Nunavimmiut qimmiisa qimuttut toqorarneqarnerat Nunavimmiut oqaluttuarisaaneranni pisimasut alianartut ilagaat. Canadami naalakkersuisut tamanna pillugu pisortatigoortumik maanna utoqqatsernialerput.

Kommune Kujalermi inunnik isumaginnittoqarfimmut akisussaaffik Naalakkersuisunit tiguneqarallarpoq. Naallu iluarsiigallarneq Kujataani innuttaasunit ajoriffissaqartinneqanngikkaluartoq, tamaanga killittoqarnera aamma uggorineqarpoq.

Nannumik Niaqornani Uummannap pigisaaniittumi sapaammi ullaakkut takunnittoqarpoq, aamma umiatsiaaraq pingasunik issimasulik Ilulissat avannaanni sikumut kiggigussaavoq.

USA-p iligisaalu sioorasaaruteqarnerat koreamiut qeqertaasa ilaanni pissutsit najummassimanarseqqeriaannarnerannik kinguneqartoq, Korea Avannarlerup siuttua oqarpoq.

Timersorneq, illoqarfinni minnerni inuussutissarsiornermi inerisaanermik siuarsaaneq atuarfeqarnermilu pitsanngorsaaneruneq, IA-p aamma Siumup aningaasanut inatsisissaq pillugu isumaqatigiissutaanni siunniussanut ilaapput.

Chris Wright, ikummatissanik atuisoqarnissaanik tapersersuisorujussuaq, USA-mi nukissiuuteqarnissamut ministerissatut Donald Trumpimit toqqarneqarpoq.

Kalaallit Nunaanni suliffeqarfiit namminersortut annersaat Elite Sport Greenlandimik nutaatut aningaasalersueqataalerpoq. Timersornikkut pikkorissunik piukkunnaatilinnillu taamaasilluni ineriartortitsisoqarnerulersinnaassaaq.

Nunatsinni UFO-qarneraasarneq UFO-t pillugit podcastimik tusarnaagassiortartup Martin Kleistip nuannarilivissimavaa.

DR-ip nunatsinnut juullimut inuulluaqqusisarnini unitsillugu nalunaaruteqarnera ukiuni arlalinni saqqummiisartuusimasup Julie Berthelsenip ajuusaarutigaa, oqaluttuarisaanermillu ilisimatusartup Ujammiugaq Engellip nunarput pillugu oqaluttuarineqartartut illuinnaasiortumik saqqummiunneqartalissappat ernummatigaa.

Meeqqanut inuusuttunullu naalakkersuisoq Aqqaluaq B. Egede naapertorlugu danskit isumaginninnermut ministeriata Sophie Hæstorp Andersenip neriorsuutigaa Danmarkimi kommunit kalaallit meeraannik allamut inisseeratarnissamik angajoqqaat piginnaasaannik nalileeriaaseq unitsissagaat piumasarineqassasoq.

Pinerluttunik Isumaginnittoqarfik nunatsinni kommunini annerpaaq pinerlitsaaliinermik suleqatigiilerput.

KNR TV-p atisanik ilusilersuisartut nuimanerpaat sisamat peqatigalugit atisanik takutitsineq alutornartoq saqqummiutissavaa. KNR TV-p kalaallit atisanik ilusilersuisartut nersorniarlugit atisanik takutitsinissamik aqqutissiuussisussamik saqqummiussinermigut piffiit nutaat atuutilernerat malunnartinniarpaa.

Innarluutilinnik arsaattartoqatigiit siulliit B-67ip aallartilerpai. Immikkut pisariaqartitsisunut tunniussaqarusunneq siuttuunerlu piumassusinitsitsivoq. Neriuutaavoq aamma allat aallartitsiumaartut.

Ikinngutigiit sisamat pisiniarfimmut upernaaq tillinniarsimasutut eqqartuunneqarput. Taakkunannga pingasut 37-nik ukiulimmik toqutseriarsimasutut aamma eqqartuunneqarput.

Tasiilami ullup unnuallu ingerlanerani 40-t meterisut sakkortutigisumik anoraasuangaatsiareersoq ajoqusernit maanna ersarissisut, Upalungaarsimasut pisortaat Henrik Andreassen oqarpoq.

Naalakkersuisut Kommune Kujallermi isumaginnittoqarfimmik ilungersuasumik ataatsimiititaliarluunniit isumaqatigiissummik ilisimatinneqarsimanngitsoq tigusisussanngorput. Kommunalbestyrelsimut ilaasortap ammasumik oqaluuserinnittoqannginnera naammatsiffigaa.

Kennedyp inuppassuarnit uissuummissutigineqartartumik covid 19-mut akiuussutissaq ataasiaannarnani qularnartoqarnerarlugulu autismemut atuumassuteqarnerarnikuuaa.

Inuusuttut eqimattat qaammatini kingullerni eqqagassat puussiarsuarnik angisuunik 53-inik ulikkaaripput. Eqqagassanik katersinissamut aaqqissuussisoq avatangiisinik paarinninnermut pikkorinnerulertariaqartugut isumaqarpoq.

Tasilami innuttaasut Piterarnerata nalaani angerlarsimaannarnissaat Kommuneqarfik Sermersuup kaammattuutigaa.

Aasaq 2025-p tungaanut angalaninni apuuffissannut apuutsinnak nunani allani akunnilluni mikkaanni immikkut isumannaallisaanermi misissuisoqartassaaq.

Kalaallit angajoqqaat meeraasa allamut inissinneqaratarsinnaanerannik Danmarkimi kommunit nalileeriaasitaassaat siornali piareersimasussaagaluarput. Nalileeriaasitaassaalli suli tassa piareeqqajanngillat.

Angut 49-nik ukiulik Nuummi Nuussuarmi pingasunngornermi ualikkut biilertilluni biilit aqussinnaajunnaarpai ajutoorlunilu.

Republikanerit USA-mi innuttaasut sinnerlugit sinniisoqarfimmi amerlanerussuteqalernertik qulakkeeraat USA-milu inatsisartuni assigiinngitsuni marluusuni taamaalillutik siuttuulissagunartut, USA-mi nutaarsiassaqartitsiviit ilaat allappoq.

Inuiaqatigiit ikittut, kinaassuseq, ileqqullu nunatta siunissaanut qanoq pingaaruteqarsinnaanerinut paasiniaasimasoq ukioq manna ilisimatusartut unammineranni ajugaasuuvoq.

Sisimiuni inuit 100-t tallimanngormat ingerlaaqatigiipput, taakku persuttaanerit Sisimiuni ukiuni arlalinni pisarsimasut akerleralugit ersarissarniarpaat. Borgmesterip, Malik Berthelsenip politiinit iliuuseqartoqarnissaa aamma piumasaqaatigaa.

Ukiup ataatsip ingerlanerinnaani Savalimmiut marloriarlutik assammik arsarnermi oqaluttuarisaanermut ilanngussipput. Atlantikup avannaamiut taakku peqataassapput arnat assammik arsarnermi Europami pissartanngorniunnerat novemberip naanerani aallartippat.

Naluttarfik Maliup siunissaa pillugu ukioq ataaseq sinnerlugu nalornisoqareersorlu suliami nutaarsiassaqalerpoq: Naluttarfik iluarsartuunneqassaaq, allilernissaalu siunissamut utaqqitinneqarpoq.

Angutit pingasut biilinik aallarussisut politiiniit pingasunngornermut unnuaani qimaapput. Taakkunannga marluk biilinik ajutooreernerminni qimaariaraluartut tigusarineqarput.

Paul Watsonip aniguilluni Nuuk suli qimaqqusaanngikkallaqqippaa. Nunatsinni Eqqartuussiveqarfiup tamanna aalajangerpaa.

Elon Musk suliffeqarfinnillu aallarnisaasoq USA-mi naalakkersuisut sullissinerisa pitsanngorsaavigineqarnisssaannut ministereqarfiulertussami siuttuussapput.

Nunatsinni kommunit eqqakkanik ammaannartumik ikuallaanissaat piffissami sivisunerusumi naalakkersuisunit aappaagu juulip 31-ata tungaanut periarfissiissutigineqarpoq.

Rebekka Olsvig Nuummeersoq piorsarsimassutsikkut peqatigiiffilerinermi annertuumik suliaqarsimanini pissutigalugu sølvimik tallimanngormat nersornaaserneqarpoq. Nersornaat Inatsisartut siulittaasuannit, Mimi Karlsenimit tunniunneqarpoq.

New Zealandimi meeqqat inersimasullu 200.000-t naalagaaffiup suliffeqarfiini inissinneqarsimasut assigiinngitsutigut atornerlunneqarsimasut, misissuinerup takutippaa.

Tillinniartoqarneranik akunnerit kingulliit 24-it ingerlaneranni nalunaarutiginninnerit arlaliusut, tillinniariaraluaq qaninngarneqarsimasoq biilinillu ikuallattoqartoq, Kalaallit Nunaanni Politiit nalunaarput.

Atoqatigiinnissami akuersissuteqarnissamut inatsit nunatsinni atuutsinneqalermalli ukioq ataaseq qaangiutereerpoq. Akuersissuteqarnissamut inatsit Danmarkimi atuutsinneqalermalli pinngitsaaliisoqarsimaneranik nalunaarutiginninnerit amerlisut nunatsinni allatut pisoqarpoq.