እንዲሁም 180 የውጭ ዜጎች ምህረት እንዳደረጉ ዘግቧል። በሚያንማር በበዓላት እና በጉልህ ሁነቶች ወቅት እስረኞችን በብዛት መልቀቅ የተለመደ ነው። ከእስር የተፈቱት እስረኞች እንደገና ሕጉን ከጣሱ፣ ከአዲስ ቅጣት በተጨማሪ ቀሪውን የቅጣት ፍርዳቸውን እንዲጨርሱ እንደሚደረግ በምህረት የተለቀቁበት ቅደመ ሁኔታ ያስጠነቅቃል። በሌላ ዘገባ ሚን አውንግ ህላይንግ የ144 እስረኞችን የዕድሜ ልክ እስራት ወደ 15 ዓመት እስራት ዝቅ እንዲል መወሰናቸው ተሰምቷል። ዘገባው በጉዳዩ ዙሪያ ዝርዝር መረጃ አልሰጠም። በጸረ - ፈንጂ፣ በሕገ-ወጥ ማኅበራት፣ በጦር መሳሪያ እና በፀረ-ሽብርተኝነት ሕግ ከተከሰሱት በስተቀር ሁሉም እስረኞች ቅጣታቸው በአንድ ስድስተኛ እንደሚቀነስላቸው ዘገባው አክሏል። የወታደራዊ መንግሥት ቃል አቀባይ ሜጀር ጄኔራል ዛው ሚን ቱን ፣ለጋዜጠኞች በተውት የድምጽ ማስታወሻ፣ ከእስር ከተፈቱት መካከል ወደ 600 የሚጠጉ እስረኞች በሚያንማር የወንጀለኛ መቅጫ ህግ አንቀፅ 505(A) የተከሰሱ መሆናቸውን ተናግረዋል ። አንቀጹ ሕዝባዊ ብጥብጥ ወይም ስጋት መፍጠር፣ ሐሰተኛ ዜና እና አስተያየቶች ማሰራጨትን በወንጀልነት ይደነግጋል።

የሩስያ መከላከያ ሚኒስቴር የሀገሪቱ ጦር በዩክሬን ምሥራቃዊ ሉሃንስክ ግዛት ውስጥ የምትገኘውን ናዲያ የተባለችውን መንደር መቆጣጠሩን እና በዩናይትድ ስቴትስ የተሠሩ ስምንት የአርሚ ታክቲካል ሚሳኤል ሲስተም (ATACMS) ሚሳኤሎችን መምታቱን ሮይተርስ ዘገበ።  የጦር ሜዳውን ውሎ መረጃዎች ግን ማረጋገጥ እንዳልቻለ በዘገባው ጠቅሷል።  ሚኒስቴሩ ፣ የሀገሪቱ የአየር መከላከያ ስርዓት ቅዳሜ ማለዳ በሰሜናዊ ሌኒንግራድ አካባቢ የተመቱትን ሦስቱን ጨምሮ ፣ በሩሲያ አየር ክልል ውስጥ የገቡ ዐሥር የዩክሬን ሰው አልባ አውሮፕላኖችን መትቶ መጣሉን አክሏል። በሴንት ፒተርስበርግ የሚገኘው ፑልኮቮ አየር ማረፊያ ቅዳሜ ማለዳ ላይ ማናቸውም በረራዎችን ለጊዜው አቁሟል።

  ተመራጩ ፕሬዝደንት ዶናልድ ትራምፕ ጥፋተኛ በተባሉበት «አፍ ማስያዣ»  ገንዘብ መክፈል ክስ ውሳኔ ለማስተላለፍ ጉዳዩን የያዙት ዳኛ በትናንትናው ዕለት  ቀጠሮ ሰጥተዋል። ያልተጠበቀ እንደሆነ በተነገረለት የዳኛው እርምጃ መሰረት ፣ ትራምፕ ወደ ዋይት ሀውስ ከሚመለሱበት  ቀን 10 ቀናት አስቀድሞ -በአውሮፓዊያኑ ጥር 10 ቀን  ውሳኔው ይፋ ይደረጋል። የቅጣት ውሳኔው  ግን እስርን እንደማይጨምር ተመላክቷል ።  የዳኛው ውሳኔ  ትራምፕ በወንጀሎች የጥፋተኝነት ውሳኔ ተላልፎባቸው ስልጣን የተረከቡ የመጀመሪያው ፕሬዝደንት ያደርጋቸዋል። የትራምፕን ችሎት የመሩት ዳኛ ሁዋን ኤም ሜርካን  በፅሁፍ ባሰፈሩት ሀተታ፣ የቀድሞውን እና የወደፊቱን ፕሬዝደንት ሁኔታዎችን ያገናዘበ ውሳኔ እንደሚተላለፍባቸው አመላክተዋል ። በዚህም መሰረት ጉዳዩ ያለ  እስራት፣ የገንዘብ ቅጣት ወይም አመክሮ ጊዜ ይዘጋል። ሜርካን ፣ ፕሬዚደንታዊ ያለመከሰስ መብትን እንዲሁም ወደ ዋይት ሀውስ የመመለሻቸው ጊዜ መቃረቡን በመጥቀስ ውሳኔው ውድቅ እንዲደረግ ትራምፕ ያደረጉትን ግፊት አልተቀበሉም። ዳኛው በትራምፕ ላይ ውሳኔ ከማስተላለፍ  የሚከለክላቸው የህግ አግባብ እንደሌለ ገልጸው  ጥር 20 ቀን ቃለ መሃላ ከመፈጸሙ  በፊት ትራምፕ ላይ ውሳኔውን  ማስተላለፍ «ግዴታ ነው» ብለዋል ። የፍትህ መሻቶች የሚፈጸሙት «ይህ ጉዳእ  የመጨረሻው እልባት ሲያገኝ ብቻ ነው» ሲሉ ሜርካን ጽፈዋል። ትራምፕ በአውሮፓዊያኑ ግንቦት ወር 34 የንግድ መዝገቦችን በማጭበርበር ወንጀል ጥፋተኛ ተብለዋል።በአውሮፓዊያኑ 2016 የትራምፕ የመጀመሪያ የምረጡኝ ዘመቻ የመጨረሻ ሳምንታት ውስጥ ለወሲብ ፊልም ተዋናይቷ ስቶርሚ ዳኒልስ የተከፈለውን ገንዘብ ለመደበቅ ያለሙት ጥረቶችም በእነዚህ ጥፋቶች  ውስጥ ተካተዋል። ለስቶርሚ ዳኔልስ ክፍያዎቹ የተፈጸሙት ከባለትዳሩ ትራምፕ ጋር ከዓመታት በፊት ስጋዊ ግንኙነት እንደነበራቸው ለሕዝብ እንዳያሳውቁ ለማድረግ ነው።ትራምፕ ታሪኩ ሀሰተኛ እና ምንም ዓይነት ጥፋት እንዳልፈጸሙ ተናግረዋል።  የመከላከያ ጠበቆች እና ዐቃቤ ህግ ጉዳዩን ዕጣ ፋንታ በተመለከተ አቋማቸውን ይፋ እስኪያደርጉ ድረስ፣ከህዳር  5 ምርጫ በኋላ፣ ሜርካን ሂደቱን አቁመው የቅጣት ውሳኔውን ላልተወሰነ ጊዜ አራዝመውት ነበረ።  የትራምፕ ጠበቆች መርካን መዝገቡን እንዲዘጉት ጠይቀዋል። ይህ ካልሆነ ጉዳዩ በተመራጩ ፕሬዝደንት ሀገሪቱን የመምራት አቅም ላይ ኢ-ህገመንግስታዊ «ሁከት» እንደሚፈጥር ተናግረዋል። ዐቃቤነ ህጎች በበኩላቸው  ተመራጩ ፕሬዝዳንት ሊስተናገዱበት የሚችሉበት ሁኔታ መኖሩን ተቀብለው ፣  የጥፋተኝነት ውሳኔው ግን እንዳይለወጥ ተከራክረዋል። ትራምፕ የስልጣን ዘመናቸው እስኪያበቃ ድረስ  ጉዳዩ በይደር እንዲቆይ  ወይም እስር የማይኖረው ቅጣት እንዲተላለፍባቸው ማረጋገጫ መስጠትን ጨምሮ  የተለያዩ አማራጮች ተጠቁመዋል።

ሉሲ ወይም ድንቅነሽ ተብላ የተሰየመችው ቅሪተ አካል በአፋር ክልል ከተገኘች ዘንድሮ ኅዳር 15 ቀን 2017 ዓ.ም 50 ዓመቷን ደፍናለች፡፡ ቅሪተ አካሏን ካገኙት ዶናልድ ጆንሰን እንዲሁም፣ ከሉሲም በዕድሜ ቀደም ያለችውን ሌላ ቅሪተ አካል ያገኙትን ዶ/ር ዘረሰናይ ዓለምሰገድ አነጋግረናል። ዝርዝሩን ከተያያዘው ፋይል ይከታተሉ።  

በሶማሊያ አዲሱ የአፍሪካ ኅብረት የሰላም ተልዕኮ ከአል ሻባብ ጋራ ለሚያደርገው ፍልሚያ እንደምትተባበር ኢትዮጵያ አስታውቃለች፡፡ በሶማሊያ የአፍሪካ ኅብረት የድጋፍና የማረጋጋት ተልዕኮ በቅርቡ ወደ ሶማሊያ እንደሚሰማራ በመጠበቅ ላይ ነው። ኢትዮጵያ ከሶማሊላንድ ጋራ የፈጸመቸው የባሕር በር አቅርቦትን የተመለከተ የመግባቢያ ስምምነት በፈጠረው ውጥረት ምክንያት፣ የኢትዮጵያ ወታደሮች ተሳተፎ እንደማይኖራቸው ሶማሊያ ስታስታውቅ ብትሰነብትም፣ቱርክ ላይ በተፈጸመው የሰላም ስምምነት ውጥረቱ ሊረግብ ችሏል። የኢትዮጵያው መከላከያ ሚኒስትር አይሻ ሞሃመድ ትላንት ሐሙስ በሶማሊያ ጉብኝት በማድረግ ከሶማሊያው ፕሬዝደንት ሃሳን ሼኽ ሞሃሙድ ጋራ ተወያይተው ከጠቅላይ ሚኒስትር ዐቢይ አሕመድ የተላከ መልዕክት ማድረሳቸውን የኢትዮጵያ የውጭ ጉዳይ ሚኒስቴር በአወጣው መግለጫ አስታውቋል። “ውይይቱ በሶማሊያ እና በቀጠናው ሰላምና መረጋጋትን ለማረጋገጥ ሁለቱ ሀገራት በጋራ ለመሥራት ያላቸውን ቁርጠኝነት ደግመው ያረጋገጡበት ነው” ሲል የኢትዮጵያው የውጪ ጉዳይ ሚኒስቴር በአወጣው መግለጫ አስታውቋል። “ሁለቱ ሀገራት የኅብረቱን ተልዕኮ በተመለከተ ትብብር ለማድረግና የሁለትዮሽ ግንኙነታቸውን ለማጠናከር ተስማምተዋል” ሲል  የውጪ ጉዳይ ሚኒስቴሩ በመግለጫው አስፍሯል። የውጭ ጉዳይ ሚኒስቴር ቃል አቀባይ አምባሳደር ነቢያት ጌታቸው፣ ዛሬ አርብ ታኅሣሥ 25 ቀን በሰጡት ጋዜጣዊ መግለጫ፣  “በአንካራው ስምምነት መሰረት የኢትዮጵያ እና የሶማሊያ ግንኙነት እንዲታደስ እየሠራን እንገኛለን” ብለዋል፡፡ የሁለቱ ሀገራት ከፍተኛ ባለሥልጣናት ጉብኝቶችም የዚሁ አካል እንደኾኑ ገልጸዋል። በኢትዮጵያ መከላከያ ሚኒስትር አይሻ መሀመድ የተመራ ልዑክ፣ ትላንት በሞቃዲሾ ከሶማሊያ ባለሥልጣናት ጋራ መወያየቱንም የገለጹት ቃል አቀባዩ፣ ውይይቱ “ኢትዮጵያ እና ሶማሊያ የኤዩሶምን ተልዕኮ ውጤታማ ለማድረግ በትብብር ለመሥራት የተስማሙበት ነው” ብለዋል፡፡ “ኢትዮጵያ በኤዩሶም ትሳተፋለች ወይስ አትሳተፍም ተብሎ ለተነሳላቸው ጥያቄ ሲመልሱ “አሁን ባለንበት ደረጃ ውይይቶች እየተካሔዱ ነው” ብለዋል፡፡ በአዲስ አበባ እና በሞቃዲሾ ሰሞኑን ከተደረጉት ውይይቶች በተጨማሪ “በቅርቡም በከፍተኛ ባለሥልጣናት ደረጃ አዲስ አበባ ላይ ተመሳሳይ ውይይት ለማድረግ እና በጉዳዩ ዙሪያ ለመነጋገር ቀጠሮ ተይዟል” ብለዋል፡፡ በሰሞናዊው የኢትዮጵያ እና ሶማሊያ ባለሥልጣናት ውይይት ላይ አልሻባብን ለመዋጋት የሚደረጉ ጥረቶችን ለማጠናከር መግባባት መኖሩን ጠቅሰው፣ “ከድህረ-አትሚስ በኋላ የሚኖረው የኃይል ስምሪት፣ ኢትዮጵያ ጥንቃቄ በተሞላበት መንገድ እንዲሆን ትፈልጋለች” ብለዋል፡፡ የሶማሊያው የውጪ ጉዳይ ሚኒስቴር በበኩሉ፣ በዐዲሱ ተልዕኮ ለመሳተፍ “የኢትዮጵያን ጥያቄ ለመመልከት ፍላጎት አለው” ቢልም፣ ተጨማሪ ዝርዝር አልሰጠም። በሁለቱ ወገኖች መካከል የሚደረገው ውይይት አስፈላጊ መሆኑን ያመለከተው የሚኒስቴሩ መግለጫ፣ “ለሶማሊያ ሉአላዊነትና የግዛት አንድነት ክብር መኖሩን በድጋሚ ለማረጋገጥ” ቁልፍ እርምጃ ነው ብሏል። ኢትዮጵያ ከተገንጣይዋ የሶማሊያ ራስ ገዝ አስተዳደር ሶማሊላንድ ጋራ የተፈራረመችውን የባሕር በር የመግባቢያ ስምምነት አምርራ የተቃወመችው ሶማሊያ፣ የመግባቢያ ስምምነቱን እስካልሰረዘች ድረስ ኢትዮጵያ በኤዩሶም ተልዕኮ እንደማትሳተፍ አቋም ይዛ ቆይታለች፡፡ የኢትዮጵያ እና የሶማሊያ መሪዎች፣ በአገሮቻቸው መካከል ያለውን ውጥረት ለማርገብ በቅርቡ በአንካራ ከተስማሙ በኋላም ቢኾን፣ በሶማሊያ ሰላም የማስከበር ተልዕኮ ውስጥ ለዓመታት ከፍተኛውን ሚና ስትጫወት የቆየችው ኢትዮጵያ በዚህ ተሳትፎዋ የመቀጠሏ ጉዳይ እልባት አላገኘም፡፡ የሶማሊያ ባለሥልጣናት በኤዩሶም ስር የሚሰለፉ አስፈላጊ 11 ሺሕ ወታደሮችን ከዩጋንዳ፣ ጅቡቲ እና ኬንያ ማግኘታቸውን የገለፁ ሲኾን፣ ከዓባይ ውሃ አጠቃቀም ጋር በተገናኘ ከኢትዮጵያ ጋራ አለመግባባት ውስጥ የምትገኘው ግብፅም፣ በሶማሊያው የአፍሪካ ሕብረት ተልዕኮ ስር ወታደሮቿን እንደምታሳትፍ በውጭ ጉዳይ ሚኒስትሯ በኩል ገልጻለች፡፡ አዲሱ የአፍሪካ ኅብረት ተልዕኮ - ኤዩሶም ከአውሮፓውያኑ ጥር 1 ቀን 2025 ዓ.ም ጀምሮ በሶማሊያ ኃላፊነቱን መረከቡ፣ በሶማሊያ የአፍሪካ ኅብረት ድጋፍና ማረጋጋት ተልዕኮ ኃላፊ ሞሀመድ ኤል አሚኒ ሱፍ በእለቱ ባወጡት መግለጫ አስታውቀዋል።  

ጋና በመላው ዓለም የሚገኙ ጥቁሮችን ወደ ሀገሯ እንዲመጡ በመጋበዝ ላይ ስትኾን፣ በቅርቡም 524 ለሚሆኑና በአብዛኛው ጥቁር አሜሪካውያን ለኾኑ ሰዎች ዜግነት ሰጥታለች። ጋና ከአምስት ዓመታት በፊት “የመመለስ ዓመት” የሚል ተነሳሽነት ከጀመረች ወዲህ የተሰጠ ከፍተኛው የዜግነት ቁጥር መሆኑም ታውቋል። ተነሳሽነቱ የመጀመሪያዎቹ አፍሪካውያን በበባሪያ ፍንገላ በ1619 ዓ.ም ወደ አሜሪካ የመጡበትን አራት መቶኛ ዓመት ለማሰብ ያለመ ነው። ከረጅም ጊዜ በፊት የተሰበረው ቁርኝት መልሶ በመጠገኑ ሰዎች እጅግ ሲደሰቱ መስተዋሉን የአሶስዬትድ ፕረስ ዘገባ አመልክቷል። በዜግነት አሰጣጥ ሥነ ሥርዐት ላይ አንዳንዶች የጋናን ባንዲራ በማውለብለብ በደስታ ሲያለቅሱም ተሰተውሏል። ለመጀመሪያ ጊዜ በአሜሪካ ሳሉ ያልተሰማቸው ደስታና የማንነት ስሜት እንደተሰማቸውም አንዳንዶች ተናግረዋል።

የደቡብ ኮሪያ መርማሪዎች ተከሳሹን የአገሪቱ ፕሬዝደንት ዩን ሶክ ዮል በቁጥጥር ሥር ለማድረግ የነበራቸውን ሙከራ አቁመዋል። መርማሪዎቹ ሙከራውን የተውት ፕሬዝደንቱን ከመኖሪያ ቤታቸው ለመያዝ ያደርጉት ሙከራ በጠባቂዎቻቸው በመገታቱ ነው። የሀገሪቱ ሕግ አውጪ ምክር ቤት ፕሬዝደንቱን ከሥራቸው ያገደ ሲሆን፣ የመያዣ ትዕዛዙ ተግባራዊ የሚደረግ ከሆነ ዩን ሶክ ዮል በደቡብ ኮሪያ ታሪክ የተያዙ የመጀመሪያ ፕሬዝደንት ይሆናሉ። ባለፈው ወረ የማርሻል ሕግ አውጀው ሀገሪቱን ወደ ወታደራዊ አስተዳደር ለመቀየር የሞከሩት ፕሬዝደንቱ ከፍተኛ ተቃውሞ ገጥሟቻው ሐሳባቸውን ወዲያው እንዲተው ተገደዋል። በዚህም እሥራት፣ ከከፋ ደግሞ የሞት ቅጣት ይጠብቃቸዋል። ሃያ የሚሆኑ መርማሪዎችና 80 የሚሆኑ ፖሊሶች መኖሪያ ግቢያቸው ገብተው ፕሬዝደንቱን ለመያዝ ሲሞክሩ፣ 200 የሚሆኑ ወታደሮችና ጠባቂዎቻቸው ገተዋቸዋል። በሁለቱ ወገኖች መካከል ድርድር ተሞክሮ ሳይሳከ በመቅረቱ መርማሪዎችና ፖሊሶች ወደ መጡበት ተመልሰዋል። የመያዣ ትዕዛዙ የቀን ገደብ ሰኞ የሚያበቃ ሲሆን፣ ፕሬዝደንቱ ራሳቸውን ለመከላከል “እንደሚፋለሙ” ዝተዋል። ይህ በእንዲህ እንዳለ የመያዣ ትዕዛዙ የቀን ገደብ በሚያከትምበት ሰኞ ዕለት የአሜሪካው የውጪ ጉዳይ ምኒስትር አንተኒ ብሊንከን ከሰሜን ኮሪያው አቻቸው ጋራ ለመነጋገር ሶል እንደሚገቡ ታውቋል። በደቡብ ኮሪያ የፖለቲካ ጉዳይ ላይ አስተያየት ሰጥታ የማታውቀው ሰንሜን ኮሪያ፣ ዮንን ለመያዝ በሚደረግ ጥረት ምክንያት፣ ሶል የፖለቲካ ቀውስ ውስጥ ገብታለች ሲሉ የሃገሪቱ የመንግሥት ብዙኅን መገናኛ አስታውቀዋል።

እንደ ብዙዎቹ የፕሬዝዳንት ዶናልድ ትራምፕ የካቢኔ እጩዎች ሁሉ፣ የትምህርት ሚኒስትር እጩዋ ሊንዳ ሜክሜሃን በትረምፕ የምረጡኝ ቅስቀሳ ዘመቻ ላይ ዋና ደጋፊ እና መዋጮ ለጋሽ ነበሩ። በአብዛኛው የሠሩትም የዓለም የነጻ ትግል መዝናኛ የተባለውን ዘርፈ ብዙ ድርጅት በመምራት ነበር፡፡ ምንም እንኳን ብዙ ተንታኞች እና መምሕራን በትምሕርት ላይ ያላቸው ልምድ ውስን ነው ቢሉም፣ በእርሳቸው አመራር ትልቅ የአቅጣጫ ለውጥ እንደሚኖር ይጠበቃል። የቪኦኤዋ ሎረል ቦውማን ያደረሰችንን ዘገባ ከተያያዘው ፋይል ይከታተሉ።    

ዩናይትድ ስቴትስ ላስ ቬጋስ ከተማ በተመራጩ ፕሬዝዳንት ዶናልድ ትረምፕ ሆቴል ደጃፍ በቴስላ ሳይበር ትራክ መኪና ፍንዳታ የሞተው ግለሰብ የአሜሪካ ጦር ሠራዊት አባል ነው ብለው ባለሥልጣናት እንደሚያምኑ ተነገረ። ይህን የተናገሩት አሶሼትድ ፕሬስ ትላንት ሐሙስ ያነጋገራቸው ሦስት የአሜሪካ ባለሥልጣናት ናቸው፡፡ ባለሥልጣናቱ ምርመራ ላይ ባለ ጉዳይ ለመናገር ሥልጣን ስላልነበራቸው ስማቸው አልተገለጸም፡፡ ሁለት የሕግ አስከባሪ ባለሥልጣናት ተሽከርካሪዋ ውስጥ የነበረው ማቲው ሊቭልስበርገር የተባለ ሰው እንደሆነ ተናግረዋል፡፡ ሊቭልስበርገር ሰሜን ካሮላይና ውስጥ ቀድሞ ፎርት ብራግ በተባለው የጦር ሠራዊቱ የልዩ ኃይሎች መምሪያ የሚገኝበት ግዙፍ የጦር ሠፈር ያገለግል እንደነበር ሦስቱ ባለሥልጣናት ተናግረዋል፡፡ የላስ ቬጋሱ የመኪና ፍንዳታ የተከሰተው የ42 ዓመቱ ሻምሱድ-ዲን ባህር ጃባር በአውሮፓውያኑ የዘመን መለወጫ ቀን በኒው ኦርሊየንስ 15 ሰዎችን የገደለበትን አደጋ ባደረሰበት ዕለት ነው፡፡ አደጋው የተከሰተው ኒው ኦርሊየንስ ውስጥ ፍሬንች ኳርተር ተብሎ በሚጠራው አካባቢ ነው፡፡ ጃባር በፖሊስ ከመገደሉ በፊት ዐዲሱን ዓመት ለማክበር ተሰባስበው በነበሩ ሰዎች ላይ መኪናውን በፍጥነት በመንዳት ቢያንስ 15 ሰዎችን ገድሏል፡፡ ድርጊቱ በሽብር አድራጎትነት ተይዞ በመመርመር ላይ ሲሆን ፖሊስ አጥቂው ጥቃቱን የፈጸመው ብቻውን አይደለም ተብሎ እንደሚያምን ቢገልጽም የፌዴራሉ ምርመራ ቢሮ (ኤፍ ቢ አይ) ዛሬ ሐሙስ ለጋዜጠኞ በሰጠው መግለጫ «ግለሰቡ ጥቃቱን የፈጸመው ብቻውን ነው» ብሏል፡፡ “ጥቃቱን የፈጸመው በእስላማዊ መንግሥት ሽብርተኞች ተገፋፍቶ ነው” ሲልም አክሏል፡፡ የአሜሪካ ጦር ሠራዊት አባል የሆነው ጃባርም በፎርት ብራግ የጦር ሠፈር ያገለገለ ቢሆንም አንድ ላይ አለመስራታቸውን አንደኛው ባለሥልጣን ተናግረዋል፡፡

የጣሊያን የውጭ ጉዳይ ሚኒስቴር ቴህራን ውስጥ በጋዜጠኝነት ቪዛ ፈቃድ ስትሠራ የነበረችው እና እኤአ ታኅሣሥ 19 ቀን የታሰረችውን ዘጋቢ ሴሲሊያ ሳላ በአስቸኳይ እንድትፈታ ዛሬ ሐሙስ  የኢራን አምባሳደርን ጠርቶ ጠይቋል። የጣሊያን የውጭ ጉዳይ ሚኒስቴር በመግለጫው የሳላ መታሰር እንዳሳሰበው በመግለጽ ሰብአዊ አያያዝ እና የሰብአዊ መብቶቿ መከበር ላይ አፅንዖት ሰጥቷል። የጣሊያን ብዙኅን መገናኛ እንደዘገቡት፣ «ሳላ ሌሊትና ቀን የደበዘዘ መብራት ባለው ቀዝቃዛ ክፍል ውስጥ ከሌሎች እስረኞች ተለይታ ለብቻዋ ታስራለች። የዐይን  መነጽሯን የተቀማች ሲሆን፣ ከውጭ ዓለም ጋራ ምንም ዓይነት ግንኙነት እንዳይኖራት ተደርጓል» ብለዋል፡፡ የጣሊያን የውጭ ጉዳይ ሚኒስቴር ዋና ጸሐፊ ሪካርዶ ጉዋሪሊያ ቴህራን የሚገኙ የሀገራቸው ኤምባሲ ሠራተኞች፣ ሳላን እንዲጎበኙ እና «እስካሁን የተከለከለቻቸውን  የመገልገያ ዕቃዎች» እንዲያስገቡላት እንዲፈቀድ ጠይቀዋል። የኢራን የዜና ወኪል ኢርና ባለፈው ሰኞ እንደዘገበው ሳላ «የኢስላማዊ ሪፐብሊክ ሕግን በመጣስ» በቁጥጥር ሥር ውላለች” ከማለቱ በቀር ተጨማሪ መረጃ አልሰጠም። ጋዜጠኛዋ በቁጥጥር ስር የዋለችው ኢራናዊው ነጋዴ መሐመድ አቤዲኒ፣ በሚላን፣ ማልፔንሳ አውሮፕላን ማረፊያ ከታሰረ ከሦስት ቀን በኋላ ነው፡፡ አቤዲኒ የታሰረው ዋሽንግተን እ ኤ አ በ2023 ዩርዳኖስ ውስጥ የነበሩ ሦስት አሜሪካውያን ለተገደሉበት የድሮን ጥቃት ለድሮኑ መሥሪያ የሚውሉ እቃዎችን አቅርቧል በሚል የእስር ማዘዣ ስላወጣችበት ነው፡፡ ኢራን በጥቃቱ እጇ እንደሌለበት ስትገልጽ የውጭ ጉዳይ ሚኒስትሯ የኢራን  ብዙኅን መገናኛ ጠቅሰው የአቤዲኒ እስር ዓለም አቀፍ ሕግን የጣሰ ነው ብለዋል፡፡ ከቅርብ ዓመታት ወዲህ የኢራን የጸጥታ ኃይሎች በርካታ የውጭ ሀገር ዜጎችን እና ጥምር ዜግነት ያላቸውን ኢራናውያንን ፣ በአብዛኛው በስለላ እና በጸጥታ ወንጀሎች በመክሰስ በቁጥጥር ስር አውለዋል። የመብት ተሟጋች ድርጅቶች “ኢራን እንደዚህ ዓይነቶቹን እስሮች ከሌሎች ሀገራት ጋራ ለመደራደሪያ ለመጠቀም እየሞከረች ነው” ሲሉ ክስ ያሰሙ ሲኾን  ኢራን ይህንን አስተባብላለች። የጣሊያን ጠቅላይ ሚኒስትር ጆርጂያ ሜሎኒ በሳላ ጉዳይ ላይ ከውጪ ጉዳይ እና ከፍትህ ሚኒስትሮቻቸው ጋራ ዛሬ  ማምሻውን እንደሚመክሩ ጽሕፈት ቤታቸው አስታውቋል፡፡

ባለፈው ቅዳሜ ታኅሣሥ 12 ቀን 2017 ዓም ቡና ባንክ እና ካቻ ዲጂታል ፋይናንሻል ሰርቪስ የቅድመ ደሞዝ ብድር አገልግሎት ተጠቃሚ የሚያደርግ «አቦል ደሞዜ» የተባለ የዲጂታል ብድር እና ቁጠባ አገልግሎት በይፋ አስጀምረዋል። በሙከራ አገልግሎት ላይ የቆየ መኾኑ የተገለጸው «አቦል ደሞዜ» ለተቀጣሪ ደመወዝተኛ የኅብረተሰብ ክፍል አገልግሎት እንዲሰጥ የተዘጋጀ መተግበሪያ መሆኑን የካቻ ዲጂታል ፋይናንስ አገልግሎት እና የቡና ባንክ ኃላፊዎች ለአሜሪካ ድምጽ ተናግረዋል። ሠራተኞች ከደመወዝ ክፍያ ቀናቸው ቀደም ብሎ የገንዘብ እጥረት ሲገጥማቸው ከወር ደሞዛቸው የተወሰነውን ክፍል ያለምንም ማስያዣ በብድር እንዲያገኙ ያስቻላቸው መኾኑን የአገልግሎቱ ተጠቃሚ መሆናቸውን የአዲስ አበባ ነዋሪዎቹ ወ/ሮ ሶስና እና አቶ እስራኤል በቀለ ገልጸውልናል። በዓይነቱ የመጀመሪያ ነው ያሉት መተግበሪያ ከኑሮ ውድነት አንጻር ገቢያቸውን ከወር እስከ ወር ማብቃቃት ለተቸገሩ ተጠቃሚዎች መፍትሄ መሆኑንም ከኢት ፊን ቴክ ተቋም የሂሳብ አያያዝ ባለሞያና የዲጂታል ቴክኖሎጂ አማካሪ አቶ በረከት ቦጋለ አብራርተዋል፡፡ ከብሔራዊ ባንክ የአገልግሎት ሰጭነት ፈቃድ ማግኘታቸውንና በባንኩ የዘወትር ቁጥጥር የሚደረግበት መሆኑን የካቻ ማርኬቲንግ የግንኙነት ሥራ አስኪያጅ አቶ ናሆም አበራ ገልጸዋል፡፡ አቶ ናሆም አክለውም የዚህ አዲስ አገልግሎት ተጠቃሚዎች የደመወዛቸውን 33 ወይም 50 በመቶ በቀላሉ ካሉበት ሆነው በካቻ የሞባይል መተግበሪያ ማግኘት ይችላሉ ብለዋል። ከመንግሥታዊው ቴሌብር እና ከኬኒያው ሳፋሪኮም ኤም -ፔሳ ቀጥሎ ለመጀመሪያ ጊዜ በሀገር ውስጥ የግል ድርጅቶች የተጀመረው አገልግሎት መሆኑን ያነጋገርናቸው ባለሞያና የድርጅቶቹ ኃላፊዎች ገልጸውልናል። ሠራተኞች አገልግሎቱን ለማግኘት የቡና ባንክ ወይም የካቻ ደንበኞች መሆን እንደሚጠበቅባቸው አገልግሎቱን ያበለፀገው ካቻ ዲጂታል ፋይናንሺያል ሰርቪስ ሥራ አስፈጻሚ አቶ አብርሃም ጥላሁን ለአሜሪካ ድምጽ ተናግረዋል። አገልግሎቱን ለመጠቀም የስልክ ባለቤትነትን የሚጠይቅ መሆኑ ኢትዮጵያ ውስጥ ካሉ የስልክ ተጠቃሚዎች ቁጥር አነስተኛ መሆንና ከኢንተርኔት መሠረተ ልማት ውስንነት እንዲሁም ተደራሽነቱን ከማስፋት አንጻር ገና ብዙ ሥራ የሚጠይቅ መሆኑን ባለሙያዎች ይናገራሉ፡፡ ዝርዝሩን ከተያያዘው የድምጽ ፋይል ያድምጡ፡፡

የአውሮፓውያኑ አዲስ ዓመት ከተበሰረ ከጥቂት ሰዓታት በኋላ በአሜሪካ፣ ሉዚያና ግዛት በምትገኘው ኒው ኦርሊየንስ ከተማ አንድ ተሽከርካሪ ሕዝብ በተሰበሰበት ቦታ ላይ በመውጣት የዐስር ሰዎችን ሕይወት ሲያጠፋ 30 ሰዎች ደግሞ ጉዳት እንደደረሰባቸው የከተማዋ ድንገተኛ አደጋ መከላከያ አስታውቋል። የኒው ኦርሊየንስ ፖሊስም የበርካታ ሰዎች ሕይወት ላለፈበት አደጋ ምላሽ እየሰጠ መኾኑን በመግለፅ፣ ሰዎች አደጋው ከደረሰበት አካባቢ እንዲርቁ መክሯል። አደጋው የደረሰው በኒው ኦርሊየንስ የተካሄደው የአዲስ ዓመት ክብረ በዓል ማብቂያ ላይ ሲሆን፣ በሺሕዎች የሚቆጠሩ ሰዎች 'ኦል ስቴት' ቦል ተብሎ የሚጠራውን የዩንቨርስቲዎች የእግርኳስ ጨዋታ የሩብ ፍፃሜ ውድድር ለመከታተል እየተዘጋጁ ባሉበት ሰዓት መሆኑ ተመልክቷል። 

ከሲድኒ እስከ ሞምባይ፣ ከፓሪስ እስከ ሪዮ ደ ጄኔሮ፣ በዓለም ዙሪያ ያሉ ሕዝቦች የአውሮፓውያኑን 2025 በአስደናቂ የብርሃን ትዕይቶች፣ በረዶ ውስጥ በመነከር እና በተለያዩ ሥነ ሥርዐቶች ተቀብለውታል። በኒው ዮርክ የአዲሱን ዓመት መግቢያ የሚያበስረው ትልቁ ኳስ ታይም ስኩዌር ተብሎ በሚጠራው አደባባይ ላይ ሲወርድ፣ በሺዎች የሚቆጠሩ ሰዎች በከፍተኛ ሁኔታ ይወርድ በነበረው ዝናብ ውስጥ ኾነው ተከታትለውታል። ስድስት ቶን የሚመዝነው ኳስ እና 2ሺሕ 688 የሦስት ማዕዘን ቅርፅ ያላቸው ፈርጦች በታይምስ ስኩዌሩ ላይ ሲወርዱም ጥንዶች ተሳስመዋል፣ የተሰበሰበው ሕዝብም ደስታውን ገልጿል። አዲሱን ዓመት በቅድሚያ የተቀበሉት በደቡባዊ የፓሲፊክ ውቅያኖስ አካባቢ የሚገኙ ሀገራት ሲሆኑ፣ ኒውዚላንድ 2025 መግባቱን ያበሰረችው የኒውዮርክ ኳስ ከመውረዱ 18 ሰዓታት አስቀድማ ነው። ከዓለም ቀድማ በዓሉን ለማክበር ዕድል ያገኘችው ኦክላንድ ከተማ ውስጥም በሺሕዎች የሚቆጠሩ ሰዎች ወደ መሐል ከተማ በመጉረፍ እንዲሁም የርችት ትዕይንቶችን ለማየት እሳተ ገሞራ በሚወጣባቸው የከተማዋ የተቆላለፉ ተራራዎች ላይ በመውጣት አክብረዋል። በተቃራኒው አሜሪካ ውስጥ የምትገኘው ሳሞዓ፣ ኒው ዚላንድ በዓሉን ካከበረቸ ከ24 ሰዓታት በኋላ አዲስ ዓመት በመቀበል የመጨረሻዋ ሀገር ትሆናለች። እንደ መካከለኛው ምስራቅ፣ ሱዳን እና ዩክሬን ባሉ አካባቢዎች የሚካሄደው ጦርነት ግን የ2025ን አቀባበል አቀዝቅዞታል። የርችት ትዕይንቶች አክላንድ አንዲሱን ዓመት ከተቀበለች ከጥቂት ሰዓታት በኋላ፣ በአውስትራሊያዋ ሲድኒ ከተማ የሚገኘው ድልድይ በተለያዩ የርችት ትዕይንቶች ደምቋል። ይህን ትዕይንት ለማየትም ከአንድ ሚሊየን በላይ የሚሆኑ ሰዎች በሲድኒ ወደብ አቅራቢያ ተገኝተው ከእንግሊዛዊው የፖፕ ሙዚቃ አቀንቃኝ ሮቢ ዊሊያም ጋር በጋራ አዚመዋል። በላስ ቬጋስ ከ340 ሺሕዎች በላይ ሰዎች ከቁማር ማጫወቻ ስፍራዎች የተነሱ የርችት ትዕይንቶችን ተከታትለዋል። ከትዕይንቱ አቅራቢያ የተዘጋጀ ስፍራም የተለያዩ የሰዓት አቆጣጠሮችን በማሳየት በተለያዩ የዓለም አካባቢዎች አዲስ ዓመት ሲገባ አብስሯል። በካሊፎርኒያ፣ ፓሳዲና ከተማ የተካሄደውን ደማቅ የሰልፍ ትዕይንት ለመመልከት በሺዎች የሚቆጠሩ ሰዎች በየመንገዱ ላይ ድንኳን ተክለው የተቀመጡ ሲሆን፣ በቴኔሲ ግዛት ናሽቪል ከተማ የተዘጋጀውን የሀገረሰብ ሙዚቃ ድግስ ለመታደምም ደግሞ ከ200 ሺሕ በላይ ሰዎች ተሰባስበዋል። በደቡብ ኮርያ ያለፈው እሑድ በተከሰከሰው አውሮፕላን ምክንያት ህይወታቸው ያለፈውን 179 ሰዎች ለማሰብ ብሔራዊ ሐዘን በመታወጁ፣ ለአዲሱ ዓመት የተሰናዱ ዝግጅቶች ተሰርዘዋል።  

አዲሱ የአፍሪካ ኅብረት የሶማሊያ የሰላም አስከባሪ ተልዕኮ በሰዓታት ውስጥ ሥራውን ይጀምራል፡፡ ታዲያ አንድ የሶማሊያ ክፍለ ግዛት ባለሥልጣን «ኢትዮጵያ በእንግሊዝኛ የምሕጻር መጠሪያው አውሶም በተባለው ተልዕኮ እንዳትሳተፍ መደረግ የለባትም» ሲሉ አስጠንቅቀዋል፡፡ የኢትዮጵያ ወታደሮች የሚገኙበት የጁባላንድ ክፍለ ግዛት ምክትል ፕሬዝደንት መሐሙድ ሰይድ አደን ለአሜሪካ ድምጽ የአፍሪካ ቀንድ አገልግሎት በሰጡት ቃል ኢትዮጵያ በተልዕኮው እንዳትሳተፍ ቢደረግ እንደሚቃወሙ ገልጸዋል፡፡ ዝርዝሩን ከተያያዘው ፋይል ይከታተሉ።

የዚምባቡዌ መንግሥት ሀገሪቱ ያለባትን ሥር የሰደደ የኢሌክትሪክ ኃይል እጥረት ለማስወገድ የኒውክሌየር ኃይል ማመንጫ ለመገንባት ጥረት እያደረገ መሆኑን አስታወቀ፡፡ ለዚህም ከዓለም አቀፉ የአቶሚክ ኃይል ተቆጣጣሪ ድርጅት እና ከሩሲያዊያን መዋዕለ ነዋይ መዳቢዎች ጋራ በመሥራት ላይ መሆኑን አስታውቋል። ኮለምበስ ማቩንጋ ከሃራሬ ባጠናቀረው ዘገባ፣ ዚምባቡዌ እየደጋገመ የሚከሰተው ድርቅ ከውሃ የሚመነጨውን የኤሌክትሪክ ኃይል እያዳከመው በመኾኑ ከነፋስ እና ከጸሐይ ኃይል በርከት አድርጋ ለማመንጨት የምትችልበትን መንገድ በማጥናት ላይ ነች፡፡

እንደ አውሮፓውያኑ አቆጣጠር 2024፣ በታሪክ ታይቶ በማያውቅ መልኩ ከ60 በላይ ሀገሮች ምርጫ ያካሄዱበት ዓመት ነበር። ምርጫዎቹን ተከትሎ ከድምፅ አሰጣጥ እና የምርጫ ውጤት ጋር የተያያዙ ከ160 በላይ ተቃዎሞዎች መቀስቀሳቸውንም ካርኒጅ የተሰኘው ዓለም አቀፍ የተቃውሞ መቆጣጠሪያ ማዕከል አስታውቋል። ከቁጥሩ በላይ ግን ዓመቱን የተለየ የሚያደርገው፣ ከተለመደው ወጣ ባለ መልኩ፣ በስልጣን ላይ የነበሩ በርካታ መሪዎች እና የፖለቲካ ፓርቲዎች ስልጣናቸውን ለማስጠበቅ አለመቻላቸው መሆኑን ፒው የተሰኘው የጥናት ተቋም አመልክቷል። የኢትዮጵያ እና የሶማሌላንድ ስምምነት እንደ አውሮፓውያኑ አቆጣጠር 2024 የጀመረው ባልተለመዱ እና ባልተጠበቁ ፖለቲካዊ ክስተቶች ነው። ከጅምሩ አዲሱን ዓመት ለመቀበል ዓለም ትኩረቱን በበዓሉ ዝግጅት ላይ ባደረገበት እለት፣ ኢትዮጵያ የባህር በር የምታገኝበት የመግባቢያ ሰነድ ከሶማሌላንድ መሪዎች ጋር መፈራረሟን አስታወቀች። በወቅቱ ለ50 ዓመት የሚዘልቅ ሊዝ እና እየታደሰ እንደሚቀጥል የተገለጸው ስምነት፣ ከባህር በር በተጨማሪ ኢትዮጵያ የጦርና የንግድ ሠፈር እንዲኖራት የሚፈቅድ መሆኑ ተገልጾ ነበር። ሶማሌላንድ በበኩሏ በምትኩ ኢትዮጵያ ዓለም አቀፍ እውቅና ልትሰጣት መስማማቷን አስታውቃ ነበር። ወዲያውኑ ግን የሶማሌላንድ ግዛት የአስተዳደሯ አካል መሆኑን የምትገልጸው ሶማሊያ «ስምምነቱ ሕጋዊ መሠረት የሌለው እና ሊዓላዊነቷን እንደሚዳፈር» በመግለፅ ተቃውሞዋን አሰማች። በሶማሊያ የሚንቀሳቀሰውን አል-ሻባብ ለመዋጋት በሀገሯ የሚገኙ ወታደሮች ለቀው እንዲወጡ እንደምታደርግም ዛተች። በዚህ ምክንያት 2024 በአፍሪካ ቀንድ የቀውስ ስጋት የፈጠረውን ይህን ውጥረት ለማርገብ ቀጠናዊ እና ዓለም አቀፋዊ ጥረቶች የተካሄዱበት ሆኖ አልፏል። በዓመቱ ማገባደጃ ላይ በቱርኩ ፕሬዝዳንት ሬሲፕ ጣይብ ኤርዶዋን አደራዳሪነት፣ ኢትዮጵያ እና ሶማሊያ ከሶማሌላንድ ጋር በተፈረመው የመግባቢያ ስምምነት ምክንያት ለአንድ ዓመት ገብተውበት የነበረውን ዲፕሎማሲያዊ ውዝግብ ለማቆም ስምምነት ማድረግ ቢችሉም፣ አሁንም ውጥረቱ ሙሉ ለሙሉ አልበረደም። ብሪክስ በ2024 መግቢያ የዓለም ትኩረት የሳበው ሌላው ጉዳይ፣ ኢትዮጵያ፣ ኢራን፣ ሳዑዲ አረቢያ እና የተባበሩት አረብ ኤም ሬትስ በመልማት ላይ ያሉ አገሮች የመሰረቱትን 'ብሪክስ' የተሰኘ ቡድን መቀላቀላቸው ነው። የምዕራባውያን አገሮች፣ እንደ ዓለም አቀፉ የገንዘብ ተቋም እና የዓለም ባንክ የመሳሰሉ ለመንግሥታት ብድር የሚሰጡ ጠቃሚ ዓለም አቀፍ ተቋማት ላይ ያላቸው ጫና የወለደውን ይኽን ቡድን ኢትዮጵያ የተቀላቀለችውም፣ በፖለቲካዊ እና ኢኮኖሚያዊ ጫናዎች ምክንያት መሆኑን፣ በኢትዮጵያ የኢኮኖሚ ባለሞያዎች ማህበር የምርምር እና ፖሊሲ ትንተና ዳይሬክተር እና የምጣኔ ሀብት ተመራማሪ ዶክተር ደግዬ ጎሹ አመልክተው ነበር። የአባላቱ ቁጥር ዘጠኝ የደረሱት ብሪክስ በዚህ አመት የተለያዩ ጉባዔዎችን ያካሄደ ሲሆን በሀገራቱ መካከል በሚደረጉ የንግድ ልውውጦች ብሄራዊ ገንዘባቸውን እንዲጠቀሙ የሚያስችል አሰራር ለመፍጠር በመሥራት ላይ መሆናቸውንም በዚህ እየተገባደደ ባለው ዓመት አስታውቀዋል። ሱዳን የአውሮፓውያኑ 2024፣ ኢትዮጵያን ጨምሮ ሶማሊያ እና ኤርትራ በሚገኙበት የአፍሪካ ቀንድ እየተባባሰ ከሄደው ዲፕሎማሲያዊ ውጥረት በተጨማሪ፣ በሀገር ውስጥ የፖለቲካ አለመረጋጋቶች የቀጠሉበት እና እና አዳዲስ የእርስ በእርስ ግጭቶችም የተፈጠሩበት አመት ነበር። ከቀጠናው ወጣ ሲል ደግሞ በሰሜን ምስራቅ በምትገኘው ሱዳንም፣ በሀገሪቱ ጦር ሰራዊት እና በፈጥኖ ደራሹ ኃይል መካከል የሚካሄደው ጦርነት በዚህ አመት አንደኛ አመቱን አስቆጥሮ ቀጥሏል። በዋና ከተማዋ ካርቱም ጨምሮ፣ በዳርፉር፣ ኮርዶፋን እና ሌሎች ክልሎች ከባድ ውጊያዎች ተካሂደዋል። ለ20 ወራት በሱዳን የዘለቀው ይህ አስከፊ ጦርነት እስከዛሬ ከተመዘገቡት ሁሉ ትልቁ ሰብዓዊ ቀውስ ሆኖ መመዝገቡን የዓለም ነፍስ አድን ኮሚቴ ያስታወቀ ሲሆን ከ11 ሚሊየን በላይ ዜጎች በሀገር ውስጥ እና በውጪ ሀገራት መፈናቀላቸውን የመንግስታቱ ድርጅት ገልጿል። ‘የረሃብ ክትትል ኮሚቴ’ በሚል የሚታወቀው ተቋም ከሳምንታት በፊት ይፋ ባደረገው ሪፖርት ከበባ ውስጥ ባለችው የሰሜን ዳርፉር መዲና አል ፋሽር ውስጥ በሚገኙ ሁለት መጠለያዎች፣ እንዲሁም በደቡብ ኮርዶፋን ግዛት በሚገኙ ሌሎች ሁለት አካባቢዎች ረሃብ መስፋፋቱንም አስታውቋል። ወደ 26 ሚሊዮን የሚጠጋ የሱዳንን ሕዝብ ለከባድ ረሃብ ያጋለጠውን አስከፊ ቀውስ ለማርገብ የሶማሊያ፣ ኢትዮጵያ፣ ኬንያ እና ዩጋንዳ መሪዎች የሚገኙበት ስብስብ በዚሁ ዓመት ስብሰባ አካሂዶ ነበር። በመስከረም ወር በኒውዮርክ የተካሄደው 79ኛው የዓለም መሪዎች ጉባዔ አጀንዳ ከነበሩ ርዕሶች አንዱም ይኽ የሱዳን ቀውስ ነው። ሆኖም የሱዳን የእርስ በእርስ ጦርነት መቋጫ ሳያገኝ አመቱ ተገባዷል። ምዕራብ አፍሪካ 2024 ከሱዳን በተጨማሪ በሌሎች የአፍሪካ ሀገራትም ቀውሶች፣ ጥቃቶች እና ፖለቲካዊ አለመረጋጋቶች ተስተናግደውበታል። ለምሳሌ በየካቲት ወር በሰሜናዊ ቡርኪናፋሶ በሚገኙ ሦስት መንደሮች ላይ የእስላማዊ የጽንፈኛ ኃይሎች ባደረሱት ጥቃት ከ170 በላይ ሰዎች ተገድለዋል። መጋቢት ወር ላይም በሰሜን ምዕራብ ናይጄሪያ ታቂዎች በአንድ ትምህርት ቤት ላይ ወረራ አካሂደው 280 ተማሪዎችን አግተው መውሰድ ችለዋል። ይህም እ.አ.አ በ2014 የቦኮ ሃራም ታጣቂዎች ከቺቦክ መንግደር በመቶዎች የሚቆጠሩ ልጃገረዶችን ካገቱበት ጊዜ አንስቶ፣ ከናይጄሪያ ትምህርት ቤቶች የታገቱ ተማሪዎች ብዛት ከ1ሺህ 400 እንዲበልጥ አድርጎታል። የኔዘርላንድ የጥናት ተቋም የሆነው ክሊነንዳል ኢንስቲትዩት አደገኛ የሆኑ ግንኙነቶችን አስመልከቶ ግንቦት ወር ላይ ይፋ አድርጎት በነበረው የጸጥታ ሪፖርት፣ ታጣቂዎች ከሳህል ቀጠና በባህር ዳርቻ ወደሚገኙ የበለጸጉ ሀገራት እየፈለሱ መሆኑን አመላክቷል። የኢኮኖሚ እድሎች እና ከፍተኛ የድህነት ደረጃ፣ ታጣቂዎች በቀጠናው በቀላሉ ሰዎችን እንዲመለምሉ እና እራሳቸውን እንዲያሳድጉ አስተዋጽኦ እያደረገ መሆኑንም ሪፖርቱ ጨምሮ ገልጿል። የሰሃራ በረሃን አብዛኛውን ክፍል የሚሸፍነው የአፍሪካ ሳህል ቀጠና የዓለም አቀፍ አሸባሪዎች ማዕከል መሆኑን የዓለም ሽብርተኝነት መረጃ ጠቋሚ እ.አ.አ በ2023 ያወጣው መረጃ ያሳያል። ከቅርብ አመታት ወዲህ በቀጠናው የተካሄዱት መፈንቅለ መንግሥቶች የአካባቢውን የጸጥታ ሁኔታ እና ለታጣቂዎቹ ይሰጡ የነበሩ ምላሾችን ክፉኛ እንደጎዱት ባለሙያዎች ይናገራሉ። ይህም በ2024 ተባብሶ ቀጥሏል። የአየር ንብረት ለውጥ ከፖለቲካ አለመረጋጋቱ ጎን ለጎን በ2024 ፈታኝ ሆኖ የቀጠለው በአየር ንብረት ለውጥ ምክንያት የሚከሰቱ የተፈጥሮ አደጋዎች ናቸው። በደቡብ ኢትዮጵያ፣ ጎፋ ዞን ሐምሌ ወር ላይ የጣለውን ከባድ ዝናብ ተከትሎ በደረሰው የመሬት መንሸራተት አደጋ ከ250 በላይ ሰዎች ህይወታቸውን ማጣታቸውን የተባበሩት መንግስታት ድርጅት ሪፖርት አስታውቋል። በዓመቱ መግቢያ በዘነበው ከፍተኛ ዝናብ ምክንያት የኮንጎ ወንዝ ባለፉት ስድስት አስርት አመታት ውስጥ ባልታየ ሁኔታ በመሙላቱ፣ በዲሞክራቲክ ሪፐብሊክ ኮንጎ እና በኮንጎ ሪፐብሊክ ያስከተለው ጎርፍ ከ300 በላይ ሰዎች ህይወት ሲያጠፋ ከ350 ሺህ በላይ ሰዎች ደግሞ የሰብዓዊ እርዳታ ጠባቂ ሆነዋል። በሚያዚያ ወር በምስራቅ አፍሪካ የጣለው ከፍተኛ ዝናብ ያስከተለው ጎርፍም በታንዛኒያ ከ155 በላይ ሰዎችን ሲገድል፣ ከ200 ሺህ በላይ የሚሆኑ ሰዎች ደግሞ ጉዳት ደርሶባቸዋል። በደቡብ አፍሪካ ባለፉት 40 አመታት ውስጥ አለመታየቱ የተገለጸ ድርቅም በአንጎላ፣ ቦትስዋና፣ ማላዊ፣ ሞዛምቢክ፣ ናሚቢያ፣ ዛምቢያ አንድ ማዳጋስካር ከፍተኛ ጉዳት አስከትሏል። እነዚህ ክስተቶች ታዲያ በህዳር ወር አዘርባጃን ዋና ከተማ፣ ባኩ ውስጥ በተካሄደው 29ኛው ዓለም አቀፍ የአየር ንብረት ጉባዔ መፍትሄ ይገኝላቸዋል ተብሎ ተጠብቆ ነበር። በአየር ንብረት ምክንያት ከፍተኛ ጉዳት እየደረሰባቸው ላሉ ታዳጊ ሀገራት ለመሰጠት ቃል የተገባው የገንዘብ ድጋፍም ወደ 1.3 ትሪሊየን ዶላር ያድጋል የሚል ተስፋ ተጥሎ ነበር። ሆኖም ከበለጸጉት ሀገራት የሚጠበቀው የገንዘብ ድጋፍም ሆነ፣ በከፍተኛ ሁኔታ እንዲቀንሱ የሚጠበቀው የአየር በካይ ጋዞችን ልቀት አለመሳካት ብዙዎችን አስቆጥቷል። መካከለኛው ምስራቅ ከአፍሪካ አህጉር ወጣ ስንል ደግሞ፣ 2024 በዋናነት በዩክሬን፣ በጋዛ፣ በሊባኖስ እና በቅርቡ ደግሞ በሶሪያ የተደረጉ ጦርነቶች የተሞላ ነበር። በተለይ በአመቱ ማገባደጃ በሶሪያ የተደረገው ውጊያ ሀገሪቱን ከግማሽ ምዕተ አመት በላይ ላስተዳድረው የአሳድ ቤተሰብ አገዛዝ ውድቀት ሆኗል። እ.አ.አ በጥቅምት 2023 የሐማስ ታጣቂ ቡድን ያደረሰውን ጥቃት ተክትሎ፣ እስራኤል ከአንድ አመት በላይ በጋዛ ባደረገችው ዘመቻ ከ45 ሺህ በላይ ፍልስጤማውያን መገደላቸውን፣ የተባበሩት መንግስታት ድርጅት የጋዛ ጤና ሚኒስትርን ጠቅሶ ዘግቧል። እንደ አምነስቲ ኢንተርናሽናል እና ሂዩማን ራይትስ ወች ያሉ ዓለም አቀፍ የሰብዓዊ ተቋማትም እስራኤል ጋዛ ውስጥ፣ በፍልስጤም ሕዝብ ላይ የዘር ማጥፋት አድራጎት ፈፅማለች ሲሉ በጦር ወንጀል እና በሰው ልጆች ላይ በሚፈፀሙ ወንጀሎች ከሰዋታል። በ2024 መጀመሪያ ጥር ወር ላይ ደቡብ አፍሪካ ተመሳሳይ ወንጀሎችን ጠቅሳ እስራኤልን በዓለም አቀፉ የወንጀል ፍርድ ቤት ከሳ ነበር። ክሱን የተቀበለው ፍርድቤቱም፣ የእስራኤሉ ጠቅላይ ሚኒስትር ቤንጃሚን ኔታንያሁ፣ የቀድሞ የመከላከያ ሚኒስትራቸው ዮአቭ ጋላንት እና የሐማስ ባለስልጣናትን በጦር ወንጀለኦች በመምክሰስ የእስር ማዘዣ አውጥቶባቸዋል። እስራኤል በጋዛ ላይ የጀመረችውን ጥቃት አጠናቅራ በመካከለኛው ምስራቅ ወዳሉ ሌሎች ሀገራት ፊቷን ያዞረችውም በዚሁ አመት ነው። ሊባኖስ በሚገኘው የሂዝቦላህ ታጣቂዎች ላይ ባደረሰችው ጥቃትም ከ3ሺህ በላይ ሰዎች መገደላቸውን የተባበሩት መንግስታት ድርጅት አስታውቋል። በሺዎች የሚቆጠሩ ደግሞ ከቤት ንብረታቸው ተፈናቅለዋል። ከእነዚህ ውስጥ በዋና ከተማዋ ቤይሩት ጨምሮ፣ በሊባኖስ የተለያዩ ከተሞች በቤት ሰራተኝነት የሚተዳደሩ በሺዎች የሚቅጠሩ ኢትዮጵያውያንም ይገኙበታል። በዚህ ምክንያት በከፍተኛ ችግር ውስጥ እንደሚገኙ ያመለከቱት በቤይሩት የሚኖሩ ኢትዮጵያውያኖች የኢትዮጵያ መንግስት ወደ ሀገራቸው እንዲመልሳቸው ተደጋጋሚ ጥያቄዎችን እያቀረቡ ይገኛሉ። የሩሲያ እና ዩክሬን ጦርነት በሩሲያ እና በዩክሬን መካከል የሚካሄደው ጦርነት ያላሸናፊ እና ያለተሸናፊ በ2024ም ቀጥሏል። በላቁ ወታደራዊ ቴክኖሎጂዎች በመታገዝ፣ ሩሲያ ወደፊት ለመግፋት የምታደርጋቸው ሙከራዎች እና የዩክሬን መልሶ የማጥቃት ዘመቻዎች በንፁሃን ዜጎች እና በሲቪል ተቋማት ከፍተኛ ጉዳት ማድረሳቸውን ቀጥለዋል። አንዳቸውም ግን የማሸነፍ ወይም ወደ ሰላም ድርድር የመምጣት ምልክት አላሳዩም። ይልቁኑም ሁለቱም ሀገራት በ2024 በነበራቸው የውጊያ ሂደት የሰው አልባ አውሮፕላን አጠቃቀማቸው በከፍተኛ ሁኔታ ጨምሮ እስካሁን 1.5 ሚሊየን ድሮኖችን መግዛታቸው ተመልክቷል። ስፖርት 2024 በአብዛኛው ጦርነቶች፣ መፈናቀሎች፣ ረሃብ፣ እና በአየር ንብረት ቀውስ በደቀኗቸው ፈተናዎች የተሞላ ይሁን እንጂ፣ ሙሉ ለሙሉ ግን የጨለመ አልነበረም። በየካቲት ወር አንድ ወር ለተጠጋ ጊዜ የተካሄደው የአፍሪካ ሀገራት የእግር ኳስ ዋንጫ ፍልሚያ የብዙ ኳስ አፍቃሪያንን ቀልብ የሳበ ሆኖ አልፏል። ውድድሩንም አዘጋጇ ሀገር ኳትዲቯር ተፎካካሪዋን ናይጄሪያን 2 ለ 1 በሆነ ውጤት በማሸነፍ፣ በአሸናፊነት አጠናቃለች። ከ60ሺ በላይ ህዝብ በሚያስተናግደው አላሳን ዋተራ (ኢቤምፒ) ስታዲየም የተከናወነውን የፍጻሜ ጨዋታ በሚሊየኖች የሚቆጠሩ አፍሪካዊያን በቀጥታ ስርጭት የተከታተሉት ሲሆን የዘንድሮውን የአፍሪካ ሀገራት ዋንጫ ለማዘጋጀት ኳትዲቯር 1 በሊየን ዶላር ገደማ እንዳወጣች ተመልክቷል። ሐምሌ ላይ በፓሪስ የተካሄደው የበጋ ኦሎምፒክስ ፉክክርም ዓለምን ያስደመሙ አስደናቂ የአትሌቲክስ ትዕይንቶች የታዩበት ሆኖ የተጠናቀቀው በተሰናባቹ 2024 ነበር። በመክፈቻው ስነስርዓት ፓሪስ፣ የሴይን’ን ወንዝ ተከትሎ ባለው ሥፍራ፣ እጅግ ያማረ፣ በከዋክብት የደመቀ እና ታሪካዊ የውበት እና የለውጥ መፍለቂያ ስሟን ያንጸባረቀ ልዩ የመክፈቻ ዝግጅት ያሳየች ሲሆን፣ በዓለም ዙሪያ በፈረንሳይኛ ቋንቋ ከሚጫወቱ ድምጻውያን ከፍተኛ ተደማጭነት ያላት ማሊያዊ-ፈረንሳዊቷ የፖፕ ሙዚቃ ኮከብ አቀንቃኝ አያ ናካሙራ፣ በወርቃማ ቀለም የተንቆጠቆጠ ልብስ ለብሳ፣ በዳንሰኞቿ እና በፈረንሳይ ብሄራዊ የክብር ዘብ ባንድ ታጅባ ተወዳጁን «ጃጃ» የተሰኘ ሙዚቃዋን ተጫውታለች።