អតីត​ប្រធានាធិបតី​ហ្វីលីពីន លោក រ៉ូឌ្រីហ្គោ ឌុយទែរតេ ដែល​កំពុង​ជាប់ឃុំ​និងត្រូវ​​ប្រឈម​មុខ​នឹង​តុលាការព្រហ្មទណ្ឌអន្តរជាតិ បាន​ចេញវីដេអូ​មួយ ដោយ​ប្រកាស​ទទួល​ស្គាល់ការ​ប្រព្រឹត្ត​​ក្នុង​អាណត្តិ​ដឹកនាំ​របស់លោក ហើយ​អះអាង​ការពារ​មន្ត្រី​ថ្នាក់ក្រោម​ដែល​អនុវត្ត​តាម​ការបង្គាប់​បញ្ជា​របស់លោក។

ជាថ្មីម្តងទៀត លោក ហ៊ុន សែន ក្នុងនាមជាប្រមុខរដ្ឋស្តីទីបានលើកឡើងពីការចង់ឃើញរុស្សីចូលតុអង្គុយចរចាជាមួយអ៊ុយក្រែនដើម្បីអាចឈានដល់ការបញ្ចប់សង្គ្រាម។ ការលើកឡើងរបស់លោក ហ៊ុន សែនយ៉ាងដូច្នេះធ្វើឡើងនៅក្នុងជំនួបទ្វេភាគីជាមួយលោក Anatoly Borovik ឯកអគ្គរដ្ឋទូតរុស្សីប្រចាំកម្ពុជានៅព្រឹកថ្ងៃទី១៣ មីនា ឆ្នាំ២០២៥នេះ។

ថ្ងៃពុធ ទី ១២ ខែមីនា ប្រធានាធិបតីរុស្ស៊ី លោក វ៉្លាឌីមៀរ ពូទីន បានចុះទៅត្រួតពិនិត្យ អង្គភាពយោធារស្ស៊ី ដែលកំពុងឈរជើង ក្នុងតំបន់ Koursk ។ Koursk គឺជាទឹកដី  រុស្សី ដែលមួយផ្នែក កំពុងស្ថិតក្រោមការកាន់កាប់របស់កងទ័ពអ៊ុយក្រែន ចាប់តាំងរវាងពាក់កណ្តាលឆ្នាំ ២០២៤ រហូតមក។ ក្នុងដំណើរទស្សនកិច្ចដ៏កម្រនេះ មេដឹកនាំ រុស្ស៊ី បានថ្លែងទៅកាន់កងទ័ពរុស្ស៊ី ដោយភ្ជាប់ជាមួយក្តីសង្ឃឹមថា តំបន់ Koursk​ នឹងត្រូវវាយរំដោះចេញពីការត្រួតត្រា ពីសំណាក់អ៊ុយក្រែន ក្នុងពេលដ៏ខ្លីខាងមុខ។

កាលពីថ្ងៃអង្គារទី​១១មីនា លោក​ម៉ាក្រុង ប្រធានាធិបតីបារាំង បានជួបប្រជុំជាមួយ​នាយសេនាធិការកងទ័ព មកពីបណ្ដា​ប្រទេស​ជាង​៣០ ដើម្បី​និយាយអំពី​លទ្ធភាព​ចូលរួម​ របស់ប្រទេសនីមួយៗ នៅ​ក្នុង​ផែនការជួយ​ធានាការពារសន្តិសុខអ៊ុយក្រែន។ ជាការធានាសន្តិសុខនិងសន្តិភាពយូរអង្វែងសម្រាប់អ៊ុយក្រែន នៅពេលណាមាន​កិច្ចព្រមព្រៀង​បញ្ចប់សង្គ្រាមជាស្ថាពរជាមួយរុស្ស៊ី​។ គួរបញ្ជាក់ថា អ៊ុយក្រែនទើបតែបានយល់ព្រមតាមសំណើអាមេរិក ផ្អាក​ការប្រយុទ្ធបណ្តោះអាសន្ន៣០ថ្ងៃ ដើម្បីឈានទៅបើកការចរចាសន្តិភាព។ តែសម្រាប់ពេលនេះ គេកំពុងរងចាំស្តាប់ចម្លើយពីខាងរុស្ស៊ី​។

ការចូលរួមចំណែកការពារព្រៃឈើនៅកម្ពុជាត្រូវបានគេចាត់ទុក ជាបេសកកម្មមួយដ៏លំបាក និងអាចប្រឈមគ្រោះថ្នាក់។ ទោះជាយ៉ាងនេះក្តី​ នៅតែមានមនុស្សមួយចំនួនបន្តស្ម័គ្រចិត្តតស៊ូធ្វើការងារមួយនេះដោយមិនរុញរា។ លោក ពេជ្រ សារឿន ប្រធានសហគមន៍ព្រៃឈើ ឈើទាលព្រឹស បានបង្ហាញអារម្មណ៍តូចចិត្តដែលបានបរាជ័យក្នុងការទប់ស្កាត់បទល្មើសព្រៃឈើ។ ក៏ប៉ុន្តែ​ លោកនៅតែប្ដេជ្ញាចិត្តថា ដរាបណាព្រៃឈើនៅតែមាន លោកនៅតែបន្តការពាររហូតដល់ជីវិតចុងក្រោយ ៕

អគ្គនាយកដ្ឋានគយ និងរដ្ឋាករកម្ពុជាបានបិទបញ្ចប់នៅថ្ងៃទី១២ ខែមីនាលើវិធានការហាមឃាត់ការនាំចូលជាបណ្តោះអាសន្ននូវគ្រឿងក្នុង និងបំណែកសាច់សត្វបង្កកចាប់ពីថ្ងៃទី១៣ ខែមីនា តទៅ។ ការអនុញ្ញាតឲ្យមានការនាំសាច់បង្កកចូលទីផ្សារកម្ពុជាឡើងវិញ គឺបន្ទាប់ពីការហាមឃាត់អស់រយៈពេល១២ខែ។ តែសមាគមអ្នកចិញ្ចឹមសត្វកម្ពុជាទទួចឲ្យបញ្ឈប់ការនាំចូលទាំងស្រុងដោយពន្យល់ហេតុផលថា ការផ្គត់ផ្គង់សត្វរបស់អ្នកចិញ្ចឹមក្នុងស្រុក គឺគ្រប់គ្រាន់។ ចំណែកអ្នកជំនាញផ្នែកសុខាភិបាលទាញសញ្ញាពីហានិភ័យដល់សុខភាព ប្រសិនបើពលរដ្ឋកម្ពុជាបរិភោគប៉ះសាច់បង្កកដែលផ្ទុកជំងឺ និងមិនបានឆ្លងកាត់ការត្រួតពិនិត្យត្រឹមត្រូវ។

នៅថ្ងៃទី១៤​ មីនា សាលាឧទ្ធរណ៍បើកសវនាការរបស់ទណ្ឌិត ស្រី ស៊ីណា ជាលើកទី១ លើបណ្ដឹងពីបទឃាតកម្ម និងការប្រើប្រាស់អាវុធដោយគ្មានការអនុញ្ញាត។ តែគ្រួសារជនរងគ្រោះបានប្រាប់វិទ្យុបារាំងអន្តរជាតិ RFI នៅថ្ងៃទី១៣​ មីនាថា ពួកគេមានក្តីបារម្ភចំពោះការប្រែប្រួលតិចតួចលើរឿងក្តីមួយនេះ​ និងសង្ឃឹមថា​ សាលាឧទ្ធរណ៍នៅតែបន្តសម្រេចតម្កល់សាលក្រមកាត់ទោសរបស់សាលាដំបូងរាជធានីភ្នំពេញដដែល។

ថ្ងៃពុធទី ១២ ខែ មីនា ទីភ្នាក់ងារព័ត៌មានផ្លូវការរុស្ស៊ី បានផ្សាយឲ្យដឹងថា ប្រធានស្ថាប័នស៊ើបការណ៍ក្រៅប្រទេសរបស់រុស្ស៊ី លោក Serguei Naryshkine បានជួបសន្ទនាតាមទូរសព្ទ ជាមួយប្រធានស្ថាប័នស៊ើបការណ៍អាមេរិក CIA លោក John Ratcliffe។ នេះជាកិច្ចសន្ទនាលើកទី១ រវាងថ្នាក់ដឹកនាំនៃស្ថាប័នទាំងពីរ គិតតាំងពីពេល ដែលរុស្ស៊ី បានវាយលុកចូលអ៊ុយក្រែន ក្នុងខែ កុម្ភៈឆ្នាំ ២០២២ កន្លងទៅ។ 

ភាគី​អ៊ុយក្រែន និង​សហរដ្ឋអាមេរិក ដឹកនាំដោយរដ្ឋមន្ត្រីការបរទេសទាំងសងខាង ​បានជួប​ប្រជុំគ្នាជាលើកទី​១នៅឯទីក្រុងចេដដា ប្រទេសអារ៉ាប៊ីសាអូឌីត កាលពីថ្ងៃអង្គារទី​១១មីនា​។ ជាលទ្ធផលនៃកិច្ចប្រជុំនេះ អ៊ុយក្រែនបានសុខចិត្ត​ទទួលយក​សំណើរបស់ភាគីអាមេរិក​ ក្នុងការ​ផ្អាកការប្រយុទ្ធរយៈពេល​៣០ថ្ងៃ​ ហើយចំណែកភាគីអាមេរិក បានយល់ព្រម​ផ្តល់ជំនួយយោធា និង​ផ្តល់ព័ត៌មាន​កងទ័ព​ឲ្យ​អ៊ុយក្រែនឡើងវិញ​ផងដែរ​។ គិតត្រឹមពេលនេះ មិនទាន់​មានប្រតិកម្ម​ពី​រុស្ស៊ីឡើយ​។

ប្រជាពលរដ្ឋ​ប៉ាឡេស្ទីន​ បាន​​ផ្តល់​សក្ខីកម្មដោយ​បកអាក្រាត​​ពីទារុណកម្មនិងអំពើហិង្សា​ផ្លូវ​ភេទ ដែល​បង្កឡើង​ពី​សំណាក់​​ទាហាន អ្នកសួរ​ចម្លើយ​ ​និង​ឆ្មាំពន្ធនាគារ​អ៊ីស្រាអែល។ ការ​ចេញមុខរិះគន់​​សកម្មភាព​អមនុស្សធម៌​របស់​អ៊ីស្រាអែលនៅពេល​​នេះ ​ឋិតក្នុង​ក្របខណ្ឌ​ស៊ើបអង្កេត​​​របស់​អង្គការ​សហប្រជាជាតិ ស្តីអំពីស្ថានភាព​សិទ្ធិពលរដ្ឋ​ប៉ាឡេស្ទីន​ ក្នុង​តំបន់​អាណានិគមកិច្ចត្រួតត្រាដោយ​អ៊ីស្រាអែល​។​ 

កោះហ្ក្រូអិនឡង់ដ៍ ដែលជាដែនដី​ស្វយ័តរបស់​ដាណឺម៉ាក បានរៀបចំបោះឆ្នោតសភាកាលពីថ្ងៃអង្គារ​ទី​១១មីនា​។ ជាលទ្ធផលគួរ​ឲ្យ​ភ្ញាក់​ផ្អើល​​ គឺគណបក្សស្តាំកណ្តាលនិយម ដែលបានសំឡេងឆ្នោតនាំមុខគេ រីឯគណបក្ស​​ឯករាជនិយមដែលទាមទារចង់ផ្តាច់ខ្លួនពី​ដាណឺម៉ាក ស្ថិតនៅលំដាប់ទី​២​។ ទោះជាយ៉ាងណា គណបក្សស្តាំកណ្តាលនិយមត្រូវតែចរចា​ជាមួយប​ក្សផ្សេង ដើម្បី​បង្កើតរដ្ឋាភិបាលចម្រុះ​។ ជារដ្ឋាភិបាល​ដែលនឹងមកកំណត់ទិសដៅ​ត្រូ​វដើរ សម្រាប់អនាគតកោះហ្ក្រូអិន​ឡង់ដ៍ ដែល​កំពុងតែស្ថិតនៅក្នុងការប្រទាញប្រទង់គ្នាខ្លាំង ដោយសារតែលោកដូណាល់ ត្រាំ បាន​និយាយ​ម្តងហើយម្តងទៀត ថាចង់​បានកោះនេះមកគ្រប់គ្រង​។

ភាគី​អ៊ុយក្រែន និង​សហរដ្ឋអាមេរិក ដឹកនាំដោយរដ្ឋមន្ត្រីការបរទេសទាំងសងខាង ​បានជួប​ប្រជុំគ្នាជាលើកទី​១នៅឯទីក្រុងចេដដា ប្រទេសអារ៉ាប៊ីសាអូឌីត កាលពីថ្ងៃអង្គារទី​១១មីនា​។ អ៊ុយក្រែន​បានស្នើ​គម្រោង​ធ្វើបទបាញ់មួយផ្នែក នៅលើអាកាសនិង​សមុទ្រ ជាមួយរុស្ស៊ី​។ ហើយស្របពេលដែលមាន​កិច្ចប្រជុំនេះ កងទ័ពអ៊ុយក្រែន​ បានបើកការវាយ​ប្រហារ​ទ្រង់ទ្រាយធំ ដោយ​ប្រើយានដ្រូនជាច្រើនរយគ្រឿង វាយបំផ្ទុះទៅដល់​រដ្ឋធានីម៉ូស្គូរបស់រុស្ស៊ី​តែម្តង​។

អ្នកស្រី សូ ភីណា ជាអ្នកនិពន្ធ និងជាអ្នកបោះពុម្ពផ្សាយដ៏មានប្រជាប្រិយភាពម្នាក់នៅកម្ពុជា។ អ្នកស្រីបានចូលប្រឡូកក្នុងវិស័យតែងនិពន្ធចាប់តាំងពីឆ្នាំ ២០១៣ និងបានបង្កើតគ្រឹះស្ថានបោះពុម្ពផ្សាយកម្ពុមេរានៅក្នុងឆ្នាំ២០១៥ ព្រមទាំងបានបង្កើតមហោស្រពអក្សរសិល្ប៍ខ្មែរនៅតាមបណ្តាខេត្តនានានៅកម្ពុជាចាប់តាំងពីឆ្នាំ២០១៧។ ជាអ្នកតំណាងឲ្យសម្លេងស្ត្រីខ្មែរនៅក្នុងវិស័យតែងនិពន្ធ អ្នកស្រី ភីណា តែងត្រូវបានគេអញ្ញើញឲ្យចូលរួមនៅក្នុងសន្និបាត ឬមហោស្រពអក្សរសិល្ប៍នានានៅបរទេស។

សហរដ្ឋអាមេរិកធ្លាប់តែ​​ជាប្រទេស​​ម្ចាស់​ជំនួយធំជាងគេ​ក្នុង​គម្រោង​​មនុស្សធម៌​ពិភពលោក​ តែរដ្ឋាភិបាលក្រុង​វ៉ាស៊ីន​តោន​ក្រោម​អំណាច​របស់​លោក ដូណាល់ ត្រាំ ​បាន​ប្រកាស​រឹតត្បឹតកាត់​បន្ថយ​​ចំណាយ​ថ​វិកាជាតិ​ ដោយ​ត្រូវ​ផ្តាច់​ជំនួយអន្តរជាតិ ​ជាង ៨០ %​។ ស្ថាប័ន​អន្តរជាតិនិង​អង្គការ​មនុស្សធម៌​នានា ដែល​ធ្លាប់​ទទួល​ជំនួយ​អាមេរិក បាន​ចេញមុខ​ដាស់តឿន​អំពីគ្រោះថ្នាក់​ ដោយ​បញ្ជាក់ថាការ​ផ្តាច់​ជំនួយ​មនុស្សធម៌​​អាមេរិក​ នឹង​ធ្វើ​ឲ្យ​ប៉ះពាល់ដល់អាយុជីវិតមនុស្សរាប់លាននាក់ នៅទូទាំង​ពិភពលោក។​ 

នៅក្នុងពិធីចែកសញ្ញាបត្រដល់និស្សិតវិទ្យាស្ថានវ៉ាន់ដានាព្រឹកថ្ងៃទី១១ ខែមីនា ឆ្នាំ២០២៥ នេះ លោកនាយករដ្ឋមន្ត្រី ហ៊ុន ម៉ាណែត បានថ្លែងទៅកាន់ក្រុមប្រឆាំងនៅក្រៅប្រទេសថា រដ្ឋាភិបាលនៅលើពិភពលោកនេះ គឺគ្មានរដ្ឋាភិបាលណាដែលមិនប្រឈមនឹងបញ្ហាទេ។ ការថ្លែងដូចនេះរបស់លោក ហ៊ុន ម៉ាណែតធ្វើឡើង ក្រោយពេលមានការបំផុសពីសំណាក់អ្នកនយោបាយប្រឆាំងនៅក្រៅប្រទេសដែលតែងតែអំពាវនាវឲ្យប្រជាជនក្រោយឈរឡើងប្រឆាំងនឹងរដ្ឋាភិបាលរបស់លោក។

វិទ្យាស្ថានបារាំង និងស្ថានទូតបារាំងប្រចាំកម្ពុជានឹងចាប់ផ្តើមរៀបចំព្រឹត្តិការណ៍អបអរសប្តាហ៍ភាសាបារាំង និងហ្វ្រងកូហ្វូនីនៅមុន និងចាប់ពីថ្ងៃទី២០ ខែមីនានេះទៅ។ សេចក្តីប្រកាសព័ត៌មានរបស់ស្ថានទូតបារាំងប្រចាំកម្ពុជានៅថ្ងៃទី១០ ខែមីនា ឆ្នាំ២០២៥ បានឲ្យដឹងថា ព្រឹត្តិការណ៍វប្បធម៌ដ៏ធំនេះធ្វើឡើងក្នុងគោលដៅលើកស្ទួយភាសាបារាំង ក៏ដូចជាវប្បធម៌នៃប្រទេសប្រើប្រាស់ភាសាបារាំង។

យប់ថ្ងៃចន្ទ ទី ១០ ឆ្លងចូលថ្ងៃ អង្គារ ទី ១១ ខែមីនា អ៊ុយក្រែនបានបញ្ជូនយានដ្រូន ជាង ៣៣០ គ្រឿងបំពាក់ដោយគ្រាប់ផ្ទុះ ទៅវាយប្រហារលើទឹកដីរុស្ស៊ី ដែលក្នុងនោះ ទីក្រុងម៉ូស្គូ បានក្លាយជាផ្ទាំងស៊ីបទី១។ ប្រតិបត្តិការវាយប្រហារ ទ្រង់ទ្រាយធំបំផុត មិនធ្លាប់មាន ពីសំណាក់កងទ័ពអ៊ុយក្រែនលើកនេះ បានបណ្តាលឲ្យមានមនុស្សស្លាប់យ៉ាងតិច ២ នាក់ និង របួស​ជាង ១៨ នាក់។

កាលពីថ្ងៃចន្ទទី​១០​មីនា​ មានករណីនាវា២គ្រឿងបុកគ្នាផ្ទុះ​ឆេះ​ នៅក្នុងសមុទ្រខាងជើង ភាគខាងកើតប្រទេសអង់គ្លេស។ ផ្អែកតាមព័ត៌មាន​បឋម នាវាមួយ​ជានាវាដឹកទំនិញ បាន​បើកបុក​នាវាដឹកប្រេងដែលឈប់ចតនៅស្ងៀម បណ្តាលឲ្យ​ផ្ទុះឆេះ​។ ក្រុមសង្គ្រោះបាន​ជួយ​រំដោះ​បានបុគ្គលិក​លើនាវាទាំង២ ​ជាង​៣០​នាក់ តែមាន​ម្នាក់​បាត់ខ្លួន។ អង្គការបរិស្ថាន​​និង​អាជ្ញាធរអង់គ្លេសមានការព្រួយ​បារម្ភជាខ្លាំង​ អំពីផលប៉ះពាល់​បរិស្ថានបណ្តាល​មកពី​ការបែកធ្លាយ​ប្រេង​ និងសារធាតុពុលផ្សេងៗចូលទៅក្នុងសមុទ្រ​។

ប៉ូលិសអន្តរជាតិ​​អាំងទែរប៉ូល (Interpol Manille) ​ប្រចាំការ​នៅ​ក្រុង​ម៉ានីល បាន​ចាប់ខ្លួនអតីតប្រធានាធិបតីហ្វីលីពីន លោក រ៉ូឌ្រីហ្គោ ឌុយទែរតេ។ ការ​ឃាត់ខ្លួន​នេះ ​អនុវត្តតាម​ដីកា​ចាប់​ខ្លួន​របស់តុលាការព្រហ្មទណ្ឌអន្តរជាតិ នៅទីក្រុង​ឡាអេ ដែល​បាន​ចោទប្រកាន់​អតីត​ថ្នាក់ដឹកនាំ​ហ្វីលីពីនរូបនេះ​ ពីបទល្មើស​​ឧក្រិដ្ឋកម្មប្រឆាំងមនុស្សជាតិ​។​ ​

សហ​ភាព​សហព័ន្ធ​យុវជន​កម្ពុជា​បាន​ប្រកាស​ជា​ផ្លូវ​ការ​នៅ​ថ្ងៃ​ទី​៩ ​ខែ​មីនា​ពី​ការ​ត្រៀម​រៀប​ចំ​ព្រឹត្តិការណ៍អង្គរ​សង្ក្រាន្ត ឆ្នាំ​២០២៥ ក្រោម​ប្រធាន​បទ «ញញឹម​សាទរ​សង្ក្រាន្ត​ឆ្នាំថ្មី»​។ ​ព្រឹត្តិ​ការណ៍​នេះ​នឹង​រៀប​ចំ​ធ្វើនៅ​ខេត្ត​សៀម​រាប​រយៈ​ពេល​ ៣​ថ្ងៃ​ពី​ថ្ងៃទី​ ១៤ ដល់ ១៦ ខែ​មេសា ឆ្នាំ​២០២៥​។​ មាន​មតិ​ខ្លះ​លើក​ឡើង​ថា ​ការ​រៀប​ចំ​ព្រឹត្តិ​ការណ៍​នេះ​ គឺ​ជាការ​ចំណាយ​ថវិកា​ខ្ជះ​ខ្ជាយ និង​ជាការ​បង្កើត​ព្រឹត្តិការណ៍​ដើម្បី​បង្វែរ​ព្រឹត្តិ​ការណ៍​។​ តែ​នៅព្រឹក​ថ្ងៃ​ទី​១១ ខែ​មីនា ​ប្រមុខ​រដ្ឋា​ភិបាល​ លោក ហ៊ុន ម៉ាណែត បាន​ការ​ពារ​ផែន​ការ​រៀប​ចំ​ព្រឹត្តិ​ការណ៍​ «អង្គរ​សង្ក្រាន្ត»​ ថា​ គឺ​ជា​ការ​ទាក់​ទាញ​ភ្ញៀវ​ទេសចរ​ និង​មិន​មែន​ជាការ​បង្កើត​ព្រឹត្តិការណ៍​ដើម្បី​បង្វែរ​ព្រឹត្តិការណ៍​នោះ​ទេ​។​

ក្នុងរយៈពេល​៥ឆ្នាំចុងក្រោយ ប្រទេសអឺរ៉ុប​សមាជិកអូតង់ បានបង្កើនការទិញគ្រឿងសព្វាវុធ​ពីអាមេរិកចំនួន​ទ្វេដង បើប្រៀបធៀបទៅកំឡុងពេល​ឆ្នាំ​២០១៥-២០១៩។ នេះបើផ្អែកតាមរបាយការណ៍របស់វិទ្យាស្ថាន​ SIPRI ដែលមានទីតាំង​នៅទីក្រុងស្តុកខូលម៍​។ ការសំរុកទិញគ្រឿងសព្វាវុធ​​នៅតាមបណ្តាប្រទេសអឺរ៉ុប គឺវាស្ថិតនៅក្នុងបរិបទមួយ​ ដែល​រុស្ស៊ី​គំរាម​សន្តិសុខកាន់តែខ្លាំង។ តែទន្ទឹមនឹងនេះ វាសបញ្ជាក់ថាអឺរ៉ុបនៅតែពឹង​ផ្អែក ទៅលើ​គ្រឿងសព្វាវុធអាមេរិក បើទោះបី​ជាមានឆន្ទៈចង់​ផលិត និងពង្រឹងសមត្ថភាពការពារខ្លួន​ដោយ​ខ្លួនឯងក៏ដោយ​។

នៅភូមា សង្រ្គាមស៊ីវិល​មិនត្រឹម​បង្កអសន្តិសុខ បង្កើតវិបត្តិមនុស្សធម៌ ការផ្លាស់ទី ប៉ុន្តែ វា​ជា​ដើមចម​នៃ​ភាពក្រីក្រ​គ្មានថ្ងៃបញ្ចប់។ ដោយសារ​តែជីវភាព គ្រោះ​អត់ឃ្លាន ប្រជាជន​ភូមា នៅរដ្ឋ​ស្ហាន ដែលមាន​ព្រំដែនជាប់ព្រំដែនប្រទេស​បី គឺ ចិន ឡាវ និងថៃ ​បាន​ងាក​ទៅ​ប្រកបរបរ​ដាំដំណាំអាភៀន ជំនួសការធ្វើស្រែចម្ការ។ ដំណាំអាភៀនជា​ជំរកចុងក្រោយ​របស់ពួកគេ​នៅក្នុង​ប្រទេស​មួយ ដែល​សង្រ្គាម​ស៊ីវិល​កំពុង​ផ្ទុះឡើង នៅ​គ្រប់​កន្លែង ខណៈ​ដែល​ភាគីជម្លោះ​ក្រាញ ចង់ឈ្នះរៀងៗខ្លួន។ មេដឹកនាំរបបសឹកភូមា​ដែលបានធ្វើរដ្ឋប្រហារ​ទម្លាក់រដ្ឋាភិបាល​ស៊ីវិល​របស់​លោកស្រី​អ៊ុងសាន ស៊ូជី និង​ប្រយុទ្ធតទល់​នឹង​ក្រុមឧទ្ទាម​ប្រឆាំង​៤ឆ្នាំមកនេះ ទើប​ប្រកាស​បន្ត​ដាក់​ប្រទេស​ក្នុងស្ថានភាពអាសន្ន រយៈពេល​៦ខែ​តទៅទៀត។

ផ្ទះបុរាណមួយខ្នងសង់អំពីឈើ ស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង មានអាយុកាលជាង ១០០ឆ្នាំមកហើយ ប៉ុន្តែសភាពផ្ទះទាំងមូលនៅតែរឹងមាំ និងមានសោភ័ណភាពដូចដើមស្ទើរតែ ១០០%។ លោក យី សារិទ្ធ ជាម្ចាស់ផ្ទះជំនាន់ទី៣ បានបញ្ជាក់ថា ផ្ទះរបស់លោកមានលេខ មុខ ក្រោយ ខុសគ្នា។ ផ្ទះលេខ១ មានអាយុកាល ១១៨ ឆ្នាំ និងផ្ទះលេខ២ មានអាយុកាល ១៣៥ឆ្នាំ កំពុងទាក់ទាញភ្ញៀវទេសចរឲ្យចូលទៅទស្សនាជាហូរហែ និងបានជួយបង្កើនប្រាក់ចំណូលដល់ក្រុមគ្រួសារលោកមួយកម្រិតថែមទៀត តាមរយៈការបង់វិភាគទានពីភ្ញៀវម្នាក់ ២$។

នៅថ្ងៃអាទិត្យទី៩ មីនា មន្ទីរប្រឆាំងគ្រឿងញៀននៃអគ្គស្នងការនគរបាលជាតិបានចេញមុខបដិសេធចំពោះព័ត៌មានដែលថា សមត្ថកិច្ចបានចាប់មនុស្សញាត់ចូលឡានដោយគ្មានមូលហេតុ។ ការបដិសេធនេះធ្វើឡើង បន្ទាប់ពីគណនីហ្វេសប៊ុកឈ្មោះ Pheavy FC និងសារព័ត៌មាន ស៊ី អរ អិន បានបង្ហោះវីដេអូទាក់ទងនឹងសកម្មភាពដែលសមត្ថកិច្ចបង្ក្រាបបទល្មើសគ្រឿងញៀនក្នុងសង្កាត់ព្រែកកំពឹស ខណ្ឌដង្កោ។

នៅថ្ងៃទី៩ ខែមីនា ឆ្នាំ២០២៥ លោក ហ៊ុន ម៉ាណែត នាយករដ្ឋមន្ដ្រីកម្ពុជាបានចេញសារសំឡេងមួយពាក់ព័ន្ធនឹងការរៀបចំចរាចរណ៍នៅពេលមានក្បួនរថយន្តធ្វើដំណើរតាមផ្លូវរបស់ថ្នាក់ដឹកនាំ។ តាមលោក ហ៊ុន ម៉ាណែត កងកម្លាំងរក្សាសណ្ដាប់ធ្នាប់គួរតែកាត់បន្ថយរយៈពេលនៃការបិទផ្លូវ និងមិនចាំបាច់បិទផ្លូវទាំងអស់ទេ។ ចំណែកករណីមានឡានសឺរ៉ែន គឺត្រូវសម្រួលឱ្យធ្វើដំណើរទៅមុន។ អ្នកតាមដានសង្គមយល់ថា ដើម្បីកុំឱ្យមានការកកស្ទះចរាចរណ៍ គឺទាល់តែកងកម្លាំងកុំបិទផ្លូវទុកមុនយូរពេក និងថា រដ្ឋគួរកសាងហេដ្ឋារចនាសម្ព័ន្ធផ្លូវថ្នល់ក្នុងក្រុងបន្ថែមទៀត មិនថាផ្លូវអាកាស ឬផ្លូវក្រោមដី។

អង្គភាពប្រឆាំងអំពើពុករលួយហៅកាត់ ACU បានបើកការស៊ើបសួរ និងប្តឹងអភិបាលរងខេត្តកំពង់ស្ពឺជាមួយបក្ខពួក ២រូបក្នុងសំណុំរឿងប្រព្រឹត្តអំពើពុករលួយ កិបកេងលុយប្រមាណ៤០ម៉ឺនដុល្លា។ បើតាមសេចក្តីប្រកាសរបស់សាលាដំបូងខេត្តកំពង់ស្ពឺ អភិបាលរងខេត្តកំពង់ស្ពឺ និងបក្ខពួកត្រូវបានតុលាការខេត្តកំពង់ស្ពឺចេញដីកាឃុំខ្លួនក្នុងពន្ធនាគារ។

អ៊ីរ៉ង់មិនចុះចាញ់ ឱនក្រាប​នៅចំពោះមុខ​ការគំរាមកំហែង​របស់​អាមេរិក។ នៅថ្ងៃសៅរ៍​កន្លងទៅ ប្រមុខដឹកនាំ​សាសនា អាយ៉ាតូឡា អាលី ខាមេណី ដែលជា​មនុស្សមានអំណាច​ធំជាងគេ​នៅអ៊ីរ៉ង់ បាន​បដិសេធមិន​ចរចា​ជាមួយ​អាមេរិក ពោល​គឺ​នៅបន្ទាប់ពី​លោកដូណាល់ ត្រាំ គំរាមកំហែង​ប្រើកម្លាំងយោធា បើសិន​អ៊ីរ៉ង់​មិន​ព្រម​ចរចា​ជាមួយ​អាមេរិក។ នៅ​ក្នុងបទសម្ភាសន៍ជាមួយទូរទស្សន៍អាមេរិកាំង Fox News ចាក់ផ្សាយ​នៅថ្ងៃសុក្រ លោកដូណាល់ ត្រាំ​បាន​អះអាង​ថា លោក​បានផ្ញើសំបុត្រ​មួយច្បាប់ទៅ​អាយ៉ាតូឡា​ អាលី ខាមេណី ដើម្បីបើកការចរចា​លើ​កិច្ចព្រមព្រៀងថ្មី​ស្តីពី​កម្មវិធីនុយក្លេអ៊ែរ​របស់អ៊ីរ៉ង់។

នៅថ្ងៃចន្ទទី​១០​មីនា អាជ្ញាធរនគរបាល​ក្រុងស៊េអូល បានចេញបញ្ជា​ហាមឃាត់​​រាល់ការជួបជុំទាំងអស់ នៅ​តំបន់ជុំវិញ​តុលាការធម្មនុញ្ញកូរ៉េខាងត្បូង ស្របពេល​ដែល​ស្ថាប័នយុត្តិធម៌​កំពូលនេះ ត្រៀម​ប្រកាស​សាល​ក្រម ថា​តើ​​លោក​ប្រធានាធិបតី យូន ស៊ុកយោល​នឹងត្រូវដក​ហូតចេញពី​តំណែងឬយ៉ាងណា​។ អាជ្ញាធរក្រុងស៊េអូល មានការបារម្ភអំពីបាតុកម្មហិង្សាចលាចល ព្រោះថាករណី​នេះធ្លាប់​មានម្តងហើយ នៅ​ពេល​ដែល​តុលាការ​មួយ​បាន​សម្រេចពន្យាការឃុំខ្លួន​លោក​យូន ស៊ុក​យោល។ សូមបញ្ជាក់ថា លោក​យូន ស៊ុក​យោល ទើបតែត្រូវបាន​គេដោះលែង​ឲ្យ​នៅក្រៅ​ឃុំវិញ កាលពីថ្ងៃសៅរ៍សប្តាហ៍មុន ដោយសារមូលហេតុ​នីតិវិធី​។

លោក ហ៊ុន ម៉ាណែត នាយក​រដ្ឋមន្ត្រី​កម្ពុជា បញ្ជា​ឲ្យ​ស្ថាប័ន​ជំនាញ​សហការ​អភិរក្ស និង​ថែ​រក្សា​តំបន់​ទេសចរណ៍​ខ្នង​ផ្សារ និង​ខ្នង​សំពៅ នៃ​ឧទ្យាន​ជាតិ​ភ្នំ​ក្រវ៉ាញ​ឲ្យ​បាន​ល្អ សម្រាប់​ផល​ប្រយោជន៍​សាធារ​ណៈ និង​សហគមន៍​នៅ​តំបន់​នោះ​។ ​បទ​បញ្ជា​របស់​ប្រមុខ​រដ្ឋាភិបាល​ចេញ​ថ្ងៃ​ទី​១០ ខែ​មីនា ឆ្នាំ​២០២៥​ ធ្វើ​ឡើង​ បន្ទាប់​ពី​លោក​បាន​ចុះ​ទៅ​ដល់​តំបន់​ភ្នំ​ខ្នង​ផ្សារ ​ក្នុង​ខេត្ត​កំពង់​ស្ពឺ កាល​ពី​ថ្ងៃ​ទី​៨ ខែ​មីនា​។

ការដំឡើងពន្ធលើទំនិញកាណាដា ម៉ិកស៊ិក និងចិន​នាំចូលទៅ​អាមេរិក​បានចូលជា​ធរមាន​នៅថ្ងៃអង្គារ ទី​៤មីនា។ ប៉ុន្តែ នៅមួយថ្ងៃក្រោយ លោក​ដូណាល់ ត្រាំ​បាន​ប្រកាសជាបន្តបន្ទាប់គ្នា​​ថា លោក​សម្រេច​លើកលែង​មុខទំនិញកាណាដា និងម៉ិកស៊ិកមួយចំនួនវិញ ចំណែក ទំនិញចិនទាំងអស់នៅតែ​ត្រូវ​បង់ពន្ធបន្ថែមនៅ​ក្នុងកម្រិត​២០%ដដែល។ លោក​ដូណាល់ ត្រាំ​បានពន្យល់​ការប្តូរជំហរ ថយមួយជំហាន​មកវិញក្នុងរឿងដំឡើងពន្ធ​លើទំនិញកាណាដា និងម៉ិកស៊ិកថា មកពីលោក​ចង់ជួយប្រទេស​ជិតខាងទាំងពីរដែលធ្វើពាណិជ្ជកម្ម​ជារៀងរហូតមកជាមួយអាមេរិក។ ចង់ជួយប្រទេស​ជិតខាង របស់លោកដូណាល់ ត្រាំ ជាពាក្យពិតដែរឬទេ? តើ​អ្វីទៅជា​ហេតុផលពិតប្រាកដដែលធ្វើ​ឲ្យ​លោកដូណាល់ ត្រាំ​ថយមួយជំហាន​ក្នុងជម្លោះពាណិជ្ជកម្ម​ជាមួយ​ប្រទេស​ជិតខាង ជាពិសេស​កាណាដា? 

ការផ្សាយ​កម្មវិធីព័ត៌មានប្រចាំថ្ងៃអាទិត្យ ទី៩ ខែមីនា ឆ្នាំ២០២៥ រៀបចំដោយ​សាំ ឧត្តម

ការដំឡើងពន្ធលើទំនិញកាណាដា ម៉ិកស៊ិក និងចិន​នាំចូលទៅ​អាមេរិក​បានចូលជា​ធរមាន​នៅថ្ងៃអង្គារ ទី​៤មីនា។ ប៉ុន្តែ នៅមួយថ្ងៃក្រោយ លោក​ដូណាល់ ត្រាំ​បាន​ប្រកាសជាបន្តបន្ទាប់គ្នា​​ថា លោក​សម្រេច​លើកលែង​មុខទំនិញកាណាដា និងម៉ិកស៊ិកមួយចំនួនវិញ ចំណែក ទំនិញចិនទាំងអស់នៅតែ​ត្រូវ​បង់ពន្ធបន្ថែមនៅ​ក្នុងកម្រិត​២០%ដដែល។ លោក​ដូណាល់ ត្រាំ​បានពន្យល់​ការប្តូរជំហរ ថយមួយជំហាន​មកវិញក្នុងរឿងដំឡើងពន្ធ​លើទំនិញកាណាដា និងម៉ិកស៊ិកថា មកពីលោក​ចង់ជួយប្រទេស​ជិតខាងទាំងពីរដែលធ្វើពាណិជ្ជកម្ម​ជារៀងរហូតមកជាមួយអាមេរិក។ ចង់ជួយប្រទេស​ជិតខាង របស់លោកដូណាល់ ត្រាំ ជាពាក្យពិតដែរឬទេ? តើ​អ្វីទៅជា​ហេតុផលពិតប្រាកដដែលធ្វើ​ឲ្យ​លោកដូណាល់ ត្រាំ​ថយមួយជំហាន​ក្នុងជម្លោះពាណិជ្ជកម្ម​ជាមួយ​ប្រទេស​ជិតខាង ជាពិសេស​កាណាដា? 

បន្ទាប់ពីជោគជ័យជាច្រើនឆ្នាំជាប់គ្នា ទិវាជាតិអំណានលើកទី១០បាននាំយកសៀវភៅច្រើនប្រភេទមកបង្ហាញដល់សាធារណជននៅក្នុងឱកាសតាំងពិព័រណ៍សៀវភៅ។ ទិវាជាតិអំណាន និងការដាក់តាំងពិព័រណ៌សៀវភៅ រយៈពេល៤ថ្ងៃ ចាប់ពីថ្ងៃទី៨មីនាដល់ថ្ងៃទី១១មីនាប្រព្រឹត្តទៅនៅបរិវេណវិទ្យាស្ថានបច្ចេកវិទ្យាកម្ពុជា ឬសាលាតិចណូ។ អ្នកចូលរួមក្នុងពិព័រណ៌សៀវភៅបានបង្ហាញចំណាប់អារម្មណ៍រីករាយជាពន់ពេក ដោយសារតែវាឱកាសមួយសម្រាប់ទិញសៀវភៅដែលពួកគេចូលចិត្ត។ ក្នុងន័យនេះ ពួកគេចង់ឲ្យមានការរៀបចំកម្មវិធីបែបនេះជាប្រចាំ ក៏ដូចជាការរៀបចំបណ្ណាល័យដែលអាចចូលអានសៀវភៅឥតគិតថ្លៃ។